Երևանի պետական համալսարանի Իջևանի մասնաճյուղ

Դրամաշնորհային մրցույթում հաղթել է ԵՊՀ ԻՄ ընդհանուր տնտեսագիտության ամբիոնի վարիչ, տ.գ.դ., պրոֆեսոր Հ.Մարզպանյանի ղեկավարած հետազոտական թիմը

2012թ. Շվեյցարիայի Ֆրայբուրգի համալսարանի հետազոտությունների կովկասյան ցանցի կենտրոնի կողմից հայտարարվել էր դրամաշնորհային մրցույթ՝ Վրաստանի և Հայաստանի ակադեմիական հետազոտությունների խթանման նպատակով:

Մրցույթին մասնակցելու հայտ էր ներկայացրել ԵՊՀ ԻՄ ընդհանուր տնտեսագիտության ամբիոնի վարիչ, տ.գ.դ., պրոֆեսոր Հ.Մարզպանյանի  ղեկավարած հետազոտական թիմը (տ.գ.թ. Գ.Սիրոյան, սոց. թեկն., դոց. Ս.Աստվածատուրով, տեխն գիտ. թեկն. Ռ.Մարկոսյան, սոցիալական քաղաքականության մագիստրոս Ա.Ուդումյան, տեխն. աշխատող Ա.Բաղդասարյան):

Ընդհանուր 48 հայտից ընդունվել և ֆինանսավորվել է 7-ը (4-ը՝ Վրաստանից,  3-ը՝ Հայաստանից):

Այդ երեք հայտերից մեկը պատկանում է Հ.Մարզպանյանի  ղեկավարած թիմին, որի հետազոտական ծրագրի թեման է՝ «Միգրացիայի և մարդկային կապիտալի վերարտադրության փոխառնչությունները ՀՀ-ում»:

Ծրագիրը մեկնարկել է 2012թ. հոկեմբերի 1-ից և նախատեսված է 2 տարվա համար: Ավարտին է մոտենում ծրագրի առաջին փուլը, որի ընթացքում իրականացվել է մասնագիտական գրականության վերլուծություն, հետազոտությունների արդյունքների հավաքում, մշակում, խմբավորում, ամփոփում, որոշ հայեցակարգային հարցադրումների ու մոտեցումների հստակեցում, վարկածների առաջքաշում: Այս փուլում հրատարակվել է երկու հոդված, որոնցից մեկը՝ Մոսկվայում, իսկ 3-րդ հոդվածն ընթացքի մեջ է:

2-րդ փուլն սկսվելու է ապրիլից և հիմնականում ընդգրկելու է դաշտային աշախատանքներ (սոցհարցումների անցկացում, որակական հարցազրույցներ նեղ մասնագետների հետ, ֆոկուս-խմբեր,  կլոր սեղանների, քննարկումների կազմակերպում և այլն): Դաշտային աշխատանքների հարցումների համար որպես թիրախային մարզեր ընտրվել են Տավուշը, Սյունիքը և Երևանը:

Այս աշխատանքներում նախատեսվում է ներգրավել նաև առաջադեմ ուսանողների, ովքեր իրենց նախաավարտական պրակտիկան կանցնեն իրականացվող հետազոտության շրջանակում, իսկ ստսցված արդյուքները կարող են օգտագործել  կուրսային, ավարտական աշխատանքներում,  ՈՒԳԸ գիտաժողովներում և այլն:

2-րդ տարվա ընթացքում նախատեսվում է իրականացնել ամփոփում, համեմատություններ, թարգմանություններ, հրատարակումներ, քննակումներ, շնորհնադեսներ:

Պարգևատրվեցին “Լավագույն ուսանող” հանրապետական մրցույթում հաղթած մեր ուսանողները

2013 թ. փետրվարի 21-ին ԵՊՀ Իջևանի մասնաճյուղում տեղի ունեցավ տնօրենության ընդլայնված նիստ, որին ներկա էին մասնաճյուղի ավելի քան 50 աշխատակիցներ և ուսանողներ:

Նիստի հրավիրման շարժառիթը նախօրեին ԵՊՀ Պալեանների անվան դահլիճում տեղի ունեցած «Լավագույն ուսանող» հանրապետական մրցույթի մրցանակաբաշխությունն էր:

Այն կազմակերպել էր ՀՀ կրթության և գիտության նախարարությունը Հայաստանի երիտասարդական հիմնադրամի և ՎիվաՍել-ՄՏՍ-ի հովանավորությամբ: Մրցույթն իրականացվել էր 2 փուլով՝ ներբուհական և միջբուհական, բակալավրի և մագիստրոսի կրթական ծրագրերով, 4 անվանակարգերով` «Ուսանողական ինքնակառավարում», «Մշակույթ» (արվեստ, գրականություն), «Սպորտ», «Գիտահետազոտական աշխատանք» (բնագիտական, հումանիտար, տեխնիկական ենթոլորտներով):

Մրցանակաբաշխությանը ներկա էին ՀՀ վարչապետը, ԿԳ նախարարը, ՀԵՀ համակարգողը, տարբեր բուհերի ներկայացուցիչներ, ուսանողներ, հյուրեր:

12 ուսանող գրավեցին 1-ին, 11-ը՝ 2-րդ, 10-ը՝ 3-րդ տեղ:

ԵՊՀ Իջևանի մասնաճյուղի «Կիրառական մաթեմատիկա և ֆիզիկա» մասնագիտության 4-րդ կուրսի ուսանող, ՈՒԳԸ-ի նախագահ Սլավիկ Ալավերդյանը և «Տնտեսագիտության տեսություն» մասնագիտության 4-րդ կուրսի ուսանող, ՈՒԽ-ի նախագահ Նաիրի Ճաղարյանը «Գիտահետազոտական աշխատանք» անվանակարգում գրավեցին 1-ին և 2-րդ տեղերը:

ԵՊՀ ԻՄ-ի տնօրեն Ս. Առաքելյանը նշեց, որ սա առանձնահատուկ ձեռքբերում է մասնաճյուղի համար: Նա շնորհավորեց մրցանակակիրներին և մասնաճյուղի տնօրենության անունից նրանց հանձնեց դրամական պարգևներ (50.000-ական ՀՀ դրամ):

Այնուհետև ՈՒԽ-ի և ՈՒԳԸ-ի նախագահները ներկայացրին իրենց կառույցների կազմում տեղի ունեցած փոփոխությունները: Փոխվել են բոլոր ֆակուլտետների ՈՒԽ-ի նախագահները: Հումանիտար գիտությունների ֆակուլտետում Հերմինե Օթարյանին փոխարինել է Էրիկ Ավետիսյանը, Տնտեսագիտության ֆակուլտետում` Իսրայել Մովսեսյանին` Լուիզա Ալեքսանյանը, Բնական գիտությունների ֆակուլտետում`  Պարույր Ամիրխանյանին` Արթուր Մարդանյանը, Կիրառական արվեստի ֆակուլտետում` Վարդան Եգանյանին` Հերիքնազ Ոսկանյանը:

Փոխվել են նաև Հումանիտար գիտությունների և Տնտեսագիտության ֆակուլտետների ՈՒԳԸ-ի նախագահները: Հումանիտար գիտությունների ֆակուլտետում Միկիչ Փարսադանյանին փոխարինել է Մերի Սահակյանը, Տնտեսագիտության ֆակուլտետում` Սասուն Սահակյանին` Հասմիկ Ալիխանյանը:

Ներկաները շնորհավորեցին ֆակուլտետների նորընտիր ՈՒԽ-ի և ՈՒԳԸ-ի նախագահներին և մաղթեցին բեղուն գործունեություն:

Պարգևատրվեց մասնաճյուղի ուսանողական գիտական ընկերությունը

        Ս.թ. դեկտեմբերի 28-ին Երևանի պետական համալսարանի ուսանողական գիտական ընկերությունն ամփոփեց 2012-2013 ուստարվա առաջին կիսամյակի գործունեությունը:

        ՈՒԳԸ-ի ընդլայնված նիստին ներկա էին ընկերության կառուցվածքային ստորաբաժանումների ղեկավարները, բազմաթիվ ակտիվ անդամներ, ԵՊՀ ուսանողների, շրջանավարտների և հասարակայնության հետ կապերի գծով պրոռեկտոր Ռուբեն Մարկոսյանը, ուսանողների հետ տարվող աշխատանքների բաժնի վարիչ Վահագն Վարագյանը և ուսանողական խորհրդի նախագահ Ռաֆֆի Քարամյանը:

            ՈՒԳԸ-ի նախագահ Միքայել Մալխասյանը ներկայացրեց կիսամյակի գործունեությունը: Այս կիսամյակի ընթացքում ՈՒԳԸ-ն կազմակերպել է 19 գիտաժողով, որոնցից 7-ը՝ միջբուհական, 8 օլիմպիադա, 40 արտահամալսարանական միջոցառում, սեմինարներ, ֆիլմի դիտումներ, քննարկումներ և այլ բնույթի ավելի քան 140 միջոցառում:

   Ապա կայացավ Հայոց ցեղասպանության 97-րդ տարելիցին նվիրված հանրապետական երիտասարդական գիտաժողովի հոդվածների ժողովածուի շնորհանդեսը:

Պատվոգրեր հանձնեցին երկու ֆակուլտետների ՈՒԳԸ-ների կազմակերպած վերջին գիտաժողովների մասնակիցներին, որոնց թվում էին մեր մասնաճյուղի ուսանողներ Մերի Սահակյանը և Սլավիկ Ալավերդյանը:

           Այնուհետև տեղի ունեցավ պարգևատրման արարողությանը: Պարգևների արժանացան «գերազանց» և «գերազանց վերապահումով» գնահատականներ ստացած ֆակուլտետների ՈՒԳԸ-ները: ԵՊՀ Իջևանի մասնաճյուղի ՈՒԳԸ-ն ընդհանուր հաշվարկով զբաղեցրել էր 5-րդ տեղը (նախորդ կիսամյակի համեմատ բարելավել է ցուցանիշը երկու տեղով) և արժանացել «գերազանց վերապահումով» գնահատականի: Պարգևն ստացավ մասնաճյուղի ՈՒԳԸ-ի նախագահ Սլավիկ Ալավերդյանը:

            Պարգևատրվեցին նաև յուրաքանչյուր ՈՒԳԸ-ի մեկական ակտիվ անդամ. մեր մասնաճյուղից պարգևատրվեց «Մանկավարժություն և հոգեբանություն» մասնագիտության 4-րդ կուրսի ուսանողուհի Աննա Ադամյանը:

          ՈՒԳԸ-ի նախագահը, Ռ. Մարկոսյանը, Վ. Վարագյանը և Ռ. Քարամյանը շնորհավորեցին բոլորի գալիք Ամանորը և Սուրբ Ծնունդը՝ մաղթելով գիտական ակտիվության և նորանոր ձեռքբերումների տարի:

Կայացավ նախատոնական հանդիպումը

2012թ. դեկտեմբերի 27-ին ԵՊՀ ԻՄ դահլիճում տեղի ունեցավ տնօրեն Սամվել Առաքելյանի նախատոնական հանդիպումը մասնաճյուղի աշխատակիցների, ուսանողական խորհրդի և ուսանողական գիտական ընկերության անդամների հետ:

Մասնաճյուղի տնօրենը ներկայացրեց տարեվերջյան հաշվետվություն՝ ամփոփելով այս տարվա գլխավոր ձեռքբերումները:

Նա մասնավորապես նշեց. «2011թ. մենք չունեցանք ընդունելություն, և բնական է, որ ուսանողների թվի կտրուկ պակասումը (մոտավորապես 450 ուսանողով) պետք է բացասաբար անդրադառնար մեր հաստատության հետագա գործունեության վրա: Բայց, նկատի ունենալով այն հանգամանքը, որ մենք ունեինք խնայված միջոցներ և կանխատեսել էինք նման վիճակ, կարողացանք 2012 թվականն անցկացնել առանց ցնցումների և կրճատումների: Թվական տվյալները բավականին գոհացուցիչ են մեզ բոլորիս համար, որովհետև աշխատողների 61,2%-ը կազմում է պրոֆեսորադասախոսական անձնակազմը: Այս առումով մենք առաջին եռյակում ենք գտնվում հանրապետությունում»:

Տնօրենը նաև ընդգծեց, որ յուրաքանչյուր բուհ ունի երեք հիմնական գործառույթ՝ կրթական, դաստիարակչական, սոցիալական, և մասնաճյուղի ղեկավարությունը պիտի կարողանա ապահովել այդ գործառույթների իրականացումը, Իջևանը դարձնել համալսարանական քաղաք:

Պարոն Առաքելյանը շնորհավորեց բոլորի Ամանորը և Սուրբ Ծնունդը՝ հղելով բարեմաղթանքներ և ցանկանալով, որ 2013 թվականը լինի որակական լուրջ փոփոխությունների տարի:

Իրենց աշխատանքային պարտականությունները լիարժեք ու բարեխղճորեն կատարելու համար պատվոգրերի ու շնորհակալագրերի արժանացան մասնաճյուղի 10 աշխատակիցներ (Գևորգ Մշեցի Ջավրուշյան, Նաիրա Առուշանյան, Մուշեղ Սարուխանյան, Պավել Ասիլբեկյան, Աիդա Սարհատյան, Սոնա Խաչատրյան, Մարիետա Ճաղարյան, Արփինե Խաչատրյան, Ալվինա Առուստամյան, Համլետ Քոչարյան):

ԵՊՀ-ի ռեկտոր Արամ Սիմոնյանի կողմից մասնաճյուղի տնօրենը շքանշան հանձնեց Օտար լեզուների ամբիոնի ասիստենտ Աիդա Մարդանյանին՝ անբասիր, արդյունավետ աշխատանքի և մասնաճյուղում կրթության զարգացման գործում ունեցած նշանակալի ավանդի համար:

Տնօրեն Ս. Առաքելյանը նաև հատուկ շնորհակալություն հայտնեց ՈՒԳԸ-ի նախագահ Սլավիկ Ալավերդյանին՝ նշելով, որ մասնաճյուղն իր գոյության ընթացքում այսքան ակտիվ ու գործունյա ուսանողական գիտական ընկերություն դեռևս չէր ունեցել:

ՈՒԽ-ի նախագահ Նաիրի Ճաղարյանը ուսանողության անունից սրտանց շնորհավորեց բոլորի Նոր տարին և Սուրբ Ծնունդը:

Հանդիպման վերջում տեղի ունեցավ հյուրասիրություն:

Հումանիտար գիտությունների ֆակուլտետն ընտրեց ՈՒԳԸ-ի նոր նախագահ

Ս.թ. դեկտեմբերի 24-ին Հումանիտար գիտությունների ֆակուլտետում տեղի ունեցան ֆակուլտետի ուսանողական գիտական ընկերության նախագահի ընտրություններ:

ՈՒԳԸ նախագահի թեկնածուներն էին «Պատմություն» մասնագիտության 3-րդ կուրսի ուսանող Արման Մատինյանը և «Հայոց լեզու և գրականություն» մասնագիտության 3-րդ կուրսի ուսանողուհի Մերի Սահակյանը:

Ընտրությանը մասնակցում էին ֆակուլտետի 48 ուսանողներ, ինչպես նաև մասնաճյուղի ՈՒԳԸ-ի նախագահը, փոխնախագահը, մյուս ֆակուլտետների ՈՒԳԸ-ի նախագահները:

Նախ ֆակուլտետի ՈՒԳԸ-ի գործող նախագահ Միկիչ Փարսադանյանը ներկայացրեց կիսամյակի ընթացքում կատարած աշխատանքների հաշվետվությունը:

Ապա իր խոսքն ասեց մասնաճյուղի ՈՒԳԸ-ի նախագահ Սլավիկ Ալավերդյանը՝ շնորհակալություն հայտնելով ՈՒԳԸ-ի գործող նախագահին գրեթե 3 տարի ֆակուլտետի ՈՒԳԸ-ն ղեկավարելու և կազմակերպչական գործունեություն ծավալելու համար:

Այնուհետև թեկնածուները հակիրճ ներկայացրին իրենց ծրագրերը:

Փակ ընտրությունների արդյունքում 33 ձայնով ֆակուլտետի ՈՒԳԸ-ի նախագահ ընտրվեց Մերի Սահակյանը:

Ներկաները շնորհավորեցին նրան և մաղթեցին կազմակերպչական բուռն գործունեություն: