2021թ. փետրվարի 26-ին ԵՊՀ Իջևանի մասնաճյուղում կայացավ  մայրենի լեզվին նվիրված միջոցառում, որը կազմակերպել էր Ուսանողական գիտական ընկերությունը:

Ներկա էին Հումանիտար գիտությունների ֆակուլտետի վարչական և պրոֆեսորադասախոսական անձնակազմի ներկայացուցիչներ, Հայոց լեզվի և գրականության ամբիոնի անդամները, ուսանողներ:

Միջոցառման մասնակիցները՝ «Հայոց լեզու և գրականություն» մասնագիտության առաջին և երկրորդ կուրսի ուսանողները, հանդես եկան մայրենի լեզվին նվիրված ոգեշունչ բանաստեղծություններով ու էսսեներով (Սիրանուշ Սարդարյան. «Հրեշտականման լեզու»), ներկայացրին մայրենիին նվիրված տոնի նախապատմությունը, թե ինչպես 1999թ. նոյեմբերի 17-ին  ՅՈՒՆԵՍԿՕ-ն որոշում ընդունեց ստեղծել մայրենի լեզվին նվիրված տոն, և 2000 թվականից  փետրվարի  21-ը հռչակվեց  որպես Մայրենի լեզվի միջազգային օր: Հայաստանում այն նշվում է 2005 թվականից:

Լեզվին նվիրված ցերեկույթի ընթացքում ներկայացվեցին ոսկեղենիկ հայերենի մասին հայ և համաշխարհային մեծերի ասույթները, ցուցադրվեցին հայոց այբուբենի և լեզվի մասին տեսահոլովակներ:

Իրենց ելույթներում ուսանողներն ընդգծեցին, որ հիրավի «լեզուն է ամեն մի ժողովրդի ազգային գոյության և էության ամենախոշոր փաստը, ինքնուրույնության ու հանճարի ամենախոշոր դրոշմը…» (Հովհ. Թումանյան): Դարեր ի վեր սառնորակ աղբյուրի նման սնող ամրակուռ մայրենին մշտապես ծարավը հագեցնող անցորդներին է նվիրել իր խորքերում խնամքով փայփայած հրաշակերտ ադամանդներ. շնորհաշատ, գիտուն, խորամիտ անհատների միջոցով գալիք սերունդներին է ավանդել գիտական, պատմամշակութային հսկայական հարուստ ժառանգություն:

Միջոցառման վերջում մայրենի լեզվի արժևորման խոսքով հանդես եկան  Հայոց լեզվի և գրականության ամբիոնի վարիչ, բ.գ.թ. Վ.Ավագյանը և ֆակուլտետի դեկանի պաշտոնակատար, բ.գ.թ., դոցենտ Կ.Պողոսյանը՝ մատաղ սերնդին պատգամելով սիրել, փայփայել և անաղարտ պահել մեր մայրենին՝ «հնաբառ, մեսրոպատառ, աղբյուրի պես ջինջ ու կայտառ, մոր նման
միշտ տուն կանչող, մայր հողի պես միշտ կանաչող» լեզուն հայոց…

2021թ. փետրվարի 25-ին ԵՊՀ ԻՄ-ի կիրառական արվեստի ֆակուլտետում տեղի ունեցավ մոմավառություն՝ նվիրված պատերազմում զոհված հայորդիների սուրբ հիշատակին:

Միջոցառումը կազմակերպվել էր Դեկորատիվ-կիրառական արվեստի և դիզայնի ամբիոնի ասիստենտ Քրիստինե Մխիթարյանի և «Դիզայն» կրթական ծրագրի 3-րդ կուրսի ուսանողների համատեղ ջանքերով:

Ներկա էին ԵՊՀ ԻՄ-ի վարչական և պրոֆեսորադասախոսական անձնակազմի անդամներ, ուսանողներ, հյուրեր:

Միջոցառման մասնակիցները մեկ րոպե լռությամբ հարգեցին մեր քաջ հերոսների հիշատակը, ապա ներկայացրին պատերազմից հերոսական դրվագներ, խոսեցին ԵՊՀ ԻՄ-ի ուսանողների՝ պատերազմին մասնակցության մասին։ Ներկաներն իրենց հիշատակի խոսքում առանձնացրին Կիրառական արվեստի ֆակուլտետի ուսանողներ, հայրենիքի համար նահատակված Հովհաննես Չոբանյանին և Հակոբ Մելիքսեթյանին:

Մասնավորապես նշվեց, որ Հովհաննես Չոբանյանը ծնվել է 1997թ․ հուլիսի 17-ին Տավուշի մարզի Այգեհովիտ գյուղում: Սովորել և ավարտել է Հովհաննես Հինդիլյանի անվան միջնակարգ դպրոցը: 2015-ին ընդունվել է ԵՊՀ Իջևանի մասնաճյուղի կիրառական արվեստի ֆակուլտետ: Նա տաղանդավոր նկարիչ էր, լավագույններից մեկը և՛ ուսման մեջ, և՛ շրջապատում:

2019 թվականին ավարտել է ուսումը և զորակոչվել բանակ: Մասնակցել է 2020թ. Արցախյան պատերազմի թեժ մարտերին: Բազմիցս աչքի է ընկել մարտական առաջադրանքների կատարման ընթացքում: Հերոսաբար ընկել է 2020 թվականի հոկտեմբերի 22-ին՝ Որոտանի (Կուբաթլու) համար մղվող մարտերի ժամանակ:

Հակոբ Մելիքսեթյանը ծնվել է 2000թ. հոկտեմբերի 16-ին Տավուշի մարզի Գետահովիտ գյուղում: Ավարտելով տեղի միջնակարգ դպրոցը՝ 2018 թվականին ընդունվել է ԵՊՀ Իջևանի մասնաճյուղի կիրառական արվեստի ֆակուլտետ:

Անսահման բարի էր, ժպտերես, կատակասեր: Ուսումը կիսատ թողնելով՝ 2019 թվականի հունվարին զորակոչվել է բանակ: Ծառայել է Արցախի ՊԲ Մարտունի-2 զորամասում: Եղել է ՀՕՊ մասնագետ: Արցախյան երկրորդ պատերազմի առաջին իսկ օրից Հակոբն իր ընկերների հետ համառ մարտեր է մղել թշնամու մեծաթիվ ուժերի դեմ, խոցել է մի քանի անօդաչու թռչող սարք, կործանիչ ինքնաթիռ: Անմահացել է հոկտեմբերի 7-ին Մարտունիում: Գերազանց ծառայության համար պարգևատրվել է «Քաջարի մարտիկ» և «Զինված ուժեր» կրծքանշաններով:

Միջոցառման վերջում, ի հիշատակ հազարավոր հայորդիների, տեղի ունեցավ մոմավառություն:

Կառավարությունը հաստատել է ՀՀ բարձրագույն ուսումնական հաստատությունների բակալավրի ու անընդհատ և ինտեգրացված կրթական ծրագրերով 2021-2022 ուսումնական տարվա մասնագիտությունների ու ընդունելության քննությունների ցանկը:

Համաձայն ընդունված որոշման՝ առկա և հեռակա համակարգերում դիմորդները կհանձնեն հիմնականում երկու ընդունելության քննություն: Կան մասնագիտություններ, որոնց դիմորդները վճարովի ուսուցման համակարգում թափուր տեղերի առկայության դեպքում 2-րդ քննության գնահատականը (քննությունների ցանկում նշված է երկու աստղանշանով **) կարող են փոխանցել նախորդ աստիճանի ավարտական փաստաթղթից (ատեստատ կամ դիպլոմ):

Գալիք՝ 2021-22 ուստարվա ընդունելության քննությունների ցանկում կատարված հիմնական փոփոխությունն այն է, որ մի շարք մասնագիտությունների համար բուհերի կողմից սահմանված են մրցութային կամընտրական քննություններ՝ դիմորդներին հնարավորություն տալով իրենց ցանկությամբ ընտրելու համապատասխան քննական առարկան:

Այս փոփոխությունը տարածվում է այն մասնագիտությունների վրա, որոնց համար նախորդ տարիներին սահմանված է եղել մրցութային երեք քննություն: Այդ մասնագիտությունների դիմորդներն այժմ կհանձնեն երկու քննություն՝ նախկին երեքի փոխարեն, որոնցից մեկը սահմանված է որպես պարտադիր առարկա, իսկ երկրորդ քննությունը դիմորդն առաջարկվող առարկաներից կընտրի իր ցանկությամբ:

Ընդունելության քննությունների և մասնագիտությունների ցանկը՝ այստեղ:

Գիտելիքների ստուգման գործընթացն իրականացնելիս, անկախ բուհի կարգավիճակից (պետական, ոչ պետական), բոլոր դիմորդների համար սահմանվում են ընդունելության միևնույն պայմանները:

Նշենք, որ սովորաբար բակալավրիատի ծրագրով դիմորդները հանձնել են նվազագույնը երկու ընդունելության քննություն: Բացառություն է արվել միայն անցյալ՝ 2020-2021 ուսումնական տարվա ընդունելության գործընթացի կազմակերպման ժամանակ, երբ դիմորդները հանձնել են մեկ քննություն՝ պայմանավորված կորոնավիրուսի համավարակի տարածման կանխարգելմամբ:

ԵՊՀ ԻՄ-ի առկա ուսուցման 2021-2022 ուստարվա ընդունելության մասնագիտությունների ցանկը կարող եք տեսնել այստեղ: