2019թ. հոկտեմբերի 18-ին ԵՊՀ ԻՄ-ի կիրառական արվեստի ֆակուլտետի ներկայացուցիչները՝ դեկանի պաշտոնակատար Ա. Շ. Մարգարյանը, Դեկորատիվ-կիրառական արվեստի և դիզայնի ամբիոնի ասիստենտներ, ՀՀ ՆՄ անդամներ Գևորգ Ջավրուշյանը, Դոնարա և Անուշ Չիբուխչյանները այցելեցին Ազատամուտի մշակույթի պալատ:

Այցելության նպատակն էր Ազատամուտի գեղարվեստի ստուդիայի սաների  և նույն ստուդիայի ուսուցչուհի, նկարչուհի, ԵՊՀ ԻՄ-ի շրջանավարտ Անի Աղաջանյանի աշխատանքների համատեղ ցուցահանդեսին մասնակցելը և աշակերտներին մասնագիտական խորհուրդներ տալը:

Նախ համալսարանականները Ազատամուտ համայնքի մշակույթի պալատում մասնակցեցին ԵՊՀ ԻՄ-ի կիրառական արվեստի ֆակուլտետի շրջանավարտ Ա.Աղաջանյանի և իր սաների աշխատանքների ցուցահանդեսին՝ տպավորվելով ներկայացված գործերով:

Այնուհետև մեր դասախոսները և հատկապես պարոն Ջավրուշյանը գեղարվեստի ստուդիայի սաներին բացատրեց որոշ նրբություններ, տվեց արժեքավոր խորհուրդներ՝ նրանց նկարելու կատարողական ու տեխնիկական հմտությունները զարգացնելու վերաբերյալ:

 2019թ. հոկտեմբերի 13-ին Տնտեսագիտության ֆակուլտետի տուրիզմի կառավարման և մշակութաբանության ամբիոնը ֆակուլտետի ուսանողական խորհրդի հետ կազմակերպել էր Իջևան-Աղավնավանք-Գոշավանք-Գոշի լիճ-Իջևան երթուղով քայլարշավ՝ նվիրված ԵՊՀ ԻՄ-ի հիմնադրման 25-ամյակին:

Քայլարշավին մասնակցում էին ամբիոնի ասիստենտ, մ.գ.թ. Հ.Ազիզյանը, ասիստենտ Պ.Ասիլբեկյանը, գործավար-օպերատոր Ս.Սաֆարյանը, ԵՊՀ ԻՄ-ի տարբեր ֆակուլտետների ուսանողներ:

Երթուղին բավականին հագեցած էր. յուրաքանչյուր երթուղու վերջում իրականացվեց քննարկում՝ տվյալ ռեսուրսի զբոսաշրջային օգտագործման հեռանկարները և հնարավորությունները թեմայով:

Պ.Ասիլբեկյանը երթուղու ընթացքում ուսանողներին ներկայացրեց մանրամասներ ռելիեֆի, բուսականության, ջրագրության վերաբերյալ և շեշտեց դրանց զբոսաշրջային նշանակությունը:

Վերջնական նպատակակետերի մասին տեղեկատվություն ներկայացրին  «Զբոսաշրջություն» մասնագիտության ուսանողուհիներ Լաուրա Ուլիխանյանը (Գոշի լիճ) և Թինա Թամրազյանը (Աղավնավանք):

Հ.Ազիզյանը ուսանողներին ներկայացրեց երթուղիների ընթացքում  զբոսավարներին ներկայացվող պահանջները, քայլարշավի ժամանակ էթիկայի կանոնները, զբոսավարական հմտությունները:

Քայլարշավն անցավ  մեծ ոգևորությամբ: Ուսանողները ստացան ինչպես հաճելի տպավորություններ, այնպես էլ համալրեցին հայրենի բնաշխարհի վերաբերյալ իրենց գիտելիքները:

 2019թ. հոկտեմբերի 12-ին և 13-ին ԵՊՀ ԻՄ-ի անգլերեն լեզվի և գրականության  ամբիոնի վարիչի պաշտոնակատար Ք.Հարությունյանը և ամբիոնի դասախոսներ Երևանում մասնակցեցին «Դասավանդում հանուն հաջողության» անգլերենի ուսուցիչների և դասավանդողների մասնագիտական համաժողովին, որը կազմակերպել էր Հայաստանում Բրիտանական խորհուրդը:

Երկօրյա համաժողովին մասնակցում էին շուրջ 900 անգլերենի դասավանդողներ:

Հրավիրյալ խոսնակներն էին բրիտանացիներ Սթեֆան Հինլաֆը և Սայմոն Էթերտոնը:

Սթեֆան Հինլաֆը, լինելով Անգլիայի հարավից, այժմ բնակվում է Զագրեբում և զբաղվում է անգլերենի ուսուցիչների վերապատրաստումով: Նա բազմաթիվ վերապատրաստումներ է իրականացրել եվրոպական մի շարք երկրներում, այդ թվում՝ Ալբանիայում, Սերբիայում, Իսրայելում, Վրաստանում և այլուր: Ս.Հինլաֆը նաև մի քանի դպրոցական դասագրքերի համահեղինակ է:

Սայմոն Էթերտոնը, ունենալով ավելի քան 30 տարվա փորձ, անգլերենի դասավանդման բնագավառում իրականացնում է լայնածավալ աշխատանքներ ոչ միայն Եվրոպայում, այլև Ասիական և Խաղաղօվկիանոսյան շրջանում:

Համաժողովում ելույթ ունեցան նաև հայ դասավանդողներն ու ուսուցիչները՝ ներկայացնելով իրենց գաղափարները, փորձն ու հմտությունները:

Երկօրյա համաժողովի օրակարգը բավականին հագեցած էր և ուղեկցվում էր ակտիվ քննարկումներով: