2013թ. մայիսի 14-16-ը Իջևանում անցկացվեց Անդրանիկ Մարգարյանի հիշատակին նվիրված հանրապետական սիրողական 2-րդ մրցաշարը, որին մասնակցում էին 8 թիմ («Երևան», «ԵՊՀ Իջևանի մասնաճյուղ», «Չարենցավան», «Արթիկ-Մարալիկ», «Ալավերդի», «Նոյեմբերյան», «Ալաշկերտ-Մարտունի» և «Նիկարմ» ֆուտբոլային ակումբի պատանիների թիմը): ԵՊՀ ԻՄ-ի ֆուտբոլի հավաքականը դուրս եկավ եզրափակիչ փուլ:

Մայիսի 16-ին Իջևանի «Արնար» մարզադաշտում տեղի ունեցավ մրցաշարի եզրափակիչ հանդիպումը` «ԵՊՀ Իջևանի մասնաճյուղ» – «Երևան»:

Խաղն ավարտվեց Երևանի թիմի հաղթանակով:

Հաջորդեց պարգևատրման արարողությունը:

ԵՊՀ Իջևանի մասնաճյուղի թիմին գավաթն ու արծաթե մեդալները հանձնեցին հայկական ֆուտբոլի լեգենդներ Սամվել Պետրոսյանն ու Լևոն Յաբլուկյանը:

Երևանի թիմին պարգևատրեցին ԵՊՀ ԻՄ-ի տնօրեն Սամվել Առաքելյանը և «Նիկարմ»  ֆուտբոլային ակումբի նախագահ Արմեն Խաչատրյանը:

Մրցաշարում լավագույններ ճանաչված դարպասապահ Կարեն Մելիքբեկյանը («Նիկարմ»-97), պաշտպան Գարիկ Զիլաբյանը («ԵՊՀ Իջևանի մասնաճյուղ»), կիսապաշտպան Աշոտ Գասպարյանը («Չարենցավան»), հարձակվող Նարեկ Մակարյանը, ռմբարկու Մաթևոս Երեմյանը, մարզիչ Լևոն Յաբլուկյանը («Երևան») պարգևատրվեցին պատվոգրերով, հուշանվերներով ու գրքերով:

ԵՊՀ ԻՄ-ի տնօրեն Սամվել Առաքելյանը և Հայաստանի պետական տնտեսագիտական համալսարանի ռեկտոր Կորյուն Աթոյանը մրցաշարի անցկացմանն աջակցելու համար պարգևատրվեցին «Նիկարմ»  ֆուտբոլային ակումբի շնորհակալագրերով:

  2013թ. մայիսի 15-ին ԵՊՀ ԻՄ-ի բնական գիտությունների ֆակուլտետի ՈՒԳԸ-ի նախաձեռնությամբ անցկացվեց մաթեմատիկայի օլիմպիադա:

Օլիմպիադային մասնակցեցին մասնաճյուղի «Կիրառական մաթեմատիկա և ֆիզիկա» և «Տնտեսագիտության տեսություն» մասնագիտությունների առաջին կուրսերի շուրջ 10 ուսանողներ:

Խնդիրները վերաբերում էին գլխավորապես առաջին կուրսում նախատեսված «Մաթեմատիկական անալիզ», «Վերլուծական երկրաչափություն և գծային հանրահաշիվ»  դասընթացներին, ինչպես նաև կային տրամաբանության վրա հիմնված առաջադրանքներ:

Ուսանողներն առաջին անգամ էին մասնակցում բուհական օլիմպիադայի և ծանոթ չէին խնդիրների բարդությանը և լուծման տրամաբանաությանը. դրանով է պայմանավորված միավորների ոչ այնքան գոհացուցիչ լինելը: Սակայն այս օլիմպիադան հիմք կդառնա հետագայում կազմակերպվելիք օլիմպիադաներին ավելի լավ հանդես գալու համար:

2013թ. մայիսի 15-ին ԵՊՀ Իջևանի մասնաճյուղում տեղի ունեցավ «Եկամտային հարկի մասին» ՀՀ օրենքի և աշխատանքային օրենսդրության դրույթների կիրարկման վերաբերյալ սեմինար-խորհրդատվություն:

Սեմինարը վարում էին «Աշխատանքի պետական տեսչության Տավուշի մարզի տարածքային կենտրոն»-ի գլխավոր և առաջատար մասնագետներ Մեսրոպ Մխիթարյանը և Դավիթ Վիրաբյանը:

Մասնակցում էին Հաշվապահության ու Պետական գնումների, նյութամատակարարման և պահեստավորման բաժինների աշխատակիցները:

Սեմինարի ընթացքում քննարկվեցին աշխատանքի ընդունման մասին անհատական իրավական ակտի բովանդակության, աշխատանքային պայմանագրի կնքման կարգի, արձակուրդների տրամադրման և վճարման կարգի, հավելյալ վճարների մասին հարցեր:

2013թ. մայիսի 13-14-ին «Հասարակություն առանց Բռնության» ՀԿ-ի կողմից անցկացվեց երկօրյա քաղաքացիական սեմինար` «Կին-խաղաղարարների դերի բարձացումը կոնֆլիկտային իրավիճակներում. Սևազգեստ կանանց շարժման հզորացումը Հայաստանում» ծրագրի շրջանակներում:

Սեմինարը վարում էր «Հասարակություն առանց Բռնության» ՀԿ-ի ներկայացուցիչ Անուշ Խաչատրյանը, մասնակցում էին Հումանիտար գիտությունների և Տնտեսագիտության ֆակուլտետների ուսանողուհիներ:

Քաղաքացիական սեմինարի նպատակը մարզի երիտասարդ կանանց ու աղջիկների տեղեկացվածության մակարդակի բարձրացումն էր խաղաղության, կոնֆլիկտի տեսակների, դրա լուծման տարբերակների, ինչպես նաև այդ գործընթացներում կնոջ դերի բարձրացման մասին:

Մասնակիցները ձեռք բերեցին ինչպես տեսական գիտելիքներ, այնպես էլ գործնական հմտություններ` դերային խաղեր, խմբային աշխատանքներ կազմակերպելու համար:

Սեմինարի ընթացքում ծավալվեց բուռն քննարկում, մասնակից ուսանողուհիները փոքրիկ ներկայացումների միջոցով դրսևորեցին ստացած գիտելիքներն ու հմտությունները:

Նմանատիպ դասընթացները նպաստում են հասարակության մեջ կնոջ դերի բարձրացմանը: