Սիրելի´ Մայրեր, Գեղեցիկ սեռի ներկայացուցիչներ, ԵՊՀ Իջևանի մասնաճյուղի անունից ջերմորեն շնորհավորում ենք Ապրիլի 7-ի՝ Մայրության և գեղեցկության տոնի առթիվ, մաղթում, որ միշտ լինեք սիրող ու սիրված, երջանիկ, ձեր կոչմանը արժանի՝ իսկական մայրեր, կանայք, քույրեր, աղջիկներ:
Բարությամբ, Սիրով, Գեղեցկությամբ, Մայրական գորովով ու Կանացի թովչանքով լցնեք աշխարհը…
Թանկագի՛ն մայրեր, որ Աստծո նմանակն եք մայր հողի վրա, ձեր սուրբ արգանդով է իրականացվում արարման հրաշքը, թո՛ղ Աստծո օրհնանքը միշտ ձեզ հետ լինի, դուք էլ ձեր զավակներին պատեք մայրական օրհնանքով…
Մայր` սրբություն ամենասուրբ,
Մայր` նրբություն ամենանուրբ.
Դու ամենից քնքուշ էակ,
Դու արևից ավելի տաք,
Դու արևից զորեղ արև
Այս ջերմաշունչ արևի տակ:
Ով էլ լինես և ինչ ազգի,
Ինչ հասակի ու տարիքի,
Ապրես անգամ Մարսի վրա
Կամ մի անհայտ մոլորակի,
Ամբողջ հոգով,
Ակնածանքով
Խոնարհվում եմ ես քո առաջ.
Դու` տքնություն ու վեհություն,
Դու` հավերժող անմահություն,
Դու` հայրենիք, դու` տեղ, դու` տուն,
Դու` խտացած համբերություն…
Մայր` սրբություն ամենասուրբ,
Մայր` նրբություն ամենանուրբ.
Դու` հողեղեն, դու` հրեղեն,
Դու` լուսեղեն ու անգին գանձ,
Դու մեր կողքին ապրող աստված,
Չեմ հասկանում, թե քեզ թողած,
Մարդն ինչու է նայել վերև
Ու վերևում փնտրել աստված
Եվ կուրորեն նրան պաշտել,
Երբ միայն քեզ պետք է պաշտեր:
Ո՜վ տքնություն
Ու վեհություն,
Ո՜վ հավերժող
Անմահություն
Եվ խտացած համբերություն…
