Երևանի պետական համալսարանի Իջևանի մասնաճյուղ

Մասնաճյուղը հյուրընկալեց մանկավարժական գիտությունների դոկտոր, պրոֆեսորներին

2013թ. հոկտեմբերի 26-ին ԵՊՀ Իջևանի մասնաճյուղում տեղի ունեցավ «21-րդ դարի հայ մանկավարժական միտքը» վերնագրով միջոցառումը, որը նախաձեռնել էր Հումանիտար գիտությունների ֆակուլտետի մանկավարժության և հոգեբանության ամբիոնի վարիչի պաշտոնակատար, մ.գ.թ., դոցենտ Վ.Բրուտյանը:

Միջոցառմանը ներկա էին ԵՊՀ ԻՄ-ի պրոֆեսորադասախոսական անձնակազմի ներկայացուցիչները, Երևանից հրավիրված էին ՌԴ կրթության ակադեմիայի ակադեմիկոս, ՀՀ մանկավարժահոգեբանական գիտությունների ակադեմիայի իսկական անդամ, ՀՀ արվեստի վաստակավոր գործիչ, սպորտի վարպետ, մանկավարժական գիտությունների դոկտոր, Հայկական պետական մանկավարժական համալսարանի պրոֆեսոր Լեմս Ներսիսյանը,

մանկավարժական գիտությունների դոկտոր, ՀՊՄՀ-ի պրոֆեսոր Գառնիկ Հովակիմյանը և ՀՀ մանկավարժահոգեբանական գիտությունների ակադեմիայի փոխնախագահ, մանկավարժական գիտությունների դոկտոր, ՀՊՄՀ-ի պրոֆեսոր, ՀՀ վաստակավոր մանկավարժ Մնացական Մանուկյանը:

«21-րդ դարի հայ մանկավարժական միտքը» վերնագրով միջոցառումը կրում էր գիտագործնական բնույթ և ուներ երկու ուղղվածություն՝ մ.գ. դոկտոր, պրոֆեսորների մասնակցությամբ ուսումնական պլաններում դասընթացների ժամաքանակի արդյունավետ պլանավորում մասնաճյուղի դասախոսների հետ և ակնարկային դասախոսությունների անցկացում ուսանողների հետ:

Գիտագործնական հանդիպումը կրելու է շարունակական բնույթ. հաջորդ այցը կլինի դեկտեմբերի սկզբին՝ լրացուցիչ մասնագիտությունների (հոգեբանություն, սոցիոլոգիա) գծով:

Հայագետների այցը ԵՊՀ Իջևանի մասնաճյուղ

2013թ. հոկտեմբերի 19-ին ԵՊՀ Իջևանի մասնաճյուղ այցելեցին ՀՀ գիտությունների ազգային ակադեմիայի և ԵՊՀ հայագիտական հետազոտությունների ինստիտուտի կողմից կազմակերպված «Հայագիտությունը և արդի ժամանակաշրջանի մարտահրավերները» խորագրով եռօրյա միջազգային 2-րդ համաժողովին մասնակցած մի խումբ անվանի հայագետներ` Բուրաստան Զուլումյանը (Մոսկվա), Աշոտ Ավետիսյանը (Մոսկվա), Դոնի Ռոստովի հայկական համայնքի ղեկավար Սերգեյ Սայադովը, ԵՊՀ հայագիտական հետազոտությունների ինստիտուտի փոխտնօրեն Մհեր Հովհաննիսյանը և ուրիշներ:

Հանդիպմանը ներկա էին ԵՊՀ ԻՄ-ի տնօրեն Ս.Առաքելյանը, մասնաճյուղի վարչական անձնակազմի ներկայացուցիչներ, դասախոսներ, ուսանողներ:

Հայագետները հյուրընկալվեցին մասնաճյուղի կիրառական արվեստի ֆակուլտետի կոմպոզիցիոն աշխատանքների պատկերասրահում, ուր նրանք ծանոթացան ֆակուլտետի շրջանավարտների բազմաժանր (գոբելեն, գեղանկար, վիտրաժային նկարչություն, փայտի գեղարվեստական մշակում, բոլորաքանդակ, բատիկա և այլն) ստեղծագործություններին:

Հյուրերն անչափ տպավորված էին շրջանավարտների կոմպոզիցիոն աշխատանքներով և իրենց ստացած ջերմ տպավորությունները գրառեցին պատկերասրահի տպավորությունների գրքում:

Գերմանացի հյուրերի այցը ԵՊՀ Իջևանի մասնաճյուղ

2013թ. սեպտեմբերի 11-ին ԵՊՀ Իջևանի մասնաճյուղ այցելեցին Բավարիայի Այխշտետ Ինգոլշտադ համալսարանի դոկտոր, պրոֆեսոր Հարալդ Պեխլաները և նույն համալսարանի տուրիզմի բաժնի մագիստրատուրայի առաջին կուրսի մի խումբ ուսանողներ: Նրանց ուղեկցում էին Գերմանիայի Միջազգային Համագործակցության (GIZ) «Քաղաքների ցանց Հարավային Կովկասում» նախաձեռնության շրջանակներում Տավուշի մարզի ու Ռեգենի տարածաշրջանի միջև համագործակցության գերմանական կողմի գործընկերներ Հերբերթ Ուննաշը, Սուսաննե Վագները և Ռեգինա Քաուշինգերը:

Հանդիպմանը ներկա էին ԵՊՀ ԻՄ-ի տնօրեն Ս.Առաքելյանը, մասնաճյուղի վարչական անձնակազմի ներկայացուցիչներ, դասախոսներ, ուսանողներ:

Այցելության նպատակը ԵՊՀ Իջևանի մասնաճյուղի և Ռեգենի տարածաշրջանի բարձրագույն ուսումնական հաստատությունների միջև համագործակցության ուղղությամբ նախնական քայլեր ձեռնարկելն էր:

Հանդիպման ընթացքում քննարկվեցին մի շարք հարցեր: Հայ և գերմանացի ուսանողների միջև անգլերեն լեզվով տեղի ունեցավ մտքերի փոխանակություն, խոսեցին իրենց նախասիրությունների և ընդհանուր հետաքրքրություննների մասին: Տնօրենի կողմից առաջարկվեց մասնաճյուղում ստեղծել գերմաներեն լեզվի ուսուցման կենտրոն, որպեսզի հետագա հաղորդակցումը լինի գերմաներենով:

Հյուրերն այցելեցին նաև մասնաճյուղի կիրառական արվեստի ֆակուլտետի կոմպոզիցիոն աշխատանքների պատկերասրահ, որտեղ ծանոթացան ֆակուլտետի շրջանավարտների բազմաժանր (գոբելեն, գեղանկար, վիտրաժային նկարչություն, փայտի գեղարվեստական մշակում, բոլորաքանդակ, բատիկա և այլն) ստեղծագործություններին:

Պատկերասրահի տպավորությունների գրքում պրոֆեսոր Պեխլաները կատարեց գրառում իր ստացած ջերմ տպավորությունների վերաբերյալ:

Երկու կողմերն էլ շահագրգռված էին հետագա լուրջ համագործակցության համար:

Հրեա գիտնական Յաիր Աուրոնի այցը ԵՊՀ Իջևանի մասնաճյուղ

2013թ. հուլիսի 20-ին ԵՊՀ Իջևանի մասնաճյուղի կոմպոզիցիոն աշխատանքների պատկերասրահում տեղի ունեցավ հանդիպում իսրայելցի պատմաբան Յաիր Աուրոնի, Հայաստանի գրողների միության նախագահ Լևոն Անանյանի, արտասահմանցի հյուրերի հետ:


Հանդիպմանը ներկա էին Տավուշի մարզպետ Արմեն Ղուլարյանը, ԵՊՀ ԻՄ-ի տնօրեն Սամվել Առաքելյանը, մասնաճյուղի վարչական և պրոֆեսորադասախոսական անձնակազմի ներկայացուցիչներ, ուսանողներ և այլք:


Արդեն հայերեն է թարգմանվել հրեա գիտնական և պատմաբան, Իսրայելի Բաց համալսարանի պրոֆեսոր, Սորբոնի համալսարանի փիլիսոփայության դոկտոր, պատմաբանների ու ցեղասպանագետների միջազգային մի շարք կազմակերպությունների անդամ, բազմաթիվ աշխատությունների հեղինակ Յաիր Աուրոնի «Անընդունելի անտարբերություն» գիրքը, որի համար նա 2000 թվականին ներկայացվել է կանադական «Լիոնալ Գելբեր» մրցանակին:

Արխիվային հետազոտությունների վրա հիմնված այդ գրքում Հայոց եղեռնը դիտարկվում է որպես նախորդողը 20-րդ դարի ցեղասպան բոլոր գործողությունների, հանգամանորեն ներկայացվում Օսմանյան կայսրության երկու ազգային փոքրամասնությունների` հրեաների ու հայերի այդ ժամանակվա վիճակը և քաղաքական ուժերի վերաբերմունքն այդ ամենի նկատմամբ:


Հանդիպման սկզբում մեծարգո հյուրին ողջունեցին Տավուշի մարզպետ Ա.Ղուլարյանը և մասնաճյուղի տնօրեն Ս.Առաքելյանը` նրան շնորհակալություն հայտնելով նվիրյալ գործունեության համար:

«Ես համոզված եմ, որ Ձեր գիրքը կարդացող որևէ մեկը ձեռքը չի մեկնի դեպի զենքը: Խաղաղությու՛ն բոլոր ազգերին և կրկին շնորհակալություն Ձեզ»,- նշեց ԵՊՀ ԻՄ-ի տնօրեն Ս.Առաքելյանը:


Այնուհետև Յաիր Աուրոնը ներկայացրեց Հայոց ցեղասպանության վերաբերյալ իր տեսակետը` ընդգծելով նրա ճանաչման անհրաժեշտությունը նման նախճիրները կանխելու նպատակով. «Չճանաչելով, չքննարկելով այլ ազգերի ցեղասպանությունը` մենք նվաստացնում ենք նաև Հոլոքոստը… Մենք պարտավոր ենք հարգելու նաև այլ ժողովուրդների հիշողությունը, պարտավոր ենք խորհրդարանական մակարդակով առաջ տանել Հայոց ցեղասպանության քննարկումը:

Մենք` իսրայելցիներս, պետք է առաջինը ճանաչեինք այդ ցեղասպանությունը: Սրտիս խորքում հայերն ինձ համար իմ եղբայրներն են»,- նշեց հրեա պատմաբանը:


Վերջում ԵՊՀ Իջևանի մասնաճյուղի կիրառական արվեստի ֆակուլտետի կողմից հյուրերին տրվեցին նվերներ:

Տեղի ունեցավ դիպլոմների հանձնման հանդիսավոր արարողությունը

2013թ. հունիսի 29-ին ԵՊՀ Իջևանի մասնաճյուղում տեղի ունեցավ դիպլոմների հանձնման հանդիսավոր արարողությունը:

 

Ներկա էին Տավուշի մարզպետ Ա. Ղուլարյանը, Իջևանի քաղաքապետ Վ. Ղալումյանը, ԵՊՀ պրոռեկտորներ Ա. Գրիգորյանը և Գ. Գևորգյանը, մասնաճյուղի վարչական ու պրոֆեսորադասախոսական անձնակազմի ներկայացուցիչները, շրջանավարտները, ծնողները և այլք:

 

Ուսանողական խորհուրդը կազմակերպել էր տոնական միջոցառում, որի ընթացքում ուսանողները երգեցին հայրենասիրական երգեր, ասմունքեցին մասնաճյուղին նվիրված ձոն: Այն գրել էր մասնաճյուղի հայոց լեզվի և գրականության ամբիոնի դոցենտ Ա.Սարհատյանը:

 

Շրջանավարտներին շնորհավորեցին մասնաճյուղի տնօրեն Ս. Առաքելյանը, ԵՊՀ պրոռեկտոր Ա. Գրիգորյանը, Տավուշի մարզպետ Ա. Ղուլարյանը՝ նրանց մաղթելով կանաչ ճանապարհ, շնորհակալություն հայտնելով ծնողներին:

 

Մասնաճյուղի տնօրենը խոսեց ուսանողների առաջադիմության, նոր մասնագիտությունների, Կիրառական արվեստի ֆակուլտետում մագիստրատուրայի բացման մասին:

 

Հաշվի առնելով մարզպետի ներդրումը այդ մասնագիտության զարգացման գործում՝ տնօրենը նվիրեց նրան Կիրառական արվեստի ֆակուլտետի մագիստրանտերի աշխատանքներից մեկը:

Ելույթ ունեցավ «Մանկավարժություն և հոգեբանություն» մասնագիտության շրջանավարտ Մարիամ Բուդուրյանի հայրը, շնորհակալություն հայտնեց մասնաճյուղի վարչական և պրոֆեսորադասախոսական անձնակազմի ներկայացուցիչներին:
Շրջանավարտ Սլավիկ Ալավերդյանը առաջին կուրսեցիներին փոխանցեց մասնաճյուղի բացման բանալին և կոչ արեց լինել ուսումնատենչ, ակտիվ, ձգտող և ինքնավստահ:

 

Այնուհետև պաշտոնատար անձինք հանձնեցին դիպլոմները: Գերազանցության դիպլոմ ստացողները կրում էին եռագույն թիկնոցներ ու գլխարկներ: Դա ավելի տոնական տեսք էր հաղորդում միջոցառմանը և շրջանավարտներին պարտավորեցնում շարունակել իրենց հաջողությունները: