ԵՊՀ-ի մինչհամալսարանական կրթության վարչության նախաձեռնությամբ ԵՊՀ-ում և ՀՀ բոլոր մարզերում կայացած ամենամյա 8-րդ «ԵՊՀ օլիմպիադա-2016»-ին մասնակցել էին Տավուշի մարզի 32 դպրոցների ավելի քան 300 աշակերտներ:

Նրանցից 60-ն էին հաղթահարել մարզային 1-ին փուլի փորձությունը և մասնակցել  2-րդ փուլին, որն անց էր կացվել ԵՊՀ-ում:

Ամփոփելով աշխատանքների արդյունքները՝ II կարգի դիպլոմների արժանացան 4, III կարգի` 3 և գովասանագրերի 13 տավուշցի դպրոցականներ:

ԵՊՀ Իջևանի մասնաճյուղի մասնագիտական կողմնորոշման և պրակտիկայի կազմակերպման բաժնի կողմից կազմակերպվեցին հանդիպումներ բոլոր այն դպրոցներում, որոնցում սովորող դպրոցականները հաջողությամբ էին մասնակցել օլիմպիադային և ցուցաբերել բարձր արդյունքներ:

Հանդիպումների ընթացքում պատվոգրեր հանձնվեցին օլիմպիադայի ընթացքում բարձր միավորներ ստացած աշակերտներին:

Լավագույն մասնակցության և բարձր առաջադիմության համար ԵՊՀ ռեկտորի կողմից հատուկ շնորհակալագրով պարգևատրվեց Դիլիջանի ավագ դպրոցը:

Հանդիպումների ընթացքում բաժնի վարիչ Վ.Աղաբաբյանը ներկայացրեց ԵՊՀ գիտխորհրդի նոր որոշումը, ըստ որի՝ ԵՊՀ-ի ամենամյա օլիմպիադայում 1-3-րդ տեղերը զբաղեցրած աշակերտները վճարովի ուսուցման համակարգով ԵՊՀ ընդունվելու դեպքում առաջին կուրսում կստանան ուսման վարձի զեղչ՝ համապատասխանաբար 50, 40 և 30%-ով:

2016թ. ապրիլի 16-29-ը ԵՊՀ Իջևանի մասնաճյուղում անցկացվում են ավարտական աշխատանքների նախապաշտպանություններ:

Ավարտական կուրսերի ուսանողները ներկայացնում են իրենց աշխատանքների կատարողականի մասին, մինչև պաշտպանությունը մասնագիտական ամբիոնների դասախոսների կողմից ստանում համապատասխան ցուցումներ՝ բացթողումները շտկելու, պաշտպանությանն ավելի ամբողջական ձևով ու  պատշաճ ներկայանալու նպատակով:

 Առանձնակի ուշադրություն է դարձվում ավարտական աշխատանքներին ներկայացվող պահանջներին՝ թեմայի և բովանդակության համապատասխանությանը, աշխատանքի արդիականությանը, ինքնուրույնության աստիճանին, որոշակի նորամուծությանը, խնդրի խոր և համակողմանի ուսումնասիրությանը, տեսականի և գործնականի համադրությանը,  նյութի տրամաբանական շարադրանքին, ինչպես նաև աշխատանքի ներկայացման ձևին և այլն, թե որքանով են ուսանողները հետևել սահմանված չափանիշներին ու իրականացրել դրանք:

Ընդհանուր առմամբ մասնաճյուղում նախապաշտպանության փուլի համար  ավարտական աշխատանքների կատարման ընթացքը կարելի է համարել բավարար:

2016թ. ապրիլի 22-ին ՀՀ ՊՆ Իջևանի զորամասի հրամանատարը ԵՊՀ Իջևանի մասնաճյուղին նվիրեց օդամղիչ համակարգով աշխատող ուսումնական զենք՝ մասնաճյուղի ուսանողների համար ուսումնավարժական պարապմունքներ կազմակերպելու, նրանց մարտական պատրաստվածությունը բարձրացնելու նպատակով:

Նախ՝ մասնաճյուղի ուսանողները զորամասի աջակցությամբ կանցնեն կրակային պատրաստության դասընթացներ:

Ապա այդ դասընթացների արդյունքում լավ ցուցանիշներ հանդես բերած ուսանողները կմասնակցեն մարզի մասշտաբով անցկացվելիք համապատասխան մրցումներին:

Բուհ-բանակ կապն առավել սերտացնելու, ուսանողների ռազմահայրենասիրական պատրաստականությունը բարձրացնելու նպատակով նախատեսվել է Իջևանի զորամասի և մասնաճյուղի կողմից իրականացնել համատեղ միջոցառումներ:   

2016թ. ապրիլի 21-ին ԵՊՀ Իջևանի մասնաճյուղի «Տավուշ» ռազմահայրենասիրական ակումբը կազմակերպել էր հանդիպում Իջևանի ավագ դպրոցի աշակերտների հետ։

Հանդիպման նպատակն էր աշակերտների հետ  հայրենասիրության թեմայով քննարկում իրականացնելը:

Քննարկվեցին երիտասարդների մեջ հայրենասիրական ոգու բարձրացմանը, Հայոց ցեղասպանությանը, 20-ական թվականներին ծավալված «Նեմեսիս» գործողությանը, «Հայաստանի ազատագրության հայ գաղտնի բանակ» (անգլ.՝ Armenian Secret Army for the Liberation of Armenia (ASALA) կազմակերպության հիմնադրմանը և գործունեությանը վերաբերող մի շարք հարցեր:

Ակումբականները ոչ միայն ներկայացրին պատմական փաստեր, այլև իրենց ասելիքը համեմեցին մեջբերումներով՝ քաղված գրական ստեղծագործություններից, գերմանացի դիվանագետ Լ.Էյնշտեյնի, գերմանացի գիտնական Յ.Մարկվարտի, ֆրանսիացի գրողներ Ա.Ֆրասի և Ժ.Մորգանի խոսքերից։

Քննարկման ընթացքում դպրոցականները հարցեր ուղղեցին համալսարականներին, ներկայացրին իրենց ուշագրավ տեսակետներն ու մեկնաբանությունները, որոնցում զգացվում էր նրանց հայրենասիրությունը, ամեն ինչով երկրին ու նրա պատմությանը սատար կանգնելու պատրաստակամությունը:

Համալսարանականների նախաձեռնությունը խրախուսվեց ինչպես դպրոցի տնօրենի, այնպես էլ ուսուցչական անձակազմի կողմից։

ԵՊՀ ԻՄ-ի «Տավուշ» ռազմահայրենասիրական ակումբը նման հանդիպումներ է նախատեսել նաև Իջևանի վարժարանի և Տավուշի տարածաշրջանային պետական քոլեջի սաների հետ։

2016թ. ապրիլի 21-ին ԵՊՀ ԻՄ-ի բնական գիտությունների ֆակուլտետում տեղի ունեցավ «Երիտասարդության շրջանում մոտիվացիայի բարձրացման խնդիրները» թեմայով քննարկում, որը կազմակերպել էր ֆակուլտետի ՈՒԳԸ-ի նախագահ, «ԻԿՄ» մասնագիտության երրորդ կուրսի ուսանողուհի Էրինե Ղարայանը՝ Բարձրագույն մաթեմատիկայի և բնագիտության ամբիոնի վարիչ Ա.Վ.Ցուցուլյանի աջակցությամբ:

Քննարկման ընթացքում շեշտվեց, որ մոտիվացիոն ներքին և արտաքին գործոններ են, որոնք դրդում են մարդկանց իրականացնել գործողություններ՝ նպատակին հասնելու համար:

Բարձրացվեցին մի շարք հարցեր, թե ով է որակի պատվիրատուն, ինչպես բարձրացնել կրթության որակը, առանց որի անհնար է պետության զարգացումն ու առաջընթացը:

Թե՛ դասախոսները և թե՛ ուսանողներն ակտիվ մասնակցություն ունեցան քննարկմանը, ներկայացրին իրենց կարծիքներն ու տեսակետները, առաջադրեցին հարցեր և ստացան պատասխաններ: 

Քննարկումը հաջողությամբ իրականացվեց, ինչը հիմք տվեց, որ ֆակուլտետում նմանատիպ քննարկումները կրեն շարունակական բնույթ: