Երևանի պետական համալսարանի Իջևանի մասնաճյուղ

Կիրառական արվեստի ֆակուլտետի ներկայացուցիչները աշխատանքի տոնավաճառում

2018թ. օգոստոսի 18-ին Իջևանի Քանդակների այգում «Քմյունիթի սենթր ֆոր դիվելոփմենթ» տարածաշրջանային համագործակցության ՀԿ թիմը Իջևանի զբաղվածության տարածքային կենտրոնի աջակցությամբ, Եվրոպական միության և ՀՀ Կառավարության կողմից համաֆինանսավորվող «Տավուշի մարզի ինտեգրված և հավասարակշռված տնտեսական զարգացում» ծրագրի շրջանակներում կազմակերպել էր աշխատանքի տոնավաճառ»:

18-08-2018-5

Տոնավաճառում իրենց տաղավարներով ընդգրկված էին Տավուշի մարզի մոտ 50 կազմակերպություններ և անհատներ:

18-08-2018-2

Առանձին տաղավարով ներկայացված էին և ԵՊՀ Իջևանի մասնաճյուղի կիրառական արվեստի ֆակուլտետի դասախոսներ Անուշ և Դոնարա Չիբուխչյանների, շրջանավարտների, մասնավորապես՝ Վարդան Եգանյանի, Անգին Մամյանի աշխատանքները:

18-08-2018-3

Տոնավաճառի բացմանը ներկա էին Տավուշի մարզպետ Վահե Ղալումյանը, ՀՀ տարածքային կառավարման և զարգացման նախարարության տեղական ինքնակառավարման քաղաքականության վարչության պետ Աշոտ Գիլոյանը, Իջևանի քաղաքապետ Վարդան Ղալումյանը:   

18-08-2018-4

Իր ողջույնի խոսքում հասարակական կազմակերպության նախագահ Հասմիկ Ազիբեկյանը շնորհակալություն հայտնեց գործընկեր կազմակերպություններին տոնավաճառի կայացմանն աջակցելու համար, նաև բոլոր նրանց, ովքեր հետաքրքրված են տոնավաճառով և առաջարկեց գնումներ կատարել ու աջակցել տեղական արտադրողին:

18-08-2018-1

Մասնակից կազմակերպությունները և անհատները ներկայացրին իրենց արտադրանքը, թափուր աշխատատեղերը, վերցրեցին կոնտակտներ և CV-ներ, պատախանեցին տոնավաճառի այցելուների հարցերին:

 

Արցախի պետական համալսարանի ուսանողների եռօրյա այցը ԵՊՀ Իջևանի մասնաճյուղ

2018թ. օգոստոսի 11-ին Արցախի պետական համալսարանի մի խումբ ուսանողներ ժամանեցին ԵՊՀ Իջևանի մասնաճյուղ:

12-08-18-1

Մեկ ամիս առաջ Արցախի պետական համալսարանը (ԱրՊՀ) կազմակերպել էր «ԱրՊՀ-2018» միջազգային ուսանողական ճամբար, որին մասնակցել էին նաև ԵՊՀ Իջևանի մասնաճյուղի երեք ուսանողներ:

Մեր բուհի և ԱրՊՀ ուսանողների ծանոթությունը մի քանի օրում վերածվեց շատ ջերմ մտերմության, և ճամբարի մասնակիցներն առաջարկեցին բուհի ղեկավարությանը ԱրՊՀ մի խումբ ուսանողների համար կազմակերպել ճանաչողական այց Իջևան՝ պատրաստակամություն հայտնելով նրանց հյուրընկալել իրենց բնակարաններում:

12-08-18-5

Մի քանի օրվա ընթացքում ԵՊՀ ԻՄ ՈԻԽ-ի մի խումբ ակտիվ անդամներ կազմեցին միջոցառումների ծրագիր, դիմեցին մարզի մի շարք կազմակերպությունների և կյանքի կոչեցին «ԱրՊՀ ուսանողների ճանաչողական այց Իջևան» ծրագիրը:

12-08-18-7

Հյուրերին դիմավորեցին ԵՊՀ ԻՄ-ի տնօրենի օգնական Արման Եգանյանը, դասախոս Սլավիկ Ալավերդյանը և ուսանողական խորհրդի ակտիվ անդամները: Նրանք հյուրերին պատմեցին մասնաճյուղի պատմությունը, ձեռքբերումները, էքսկուրսիա կազմակերպեցին կրթօջախի տարածքում, այնուհետև տեղավորեցին իրենց բնակարաններում:

12-08-18-6

3 օրվա ընթացքում հյուրերի հետ մշտապես գտնվում և բոլոր կազմակերպչական հարցերով զբաղվում էին ՈՒԽ-ի նախագահ Տիգրան Չիբուխչյանը, ՈՒԳԸ նախագահ Հրանտ Ղարագյոզյանը, Արցախի ճամբարի մասնակիցներ Շիրակ Գասպարյանը, Գերասիմ Ալավերդյանը, Արգիշտի Մարգարյանը, ՈՒԽ-ի նախագահության անդամներ Լուիզա Մադաթյանը, Լիանա Ներսիսյանը, Մարգարիտ Թամրազյանը, ՈՒԽ-ի ակտիվ անդամներ Սաթենիկ Հարությունյանը, Մերի Պետրոսյանը, Իրինա Փիրումյանը, Մարիամ Մելիքսեթյանը, Ջավահիր Մնացականյանը, Նվարդ Մելիքսեթյանը և Լավրենտ Նազարյանը:

Օգոստոսի 12-ի առավոտյան տեղի ունեցավ հանդիպում ԵՊՀ ԻՄ-ի տնօրենի ժամանակավոր պաշտոնակատար Արտակ Ցուցուլյանի հետ, որի ժամանակ հյուրերը ներկայացրին ԱրՊՀ-ի կառուցվածքը և գործունեությունը, քննարկվեցին երկու բուհերի և նրանց ուսանողական կառույցների համագործակցության հնարավորությունները:

12-08-18-4

Այնուհետև նրանք ակտիվորեն մասնակցեցին Երիտասարդության միջազգային օրվա միջոցառումների ծրագրին:

12-08-18-2

Արցախցի երիտասարդները ԵՊՀ ԻՄ-ի ուսանողների հետ մասնակցեցին Բադմինթոնի ցուցադրական մրցաշարին՝ մրցելով միմյանց և պրոֆեսիոնալ մարզիկների հետ։

Հյուրերը մասնակցեցին ԵՊՀ ԻՄ-ի տարածքում կազմակերպված միջոցառումներին, ծանոթացան Հայաստանում «Էրազմուս +» ծրագրի միջազգային բարձրագույն կրթական և երիտասարդական շարժունակության հատվածներին, «Մշակութային խճանկարին», «Հեղափոխության դեմքերն ու դեպքերը» բացօթյա ցուցահանդեսին, թատերականացված բացօթյա ակցիա-վիկտորինային, որի ժամանակ արցախցի ուսանողներից մեկը պարգևատրվեց խորհրդանշական նվերով։

12-08-18-14

Օրվա վերջում կայացած տոնական համերգից հետո խումբը խնջույք ունեցավ Իջևանի «ԴՈԿ» հյուրանոց-ռեստորանում:

Հաջորդ օրը միջհամալսարանական ակտիվ խումբը ուղևորվեց Ենոքավանի հարևանությամբ գտնվող «Լաստիվեր-Անապատ» հանգստյան գոտի: Ուսանողները անտառի միջով հետիոտն քայլեցին ավելի քան 3 կմ, տեսան գեղատեսիլ ջրվեժը և հանգստյան գոտու հետաքրքիր փայտե շինությունները: Կազմակերպվեց ինտելեկտուալ խաղ-մրցույթ, որի հաղթողները ստացան պատվոգրեր:

12-08-18-3

Օրվա վերջում ԵՊՀ ԻՄ-ի դահլիճում կազմակերպվեց երաժշտական-պարային երեկույթ:

12-08-18-9

Օգոստոսի 14-ին խմբին միացան ԱրՊՀ ևս 6 ուսանողներ, ովքեր հանգստանում էին Դիլիջանում: Բոլորը նախ այցելեցին Իջևանի դենդրոպարկ, ծանոթացան աշխարհի տարբեր երկրներից բերված յուրօրինակ ծառերին և թփերին, ապա այցելեցին Իջևանի պատմաերկրագիտական թանգարան, որտեղ ծանոթացան պատմական արժեք ներկայացնող ցուցանմուշներին, Իջևանի և Տավուշի մարզի տարածքից հայտնաբերված գտածոներին, մշակույթի նմուշներին, տարազին:

12-08-18-11

Այնուհետև խումբն այցելեց Մակարավանք, ծանոթացավ վանական համալիրի պատմությանը և ճարտարապետությանը, որից հետո ճաշեց Աչաջուր գյուղի հուշաղբյուրներից մեկում:

12-08-18-13

Արցախ մեկնելուց առաջ հյուրերին ԵՊՀ ԻՄ-ի կողմից գրքեր նվիրեց գրադարանի վարիչ Վլադիմիր Պողոսյանը:

Հյուրերը շատ էին տպավորվել ԵՊՀ ԻՄ-ի ընդունելությամբ, կազմակերպված միջոցառումներով, Իջևանի բնությամբ և մշակութային կոթողներով, որոնք նման են Արցախի բնությանը և կոթողներին: Երկու բուհերի ուսանողները խոստացան, որ կշարունակեն համագործակցությունը, և փոխադարձ այցերը կլինեն հաճախակի:

12-08-18-15

Ծրագրի իրականացնմանը մեծապես աջակցել են Իջևանի քաղաքապետարանը, Աչաջրի գյուղապետարանը, Իջևանի գինու, կոնյակի գործարանը, Հայաստանի էլեկտրական ցանցերի «Աղստև» մասնաճյուղը, «Արդշինբանկ» ՓԲԸ Իջևանի մասնաճյուղը, «Լաստիվեր-Անապատ» հանգստյան գոտին:

 

ԵՊՀ ԻՄ-ը հայտարարում է մի շարք թափուր պաշտոնների առկայության մասին

Թափուր աշխատատեղեր

 

«Երևանի պետական համալսարան» հիմնադրամի Իջևանի մասնաճյուղը հայտարարում է հետևյալ թափուր պաշտոնների առկայության մասին.

 

  1. Մասնագիտական կրթության որակի ապահովման (ՄԿՈԱ) բաժնի ավագ մասնագետ

ՀԻՄՆԱԿԱՆ ՊԱՐՏԱԿԱՆՈՒԹՅՈՒՆՆԵՐ

  1. Բաժնի ավագ մասնագետը բաժնի և մասնաճյուղի այլ կառուցվածքային ստորաբաժանումների աշխատողների հետ շփվում և հանդես է գալիս որպես ներկայացուցիչ իր լիազորությունների շրջանակներում:
  2. Բաժնի վարիչի հանձնարարությամբ մասնակցում է բաժնի գործառույթների կատարմանը, այդ թվում՝
  • Մշակել ԵՊՀ ԻՄ-ի որակի ներքին ապահովման (ՈՆԱ) գործընթացները կանոնակարգող փաստաթղթերը, համապատասխան մեխանիզմները և գործիքները:
    • Համակարգել և իրականացնել ՈՆԱ գործընթացները մասնաճյուղում, ուսումնասիրել և մշակել դրանց բարելավման առաջարկներ, ապահովել այդ գործընթացների թափանցիկությունը:
    • Աջակցել ԵՊՀ ԻՄ-ի բոլոր ստորաբաժանումներում որակի ներքին ապահովման գործընթացների իրականացմանը և արդյունքների վերլուծությանը:
    • Համակարգել մասնաճյուղի գործունեության  գնահատման առանցքային ցուցիչների /ԳԱՑ/  վերաբերյալ ամենամյա տեղեկատվության հավաքագրման գործընթացը, իրականացնել այդ տվյալների վերլուծություն:
    • Կազմակերպել ԵՊՀ ԻՄ-ի ինստիտուցիոնալ կարողությունների ինքնագնահատման գործընթացը, պատրաստել զեկույցը, կազմակերպել նրա քննարկումը  և հրապարակումը:
    • Մշակել ԵՊՀ ԻՄ-ի կրթական ծրագրերի մշտադիտարկման և պարբերական վերանայման ընթացակարգեր, համակարգել և աջակցել դրանց իրականացմանը, համակարգել և օժանդակել կրթական ծրագրերի որակի ինքնագնահատման և հավատարմագրման գործընթացներին:
    • Մշակել դասավանդման, ուսումնառության և ուսանողների գնահատման մեթոդների արդյունավետության գնահատման գործիքակազմ, իրականացնել գնահատում և առաջարկել բարելավմանն ուղղված քայլեր:
    • Մասնակցել բաժնի գործունեության շրջանակներում համապատասխան որոշումների կայացմանը:
  1. Բաժնի վարիչի հանձնարարությամբ վարում է ընթացիկ գրագրությունը և գործավարությունը:
  2. Պահպանում է ՀՀ օրենսդրության, ԵՊՀ ԻՄ Կանոնադրության և ներքին իրավական ակտերի պահանջները, աշխատաժամանակի ռեժիմը, նպատակային է օգտագործում աշխատաժամանակը:
  3. Մշտապես ընդլայնում է որակի ապահովման գործընթացների վերաբերյալ մասնագիտական գիտելիքների և հմտությունների շրջանակը:

ՊԱՀԱՆՋՎՈՂ ՈՐԱԿԱՎՈՐՈՒՄՆԵՐ ԵՎ ՀՄՏՈՒԹՅՈՒՆՆԵՐ

  1. Բարձրագույն կրթության առկայություն (առնվազն բակալավրի կրթական աստիճան):
  2. ՀՀ օրենսդրության և իր լիազորությունների հետ կապված այլ ակտերի իմացություն, անհրաժեշտ տեղեկատվության տիրապետում, ինչպես նաև տրամաբանելու, տարբեր իրավիճակներում կողմնորոշվելու ունակություն:
  3. Տվյալների հետ աշխատելու և վերլուծելու կարողություններ:
  4. Հայերենի գերազանց իմացություն, որևէ օտար լեզվի ազատ տիրապետում:
  5. Համակարգչով և ժամանակակից այլ միջոցներով աշխատելու ունակություն:

 

  1. Մասնագիտական կրթության որակի ապահովման (ՄԿՈԱ) բաժնի մասնագետ

ՀԻՄՆԱԿԱՆ ՊԱՐՏԱԿԱՆՈՒԹՅՈՒՆՆԵՐ

  1. Բաժնի մասնագետը բաժնի և մասնաճյուղի այլ կառուցվածքային ստորաբաժանումների աշխատողների հետ շփվում և հանդես է գալիս որպես ներկայացուցիչ իր լիազորությունների շրջանակներում:
  2. Բաժնի վարիչի հանձնարարությամբ մասնակցում է բաժնի գործառույթների կատարմանը, այդ թվում՝
  • Ապահովել ԵՊՀ ԻՄ-ի որակի ներքին ապահովման (ՈՆԱ) գործընթացները կանոնակարգող փաստաթղթերի, համապատասխան մեխանիզմների և գործիքների կիրառումը համապատասխան ստորաբաժանումներում:
    • Իրականացնել ՈՆԱ գործընթացները մասնաճյուղում, հավաքագրել դրանց վերաբերյալ խնդիրներ, մշակել բարելավման առաջարկներ:
    • Աջակցել ԵՊՀ ԻՄ-ի բոլոր ստորաբաժանումներում որակի ներքին ապահովման գործընթացների իրականացմանը:
    • Իրականացնել մասնաճյուղի գործունեության  գնահատման առանցքային ցուցիչների /ԳԱՑ/  վերաբերյալ ամենամյա տեղեկատվության հավաքագրում:
    • Մասնակցել ԵՊՀ ԻՄ-ի ինստիտուցիոնալ կարողությունների ինքնագնահատման, զեկույցի պատրաստման, նրա քննարկման գործընթացին:
    • Աջակցել ԵՊՀ ԻՄ-ի կրթական ծրագրերի մշտադիտարկման և պարբերական վերանայման ընթացակարգերի իրականացմանը, օժանդակել կրթական ծրագրերի որակի ինքնագնահատման և հավատարմագրման գործընթացներին:
    • Իրականացնել ամբիոններում դասավանդման, ուսումնառության և ուսանողների գնահատման մեթոդների արդյունավետության վերաբերյալ գնահատման գործընթացներ, հավաքագրել տվյալներ, կանոնակարգել և մշակել:
    • Մասնակցել բաժնի գործունեության շրջանակներում համապատասխան որոշումների կայացմանը:
      1. Բաժնի վարիչի հանձնարարությամբ վարում է ընթացիկ գրագրությունը և գործավարությունը:
      2. Սահմանված կարգով մասնակցում է ԵՊՀ ԻՄ-ի մշտական կամ ժամանակավոր հանձնաժողովներին կամ աշխատանքային խմբերի աշխատանքներին:
      3. Մշտապես ընդլայնում է մասնագիտական գիտելիքների և հմտությունների շրջանակը:

ՊԱՀԱՆՋՎՈՂ ՈՐԱԿԱՎՈՐՈՒՄՆԵՐ ԵՎ ՀՄՏՈՒԹՅՈՒՆՆԵՐ

  1. ՀՀ օրենսդրության և իր լիազորությունների հետ կապված այլ ակտերի իմացություն, անհրաժեշտ տեղեկատվության տիրապետում, ինչպես նաև տրամաբանելու, տարբեր իրավիճակներում կողմնորոշվելու ունակություն:
  2. Տվյալների հետ աշխատելու կարողություններ:
  3. Հայերենի գերազանց իմացություն, որևէ օտար լեզվի ազատ տիրապետում:
  4. Համակարգչով և ժամանակակից այլ միջոցներով աշխատելու ունակություն:

 

  1. Շրջանավարտների և արտաքին շահակիցների հետ տարվող աշխատանքների համակարգող

ՀԻՄՆԱԿԱՆ ՊԱՐՏԱԿԱՆՈՒԹՅՈՒՆՆԵՐ

  1. Համակարգել, կազմակերպել և ամփոփել ԵՊՀ ԻՄ-ի ուսանողների և շրջանավարտների կողմից աշխատանք գտնելու հիմնախնդիրների ուղությամբ մասնաճյուղում տարվող աշխատանքները:
  2. Կազմակերպել ԵՊՀ ԻՄ-ի ուսանողների մոտ ուսումնառության հետ զուգահեռ աշխատանքային որոշակի փորձի ձևավորման ուղղությամբ տարվող աշխատանքները:
  3. Ապահովել արդյունավետ կապ մասնաճյուղի ուսանողների, շրջանավարտների և պոտենցիալ գործատուների միջև:
  4. Իրականացնել ուսումնասիրություններ և վերլուծություններ տեղական և միջազգային աշխատաշուկայի զարգացման միտումների մասին, ներկայացնել ամփոփ տեղեկատվություն:
  5. Իրականացնել տարբեր ուսումնասիրություններ ԵՊՀ ԻՄ-ի ուսանողների և շրջանավարտների շրջանում նրանց կարիերայի զարգացման ակնկալիքների, աշխատաշուկայում մրցունակության ընթացիկ վիճակի և մի շարք այլ հիմնահարցերի վերաբերյալ:
  6. Կազմակերպել տարբեր տեսակի խորհուրդատվություններ, դասընթացներ, սեմինարներ և գործօգուտ այլ միջոցառումներ ԵՊՀ ԻՄ-ի ուսանողների և շրջանավարտների համար աշխատանք գտնելու և հիմնահարցերի վերաբերյալ, տարածել համապատասխան տեղեկատվություն:
  7. Հաստատել մշտական կապ շրջանավարտների ու մասնաճյուղի միջև և ապահովել համագործակցություն:

ՊԱՀԱՆՋՎՈՂ ՈՐԱԿԱՎՈՐՈՒՄՆԵՐ ԵՎ ՀՄՏՈՒԹՅՈՒՆՆԵՐ

  1. Համալսարանականների մրցունակության բարձրացմանը, մասնաճյուղի և առաջատար ձեռնարկությունների փորձգործակցությանը և շրջանավարտների ու մասնաճյուղի միջև մշտական կապի ամրապնդմանը ու համագործակցության աճին նպաստող հիմնախնդիրները լուծելու համար անհրաժեշտ որակավորումների և հմտությունների առկայություն:
  2. Մասնագիտական կրթության և համապատասխան որակավորումների առկայություն:
  3. Ցանկալի է աշխատանքային փորձի առկայությունը:

 

  1. Դասախոսների վերապատրաստման աշխատանքների համակարգող

 ՀԻՄՆԱԿԱՆ ՊԱՐՏԱԿԱՆՈՒԹՅՈՒՆՆԵՐ

  1. Բաժնի վարիչի հանձնարարությամբ մասնակցել բաժնի ընթացիկ աշխատանքների կատարմանը:
  2. Կատարել բաժնի վարիչի աշխատանքային հանձնարարականները:
  3. Համագործակցել մասնաճյուղի ֆակուլտետների դեկանատների և մասնագիտական ամբիոնների հետ, նրանց հետ համատեղ մշակել ժամանակացույցներ դասախոսների վերապատրաստման աշխատանքներ իրականացնելու նպատակով՝ ըստ մասնագիտությունների:
  4. Մասնաճյուղի տնօրենության և կառուցվածքային ստորաբաժանումների ղեկավարների հետ որոշել աշխատակիցների վերապատրաստման հոսքերը և վերապատրաստման անցկացման տեղերի ցանկը:
  5. Իրականացնել ըստ մասնագիտությունների վերապատրաստումների վերահսկումը, գրանցել դասախոսների հաճախումները և հետևել սահմանված ժամանակացույցի պահպանմանը:
  6. Իրականացնել վերապատրաստվող դասախոսներին հարցումները՝ դասընթացի, դրա մասնակիցների ձեռք բերած գիտելիքների և հմտությունների վերաբերյալ:
  7. Նախապատրաստել դասախոսներին վերապատրաստման վերաբերյալ հրամանների և այլ փաստաթղթերի նախագծերը:
  8. Մշտապես ընդլայնել մասնագիտական գիտելիքների և հմտությունների շրջանակը:

ՊԱՀԱՆՋՎՈՂ ՈՐԱԿԱՎՈՐՈՒՄՆԵՐ ԵՎ ՀՄՏՈՒԹՅՈՒՆՆԵՐ

  1. Բարձրագույն կրթության առկայություն (առնվազն բակալավրի կրթական աստիճան):
  2. Հայերենի գերազանց իմացություն, տրամաբանելու, տարբեր իրավիճակներում կողմնորոշվելու ունակություն:
  3. Համակարգչով և այլ տեխնիկական միջոցներով աշխատելու ունակություն:

 

  1.  Օպերատոր Մարդկային ռեսուրսների կառավարման (ՄՌԿ) բաժնում

ՀԻՄՆԱԿԱՆ ՊԱՐՏԱԿԱՆՈՒԹՅՈՒՆՆԵՐ

  1. ՄՌԿ բաժնի օպերատորը անմիջապես ենթարկվում է բաժնի վարիչին, իր գործառույթային հանձնարարությունները ստանում է բաժնի վարիչից կամ բաժնի վարիչի տեղակալից:
  2. ՄՌԿ բաժնի օպերատորի գործառույթային պարտականություններից են ԵՊՀ ԻՄ-ի ուսումնամեթոդական վարչությունից, ՈՒԳՊՎ և ՄՌԿ բաժիններից ստացվող հրամանները համակարգել, պահանջվող քանակով բազմացնել և նախանշված ժամկետներում տրամադրել ՄՌԿ բաժնի վարիչի տեղակալին:
  3. Մասնաճյուղին այլ ստորաբաժանումներից ՄՌԿ բաժնում համակարգվող բոլոր տեսակի գրությունները, զեկուցագրերը, մտից ելից փաստաթղթերը համակարգել և նախանշված ժամկետում նրանց համակարգչային շարվածքները հանձնել իր ղեկավարին:
  4. Օժանդակել բաժնի հետ կապված բոլոր աշխատանքների արդյունավետ կազմակերպմանը և ժամանակին իրականացմանը:

ՊԱՀԱՆՋՎՈՂ ՈՐԱԿԱՎՈՐՈՒՄՆԵՐ ԵՎ ՀՄՏՈՒԹՅՈՒՆՆԵՐ

  1. Համակարգչային Word, Excel, Access ծրագրերով արագ և արդյունավետ աշխատելու հմտություն:
  2. Հանձնարարված աշխատանքները գրագետ և արդիական պահաանջներին համապատասխան իրականացնելու կարողություններ:

 

  1. Էլեկտրիկ

ՀԻՄՆԱԿԱՆ ՊԱՐՏԱԿԱՆՈՒԹՅՈՒՆՆԵՐ

  1. Մասնաճյուղի սրահներում, լսարաններում, աշխատասենյակներում և միջանցքներում իրականացնել էլեկտրահաղորդման մոնտաժային աշխատանքներ:
  2. Անհրաժեշտության դեպքում իրականացնել էլ.ցանցերի ստեղծման աշխատանքներ:
  3. Ապահովել սելեկտորների, տեսասարքերի, տեսախցիկների, պրոյեկտորների, համակարգչային և ինտերնետային ցանցերի, Wi-Fi-ի անխափան աշխատանքը:
  4. Ժամանակին վերացնել մասնաճյուղի մասնաշենքերի էլ.սնուցման, համակարգչային և հեռախոսային սարքերի անսարքությունները:
  5. Ապահովել մոնտաժային աշխատանքների արդիական պահանջներին բավարարող որակ և աշխատել նյութածախսի խնայողության բարձր գիտակցումով:
  6. Կարողանալ էլեկտրական սարքերը ընթացիկ վերանորոգման ենթարկել և խուսափել խափանված էլ.սարքերը նորով փոխարինելու հեշտ ճանապարհից:

ՊԱՀԱՆՋՎՈՂ ՈՐԱԿԱՎՈՐՈՒՄՆԵՐ ԵՎ ՀՄՏՈՒԹՅՈՒՆՆԵՐ

  1. Մասնագիտական որակավորման և համապատասխան կարգային մասնագետի որակավորումների առկայություն:
  2. Մասնագիտական աշխատանքի փորձի՝ էլեկտրիկից պահանջվող հմտությունների և կարողությունների առկայություն:

 Ցանկացողները պետք է մինչև 2018թ. օգոստոսի 25-ը իրենց ռեզյումեները ուղարկեն  narine.abazyan@bk.ru   էլեկտրոնային հասցեին:

Լրացուցիչ հարցերի դեպքում կարող եք դիմել ԵՊՀ ԻՄ-ի մարդկային ռեսուրսների կառավարման բաժնի վարիչ Կամո Այվազյանին՝ ՀՀ Տավուշի մարզ, ք. Իջևան, Ուսանողական 3, հեռ.՝  094-03-31-61:

 

 

 

 

 

Երիտասարդության միջազգային օրը երիտասարդական մայրաքաղաքում

Օգոստոսի 12-ին ՀՀ 2018թ. երիտասարդական մայրաքաղաք Իջևանում մեծ շուքով նշվեց Երիտասարդության միջազգային օրը:

Ծրագրի բացումը տեղի ունեցավ Իջևանի Քանդակների զբոսայգում։ Ներկա էին ՀՀ կրթության և գիտության նախարար Արայիկ Հարությունյանը, Սպորտի և երիտասարդության հարցերի նախարարի տեղակալ Քրիստինե Ասատրյանը, Տարածքային կառավարման և զարգացման նախարարի տեղակալ Դավիթ Գևորգյանը, Տավուշի մարզպետ Վահե Ղալումյանը, Իջևանի քաղաքապետ Վարդան Ղալումյանը, Հայաստանում ՄԱԿ-ի մշտական համակարգող, Բնակչության հիմնադրամի ներկայացուցիչ Շոմբի Շարփը, համալսարանականներ՝ ԵՊՀ Իջևանի մասնաճյուղի տնօրենի պաշտոնակատար Արտակ Ցուցուլյանի գլխավորությամբ, այլ պաշտոնյաներ, կազմակերպությունների ղեկավարներ, իջևանաբնակ և Երևանից, ՀՀ մարզերից, Արցախից ժամանած հարյուրավոր երիտասարդներ:

18

Բացման ելույթներում պաշտոնյաները շնորհավորեցին երիտասարդներին և տարվա երիտասարդական մայրաքաղաք Իջևանին, կարևորեցին հասարակությունում երիտասարդության դերը և նշանակությունը, ներկայացրին օրվա խորհուրդը, բերեցին հաջողությունների հասած երիտասարդենրի օրինակներ, կոչ արեցին մասնակցել ծրագրով նախատեսված տարբեր միջոցառումներին։

19

Քանդակների զբոսայգուն կից տարածքում տեղի ունեցավ բադմինթոնի ցուցադրական մրցաշար, որին կարող էին մասնակցել նաև ցանկություն ունեցող երիտասարդները և մրցել պրոֆեսիոնալ մարզիկների հետ կամ էլ հետևել նրանց ցուցադրական ելույթներին։

IMG_0492

Իջևանի գորգագործական կոմբինատի պատին Սպորտի և երիտասարդության հարցերի նախարարության և «Երիտասարդական միջոցառումների իրականացման կենտրոն» ՊՈԱԿ-ի ջանքերով կազմակերպվեց «ՍթրիթԱրթ»՝ հավասար հնարավորությունների, խաղաղության, հեղափոխության, բնապահպանության թեմաներով։ Նկարիչների մեջ էին ԵՊՀ ԻՄ-ի ուսանողներ Գուրգեն Դալյանը և Իրինա Փիրումյանը:

11

Տավուշի մարզպետարանի դահլիճում տեղի ունեցավ կառավարության ներկայացուցիչների մասնակցությամբ «Երիտասարդների հին խնդիրների լուծման նոր տեսլականը» թեմայով հանդիպում-քննարկում, որն իրականացրեց «Հոդված 3» ակումբը։ 

39245742_1837380953006830_2134331637800894464_n

Այնուհետև նույն դահլիճում կայացավ «Երիտասարդական հնարավորություններ» խորագրով կոնֆերանս, որը կազմակերպել էին ՄԱԿ-ի Բնակչության հիմնադրամը, Իջևանի «ԻնֆոՏուն»-ը և Եվրասիա համագործակցություն հիմնադրամի հյուսիսային մասնաճյուղը։

Հայաստանի երիտասարդական հիմնադրամի Տավուշի մարզային կենտրոնում տեղի ունեցավ «Հաջողության իմ բանաձևը» թեմայով քննարկում, որի ժամանակ որոշակի փորձառություն ունեցող երիտասարդ աշխատողները իրենց փորձը փոխանցեցին ներկա գտնվող երիտասարդներին:

Բնականաբար, միջոցառումներ տեղի ունեցան նաև ԵՊՀ Իջևանի մասնաճյուղում:

16

«Յելլ» էքստրիմ պարկի հիմնադիր Տիգրան Չիբուխչյանը ներկայացրեց իր բիզնեսի հաջողության պատմությունը:

14174

Միավորված ազգերի զարգացման ծրագրի աշխատակից Սիրանուշ Մանթարլյանը ներկաներին ծանոթացրեց «Ինտեգրված Գյուղական զբոսաշրջության զարգացում» ծրագրի կողմից Տավուշի մարզում իրականացվող զբոսաշրջային ծրագրերին:

17

Հայաստանում «Էրազմուս +» ծրագրի ազգային գրասենյակի տնօրեն Լանա Կառլովան ներկայացրեց ծրագրի միջազգային բարձրագույն կրթական հատվածը, բուհերի համագործակցության կարգը, ուսանողների և դասախոսների փոխանակման ծրագրերը:

15

 

«Հայ առաջադեմ երիտասարդություն» ՀԿ փոխնախագահ Գրիգոր Երիցյանն էլ ներկայացրեց «Էրազմուս+» ծրագրի երիտասարդական շարժունակության հատվածը:

14Յուրօրինակ միջոցառում էր «Հայ առաջադեմ երիտասարդություն» ՀԿ-ի կողմից կազմակերպված «Մշակութային խճանկարը», որի ընթացքում Գերմանիայից, Շվեդիայից, Բելգիայից, Մոլդովայից, Ֆրանսիայից, Էստոնիայից, Վրաստանից և Ուկրաինայից 30 երիտասարդներ ներկայացրին իրենց երկիրը, մշակույթը, խոհանոցը և սովորույթները։

13

Միջոցառման ընքացքում ԵՊՀ ԻՄ-ի կիրառական արվեստի ֆակուլտետի դեկորատիվ-կիրառական արվեստի և դիզայնի ամբիոնի ասիստենտներ Անուշ Չիբուխչյանը և Դոնարա Չիբուխչյանը անցկացրին ապակենկարչության (վիտրաժ) վարպետության դաս՝ զուգահեռաբար ներկայացնելով նաև ֆակուլտետի ուսանողների և դասախոսների աշխատանքները: Միջոցառման ընթացքում ԵՊՀ ԻՄ այցելեց ՀՀ կրթության և գիտության նախարար Արայիկ Հարությունյանը, հանդիպում ունեցավ բուհի ղեկավարության հետ:

12

Քանդակների զբոսայգում երեկոյան մեկնարկեց «Հոդված 3» ակումբի կողմից իրականացվող «Հեղափոխության դեմքերն ու դեպքերը» բացօթյա ցուցահանդեսը, և անցկացվեց ՄԱԿ-ի կայուն զարգացման 17 նպատակներին նվիրված թատերականացված բացօթյա ակցիա-վիկտորինա, որի հաղթողները պարգևատրվեցին խորհրդանշական նվերներով։

IMG_0578

Օրվա վերջում տեղի ունեցավ համերգ, որի ժամանակ գեղեցիկ համարներով հանդես եկան Սրբուկը և «Տիեզերք Բենդը»։

IMG_0581

 

Կայացավ «Կյանքի հմտություններ» դասընթացը

2018թ. օգոստոսի 10-ին ԵՊՀ ԻՄ-ի դահլիճում կայացավ «Կյանքի հմտություններ» խորագրով 8 ժամ տևողությամբ դասընթացը, որն իրականացվեց «Կոկա-Կոլա Հելլենիկ Բոթլինգ Քամփնի Արմենիա» ընկերության «ԵՐԻՏԱՍԱՐԴՆԵՐԻ ԶԱՐԳԱՑՈՒՄ» 2018-2020թթ. եռամյա ծրագրի շրջանակներում՝ IAB Բիզնեսի Միջազգային Ակադեմիայի կողմից:

10-08-2018-4

Դասընթացին մասնակցեցին Տավուշի մարզի մոտ 80 երիտասարդներ, այդ թվում՝ ԵՊՀ Իջևանի մասնաճյուղի մի քանի տասնյակ ուսանողներ և շրջանավարտներ:

10-08-2018-11

Բացման խոսքով հանդես եկավ ԵՊՀ ԻՄ-ի տնօրենի ժամանակավոր պաշտոնակատար Արտակ Ցուցուլյանը, ով ողջունեց մասնակիցներին, շնորհակալություն հայտնեց կազմակերպիչներին, կոչ արեց լինել ակտիվ և յուրացնել այն հմտությունները, որոնք կնպաստեն իրենց առաջընթացին:

10-08-2018-1

IAB Բիզնեսի Միջազգային Ակադեմիայի տնօրեն Թամարա Հովհաննիսյանը ներկայացրեց ծրագրի կառուցվածքը, դասընթացավարին և մենթորներին:

10-08-2018-2

Դասընթացում ներառված թեմաներն էին.

  • Ինքնաճանաչում և ինքնազարգացում,
  • Մասնագիտական կապերի ստեղծում և ամրապնդում,
  • Հետադարձ կապի հմտություններ,
  • Ես՝ որպես հաղորդակցվող:

10-08-2018-5

Դասընթացավար Հայարփի Սահակյանը յուրաքանչյուր թեմայի վերաբերյալ ներկայացրեց տեսական նյութ, այնուհետև մասնակիցներն ուղղեցին իրենց հարցերը, լրացրին թեստեր, կատարեցին խմբային աշխատանքներ: Դասընթացի մասնակիցները հանդես եկան ելույթներով և դերային խաղերով, որոնց ժամանակ նրանց օգնում էին մենթորները, ովքեր հիմնականում Տավուշի մարզի գործատուներ և տարբեր կազմակերպությունների ղեկավարներ էին:

10-08-2018-16

 

Երիտասարդները սովորեցին, թե ինչպես վերլուծել սեփական հնարավորությունները, ճիշտ ձևակերպել նպատակ և դրան հասնելու ճանապարհը, ինչին ուշադրություն դարձնել CV գրելու, գործատուների հետ նամակագրութան և աշխատանքի հարցազրույցի ժամանակ, ունենալ հաշիվ LinkedIn սոցիալական ցանցում և այլ հմտություններ:

10-08-2018-13

 

Գործատուները փոխանցեցին իրենց փորձը, նաև աշխատանքի առաջարկներ կատարեցին մասնակիցներից մի քանիսին, ինչը խոսում է ծրագրի արդյունավետության և ազդեցության մասին:

10-08-2018-8

Վերջում Թամարա Հովհաննիսյանը շնորհակալություն հայտնեց մասնակիցներին և մենթորներին, դասընթացի կազմակերպմանը և մասնակիցների հավաքագրմանը աջակցած անձանց և կազմակերպություններին, մասնավորապես ԵՊՀ Իջևանի մասնաճյուղին, և կոչ արեց ակտիվորեն տարածել ծրագրի վերաբերյալ հայատարարությունը՝ նորանոր երիտասարդներ ներգրավելու համար:

10-08-2018-17

Հաջորդ դասընթացին մասնակցելու համար կարող եք լրացնել այս հայտը՝ https://goo.gl/oRf48T, իսկ եթե ցանկանում եք գրանցվել որպես մենթոր, անհրաժեշտ է լրացնել հետևյալ հայտը՝ https://goo.gl/qE9X3W: