2016թ. ապրիլի 18-ին ԵՊՀ ԻՄ-ի բնական գիտությունների ֆակուլտետում տեղի ունեցավ բանավեճ, որը կազմակերպվել էր «Ջինիշյան» հիշատակի հիմնադրամի «Քաղաքացիական երկխոսություն և գործնական քայլեր փոփոխության համար» դրամաշնորհային ծրագրի իրականացման շրջանակներում, ուսանողական նախաձեռնող թիմի (Ալվինա Գևորգյան, Էրինե Ղարայան, Ֆլորա Խաչատրյան, Վահագն Իսախանյան, Նելլի Օրդինյան, Նարա Մարտիրոսյան) կողմից:

Ծրագրի իրականացմանն աջակցեցին մասնաճյուղի դասախոսներ, Հայոց լեզվի և գրականության ամբիոնի ասիստենտ, բ.գ.թ. Ա.Հասանյանը, Օտար լեզուների ամբիոնի դասախոս Շ.Գրիգորյանը, World Vision  ՀԿ-ի ծրագրերի համակարգող Արարատ Ալիխանյանը, բանավեճը վարեց մասնաճյուղի աշխատակից Մելինե Մելիքյանը:

Բանավեճի թեման էր «Դպրոցում ձեռք բերած գիտելիքները բավարա՞ր են արդյոք բուհ ընդունվելու համար»:    

Նախ՝ բանավեճի արվեստին տիրապետելու, ճիշտ ձևով բանավիճելու համար ֆակուլտետներում անցկացվեցին փոքրիկ սեմինար-քննարկումներ:

Այնուհետև յուրաքանչյուր ֆակուլտետից ընտրվեց մեկական թիմ և վիճակահանությամբ պարզվեցին միմյանց դեմ բանավիճող թիմերի անունները:

Եզրափակիչ փուլ անցան Կիրառական արվեստի և Բնական գիտությունների ֆակուլտետների թիմերը:

Հաղթող ճանաչվեց Բնական գիտությունների ֆակուլտետի թիմը:

Եզրափակիչ փուլ անցած թիմերը պարգևատրվեցին պատվոգրերով, իսկ հաղթող թիմին տրվեց նաև նվեր:

2016թ. ապրիլի 16-ին ԵՊՀ ԻՄ-ի Հումանիտար գիտությունների ֆակուլտետում տեղի ունեցավ «Բարի գալուստ Իջևան» ֆիլմի դիտումը:

Ֆիլմը ստեղծվել է «Ջինիշյան» հիշատակի հիմնադրամի «Քաղաքացիական երկխոսություն և գործնական քայլեր փոփոխության համար» դրամաշնորհային ծրագրի իրականացման շրջանակներում, ուսանողական նախաձեռնող թիմի կողմից:    

Ծրագրի հիմնական պատասխանատուն «Ֆրանսերեն լեզու և գրականություն» մասնագիտության երրորդ կուրսի ուսանողուհի Սյուզաննա Պետրոսյանն էր, նրան աջակցել են ԵՊՀ ԻՄ-ի ուսանողական խորհուրդը և պրոֆեսորադասախոսական անձնակազմի անդամներ:

Ֆիլմի նկարահանմանն իրենց անմիջական մասնակցություն են ունեցել մասնաճյուղի ուսանողներ, «ԱԼԳ» մասնագիտության երկրորդ կուրսի ուսանողուհի Աստղիկ Սարիբեկյանը, «ՖԼԳ» մասնագիտության երկրորդ կուրսի ուսանողուհի Մերի Գասպարյանը և «ՀԼԳ» մասնագիտության առաջին կուրսի ուսանող Վահե Առուստամյանը:

«Նպատակ ենք ունեցել նկարահանել տեսանյութ, որտեղ կներկայացվի Իջևանն իր մարդկային ռեսուրսով,  պատմամշակութային արժեքներով և բնությամբ, ինչի շնորհիվ կկարողանանք նաև նպաստել Իջևանում զբոսաշրջության զարգացմանը»,- նշեց ծրագրի պատասխանատու Սյուզաննա Պետրոսյանը:

Ֆիլմն արժանացավ համալսարանական հանդիսատեսի հավանությանը:

Կինոդիտումից հետո ծավալվեց աշխույժ քննարկում:

2016թ. ապրիլի 15-ին ԵՊՀ ԻՄ-ի  բնական գիտությունների ֆակուլտետի «Ինֆորմատիկա և Կիրառական մաթեմատիկա» մասնագիտության մի խումբ ուսանողներ՝ դասախոսների ղեկավարությամբ, ճանաչողական այց կատարեցին «Թեքնոլոջի ընդ Սայնս Դայնամիքս» ընկերություն` Մերգելյան ակումբի գործունեությանը մոտիկից ծանոթանալու նպատակով:

Այցը կազմակերպվել է ս.թ. մարտի 14-ին «Թի-Էս-Դի»  ընկերության ներկայացուցիչերի՝ ԵՊՀ Իջևանի մասնաճյուղ  կատարած այցելության ընթացքում ձեռքբերված պայմանավորվածության հիման վրա:

Ճանաչողական այցը բաղկացած էր երկու մասից: Նախ՝ մասնակիցներին ներկայացվեցին «Թի-Էս-Դի» ընկերության թողարկվող արտադրանքները («Արմթաբ», «Արմֆոն» բրենդներ և այլն), այնուհետև հոսքագիծը, որտեղ փուլ առ փուլ մշակվում է և ստացվում վերջնական պատրաստի արտադրանքը: Ուսանողները ծանոթացան սարքավորումների ապարատային և ծրագրային մշակման գործընթացներին:

Այցի երկրորդ հատվածն ուներ դասընթացի ձևաչափ: «Թեքնոլոջի ընդ Սայնս Դայնամիքս» ընկերության և «Նյու Թեքնոլոջի Էդուքեյշն Ֆոնդ»  բարեգործական հիմնադրամի աշխատակիցները, ծրագրերի ղեկավարները ներկայացրին իրենց կազմակերպությունը, նրա գործունեության հիմնական ուղղությունները, գործող «Startup»-երը, իսկ «Թի-Էս-Դի»  ընկերության հիմնադիր տնօրեն Վահան Շաքարյանը տեղեկացրեց գործարանի գործունեության, ձեռքբերումների, և ձեռնարկվող ծրագրերի մասին, փորձնական հարցազրույցի ձևով ներկաներին ուղղեց մի քանի տրամաբանական հարց: Այնուհետև ծավալվեց բուռն քննարկում:

Վ.Շաքարյանը հավելեց, որ  պատրաստ է աջակցել, ներկայանալ մասնաճյուղ և Իջևանի երիտասարդ հետազոտողների «Մերգելյան» ակումբի որոշ ուսանողների, իր իսկ ընտրությամբ, հրավիրել  մասնագիտական պրակտիկայի:

Այդ  ուսանողների ընտրության համար կանցկացվի հարցազրույց և նրանց կընտրի անձամբ ինքը: Նաև հույս հայտնեց, որ դրանով մասնաճյուղի հետ համագործակցությունը չի սահմանափակվի: Մասնաճյուղի աշխատակից Ա.Սիմոնյանի հետ ձեռքբերվեց հետագա համագործակցության պայմանավորվածություն:

Ուսանողները վերադարձան բավականին գոհ. նրանք շատ տպավորված էին ճանաչողական այցից, «Թի-Էս-Դի» ընկերության աշխատանքային գործընթացից: