2019թ. փետրվար-մարտ ամիսներին ԵՊՀ ԻՄ-ի «Ընդհանուր մանկավարժություն» մասնագիտության («Տարրական  մանկավարժություն  և  մեթոդիկա» կրթական ծրագիր)  3-րդ  կուրսի  ուսանողներն իրենց արտադրական (մանկավարժական) պրակտիկան են իրականացնում Իջևանի  №1  հիմնական  դպրոցում:

Ծրագրի համաձայն՝ պրակտիկան կազմակերպվում է շարունա­կա­կանության ու հաջորդականության սկզբունքներով և մասնագիտական կոմպետեն­տության աստիճանական զարգացման մեխանիզմով` ղեկավարներ Մանկավար­ժության և հոգեբանության ամբիոնի  դասախոսներ, հ.գ.թ., ասիստենտ  Ա.Քամալյանի  և  մ.գ.թ., ասիստենտ Ա.Սարգսյանի  վերահսկողությամբ: 

Պրակտիկայի սկզբում ուսանողները հանդիպումներ են ունեցել մասնագիտական ամբիոնին կցված ղեկավարների, դպրոցի ուսումնական գծով փոխտնօրեն Ա.Պետ­րոսյանի և դպրոցի կողմից նշանակված պրակտիկայի ղեկավարների հետ: Ուսանողներին ներկայացվել են պրակտիկայի  նպատակը և անելիքները, դպրոցում գործող նորմերն ու կարգուկանոնը, հստակեցվել են հանձնարարականները, կատարվել է ուսանողների բաշխում ըստ դասվար­ների:        

Պրակտիկայի ընթացքը  բավականին  հագեցած  է ուսանողների  համար: Մանկավարժի գործունեություն իրականացնելու համար նրանք կատարում են ակտիվ աշխա­տանք­ներ՝ զարգացնելով դասի պլան կազմելու (նպատակները, խնդիրները, քայլերը և իրա­կանացման մեթոդները որոշելու), դաս վարելու, արդյունքները քննար­կելու և  մեկնաբանելու իրենց կարողությունները:

Հմուտ դասվարներն  իրենց փորձը փոխանցում  են ուսանողներին և նրանց  նախապատրաստում  ուսուցչի աշխատանքին:

 2019թ. մարտի 2-ին ԵՊՀ Իջևանի մասնաճյուղում կայացավ «Ինչպե՞ս գրել ավարտական աշխատանք» թեմայով սեմինար-քննարկումը, որը վարեց ԵՊՀ ԻՄ-ի տուրիզմի կառավարման և մշակութաբանության ամբիոնի վարիչի ԺՊ, ա.գ.թ., դոցենտ Գ.Հովհաննիսյանը:

 Քննարկմանը ներկա էին մասնաճյուղի ավարտական կուրսերի ուսանողներ:

 «Գիտահետազատական  աշխատանք  կատարելու  հիմնական  սկզբունքները» մեթոդական ձեռնարկի համահեղինակ Գ.Հովհաննիսյանի խոսքով՝ կազմակերպված սեմինար-քննարկման նպատակն էր ավարտական կուրսերի ուսանողներին հաղորդակից դարձնել ավարտական աշխատանքների կատարման մեթոդաբանությանը և մեթոդներին, դրանց ձևավորման և ձևակերպման կանոններին, ուսանողներին պատրաստել ավարտական աշխատանքների պաշտպանությանը, նրանց ներկայացնել հրապարակային պաշտպանության ժամանակ աշխատանքների գնահատման սանդղակը:

 Սեմինար-քննարկման ընթացքում ներկայացվեցին գիտական հետազոտության առանձնահատկությունները՝ գործընթացի նպատակաուղղվածությունը, անհայտի բացահայտումը, նորի որոնումը և հետազոտության հատուկ մեթոդների օգտագործումը:

 Տրվեց ավարտական աշխատանքի՝ որպես գիտահետազոտական աշխատանքի սահմանումը, այն է՝ ավարտական աշխատանքն ուսանողի մասնագիտական որակավորումը՝ տեսական ու գործնական պատրաստվածությունը հաստատող ուսումնասիրություն է: Բակալավրի ավարտական աշխատանքն ինքնուրույն, տեսական կամ կիրառական նշանակության աշխատանք է, որն արտացոլում է տվյալ մասնագիտության շրջանակներում ուսանողի ձեռք բերած գիտելիքները կիրառելու, մասնագիտական ոլորտին առնչվող խնդիրներ բարձրացնելու և լուծումներ առաջադրելու հմտություններ:

 Ներկայացվեցին գիտական հետազոտության իրականացման վերաբերյալ որոշ մեթոդաբանական մոտեցումներ, այսինքն՝ բացատրվեց, թե ինչ է նշանակում գիտականորեն ուսումնասիրել՝ լինել գիտականորեն օբյեկտիվ, չանտեսել փաստերը՝ ելնելով դրանք բացատրելու կամ դրանց գործնական կիրառությունը ցույց տալու դժվարությունից, քանզի գիտության մեջ նորի էությունը ոչ միշտ է տեսանելի հետազոտողին:  

Ընդգծվեց, որ գիտականորեն հետազոտել նշանակում է չափել այն ամենը, ինչը հնարավոր է չափել, ցույց տալ ուսումնասիրվող օբյեկտի կամ երևույթի հարաբերակցությունն արդեն հայտնիի հետ, ոչ միայն դիտել, այլև տեսնել, նկատել կարևոր մանրամասնություններ, մեծը փոքրի մեջ՝ այդ ընթացքում իհարկե չշեղվելով հետազոտության գլխավոր գծից:

 Նշվեց, որ գիտական հետազոտությամբ բավարար չէ միայն հաստատել գիտական նոր փաստ, կարևոր է դրան տալ գիտական բացատրություն, ցույց տալ դրա ճանաչողական, տեսական կամ գործնական նշանակությունը:   

 Անդրադարձ կատարվեց նաև գիտության լեզվին, որի հիմքը կազմում են տերմինաբանական բնույթի այնպիսի բառեր և բառակապակցություններ, ինչպիսիք են թեմայի արդիականություն, ասպեկտ, գիտաենթադրություն, դեդուկցիա, ինդուկցիա, գիտական հետազոտություն, հետազոտության նպատակ, խնդիրներ, օբյեկտ, առարկա, կատեգորիա, հետազոտության մեթոդ, գիտական ճանաչողության մեթոդաբանություն, գիտական փաստ, հասկացություն, դատողություն, տեսություն, սկզբունք, հետևություն, եզրակացություն և այլն:

 Ցուցադրվեց հետազոտության կառուցվածքը, գիտական հետազոտության ընթացքի ընդհանուր սխեման.

1. Ընտրված թեմայի արդիականության (ակտուալության) հիմնավորում:
2. Հետազոտության նպատակի և խնդիրների սահմանում:
3. Հետազոտության օբյեկտի և առարկայի սահմանում:
4. Հետազոտության իրականացման մեթոդի (մեթոդիկայի) ընտրություն:
5. Հետազոտության գործընթացի նկարագրություն:
6. Ստացված արդյունքների հետևությունների ձևակերպում և գնահատում:

 Ամփոփելով սեմինարի ընթացքում քննարկված հարցերն ու խնդիրները՝ պարոն Հովհաննիսյանը կատարեց հետևյալ հետևությունները.

• գիտահետազոտական աշխատանք գրելիս հեղինակը պետք է իմանա գիտական հետազոտություն կատարելու հիմնական սկզբունքները,
• ուսումնասիրության թեմայի ընտրությունից ու հաստատումից հետո անհրաժեշտ է զբաղվել թեմային առնչվող նյութերի՝ սկզբնաղբյուրների և ուսումնասիրությունների հավաքմամբ («մրջյունի» փուլ),
• այնուհետև հարկ է ընթերցել հավաքված գրականությունը՝ ընթացքում առանձնացնելով ուսումնասիրության թեմային վերաբերող նյութերը («մեղվի» փուլ):  

 Վերջում սեմինար-քննարկման մասնակիցներն ստացան իրենց հետաքրքրող հարցերի պատասխանները:

2019թ. մարտի 1-ին վերսկսվեցին Տավուշի մարզի հանրակրթական դպրոցների ավարտական դասարանների աշակերտների համար ԵՊՀ Իջևանի մասնաճյուղի բարձրակարգ դասախոսների մասնակցությամբ ակնարկային դասախոսությունները:

ԵՊՀ ԻՄ-ի ներկայացուցիչները՝ Մասնագիտական կողմնորոշման և պրակտիկայի կազմակերպման բաժնի վարիչ, պ.գ.թ, ասիստենտ Լիաննա Բեգինյանը, նույն բաժնի տեսուչ Սլավիկ Ալավերդյանը, Անգլերեն լեզվի և գրականության ամբիոնի վարիչի պաշտոնակատար, բ.գ.թ., դոցենտ Քրիստինե Հարությունյանը, այցելեցին Գառնիկ Անանյանի անվան Իջևանի ավագ դպրոց:

Դպրոցի տնօրեն Գայանե Էդիլյանը համալսարանականներին ներկայացրեց  12-րդ դասարանի հումանիտար հոսքի աշակերտներին:

Ակնարկային դասախոսությունը վարեց Ք.Հարությունյանը: Նա անդրադարձավ լեզվաբանի մասնագիտությանը, անգլերենի բառակազմությանը, իմաստաբանության հիմնախնդիրներին, այնուհետև պատասխանեց աշակերտներին հետաքրքրող հարցերին:

Դասախոսությունն անցավ ջերմ և անկաշկանդ մթնոլորտում:

Աշակերտները ցանկություն հայտնեցին այլ թեմաներով դասախոսությունների ևս մասնակցել:

Առաջիկայում ակնարկային դասախոսություններ կիրականացվեն մարզի ավագ, միջնակարգ դպրոցներում և Իջևանի վարժարանում: