ԵՊՀ աստվածաբանության ֆակուլտետի ուսանողական գիտական ընկերությունը Պատմության ֆակուլտետի ուսանողական գիտական ընկերության հետ համատեղ 2021թ. մայիսի 6-ին կազմակերպում է աշխատաժողով՝ նվիրված անվանի հայագետ, տոմարագետ, կանոնագետ Ռաֆիկ Վարդանյանի հիշատակին:
Գիտաժողովին զեկուցումներ կարող են ներկայացվել հետևյալ թեմաներով՝
- պատմագրություն,
- ձեռագրագիտություն,
- տոմարագիտություն,
- կանոնագիտություն,
- աստվածաբանություն,
- աղբյուրագիտություն:
Կարևոր է՝ ներկայացվելիք զեկուցումների թեմաներն առնչվեն նաև Ռաֆիկ Վարդանյանի աշխատությունների քննությանը, վերլուծմանը և արժևորմանը:
Աշխատաժողովին կարող են մասնակցել ուսանողներ, ասպիրանտուրայի սովորողներ, հայցորդներ, գիտության թեկնածուներ, որոնց ներկայացվելիք թեմաներն առնչվում են վերոնշյալ բնագավառներին:
Աշխատաժողովի աշխատանքներն արդյունավետ կազմակերպելու համար կազմկոմիտեն սահմանել է հետևյալ ժամանակացույցը. մինչև սույն թվականի ապրիլի 8-ը գիտաժողովի կազմկոմիտեին պետք է ներկայացնել զեկուցման հիմնադրույթները 350-400 բառի սահմաններում՝ ներառյալ զեկուցման թեման, մասնակցի անունը և ազգանունը, ինչպես նաև այն հաստատությունը, որը ներկայացնում է զեկուցողը (անկախ հետազոտողները նույնպես կարող են մասնակցել):
Հիմնադրույթները պետք է արտացոլեն ներկայացվելիք զեկուցումը և ուսումնասիրության նպատակը:
Խնդրում ենք հիմնադրույթներն ուղարկել ssstheology.com էլ. հասցեին:
Մինչև սույն թվականի ապրիլի 25-ը դրական կարծիքներ ստացած հիմնադրույթների հեղինակները հնարավորություն կստանան ներկայացնելու իրենց զեկուցումները մայիսի 6-ին ԵՊՀ աստվածաբանության ֆակուլտետի Աճեմյան գրադարանում կայանալիք աշխատաժողովին:
Հ.Գ.: Համավարակային իրավիճակի թելադրանքով՝ գիտաժողովը կարող է անցկացվել նաև առցանց տարբերակով: Այդ մասին հետագայում կտրվեն լրացուցիչ տեղեկություններ:
Աղբյուրը` ysu.am: