Երևանի պետական համալսարանի Իջևանի մասնաճյուղ

Monthly Archives: May 2013

Հայոց լեզվի և գրականության ամբիոնի դասախոսները երիտասարդ գրականագետների հանրապետական գիտաժողովում

2013թ. մայիսի 23-25-ը Տավուշի մարզի  Զիկատար բնապահպանական-ուսումնական կենտրոնում անցկացվեց երիտասարդ գրականագետների հանրապետական գիտաժողով, որը կազմակերպվել էր ՀՀ ԳԱԱ Մ.Աբեղյանի անվան գրականության ինստիտուտի և Հայաստանի գրողների միության համատեղ ջանքերով:

Գիտաժողովին մասնակցում էին ԵՊՀ ԻՄ-ի հայոց լեզվի և գրականության ամբիոնի դասախոսներից ՀԳՄ անդամ, բան. գիտ. թեկն. Ա.Հասանյանը, Վ.Աղաբաբյանը և Հ.Վանյանը:

Ներկա էին Հայաստանի գրողների միության նախագահ Լ.Անանյանը, Մ.Աբեղյանի անվան գրականության ինստիտուտի տնօրեն, բան. գիտ. դոկտոր, պրոֆեսոր Ա.Իսահակյանը, բան. գիտ. դոկտոր, պրոֆեսոր Զ.Ավետիսյանը, Վ.Դևրիկյանը, Վ.Ղազարյանը, Հր. Սարիբեկյանը, Տավուշի մարզպետ Ա.Ղուլարյանը, փոխմարզպետ Լ.Սարգսյանը, Կողբի գյուղապետ Ա.Աբովյանը, գրող Ս.Բեգլարյանը, գրող և նկարիչ Զ.Պետրոսյանը, դպրոցների տնօրեններ, ուսուցիչներ, աշակերտներ և այլք:

Գիտաժողովը բացեցին Լ.Անանյանը, Ա.Իսահակյանը և Ա.Ղուլարյանը` ողջունելով նման լուրջ գիտական միջոցառման անցկացումը սահմանային մարզում` Տավուշ աշխարհի չքնաղ բնության գրկում:

Հետաքրքիր ու բազմաբնույթ զեկուցումներով գիտաժողովի առաջին օրը հանդես եկան`

  1. Անի Եղիազարյանը («Թումանյանը Խաքանիի քառյակների թարգմանիչ»),
  2. Հասմիկ Վանյանը («Ավետիք Իսահակյանի լեգենդների ու զրույցների խոհափիլիսոփայությունը»),
  3. Անի Առաքելյանը («Երկու վեպ, երկու հայացք /Չարենց և Շահնուր/»),
  4. Նարեկ Սուքիասյանը («Եղիշե Չարենց-Գարսիա Լորկա գրական առնչություններ»),
  5. Լիլիթ Թունյանը («Գեղարվեստական ժամանակի ու տարածության դրսևորման ձևերը Համաստեղի արձակում»):

Երկրորդ օրվա I նիստին զեկուցումներ կարդացին`

  1. Տաթև Հարությունյանը («Նագիհ Մահֆուզի «Հայելիներ» վեպի առանձնահատկությունները»),
  2. Կարինե Հարությունյանը («Մտքի երկրորդ կողմը Հ.Էդոյանի «Քայլեր և ստվերներ» ժողովածուում»),
  3. Անի Գալստյանը («Ճշգրիտ երևակայություն. Էդգար Պոյի «Տրամաբանական» նովելը»),
  4. Լաուրա Գևորգյանը («Հայրենիքի ընկալման նորօրյա երանգները իրանահայ ժամանակակից պոեզիայում»):

II նիստին զեկուցումներ կարդացին`

  1. Ալիսա Հասանյանը(«Սամվել Բեգլարյան. ստեղծագործական ակնարկ»),
  2. Ուլյանա Կոստանյանը («Գյուղաշխարհի անդառնալի փլուզման դրաման Մաթևոսյանի արձակում»),
  3. Լուսինե Ասլանյանը («Հոգևոր և մարմնական սիրո արտացոլումը «Բանաստեղծը և կինը» վիպակում»),
  4. Հովհաննես Բեյլերյանը («Պահքի շրջանի առակների մեկնությունը»),
  5. Մարինե Մկրտչյանը («Զորի Բալայանի «Օջախ»-ի գաղափարական հիմքը և աղերսները արցախյան շարժմանը»),
  6. Վահան Աղաբաբյանը («Ս.Խանզադյանի «Կորած արահետներ» պատմվածաշարը»):Յուրաքանչյուր զեկուցումից հետո ծավալվեց ակտիվ բանավեճ-քննարկում:

Ներկայացված բովանդակալից զեկուցումների կապակցությամբ իրենց տպավորություններն արտահայտեցին ուսուցիչներն ու դպրոցների տնօրենները, մասնավորապես` Բերդավանի դպրոցի տնօրեն Արևիկ Ասատրյանը:

Երիտասարդ գրականագետների հանրապետական գիտաժողովի մասնակիցների զեկուցումները Հայաստանի գրողների միության նախագահ Լ.Անանյանի կողմից երաշխավորվեցին առանձին գրքով տպագրության:

Իրանի Իսլամական Հանրապետության դեսպանի այցը ԵՊՀ Իջևանի մասնաճյուղ

2013թ. մայիսի 21-ին պաշտոնական այցով Տավուշի մարզում էր Իրանի Իսլամանական Հանրապետության արտակարգ և լիազոր դեսպան Մոհամմադ Ռեյիսը: Նրան ուղեկցում էր տնտեսական հարցերով խորհրդական Ռըզա Մուստաֆան:

Մարզպետարանում տեղի ունեցած ընդունելությունից հետո Տավուշի մարզպետ Արմեն Ղուլարյանի, փոխմարզպետներ Լևոն Սարգսյանի, Վահե Վարդապետյանի, մարզպետի խորհրդական Լյուբիկ Չիբուխչյանի, ինչպես նաև Իջևանի քաղաքապետ Վարդան Ղալումյանի ուղեկցությամբ հյուրերն այցելեցին ԵՊՀ Իջևանի մասնաճյուղ:

Նախ նրանք հանդիպում ունեցան մասնաճյուղի տնօրեն Ս.Առաքելյանի հետ, այնուհետև այցելեցին Կիրառական արվեստի ֆակուլտետ, ծանոթացան ուսանողների ավարտական աշխատանքներին:

Քննարկվեցին կրթության բնագավառում համագործակցելու վերաբերյալ մի շարք հարցեր: Դեսպանը խոստացավ օժանդակել մասնաճյուղին՝ ստեղծելու պարսկերենի ուսուցման ժամանակակից կենտրոն:

Մոհամմադ Դեյիսը և նրան ուղեկցողներն իրենց հիացմունքն արտահայտեցին Կիրառական արվեստի ֆակուլտետի ուսանողների աշխատանքների կապակցությամբ, իրենց տպավորությունները գրի առան տպավորությունների մատյանում:

            Վերջում ԵՊՀ Իջևանի մասնաճյուղի կողմից Իրանի Իսլամանական Հանրապետության արտակարգ և լիազոր դեսպանին նվիրվեց նախորդ տարիների ավարտական աշխատանքներից մեկը:

«Գրքի բանկ»-ը ԵՊՀ ԻՄ-ի ՈՒԳԸ-ին տրամադրել է ավելի քան 600 գիրք

2013թ. մայիսի 20-ին «Գրքի բանկ»-ը ԵՊՀ Իջևանի մասնաճյուղի ուսանողական գիտական ընկերությանը տրամադրեց 130 գիրք, իսկ մեկ ամիս առաջ տրամադրել էր 500-ից ավելի գիրք:

«Գրքի բանկ»-ը նախաձեռնել է «Ֆլեշմոբ Դիվիզիա» երիտասարդական ՀԿ-ն՝ «Երևանը գրքի համաշխարհային մայրաքաղաք» ծրագրի շրջանակներում: «Գրքի բանկ»-ի նպատակն է ամրապնդել գիրք նվիրելու  մշակույթը Հայաստանում, հասարակությանը մասնակից դարձնել համայնքային զարգացմանը, աջակցել համայնքային գրադարաններին։

Այս ուսումնական կիսամյակում մասնաճյուղի ՈՒԳԸ-ն նախաձեռնեց մարզի գյուղերի համար գրքերի հավաքագրման գործը, որին միացան մասնաճյուղի ուսանողներն ու դասախոսները և մի շարք կազմակերպություններ: Արդյունքում հավաքագրված մոտ 500 գրքերը տրամադրվեցին Խաչարձան, Աղավնավանք, Ոսկեպար, Բաղանիս, Ոսկեվան համայնքների դպրոցներին:

Ապա սկսվեց համագործակցությունը մասնաճյուղի ՈՒԳԸ-ի և «Գքրի բանկ»-ի միջև, որի արդյունքում տրամադրված ավելի քան 600 գրքերից 80-ը նվիրաբերվել է մասնաճյուղի գրադարանին, իսկ մնացածն առաջիկայում կտրամադրտվի Տավուշի մարզի մի շարք համայնքների գրադարաններին և դպրոցներին:

Իջևանում կստեղծվի մոբայլ ծրագրավորման կենտրոն

2013թ. մայիսի 20-ին ԵՊՀ Իջևանի մասնաճյուղի բնական գիտությունների ֆակուլտետի մասնագիտական համակարգչային լաբորատորիայում տեղի ունեցավ «Մոբայլ Ծրագրավորման Կենտրոն Իջևան» նախագծի համակարգող Արեգ Պետրոսյանի հանդիպումը մասնաճյուղի ուսանողների և շրջանավարտների հետ: Նա ներկայացրեց ծրագրի մանրամասները:

Նախագիծը նպատակ ունի Իջևանում զարգացնել մոբայլ ծրագրավորումը և Իջևանի երիտասարդության համար տեղում լավ աշխատանք գտնելու հնարավորություն ստեղծել:

Նախագիծը բաղկացած է 3 մասից.

  • Ծրագրավորման, դիզայնի և անգլերենի երկամյսա դասընթաց (հուլիս-օգոստոս),
  • 10-ամսյա աշխատանքային պրակտիկա,
  • Մոբայլ ծրագրավորման կազմակերպության ստեղծում և լավագույն մասնակիցներին աշխատանքով ապահովում:

Առաջիկայում տեղի կունենա հերթական հանդիպումը նախագծին մասնակցելու շահագրգիռ անձանց հետ, որի ժամանակ ներկա կլինեն նաև նախագծի դոնոր կազմակերպությունների ներկայացուցիչները:

Մասնակցելու համար ցանկացողները կարող են գրանցվել այստեղ՝ http://mpcijevan.wordpress.com/register/:

ԵՊՀ հավատարմագրման գործընթացը միջազգային փորձագետների ուշադրության կենտրոնում է

ԵՊՀ հավատարմագրման գործընթացը միջազգային փորձագետների ուշադրության կենտրոնում է:
2013 թ-ի հունիսի 17-ին և 18-ին միջազգային փորձագիտական խումբը հավատարմագրման նպատակով կայցելի ԵՊՀ` համալսարանում կրթության որակի ապահովումը և որակի մշակույթն ուսումնասիրելու համար: Այցի ընթացքում խումբը հարցազրույցներ կունենա ԵՊՀ տարբեր ստորաբաժանումների ներկայացուցիչների խմբերի հետ:

ԵՊՀ բոլոր ուսանողներին և աշխատակիցներին հնարավորություն է ընձեռվում մասնակցելու «դյուրացված» բաց քննարկումներին: Նրանք կարող են ներկայացնել ցանկացած խնդիր: Տեղեկատվության գաղտնիությունն ապահովված է, սակայն փորձագիտական խումբը տեղեկատվությունը կօգտագործի միայն գնահատման նպատակներով և չի կարող լուծումներ առաջադրել կամ որոշումներ ընդունել առանձին անձանց խնդիրների վերաբերյալ:

Փորձագիտական խմբի ղեկավարն է պրոֆեսոր Վան Քեմպը (NVAO փորձագետ, Նիդեռլանդներ), իսկ անդամներն են` պրոֆեսորներ Յան Կիյնը (NVAO փորձագետ, Նիդեռլանդներ), Յուրի Սուվարյանը (Գիտությունների ազգային ակադեմիա), Արա Ամիրյանը (Հայկական պետական ագրարային համալսարան) և ուսանողուհի Զարուհի Սարգսյանը (Գլաձոր համալսարան): Որակի ապահովման ազգային կենտրոնի (ՈԱԱԿ) համակարգողներն են Սուսաննա Կարախանյանը և Անի Մկրտչյանը:

Վերոնշյալ օրերին փորձագիտական խմբի հետ հանդիպելու համար պետք է նախապես գրանցվել: Այդ նպատակով կարող եք կապ հաստատել ՈԱԱԿ-ի համակարգողներ Սուսաննա Կարախանյանի (s.karakhanyan@anqa.am) և Անի Մկրտչյանի հետ (ani.mkrtchian@gmail.com):

Անուն-ազգանունը, ֆակուլտետն ու կրթական ծրագիրը նշելուց բացի` պետք է նաև հակիրճ ներկայացնել այն թեման, որի մասին խոսվելու է: Գրանցման վերջնաժամկետն է 2013 թվականի հունիսի 14-ը: Փորձագիտական խմբի հետ հանդիպումը կտևի առավելագույնը 10 րոպե:

ԵՊՀ-ն կտրամադրի փորձագիտական այցի մանրամասները, իսկ ինստիտուցիոնալ հավատարմագրման նպատակով կազմված ԵՊՀ ինստիտուցիոնալ ինքնագնահատման զեկույցի նախագծի ամբողջական տարբերակը կարող եք կարդալ այստեղ:

12345678

Հայտարարություն

Նորություններ