2017թ․ նոյեմբերի 17-18-ին Գյումրիի տեխնոլոգիական կենտրոնում առաջին անգամ անցկացվեց «Մարզերի հզորացումը բարձր տեխնոլոգիաների խթանմամբ» խորագրով հանրապետական համաժողովը:

Ներկա էին տեխնոլոգիական կրթությամբ, ճարտարագիտության, ծրագրավորման և նորարար ոլորտներով հետաքրքրված ավելի քան 150 երիտասարդներ ՀՀ բոլոր մարզերից, մարզպետներ, նախարարությունների և մարզպետարանների ներկայացուցիչներ։

Համաժողովին մասնակցում էին նաև ԵՊՀ Իջևանի մասնաճյուղի ընդհանուր մաթեմատիկայի և բնագիտության ամբիոնի դասախոս Սլավիկ Ալավերդյանը, «Ինֆորմատիկա և կիրառական մաթեմատիկա» մասնագիտության 4-րդ կուրսի ուսանողներ Վլադիմիր Ներսիսյանը, Վահե Դավթյանը և 3-րդ կուրսի ուսանող Սարիբեկ Սարիբեկյանը։

Համաժողովի նպատակն էր ներկայացնել Շիրակի մարզի հաջողված փորձը և մոտիվացնել մարզերի երիտասարդներին, բացահայտել կրթությունից բիզնես հնարավորությունները և մարտահրավերները, նպաստել ՀՀ մարզերում տեղեկատվական տեխնոլոգիաների, աշխատանքային շուկայի զարգացմանը և ընդլայնմանը։

Ողջույնի խոսքով հանդես եկան ՀՀ վարչապետ Կարեն Կարապետյանը, Հայաստանում Գերմանիայի արտակարգ և լիազոր դեսպան Բերնհարդ Մաթիաս Քիսլերը, Շիրակի մարզպետ Արթուր Խաչատրյանը, Գյումրիի քաղաքապետ Սամվել Բալասանյանը, Համաշխարհային բանկի Հայաստանի գրասենյակի ղեկավար Սիլվի Բոսութղոն և ԵՄ համագործակցության բաժնի պետ Հոա-Բին Աճեմյանը:

ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանի և «Թվային Նուռ» ընկերության հիմնադիր Թոդ Ֆաբաքերի միջև ստորագրվեց հուշագիր՝ ՀՀ ճանապարհների թվայնացման պիլոտային ծրագրի մեկնարկի մասին:

Առաջին օրը տեղի ունեցան պրեզենտացիաների ուղեկցությամբ թեմատիկ քննարկումներ:

Ձեռնարկությունների ինկուբատոր հիմնադրամի (ՁԻՀ) տնօրեն Բագրատ Ենգիբարյանը ներկայացրեց Գյումրու և Վանաձորի տեխնոլոգիական կենտրոնների ռազմավարական ուղղությունները, ՀՀ տնտեսական զարգացման և ներդրումների նախարարության զբոսաշրջության պետական կոմիտեի նախագահ Զարմինե Զեյթունցյանը խոսեց մարզերում զբոսաշրջության խթանմանն ուղղված նորարարությունների մասին, «Աջակցություն ՓՄՁ զարգացմանը Հայաստանում» ծրագրի ներկայացուցիչները, միջազգային փորձագետները խոսեցին ազատ տնտեսական գոտիների, բիզնես միջավայրին աջակցության և բիզնես մտածելակերպի խթանման մասին։

ՀՀ ԿԳ նախարար Լևոն Մկրտչյանը, Գյումրիի կրթական հաստատությունների ներկայացուցիչները և «Մասնավոր հատվածի զարգացում Հարավային Կովկասում» ծրագրի հայաստանյան թիմի ղեկավար Վիլհելմ Հյուգոն ներկայացրին կրթության ոլորտում բարեփոխումների, տարածաշրջանային առանձնահատկություններին, աշխատաշուկայի պահանջարկին կրթական ծրագրերի համապատասխանեցման և բիզնեսի ու կրթական հաստատությունների համագործակցության մասին։

Մարզերի թիմերին տրվեց առաջադրանք ներկայացնել հիմնավորում, թե ինչու պիտի ՏՏ միջազգային ընկերությունները մասնաճյուղեր բացեն հենց տվյալ մարզում, և ստեղծվեն տեխնոլոգիական կենտրոններ։

Տավուշի մարզի 15 հոգանոց թիմի տեսակետը ներկայացրեց Սլավիկ Ալավերդյանը։ Նա նշեց, որ մարզը սահմանամերձ է, ունի շուրջ 50 հազար երիտասարդ, որոնց մեծ մասն ունի բարձրագույն կամ միջին մասնագիտական կրթություն և ցանկանում է մնալ մարզում։ Տավուշի մարզում գործում են ԵՊՀ Իջևանի մասնաճյուղը, ԹՈՒՄՈ կենտրոնը, UWC Դիլիջան միջազգային քոլեջը, առաջիններից մեկը Տավուշում է սկսել գործել «Կրթություն Հայաստան» ծրագիրը, վերջերս հիմնադրվել են «Վեկտր» և «Ստորմ» ծրագրավորման ընկերությունները։ Մարզն ունի տեղեկատվական տեխնոլոգիաների զարգացման համար կարևոր ոլորտ հանդիսացող տուրիզմի մեծ պոտենցիալ, որի զարգացման համար ընդամենը 2 շաբաթ առաջ բացվել է «Տավուշի տուրիզմի զարգացման և հետազոտության կենտրոն»-ը։

Միջազգային փորձագիտական խմբի կողմից ներկայացումը գնահատվեց որպես 2-րդ լավագույն ներկայացում։

1-ինը Սյունիքի, իսկ 3-րդը Գեղարքունիքի մարզի ներկայացումներն էին։

Օրվա վերջում համաժողովի մասնակիցների համար Գյուրիի «Սև բերդ»-ում տեղի ունեցավ ընթրիք և համերգ՝ DJ Smoke-ի մասնակցությամբ։

Երկրորդ օրը համաժողովի աշխատանքները շարունակվեցին հետաքրքիր սեմինարներով և թիմային աշխատանքներով՝ միջազգային փորձագետների մատուցմամբ։ Միաժամանակ ընթանում էին 2 սեմինարներ։ Մասնակիցները իրենց ցանկությամբ էին ընտրում, թե որ սեմինարին մասնակցեն։

«Համայնքային զարգացման նորարարական կենտրոն» ՀԿ-ի նախագահ Կարեն Երզնկանյանը ներկայացրեց ՀԿ-ի և մասնավորապես Ամասիայում ստեղծված 3D մոդելավորաման և միկրոինժեներիայի լաբորատորիայի գործունեությունը։

«Աջակցություն ՓՄՁ զարգացմանը Հայաստանում» ծրագրի միջազգային փորձագետ Չուս Լոզանոն ներկայացրեց գործարարի իր մեծ փորձը, ձախողումները և հաջողությունները և այն կարևոր պայմանները, որոնց պետք է բավարարի բիզնես գաղափարը, որպեսզի հաջողվի։ Մասնակիցները տվեցին իրենց հարցերը, ներկայացրին իրենց գաղափարները և ստացան խորհուրդներ։

Թոդ Ֆաբաքերը և «Թվային Նուռ» ընկերության թիմի անդամները խոսեցին Տուրիզմում տեխնոլոգիական գործիքների, կայքերի, բջջային հավելվածների անհրաժեշտության մասին։

Staff.am կայքի հիմնադիր տնօրեն Լուիզա Ավետիսյանը ներկայացրեց ինքնակենսագրական և ներկայացուցչական նամակ պատրաստելու արվեստը, որը հատկապես օգտակար եղավ ուսանողներին և աշխատանք չունեցողներին։

Րաֆֆի Նիզիբլյանը և “Deem Communications” ընկերության թիմը անցկացրին «Փոքր քաղաքների բրենդավորում» սեմինարը։ Ներկայացվեցին արտասահմանյան և հայաստանյան տարբեր բնակավայրերի բրենդավորման օրինակներ, ապա մասնակիցները բաժանվեցին 5 թիմերի և փորձեցին բրենդավորել Վանաձոր, Գավառ, Իջևան, Արտաշատ և Կապան քաղաքները։ Թիմերը թվարկեցին այն ամենը, ինչ կարող է ծառայել որպես բրենդ (մշակույթ, բնություն, հայտնի մարդիկ, շինություններ, արատադրություն, բարբառ, ավանդություններ և այլն)։ Ապա ընտրեցին դրանցից մեկը և ներկայացրին, թե ինչ է անհրաժեշտ, որ այն դառնա քաղաքի իրական բրենդ։

Իջևանի համար որպես բրենդ ծառայող գործոններ նշվեցին Իջևանի գինու գործարանը, Դենդրոպարկը, ԵՊՀ Իջևանի մասնաճյուղը, անտառը, մոտակայքում առկա վանական համալիրները (Մակարավանք, Մորո ձորո վանք և այլն), Ենոքավանի Լաստիվերը և Yell Extreme Park-ը, վերջերս տեղադրված Աշոտ Երկաթի արձանը։ Անգամ խոսվեց աղտոտված Աղստև գետը մաքրելու և աշխարհին որպես մաքրված գետ ունեցող քաղաք ներկայանալու հեռանկարային առաջարկի մասին։

Որպես քաղաքի բրենդ ընտրվեց «Ուսանողական քաղաքի» տարբերակը, որի համար անհրաժեշտ է զարգացնել ԵՊՀ Իջևանի մասնաճյուղը, խորացնել կապերը այլ մարզերի և արտերկրի հետ, ստեղծել ուսանողական հանրակացարաններ, գիտահետազոտական կենտրոններ, ուսանողական պուրակ և ժամանցի կենտրոններ։

«Աջակցություն ՓՄՁ զարգացմանը Հայաստանում» ծրագրի տեխնիկական փորձագետ Պիեր Պրիուչը և ՁԻՀ ծրագրի ղեկավար Ջուլիա Թումասյանը անցկացրին «Դիզայներական մտածողություն» սեմինարը։

Փակման խոսքով հանդես եկավ Գյումրիի տեխնոլոգիական կենտրոնի բիզնես զարգացման մենեջեր Ամալյա Եղոյանը։ Նա հաջողություն մաղթեց բոլոր մասնակիցներին, հույս հայտնեց, որ երկօրյա համաժողովում ստացած գիտելիքները և փորձը օգտակար կլինեն յուրաքանչյուրին իր մարզում զարգացում ապահովելու համար և նշեց, որ համաժողովը կլինի ամենամյա։

2017թ. նոյեմբերի 18-ին ԵՊՀ ԻՄ-ի ռուսաց  լեզվի և գրականության սեկցիայի նախաձեռնած “Клуб любителей русской словесности” գրական ակումբի գործունեության շրջանակներում կայացավ դաս-քննարկում, որը նվիրված էր ռուսաց լեզվի ծագմանը և զարգացմանը:

Դաս-քննարկումը վարում էին Ռուսաց լեզվի և գրականության սեկցիայի պատասխանատու բ.գ.թ., ասիստենտ Անժելա Այդինյանը, սեկցիայի դասախոս Սվետլանա Եղիազարյանը:

Ռուսաց լեզվի ծագմանը և զարգացմանը նվիրված դաս-քննարկմանը մասնակցում էին Հումանիտար գիտությունների ֆակուլտետի «Պատմություն», «Հայոց լեզու և գրականություն» մասնագիտությունների առաջին կուրսերի  ուսանողները, ակումբի անդամներ:

Դասը սկսվեց ռուսաց լեզվի ծագման և զարգացման մասին պատմող փաստագրական  ֆիլմի ցուցադրումով:

Այնուհետև ծավալվեց թեմայի շուրջ հետաքրքիր քննարկում:

Ուսանողները ներկայացրին ռուս և համաշխարհային մեծանուն գրողների և բանաստեղծների  խոսքերը, բանաստեղծություններ՝ նվիրված ռուսաց լեզվին:

Հնչեցին գեղեցիկ երգեր և երաժշտություն:

2017թ. նոյեմբերի 16-17-ին «Բեսթ Վեսթերն Աղվերան» հյուրանոցում  (“Best Western Aghveran Hotel”) «Խաղաղության կորպուս-Հայաստան»-ը կամավորների և նրանց հայ գործընկերների համար կազմակերպել էր «Ծրագրի նախագծում և կառավարում» (PDM) թեմայով կոնֆերանսը, որի ընթացքում վերհանվեցին համայնքային խնդիրները, կատարվեց իրավիճակի գնահատում, որոշվեցին հնարավոր լուծելիները, և մշակեց ծրագիր դրանք իրագործելու համար։

Կոնֆերանսին մասնակցեց նաև ԵՊՀ ԻՄ-ի «Անգլերեն լեզու և գրականություն» մասնագիտության 3-րդ կուրսի ուսանողուհի Արինա Պարոնյանը:

«Ծրագրի նախագծում և կառավարում» կոնֆերանսի մասնակիցներին նախ ներկայացվեցին Համայնքի մասնակցային վերլուծության (անգլ.՝ PACA)  և Ծրագրերի նախագծման և կառավարման (անգլ.՝ PDM) սկզբունքները, որոնք կօգնեն կյանքի կոչելու համայնքի զարգացմանը նպաստող տարաբնույթ ծրագրեր:

Այնուհետև մասնակիցները ծանոթացան ծրագրերի նախագծման և կառավարման փուլերին, հնարավորություն ունեցան ըստ այդ փուլերի իրականացնելու փորձնական աշխատանքներ, որպեսզի իրենց համայնքներում կարողանան գործի դնել դասընթացի շրջանակներում ձեռք բերած գիտելիքներն ու հմտությունները:

Համայնքների զարգացման հարցում Խաղաղության կորպուսն ունի ռեսուրսահեն մոտեցում, այն է՝ ի հայտ բերել և օգտագործել համայնքի ռեսուրսներն ի նպաստ այդ իսկ համայնքի:

Կոնֆերանսի կազմակերպիչները համոզմունք արտահայտեցին, որ կամավորների և նրանց գործընկերների համար կազմակերպվող վերապատրաստական դասընթացները զգալիորեն կնպաստեն Հայաստանի համայնքների զարգացմանն ուղղված համատեղ ջանքերին:

Համաժողովի փակման օրը մասնակիցներին  ներկայացվեցին «Խաղաղության կորպուս-Հայաստան»-ի կողմից տրամադրվող փոքր դրամաշնորհային ծրագրերը, որոնց նրանք հետագայում հնարավորություն կունենան դիմել՝ համայնքում ծրագրեր իրականացնելու համար:

Վերջում բոլոր մասնակիցներին տրվեցին կոնֆերանսին մասնակցելու հավաստագրեր:

2017-2018 ուստարվա I կիսամյակում «ԵՊՀ» հիմնադրամի Իջևանի մասնաճյուղի գրադարանը հերթական անգամ համալրվեց մասնագիտական նոր գրքերով:

Ստորև ներկայացնում ենք ձեռք բերված գրականության ցանկը՝ այբբենական կարգով, ըստ մասնագիտությունների. 

Տնտեսագիտության տեսություն և զբոսաշրջություն 

1. Ղարիբյան Գ., Խառատյան Ա., Իսահակյան Ռ., Անկախության տարիներին Հայաստանի Հանրապետության սոցիալ-տնտեսական զարգացումները և մարդկային կապիտալի վերարտադրության հիմնախնդիրները, Երևան, 2017,  340 էջ (2 օրինակ):

Պատմություն 

1. Ացամբա, Գուբեր, Սիմոնովսկայա, Ասիայի և Աֆրիկայի երկրների պատմություն. Միջին դարեր, Երևան, ԵՊՀ հրատ., 1978, 605 էջ:
2. Ացամբա, Գուբեր, Սիմոնովսկայա, Ասիայի և Աֆրիկայի երկրների պատմություն. Նոր դարեր, Երևան, ԵՊՀ հրատ., 1978, 712 էջ:
3. Գալոյան Գ., Հայաստանը մեծ տերությունների աշխարհակալման առճակատումներում, ՀՀ ԳԱԱ, Երևան, 2004, 822 էջ:
4. Գասպարյան Ն., Հայն ու Հայաստանը օտարների աչքերով, Երևան, ԵՊՀ հրատ., 2017, 196 էջ:
5. Թոյնբի Ա., Հասու լինել պատմությանը, Երևան, «Անտարես», 2013:
6. Կիրակոսյան Ջ., Հայաստանը միջազգային դիվանագիտության և սովետական արտաքին քաղաքականության փաստաթղթերում, Երևան, 1972, 870 էջ:
7. Հայրենիք-Սփյուռք հարաբերությունները. 1918 թվականից մինչև մեր օրերը, Երևան, ԵՊՀ հրատ., 2017, 244 էջ:
8. Շտայներ Ռուդոլֆ, Ինչպես հասնել բարձրագույն աշխարհների ճանաչողության, Երևան, «Սարգիս Խաչենց» հրատ., 2007, 212 էջ:
9. Պետական տեղեկագիր, ՀՀ աշխատանքային օրենսգիրք, Երևան, 2017:
10. Սկազկին, Միջին դարերի պատմություն, Երևան, ԵՊՀ հրատ, 1978, 852 էջ:
11. Սկազկին, Միջին դարերի պատմություն, Երևան, ԵՊՀ հրատ., 1978, 530 էջ:
12. Ստեփանյան Ա., Պատմության հետագիծը, Երևան, «Փրինթ ինֆո» հրատ., 2014, 496 էջ:
13. Վիրաբյան Վ., Հայաստանի Հանրապետությունը 1918-1920 թթ., Երևան, ԵՊՀ հրատ., 2011, 204 էջ:

Մանկավարժություն և հոգեբանություն

1. Ապաքինում և հոգեսոցիալական վերականգնողական աշխատանք հոգեկան առողջության ոլորտում (ուսումնաօժանդակ ձեռնարկ), Երևան, ԵՊՀ հրատ., 2016, 298 էջ:
2. Ղույումչյան Գ., Մանկավարժություն, հ. 1, Երևան, «Բեկոր» հրատ., 2017, 464  էջ:

Հայոց լեզու և գրականություն,  օտար լեզուներ 

1. Ալիշան Ղ., Երկեր, Երևան, «Սովետական գրող» հրատ., 1981, 400 էջ:
2. Աղաբաբյան, Հայ սովետական գրականության պատմություն, Երևան, ՀԽՍՀ ԳԱԱ հրատ., 1986, 576 էջ:
3. Այտընյան Ա., Քննական քերականություն աշխարհաբար կամ արդի հայերեն լեզվի, Երևան, ԵՊՀ հրատ., 1987, 866 էջ:
4. Ավետիսյան Յ., Թելյան Լ., Սարգսյան Լ., Ավետիսյան Լ., Հայոց լեզվի ուղեցույց, Երևան, ԵՊՀ հրատ., 2017, 222 էջ (2 օրինակ):
5. Ավետիսյան, Ղազարյան, Գրաբարի ձեռնարկ, Երևան, ԵՊՀ հրատ., 2007, 300 էջ:
6. Բախչինյան Հ., Հայ միջնադարյան գրականություն, Երևան, 2006, 232 էջ:
7. Բայրամյան Հր., Վրացերենի դասընթաց, Երևան, ԵՊՀ հրատ., 2017, 306 էջ:
8. Գալշոյան Մ., Քեզ վերևից չպետք է նայել, Երևան, «Նաիրի» հրատ., 1990, 288 էջ:
9. Դավթյան Վ., Երկեր 2 հատորով, Երևան, «Սովետական գրող» հրատ., 1985 (3 հատորով):
10. Էմին Գ., Երկերի ժողովածու 3 հատորով, Երևան, «Սովետական գրող» հրատ., 1985 (3 հատորով):
11. Թոթովենց Վ., Երկեր 3 գրքով, Երևան, «Սովետական գրող» հրատ., 1988 (3 հատորով):
12. Կամյու Ալբեր, Երկեր, հ. 1, Երևան, 2002, 375 էջ:
13. Կիրակոսյան Ա., Խորան, Երևան, «Նոր դար» հրատ., 1992, 383 էջ:
14. Հեսսե Հերման, Տափաստանի գայլը, Երևան, «Անտարես» հրատ., 2014, 272 էջ:
15. Մանդելշտամ Օ., Մեգանոմ, Երևան, «Ապոլոն» հրատ., 1993, 216 էջ:
16. Շահնուր Շ., Նահանջը առանց երգի, Երևան, ԵՊՀ հրատ., 1994, 216 էջ:
17. Շեքսպիր Վ., Լիր արքա, Երևան, «Հայաստան» հրատ., 1970, 238 էջ:
18. Շիրազ Հ., Երկերի ժողովածու 2 հատորով, Երևան, «Սովետական գրող» հրատ., 1984 (2 հատորով):
19. Չարենց Եղիշե, Ընտիր երկեր, հատոր Դ, Երևան, «Անտարես» հրատ., 2015, 424 էջ:
20. Պարոնյան Շ., Այունց Ա., Լեզուն և մշակույթը ակադեմիական համատեքստում, Երևան, ԵՊՀ հրատ., 2017,  264 էջ (2 օրինակ):
21. Պետրոսյան Վ., Հայկական էսքիզներ, Երևան, «Հայաստան» հրատ., 1984, 304 էջ:
22. Ռեմբո Ա., Բանաստեղծություններ, Երևան, «Ապոլոն» հրատ., 1991, 190 էջ:
23. Ռոլանդի երգը, Երևան, «Սարգիս Խաչենց» հրատ., 1995, 234 էջ:
24. Սարտր Ժան-Պոլ, Սրտխառնոց, Երևան, «Անտարես» հրատ., 2016, 264  էջ:
25. Սոսյուր Ֆ., Ընդհանուր լեզվաբանության դասընթաց, Երևան, «Փրինթինֆո» հրատ., 2008, 375 էջ:
26. Ստենդալ, Կարմիրը և սևը, Երևան, «Անտարես» հրատ., 2012, 656 էջ:
27. Վոյնիչ, Բոռ, Երևան, «Հայրապետ» հրատ., 1960, 360 էջ:
28. Րաֆֆի, Երկերի ժողովածու հ. 1, Երևան, «Սովետական գրող» հրատ., 1983, 568 էջ:
29. Րաֆֆի, Երկերի ժողովածու հ. 3, Երևան, «Սովետական գրող» հրատ., 1984, 464 էջ:
30. Օսթին Ջեյն, Զգացմունք և բանականություն, Երևան, «Անտարես» հրատ., 2017, 408 էջ:
31. Օրուել Ջորջ, 1984, Երևան, «Անտարես» հրատ., 2012, 336 էջ:
32. 20-րդ դարի արտասահմանյան արձակ, հ. 1, Երևան, ԵՊՀ հրատ., 1984, 576 էջ:
33. Alexander L., For and Against, London, 1968.
34. Vince Michael, Advanced Language Practice, Macmillan, 2007.
35. Vince Michael, First Certificate Language Practice, Macmillan, 2007.

Բնական գիտություններ 

1. Բադալյան Ս., Ղարիբյան Ն., Տարբեր սնկային կուլտուրաների միցելիումի կառուցվածքային առանձնահատկությունները, Երևան, ԵՊՀ հրատ., 2017, 176 էջ: