2017թ. մարտի 10-ին՝ ժամը 13:00-ին, մասնաճյուղի տնտեսագիտության ֆակուլտետի օնլայն լսարանում տեղի կունենա «Կրթություն Հայաստան» ՀԿ-ի ներկայացուցիչների հետ հանդիպում, որին կարող են մասնակցել ԵՊՀ ԻՄ-ի բոլոր ուսանողները:
Ուսանողների հետ հանդիպումը կազմակերպել են «Դասավանդի՛ր, Հայաստան» ՀԿ-ն ու ԵՊՀ ԻՄ-ի շրջանավարտների և կարիերայի կենտրոնը՝ հանրակրթության բնագավառում երիտասարդ մասնագետներ ներգրավելու նպատակով:
Հանդիպման ընթացքում կքննարկվեն «Դասավանդի՛ր, Հայաստան» ծրագրի առաքելությունը, դիմելու կարգը, կպատասխանեն մասնակիցներին հետաքրքրող հարցերին:
Հիշեցնենք, որ «Դասավանդի՛ր, Հայաստան»-ը երկամյա դասավանդման ծրագիր է` նախատեսված Հայաստանի լավագույն երիտասարդ մասնագետների համար: Այն միտված է բացահայտելու մասնակիցների մասնագիտական և առաջնորդական ներուժը՝ միաժամանակ նպաստելով գյուղական համայնքների զարգացմանը:
Ծրագրի մասնակիցները տեղաբաշխված են Հայաստանի մարզերի դպրոցներում, որտեղ կա համապատասխան երիտասարդ ուսուցիչների պակաս: Մասնակիցները, իրենց հետ բերելով նորարարական մտքեր, նոր մեթոդներ, հասանելի են դարձնում վերջին կրթական նյութերը աշակերտների համար, ոգեշնչում են երեխաներին և նպաստում են կրթության որակի բարելավմանը:
Ծրագրի երկարաժամկետ տեսլականն է ձևավորել համախոհ առաջնորդներ, ովքեր հասկանում են հայկական կրթական համակարգի առանձնահատկությունները և ի վիճակի են ծրագիրը հաջողությամբ ավարտելուց հետո նպաստել նաև դրա հետագա զարգացմանը և արդիականացմանը՝ անկախ իրենց կարիերայի ընթացքից։