«Հաջողության բանաձև». հարցազրույց ԵՊՀ ԻՄ-ի շրջանավարտ Նարեկ Վարշամյանի հետ 

 2019թ. մայիսի 7-ին հարցազրույց ունեցանք ԵՊՀ Իջևանի մասնաճյուղի՝ 2008թ. շրջանավարտ, «Տավուշի երիտասարդական կենտրոն» հասարակական կազմակերպության նախագահ, «ՍՕՍ−Մանկական Գյուղեր» ՀԲՀ-ի «Իջևան» մասնաճյուղի մանկավարժ Նարեկ Հովհաննեսի Վարշամյանի հետ:

– Խնդրում եմ՝ նշեք Ձեր ծննդյան թիվը և վայրը:

– Ծնվել եմ 1987թ. հուլիսի 31-ին Իջևանում:

– Պատմեք, խնդրում եմ, Ձեր ընտանիքի մասին:

– Հայրս Իջևանից է, մայրս՝ Արցախի Դրմբոն գյուղից։ Հայրս մասնագիտությամբ պատմաբան է, մայրս տնտեսագետ է եղել:  

Ամուսնացած եմ, ունեմ 2 դուստր: Կինս նույնպես Իջևանից է, ԵՊՀ ԻՄ-ի շրջանավարտ է՝ մասնագիտությամբ դիզայներ:

– Փոքր հասակում ի՞նչ եք երազել դառնալ:

– Մանկուց երազել եմ դառնալ բիզնեսմեն, սակայն մինչև այժմ կյանքը այլ հունով է տարել:

– Ի՞նչ կրթություն եք ստացել:

– Բակալավրական կրթությունս ստացել եմ ԵՊՀ Իջևանի մասնաճյուղում՝ ձեռք բերելով մաթեմատիկայի, ինֆորմատիկայի և մանկավարժության բակալավրի աստիճան: Մագիստրատուրան ավարտել եմ ՀՀ պետական կառավարման ակադեմիայում՝ Հանրային կառավարման ֆակուլտետում:

– Ի՞նչ դեր է խաղացել ԵՊՀ ԻՄ–ում ստացած կրթությունը Ձեր կյանքում:

– ԵՊՀ ԻՄ-ը ինձ տվել է գիտելիք, ավելին սովորելու ցանկություն: Ձեռք եմ բերել մի շարք նոր հատկանիշներ, որոնցից առանձնանցնեմ 2-ը.

1. 1. լինել պրոֆեսիոնալ, չխառնել անձնականն ու գործնականը,
2. 2. Խնդիրը լուծելիս մտածել ոչ միայն լուծման, այլև այդ լուծման գեղեցկության մասին:

– Ի՞նչ աշխատանքային փորձ ունեք:

2013 թվականից «Տավուշի երիտասարդական կենտրոն» հասարակական կազմակերպության նախագահն եմ:

2010 թ.-ից աշխատում եմ «ՍՕՍ−Մանկական Գյուղեր» ՀԲՀ-ի «Իջևան» մասնաճյուղում՝ որպես մանկավարժ:

2008-2009 թթ. աշխատել եմ Բրիտանական Կարմիր խաչում՝ որպես երիտասարդական բաժնի ղեկավարի օգնական:

– Ո՞րն է Ձեր ամենասիրելի գիրքը:

– «Գևորգ Մարզպետունի» պատմավեպը: Առհասարակ սիրում եմ պատմական իրողությունների մասին նմանատիպ գրքեր կարդալը: Կարծում եմ, որ այդպես պետք է ձևավորել արդի հայ մարդու արժեքային համակարգը:

– Ո՞րն է Ձեր կարդացած վերջին գիրքը:

– Anthony Bruno – “Seven” դետեկտիվ գիրքը: Ծանր ընթերցանություն է, սակայն այդ գիրքն ինձ առաջին հերթին հետաքրքրել է անգլերենի քերականության տեսանկյունից:

– Ի՞նչ երաժշտություն եք նախընտրում, և ո՞րն է Ձեր սիրած երգը:

– Սիրում եմ դասական երաժշտություն, ինչպես նաև արտասահմանյան փոփ և ջազ: Երաժշտությունն ինձ համար ունի որոշիչ նշանակություն: Այն ինձ համար մոտիվացիայի աղբյուր է: Ծանր որոշումներ կայացնելիս հնարավոր է երկար լսեմ Վիվալդիի 4 եղանակները: Առանձնակի համակրանք ունեմ “Vincent” (Don Mclean) երգի նկատմամբ:

– Ո՞րն է Ձեր սիրած ֆիլմը:

– Այստեղ պատասխանը միանշանակ է՝ «Մատրիցա»։

– Ունե՞ք նախընտրելի մարզաձև:

– Սիրում եմ ֆուտբոլ (երկար տարիներ երկրպագում եմ «Մանչեսթեր Յունայթեդ» ակումբին), սեղանի թենիս և մեծ թենիս, որ առաջին անգամ խաղացել և ինձ համար բացահայտել եմ 10 տարի առաջ: Մեծ թենիսն ինձ միանգամից գրավեց:

– Ո՞րն է Ձեր սիրած վայրը Հայաստանում և արտերկրում:

– Հայաստանում շատ եմ սիրում Կիրանց վանքը և իր շրջակայքը: Արտերկրում սիրած վայրերը Իռլանդիան և Շոտլանդիան են: Եթե ավելի մանրամասն պատասխանեմ, սիրում եմ քայլել Հյուսիսային Իռլանդիայի Բանգոր քաղաքի Իռլանդական ծովի ափեզրին: Սիրում եմ նաև Էդինբուրգը, որտեղ քայլելիս կարծես միջնադարում հայտնվես:

– Ո՞ր հատկանիշներն եք գնահատում մարդկանց մեջ:

– Մարդկանց մեջ միշտ գնահատել եմ ազնվությունը, անկեղծությունը և արդարության զգացումը:

– Ունե՞ք նախընտրած ասույթ կամ կարգախոս, որով առաջնորդվում եք:

– Իմ ամենանախընտրելի ասույթը Էլեոնոր Ռուզվելտի հետևյալ խոսքերն են. «Ապագան պատկանում է նրանց, ովքեր իրապես հավատում են իրենց երազանքների գեղեցկությանը»:

– Ի՞նչ երբեք չեք անի:

– Երբեք չեմ դավաճանի:

– Ինչի՞ց եք վախենում:

– Կարծում եմ՝ միակ բանը, որից մարդը պետք է վախենա և հաղթահարի, հենց վախն է ինքին:

– Ինչի՞ համար եք ափսոսում:

– Ափսոսում եմ, որ կյանքում ավելի հաճախ ռիսկի չեմ դիմել:

– Ի՞նչն է օգնում Ձեզ որոշում կայացնել դժվարին իրավիճակներում:

– Խիղճը, սկզբունքները և իրավիճակը վերլուծելու ունակությունը:

– Ի՞նչն եք համարում Ձեր կյանքի ամենամեծ ձեռքբերումը:

– Կյանքիս ամենամեծ ձեռքբերումը ընտանիքս է: Հատկապես ամենադժվար իրավիճակներում մշտապես ունեցել եմ ընտանիքիս աջակցությունը, նույնսիկ երբ հաջողելու հավանականությունը շատ փոքր էր:

– Ո՞րն է  հաջողության հասնելու Ձեր բանաձևը:

– Անել ուժերիդ առավելագույնի չափով՝ հավատալով, որ կհասնես հաջողության:

– Ո՞րն է Ձեր ստացած ամենաթանկ խորհուրդը:

– Ցանկացած բան անելու համար ընդամենը պետք է սկսել գործել, քայլ անել:

– Ո՞րն է այն հիմնական խորհուրդ–պատգամը, որ Դուք կտաք երիտասարդներին (մասնավորապես՝ ԵՊՀ ԻՄ-ի ուսանողներին):

– Մի՛ վախեցեք սխալվելուց, սիրելի՛ ուսանողներ, քանզի չի սխալվում նա, ով ոչինչ չի անում: Արե՛ք, փորձե՛ք և միանշանակ կհաջողեք:

– Շնորհակալ ենք հետաքրքիր հարցազրույցի համար:

 

Հարցազրույցը վարեց ԵՊՀ ԻՄ-ի հասարակայնության հետ

կապերի և մամուլի պատասխանատու Հասմիկ Վանյանը: