Երևանի պետական համալսարանի Իջևանի մասնաճյուղ

Եվրոպական միության պատվիրակության այցը ԵՊՀ Իջևանի մասնաճյուղ

2014թ. մարտի 28-ին Եվրոպական միության պատվիրակության մարզային այցելությունների շրջանակում մասնաճյուղի պրոֆեսորադասախոսական անձնակազմի և ուսանողների հետ հանդիպեցին պատվիրակության ղեկավար Տրայան Հրիսթեան, Լիտվայի դեսպան Էրիկաս Պետրիկասը, Հունաստանի դեսպան Իոաննիս Թայիսը, Շվեդիայի թագավորության գործերի հավատարմատար Մարտինա Քուիքը, ԵՄ պատվիրակության մամուլի և տեղեկատվության հարցերի պատասխանատու Անահիտ Ազատյանը և պատվիրակության աշխատակից Բեն Քենարդը:

Ողջույնի խոսքով հանդես եկավ Հումանիտար գիտությունների ֆակուլտետի դեկան, պ.գ.թ. Վարդան Ալեքսանյանը:  Նա միջազգային պատվիրակներին համառոտ ներկայացրեց մասնաճյուղի պատմությունը, խոսեց գործող մասնագիտությունների մասին, ընդգծեց մասնաճյուղի դերը ինչպես կրթության, այնպես էլ ժողովրդագրության տեսանկյունից: Վ.Ալեքսանյանը կարևորեց նաև պատվիրակության այցը մասնաճյուղ` շեշտելով, որ ՀՀ-ի համար կարևոր  է բոլոր երկրների հետ բարիդրացիական հարաբերություններ ունենալը, իսկ Եվրոպան շարունակում է մնալ որպես դեմոկրատական արժեքների ջահակիր:

Հանդիպման ընթացքում ԵՄ պատվիրակության դեսպան Տրայան Հրիսթեան հանդես եկավ փոքրածավալ դասախոսությամբ, խոսեց ԵՄ Արևելյան գործընկերության մասին: Դեսպանը նշեց, որ ԵՄ և ՀՀ միջև հարաբերությունները սկսվել են կայուն կերպով զարգանալ 1990-ական թվականների սկզբից: ԵՄ-Հայաստան համագործակցությունն ակնհայտ կերպով  ամրապնդվեց 2006թ. նոյեմբերին հաստատված ԵՀՔ Գործողությունների ծրագրի ընդունումից հետո: Հիշեցրեց, որ  ԵՄ-Հայասատան հարաբերությունների հիմքում  ընկած է Գործընկերության և համագործակցության համաձայնագրով նախանշված ժողովրդավարության, շուկայական տնտեսության, միջազգային իրավունքի սկզբունքների ու մարդու իրավունքների նկատմամբ հարգանքը: Տրայան Հրիսթեան համառոտ ներկայացրեց Արևելյան գործընկերության դերն ու նշանակությունը, գործնական ձեռքբերումները:

Վերջում դեսպանը պատասխանեց ուսանողների  և դասախոսների հարցերին, շնորհակալություն հայտնեց ԵՄ պատվիրակությանը հյուրընկալելու համար:

Մասնաճյուղից հյուրերը հեռացան նորից հանդիպելու ակնկալիքով:

Բացվեց «Գարնանային գույներ» ցուցահանդեսը` նվիրված կանանց տոնին

2014թ. մարտի 17-ին Իջևանի քաղաքային պատկերասրահում հանդիսավոր կերպով բացվեց ԵՊՀ ԻՄ-ի կիրառական արվեստի ֆակուլտետի դասախոսների և ուսանողների ստեղծագործությունների ցուցահանդեսը: Այն կրում է «Գարնանային գույներ» խորագիրը ու նվիրված է Մայրության և գեղեցկության տոնին:

Կանանց տոնին նվիրված ցուցահանդեսի բացումը, որ յուրօրինակ հարգանքի և մեծարանքի տուրք է սիրելի մայրերին, կանանց, քույրերին ու դուստրերին,  ֆակուլտետում դարձել է գեղեցիկ ավանդույթ:

Ցուցահանդեսի հանդիսավոր բացմանը մասնակցում էին Իջևանի քաղաքային իշխանությունները, ԵՊՀ ԻՄ-ի ղեկավարությունը, արվեստագետներ, դասախոսներ, ուսանողներ, քաղաքացիներ: Հատուկ հրավիրված էին մարզի զոհված ազատամարտիկների հարգարժան մայրերը:

Բացման խոսքով հանդես եկան մասնաճյուղի տնօրեն Ս.Առաքելյանը, Տավուշի մարզպետ Ա.Ղուլարյանը, Իջևանի քաղաքապետարանի մշակույթի բաժնի գլխավոր մասնագետ Լ.Ղալումյանը, Հայր Սամվել Մխիթարյանը:

Իր բնույթով ցուցահանդեսը բազմաժանր է, ընդգրկում է Կիրառական արվեստի ֆակուլտետի 14 դասախոսների շուրջ 40 աշխատանք: Ցուցադրված են մասնաճյուղի դասախոսներ Ա. Միրզոյանի, Ռ. Բուղդարյանի, Ս. Հովհաննիսյանի, Գ. Ջավրուշյանի, Ա. Խաչատրյանի, Ա. Չիբուխչյանի, Դ. Չիբուխչյանի, Ռ. Պողոսյանի, Ք. Մխիթարյանի, Ա. Աբազյանի, Մ. Ստեփանյանի, Լ. Լաճիկյանի, Իջևանի քաղաքային պատկերասրահի տնօրեն Ս. Մելքումյանի, պատկերասրահի աշխատակցուհի Հ. Էդիլյանի ստեղծագործությունները:

Պայծառ ու վառ գույներով աչքի ընկնող աշխատանքները պատկերասրահը համակել են գարնան թարմ շնչով:

«Գարնանային գույներ» ցուցահանդեսը կտևի մինչև ապրիլի 7-ը:

Դպրոցական օլիմպիադան անցկացվեց մասնաճյուղի կողմից

2014թ. մարտի 15-ին ԵՊՀ ՄԿՄԿ վարչության կողմից հանրակրթական բոլոր առարկաներից կազմակերպվեց օլիմպիադա, որի նպատակն էր շնորհալի և ստեղծագործական կարողություններ ունեցող երեխաների հայտնաբերումը, նրանց հետ անհատական աշխատանքի կազմակերպումը:

Տավուշի մարզի  ավագ և միջնակարգ դպրոցների 12-րդ դասարանների  աշակերտները օլիմպիադային մասնակցեցին ԵՊՀ Իջևանի մասնաճյուղում, որտեղ այդ աշխատանքներն իրականացրեց Մասնագիտական կողմնորոշման և պրակտիկայի կազմակերպման  բաժինը:

Ժամը 10:00-ին ԵՊՀ ԻՄ-ի դահլիճում տեղի ունեցավ մասնաճյուղի տնօրեն Ս. Առաքելյանի հանդիպումը օլիմպիադայի մասնակիցների հետ: Խոսքով հանդես եկան ԵՊՀ ԻՄ-ի տնօրենը և ՄԿՊԿ բաժնի վարիչ Վ.Չոբանյանը: Տնօրենը կարևորեց օլիմպիադայի անցկացումը մասնաճյուղում, ողջունեց աշակերտներին, որ եկել են գիտելիքների ստուգատեսի, նրանց մաղթեց հաջողություններ:

Օլիմպիադան տևեց 4 ժամ: Հանրակրթական 12 առարկաներից օլիմպիադային Տավուշի մարզի 54 միջնակարգ և 4 ավագ դպրոցներից  մասնակցեցին 23 միջնակարգ և 4 ավագ դպրոցներ՝ 257 աշակերտներով:

Օլիմպիադայի  փակման և պարգևատրման արարողությունը տեղի կունենա մարտի 28-ին՝ ժամը 15.00-ին, ԵՊՀ մեծ դահլիճում ( կենտրոնական մասնաշենք, 3-րդ հարկ):

Արդյունքների մասին կարող եք տեղեկանալ ԵՊՀ Իջևանի մասնաճյուղի կայքի (ijevan.ysu.am) միջոցով:

ՏԵՂԻ ՈՒՆԵՑԱՎ ՄԱՍՆԱՃՅՈՒՂԻ ՏՈՒՐԻԶՄԻ ԿԱՌԱՎԱՐՄԱՆ և ՄՇԱԿՈՒԹԱԲԱՆՈՒԹՅԱՆ ԱՄԲԻՈՆԻ ԴԱՍԱԽՈՍ Լ. ԼԱՃԻԿՅԱՆԻ ԳՐՔԵՐԻ ՇՆՈՐՀԱՆԴԵՍԸ


2014թ. մարտի 12-ին ԵՊՀ Իջևանի մասնաճյուղի գրադարանում տեղի ունեցավ Տուրիզմի կառավարման և մշակութաբանության ամբիոնի դասախոս Լևոն Լաճիկյանի «Խաչվող ճանապարհներ» գրքի  անգլերեն թարգմանության և նրա կազմած «Հայաստան» բանաստեղծական ժողովածուի շնորհանդեսը:

Լ.Լաճիկյանը մեզանում հայտնի գեղագետ, արվեստաբան և մշակութային մեկնաբան է: Ծնվել է Գյումրիում, սովորել Երևանի պետական համալսարանի բանասիրական ֆակուլտետում, ապա ավարտել տեղի ասպիրանտուրան` «Գեղագիտություն» մասնագիտությամբ: Արդեն մի քանի տասնամյակ նա իր գրիչն ու ջանքերը ծառայեցնում է ժամանակակից հայ մշակութային կյանքի լուսաբանման ու մեկնաբանման հույժ կարևոր գործին: Ավելին` նա նաև մասնակիցն է գրական-մշակութային այդ ընթացքի` իր բազմաթիվ հոդվածներով, գրքերով, իսկ վերջին տարիներին` նաև գծանկարներով:

Լաճիկյանի հարյուրավոր արվեստաբանական հոդվածների ընտրանին 2004թ. ամփոփվեց «Անլույս օրերի ոգեղեն ղողանջներ» գրքում, որն իրավամբ գնահատվեց որպես անցյալ դարավերջի հայ մշակութային կյանքի հանրագիտարան: Դրան հաջորդեցին Նյու Յորքում և Երևանում լույս տեսած նրա 2 գեղազարդ հատորները` նվիրված հայ գրերի գյուտին:

Նրա շուրջ 2 տասնյակ գիտական հոդվածները` նվիրված հայ միջնադարյան գեղագիտությանը, հրատարակվել են Հայաստանի և արտերկրի հայագիտական հանդեսներում («Բազմավէպ», «Հանդես ամսօրյա»  և այլն) և հանրագիտարաններում («Քրիստոնյա Հայաստան», «Հայ Սփյուռք»  և այլն): Այժմ նա Երևանի պետական համալսարանի Իջևանի մասնաճյուղի տուրիզմի կառավարման և մշակութաբանության ամբիոնի դասախոս է:

2006թ. Երևանում լույս տեսած «Խաչվող ճանապարհներ» ժողովածուն մեծ հաջողություն բերեց հեղինակին: Ընթերցողին այն գրավեց ոչ միայն բովանդակալից ու գեղեցիկ հայերենով շարադրված ուղեգրություններով, այլև ուշագրավ գծանկարներով: Դրանց միջոցով ընթերցողը մտովի կարողանում է «լինել» պատմական Հայաստանում, Լիբանանում, «շրջել» եվրոպական մի շարք երկրներով, ապա «այցելել» Ամերիկայի Միացյալ Նահանգներ: Գիրքն ընդգրկում է Լևոն Լաճիկյանի` տարբեր տարիների և տարբեր երկրներ կատարած այցելություններից հետո գրած շուրջ 2 տասնյակ ուղեգրությունները, որոնք յուրատեսակ խոհագրություններ և քնարական մտորումներ են Հայաստանի անցյալի ու ներկա պատմության, ինչպես նաև արտերկրում սփռված հայկական գաղթօջախների վերաբերյալ: Գրքի շարադրանքից երևում է հեղինակի հետաքրքրությունների լայն շրջանակը: Միաժամանակ պարզորոշ զգացվում է, որ այն պատկանում է գեղագետի և արվեստի տեսաբանի գրչին. հիմնականում այդ տեսանկյունից են քննված երկրներն ու բնակավայրերը:

Օտար ընթերցողին ներկայացնելու նպատակով անցած տարի «Խաչվող ճանապարհներ» գիրքը պետական պատվերի շրջանակներում Երևանում հրատարակվեց նաև անգլերեն` թարգմանությամբ Մարինա Բազաևայի և խմբագրությամբ Ռուզան Ավետիսյանի:  Իսկ անցած տարեվերջին «Տիգրան Մեծ»  հրատարակչությունը լույս ընծայեց Լևոն Լաճիկյանի կազմած «Հայաստան»  բանաստեղծական ժողովածուն, որն ամփոփում է մեր հին ու նորօրյա, դասական ու ժամանակակից բանաստեղծների քերթվածները Հայաստան աշխարհի և, ընդհանրապես, հող հայրենիի մասին:

Լևոն Լաճիկյանը նաև վավերագրական 8 ֆիլմերի սցենարի հեղինակ է, որոնցից մեկը 2004թ. մոսկովյան միջազգային կինոփառատոնում արժանացավ դիպլոմի: Նա Հայաստանի լրագրողների և նկարիչների միությունների անդամ է, փոխնախագահն է «Հայաստան-Լիբանան» բարեկամության ընկերության: Մինչև օրս կազմակերպել է անհատական 8 ցուցահանդես Երևանում, Գյումրիում, Գորիսում, Ստամբուլում և Նյու Յորքում: Արդի հայ մշակույթին մատուցած ծառայությունների համար 2010թ. նա արժանացել է ՀՀ մշակույթի նախարարության ոսկե մեդալի:

Մասնաճյուղում անցկացված շնորհանդեսի ժամանակ Լ.Լաճիկյանի վաստակն արժևորեցին, նրա անձնական ու մասնագիտական բարձր հատկանիշները վերհանեցին գրադարանի վարիչ Նելլի Ստեփանյանը, Հումանիտար գիտությունների ֆակուլտետի դեկան, պատմ. գիտ. թեկն., դոցենտ Վարդան Ալեքսանյանը, Օտար լեզուների ամբիոնի դասախոս,  «Խաչվող ճանապարհներ» գրքի անգլերեն տարբերակի խմբագիր Ռուզաննա Ավետիսյանը, Հայոց լեզվի և գրականության ամբիոնի ասիստենտ, բան. գիտ. թեկն. Վահան Աղաբաբյանը:

Վերջում ԵՊՀ ԻՄ-ի շնորհալի ուսանողները ներկայացրին գրական-գեղարվեստական կոմպոզիցիա` կազմված «Հայաստան» բանաստեղծական ժողովածուից:

Տեղի ունեցավ մասնաճյուղի պատմության և քաղաքագիտության ամբիոնի վարիչ, պ.գ.դ., պրոֆեսոր Ռ.Նահապետյանի գրքերի շնորհանդեսը

2014թ. մարտի 4-ին ԵՊՀ ԻՄ-ի գրադարանում տեղի ունեցավ մասնաճյուղի պատմության և քաղաքագիտության ամբիոնի վարիչ, պատմական գիտությունների դոկտոր, պրոֆեսոր Ռաֆիկ Ասքանազի Նահապետյանի գրքերի շնորհանդեսը:

Ռ.Նահապետյանը ծնվել է 1943թ. սեպտեմբերի 18-ին Լոռու մարզի Գեղասար գյուղում: 1960թ. ավարտել է Նալբանդի (Շիրակամուտ) միջնակարգ դպրոցը: 1960-1962թթ. սովորել է Վանաձորի շինարարական տեխնիկումում: 1963-1967թթ. սովորել և ավարտել է ԵՊՀ պատմության ֆակուլտետը, 1970-1973թթ.` ԵՊՀ ասպիրանտուրան` «Ազգագրություն» մասնագիտացմամբ: 1986թ. պաշտպանել է թեկնածուական, իսկ 2008թ.` դոկտորական ատենախոսություն: 2010թ. ԲՈՀ-ի կողմից շնորհվել է պրոֆեսորի կոչում:

1967 թվականից աշխատում է ԵՊՀ պատմության ֆակուլտետում, համատեղության կարգով` ԵՊՀ Իջևանի մասնաճյուղում: 1998-ից մինչև այսօր մասնաճյուղի պատմության և քաղաքագիտության ամբիոնի վարիչն է, 2000-2004թթ. եղել է նաև Հումանիտար գիտությունների ֆակուլտետի դեկան: Հրատարակել է երեք բուհական ձեռնարկ` 2008թ. «Ազգագրություն. Ուսումնամեթոդական ուղեցույց», 2009թ.` «Հայոց սոցիոնորմատիվ մշակույթ». մաս 1, 2010թ.` «Հայ ազգագրության պատմություն. Հնագույն և հին սկզբնաղբյուրների ազգագրական տեղեկությունները հայերի և Հայաստանի մասին». Մաս 1` ՀՀ ԿԳ նախարարության կողմից երաշխավորված:

Հրատարակել է շուրջ 100 ուսումնական և գիտական ուսումնասիրություններ: 2004թ. հիմնել է «Արևմտահայերի էթնոմշակութային բնութագիրը» խորագրով գիտական հրապարկումների շարք: Հրատարակել է  «Աղձնիքահայերի ընտանիքը և ընտանեկան ծիսակարգը» (2004), «Աղձնիքահայերի ամուսնահարսանեկան սովորույթներն ու ծեսերը» (2007), 2011թ.` «Աղձնիքահայերի մանկածնության և մանկան խնամքի սովորույթներն ու ծեսերը», 2012թ.` «Հայոց ազգակցական համակարգը` (XIX դ. երկրորդ կես – XX դ. սկիզբ)» պատմաազգագրական ուսումնասիրությունները: 2013թ. «Հայ մատենագիրը» շարքից հրատարակել է «Ազգագրական տեղեկությունները Փավստոս Բուզանդի «Հայոց պատմություն» երկում» ուսումնասիրությունը:

Ավելի քան 45 տարվա գիտամանկավարժական և գիտամասսայական մշակութային բեղմնավոր գործունեության համար պարգևատրվել է բարձրագույն և միջնակարգ մասնագիտական կրթության նախարարության (1967), ԵՊՀ ռեկտորատի կողմից (2009) պատվոգրերով, ՀՀ նախագահի շնորհակալագրով (2009թ. դեկտեմբերի 10, Երևան, թիվ 423), 2011թ. ՀՀ Տավուշի մարզպետի շնորհակալագրով` Տավուշի մարզի կրթական համակարգում ցուցաբերած անգնահատելի ծառայությունների համար: Պարգևատրվել  է նաև Լոռու մարզի «Մաշտոց» կրթամշակութային կենտրոն հասարակական կազմակերպության «Ամենայն Հայոց Կաթողիկոս Վազգեն Առաջին» մեդալով,  ծննդյան 70-ամյակի և գիտամանկավարժական գործունեության 45-ամյակի առթիվ` ԵՊՀ հուշամեդալով (2013):

Մասնաճյուղում պրոֆեսոր Նահապետյանի գրքերի շնորհանդեսի ժամանակ երախտիքի և արժևորման խոսք ասացին մասնաճյուղի տնօրեն, պատմ. գիտ. թեկն., դոցենտ Ս.Առաքելյանը, Հումանիտար գիտությունների ֆակուլտետի դեկան, պատմ. գիտ. թեկն., դոցենտ Վ.Ալեքսանյանը, Կիրառական արվեստի ֆակուլտետի դեկան, տեխն. գիտ. թեկն., դոցենտ Կ.Այվազյանը, Հայոց լեզվի և գրականության ամբիոնի դոցենտ, բան. գիտ. թեկն. Ա.Սարհատյանը, Մանկավարժության և հոգեբանության ամբիոնի ասիստենտ Ա.Հովակիմյանը:

Ի պատասխան` Ռ.Նահապետյանը նշեց. «Մասնաճյուղում անցկացրած 16 տարիները իմ կյանքի ամենաերջանիկ, բայց միևնույն ժամանակ ամենատքնաջան տարիներն են: Իջևանը Հայաստանի ամենագողտրիկ, ամենաինտելեկտուալ տարածքն է: Ես պարտական եմ այս հողին. այն կենարար ազդեցություն է ունեցել իմ գիտամանկավարժական գործունեության վրա»:

Դիմելով մասնաճյուղի ուսանողությանը` վաստակաշատ ազգագրագետը շեշտեց, որ նրանց մեջ կա այն պոտենցիալը, որը պատիվ կբերի ոչ միայն տարածաշրջանին, այլև Հայաստանի Հանրապետությանը: