2018թ. հոկտեմբերի 5-7-ին ԵՊՀ ԻՄ-ի անգլերեն լեզվի և գրականության ամբիոնի վարիչի պաշտոնակատար, բ.գ.թ., դոցենտ Ք.Հարությունյանը, բ.գ.թ., ասիստենտ Ն.Գասպարյանը, բ.գ.թ., ասիստենտ Ա.Կարապետյանը, դասախոսներ Է.Թեմրազյանը և Ա.Սիմոնյանը Երևանում մասնակցեցին Հայաստանում Բրիտանական Խորհրդի կողմից անգլերեն դասավանդողների համար կազմակերպված վերապատրաստման դասընթացի:

Մասնակցում էին ՀՀ անգլերեն լեզվի դասախոսներ և ուսուցիչներ, ինչպես նաև մասնագետներ հարևան երկրներից, այդ թվում՝ Իրանի Իսլամական Հանրապետությունից և Վրաստանի Հանրապետությունից:        

Եռօրյա դասընթացը վարում էր բրիտանացի հայտնի մասնագետ Փեննի Ուրը, ով հեղինակավոր մասնագետ է և առավելապես հայտնի է իր աշխատանքներով դասավանդման մեթոդիկայի բնագավառում:

Նա կրթություն է ստացել Մեծ Բրիտանիայում՝ Օքսֆորդի և Քեմբրիջի համալսարաններում: Այնուհետև նա տեղափոխվել է Իսրայել, որտեղ աշխատել է որպես ուսուցիչ: Փեննի Ուրն ունի 35 տարվա դասավանդման փորձ: Նա վերապատրաստման դասընթացներ է վարում ամբողջ աշխարհում: Ուրի հեղինակած դասագրքերի թվում է քերականության և բառապաշարի յուրացման վերաբերյալ դասագրքերի շարքը, որը լայն կիրառություն ունի նաև Հայաստանում:

Վերապատրաստումն անցավ շատ ակտիվ և ջերմ մթնոլորտում:  Երեք օրվա ընթացքում Փեննի Ուրը ներկայացրեց անգլերենի դասավանդման մեթոդաբանության առանձնահատկությունները, գիտական հետազոտությունների և լեզվի դասավանդման միջև կապը, տարբեր ընդունակություններով և հնարավորություններով լսարանի հետ աշխատելու առանձնահատկությյունները, ինչպես նաև իր դասավանդման գաղտնի մեթոդները:  

2018թ. հոկտեմբերի 5-ին ԵՊՀ ԻՄ-ի ուսումնամեթոդական վարչության պետ Ա.Դավթյանը, Հայոց լեզվի և գրականության ամբիոնի վարիչ Վ.Ավագյանը հանդիպում ունեցան ՀՀ Տավուշի մարզի սահմանամերձ Բերքաբեր գյուղի միջնակարգ դպրոցի ղեկավար և ուսուցչական անձնակազմի, ավարտական դասարանի աշակերտների հետ:     

Հանդիպման նպատակն էր բուհ-դպրոց համագործակցության խորացումը, մասնավորապես՝ ԵՊՀ Իջևանի մասնաճյուղի ընդունելության քննական առարկաների կապակցությամբ դպրոցի անձնակազմի և աշակերտության կարծիքներն ու առաջարկությունները լսելը:

Նախ Ուսումնամեթոդական վարչության պետ Ա.Դավթյանը աշակերտներին ներկայացրեց ԵՊՀ ԻՄ-ում գործող ընդունելության կարգը, բուհի մասնագիտությունները և դրանց առանձնահատկությունները, աշխատաշուկայի պահանջարկով պայմանավորված հնարավոր փոփոխությունները:

Ապա ԵՊՀ Իջևանի մասնաճյուղի ներկայացուցիչները պատասխանեցին աշակերտների ուղղած հարցերին:

Հանդիպման ընթացքում ձեռք բերվեց նախնական պայմանավորվածություն տեսակապի միջոցով պարբերաբար (ըստ ժամանակացույցի) կապ հաստատել աշակերտների հետ և պատասխանել նրանց հետաքրքրող մասնագիտական հարցերին՝ 3 առարկաների («Հայոց լեզու և գրականություն», «Օտար լեզու և գրականություն» («Անգլերեն լեզու և գրականություն») և «Մաթեմատիկա») առնչությամբ:

Ընդգծվեց, որ սահմանամերձ գյուղերի դպրոցների աշակերտներին օժանդակելու նպատակով հեռավար ուսուցում կազմակերպելու համալսարանական ծրագիրը լինելու է շարունակական և ընդգրկելու է սահմանամերձ նոր համայնքներ:     

2018թ. հոկտեմբերի 4-ին «Երևանի պետական համալսարան» հիմնադրամի Իջևանի մասնաճյուղում կայացավ Գիտական խորհրդի նիստ՝ Ա. Վ. Ցուցուլյանի նախագահությամբ:  

Գիտխորհրդի նիստում քննարկվեցին օրակարգով նախատեսված հետևյալ հարցերը.

1. ԵՊՀ ԻՄ-ի գիտական խորհրդի՝ 2018-2019 ուստարվա 1-ին կիսամյակի նիստերի ժամանակացույցի հաստատում (զեկուցող՝ Ա.Վ. Ցուցուլյան)
2. 2018-2019 ուստարվա 1-ին կիսամյակի անվանական կրթաթոշակ ստացող ուսանողների ցուցակի հասատատում (զեկուցող՝ Ա.Դավթյան)
3. ԵՊՀ ԻՄ-ի՝ 2019թ. բակալավրի կրթական ծրագրերով ընդունելության մասնագիտությունների ցանկի քննարկում (զեկուցող՝ Ա.Ցուցուլյան)
4. Ընթացիկ հարցեր.
   • ԵՊՀ ԻՄ-ի գիտական խորհրդում ընտրովի անդամների համամասնությունների և ԵՊՀ ԻՄ-ի կառուցվածքային ստորաբաժանումներին հատկացվող տեղերի չափաբաժինների հատկացում (զեկուցող՝ Ա.Ցուցուլյան)
   • ԵՊՀ ԻՄ-ում պրոֆեսորադասախոսական կազմի՝ առանց մրցույթի տարբեր պաշտոններում հրամանագրման մասին (զեկուցող՝ Ա.Ցուցուլյան)
   • ԵՊՀ ԻՄ-ում ամբիոնների վարիչների թափուր պաշտոնների համար մրցույթ հայտարարելու մասին (զեկուցող՝ Մ.Աթոյան)
   • ԵՊՀ ԻՄ-ի ընդհանուր մաթեմատիկայի և բնագիտության ամբիոնի ասիստենտ, ֆ.մ.գ.թ. Կ.Հովսեփյանի՝ դոցենտի գիտական կոչում ստանալու համար սահմանված գործընթացին մասնակցելու հարցը (զեկուցող՝ Մ.Աթոյան):

Ղեկավարվելով Երևանի պետական համալսարանի Իջևանի մասնաճյուղի կանոնադրության 28-րդ կետի 2-րդ ենթակետով և Երևանի պետական համալսարանի Իջևանի մասնաճյուղի գիտական խորհրդի կանոնակարգի 4-րդ կետի 16-րդ ենթակետով՝ Երևանի պետական համալսարանի Իջևանի մասնաճյուղի գիտական խորհուրդը հաստատեց ԵՊՀ ԻՄ-ի գիտական խորհրդի՝ 2018-2019 ուստարվա առաջին կիսամյակի նիստերի ժամանակացույցը:

Ղեկավարվելով Երևանի պետական համալսարանի Իջևանի մասնաճյուղի կանոնադրության 21-րդ կետի 7-րդ ենթակետով և Երևանի պետական համալսարանի Իջևանի մասնաճյուղի գիտական խորհրդի կանոնակարգի 4-րդ կետի 7-րդ ենթակետով՝ Երևանի պետական համալսարանի Իջևանի մասնաճյուղի գիտական խորհուրդը հաստատեց 2018-2019 ուստարվա 1-ին կիսամյակի անվանական կրթաթոշակ ստացող ուսանողների ցուցակը:

Ղեկավարվելով Երևանի պետական համալսարանի Իջևանի մասնաճյուղի կանոնադրության 23-րդ կետի և Երևանի պետական համալսարանի Իջևանի մասնաճյուղի գիտական խորհրդի կանոնակարգի  7-րդ կետով՝ Երևանի պետական համալսարանի Իջևանի մասնաճյուղի գիտական խորհուրդը հաստատեց ԵՊՀ ԻՄ-ի գիտական խորհրդում ընտրովի անդամների համամասնությունը և կառուցվածքային ստորաբաժանումներին հատկացվող տեղերի չափաբաժինները:

Հիմք ընդունելով Երևանի պետական համալսարանի Իջևանի մասնաճյուղի ամբիոնի վարիչի ընտրության ընթացակարգի 11-րդ կետը, ղեկավարվելով Երևանի պետական համալսարանի Իջևանի մասնաճյուղի կանոնադրության 21-րդ կետի 14-րդ ենթակետով և Երևանի պետական համալսարանի Իջևանի մասնաճյուղի գիտական խորհրդի կանոնակարգի 4-րդ կետի 14-րդ ենթակետով՝ Երևանի պետական համալսարանի Իջևանի մասնաճյուղի գիտական խորհուրդը հաստատեց ԵՊՀ ԻՄ-ի որակավորման մանդատային հանձնաժողովի կազմը:

Հաշվի առնելով, որ ԵՊՀ ԻՄ-ի բնական գիտությունների ֆակուլտետի ընդհանուր մաթեմատիկայի և բնագիտության ամբիոնի դոցենտ, ֆիզ.մաթ. գիտ. թեկնածու Կարեն Հայկի Հովսեփյանի գիտամանկավարժական գործունեության տվյալները լիովին համապատասխանում են ՀՀ կառավարության 2001 թ. հուլիսի 9-ի «Հայաստանի Հանրապետությունում գիտամանկավարժական կադրերին պրոֆեսորի և դոցենտի գիտական կոչումներ շնորհելու մասին» N 615 որոշման 2-րդ՝ «Դոցենտի գիտական կոչում շնորհելը» բաժնի բ. ենթակետի, ինչպես նաև այդ հարցում նորմատիվային այլ փաստաթղթերի պահանջներին, ղեկավարվելով Երևանի պետական համալսարանի Իջևանի մասնաճյուղի կանոնադրության 21-րդ կետի 16-րդ ենթակետով և Երևանի պետական համալսարանի Իջևանի մասնաճյուղի գիտական խորհրդի կանոնակարգի 4-րդ  կետի 16-րդ ենթակետով՝ Երևանի պետական համալսարանի Իջևանի մասնաճյուղի գիտական խորհուրդը որոշեց.

1. Երաշխավորել ԵՊՀ ԻՄ-ի բնական գիտությունների ֆակուլտետի ընդհանուր մաթեմատիկայի և բնագիտության ամբիոնի ասիստենտ, ֆիզիկամաթեմատիկական գիտությունների թեկնածու Կարեն Հայկի Հովսեփյանին դոցենտի գիտական աստիճան ստանալու համար:
2. Միջնորդել ԵՊՀ գիտական խորհրդին՝ ԵՊՀ ԻՄ-ի բնական գիտությունների ֆակուլտետի ընդհանուր մաթեմատիկայի և բնագիտության ամբիոնի ասիստենտ, ֆիզիկամաթեմատիկական գիտությունների թեկնածու Կարեն Հայկի Հովսեփյանին շնորհել դոցենտի գիտական կոչում և համապատասխան առաջարկով դիմել ՀՀ ԲՈՀ:

2018թ. hոկտեմբերի 3-ին համագործակցության ծրագրերի քննարկման և նախնական պայմանավորվածություն ձեռք բերելու նպատակով տեղի ունեցավ հանդիպում ՀՀ ԿԲ Դիլիջանի ուսումնահետազոտական կենտրոնի  և ԵՊՀ ԻՄ-ի աշխատակիցների միջև:

Հանդիպմանը մասնակցում էին ՀՀ ԿԲ Դիլիջանի ուսումնահետազոտական կենտրոնի ղեկավար Արմեն Նուրբեկյանը, ղեկավարի օգնական Սյուզան Մկրտչյանը, ՀՀ  ԿԲ-ի  դրամավարկային  և  ֆինանսական    վիճակագրության  բաժնի  պետ Արթուր Ղալթախչյանը, տնտեսական հետազոտությունների վարչության տնտեսագետներ Ալիկ Շիրխանյանը և Կարեն Պողոսյանը, ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը, Տնտեսագիտության ֆակուլտետի դեկանի պաշտոնակատար Գ.Ավետիսյանը, ՄԿՊԿ բաժնի վարիչ Լ.Բեգինյանը, «Ֆինանսներ» կրթական ծրագրի պատասխանատու Ա.Սարիբեկյանը, արտադրական պրակտիկայի ղեկավար Ա.Ալեքսանյանը, դասախոսներ Մ.Աթաբեկյանը և Հ.Հայրապետյանը:

Ա.Նուրբեկյանը ներկայացրեց ուսումնահետազոտական կենտրոնի նպատակները, խնդիրները և ստորաբաժանումները (Դրամավարկային քաղաքականության, Վիճակագրության, Հետազոտությունների  վարչությունները):

Ա.Ցուցուլյանը ներկայացրեց ԵՊՀ ԻՄ-ի՝ հանդիպմանը մասնակցող աշխատակիցներին և համագործակցության ծրագրերը, որոնք կարելի է միասին իրականացնել:

Քննարկումների ժամանակ Տնտեսագիտության ֆակուլտետի դեկանը  ներկայացրեց ֆակուլտետում գործող կրթական ծրագրերը և համագործակցության հնարավորությունները:

Գ.Ավետիսյանը մասնավորապես անդրադարձավ կրթական ծրագրերի համատեղ քննարկումների, պրակտիկայի  և ավարտական աշխատանքների փոխկապակցված իրականացմանը, ԿԲ-ում դասապրոցեսների, սեմինարների, ճանաչողական այցերի կազմակերպմանը, մասնաճյուղում  ԿԲ-ի մասնագետների և ուսանողների ու դասախոսների հանդիպումների կազմակերպմանը, ԿԲ-ի համապատասխան բաժնի կողմից իրականացվող գիտահետազոտական աշխատանքներում մասնաճյուղի դասախոսների և ուսանողների ներգրավմանը, մի շարք այլ հարցերի:

Հանդիպման ընթացքում  կայացավ  կառուցողական քննարկում, և ձեռք բերվեցին մի շարք պայմանավորվածություններ, որոնք իրենց դրական ազդեցությունը կունենան մասնաճյուղի ուսումնական գործընթացի բարելավման վրա:

Մասնավորապես՝ ԿԲ-ի լավագույն մասնագետները սեմինարների անցկացման նպատակով այց կկատարեն մասնաճյուղ, ըստ նպատակահարմարության բուհին կտրամադրվեն տեղեկություններ ԿԲ-ում իրականացվող սեմինար-քննարկումների մասին: Մեր ուսանողները իրենց հետազոտական աշխատանքներով կարող են հանդես գալ ԿԲ-ում, ԿԲ-ի կողմից իրականացվող հարցազրույցի ընթացքում ընտրված ուսանողներն իրենց  պրակտիկան որպես նախադիպլոմային փուլ կիրականացնեն ԿԲ-ում: Մասնաճյուղի ուսանողները կարող են նաև ճանաչողական այց կատարել ԿԲ-ի թանգարան՝ ներկայացվող ցուցանմուշների միջոցով ծանոթանալու  դրամի պատմությանը:

Հանդիպման վերջում ԵՊՀ Իջևանի մասնաճյուղի աշխատակիցներն այցելեցին թանգարան:

2018թ. սեպտեմբերի 27-ին ԵՊՀ ԻՄ-ի ընդհանուր տնտեսագիտության ամբիոնի ասիստենտ, տ.գ.թ. Լ.Կլեկչյանի նախաձեռնությամբ «Տնտեսագիտության տեսություն» մասնագիտության 4-րդ կուրսի ուսանողները «Ֆինանսներ-2» դասընթացի շրջանակներում ճանաչողական այց կատարեցին “NASDAQ OMX Armenia” ՀՀ ֆոնդային բորսա:

Այցելությունը կազմակերպվեց նույն ամբիոնի դասախոս Ա.Սարիբեկյանի և “NASDAQ OMX Armenia” ՀՀ ֆոնդային բորսայի մարքեթինգի բաժնի պատասխանատու Փ.Ավագյանի համատեղ ջանքերով:

Հայաստանի ֆոնդային բորսայի և կենտրոնական դեպոզիտարիայի մասնագետներ Ա.Խաչատրյանը և Ա.Մուրադյանը անցկացրին «ՀՀ ֆոնդային բորսան» և «ՀՀ կենսաթոշակային համակարգը» թեմաներով սեմինարներ:

Նրանք պրեզենտացիաների ուղեկցությամբ ներկայացրին բորսայի հիմնական գործառույթները, արդի խնդիրները և զարգացման հեռանկարները:

Ուսանողները սեմինարավարներին ուղղեցին իրենց հետաքրքրող հարցերը, որոնք առավելապես վերաբերում էին արժեթղթերի շուկայի գործիքներին, և ստացան սպառիչ պատասխաններ:

Հանդիպման վերջում քննարկվեցին հետագա այցելությունների և արտադրական՝ նախադիպլոմային պրակտիկայի անցկացման հնարավորությունները: