2021թ. հունվարի 29-ին ZOOM հարթակում կայացավ ԵՊՀ ԻՄ-ի գիտական խորհրդի հերթական նիստը, որը նախագահում էր Ա. Հ. Մակարյանը:

Նիստի օրակարգում ընդգրկված էին հետևյալ հարցերը.

1. Դասավանդման որակի և արդյունավետության վերաբերյալ 2019-2020 ուստարվա ուսանողական հարցումների արդյունքների մասին (զեկուցող՝ ԵՊՀ ԻՄ-ի ՈՒՄՎ պետ Ա. Ց. Դավթյան):
2. Երևանի պետական համալսարանի Իջևանի մասնաճյուղի 2020թ. եկամուտների և ծախսերի նախահաշվի (բյուջե) հունվար-դեկտեմբեր կատարողականի մասին (զեկուցող՝ ԵՊՀ ԻՄ-ի տնօրենի պաշտոնակատար Ա. Հ. Մակարյան):
3. Հաղորդում ԵՊՀ ԻՄ-ի զարգացման՝ 2016-2020 թթ. ռազմավարական ծրագրի կատարման ընթացքի (2019-2020 ուստարի) մասին (զեկուցող՝ ԵՊՀ ԻՄ-ի տնօրենի պաշտոնակատար Ա. Հ. Մակարյան):
4. Ընթացիկ հարցեր.
   1. ԵՊՀ ԻՄ-ի հայոց պատմության և հասարակագիտության ամբիոնի ասիստենտ, պատմական գիտությունների թեկնածու Նաթելլա Գրիգորյանին դոցենտի գիտական կոչում ստանալու համար սահմանված գործընթացին մասնակցելու համար երաշխավորելու մասին (զեկուցող՝ ԵՊՀ ԻՄ-ի գիտքարտուղար Մ. Ս. Աթոյան):
   2. ԵՊՀ ԻՄ-ի մանկավարժության և հոգեբանության ամբիոնի վարիչի ժամանակավոր պաշտոնակատար, մանկավարժական գիտությունների թեկնածու Լիանա Հարությունյանին դոցենտի գիտական կոչում ստանալու համար սահմանված գործընթացին մասնակցելու համար երաշխավորելու մասին (զեկուցող՝ ԵՊՀ ԻՄ-ի գիտքարտուղար Մ. Ս. Աթոյան):
   3. ԵՊՀ ԻՄ-ի դեկորատիվ-կիրառական արվեստի և դիզայնի ամբիոնի վարիչի ժամանակավոր պաշտոնակատար,  ՀՀ նկարիչների միության անդամ Մհեր Ստեփանյանին դոցենտի գիտական կոչում ստանալու համար սահմանված գործընթացին մասնակցելու համար երաշխավորելու մասին (զեկուցող՝ ԵՊՀ ԻՄ-ի գիտքարտուղար Մ. Ս. Աթոյան):
   4. ԵՊՀ ԻՄ-ում դրամաշնորհային մրցույթ հայտարարելու մասին
      (զեկուցող՝ ԵՊՀ ԻՄ-ի «Տավուշ» հետազոտական կենտրոնի ղեկավար Հ. Ի. Մովսեսյան):

Դասավանդման որակի և արդյունավետության վերաբերյալ 2019-2020 ուստարվա ուսանողական հարցումների արդյունքների մասին հաղորդման մեջ ՈՒՄՎ պետ Ա. Ց. Դավթյանն ընդգծեց, որ նախորդ տարվա համեմատ հարցումների մասնակիցների թվաքանակը նվազել է, ինչն անհանգստացնող է: Անհրաժեշտ է մշակել մեխանիզմներ ուսանողների ակտիվությունը մեծացնելու համար։

Որոշվեց դասավանդման որակի և արդյունավետության վերաբերյալ 2019-2020 ուստարվա ուսանողական հարցումների արդյունքների մասին ԵՊՀ ԻՄ–ի ՈՒՄՎ պետ Ա. Ց. Դավթյանի հաղորդումն ընդունել ի գիտություն:

Այնուհետև գիտխորհրդի անդամները լսեցին ԵՊՀ ԻՄ-ի 2020թ. եկամուտների և ծախսերի նախահաշվի (բյուջե) հունվար-դեկտեմբեր կատարողականի մասին հաղորդումը, որը ներկայացրեց ԵՊՀ ԻՄ-ի տնօրենի պաշտոնակատար Ա. Հ. Մակարյանը:

Որոշվեց Երևանի պետական համալսարանի Իջևանի մասնաճյուղի 2020թ. եկամուտների և ծախսերի նախահաշվի (բյուջե) հունվար-դեկտեմբեր կատարողականի մասին ԵՊՀ ԻՄ-ի տնօրենի պաշտոնակատար Ա. Հ. Մակարյանի հաղորդումն ընդունել ի գիտություն:

ԵՊՀ ԻՄ–ի զարգացման՝ 2016-2020 թթ. ռազմավարական ծրագրի կատարման ընթացքի (2019-2020 ուստարի) մասին հաղորդման մեջ ԵՊՀ ԻՄ-ի տնօրենի պաշտոնակատար Ա. Հ. Մակարյանը մասնավորապես նշեց, որ մասնաճյուղն իր գործունեությունն իրականացնում է 2016-2020 թթ. զարգացման ռազմավարական ծրագրից բխող կարճաժամկետ պլանի համաձայն՝ կարևորելով կրթության որակը և նրա շարունակական բարելավումը: Մասնաճյուղը հավատարիմ է իր առաքելությանը և իր գործունեությամբ ձգտում է հասնել ծրագրով նախանշած նպատակներին: Նա իր ուսանողներին առաջարկում է համակողմանի գիտելիքներ, կարողություններ և հմտություններ ապահովող կրթական ծրագրեր, բարձրակարգ դասախոսական կազմ, ժամանակակից ենթակառուցվածքներ և իր գործունեության բոլոր բնագավառներում ձգտում է ապահովել որակի անընդհատ բարելավում:

2016-2020 թթ. ռազմավարական ծրագրի 25 խնդիրների 141 գործղություններից 22-ը (15.6%-ը) ամբողջությամբ իրականացվել է մինչև հաշվետու ժամանակահատվածը, մնացած 119 գործողությունները ներառվել են մասնաճյուղի ստորաբաժանումների 2019-20 ուստարվա և 2020-2021 ուստարվա սեպտեմբերից-դեկտեմբերն ընկած ժամանակահատվածի աշխատանքային պլաններում: Ապա, ըստ ՌԾ-ի 9 նպատակների և նրանց խնդիրների, անդրադարձ կատարվեց հաշվետու ժամանակահատվածում մասնաճյուղի ձեռքբերումներին և բացթողումներին:

Որոշվեց ԵՊՀ ԻՄ–ի զարգացման՝ 2016-2020 թթ. ռազմավարական ծրագրի կատարման ընթացքի (2019-2020 ուստարի) մասին ԵՊՀ ԻՄ-ի տնօրենի պաշտոնակատար Ա. Հ. Մակարյանի հաղորդումն ընդունել ի գիտություն:

1-ին, 2-րդ և 3-րդ ընթացիկ հարցերի վերաբերյալ անցկացված փակ, գաղտնի  քվեարկությունների արդյունքները դրական էին:

Գիտական խորհուրդը որոշեց.

ա) Երաշխավորել ԵՊՀ ԻՄ-ի՝

• հումանիտար գիտությունների ֆակուլտետի հայոց պատմության և հասարակագիտության ամբիոնի դոցենտի պաշտոնակատար, պ.գ.թ. Նաթելլա Սերոժի Գրիգորյանին,
• հումանիտար գիտությունների ֆակուլտետի մանկավարժության և հոգեբանության ամբիոնի վարիչի ժամանակավոր պաշտոնակատար, մ.գ.թ., ասիստենտ Լիանա Հարությունյանին,
• կիրառական արվեստի ֆակուլտետի դեկորատիվ-կիրառական արվեստի և դիզայնի ամբիոնի վարիչի ժամանակավոր պաշտոնակատար, ՀՀ նկարիչների միության անդամ Մհեր Օգանեսի Ստեփանյանին՝

դոցենտի գիտական կոչում ստանալու համար:

բ) Միջնորդել ԵՊՀ գիտական խորհրդին՝ նրանց շնորհել դոցենտի գիտական կոչում և համապատասխան առաջարկով դիմել ՀՀ ԲՈԿ:

4-րդ ընթացիկ հարցի մասին ԵՊՀ ԻՄ-ի «Տավուշ» հետազոտական կենտրոնի ղեկավար Հ. Ի. Մովսեսյանը հաղորդեց, որ 2021 թվականին նախատեսվում է ԵՊՀ ԻՄ-ում հայտարարել գիտահետազոտական գործունեության պայմանագրային (թեմատիկ) ֆինանսավորման նպատակով հետազոտական թեմաների հայտերի մրցույթ: Համաձայն գիտխորհրդի կողմից հաստատված «ԵՊՀ Իջևանի մասնաճյուղում դրամաշնորհների տրամադրման կարգի»՝ դրամաշնորհների մրցույթը և ֆինանսավորման ծավալները որոշվում են մասնաճյուղի գիտական խորհրդի կողմից:

«Տավուշ» կենտրոնն առաջարկում է որպես գերակա ուղղություն այս պահին դիտարկել մարզի ագրոարդյունաբերության ոլորտին առնչվող գիտական և գիտատեխնիկական նախաձեռնությունները: Գիտական խորհրդի անդամների կողմից հնչեցվեցին նաև այլ առաջարկներ՝ տուրիզմի զարգացման, մարզի ռազմավարական պլանավորման, բնապահպանական և այլ խնդիրներին առնչվող թեմաների վերաբերյալ:

Պարոն Մակարյանը նշեց, որ դրամաշնորհների տրամադրման կարգով նախատեսված է թեմաների մրցութային ընտրության ընթացակարգ՝ փորձագետների գնահատումների հիման վրա։ Բացի այդ՝ վերջնական որոշումները կայացվելու են Գիտական խորհրդի կողմից:   

Որոշվեց  թույլատրել «Տավուշ» կետրոնին 2021թվականի համար հայտարարել ներքին դրամաշնորհային մրցույթ՝ մասնաճյուղի ծախսերի նախահաշվով սահմանված գումարի չափով:

2020-2021 ուստարվա համար Հայ Առաքելական Եկեղեցու Տավուշի թեմը Եգիպտահայ ընկերակցության «Մաշտոց» հիմնադրամի աջակցությամբ և ԵՊՀ Իջևանի մասնաճյուղի հետ համագործակցությամբ սահմանել է 100.000-ական ՀՀ դրամի չափով մասնակի կրթաթոշակ ԵՊՀ ԻՄ-ի՝ սահմանամերձ համայնքների և սոցիալապես անապահով ընտանիքների 28 ուսանողի, որից 3 ուսանողի կրթաթոշակ տրամադրել է Տավուշի թեմի առաջնորդ Գերաշնորհ Տեր Բագրատ եպիսկոպոս Գալստանյանը:

Կրթաթոշակին արժանանալու համար 2020թ. սեպտեմբերի 25-ից հոկտեմբերի 10-ը ուսանողները ներկայացրել էին սոցիալական կարգավիճակի և ուսման առաջադիմության վերաբերյալ տեղեկանք, Տավուշի մարզում կամավորական հիմունքներով հասարակական և բարեսիրական աշխատանքներին մասնակցության հավաստագիր:

Հանձնախումբը՝ Տավուշի թեմի առաջնորդ Գերաշնորհ Տեր Բագրատ եպիսկոպոս Գալստանյանի, Արժանապատիվ Տեր հայրեր՝ Բերդի հոգևոր հովիվ Տեր Արամ քահանա Միրզոյանի, Նոյեմբերյանի հոգևոր հովիվ Տեր Սմբատ քահանա Աբրահամյանի, Տավուշի թեմի գլխավոր հաշվապահ Լուսինե Խաչատրյանի, Սևքար և Սարիգյուղ համայնքների հոգևոր պատասխանատու Ռուբեն սարկավագ Արզումանյանի և ԵՊՀ ԻՄ-ի արտաքին կապերի բաժնի մասնագետ Էրինե Ղարայանի մասնակցությամբ, ընտրեց 28 ուսանողներին:

ԵՊՀ Իջևանի մասնաճյուղի անունից սիրով շնորհավորում ենք կրթաթոշակի արժանացած ուսանողներին ու խորին շնորհակալություն ենք հայտնում Եգիպտահայ ընկերակցության «Մաշտոց» հիմնադրամին և Հայ Առաքելական Եկեղեցու Տավուշի թեմի առաջնորդ գերաշնորհ Տեր Բագրատ եպիսկոպոս Գալստանյանին, թո՛ղ Աստված առատորեն օրհնի նրանց հայրենանվեր գործունեությունը և համատեղ բարի գործերը՝ ուղղված Հայոց աշխարհի ու մասնավորապես Տավուշի մարզի բարօրությանը, զորացմանն ու բարգավաճմանը:

2021թ. հունվարի 28-ին լրանում է Հայոց բանակի 29-րդ տարեդարձը: Հայոց բանակը ստեղծվեց Արցախյան ազատամարտի բովում` երկրապահ-կամավորական ջոկատների հիմքի վրա` դառնալով մեր պատմության կարևորագույն ձեռքբերումներից մեկը, հայրենիքի պաշտպանության ու անվտանգության երաշխավորը:

1990 թվականին` Անկախության հռչակագրի ընդունումից հետո, կազմավորվեց Երևանի հատուկ գունդը, Արարատում, Գորիսում, Վարդենիսում, Իջևանում ու Մեղրիում ձևավորվեցին վաշտեր:

1991թ. կառավարության որոշմամբ ստեղծվեց նախարարների խորհրդին առընթեր Պաշտպանության պետական կոմիտեն:

1992թ. հունվարի 28-ին Կառավարությունը ընդունեց որոշում` «Հայաստանի Հանրապետության պաշտպանության նախարարության մասին»:

Օրը դարձավ տոն 2001 թվականին, երբ Տոների և հիշատակի օրերի մասին օրենքում ամրագրվեց որպես Բանակի օր:

Հայրենիքի պաշտպանության սուրբ պարտականությունից բացի՝ Հայոց բանակը բազմաթիվ երկրներում հաջողությամբ իրականացնում է նաև միջազգային խաղաղապահ առաքելություն:

Փա՛ռք ու պատիվ ձեզ, Հայոց բանակի քաջարի՛ զինվորներ, որ ամենայն պատվով ու պատասխանատվությամբ հսկում եք մեր պետության սահմանները, պաշտպանում հայրենի հողի վրա ազատ ապրելու և արարելու մեր իրավունքը:

Շնորհավո՛ր ձեր տոնը և խորին շնորհակալությու՛ն ձեզ, սիրելի՛ զինվորներ, խաղաղ ծառայություն և բարի վերադարձ…