2018թ. փետրվարի 19-ին ԵՊՀ ԻՄ-ի գրադարանում տեղի ունեցավ Գիրք նվիրելու օրվան և Ամենայն հայոց բանաստեղծ Հովհաննես Թումանյանի ծննդյան 149-ամյակին նվիրված միջոցառում, որը կազմակերպվել էր մասնաճյուղի գրադարանի, հայոց լեզվի և գրականության ամբիոնի, ուսանողական կառույցների համատեղ ջանքերով:

Ներկա էին Հայոց լեզվի և գրականության ամբիոնի դասախոսները, գրադարանի աշխատակիցները, ՈՒԳԸ համակարգող Ս. Ալավերդյանը, տարբեր ֆակուլտետների ուսանողներ:

Միջոցառումը բացվեց Գիրք նվիրելու տոնի նախապատմությամբ, թե ինչպես  փետրվարի 19-ը՝ Հովհաննես Թումանյանի ծննդյան օրը, 2008 թվականից Գրողների միության նախագահ Լևոն Անանյանի նախաձեռնությամբ և ՀՀ կառավարության որոշմամբ Հայաստանում նշվում է որպես Գիրք նվիրելու օր։ Շեշտվեց, որ պատահական չէր գիրք նվիրելու օրը հենց Թումանյանի ծննդյան օրվա հետ կապելը, Թումանյանի, ով ժամանակին (1899) հիմնադրել էր մի յուրահատուկ «գրողների միություն»՝ «Վերնատունը», և իր շուրջն էր համախմբել ոչ միայն հիմնական անդամներին (Աղայան, Իսահակյան, Շանթ, Դեմիրճյան, Աղբալյան), այլև Թիֆլիսի գրեթե բոլոր նշանավոր գրական գործիչների, հասարակական դեմքերի, նկարիչների, երաժիշտների, հյուրերի (Պ. Պռոշյան, Ալ. Շիրվանզադե, Նար-Դոս, Վ. Փափազյան, Ա. Ահարոնյան, Վ. Տերյան, Լեո, Ստ. Լիսիցյան, Մ. Թումանյան, Փ. Վարդազարյան, Ա. Զարգարյան, Գ. Բաշինջաղյան, Փ. Թերլեմեզյան, Կոմիտաս և ուրիշներ)։

Ներկայացվեց, որ միմյանց գիրք նվիրելը գեղեցիկ ավանդույթ էր, և լավ գիրքն ամենացանկալի ու հաճելի նվերների շարքում էր: Վերջին տարիներին այս օրը կազմակերպվում են բազմաթիվ միջոցառումներ, մարդիկ և կազմակերպությունները (այդ թվում՝ հրատարակչությունները) գրքեր են նվիրում միմյանց, գրադարաններին, դպրոցներին՝ փորձելով վերականգնել գրքի նշանակությունը, գիրք նվիրելու մշակույթը:

Հայոց լեզվի և գրականության ամբիոնի ասիստենտ, բ.գ.թ. Ա.Հասանյանը կարևորեց նմանատիպ միջոցառումների կազմակերպումը՝ այս միջոցառումն էլ համարելով հարգանքի տուրք Հովհաննես Թումանյանի ծննդյան 149-ամյակին, ներկայացրեց բանաստեղծի գրական ժառանգությունը, նրա ստեղծագործության հիմնական մոտիվները, ժողովրդականությունն ու արդիականությունը:

Ամբիոնի դոցենտ, բ.գ.թ. Ա.Սարհատյանը միացավ Հովհ. Թումանյանի ստեղծագործության վերաբերյալ գնահատանքին՝ ընդգծելով Ամենայն հայոց բանաստեղծի գրական ժառանգության համամարդկային բնույթը:

Մասնաճյուղի ՈՒԳԸ համակարգող Ս.Ալավերդյանը անցկացրեց գրականության վերաբերյալ վիկտորինա, որի հարցերն ուղարկել էր «Բուկինիստ» գրախանութի աշխատակից Անի Ղազարյանը:

Գիրք նվիրելու օրվա առթիվ շնորհավորելով ներկաներին՝ գրադարանի վարիչ Վ.Պողոսյանն ընդգծեց գրքերի անփոխարինելի դերն ու նշանակությունը սերունդների հոգևոր զարգացման գործում և միջոցառման բոլոր մասնակիցներին գրադարանի ֆոնդից նվիրեց գրքեր:   

2017-2018 ուստարվա II կիսամյակում ԵՊՀ ԻՄ-ի միջազգային համագործակցության, առկա խնդիրների ու ներուժի և առաջիկա ծրագրերի ու անելիքների վերաբերյալ փոքրիկ հարցազրույց ունեցանք մասնաճյուղի միջազգային կապերի բաժնի վարիչ, հայոց պատմության և հասարակագիտության ամբիոնի ասիստենտ, պ.գ.թ. Գևորգ Մելքոնյանի հետ.

-Պարոն Մելքոնյան, ի՞նչ հիմնական խնդիրներ ու գործառույթներ ունի ԵՊՀ ԻՄ-ի միջազգային կապերի բաժինը:

-Նախ ցանկանում եմ շնորհակալություն հայտնել հարցազրույցի և մեր բաժնի նկատմամաբ ցուցաբերած հետաքրքության համար: ԵՊՀ ԻՄ-ի միջազգային կապերի բաժնի հիմնական խնդիրներն են արտասահմանյան (այդ թվում՝ ԱՊՀ երկրների) առաջատար բուհերի հետ համագործակցության զարգացումը, միջազգային գիտական ծրագրերին բուհի ուսանողների և գիտամանկավարժական կազմի մասնակցության խթանումը, սփյուռքահայ բարերարների, գիտնականների և շրջանավարտների հետ  կապերի հաստատումը, հայկական համայնքների հետ համագործակցության ընդլայնումը, դասախոսների և ուսանողների փոխանակման ծրագրերի մշակումը և իրականացումը, դրամաշնորհային ծրագրերի վերաբերյալ տեղեկատվության վերլուծությունը: Մեր բաժնի հիմնական գործառույթներն են արտերկրի բուհերի գիտական կենտրոնների հետ պայմանագրերի և համաձայնագրերի բանակցային գործընթացների կազմակերպումը, միջազգային համագործակցության պայմանագրերի, նամակների, գրությունների նախագծերի պատրաստումը, ԵՊՀ ԻՄ-ի ստորաբաժանումների և անհատ դասախոսների արտասահմանյան գործուղումների կազմակերպումը և վերահսկումը, բաժնի իրավասություններին վերաբերող տեղեկատվական նյութերի տպագրումը, հայտարարությունների կազմումը, թարգմանությունը և այլն:

-Այս խնդիրներից ու գործառույթներից ելնելով՝ ինչպե՞ս կգնահատեք ԵՊՀ Իջևանի մասնաճյուղի միջազգային համագործակցության ներուժը:

 -Պետք է նշեմ, որ ներկայումս ԵՊՀ ԻՄ-ի պրոֆեսորադասախոսկան անձակազմի, վարչական աշխատակազմի և ուսանողների բարձր պատրաստվածությունը մեզ հնարավորություն է ընձեռնում  ընդգրկվել միջազգային տարբեր կրթական ծրագրերում և դրամաշնորհներում: Իսկապես ԵՊՀ ԻՄ-ն ունի մեծ գիտական պոտենցիալ մասնակցելու միջազգային բավականին լուրջ ծրագերին, և մեր բաժնի խնդիրն է կազմակերպել  համապատասխան փաստաթղթային և այլ կազմակերպչական խնդիրները՝ նմանատիպ ծրագերին մեր մասնակցությունն ապահովելու նպատակով: Այժմ այդ ուղղությամբ բավականին լուրջ աշխատանքներ ենք տանում:

-Կցանկանայի՝ համառոտ ներկայացնեք, թե որ երկրների համալսարանների ու կազմակերպությունների հետ եք արդեն ձեռք բերել միջազգային համագործակցության պայմանավորվածություն և ինչ ծրագրեր ունեք առաջիկայում:

-Մենք ակտիվ համագործակցության պայմանավորվածություն ենք ձեռք բերել ՌԴ գիտությունների ակադեմիայի հումանիտար համալսարանի, ԱՄՆ միջազգային զարգացման գործակալության, Երևանում գործող գիտության և մշակույթի ռուսական կենտրոնի, ինչպես նաև գերմանական կողմի հետ:

Նախատեսում ենք առաջիկայում ԵՊՀ ԻՄ-ում բացել լինգոֆոնային լսարաններ, որոնք հնարավորություն կընձեռեն մեր ուսանողներին կատարելագործել օտար լեզուների իմացությունը: Բավականին լուրջ աշխատանքներ ենք տանում, որպեսզի մեր մասնաճյուղի պրոֆեսորադասախոսական անձնակազմը և հատկապես երիտասարդ գիտնականները հնարավորություն ունենան մասնակցելու  միջազգային տարբեր  գիտաժողովներին:

Հարցազրույցը վարեց ԵՊՀ ԻՄ–ի հասարակայնության հետ կապերի և մամուլի պատասխանատու Հասմիկ Վանյանը: