2016թ. նոյեմբերի 10-ին ԵՊՀ ԻՄ-ի բնական գիտությունների ֆակուլտետում զեկուցում կարդաց «Ինֆորմատիկա և կիրառական մաթեմատիկա» մասնագիտության 2-րդ կուրսի ուսանող Սարիբեկ Սարիբեկյանը:

Ներկա էին ֆակուլտետի վարչական և պրոֆեսորադասախոսական անձնակազմի ներկայացուցիչներ, ուսանողներ:

Ս.Սարիբեկյանը ընդհանուր գծերով ներկայացրեց իր գրած ծրագիրը, որը հաշվում է n չափանի քառակուսային մատրիցի դետերմինանտը (որոշիչը), mxn չափանի մատրիցի ռանգը, nxn չափանի մատրիցի հակադարձը, գտնում մատրիցի` գծորեն անկախ տողերը:

Ապա զեկուցողը ներկայացրեց ծրագրի կոդը, շնորհանդեսի միջոցով ցույց տվեց ծրագրի  աշխատանքի արդյունքները տարբեր մուտքային տվյալների համար:

Զեկուցողին առաջադրվեցին հարցեր. ծավալվեց ակտիվ քննարկում:

2016թ. նոյեմբերի 8-ին ԵՊՀ Իջևանի մասնաճյուղում կայացավ Հումանիտար գիտությունների ֆակուլտետի գիտական խորհրդի ընդլայնված նիստ, որին մասնակցում էին ֆակուլտետի գիտխորհրդի անդամները, վարչական և պրոֆեսորադասախոսական անձնակազմի ներկայացուցիչներ, ուսանողներ:

Նիստի ընթացքում քննարկվեցին 2016-17 ուստարվա կուրսային և ավարտական աշխատանքների ընթացքին վերաբերող հարցեր, ամփոփվեցին այս ուստարվա առաջին կիսամյակի առաջին ընթացիկ քննությունների և ստուգումների արդյունքները:

Առաջին հարցի վերաբերյալ Հումանիտար գիտությունների ֆակուլտետի գիտական խորհրդի նախագահ, ֆակուլտետի դեկան, պ.գ.դ., պրոֆեսոր Ա.Ներսիսյանը մասնավորապես նշեց, որ կուրսային և ավարտական  աշխատանքների կատարման ընթացքը վերահսկվում է համապատասխան ամբիոնների և ղեկավարող դասախոսների կողմից:

Ամբիոնների կողմից կազմվել է ղեկավարների հետ հանդիպումների ժամանակացույց: Ուսանողներին տրվել է կուրսային և ավարտական աշխատանքների համար անհրաժեշտ տեսական գրականության ցանկը, հստակեցվել աշխատանքի կառուցվածքը, և այժմ աշխատանքները շարադրանքի փուլում են:

Զեկուցողը նշեց, որ մասնակի բացառություններով կուրսային և ավարտական աշխատանքների կատարման ընթացքը բավարար է: Անհրաժեշտ է ուշադրության կենտրոնում ունենալ այն ուսանողներին, ովքեր դեռևս բավարար աշխատանք չեն կատարել, հանդիպել նրանց ղեկավարներին, հարկ եղած դեպքում այդ գործում ներգրավել նաև ամբիոնի այլ դասախոսների:

Ամփոփելով 2016-17 ուստարվա առաջին կիսամյակի առաջին ընթացիկ քննությունների  և ստուգումների արդյունքները՝ խորհրդի նախագահը նշեց, որ քննաշրջանը կազմակերպվել է պատշաճ կարգով, նախապես կազմված ժամանակացույցով: Ուսանողների կողմից բարձրացված խնդիրները՝ կապված հարցաշարերի հետ, ժամանակին լուծվել են, և տարաձայնություններ չեն եղել:

Ընդգծվեց, որ ընթացիկ քննությունների և ստուգումների ճիշտ կազմակերպումը ուսանողների գիտելիքների մաս-մաս ստուգման մեխանիզմի կատարելագործման գործում ունի կարևոր դերակատարություն: Այս կիսամյակի ընթացիկ քննություններն ու ստուգումները իրականացվել են տարբեր մեթոդներով: Որոշ դասախոսներ ուսանողների գիտելիքները ստուգել են հարցը ամբողջական շարադրելու մեթոդով, իսկ ոմանք՝ քննական թեստերով: Քննական թեստերի կազմման գործում կիսամյակից կիսամյակ նկատվում է մասնագիտական կատարելագործում:

Նիստը իր ելույթով եզրափակեց մասնաճյուղի տնօրեն Ս. Ա. Առաքելյանը: Նա բավարար համարեց կատարված աշխատանքները և նշեց, որ պետք է մեծ ուշադրություն դարձնել ընթացիկ քննություններին և ստուգումներին, հետևողական լինել, որ ուսանողների գնահատականնեը հնարավորինս լիարժեքորեն արտացոլեն նրանց գիտելիքները: 

2016թ. նոյեմբերի 7-ին ԵՊՀ Իջևանի մասնաճյուղում կայացավ բազկամարտի մասնաճյուղային առաջնությունը, որի պատվավոր հյուրն էր բազկամարտի Եվրոպայի և աշխարհի չեմպիոն, մեր հայրենակից Արմեն Չապուխյանը:

Առաջնության մրցավարն էր Գեղարքունիքի մարզի բազկամարտի ֆեդերացիայի նախագահ, սպորտի վարպետ, միջազգային կարգի մրցավար Ջանիբեկ Ղազարյանը:

Բացման խոսքով հանդես եկավ ԵՊՀ ԻՄ-ի տնօրեն Ս.Ա.Առաքելյանը՝ ողջունելով բոլոր մասնակիցներին, պատվավոր հյուրերին, նշելով, որ մեզ համար մեծ պատիվ է բազկամարտի Եվրոպայի և աշխարհի չեմպիոն մեր հայրենակցի ներկայությամբ մասնաճյուղում առաջնության անցկացումը,  բազկամարտիկներին մաղթեց հաջողություններ, հաղթանակ ուժեղագույնին:

Խաղերն ընթացան երեք (65, 80, 90 կգ) քաշային կարգով:   

65 կգ քաշային կարգում առաջին տեղը գրավեց հեռակա ուսուցման համակարգի «Քարտեզագրություն և կադաստրային գործ» մասնագիտության I կուրսի ուսանող Հայկ Ղազարյանը, երկրորդ տեղը՝ հեռակա ուսուցման «Բնապահպանություն և բնօգտագործում» մասնագիտության I կուրսի ուսանող Արտակ Ասիրյանը, երրորդ տեղը զբաղեցրեց առկա ուսուցման համակարգի «Ինֆորմատիկա և կիրառական մաթեմատիկա» մասնագիտության I կուրսի ուսանող Օգսեն Մեհրաբյանը:

80 կգ քաշային կարգում  առաջին տեղը գրավեց հեռակա ուսուցման «Տնտեսագիտության տեսություն» մասնագիտության I կուրսի ուսանող Մհեր Եգանյանը, երկրորդ տեղը՝ հեռակա ուսուցման նույն մասնագիտության I կուրսի ուսանող Մաքսիմ Հախվերդյանը, երրորդ տեղը զբաղեցրեց հեռակա ուսուցման «Բնապահպանություն և բնօգտագործում» մասնագիտության I կուրսի ուսանող Սպարտակ Վարդումյանը:

90 կգ քաշային կարգում  առաջին տեղը գրավեց հեռակա ուսուցման «Սերվիս» մասնագիտության II կուրսի ուսանող Էրիկ Մանուչարյանը, երկրորդ տեղը՝  առկա ուսուցման «Մանկավարժություն և հոգեբանություն» մասնագիտության III կուրսի ուսանող Ալբերտ Զուրաբյանը, երրորդ տեղը զբաղեցրեց հեռակա ուսուցման «Տնտեսագիտության տեսություն» մասնագիտության I կուրսի ուսանող Սամվել Օրդինյանը:

Հաղթողին տնօրենության կողմից նախատեսված հուշանվերը հանձնեց աշխարհի և Եվրոպայի չեմպիոն Արմեն Չապուխյանը:

Տնօրեն Ս.Առաքելյանն էլ Ա. Չապուխյանին նվիրեց Կիրառական արվեստի ֆակուլտետի ուսանողների աշխատանքներից մեկը:

Առաջնությունից հետո միջազգային կարգի մրցավար Ջանիբեկ Ղազարյանը մեր մարզիկներին տվեց կարևոր ցուցումներ:

Բազկամարտի մասնաճյուղային առաջնության հաղթողները ս.թ. նոյեմբերի 17-ին՝ Ուսանողության միջազգային օրվա կապակցությամբ, կմասնակցեն Երևանում կայանալիք բազկամարտի առաջնությանը:

Մեր տղաներին մաղթում ենք հաջողություն և չեմպիոնական տիտղոս:  

2016թ. նոյեմբերի 7-ին Հումանիտար գիտությունների ֆակուլտետում տեղի ունեցավ «Հոգեբանամանկավարժական շտկման ուղղությունները» թեմայով տեսագործնական բաց դաս, որը վարեց Մանկավարժության և հոգեբանության ամբիոնի դասախոս Էդիտա Սիմոնյանը:

Բաց դասին ներկա էին ԵՊՀ ԻՄ-ի տնօրեն Ս. Ա. Առաքելյանը, Մանկավարժության և հոգեբանության ամբիոնի վարիչը, դասախոսներ և ուսանողներ:

Նախ դասախոսը ներկայացրեց դասի թեման, նպատակը և խնդիրները:
Ապա ուսանողները համապատասախան շնորհանդեսների ուղեկցությամբ ներկայացրին «Ավազաթերապիա», «Նկարչաթերապիա», «Երաժշտաթերապիա», «Հեքիաթաթերապիա» թեմաներով զեկուցումներ:

Նշվեց, որ նկարչաթերապիայի նպատակն է նպաստել երեխաների մտածողության, երևակայության, ուշադրության, ստեղծագործական և ճանաչողական հմտությունների զարգացմանը, հնարավորություն տալ անձին ոչ վերբալ (ոչ խոսքային) ճանապարհով ինքնադրսևորվելու, ինքնակարգավորվելու, ինքնաբացահայտվելու, դուրս բերելու ներքին հուզական կուտակումներն ու լարվածությունը:

Ընդգծվեց, որ ավազաթերապիան նպաստում է անհատականացման գործընթացին, ազատում է ներքին զգացմունքներից, ակտիվացնում է հիշողությունը, կապ է ստեղծում անգիտակցականի և գիտակցականի, ներքինի և արտաքինի, հոգևորի և ֆիզիկականի միջև, զարգացնում է երեխայի ստեղծագործական ընդունակությունները, տարածական, մաթեմատիկական մտածողությունը, վերացնում է վախերը, անհանգստությունները, բացասական հույզերը:

Մատնանշվեցին երաժշտաթերապիայի հիմնական խնդիրները՝ սեփական մարմնի գիտակցումը, տարածության մեջ կողմնորոշումը, սեփական գործողությունների կառավարումը, հավասարակշռության պահպանումը, շփման զարգացումը, սթրեսային վիճակի թուլացումը, մտավոր և սոցիալական ունակությունների զարգացումը: Առանձնացվեցին երաժշտաթերապիայի միջոցով հոգեբանական շտկման հիմնական մեխանիզմները՝ կատարսիսը (հուզական լիցքաթափում), սեփական ապրումների գիտակցման թեթևացումը, կյանքի խնդիրների հետ առերեսումը, հուզական արտահայտվածության նոր միջոցների ձեռքբերումը:

Հատկանշվեց, որ հեքիաթաթերապիան կիրառվում է կրթության մեջ, անձի զարգացման ու թրեյնինգների անցկացման նպատակով, ինչպես նաև հանդես է գալիս որպես հոգեթերապիայի հզոր միջոց: Հեքիաթաթերապիան նպաստում է երեխաների երևակայության, ստեղծագործական մտքի զարգացմանը, խնդիրներ լուծելու, որոշումներ կայացնելու մեխանիզմների ձևավորմանը: Հեքիաթների, ասացվածքների և լեգենդների միջոցով երեխայի մեջ սերմանվում են բարոյական չափանիշները, կանոնները, կյանքի անհրաժեշտ փորձը:

Դասի ընթացքում կիրառվեցին մի քանի գործնական վարժություններ և տեխնիկաներ՝ ուսանողների տեսական գիտելիքները գործնականորեն ամրապնդելու նպատակով:

Տեղի ունեցավ ակտիվ քննարկում, արծարծված հարցերի շուրջ կարծիքների փոխանակություն:

Բաց դասի վերջում ելույթ ունեցավ ԵՊՀ ԻՄ-ի տնօրեն Ս. Ա. Առաքելյանը՝ ողջունելով Մանկավարժության և հոգեբանության ամբիոնի կողմից կազմակերպված՝ այս ուստարվա առաջին բաց դասը, նրա մասնակիցներին, ընդգծելով ուսումնական գործընթացում նման նախաձեռնությունների կարևորությունը, ակնկալելով, որ դրանք մասնաճյուղում կկրեն համատարած և շարունակական բնույթ: