Երևանի պետական համալսարանի Իջևանի մասնաճյուղ

Monthly Archives: May 2013

Անհատական ցուցահանդեսի բացումը

2013թ. մայիսի 13-ին Իջևանի քաղաքային պատկերասրահում տեղի ունեցավ ԵՊՀ Իջևանի մասնաճյուղի կիրառական արվեստի ֆակուլտետի 3-րդ կուրսի ուսանողուհի Շուշան Բաղդասարյանի ստեղծագործությունների անհատական ցուցահանդեսի բացումը: Ցուցահանդեսը կրում է «Տավուշի գույները» խորագիրը:

Ներկա էին Տավուշի մարզպետ Ա.Ղուլարյանը, ԵՊՀ Իջևանի մասնաճյուղի տնօրեն Ս.Առաքելյանը, ԵՊՀ ԻՄ-ի վարչական և պրոֆեսորադասախոսական անձնակազմի անդամներ, ուսանողներ, Իջևանի քաղաքային իշխանությունների ներկայացուցիչներ, Աղավնավանքի գյուղապետ Վ.Ներսիսյանը, քաղաքացիներ:

Բացման խոսքով հանդես եկավ մասնաճյուղի տնօրենը՝ նշելով, որ աստիճանաբար իրականանում է Իջևանը մշակութային քաղաք դարձնելու երազանքը: Իջևանում ուսանողական առաջին ցուցահանդեսի կապակցությամբ նա շնորհավորեց և շնորհակալություն հայտնեց Շուշանին, նրա դասախոսներին ու ծնողներին:

Շուշան Բաղդասարյանին շնորհավորեցին նաև Տավուշի մարզպետ  Ա.Ղուլարյանը, Աղավնավանքի գյուղապետ Վ.Ներսիսյանը, մասնաճյուղի դասախոս, արվեստագետ Լ.Լաչիկյանը, Մ.Ստեփանյանը, Իջևանի քաղաքապետարանի մշակույթի բաժնի վարիչ Լ.Ղալումյանը:

Ցուցահանդեսում ներկայացված է շուրջ 100 աշխատանք:

«Տավուշի գույները» խորագրով ցուցահանդեսը կգործի երկու շաբաթ:

Գիտաժողով Հումանիտար գիտությունների ֆակուլտետում

2013թ. մայիսի 10-ին ԵՊՀ Իջևանի մասնաճյուղի հումանիտար գիտությունների ֆակուլտետում տեղի ունեցավ ուսանողական գիտաժողով, որին մասնակցում էին ֆակուլտետի տարբեր մասնագիտությունների 7 ուսանողներ:

Ներկա էին ոչ միայն Հումանիտար գիտությունների, այլև մյուս ֆակուլտետների  ուսանողներ:

Գիտական զեկուցումներով հանդես եկան.

1.Աննա Ադամյանը, Մ/Հ IV («Շիզոֆրենիայի պատճառագիտությունը և ախտաբանությունը»),

2.Լիլիթ Բաբլումյանը, Մ/Հ IV («Տղամարդու և կնոջ հոգեֆիզիոլոգիական տարբերությունները»),

3.Նաթելա Օրդինյանը, Մ/Հ IV («Չլուծված կոնֆլիկտների հետևանքները նևրոտիկի մոտ. սադիստական թեքումներ»),

4.Մարիամ Բուդուրյանը, Մ/Հ IV («Ծխելու հոգեբանական և ֆիզիկական կախվածությունների առանձնահատկությունները»),

5.Գոհար Գրիգորյանը, ՀԼ/Գ I («Տեսիլը որպես գրական մտածողություն 5-րդ դարի մատենագրության մեջ»),

6.Ռիմա Հովսեփյանը, ՀԼ/Գ I («Խոսք Ակսել Բակունցի մասին»),

7.Էդիտա Բեկնազարյանը, ՀԼ/Գ I («Տերյանի պոեզիայի երկրային ակունքները և սիրո վեպը»):

Գիտաժողովն անցավ ակտիվ քննարկումներով:

Հաղթանակի և խաղաղության օրը

2013թ. մայիսի 9-ին ԵՊՀ Իջևանի մասնաճյուղի վարչական և պրոֆեսորադասախոսական անձնակազմի անդամները, ուսանողներ այցելեցին Հայրենական Մեծ պատերազմի հուշահամալիր:

Իրենց հարգանքի տուրքը մատուցելու էին եկել նաև Իջևանի քաղաքային իշխանությունների ու տարբեր կազմակերպությունների ներկայացուցիչներ, Իջևանի զորամասի զինվորներ, քաղաքի բնակիչներ: Նրանք զինվորական երաժշտախմբի ուղեկցությամբ շարժվեցին հուշահամալիր, ծաղիկներ դրեցին պատերազմում զոհվածների հիշատակին:

Հուշահամալիրի մոտ երաժշտախումբը հնչեցրեց տոնական երաժշտություն, ապա ելույթ ունեցան  ԵՊՀ ԻՄ-ի վարչական անձնակազմի և Իջևանի քաղաքային իշխանությունների ներկայացուցիչներ:

Երկու գիտաժողով Բնական գիտությունների ֆակուլտետում

2013թ. մայիսի 2-ին և 3-ին ԵՊՀ ԻՄ բնական գիտությունների ֆակուլտետում տեղի ունեցան ուսանողական գիտաժողովներ:

Ներկա էին ֆակուլտետի դեկանը, դասախոսներ, ուսանողներ:

Առաջին օրը զեկուցումներով հանդես եկան «Կիրառական մաթեմատիկա և ֆիզիկա» մասնագիտության ուսանողները.

1. Սիրուշ Ալիփյան, ԿՄ/Ֆ 3-րդ («Աղմուկի վնասակար ազդեցությունը և նվազեցման միջոցները»)

2. Հերմինե Ալիխանյան, ԿՄ/Ֆ 1-ին («Էյլերի ինտեգրալներ»),

3. Սրբուհի Փարսադանյան, ԿՄ/Ֆ 1-ին («Գազի մոլեկուլների բաշխումը: Մաքսվելի բաշխում»)

4. Սոնա Ղևոնդյան, ԿՄ/Ֆ 1-ին («Ֆունկցիաների ուռուցիկության պայմանը»):

Երկորդ օրը զեկուցումներ կարդացին «Բնապահպանություն և բնօգտագործում» մասնագիտության ուսանողները.

1. Մերի Ամիրզյան, Բ/Բ 3-րդ («Միջավայրի գործոնների ազդեցությունը Իջևան քաղաքի Աղստև գետի ափամերձ շրջաններում ծառաբույսերի տեսակային կազմի ձևավորման վրա»),

2. Մալվինա Էվինյան, Բ/Բ 3-րդ («Խմելու ջրի ջրաքիմիական ցուցանիշների որոշումը դեղանյութերի օգնությամբ»),

3. Մերի Ամիրզյան, Բ/Բ 3-րդ («ՀՀ «Կարմի գրքում» գրանցված արժեքավոր և անհետացող ծառաբույսերի առանձին տեսակերի պահպանության հիմնախնդիրները Տավուշի մարզի «Զիկատար» պետական արգելավայրում»),

4.Մալվինա Էվինյան, Բ/Բ 3-րդ  («Սպիտակուցների կառուցվածքը և ֆունկցիաները»):

ԳԱԱ պատմության ինստիտուտի տնօրեն Ա.Մելքոնյանի այցը ԵՊՀ Իջևանի մասնաճյուղ

2013թ. մայիսի 3-ին ԵՊՀ Իջևանի մասնաճյուղ այցելեց  ԳԱԱ պատմության ինստիտուտի տնօրեն, պատմ. գիտ. դոկտոր, պրոֆեսոր Աշոտ Մելքոնյանը:

Մասնաճյուղի նիստերի դահլիճում տեղի ունեցավ վաստակավոր պատմաբանի հանդիպումը ԵՊՀ ԻՄ-ի վարչական, պրոֆեսորադասախոսական անձնակազմի ներկայացուցիչների և ուսանողների հետ:

Նախ  մասնաճյուղի տնօրեն Ս.Առաքելյանը ողջունեց պատվավոր հյուրին և ընդհանուր գծերով ներկայացրեց վաստակավոր պատմաբանի անցած ուղին:

Այնուհետև Ա.Մելքոնյանը ներկայացրեց Հայոց ցեղասպանության վերաբերյալ իր հայացքները` կուռ տրամաբանությամբ քննադատության ենթարկելով հայոց պատմության կեղծարարներին և հատկապես թուրք-ադրբեջանական պատմաշինարարներին:

«Մենք պետք է նահանջենք ճանաչումից, որն արդեն իրողություն է: Անհրաժեշտ է խոսել հատուցման մասին»,- նշեց նա: Ա. Մելքոնյանը մատաղ սերնդին կոչ արեց լինել հաստատակամ և նպատակասլաց` հայրենիքի առջև ծառացած խնդիրները լուծելու համար:

Անվանի պատմաբանը նաև պատասխանեց ներկաների հարցերին:

ԵՊՀ ԻՄ-ի տնօրենը նրան շնորհակալություն հայտնեց հետաքրքիր և բազմաբովանդակ վերլուծության համար` ակնկալելով, որ նման հանդիպումները կլինեն շարունակական:

Վերջում Ա.Մելքոնյանը մասնաճյուղի գրադարանին նվիրեց իր նոր տպագրված «Հայոց պատմության դասերն ու պատգամները» գիրքը:

12345678

Հայտարարություն

Նորություններ