2018թ. փետրվարի 14-ին ԵՊՀ ԻՄ-ի ուսանողական խորհրդի նախաձեռնությամբ մասնաճյուղում նշվեց Սիրահարների տոնը:

Տոնի կապակցությամբ ՈՒԽ-ի նախագահ Իսկուհի Շաղբաթյանը հանդես եկավ շնորհավորական ուղերձով, որտեղ մասնավորապես նշված էր.

 «ԵՊՀ Իջևանի մասնաճյուղի ուսանողական խորհուրդը սիրով շնորհավորում է բոլոր ուսանողներին՝ Սիրահարների տոնի առթիվ, մաղթում, որ նրանց ամեն մի օրը պարուրված լինի սիրով ու ջերմությամբ։

Աստված սեր է շնորհել մեզ և սիրով այրել մեր հոգիները։ Սերը մեզ բերում է բարություն, հանդարտություն, երջանկություն։

Սիրելի՛ ուսանողներ, սիրեք և սիրվեք՝ տարածելով ձեր ջերմությունը:

Շնորհավո՛ր ձեր տոնը»։

Մասնաճյուղի բակում ստեղծվել էր տոնական ու սիրով լի մթնոլորտ. Ուսանողական խորհրդի անդամները բակում ուսանողներին նվիրեցին փուչիկներ, հանդես եկան օրվան առնչվող տեղեկատվությամբ, հղեցին իրենց շնորհավորանքներն ու բարեմաղթանքները:

Աշխարհի մոտ 100 երկրում փետրվարի 14-ը նշվում է որպես Սիրահարների օր: Ի սկզբանե այն նշվել է որպես պատարագային տոն` նվիրված վաղ քրիստոնեական շրջանի սրբերից մեկի` Սբ. Վալենտինիուսի հիշատակին։

Վերջինիս, ըստ ավանդության, դատապարտել էին մահվան` զինվորներին գաղտնի պսակադրելու համար: Նա կալանավայրում բուժել է բանտապետի աղջկան, որին էլ հետագայում սիրահարվել է։

Նշվում է նաև, որ մինչև իր դատավճռի ի կատար ածումը նա հրաժեշտի նամակ է թողնում իր սիրած էակին, որի վերջում գրված է լինում «Քո Վալենտին»։

Այս պատմությունը թվագրվում է մոտ 269 թվականին՝ հռոմեական կայսր Կլավդիոս II-ի օրոք: Իսկ 496-ին Հռոմի պապ Հելասիուս I-ը փետրվարի 14-ը հայտարարեց Սուրբ Վալենտինի օր:

Այսօր աշխարհի շատ երկրներում այն պաշտոնապես նշվում է որպես սիրահարների տոն։ Այդ օրը բոլորը շնորհավորում են միմյանց, սեր խոստովանում, նվիրում խորհրդանշական նվերներ:

Հայաստանում Սուրբ Վալենտինի տոնը համընկնում է Տյառնընդառաջի տոնին:

Ըստ եկեղեցական ավանդության` Տրնդեզի տոնը կապվում է Տիրոջ ծննդից 40 օր հետո նրան կրակներով ընդառաջ գնալու գաղափարի հետ։

Այդ օրը` վաղ առավոտյան, մեծահասակ կանայք, եկեղեցուց վերադառնալով, Տրնդեզի ուտեստներ էին պատրաստում ու բաժանում տնեցիներին։

Կեսօրից հետո նորահարս ունեցող ընտանիքներն իրենց բակում խարույկ էին վառում։

Խարույկի շուրջն սկսվում էր շուրջպարը։ Երբ կրակը փոքր-ինչ մեղմանում էր, սկսվում էին կրակթռուկները։

Կրակի վրայից առաջինը թռչելու իրավունքը վերապահվում էր նորահարսին։ Պտղավորվելու ակնկալությամբ խարույկի վրայից թռչում էին նաև ամուլ կանայք՝ այրելով իրենց զգեստի քղանցքը, ապա թռչում էին երիտասարդները, տղամարդիկ, իսկ վերջում՝ երեխաները։ Այս ավանդույթը մեզանում պահպանված է մինչև օրս:

2018թ. փետրվարի 13-ին ԵՊՀ Իջևանի մասնաճյուղում տեղի ունեցավ «Ինչպե՞ս և ինչու՞ մասնակցել գիտաժողովների» խորագրով սեմինարը, որը նախաձեռնել էր մասնաճյուղի ուսանողական գիտական ընկերությունը (ՈՒԳԸ):

Ներկա էին տարբեր ֆակուլտետների ուսանողներ: Սեմինարը վարում էր ՈՒԳԸ համակարգող, Ընդհանուր մաթեմատիկայի և բնագիտության ամբիոնի դասախոս Սլավիկ Ալավերդյանը:

Սեմինարավարը նշեց գիտաժողովների մասնակցելու դրական կողմերը․

1. Սեփական ուժերի ստուգում:
2. Շփում և մրցակցություն այլ ուսանողների հետ:
3. Կրթության և կարիերայի աջակցության հնարավորություններ:
4. Խրախուսվող հասարակական ակտիվություն։

Ներկայացվեց, որ գիտաժողովների մասին կարելի է տեղեկանալ տարբեր ուսումագիտական կազմակերպությունների պաշտոնական կայքերից, հայտարարությունների տախտակներից։

Ընդգծվեց, որ հարկավոր է ճշտել գիտաժողովի չափանիշները, թեմատիկան, անհրաժեշտ փաստաթղթերը և դիմելու վերջնաժամկետը, որից հետո ընտրել գիտական ղեկավար և թեմա։

Նշվեց, թե ինչ ընթացք ունի գիտաժողովին ներկայացվող զեկուցման համար անհրաժեշտ գիտական հետազոտությունը.

1. Ընտրված թեմայի այժմեականության հիմնավորում:
2. Հետազոտության նպատակի և խնդիրների սահմանում:
3. Հետազոտության օբյեկտի և առարկայի սահմանում:
4. Հետազոտության իրականացման մեթոդի (մեթոդիկայի) ընտրություն:
5. Հետազոտության գործընթացի նկարագրություն:
6. Հետազոտության արդյունքների վերլուծություն:
7. Ստացված արդյունքների գնահատում և հետևությունների ձևակերպում:

Այնուհետև տրվեցին որոշ հասկացությունների բացատրություններ, թվարկվեցին հետազոտության մեթոդներըը (դիտում, համեմատում, գիտափորձ, չափում, մոդելավորում, վերացարկում, ինդուկցիա, դեդուկցիա, վերլուծություն, համադրություն և այլն), գիտահետազոտական աշխատանքների տեսակները (ռեֆերատ, գիտական հոդված, կուրսային և ավարտական աշխատանքներ և այլն), դրանց կառուցվածքը (անվանաթերթ, բովանդակություն, ներածություն, հիմնական մաս, եզրակացություն, գրականության ցանկ, հավելվածներ):

Ներկայացվեց աղբյուրներից օգտվելու կարգը և հղումներ կատարելու նշանակությունը.

1. Գրագողությունից խուսափում:
2. Ստուգելիության ապահովում:
3. Հարգանքի դրսևորում այլոց աշխատանքների հանդեպ:
4. Այլոց աշխատանքներով սեփական տեսակետի հիմնավորում:
5. Ուսումնասիրվող թեմային քաջածանոթություն:

Բացատրվեցին համացանցում արդյունավետ որոնման նրբությունները (Google փնտրման օպերատորներ), ներկայացվեցին գիտական գրականություն պարունակող հիմնարար կայքերը,  «Գիտահետազատական աշխատանք կատարելու հիմնական սկզբունքները» մեթոդական ցուցումները, Վազգեն Գաբրիելյանի «Գրավոր խոսք» ուսումնական ձեռնարկը:

Ս․Ալավերդյանը հավելեց, որ նմանատիպ սեմինարներ հետագայում ևս կկազմակերպվեն, և մասնաճյուղը միշտ պատրաստ է աջակցելու ուսանողներին գիտաժողովների մասնակցելու հետ կապված հարցերում։