Երևանի պետական համալսարանի Իջևանի մասնաճյուղ

Կայացավ նախատոնական հանդիպումը

2012թ. դեկտեմբերի 27-ին ԵՊՀ ԻՄ դահլիճում տեղի ունեցավ տնօրեն Սամվել Առաքելյանի նախատոնական հանդիպումը մասնաճյուղի աշխատակիցների, ուսանողական խորհրդի և ուսանողական գիտական ընկերության անդամների հետ:

Մասնաճյուղի տնօրենը ներկայացրեց տարեվերջյան հաշվետվություն՝ ամփոփելով այս տարվա գլխավոր ձեռքբերումները:

Նա մասնավորապես նշեց. «2011թ. մենք չունեցանք ընդունելություն, և բնական է, որ ուսանողների թվի կտրուկ պակասումը (մոտավորապես 450 ուսանողով) պետք է բացասաբար անդրադառնար մեր հաստատության հետագա գործունեության վրա: Բայց, նկատի ունենալով այն հանգամանքը, որ մենք ունեինք խնայված միջոցներ և կանխատեսել էինք նման վիճակ, կարողացանք 2012 թվականն անցկացնել առանց ցնցումների և կրճատումների: Թվական տվյալները բավականին գոհացուցիչ են մեզ բոլորիս համար, որովհետև աշխատողների 61,2%-ը կազմում է պրոֆեսորադասախոսական անձնակազմը: Այս առումով մենք առաջին եռյակում ենք գտնվում հանրապետությունում»:

Տնօրենը նաև ընդգծեց, որ յուրաքանչյուր բուհ ունի երեք հիմնական գործառույթ՝ կրթական, դաստիարակչական, սոցիալական, և մասնաճյուղի ղեկավարությունը պիտի կարողանա ապահովել այդ գործառույթների իրականացումը, Իջևանը դարձնել համալսարանական քաղաք:

Պարոն Առաքելյանը շնորհավորեց բոլորի Ամանորը և Սուրբ Ծնունդը՝ հղելով բարեմաղթանքներ և ցանկանալով, որ 2013 թվականը լինի որակական լուրջ փոփոխությունների տարի:

Իրենց աշխատանքային պարտականությունները լիարժեք ու բարեխղճորեն կատարելու համար պատվոգրերի ու շնորհակալագրերի արժանացան մասնաճյուղի 10 աշխատակիցներ (Գևորգ Մշեցի Ջավրուշյան, Նաիրա Առուշանյան, Մուշեղ Սարուխանյան, Պավել Ասիլբեկյան, Աիդա Սարհատյան, Սոնա Խաչատրյան, Մարիետա Ճաղարյան, Արփինե Խաչատրյան, Ալվինա Առուստամյան, Համլետ Քոչարյան):

ԵՊՀ-ի ռեկտոր Արամ Սիմոնյանի կողմից մասնաճյուղի տնօրենը շքանշան հանձնեց Օտար լեզուների ամբիոնի ասիստենտ Աիդա Մարդանյանին՝ անբասիր, արդյունավետ աշխատանքի և մասնաճյուղում կրթության զարգացման գործում ունեցած նշանակալի ավանդի համար:

Տնօրեն Ս. Առաքելյանը նաև հատուկ շնորհակալություն հայտնեց ՈՒԳԸ-ի նախագահ Սլավիկ Ալավերդյանին՝ նշելով, որ մասնաճյուղն իր գոյության ընթացքում այսքան ակտիվ ու գործունյա ուսանողական գիտական ընկերություն դեռևս չէր ունեցել:

ՈՒԽ-ի նախագահ Նաիրի Ճաղարյանը ուսանողության անունից սրտանց շնորհավորեց բոլորի Նոր տարին և Սուրբ Ծնունդը:

Հանդիպման վերջում տեղի ունեցավ հյուրասիրություն:

Հումանիտար գիտությունների ֆակուլտետն ընտրեց ՈՒԳԸ-ի նոր նախագահ

Ս.թ. դեկտեմբերի 24-ին Հումանիտար գիտությունների ֆակուլտետում տեղի ունեցան ֆակուլտետի ուսանողական գիտական ընկերության նախագահի ընտրություններ:

ՈՒԳԸ նախագահի թեկնածուներն էին «Պատմություն» մասնագիտության 3-րդ կուրսի ուսանող Արման Մատինյանը և «Հայոց լեզու և գրականություն» մասնագիտության 3-րդ կուրսի ուսանողուհի Մերի Սահակյանը:

Ընտրությանը մասնակցում էին ֆակուլտետի 48 ուսանողներ, ինչպես նաև մասնաճյուղի ՈՒԳԸ-ի նախագահը, փոխնախագահը, մյուս ֆակուլտետների ՈՒԳԸ-ի նախագահները:

Նախ ֆակուլտետի ՈՒԳԸ-ի գործող նախագահ Միկիչ Փարսադանյանը ներկայացրեց կիսամյակի ընթացքում կատարած աշխատանքների հաշվետվությունը:

Ապա իր խոսքն ասեց մասնաճյուղի ՈՒԳԸ-ի նախագահ Սլավիկ Ալավերդյանը՝ շնորհակալություն հայտնելով ՈՒԳԸ-ի գործող նախագահին գրեթե 3 տարի ֆակուլտետի ՈՒԳԸ-ն ղեկավարելու և կազմակերպչական գործունեություն ծավալելու համար:

Այնուհետև թեկնածուները հակիրճ ներկայացրին իրենց ծրագրերը:

Փակ ընտրությունների արդյունքում 33 ձայնով ֆակուլտետի ՈՒԳԸ-ի նախագահ ընտրվեց Մերի Սահակյանը:

Ներկաները շնորհավորեցին նրան և մաղթեցին կազմակերպչական բուռն գործունեություն:

Ստեղծագործում են մեր ուսանողները

Ս.թ. դեկտեմբերի 19-ին ԵՊՀ մշակույթի կենտրոնի դահլիճում տեղի ունեցավ երկու գրքերի շնորհանդես: Ներկա էին ՀԳՄ նախագահ Լ.Անանյանը, ԵՊՀ ռեկտոր Ա.Սիմոնյանը, պրոռեկտոր Ռ.Մարկոսյանը, Մշակույթի կենտրոնի ղեկավար Կ.Դավթյանը, Գրական ստուդիայի ղեկավար Ս.Մխիթարյանը, դասախոսներ, ուսանողներ:

2011 թ. Երևանի պետական համալսարանը և Արցախի պետական համալսարանը կազմակերպել էին ստեղծագործությունների մրցույթ՝ նվիրված ՀՀ անկախության 20-ամյակին:

Առաջին գրքում, որը կրում է «Քայլեր և արձագանք» վերնագիրը, ամփոփված են այդ մրցույթի լավագույն ստեղծագործությունները:

Երկրորդ գիրքը, որը «Գրական համալսարան» շարքի հերթական գիրքն է, կոչվում է «Ստեղծագործում են ուսանողները» և նվիրված է հայ գրատպության 500-ամյակին: Այստեղ ընդգրկված են տարբեր տարիներին ստեղծագործած ուսանողների, այդ թվում՝ ԵՊՀ Իջևանի մասնաճյուղի 4 ուսանողների՝ Սլավիկ Ալավերդյան, Լիլիթ Քալանթարյան (ԿՄ/Ֆ 4-րդ կուրս), Գոհար Ամիրխանյան, Լիանա Ափինյան (Սերվիս 3-րդ կուրս) աշխատանքները:

ԵՊՀ մշակույթի կենտրոնը կազմակերպել էր տոնական միջոցառում, որի ընթացքում հնչեցին գրքերում տեղ գտած ստեղծագործությունների արտասանություններ, երգեր, բեմադրվեցին փոքրիկ ներկայացումներ:

Աշխատանքի տոնավաճառ՝ ուսանողների համար

Ս.թ. դեկտեմբերի 13-15-ը ԵՊՀ Իջևանի մասնաճյուղում կայացավ «Աշխատանքի տոնավաճառ. առաջին քայլեր դեպի աշխատանք» ծրագիրը:

Այն իրականացվում է ՀՀ բոլոր մարզերում Սպորտի և երիտասարդության հարցերի նախարարության «Երիտասարդական միջոցառումների իրականացման կենտրոն» ՊՈԱԿ-ի կողմից:

Առաջին երկու օրերին ծրագրին մասնակցող շուրջ 25 ուսանողներ սովորեցին, թե ինչպես փնտրել աշխատանք, գրել ինքնակենսագրություն, դիմել գործատուին և ներկայանալ աշխատանքային հարցազրույցի, իմացան աշխատանքային պարտականությունների և իրավունքների մասին:

Երրորդ օրը տեղի ունեցավ աշխատանքի տոնավաճառ: Հրավիրվել էին մի շարք կազմակերպությունների անդամներ, որոնք ներկայացրին իրենց կազմակերպությունների գործունեության ուղղվածությունը և թափուր աշխատատեղերը, պատասխանեցին ուսանողներին հետաքրքրող հարցերին:

Վերջում բոլոր մասնակիցներին տրվեցին հավաստագրեր:

Կարդալ ավելին

Ուսանողական գիտաժողովի փակումը

Ս.թ. դեկտեմբերի 7-ին ԵՊՀ Իջևանի մասնաճյուղի կիրառական արվեստի ֆակուլտետի նիստերի դահլիճում տեղի ունեցավ ՈՒԳԸ հիմնադրման 10-ամյակին նվիրված քառօրյա գիտաժողովի փակումը:

ՈՒԳԸ նախագահ Սլավիկ Ալավերդյանը շնորհակալություն հայտնեց ներկաներին, մասնակիցներին, ԵՊՀ ԻՄ տնօրենությանը՝ գիտաժողովի կազմակերպմանն աջակցելու համար: Նա ամփոփեց գիտաժողովի արդյունքները՝ նշելով, որ բոլոր բաժանմունքներում զեկուցումները հետաքրքիր էին, ծավալվեցին ակտիվ քննարկումներ: Նա նշեց, որ այս գիտաժողովը յուրօրինակ ստուգատես էր հետագայում ավելի մասշտաբային գիտաժողովներ կազմակերպելու իմաստով:

Սլավիկ Ալավերդյանը ներկայացրեց գիտաժողովի զեկուցումների՝ տպագրության համար անհրաժեշտ չափորոշիչները և համապատասխան ամբիոնի կողմից տրվող երաշխավորագրի ձևը: Այնուհետև գիտաժողովի մասնակիցներին հանձնեց հավաստագրեր:

Վերջում իր խոսքն ասաց Անձնակազմի կառավարման բաժնի վարիչ Ա.Հովհաննիսյանը: Նա շնորհավորեց բոլոր մասնակիցներին, Ուսանողական գիտական ընկերությանը և մաղթեց նորանոր հաջողություններ: Կարդալ ավելին