Երևանի պետական համալսարանի Իջևանի մասնաճյուղ

Գերմանացի հյուրերի այցը ԵՊՀ Իջևանի մասնաճյուղ

2013թ. սեպտեմբերի 11-ին ԵՊՀ Իջևանի մասնաճյուղ այցելեցին Բավարիայի Այխշտետ Ինգոլշտադ համալսարանի դոկտոր, պրոֆեսոր Հարալդ Պեխլաները և նույն համալսարանի տուրիզմի բաժնի մագիստրատուրայի առաջին կուրսի մի խումբ ուսանողներ: Նրանց ուղեկցում էին Գերմանիայի Միջազգային Համագործակցության (GIZ) «Քաղաքների ցանց Հարավային Կովկասում» նախաձեռնության շրջանակներում Տավուշի մարզի ու Ռեգենի տարածաշրջանի միջև համագործակցության գերմանական կողմի գործընկերներ Հերբերթ Ուննաշը, Սուսաննե Վագները և Ռեգինա Քաուշինգերը:

Հանդիպմանը ներկա էին ԵՊՀ ԻՄ-ի տնօրեն Ս.Առաքելյանը, մասնաճյուղի վարչական անձնակազմի ներկայացուցիչներ, դասախոսներ, ուսանողներ:

Այցելության նպատակը ԵՊՀ Իջևանի մասնաճյուղի և Ռեգենի տարածաշրջանի բարձրագույն ուսումնական հաստատությունների միջև համագործակցության ուղղությամբ նախնական քայլեր ձեռնարկելն էր:

Հանդիպման ընթացքում քննարկվեցին մի շարք հարցեր: Հայ և գերմանացի ուսանողների միջև անգլերեն լեզվով տեղի ունեցավ մտքերի փոխանակություն, խոսեցին իրենց նախասիրությունների և ընդհանուր հետաքրքրություննների մասին: Տնօրենի կողմից առաջարկվեց մասնաճյուղում ստեղծել գերմաներեն լեզվի ուսուցման կենտրոն, որպեսզի հետագա հաղորդակցումը լինի գերմաներենով:

Հյուրերն այցելեցին նաև մասնաճյուղի կիրառական արվեստի ֆակուլտետի կոմպոզիցիոն աշխատանքների պատկերասրահ, որտեղ ծանոթացան ֆակուլտետի շրջանավարտների բազմաժանր (գոբելեն, գեղանկար, վիտրաժային նկարչություն, փայտի գեղարվեստական մշակում, բոլորաքանդակ, բատիկա և այլն) ստեղծագործություններին:

Պատկերասրահի տպավորությունների գրքում պրոֆեսոր Պեխլաները կատարեց գրառում իր ստացած ջերմ տպավորությունների վերաբերյալ:

Երկու կողմերն էլ շահագրգռված էին հետագա լուրջ համագործակցության համար:

Հրեա գիտնական Յաիր Աուրոնի այցը ԵՊՀ Իջևանի մասնաճյուղ

2013թ. հուլիսի 20-ին ԵՊՀ Իջևանի մասնաճյուղի կոմպոզիցիոն աշխատանքների պատկերասրահում տեղի ունեցավ հանդիպում իսրայելցի պատմաբան Յաիր Աուրոնի, Հայաստանի գրողների միության նախագահ Լևոն Անանյանի, արտասահմանցի հյուրերի հետ:


Հանդիպմանը ներկա էին Տավուշի մարզպետ Արմեն Ղուլարյանը, ԵՊՀ ԻՄ-ի տնօրեն Սամվել Առաքելյանը, մասնաճյուղի վարչական և պրոֆեսորադասախոսական անձնակազմի ներկայացուցիչներ, ուսանողներ և այլք:


Արդեն հայերեն է թարգմանվել հրեա գիտնական և պատմաբան, Իսրայելի Բաց համալսարանի պրոֆեսոր, Սորբոնի համալսարանի փիլիսոփայության դոկտոր, պատմաբանների ու ցեղասպանագետների միջազգային մի շարք կազմակերպությունների անդամ, բազմաթիվ աշխատությունների հեղինակ Յաիր Աուրոնի «Անընդունելի անտարբերություն» գիրքը, որի համար նա 2000 թվականին ներկայացվել է կանադական «Լիոնալ Գելբեր» մրցանակին:

Արխիվային հետազոտությունների վրա հիմնված այդ գրքում Հայոց եղեռնը դիտարկվում է որպես նախորդողը 20-րդ դարի ցեղասպան բոլոր գործողությունների, հանգամանորեն ներկայացվում Օսմանյան կայսրության երկու ազգային փոքրամասնությունների` հրեաների ու հայերի այդ ժամանակվա վիճակը և քաղաքական ուժերի վերաբերմունքն այդ ամենի նկատմամբ:


Հանդիպման սկզբում մեծարգո հյուրին ողջունեցին Տավուշի մարզպետ Ա.Ղուլարյանը և մասնաճյուղի տնօրեն Ս.Առաքելյանը` նրան շնորհակալություն հայտնելով նվիրյալ գործունեության համար:

«Ես համոզված եմ, որ Ձեր գիրքը կարդացող որևէ մեկը ձեռքը չի մեկնի դեպի զենքը: Խաղաղությու՛ն բոլոր ազգերին և կրկին շնորհակալություն Ձեզ»,- նշեց ԵՊՀ ԻՄ-ի տնօրեն Ս.Առաքելյանը:


Այնուհետև Յաիր Աուրոնը ներկայացրեց Հայոց ցեղասպանության վերաբերյալ իր տեսակետը` ընդգծելով նրա ճանաչման անհրաժեշտությունը նման նախճիրները կանխելու նպատակով. «Չճանաչելով, չքննարկելով այլ ազգերի ցեղասպանությունը` մենք նվաստացնում ենք նաև Հոլոքոստը… Մենք պարտավոր ենք հարգելու նաև այլ ժողովուրդների հիշողությունը, պարտավոր ենք խորհրդարանական մակարդակով առաջ տանել Հայոց ցեղասպանության քննարկումը:

Մենք` իսրայելցիներս, պետք է առաջինը ճանաչեինք այդ ցեղասպանությունը: Սրտիս խորքում հայերն ինձ համար իմ եղբայրներն են»,- նշեց հրեա պատմաբանը:


Վերջում ԵՊՀ Իջևանի մասնաճյուղի կիրառական արվեստի ֆակուլտետի կողմից հյուրերին տրվեցին նվերներ:

Տեղի ունեցավ դիպլոմների հանձնման հանդիսավոր արարողությունը

2013թ. հունիսի 29-ին ԵՊՀ Իջևանի մասնաճյուղում տեղի ունեցավ դիպլոմների հանձնման հանդիսավոր արարողությունը:

 

Ներկա էին Տավուշի մարզպետ Ա. Ղուլարյանը, Իջևանի քաղաքապետ Վ. Ղալումյանը, ԵՊՀ պրոռեկտորներ Ա. Գրիգորյանը և Գ. Գևորգյանը, մասնաճյուղի վարչական ու պրոֆեսորադասախոսական անձնակազմի ներկայացուցիչները, շրջանավարտները, ծնողները և այլք:

 

Ուսանողական խորհուրդը կազմակերպել էր տոնական միջոցառում, որի ընթացքում ուսանողները երգեցին հայրենասիրական երգեր, ասմունքեցին մասնաճյուղին նվիրված ձոն: Այն գրել էր մասնաճյուղի հայոց լեզվի և գրականության ամբիոնի դոցենտ Ա.Սարհատյանը:

 

Շրջանավարտներին շնորհավորեցին մասնաճյուղի տնօրեն Ս. Առաքելյանը, ԵՊՀ պրոռեկտոր Ա. Գրիգորյանը, Տավուշի մարզպետ Ա. Ղուլարյանը՝ նրանց մաղթելով կանաչ ճանապարհ, շնորհակալություն հայտնելով ծնողներին:

 

Մասնաճյուղի տնօրենը խոսեց ուսանողների առաջադիմության, նոր մասնագիտությունների, Կիրառական արվեստի ֆակուլտետում մագիստրատուրայի բացման մասին:

 

Հաշվի առնելով մարզպետի ներդրումը այդ մասնագիտության զարգացման գործում՝ տնօրենը նվիրեց նրան Կիրառական արվեստի ֆակուլտետի մագիստրանտերի աշխատանքներից մեկը:

Ելույթ ունեցավ «Մանկավարժություն և հոգեբանություն» մասնագիտության շրջանավարտ Մարիամ Բուդուրյանի հայրը, շնորհակալություն հայտնեց մասնաճյուղի վարչական և պրոֆեսորադասախոսական անձնակազմի ներկայացուցիչներին:
Շրջանավարտ Սլավիկ Ալավերդյանը առաջին կուրսեցիներին փոխանցեց մասնաճյուղի բացման բանալին և կոչ արեց լինել ուսումնատենչ, ակտիվ, ձգտող և ինքնավստահ:

 

Այնուհետև պաշտոնատար անձինք հանձնեցին դիպլոմները: Գերազանցության դիպլոմ ստացողները կրում էին եռագույն թիկնոցներ ու գլխարկներ: Դա ավելի տոնական տեսք էր հաղորդում միջոցառմանը և շրջանավարտներին պարտավորեցնում շարունակել իրենց հաջողությունները:

 

ԵՊՀ Իջևանի մասնաճյուղում բացվեց ՄԱԿ-ի անկյուն

2013թ. հունիսի 10-ին  ԵՊՀ Իջևանի մասնաճյուղի գրադարանում տեղի ունեցավ ՄԱԿ-ի անկյունի հանդիսավոր բացումը, որն իրականացվում է ՄԱԿ-ի Հանրային տեղեկատվության վարչության հայաստանյան գրասենյակի նախաձեռնությամբ:

Բացմանը մաասնակցում էին Հայաստանում ՄԱԿ-ի Հանրային տեղեկատվության վարչության ներկայացուցիչ Մարիա Դոցենկոն, ԵՊՀ ԻՄ-ի տնօրեն Ս.Առաքելյանը, տնօրենի իրավախորհրդատու Ա.Հովհաննիսյանը, գրադարանի տնօրեն Կ.Ուլիխանյանը, Իջևանի փոխքաղաքապետ Ս.Մանուկյանը, քաղաքապետարանի մշակույթի բաժնի գլխավոր մասնագետ Լ.Ղալումյանը,  մասնաճյուղի աշխատակիցներ, ուսանողներ:

Նախաձեռնության նպատակը ՄԱԿ-ի հայաստանյան գրասենյակի կողմից մարզերում երիտասարդության հնարավորությունների ընդլայնումն է: Ուսանողները, դասախոսները, հասարակության տարբեր խավերի ներկայացուցիչներն այժմ ավելի մեծ հնարավորություն կունենան ծանոթանալու ՄԱԿ-ի արժեքների, համաշխարհային օրակարգի և ՄԱԿ-ի հայաստանյան գրասենյակի գործունեության հետ:

Մասնաճյուղի գրադարանին ՄԱԿ ՀՏՎ կողմից տրամադրվեց ավելի քան 800 միավոր գրականություն, պաստառներ, գրքույկներ և այլ հրատարակումներ՝ թողարկված Նյու Յորքում, Վիեննայում և Ժնևում տեղակայված ՄԱԿ-ի գրասենյակների, ինչպես նաև Հայաստանում գործող ՄԱԿ-ի գործակալությունների, հիմնադրամների և ծրագրերի կողմից:

«Երիտասարդների կարողությունների և հնարավորությունների ընդլայնումը և հասարակության հետ երկխոսությունը մշտապես գտնվում է ՄԱԿ-ի ուշադրության կենտրոնում: Ձեր համայնքների ներկայացուցիչները ՄԱԿ-ի բազմաթիվ ծրագրերի ակտիվ մասնակիցներն են և մեր վստահելի գործընկերները ՄԱԿ-ի արժեքների զարգացման առաջմղման հարցում: Մենք ուրախ ենք աջակցել ձեզ՝ ձեր գիտելիքների հետագա բարելավման և ՄԱԿ-ի գործունեության մեջ ներգրավվելու հարցում»,-նշեց  ՄԱԿ-ի ՀՏՎ ներկայացուցիչ Մարիա Դոցենկոն:

ԵՊՀ Իջևանի մասնաճյուղի և ՄԱԿ-ի ներկայացուցիչները ողջունեցին այս համագործակցությունը՝ ընդգծելով, որ այն կրելու է շարունակական բնույթ:

Իրանի Իսլամական Հանրապետության դեսպանի այցը ԵՊՀ Իջևանի մասնաճյուղ

2013թ. մայիսի 21-ին պաշտոնական այցով Տավուշի մարզում էր Իրանի Իսլամանական Հանրապետության արտակարգ և լիազոր դեսպան Մոհամմադ Ռեյիսը: Նրան ուղեկցում էր տնտեսական հարցերով խորհրդական Ռըզա Մուստաֆան:

Մարզպետարանում տեղի ունեցած ընդունելությունից հետո Տավուշի մարզպետ Արմեն Ղուլարյանի, փոխմարզպետներ Լևոն Սարգսյանի, Վահե Վարդապետյանի, մարզպետի խորհրդական Լյուբիկ Չիբուխչյանի, ինչպես նաև Իջևանի քաղաքապետ Վարդան Ղալումյանի ուղեկցությամբ հյուրերն այցելեցին ԵՊՀ Իջևանի մասնաճյուղ:

Նախ նրանք հանդիպում ունեցան մասնաճյուղի տնօրեն Ս.Առաքելյանի հետ, այնուհետև այցելեցին Կիրառական արվեստի ֆակուլտետ, ծանոթացան ուսանողների ավարտական աշխատանքներին:

Քննարկվեցին կրթության բնագավառում համագործակցելու վերաբերյալ մի շարք հարցեր: Դեսպանը խոստացավ օժանդակել մասնաճյուղին՝ ստեղծելու պարսկերենի ուսուցման ժամանակակից կենտրոն:

Մոհամմադ Դեյիսը և նրան ուղեկցողներն իրենց հիացմունքն արտահայտեցին Կիրառական արվեստի ֆակուլտետի ուսանողների աշխատանքների կապակցությամբ, իրենց տպավորությունները գրի առան տպավորությունների մատյանում:

            Վերջում ԵՊՀ Իջևանի մասնաճյուղի կողմից Իրանի Իսլամանական Հանրապետության արտակարգ և լիազոր դեսպանին նվիրվեց նախորդ տարիների ավարտական աշխատանքներից մեկը: