2018թ. հունվարի 17-24-ին ԵՊՀ ԻՄ-ի հումանիտար և բնական գիտությունների ֆակուլտետներում կայացան կուրսային աշխատանքների պաշտպանություններ:

Հունվարի 17-ին տեղի ունեցավ «Անգլերեն լեզու և գրականություն» մասնագիտության IV կուրսի ուսանողների կուրսային աշխատանքների պաշտպանությունը:

Հունվարի 22-ին կայացավ «Ֆրանսերեն լեզու և գրականություն» մասնագիտության IV կուրսի ուսանողների կուրսային աշխատանքների պաշտպանությունը:

Հունվարի 24-ին տեղի ունեցան «Ինֆորմատիկա և կիրառական մաթեմատիկա» մասնագիտության  IV,  «Հայոց լեզու և գրականություն» մասնագիտության III և IV կուրսերի ուսանողների կուրսային աշխատանքների պաշտպանությունները:

Երկու ֆակուլտետներում էլ կուրսային աշխատանքների պաշտպանություններն իրականացվեցին սահմանված կարգով և պատշաճ մակարդակով:

Աշխատանքների թեմատիկան հետաքրքիր էր և բազմաբնույթ:

«ԱԼԳ» IV կուրսի ուսանողները պաշտպանեցին (անգլերենով) հետևյալ թեմաներով աշխատանքներ.

• Ամերիկյան երազանքը Ֆ. Ս. Ֆիցջերալդի «Մեծն Գեթսբին» վեպում:
• Մահվան և կյանքի խորհրդանիշները Է. Ա. Պոյի ստեղծագործություններում:
• Փիլիսոփայական հասկացությունները և խորհրդանիշները Հ. Մելվիլի «Մոբի Դիկ» վեպում:
• Գիտակցության հոսքի մեթոդը Վ. Վուլֆի «Տիկին Դալովայը» վեպում:
• Բացման նախադասությունները Է. Հեմինգուեյի արձակում:
• Կրկնությունը որպես Գերտրուդ Սթայնի արձակի առանձնահատկություն:
• Ջ. Միլթոնի «Կորուսյալ դրախտ»-ը և Աստվածաշունչը:
• Քաղաքական սատիրան Ջ. Օրուելլի «Անասնաֆերմա» վեպում:
• Անկումը Վ. Շեքսպիրի «Օթելլո» ողբերգության մեջ:
• Սրիկայի կերպարի նկարագիրը Վ. Շեքսպիրի «Լիր արքա» ողբերգության մեջ:
• Սիրո և ատելության արտացոլումը Է. Ա. Պոյի պոեզիայում:
• Ջ. Ք. Ռոուլինգը և կախարդական բառերը Հարի Փոթերի զարմանահրաշ աշխարհում:
• Կորուսյալ սերնդի արտացոլումը Է. Հեմինգուեյի «Եվ ծագում է արևը» վեպում:
• Պատկերավորման միջոցները ՈՒ. Ս. Մոեմի «Թատրոնը» վեպում:
• Տրագիզմի դրսևորումը Ֆ. Ս. Ֆիցջերալդի «Գիշերն անուշ է» վեպում:
• Ա. Բեսթերի «Սիրով Ֆարենհեյթ» պատմվածքի և Ռ. Բրենդբերիի «Ֆարենհեյթ 451» վեպի թեմաների և գաղափարախոսությունների վերլուծություն:
• Չառլիի կերպարի համեմատական–հակադրական վերլուծությունը Դ. Քիզի «Ծաղիկներ Էլջերնոնի համար» պատմվածքում և համանուն վեպում:

«ՖԼԳ» IV կուրսի ուսանողները պաշտպանեցին (ֆրանսերենով) աշխատանքներ՝ հետևյալ թեմաներով.

• Գրական դարձվածքային միավորները Լա Ֆոնտենի առակներում:
• Շրջասությունը Մոլիերի «Մարդատյացը» ստեղծագործության  մեջ:
• Հնչողականության դերը Պ. Վեռլենի պոեզիայում:
• Փոքրիկ իշխանի թաքնված տիեզերքը Անտուան դը Սենտ–Էքզյուպերիի համանուն ստեղծագործության մեջ:
• Սիրո թեման Ա. Թրուայայի «Էգլտիերները» վեպում:
• Ցեղասպանության թեման Մ.Լեվիի ստեղծագործության մեջ:
• «Աբսուրդի» թեման Կամյուի «Օտարը» ստեղծագործության մեջ:
• Ժանրի վերլուծությունը Ա. դը Սենտ–Էքզյուպերիի  «Փոքրիկ Իշխանը» ստեղծագործության մեջ:
• Ժարգոնը Ռ. Քենոյի «Զազին մետրոյում» ստեղծագործության մեջ:
• Ա. Գավալդայի «Միասին, ահա ամենը» ստեղծագործության կերպարների լեզվաբանական վերլուծությունը:
• Աբսուրդի գաղափարը Կամյուի «Սիզիփոսի առասպելը» ստեղծագործության մեջ:
• Կնոջ դերը մեր օրերում և Մոպասանի ստեղծագործություններում:
• Պատմողի դիրքորոշումը Մ. Լեվիի «Ստվերներ որսացողը» վեպում:
• Անկարողության գրական արտահայտությունը Ամելի Նոտոմբի «Ահ և սարսափ» ստեղծագործության մեջ և համանուն ֆիլմում:

«ՀԼԳ» III կուրսի ուսանողները պաշտպանեցին հետևյալ թեմաներով աշխատանքներ (հայոց լեզվից).

• Նախադասության քերականական  կարգերի աբեղյանական ըմբռնումը:
• Շարադասության ոճաքերականական կիրառությունը Վ. Դավթյանի «Թոնդրակեցիներ» պոեմում:
• Պարզ նախադասության կառուցվածքային տեսակների գործածությունը Պ. Սևակի «Մարդը ափի մեջ» ժողովածուում:
• Բառ–բառակապակցություն–նախադասություն լեզվական միավորների զուգադրական քննությունը:
• Բառակապակցություն. տեսակները և արտահայտությունը Դ. Դեմիրճյանի պատմվածքներում:
• Բարդությունն իբրև բառակազմական եղանակ և դրա դրսևորումը Պ. Սևակի քնարերգության մեջ:
• Դերանունն իբրև խոսքի մաս և նրա գործածությունը Հ. Սահյանի քնարերգության մեջ:
• Վերաբերմունքային խոսքի մասերը և դրանց արտահայտությունը Հ. Թումանյանի ստեղծագործության մեջ:
• Կոչականի արտահայտությունը Հովհ. Թումանյանի քնարերգության մեջ:
• Իջևանի խոսվածքի բառակազմական առանձնահատկությունները:
• Ածականի արտահայտությունը Գեղամ Սարյանի պոեզիայում:
• Դարձվածքների գործածությունը ԶԼՄ–ներում:
• Պատմահամեմատական լեզվաբանության հայեցակետերը:
• Ածանցումը Ե. Չարենցի քնարերգության մեջ:
• Փոխառությունները Խ. Աբովյանի «Վերք Հայաստանի» վեպում:

«ՀԼԳ» IV կուրսի ուսանողները պաշտպանեցին հետևյալ թեմաներով աշխատանքներ (հայ գրականությունից).

• Ֆահրատի կերպարը Րաֆֆու «Կայծեր» վեպում:
• Աբեղայի կերպարը Լ. Շանթի «Հին աստվածներ» դրամայում:
• Մետաքսեի սիրերգությունը:
• Աքսորական կյանքի գեղարվեստական նկարագիրը Գուրգեն Մահարու «Ծաղկած փշալարեր» վիպակում:
• Սիրային և հայրենասիրական մոտիվների համադրումը Հովհ. Շիրազի «Սիամանթո և Խջեզարե» պոեմում:
• Եղեռնի թեման Ս. Խանզադյանի «Խոսե´ք, Հայաստանի՛ լեռներ» վեպում:

«ԻԿՄ» IV կուրսի ուսանողները պաշտպանեցին աշխատանքներ՝ հետևյալ թեմաներով.

• Որոշ դիֆերենցիալ հավասարումների մոտավոր լուծումներ:
• Անվերջ արտադրյալներ:
• Ազդանշանի զտումը աղմուկից:
• Պատահական մեծությունների թվային բնութագրիչներ:
• Ֆիզիկական մոդելից անցումը համակարգչային մոդելի դինամիկայի խնդրիների օրինակով:
• Տվյալների առանց կորստի սեղմման որոշ ալգորիթմների ուսումնասիրում և ծրագրային իրականացում:
• Ծովամարտ խաղի գրաֆիկական իրականացում QT միջավայրում. մարդ–մարդ, մարդ–մեքենա:
• Ռոբոտաշինություն. ավտոմեքենա–ռոբոտի պատրաստումն ու ծրագրային իրականացումը:
• Շրջիկ գործակալի խնդիրը և կիրառությունները. ցանցային պլանավորման խնդիրների մոդելներն ու ծրագրային իրականացումը:
• Համիլտոնյան շրջանցումներ (m,n,r)–չափի ուղղանկյուն ցանցերում:
• «Մաուգլի» մանկական սեղանի խաղի համակարգչային իրականացումը:

Ըստ հանձնաժողովների անդամների և մասնագիտությունների կրթական ծրագրերի պատասխանատուների՝  աշխատանքները հիմնականում կատարված էին բարեխղճորեն, դրանց բովանդակությունը համապատասխանում էր ընտրված թեմային, աշխատանքներում հիմնավորված էին թեմայի արդիականությունը, նպատակը և խնդիրները, «հարցի պատմությունը» և այլն:

Ընդհանրապես աշխատանքները համապատասխանում էին կուրսային աշխատանքներին ներկայացվող պահանջներին, դրանցում նկատելի էր նաև ղեկավարների հետևողական աշխատանքը:

Պաշտպանություններն անցան սահուն. ուսանողները մեծ մասամբ ունեին անկաշկանդ ու տրամաբանված բանավոր խոսք, տեսական մտքերը հաստատում էին գործնական հիմնավորումներով, բնագրային մեջբերումներով, աշխատանքները ներկայացնում էին շնորհանդեսների ուղեկցությամբ:

 2018թ. հունվարի  23-ին ԵՊՀ Իջևանի մասնաճյուղում կայացավ Կիրառական արվեստի ֆակուլտետի գիտական խորհրդի ընդլայնված նիստ, որը նախագահում էր ֆակուլտետի դեկանի ԺՊ, ֆիզմաթ. գիտ. թեկնածու, ասիստենտ Ա.Մարգարյանը:

Ֆակուլտետի գիտխորհրդի նիստին մասնակցում էին ԵՊՀ ԻՄ-ի տնօրեն Ս. Ա. Առաքելյանը, խորհրդի անդամները, ֆակուլտետի վարչական և պրոֆեսորադասախոսական անձնակազմի ներկայացուցիչները, հրավիրված էին Ուսումնամեթոդական վարչության պետ Ա.Դավթյանը, մասնաճյուղի գիտական խորհրդի քարտուղար Մ.Աթոյանը, տնօրենի օգնական Ն.Գրիգորյանը, հասարակայնության հետ կապերի և մամուլի պատասխանատու Հ.Վանյանը:

Նիստի ընթացքում քննարկվեցին օրակարգով նախատեսված հետևյալ հարցերը.

1. 2017-18 ուստարվա առաջին կիսամյակի քննաշրջանի արդյունքների ամփոփում (առանց լուծարքի շրջանի):
2. 2017-18 ուստարվա երկրորդ կիսամյակի նախապատրաստական աշխատանքների մասին:     
3. Ընթացիկ հարցեր:

Զեկուցող՝ Ա. Շ. Մարգարյան

Ֆակուլտետի գիտխորհրդի նախագահ, դեկանի ԺՊ Ա.Մարգարյանը, ելնելով ֆակուլտետի և մասնաճյուղի զարգացման՝ 2016-2020 թթ. ռազմավարական  ծրագրի պահանջներից, ներկայացրեց 2017-18 ուստարվա 1-ին կիսամյակում իրականացված աշխատանքների  վերաբերյալ զեկուցում:

Մասնավորապես նշվեց, որ, ընդունված կարգի համաձայն, ուստարվա սկզբին քննարկվում և հաստատվում են յուրաքանչյուր ստորաբաժանման աշխատանքային պլանները և նրանց իրականացման ժամանակացույցները՝ հաշվի առնելով ընթացիկ տարվա առանձնահատկությունները:

2017թ. սեպտեմբերի 1-ից ֆակուլտետում գործող երեք կրթական ծրագրերից «Համակարգչային գրաֆիկա» ծրագրով II-րդ կուրս էին փոխադրվել երեք ուսանող (մյուսները զորակոչվել էին ՀՀ ազգային բանակ): Նրանց հետագա ուսումնառությունը այդ կազմով նպատակահարմար չէր և հակասում էր ԵՊՀ ուսանողական ակադեմիական խմբերի նորմաների պահանջներին, ուստի վերոնշյալ ուսանողները դիմեցին տնօրենությանը՝ հետագա ուսումնառությունը «Դիզայն» կրթական ծրագրով շարունակելու խնդրանքով, ինչը և բավարարվեց:

2017-18 ուստարվա սկզբից ֆակուլտետն ունի 68 ուսանող (46 վճարովի, 22 անվճար):

Ֆակուլտետի գործունեության թափանցիկությունն ապահովելու նպատակով դեկանատի, ամբիոնի և ֆակուլտետի խորհրդի նիստերի կազմակերպման ժամանակացույցները ներկայացվում, նրանց քննարկվող հարցերի մասին նախապես տեղեկացվում են 19 աշխատակիցները (13 դասախոս, 6 ուսումնաօժանդակ)  և  ուսանողները: Կայացված որոշումները, մասնավորապես՝ ստուգարքներից և քննություններից անմիջապես հետո գնահատման ամփոփ տվյալները փակցվում են հայտարարությունների տախտակին և տեղադրվում մասնաճյուղի պաշտոնական կայքէջում:

Ներկայացվեց, որ 1-ին կիսամյակի բոլոր ստուգարքները, ընթացիկ և եզրափակիչ քննությունները անց են կացվել համաձայն նախապես հաստատված ժամանակացույցի, որին, բացի 1 ուսանողից, մասնակցել են ֆակուլտետի բոլոր ուսանողները:

Առաջադիմությունը, ըստ կուրսերի, խիստ տարբեր էր և ուներ հետևյալ պատկերը.

• «Դիզայն» I կուրս – 63.64%,
• «Դիզայն» II կուրս – 92,3%,
• «Դիզայն» III-ին կուրս – 88,9%,
• «Դիզայն» IV կուրս – 90%,
• «Կիրառական արվեստ» III-րդ կուրս – 85,7%,
• «Կիրառական արվեստ» IV-րդ կուրս – 85,7%:

Ֆակուլտետի ընդհանուր առաջադիմությունը կազմում էր 80,88%:

Ա.Մարգարյանը հավելեց, որ այս տարի քննությունների անցկացման մեջ կատարվել են որոշ փոփոխություններ, մասնավորապես՝ գնահատականները նշանակվել են ուսանողների ներկայությամբ, իրենց աշխատանքները ներկայացնելուց անմիջապես հետո՝ մատնանշելով թերություներն ու բացթողումները:

Օրակարգային հարցերի քննարկումից հետո ելույթ ունեցավ մասնաճյուղի տնօրեն Ս. Ա. Առաքելյանը: Նա իր խոսքում ընդգծեց, որ աշխատանքների որակը բարելավելու նպատակով ուսանողներին տրվեն կիրառական բնույթի և ավելի բարդ առաջադրանքներ, մեծացվի արտալսարանային, ինքնուրույն աշխատանքների ծավալը, դասախոսների կողմից հետևողականություն դրսևորվի դրանց իրականացման վերահսկողության և գնահատման հարցերում: Տնօրենը ֆակուլտետի դեկանին հանձնարարեց կազմել առաջարկությունների փաթեթ և ներկայացնել, թե նյութատեխնիկական ինչպիսի միջոցներ են անհրաժեշտ իրենց աշխատանքներն առավել արդյունավետ կազմակերպելու համար: