Երևանի պետական համալսարանի Իջևանի մասնաճյուղ

Մարիա Յակոբսենին նվիրված միջոցառում մասնաճյուղում

2016թ. ապրիլի 23-ին ԵՊՀ Իջևանի մասնաճյուղի բակում տեղի ունեցավ միջոցառում՝ նվիրված Հայոց ցեղասպանությունից 110.000 հայ որբերի փրկած դանիացի միսիոներուհի Մարիա Յակոբսենին (նրա արձանը երկու տասնամյակից ավելի գտնվում է մասնաճյուղի բակում, նախկինում նրա անունով էր կոչվում նույն վայրում գտնվող մանկապարտեզը):

Մարիա Յակոբսենին նվիրված միջոցառում մասնաճյուղում

Միջոցառումը նախաձեռնել և կազմակերպել են Դանիայի Թագավորության հյուպատոսությունը Հայաստանում, Հայոց ցեղասպանության թանգարանը, Հայ Առաքելական Սուրբ Եկեղեցու Տավուշի թեմը, ԵՊՀ Իջևանի մասնաճյուղը, Դանիական-հայկական բարեգործական առաքելությունը՝ Մարիա Յակոբսենի մահվան 55-րդ տարելիցի և Հայոց ցեղասպանության 100-րդ տարելիցի եզրափակմանն ընդառաջ:

Այս առիթով Տավուշ էին այցելել  Դանիայի Թագավորության հյուպատոսության ներկայացուցիչներ՝ պատվավոր հյուպատոս Գագիկ Գյուլբուդաղյանի գլխավորությամբ, Դանիական-հայկական բարեգործական առաքելությունը՝ ղեկավար Նանե Խաչատրյանի գլխավորությամբ, պատվավոր հյուրեր, «Իմպրովիզ» քանոնահարների խումբը, աստվածաբանության ֆակուլտետի ուսանողներ, լրագրողներ և ուրիշներ:

Մարիա Յակոբսենին նվիրված միջոցառում մասնաճյուղում

Նախ՝ Տավուշի թեմի առաջնորդ Տ. Բագրատ եպիսկոպոս Գալստանյանն իրականացրեց Իջևան քաղաքում Եղեռնի զոհերի հիշատակը հավերժացնող Սուրբ նահատակաց խորանի սեղանի օծում և հոգեհանգստի արարողություն՝ նվիրված Մարիա Յակոբսենին:

Մարիա Յակոբսենին նվիրված միջոցառում մասնաճյուղում

Ապա ԵՊՀ Իջևանի մասնաճյուղի բակում՝ Հայաստանում Մ.Յակոբսենին նվիրված միակ հուշարձանի մոտ (հեղ.՝ Արա Շիրազ)  տեղի ունեցավ միջոցառումը:

Մարիա Յակոբսենին նվիրված միջոցառում մասնաճյուղում

Բացման խոսքով հանդես եկավ ԵՊՀ ԻՄ-ի տնօրեն Ս.Առաքելյանը՝ ողջունելով հյուրերին, միջոցառման նախաձեռնողներին ու մասնակիցներին՝ ընդգծելով Մարիա Յակոբսենի մեծությունը, երախտաբար արժևորելով նրա մարդասիրական մեծ առաքելությունը, նշելով, որ նրա փրկած յուրաքանչյուր մանուկ մի երևույթ է, մի ընտանիք, մի օջախ: Պարոն Առաքելյանը խոստացավ, որ մասնաճյուղում սահմանվելու է Մարիա Յակոբսենի անվան կրթաթոշակ այն ուսանողների համար, ովքեր աչքի կընկնեն բարեգթությամբ, բարեսրտությամբ և միջավայրի նկատմամբ բարի ցանկություններով:

Միջոցառման ընթացքում հոգեթով կատարումներով հանդես եկան «Իմպրովիզ» քանոնահարների խմբի աղջիկները:

Մարիա Յակոբսենին նվիրված միջոցառում մասնաճյուղում

Ելույթ ունեցան պատվավոր հյուպատոս Գագիկ Գյուլբուդաղյանը, Տավուշի թեմի առաջնորդ Տ. Բագրատ եպիսկոպոս Գալստանյանը, Օձունի քահանա  Տեր Վրթանես Բաղալյանը: 

Մարիա Յակոբսենին նվիրված միջոցառում մասնաճյուղում

Դանիական-հայկական բարեգործական առաքելության ղեկավար Նանե Խաչատրյանը Մարիա Յակոբսենի վերաբերյալ ներկայացրեց արժեքավոր տեղեկություններ՝ քաղված Հայոց ցեղասպանության թանգարանում պահվող արխիվային նյութերից: Նա իր ելույթը եզրափակեց Մարիա Յակոբսենի աղոթքների գլխավոր հիշատակությամբ՝ «Տե՛ր Աստված, թո՛ղ այս մանուկները փուչիկի պայթյունից ավելի ուժեղ ձայն չլսեն»:

Մարիա Յակոբսենին նվիրված միջոցառում մասնաճյուղում

Դանիայի թագավորության հյուպատոսությունը՝ պատվավոր հյուպատոս պարոն Գագիկ Գյուլբուդաղյանի գլխավորությամբ, Մարիա Յակոբսենի գերեզմանից հող էր բերել ԵՊՀ Իջևանի մասնաճյուղ, որն իբրև սրբազան մասունք կպահպանվի մասնաճյուղում:

Մարիա Յակոբսենին նվիրված միջոցառում մասնաճյուղում

Այնուհետև մասնաճյուղի ուսանողական խորհրդի աջակցությամբ գրադարանում տեղի ունեցավ Մարիա Յակոբսենի անձնական իրերի և վավերագրական ֆիլմի ցուցադրությունը, ներկայացվեց Յակոբսենի կյանքի և գործունեության վերաբերյալ ամբողջական տեղեկատվություն:

Մարիա Յակոբսենին նվիրված միջոցառում մասնաճյուղում

Մասնավորապես նշվեց, որ 1882 թ. ծնված Մարիա Յակոբսենը Օսմանյան կայսրության տարածքում 1890-ականներին իրագործված համիդյան ջարդերի մասին տեղեկանում է պատանի տարիքում, ինչից հետո բուժքույրության դասընթացներ ավարտելով՝ համալրում «Կանանց առաքելության աշխատողներ» (Kvindelige Missions Arbejdere (KMA)) կազմակերպության շարքերը և ուղևորվում Թուրքիա։ Նա առաջինն էր գթության քույրերից, ով հասավ Խարբերդ. դա համընկավ իր 24-ամյակի հետ։ Դեռ նոր էր անցել գործի, երբ տեղի բժիշկները նրան արդեն անվանում էին «փրկության հրեշտակ»։ Թեև նրա համար ծանր էր բարձրադիր վայրերում աշխատելն ու երկար ճանապարհ կտրելը, դա ոչինչ էր 1915-ին սկսվածի համեմատ։

Մարիա Յակոբսենին նվիրված միջոցառում մասնաճյուղում

Ցեղասպանության ալիքը հազարավոր երեխաների բերեց նրա մոտ։ Նա միանձնյա ստանձնեց հիվանդանոցում տեղավորված հազարավոր որբերի խնամքը, երբ պատերազմին Միացյալ Նահանգների ներգարվման հետևանքով ամերիկյան անձնակազմն ստիպված եղավ լքել կայսրության տարածքը: Ինչ-որ մի պահի Յակոբսենը կերակուր էր տալիս օրական 4500 երեխայի։ Չափազանց դժվար է կարդալ այդ օրերի մասին նրա հուշերը. «Ես կարծում էի՝ այլևս երբեք չեմ ժպտա»,- գրում է Մարիան՝ պատմելով տեղի պակասի պատճառով մի տղայի մերժելու մասին, որին հետո գտան սովից մեռած։ «Սիրտս կտոր-կտոր էր եղել»,- պատմում է նա՝ նկարագրելով մի դեպք, երբ ոստիկանները, որոնք նաև մասնակցում էին հայերի հետապնդումներին, իր դուռն են բերում պատառոտված ոտքերով ու մերկ մի փոքրիկ աղջնակի։ Տեղեկանալով, որ Մերձավոր Արևելքի Նպաստամատույցը (Near East Relief) ձեռնարկել է 110.000 երեխաների Թուրքիայից տարհանելու գործը՝ Մարիան, վտանգը մի կողմ թողած, շտապ վերադառնում է Մերձավոր Արևելք և սկսում զբաղվել որբահավաքությամբ։ Թուրքիա մուտքի արտոնագիր չստանալով՝ նա ուղևորվում է Լիբանան և շուտով հիմնում հետագայում մոտ 200 հայ երեխա պատսպարած «Թռչնոց բույն» որբանոցը. Մարիայից մշտապես քաղցրավենիք խնդրող երեխաները նրան հիշեցնում են ձվից նոր դուրս եկած քաղցած թռչնակների։

Մարիա Յակոբսենին նվիրված միջոցառում մասնաճյուղում

«Թռչնոց բույնն» ավելի շատ դպրոց էր, քան որբանոց, անթերի մաքուր էր ու կարգապահ, երեխաները դաս էին սովորում, իսկ աղջիկները՝ նաև հմտանում ասեղնագործության նրբություններում։ Զարմանալի է, բայց հաստատությունը գործել է նաև Երկրորդ համաշխարհային պատերազմի տարիներին: 1950թ. Յակոբսենը դարձավ առաջին կինը, ով մարդասիրական աշխատանքի համար պարգևատրեց Դանիայի թագավորության ոսկե մեդալով։ Մարիան վերջին անգամ հայրենիք է այցելել 1957 թ., իսկ մահացել է 1960 թ., «Թռչնոց բույն» որբանոցում։ Իր ցանկությամբ՝ աճյունն ամփոփվել է որբանոցի բակում։

Մարիա Յակոբսենին նվիրված միջոցառում մասնաճյուղում

Մասնաճյուղում ամբողջ միջոցառումն ուղեկցվում էր ԵՊՀ ԻՄ-ի կիրառական արվեստի ֆակուլտետի ուսանողների աշխատանքների՝ Մարիա Յակոբսենին նվիրված ցուցահանդես-վաճառքով:

Մարիա Յակոբսենին նվիրված միջոցառում մասնաճյուղում

Ամփոփելով միջոցառումը՝ Տավուշի թեմի առաջնորդ Տ. Բագրատ եպիսկոպոս Գալստանյանն իրականցրեց արձակման կարգ:

 

 

Մասնաճյուղում դասախոսությամբ հանդես եկավ Մոնպելյեի համալսարանի պրոֆեսոր Ֆրանսուա Ռուդոն

2016թ. ապրիլի 14-ին ԵՊՀ Իջևանի մասնաճյուղ այցելեցին ԵՊՀ-ի ֆրանսիական բանասիրության ամբիոնի ներկայացուցիչները (դասախոս, Ռոմանագերմանական ֆակուլտետի փոխդեկան Լիլիթ Կարապետյանը, դասախոս Թագուհի Բլբուլյանը, ավագ գործավար Լիլյա Հովհաննիսյանը) և Մոնպելյեի համալսարանի պրոֆեսոր, միջնադարյան գրականության մասնագետ Ֆրանսուա Ռուդոն:

Այցելության հիմնական նպատակն էր ԵՊՀ ԻՄ-ի «Ֆրանսերեն լեզու և գրականություն» մասնագիտության ուսանողների համար «Ֆրանսիական վերածննդի գրականությունը» թեմայով դասախոսություն կարդալը:

Մասնաճյուղում դասախոսությամբ հանդես եկավ  Մոնպելյեի համալսարանի պրոֆեսոր Ֆրանսուա Ռուդոն

Նախ՝ պատվիրակության անդամների և մասնաճյուղի տնօրեն Ս.Առաքելյանի միջև տեղի ունեցավ հանդիպում, որի ընթացքում քննարկվեցին մեզանում ֆրանսերեն լեզվի պահպանմանն ու զարգացմանն ուղղված հարցեր, նշվեց, որ մեր դասախոսների վերապատրաստման և ուսանողների փոխանակման ծրագրերի իրականացման գործում զգացվում է ֆրանսիական դեսպանատան աջակցության կարիքը, պատմական համառոտ ակնարկ կատարվեց հայ և ֆրանսիացի ժողովուրդների դարավոր բարեկամության մասին:

Մասնաճյուղում դասախոսությամբ հանդես եկավ  Մոնպելյեի համալսարանի պրոֆեսոր Ֆրանսուա Ռուդոն

Այնուհետև մասնաճյուղի օնլայն լսարանում «Ֆրանսերեն լեզու և գրականություն» մասնագիտության տարբեր կուրսերի ուսանողների համար «Ֆրանսիական վերածննդի գրականությունը» թեմայով (ֆրանսերեն) բավականին հետաքրքիր դասախոսություն ներկայացրեց  Մոնպելյեի համալսարանի պրոֆեսոր Ֆրանսուա Ռուդոն:

Մասնաճյուղում դասախոսությամբ հանդես եկավ  Մոնպելյեի համալսարանի պրոֆեսոր Ֆրանսուա Ռուդոն

Դասախոսությունից հետո տեղի ունեցավ աշխույժ քննարկում. ուսանողները պրոֆեսորին ուղղեցին թեմային առնչվող հարցեր և ստացան պատասխաններ:

Մասնաճյուղում դասախոսությամբ հանդես եկավ  Մոնպելյեի համալսարանի պրոֆեսոր Ֆրանսուա Ռուդոն

   Ապա մասնաճյուղի օտար լեզուների ամբիոնում կայացավ ԵՊՀ-ի ֆրանսիական բանասիրության ամբիոնի ներկայացուցիչների հետ հանդիպում, որի ընթացքում քննարկվեցին «Ֆրանսերեն լեզու և գրականություն» մասնագիտության առարկայական ծրագրերի, դասավանդման ժամանակակից մեթոդների կիրառման ոլորտում մայր բուհի և մասնաճյուղի համագործակցությանը վերաբերող հարցեր:

 

«Շնորհալի լույս աղջիկներին՝ լուսաշող գրական ճամփաներ…»  («Եռանկյունի» գրքի շնորհանդեսը)

2016թ. ապրիլի 4-ին ԵՊՀ ԻՄ-ի գրադարանում տեղի ունեցավ Հեռակա ուսուցման համակարգի «Մանկավարժություն և հոգեբանություն» մասնագիտության չորրորդ կուրսի ուսանողուհիներ, երկվորյակ քույրեր Սյուզաննա և Ռուզաննա Աղաբաբյանների «Եռանկյունի» գրքի շնորհանդեսը:

«Շնորհալի լույս աղջիկներին՝ լուսաշող գրական ճամփաներ…»  («Եռանկյունի» գրքի շնորհանդեսը)

Ներկա էին մասնաճյուղի վարչական և պրոֆեսորադասախոսական անձնակազմի ներկայացուցիչներ, առկա և հեռակա ուսուցման համակարգերի ուսանողներ, մարզի հոգևոր դասի ներկայացուցիչներ, համահեղինակների հարազատներ, հյուրեր, պոեզիայի սիրահարներ:

«Շնորհալի լույս աղջիկներին՝ լուսաշող գրական ճամփաներ…»  («Եռանկյունի» գրքի շնորհանդեսը)

Ողջունելով մեր ուսանողուհիների գրական նորամուտը՝ նրանց գնահատանքի, արժևորման ու քաջալերանքի ջերմ խոսքեր ասացին Հայոց լեզվի և գրականության ամբիոնի դասախոսները՝ բ.գ.թ., դոցենտ Ա.Սարհատյանը, բ.գ.թ. ասիստենտներ Վ.Աղաբաբյանը, Ա.Հասանյանը, Մ.Սարուխանյանը (խոսքն ընթերցվեց), Տավուշի թեմի առաջնորդ Բագրատ եպիսկոպոս Գալստանյանը, Հեռակա ուսուցման բաժնի աշխատակից Ա.Ղուկասյանը, ՄԿՈԱ բաժնի աշխատակից Է.Կյուրեղյանը (խոսքն ընթերցվեց), գրադարանի աշխատակից Ն.Ստեփանյանը, շնորհալի քույրերի հայրը, համակուրսեցիները, մասնաճյուղի ստեղծագործող ուսանողները:  

 

«Շնորհալի լույս աղջիկներին՝ լուսաշող գրական ճամփաներ…»  («Եռանկյունի» գրքի շնորհանդեսը)

Գրքի վերաբերյալ արտահայտված գնահատականների մեջ գերակշռող էր այն կարծիքը, որ այնտեղ ապրվածի արձագանքն է և կյանքի նկատմամբ լուսավոր հայացքը.

«Փոքրիկ մի գրքույկ, հետաքրքիր ու յուրատեսակ մի եռանկյունի, արձակի ու չափածոյի մի ուրույն դաշնություն, սրտահույզ տողեր ու խոհեր մարդու, նրա ապրած կյանքի, ներաշխարհի ալեվետումների, կորցրածի ու գտածի, անցավորի ու հավերժականի մասին:

…Աղջնակները նրբին հույզերից հյուսված ներաշխարհ ունեն, ինքնատիպ կամային որակներ, գեղեցիկի զգացողություն և փորձում են ազատություն տալ հոգու զսպված ապրումներին, ներկայացնել երազայինը, աշխարհաճանաչման իրենց կերպը» (Ալիսա Հասանյան):

«Շնորհալի լույս աղջիկներին՝ լուսաշող գրական ճամփաներ…»  («Եռանկյունի» գրքի շնորհանդեսը)

«Ուրախության, ցավի, ապրած ու չապրած օրերի, հասկացված ու խաթարված հարաբերությունների, անկատար հույսերի ու սպասումների, երազանքների և իրականության հանդիպադրման վայր է Աղաբաբյան քույրերի ստեղծագործությունների «Եռանկյունի» ժողովածուն: Գենետիկ կոդերով շարունակելով տոհմի կանչը նրանք շարունակում և լրացնում են պապի` անվանի մանկավարժ Գուրգեն Աղաբաբյանի ստեղծագործական ուղին:

…Ապրված պահը դառնում է տող, միտք: Կյանքի յուրաքանչյուր հանգրվանում նրանց որոնածը լույսն է, մարդկային ջերմ ժպիտն ու սերը: Նրանք կարողանում են «Ժպտալ և ցույց չտալ աշխարհին, որ ինքը… ցավում է» և գիտեն, որ «Կյանքի դժվարությունները տրված երկրորդ հնարավորությունն են ապրելու» (Վահան Աղաբաբյան):

«Շնորհալի լույս աղջիկներին՝ լուսաշող գրական ճամփաներ…»  («Եռանկյունի» գրքի շնորհանդեսը)

«Թերթում եմ փոքրիկ այս ժողովածուն, ու նրա էջերից հառնում են երկու բարալիկ, նրբիրան աղջիկներ՝ խոհուն, խելացի հայացքներով, որոնցում այնքա՛ն հույզեր կան, այնքա՛ն երազանքներ, այնքա՛ն հավատ կյանքի նկատմամբ, ու այդ հավատը վանում է զգայուն հոգիների խորքում արժանապատվորեն թաքցրած անմռունչ մի թախիծ… Թվում է, տողերի արանքում էլ կալանված արցունքներ կան, որոնք ծնվում են անասելի ցավից՝ դառնալով մերթ մանկան անմեղ արցունք, մերթ էլ անհագ լաց… Բայց կոկորդումդ շարված ու սիրտդ խեղդող-պայթեցնող ցավը լույսով է ողողված: …Փխրուն հոգիներում ինչքա՛ն վառ է արտահայտված կյանքի փորձություններին դիմակայելու ուժը, աշխարհում գոյություն ունեցող չարիքները վերացած տեսնելու, մարդուն մարդացած տեսնելու բուռն տենչանքը…» (Աիդա Սարհատյան):

 Երկվորյակ քույրիկներին կոչելով երկու լուսաշող հրեշտակներ՝ նրանց իր օրհնանքի խոսքն ուղղեց Տավուշի թեմի առաջնորդ Բագրատ եպիսկոպոս Գալստանյանը, օրհնանքին հաջորդեց առ Աստված աղոթքը՝ լուսավոր ու ազնիվ հայոց զավակների պահպանության, երկրին այնքան անհրաժեշտ խաղաղության համար:

«Շնորհալի լույս աղջիկներին՝ լուսաշող գրական ճամփաներ…»  («Եռանկյունի» գրքի շնորհանդեսը)

Վերջում բոլոր ներկաներին, շնորհանդեսի կազմակերպիչներին ու մասնակիցներին իրենց երախտագիտությունն արտահայտեցին գրքի հեղինակներ Սյուզաննա և Ռուզաննա Աղաբաբյանները, նրանց հայրը՝ գրքույկը համարելով «համալսարանի ծնունդ», հատուկ շնորհակալություն հայտնելով պրոֆեսորադասախոսական ու վարչական անձնակազմի ներկայացուցիչներին՝ իրենց ցուցաբերած հոգատարության, ջերմ վերաբերմունքի ու փոխանցած գիտելիքների համար:

«Շնորհալի լույս աղջիկներին՝ լուսաշող գրական ճամփաներ…»  («Եռանկյունի» գրքի շնորհանդեսը)

 

 

 

 

 

 

 

 

ՄԵՐ ՈՒՍԱՆՈՂՆԵՐԸ՝ «WRITE ON! COMPETITION 2016» ՄՐՑՈՒՅԹԻ ՀԱՂԹՈՂՆԵՐ

2016թ. մարտի 21-ին ԵՊՀ Իջևանի մասնաճյուղում տեղի ունեցավ «WRITE ON! COMPETITION 2016» մրցույթում հաղթած մեր ուսանողների վկայականների հանձնման արարողությունը, որին ներկա էին մասնաճյուղի տնօրեն Ս.Առաքելյանը, Հումանիտար գիտությունների ֆակուլտետի վարչական և պրոֆեսորադասախոսական անձնակազմի ներկայացուցիչներ, ուսանողներ:

ՄԵՐ ՈՒՍԱՆՈՂՆԵՐԸ՝ «WRITE ON! COMPETITION 2016» ՄՐՑՈՒՅԹԻ ՀԱՂԹՈՂՆԵՐ

Տասը տարուց ավելի է, ինչ ԱՄՆ Խաղաղության կորպուսի կամավորների ջանքերով գործում է «WRITE ON! COMPETITION» մրցույթը, որը նախատեսված է տարբեր երկրների 6-12-րդ դասարանների աշակերտների և բուհերի I-IV կուրսերի ուսանողների համար:

Այս տարի մրցույթը կայացել է փետրվարի 29-ին, և ԵՊՀ ԻՄ-ից մասնակցել են «Անգլերեն լեզու և գրականություն» մասնագիտության I-III կուրսերի մի խումբ ուսանողներ:

ՄԵՐ ՈՒՍԱՆՈՂՆԵՐԸ՝ «WRITE ON! COMPETITION 2016» ՄՐՑՈՒՅԹԻ ՀԱՂԹՈՂՆԵՐ

Յուրաքանչյուր կուրսի համար նախատեսված էր երկու թեմա: Շարադրությունները ստուգվել ու գնահատվել են Խաղաղության կորպուսի կամավոր դասախոս Քոլման Հեսլերի, գործընկեր դասախոս Էմմա Թեմրազյանի կողմից, և յուրաքանչյուր կուրսի երեքական լավագույն աշխատանքներ ուղարկվել են Երևան՝ ազգային (հանրապետական) հանձնաժողովի գնահատմանը:

Արդյունքների համաձայն՝ «WRITE ON! COMPETITION 2016» մրցույթի հանրապետական փուլում հաղթել են  «Անգլերեն լեզու և գրականություն» մասնագիտության I կուրսի ուսանողներ Հասմիկ Վարդանյանը (առաջին տեղ), Արինա Պարոնյանը (երկրորդ տեղ), Էմիլիա Փայտյանը (երրորդ տեղ):

ՄԵՐ ՈՒՍԱՆՈՂՆԵՐԸ՝ «WRITE ON! COMPETITION 2016» ՄՐՑՈՒՅԹԻ ՀԱՂԹՈՂՆԵՐ

II կուրսի ուսանողներից Անուշ Հակոբյանը գրավել է առաջին տեղը, Ռաֆայել Հարությունյանը՝ երկրորդ տեղը, Հայկ Դանիելյանը՝ երրորդ տեղը:

ՄԵՐ ՈՒՍԱՆՈՂՆԵՐԸ՝ «WRITE ON! COMPETITION 2016» ՄՐՑՈՒՅԹԻ ՀԱՂԹՈՂՆԵՐ

III կուրսի ուսանողուհիներ Վարսիկ Սարգսյանը և Վանուհի Վանեսյանը համապատասխանաբար գրավել են երկրորդ և երրորդ տեղերը:

ՄԵՐ ՈՒՍԱՆՈՂՆԵՐԸ՝ «WRITE ON! COMPETITION 2016» ՄՐՑՈՒՅԹԻ ՀԱՂԹՈՂՆԵՐ

Հասմիկ Վարդանյանի և Անուշ Հակոբյանի աշխատանքները հանրապետական հանձնաժողովի կողմից ուղարկվել են միջազգային՝ երրորդ փուլ:

Մարտի 21-ին մասնաճյուղում «WRITE ON! COMPETITION 2016» մրցույթում հաղթած մեր ուսանողների վկայականները հանձնելիս տնօրեն Ս.Առաքելյանը ուրախությամբ ողջունեց և շնորհավորեց ստեղծագործական կարողություններով օժտված մեր ուսանողներին՝ նրանց հերթական ձեռքբերումների կապակցությամբ, առանձնակի հաջողություն մաղթեց միջազգային՝ երրորդ փուլի մեր երկու մասնակիցներին, բոլոր ուսանողներին կոչ արեց ակտիվորեն մասնակցել նման մրցույթների, ինտելեկտուալ խաղերի, միջոցառումների և հաղթել:

Մասնաճյուղում կայացավ «Մոխրագույն լուսին» գրքի շնորհանդեսը

 

2016թ. մարտի 3-ին ԵՊՀ Իջևանի մասնաճյուղում կայացավ «Ֆրանսերեն լեզու և գրականություն» մասնագիտության երկրորդ կուրսի ուսանողուհի Մերի Գասպարյանի անդրանիկ՝ «Մոխրագույն լուսին» գրքի շնորհանդեսը:

Մասնաճյուղում կայացավ «Մոխրագույն լուսին» գրքի շնորհանդեսը

 

Ներկա էին մասնաճյուղի վարչական և պրոֆեսորադասախոսական անձնակազմի ներկայացուցիչներ, ուսանողներ, հեղինակի հարազատ դպրոցի սաներ, Իջևանի զորամասի զինվորներ, լրատվամիջոցների ներկայացուցիչներ, հյուրեր, պոեզիայի սիրահարներ:

Մասնաճյուղում կայացավ «Մոխրագույն լուսին» գրքի շնորհանդեսը

Գրքույկը նվիրված է իր քեռու՝ Մարատ Բաղինյանի հիշատակին և ընդգրկում է թարմ, հետաքրքիր մտքեր ու բանաստեղծություններ՝ ստեղծագործական ներշնչանքի պահի (Էջը բացվեց ու գրվեց. /Սկիզբը հաճելի էր այնքանով,/ Որ անկեղծ էր,/ Անկեղծ՝ մանկական սիրո կերտվածքով,/ Իսկ հետոն լեցուն էր հասունությամբ/ Եվ համեմված գեղեցիկով), սիրո (Սերը կարիք է,/ Իսկ սիրո կարիքը ջերմությունն է:/…Սերն ուզում է,/Որ իսկապես սիրես/ Իսկական մարդկանց…), հայրենասիրության (Սիրտս ձուլել եմ սրտիդ, հայրենիք,/ Տե՛ս ոնց են զարկում զույգ սրտերը մեր…) անձնավորված բնության (Քամին ուռենու մազերն է սանրում,/ Գիշերն է հուշեր շշնջում նրան, /Նոր երգ է ծնվում գիշերվա գրկում, /Լուռ համառության հանդերձը վրան) Մարդու մասին, ինչպես՝

Մարդն էլ կարծես ծառի պես է,
Բերք տվողին երանի,
Ու ծառի պես ծաղիկներով
Ծիծաղողին երանի:
Սուրբ է մարդը
Եվ անրջանք,
Անհագության
Ծով է նա:
Սուրբ տենչերով
Դեպի բարձունք
Մագլցողին երանի:

Գրքի շնորհանդեսի ժամանակ  «Հայոց լեզու և գրականություն» մասնագիտության ուսանողները ներկայացրին Մերի Գասպարյանի բանաստեղծություններից («Էջը բացվեց, «Գիշեր», «Քուն», «Հավքերի պես…», «Թունոտ թշնամի», «Քունս չի տանում»):

Մասնաճյուղում կայացավ «Մոխրագույն լուսին» գրքի շնորհանդեսը

Կիթառի ուղեկցությամբ կատարվեցին նաև այդ բանաստեղծությունների հիման վրա գրված հոգեբուխ երգեր («Տավուշի քաջեր», «Ծեր խաչքար»), որոնք իրենց ասելիքով, մեղեդայնությամբ ու անկեղծ կատարումով հուզեցին ունկդիրների սրտերը:

 Շնորհանդեսի ընթացքում հեղինակին ուղղվեցին հարցեր, թե ինչ է կյանքը, նրա խորհուրդը, պատերազմը, որն է կյանքի պատկերման նրա սկզբունքը և այլն:

Մասնաճյուղում կայացավ «Մոխրագույն լուսին» գրքի շնորհանդեսը

 Հեղինակը պարզաբանեց իր կերտած լուսնային պատկերների խորհուրդը, գրքի «Մոխրագույն լուսին» վերնագիրը, որի համաձայն՝ լուսինն իր կարոտն է և ինքը դա տեսնում է մոխրագույն:

Մեր ուսանողուհու գրական նորամուտը ողջունեցին, գնահատանքի և արժևորման խոսք ասացին Հումանիտար գիտությունների ֆակուլտետի դեկան Վ.Ալեքսանյանը, ՄԿՈԱ բաժնի մասնագետ, սոցիոլոգ Է.Կյուրեղյանը, Օտար լեզուների ամբիոնի դասախոսներ Ա.Մարդանյանը, Ն.Դավթյանը, գրքի հեղինակի հայոց լեզվի և գրականության ուսուցչուհին՝ նրան մաղթելով ստեղծագործական կանաչ ճանապարհ, մտքի սրություն, բեղուն գրիչ: