2013թ. հոկտեմբերի 12-ին ԵՊՀ Իջևանի մասնաճյուղում «Կրթական ծրագրերի մշակման հիմունքներ» դասընթացի շրջանակներում տեղի ունեցավ հերթական դասը, որը վարում էր Հումանիտար գիտությունների ֆակուլտետի մանկավարժության և հոգեբանության ամբիոնի վարիչի պաշտոնակատար, մ.գ.թ., դոցենտ Վ.Բրուտյանը:

Դասընթացը նախատեսված է պրոֆեսորադասախոսական անձնակազմի որակավորման բարձրացման ծրագրով: Նպատակն է ուսանողակենտրոն ուսուցման պահանջներին համապատասխան` դասընթացի ծրագրի կառուցումը, նպատակների և կրթական արդյունքների ձևակերպումը:

Կրթական ծրագրերի մշակման գործում կարևորվում են առարկայի ուսուցման ավարտին ակնկալվող արդյունքները, գնահատման գործիքները և ընթացակարգերը, ուսուցման միջոցները, ուսանողների ինքնուրույն, ստեղծագործական և հետազոտական աշխատանքների բովանդակությունը և այլն:

2013 թվականի հոկտեմբերի տասնմեկին  Երևանի պետական համալսարանի Իջևանի մասնաճյուղում տեղի ունեցավ սպորտլանդիայի մասնաճյուղային առաջնություն:

Առաջնությանը մասնակցում էին Երևանի պետական համալսարանի Իջևանի մասնաճյուղի բնական գիտությունների, տնտեսագիտության, հումանիտար գիտությունների և կիրառական արվեստի ֆակուլտետների առաջին և երկրորդ կուրսերի ուսանողները (ութ թիմ):

Խաղերն անցկացվեցին օլիմպիական ձևով:

Եզրափակիչ դուրս եկան Բնական գիտություների ֆակուլտետի “Ինֆորմատիկա և կիրառական մաթեմատիկա” և Կիրառական արվեստի ֆակուլտետի “Կիրառական արվեստ” մասնագիտությունների առաջին կուրսերի թիմերը:

Երեք – զրո հաշվով հաղթեցին “Ինֆորմատիկա և կիրառական մաթեմատիկա” մասնագիտության առաջին կուրսի ուսանողները:

2013թ. հոկտեմբերի 10-ին Երևանի պետական համալսարանի Իջևանի մասնաճյուղի կիրառական արվեստի ֆակուլտետի դահլիճում տեղի ունեցավ «Ոսկե աշուն» խորագրով տոնական միջոցառումը, որը նախաձեռնել էին Կիրառական արվեստի և Բնական գիտությունների ֆակուլտետների ուսանողական խորհուրդները՝ ուսանողների հետ համատեղ:

Միջոցառմանը ներկա էին ԵՊՀ Իջևանի մասնաճյուղի տնօրեն Ս.Առաքելյանը, ֆակուլտետների դեկանները, դասախոսներ, ուսանողներ:

Միջոցառման ընթացքում մասնակիցները հանդես եկան համերգային ծրագրով (ասմունք, երգ, պար):

2013թ. հոկտեմբերի 5-ին ՀՀ բնապահպանության նախարարության «Զիկատար» ՊՈԱԿ-ի տնօրեն, ԵՊՀ ԻՄ-ի անտառագիտության ամբիոնի դոցենտ, կենսաբանական գիտությունների դոկտոր Անդրանիկ Ղուլիջանյանի ուղեկցությամբ մասնաճյուղ այցելեցին անտառագետներ, կենսաբանական գիտությունների դոկտորներ Կարեն Տեր-Ղազարյանը և Ալբերտ Դումիկյանը:

Կարեն Տեր-Ղազարյանը Կալիֆորնիայի համալսարանի անտառային փորձագետ է: Ալբերտ Դումիկյանը 1988-1993թթ. աշխատել է  Խաբարովսկի երկրամասի «Բուրեինյան»   պետական արգելոցում՝  որպես գիտական գծով փոխտնօրեն: 1993-2012թթ. եղել է «Բուրեինյան»  պետական արգելոցի տնօրեն: 2012թ. վերադարձել է հայրենիք:

Այցի նպատակն էր հանդիպել ԵՊՀ ԻՄ-ի բնական գիտությունների ֆակուլտետի ուսանողների և պրոֆեսորադասախոսական անձնակազմի հետ, կիսվել իրենց առաջավոր փորձով:

Կարեն Տեր-Ղազարյանը ուսանողների շրջանում անցկացրեց հետաքրքիր մրցույթ-խաղ, որի նպատակն էր պարզել երիտասարդների տեսակետները և առաջարկները անտառտնտեսության զարգացման խնդիրների վերաբերյալ:

Խաղի մասնակիցները նախապես բաժանված թերթիկների վրա գրեցին իրենց տեսակետներն ու առաջարկները, այնուհետև հերթով ներկայացրին դրանք: Խաղի հաղթողները որոշվեցին ժյուրիի կողմից, որի անդամներն էին Անդրանիկ Ղուլիջանյանը, Կարեն Տեր-Ղազարյանը և Ալբերտ Դումիկյանը:

I և II մրցանակային տեղերի համար ընտրվեցին երկուական մասնակիցներ:

I տեղը գրավեցին «Բնապահպանություն և բնօգտագործում» մասնագիտության IV կուրսի ուսանողուհի Մերի Ամիրզյանը և «Կիրառական մաթեմատիկա և ֆիզիկա» մասնագիտության IV կուրսի ուսանողուհի Դիանա Վանեսյանը:

II տեղը զբաղեցրին «Կիրառական մաթեմատիկա և ֆիզիկա» մասնագիտության IV կուրսի ուսանողներ Մելինե Մելիքյանը և Արթուր Մարդանյանը: Խաղի հաղթողները ստացան մրցանակներ:

Ալբերտ Դումիկյանը ներկայացրեց զեկուցում՝ Ռուսաստանում արգելոցների հիմնադրման պատմության և «Բուրեինյան»  պետական արգելոցի գործունեության ու արդի հիմնախնդիրների վերաբերյալ:

Հանդիպումն անցավ ջերմ ու անմիջական մթնոլորտում: