Երևանի պետական համալսարանի Իջևանի մասնաճյուղ

Կայացավ ԵՊՀ ԻՄ-ի՝ 2018-19 ուստարվա շրջանավարտների դիպլոմների հանձնման հանդիսավոր արարողությունը

_DSC4124

 2019թ. հուլիսի 10-ին ԵՊՀ Իջևանի մասնաճյուղում տեղի ունեցավ 2018-19 ուստարվա 377 (առկա ուսուցման 154 և հեռակա ուսուցման 223) շրջանավարտների դիպլոմների հանձնման հանդիսավոր արարողությունը՝ սպասված տոն, որին մասնակցում էին պատվավոր հյուրեր, հանրապետության և մարզի տարբեր ոլորտների ներկայացուցիչներ, համալսարանականներ՝ վարչական և պրոֆեսորադասախոսական անձնակազմի անդամներ, ուսանողներ, շրջանավարտներ, ծնողներ, ԶԼՄ-ների ներկայացուցիչներ, արտաքին շահակիցներ:  

Տոնական միջոցառումն ուղեկցվեց ԵՊՀ ԻՄ-ի բակում Կիրառական արվեստի ֆակուլտետի շրջանավարտների ինքնատիպ աշխատանքների ցուցահանդեսով: 

Դիպլոմների հանձնման հանդիսավոր արարողությունը մեկնարկեց ՀՀ պետական օրհներգով:

2019թ. շրջանավարտներին շնորհավորեց ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը՝ մասնավորապես նշելով.

«Գերաշնո՛րհ Սրբազան Հայր, զորամասի հրամանատարական հարգարժան կազմ՝ հրամանատարի գլխավորությամբ, Երևանի պետական համալսարանի ներկայացուցիչներ, հարգարժան հյուրեր, տնօրեններ, ուսանողներ, համալսարանականներ, ծնողներ, ողջունում եմ բոլորիդ: Մենք՝ համալսարանականներս, այս տարի առանձնակի հպարտություն ենք ապրում, որովհետև, բոլորդ գիտեք, որ այս տարի նշվում է Երևանի պետական համալսարանի հիմնադրման 100-ամյա հոբելյանը: Շուտով կլրանա նաև մասնաճյուղի՝ նրա միակ մասնաճյուղի հիմնադրման 25-ամյա հոբելյանը: Երևանի պետական համալսարանի Իջևանի մասնաճյուղը աշխատել և աշխատում է կրթության որակի բարձրացման վրա և շարունակելու է աշխատել՝ տալով անհրաժեշտ գիտելիքներ, աշխարհայացք, մտահորիզոն, ապրելու և արարելու ձև իր բոլոր շրջանավարտներին:

Սիրելի՛ շրջանավարտներ, ԵՊՀ ԻՄ-ում դուք ստացել եք բազային անհրաժեշտ գիտելիքներ, և այս կրթության հիման վրա, որտեղ որ դուք ունեք տեսական և գործնական հմտություններ, ես վստահ եմ, որ դուք հաջողելու եք, դրա համար ես ձեզ մաղթում եմ եռանդ, կամք և կորով: Եվ կուզեմ, որ կյանքում դուք ունենաք մեծագույն հաջողություններ, որովհետև այլևս դուք Երևանի պետական համալսարանի գաղափարախոսության, լույսի կրողներն եք մեր հասարակության մեջ: Ես կուզեմ, որ ձեր կրթությունը օգնի ձեզ բարեկեցիկ կյանք կառուցելու ասպարեզում, և դրանով է՛լ ավելի բարձրացնեք Երևանի պետական համալսարանի և նրա միակ մասնաճյուղի հեղինակությունը: Մենք միասին չորս-հինգ տարի աշխատել ենք, այդ ճանապարհին եղել են հաջողություններ, կորուստներ, վշտեր, անարդարություններ, բայց ես կուզեմ, որ մեր բոլոր շրջանավարտները մեկ-երկու դրվագները չհիշեն և գեներացնեն: Ես կուզեմ, որ նրանք հիշեն այն հրաշալի ապրումները, այն գիտելիքը, այն լույսը, որը ստացել են Երևանի պետական համալսարանի Իջևանի մասնաճյուղում և հեռացնեն, վանեն իրենցից այն վատը, ինչ որ կա մեր շրջապատում: Հետագան ձերն է լինելու, և դուք հետագա արարողն եք լինելու. այն, ինչ լավն եք տեսել ԵՊՀ ԻՄ-ում, եղեք նրա շարունակողը, զարգացնողը, կրողը, իսկ այն, ինչ կգտնեք, որ անարդար ու վատ է, փորձեք ձեր շրջապատում այլևս չունենալ: Ես ձեզ հաջողություն և բարի երթ եմ մաղթում, սիրելի՛ շրջանավարտներ: Շատ ուրախ եմ ձեզ շնորհավորելու և հատկապես ձեր ծնողներին, որոնք ամեն ինչ արել են, որ դուք ստանաք այս անհրաժեշտ կրթությունը: Շնորհավո՜ր, սիրելի՛ շրջանավարտներ»:

Օրհնության խոսքով ու Տերունական աղոթքով հանդես եկավ Տավուշի թեմի առաջնորդ Տեր Բագրատ եպիսկոպոս Գալստանյանը: Նա մասնավորապես նշեց. «…Մեծ սրտով և ուրախությամբ ուզում եմ շնորհավորել մեր համալսարանին, որովհետև, ինչպես մշտապես ասել եմ, սա մի ամրոց է և դարբնոց է մեր տարածաշրջանում, ինչպես Տավուշ աշխարհը հայրենիքի, մեր պետականության դարպասն է, այնպես էլ այս համալսարանը, գտնվելով խորհրդանշական այս չքնաղ վայրում՝ մեր աշխարհում, նաև մեր կրթության, մեր ազատագրության, մեր հոգևոր-մշակութային մարդակերտումի կարևորագույն դարպասն ու ամրոցն է: Ես շնորհավորում եմ բոլոր ավարտողներին, պարոն Ցուցուլյանն ասաց, որ մոտ 380 հոգի է այսօր կյանք մեկնում: Հուսամ, որ 380 ուղղություններով դուք մեծապես ներդրում կունենաք մեր ժողովրդի կյանքում (դա կլինի Տավուշում, թե թունելից այն կողմ), ներդրում ունենալով՝ կփոխեք կյանքը, ձեր հմտություններով, ձեր վաստակած գիտելիքներով, ձեր ներկայությամբ, ձեր մարդկային տեսակով և որակներով կյանքին նոր որակ և համ կփոխանցեք: Շնորհավորում եմ մեր համալսարանի տեսչությանը, պարո՛ն Ցուցուլյան, Ձեզ և Ձեր շուրջը գտնվող բոլոր գործակիցներին, շնորհավորում եմ մեր ողջ ժողովրդին, շնորհավորում եմ վերստին մեր ավարտողներին և ձեր ծնողներին, ընտանիքներին և բոլորիս: Աստված օրհնի ձեր ընթացքը: Կեցցե՛ մեր համալսարանը, կեցցե՛ Իջևանի (ինչպես միշտ ասում եմ՝ անձնականացված ԻՄ) մասնաճյուղը, մեր ժողովուրդը, Տավուշ աշխարհը, և կեցցե՛ Հայաստանի Հանրապետությունը: Շնորհավո՛ր բոլորիդ»:

Ապա հնչեց սիրելի Մայր բուհի՝ Երևանի պետական համալսարանի հիմնը, որին հաջորդեց Տավուշի հիմնը (խոսքը և երաժշտությունը՝ Տեր Բագրատ եպիսկոպոս Գալստանյանի)՝ Տավուշի թեմի երգչախմբի կատարմամբ:

ԵՊՀ ԻՄ-ի շրջանավարտներին շնորհավորեց և բարեմաղթանքներ հղեց ԵՊՀ գիտքարտուղար Լևոն Հովսեփյանը. «Սիրելի՛ շրջանավարտներ, այսօր, հիրավի, չափազանց կարևոր և հիշարժան օր է ձեր կյանքում. դուք կատարեցիք ձեր կյանքի կարևոր քայլերից մեկը՝ արդեն իսկ դառնալով, հանդիսանալով համալսարանական: Համալսարանական լինելը, համալսարանականի կոչումը կրելը ոչ միայն պատիվ է, այլև պատասխանատվություն, պատասխանատվություն ձեր շրջապատի առջև, մեր ժողովրդի և հանրության, մեր պետության առջև, ուստի ձեր հետագա աշխատանքային, մասնագիտական գործունեության մեջ դուք պետք է ձգտեք անել առավելագույնը մեր պետության զարգացման, բարօրության համար: … Մենք հուսով ենք, որ դեռևս ձեր կարևոր հաջողությունների, ձեռքբերումներ և նվաճումների ականատեսը կլինենք և առիթներ կունենանք ձեզ շնորհավորելու և մաղթանքներ հղելու: Երևանի պետական համալսարանի 100-ամյա հոբելյանական տարեդարձի շրջանակում դուք ստանում եք ձեր ավարտական վկայագրերը. սա չափազանց կարևոր, հիշարժան և խորհրդանշական է… ԵՊՀ-ի ղեկավարության` ռեկտորատի անունից շնորհավորում եմ այս կարևոր և հիշարժան օրվա կապակցությամբ՝ մաղթելով ձեզ բարի երթ, կարևոր ձեռքբերումներ, նվաճումներ և հաղթանակներ՝ ի շահ մեր ժողովրդի և մեր պետության»:

Շնորհավորական խոսքով հանդես եկան Իջևանի քաղաքապետարանի մշակույթի բաժնի վարիչ Լիլիթ Ղալումյանը, «Տավուշ» հայրենակցական միության նախագահ, մ.գ.թ., պրոֆեսոր Լավրենտի Միրզոյանը, գրող, հրապարակախոս Խաչիկ Մանուկյանը, Իջևանի զորամասի հրամանատարի` անձնակազմի հետ տարվող աշխատանքների գծով տեղակալ, փոխգնդապետ Նվեր Մանգասարյանը, հայ անվանի հուշարձանագետ, պատմաբան, բանահավաք, Հայկական ճարտարապետությունն ուսումնասիրող հիմնադրամի երևանյան գրասենյակի նախագահ Սամվել Կարապետյանը, ԵՊՀ Իջևանի մասնաճյուղի այս տարվա շրջանավարտ, «ԵՊՀ լավագույն ուսանող-2019» մրցույթի հաղթող Սյուզաննա Շահնազարյանը և ուրիշներ:

Ելույթներն ընդմիջարկվեցին մասնաճյուղի ուսանողների երաժշտական գեղեցիկ կատարումներով:

Այնուհետև ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը մասնաճյուղի` 2018-2019 ուստարվա գործունեությանը մեծապես աջակցելու, բուհում տարբեր թեմաներով հետաքրքիր և ուսանելի դասընթացներ վարելու համար շնորհակալագրեր հանձնեց ՀՀ և Տավուշի մարզի տարբեր ոլորտների մի շարք ներկայացուցիչների:

Շնորհակալագրերից հետո տեղի ունեցավ 2019թ. շրջանավարտների դիպլոմների հանդիսավոր հանձնումը:

Նախ գերազանց առաջադիմությամբ շրջանավարտներին պարոն Ցուցուլյանը հանձնեց կարմիր դիպլոմները, ապա բուհի համապատասխան ստորաբաժանումների ներկայացուցիչները, ըստ ֆակուլտետների և մասնագիտությունների, դիպլոմները հանձնեցին առկա և հեռակա ուսուցման մյուս շրջանավարտներին:

Տոնական միջոցառումը շարունակվեց Տավշո գեղատեսիլ բնության գրկում՝ Ենոքավանի «Ապագա տուր» հյուրանոցային համալիրի տարածքում կազմակերպված երաժշտական-պարային երեկույթով և հյուրասիրությամբ:

Մեր դասախոսը՝ «Դյուցազնագրքի» ռեկորդակիր

DSC00980

 2018թ. հոկտեմբերին «Դյուցազնագիրք» դյուցազունների ասոցացիայի կողմից «Դյուցազնագիր» է տրվել Նվեր Ղարիբյանին առ այն, որ նա յուրաքանչյուր ձեռքում բռնած 9.800 կգ կցագնդերով կախ դրությունից մինչև ուսագոտի միաժամանակ բարձրացրել է 45 անգամ 30 վայրկյանում. նույն վարժությունը մեկընդմեջ կատարել է 102 անգամ 40 վայրկյանում: Այդ ռեկորդը գրանցվել է ՀՀ «Դյուցազնագիրք» ռեկորդների ժողովածուում:

Այդ կապակցությամբ հարցազրույց ունեցանք ԵՊՀ ԻՄ-ի արտակարգ իրավիճակների, մարմնակրթության և սպորտի ամբիոնի դասախոս, աշխարհի գավաթի 2-րդ մրցանակակիր (2016), Եվրոպայի եռակի չեմպիոն (2016, 2017, 2018), աշխարհի չեմպիոն (2018), «Դյուցազնագրքի» ռեկորդակիր (2018), ՀՀ միջազգային կարգի սպորտի վարպետ Նվեր Ղարիբյանի հետ.

– Պարո՛ն Ղարիբյան, ԵՊՀ ԻՄ-ի ղեկավարության և ամբողջ անձակազմի անունից Ձեզ սրտանց շնորհավորում ենք հերթական հաղթանակի առթիվ՝ մաղթելով նոր բարձունքներ Ձեր մարզական ու մարզչական կարիերայում, հաղթանակի բերկրանքը վայելելու բազում առիթներ և շնորհակալություն ենք հայտնում հարցազրույցին մասնակցելու համար:
– Ե՞րբ, ո՞ր մարզաձևում եք դիմում ներկայացրել ռեկորդը պաշտոնապես ձևակերպելու համար, և ե՞րբ է տրվել ռեկորդը հավաստիացնող վկայականը՝ «Դյուցազնագիրը», պարո՛ն Ղարիբյան:
– 2018թ. սեպտեմբերի 16-ին «Դյուցազնագիրք» դյուցազունների ասոցացիայի նախագահ Վարդան Թովմասյանի գլխավորած հանձնաժողովի կողմից գրանցվել է համապատասխան ռեկորդը (ուժային վարժությունից) և հոկտեմբերի 10-ին տրվել է հավաստագիրը:

– Որքա՞ն ժամանակ եք նախապատրաստվել այս ռեկորդին հասնելու համար. հերթական հաղթանակը հե՞շտ տրվեց արդյոք աշխարհի գավաթի 2-րդ մրցանակակիր, Եվրոպայի եռակի և աշխարհի չեմպիոն, ՀՀ միջազգային կարգի սպորտի վարպետ Նվեր Ղարիբյանին:
– Այս ռեկորդին հասնելու համար նախապատրաստվել եմ շուրջ երկու տարի: Շատ բարդ էր, քանի որ վարժությունը արագաուժային է, պահանջեց մեծ ջանք ու եռանդ, երկարատև մարզումներ:

– Որպես հաղթական պատվանդանին բազմիցս կանգնած մարզիկ՝ համաձա՞յն եք այն մտքի հետ, թե որքան դժվար է հաղթանակի ուղին, այնքան քաղցր է հաղթանակի բերկրանքը: Ձեր ունեցած բազմաթիվ հաղթանակներից ու ձեռքբերումներից ո՞րն է Ձեզ համար ավելի քաղցր:
– Այո՛, համամիտ եմ, թանկ է այն, ինչը դժվար է ձեռք բերվում, և բարձր արդյունքների հասնելու համար երկարատև ջանքեր են պահանջվում, քրտնաջան աշխատանք, հետևողական մարզումներ: Այդ իսկ պատճառով ցանկացած հաղթանակ թանկ է ինձ համար, քանի որ այդ հաղթանակներին հասնելու համար անցել եմ երկար ու դժվարին ուղի: Ինձ համար շատ կարևոր և սկզբունքային էր ուժային եռամարտի Եվրոպայի առաջնությանը իմ երկրորդ մասնակցությունը (2017թ.). առաջին անգամ Եվրոպայի առաջնությանը մասնակցեցի 2016 թվականին և անձական քաշով զիջեցի մրցակցիս: Ես խնդիր ունեի ապացուցելու, որ ի զորու եմ հաղթելու, և հաղթեցի՝ դառնալով ուժային եռամարտի՝ Եվրոպայի 2017թ. առաջնության չեմպիոն:

– Մարզական ու մարզչական աշխատանքի հետ կապված՝ ի՞նչ ծրագրեր ունեք առաջիկայում, մարզական ի՞նչ նոր բարձունքներ կան, որոնք կցանկանայիք նվաճել:
– Ցանկացած մարզիկի համար պատիվ է իր մարզական կարիերայի ընթացքում մասնակցել Օլիմպիական խաղերին, սակայն իմ մարզաձևը (ուժային եռամարտ՝ փաուերլիֆտինգ) դեռևս օլիմպիական մրցաձև չէ: Ես մինչև օրս, կարծում եմ, նվաճել եմ բոլոր տիտղոսները (աշխարհի չեմպիոն, Եվրոպայի եռակի չեմպիոն), և չկա այնպիսի մի առաջնություն, որին մեծ ձգտումով կցանկանայի մասնակցել: Մարզչական գործունեության ընթացքում իմ մարզիկները բազմաթիվ մրցաշարերում նվաճել են հաղթողի կոչումը, ունեմ երեք ՀՀ միջազգային կարգի սպորտի վարպետ, երկու ՀՀ սպորտի վարպետ սան, իմ երեք սաները սովորում են Հայաստանի ֆիզիկական կուլտուրայի և սպորտի պետական ինստիտուտում: Մոտ ժամանակներս (2018թ. նոյեմբերի 16-18-ին) իմ մարզիկներից չորսը Հայաստանի ազգային հավաքականի կազմում կմասնակցի Թբիլիսիում կայանալիք ուժային եռամարտի Եվրոպայի առաջնությանը:

– Ձեր այս նոր ձեռքբերումը («Դյուցազնագրքի» ռեկորդակիր դառնալը), պարո՛ն Ղարիբյան, ոչ միայն նշանակալի իրադարձություն է մասնաճյուղի ու մարզաշխարհի համար, այլև ոգեշնչման աղբյուր` մեր ուսանողների ու մարզի երիտասարդների համար: Դարձյալ շնորհավորում ենք, մաղթում նոր հաղթանակներ և հարցազրույցին մասնակցելու համար շնորհակալություն հայտնում Ձեզ:

Հարցազրույցը վարեց ԵՊՀ ԻՄ-ի հասարակայնության հետ
կապերի և մամուլի պատասխանատու Հասմիկ Վանյանը:

Մոմավառություն՝ նվիրված Շառլ Ազնավուրի հիշատակին

2018թ. հոկտեմբերի 2-ին ԵՊՀ Իջևանի մասնաճյուղի բակում տեղի ունեցավ մոմավառություն՝ նվիրված մեր մեծ հայրենակցի՝ ՀՀ Ազգային հերոս, ֆրանսահայ նշանավոր երգիչ, երգահան, գրող, կինոդերասան, հասարակական գործիչ, մեծագույն հայ Շառլ Ազնավուրի (Շահնուր՝ Վաղինակ Ազնավուրյանի) հիշատակին:

IMG_0797

Նախորդ օրը՝ հոկտեմբերի 1-ին, հայոց երկնակամարում խաղաղ հանգավ ամենամեծ և ամենալուսավոր աստղերից մեկը: Անհավատալի է: Կյանքից հեռացավ մի մարդ, որի սիրո քերականությամբ սերունդներ են դաստիարակվել, որին սիրել ենք մանկուց, հետևել նրա արվեստին ու կյանքին, հպարտացել, որ աշխարհում կա իր նման հայի տեսակ, ով ամենուր բարձր է պահել իր հայրենիքի պատիվը:

Մեծն Ազնավուրի հիշատակին նվիրված մոմավառությունը կազմակերպել էին ԵՊՀ ԻՄ-ի ֆրանսերեն լեզվի և գրականության ամբիոնը և ուսանողական խորհուրդը:

DSCN3756

Ելույթ ունեցավ Ֆրանսերեն լեզվի և գրականության ամբիոնի վարիչի պաշտոնակատար Ա. Մարդանյանը՝ նշելով, որ հեռացել է հայ ժողովրդի մեծ որդին, ով պատկանում է Հայաստանին, Ֆրանսիային և ողջ մարդկությանը:

Նա ընդգծեց, որ Ազնավուրը մի անհատականություն է, ով միշտ իր ժողովրդի կողքին է եղել, ով իր հանճարն ու ազդեցությունը օգտագործել է, որպեսզի ողջ աշխարհը նույնպես չմոռանա և դատապարտի Հայոց ցեղասպանությունը: Ազնավուրը մի ողջ տիեզերք է, և այժմ այդ տիեզերքը մեզ հետ է մնացել, սակայն, առանց իր կերտողի:

DSCN3755

«Ֆրանսերեն լեզու և գրականություն» մասնագիտության 4-րդ կուրսի ուսանողուհիները ազնավուրյան հոգեթով երգերի կախարդական հնչյունների ներքո  ներկայացրին նրա կյանքի ու ստեղծագործության մասին, արտասանեցին նրա բանաստեղծություններից:

Դեռ երեկ քսան տարեկան էի

Ու վատնում էի ժամանակը իմ,

Խաղում էի կյանքի հետ,

Ինչպես խաղում են հաճախ սիրո հետ,

Ու գիշերները ցերեկ դարձնում,

Հաշվի չառնելով, որ կյանքս է անցնում

Ու հալվում է այս ժամանակի մեջ:

Ես ծրագրեր կազմեցի բազում, որոնք այդպես էլ մնացին օդում

Եվ փայփայեցի ես այնքա՜ն հույսեր – այդ պատրանքները հօդս ցնդեցին,

Ես մոլորվել եմ, հիմա չգիտեմ դեպի ուր գնամ,

Եվ երկնքին եմ հայացքս հառել, բայց սիրտս արդեն հանձնել եմ հողին:

Դեռ երեկ քսան տարեկան էի,

Ու մսխում էի ժամանակը իմ,

Ես հույս ունեի կանգնեցնել նրան,

Զսպե՜լ ու սանձե՜լ,

Ու առաջ անցնել նրանից անգամ,

Բայց ես վազեցի, վազեցի միայն,

Շունչս կտրվեց, և ես հևասպառ կանգնել եմ ահա:

Անտեսում էի անցած օրերս և ապագային իմ ապավինում,

Իմ «ես»-ն անպայման առաջ էր ընկնում բոլոր խոսքերից,

Համոզված էի, որ իմ կարծիքը ամենաճիշտն էր այլ կարծիքներից,

Երբ աշխարհն էինք ըմբոստ կեցվածքով մենք քննադատում:

DSCN3769

Դեռ երեկ քսան տարեկան էի,

Բայց ես կորցրի ժամանակը իմ

Հիմարություններ անելով միայն,

Որոնք իմ հոգում բնավ չթողին

Ոչ մի ճշմարիտ, որոշակի հետք,

Ճակատիս վրա մի քանի կնճիռ գոյացավ միայն,

Ու ձանձրույթի վախ:

Քանզի սերերս, լույս աշխարհ չեկած իջան գերեզման,

Ընկերները իմ ինձնից հեռացան, նրանք այլևս չեն վերադառնա,

Մեղքը իմն է, որ շուրջս մարդ չկա, դատարկ է այսօր,

Ջահել օրերս ու կյանքս, ավա՜ղ, վատնեցի իզուր:

Իմ լավն ու վատը ես չհասկացա,

Դեն շպրտեցի ամեն մի լավ բան,

Ու ինձ մնացին ժպիտներս պաղ,

Ու ինձ մնացին արցունքնես քար:

Որտե՞ղ է հիմա

Ջահելությունը

Իմ քսանամյա:

DSCN3779

Ելույթ ունեցավ ԵՊՀ Իջևանի մասնաճյուղի տնօրենի պաշտոնակատար Ա. Վ. Ցուցուլյանը՝ մասնավորապես նշելով. «Հաղորդակցվելով մեր մեծերին՝ մենք մի քիչ մաքրվում ենք, ձգտում ենք դեպի զարգացման, դեպի կատարելագործման: Այն արժեքները, որոնք ստեղծեց և տվեց Շառլ Ազնավուրը, կմնան մեր բոլորիս մեջ և մեզ բոլորիս հույս և հավատ կներշնչեն է՛լ ավելի պայքարելու, է՛լ ավելի արարելու և ստեղծելու բարություն, սեր և համերաշխություն մեր շրջապատում: Շնորհակալություն բոլորիդ»:

Կայացավ մասնաճյուղի՝ 2017-18 ուստարվա շրջանավարտների դիպլոմների հանձնման հանդիսավոր արարողությունը

2018թ. հուլիսի 10-ին կայացավ «ԵՊՀ» հիմնադրամի Իջևանի մասնաճյուղի՝ 2017-18 ուստարվա առկա և հեռակա ուսուցման 271 շրջանավարտների դիպլոմների հանձնման հանդիսավոր արարողությունը:

9

Միջոցառմանը նախորդեց Գիտական խորհրդի տարեվերջյան ընդլայնված նիստը, որին մասնակցում էին Գիտխորհրդի անդամները, բուհի վարչական և պրոֆեսորադասախոսական անձնակազմի անդամներ, Տավուշի մարզպետարանի ներկայացուցիչներ:

6

Գիտական խորհրդի նիստում քննարկվեցին ԵՊՀ ԻՄ-ի ՄԿՈԱ բաժնի՝ 2017-2018 ուստարվա գործունեությանը, ԵՊՀ ԻՄ-ի՝ 2019թ. ընդունելության մասնագիտությունների ցանկին, ԵՊՀ ԻՄ-ի ուսումնական աշխատանքային նորմերին, ԵՊՀ ԻՄ-ի կառուցվածքային փոփոխություններին, աշխատողներին 
աշխատանքի որոշ տեսակների կատարման համար վճարվող լրավճարների հաշվարկման և վճարման կարգին վերաբերող մի շարք հարցեր:

5

Նիստի ընթացքում ամփոփվեցին  ԵՊՀ ԻՄ-ի՝ 2017-2018 ուստարվա ամփոփիչ ատեստավորման և ԵՊՀ ԻՄ-ում ստացած կրթությունից շրջանավարտների բավարարվածության գնահատման 2018թ. հարցման արդյունքները:

3

Գիտխորհրդի նիստից հետո ԵՊՀ ԻՄ-ի բակում հավաքված համալսարանականները (ուսանողներ, շրջանավարտներ, դասախոսներ, աշխատակիցներ) քայլերթով շարժվեցին Իջևանի շատրվանների հրապարակ:

23

Քաղաքի սրտում էլ տեղի ունեցավ մասնաճյուղի՝ 2018թ. առկա և հեռակա ուսուցման շրջանավարտների դիպլոմների հանձնման հանդիսավոր արարողությունը. շրջանավարտների համար ամենասպասված և ամենանշանավոր օրը դարձավ համաքաղաքային տոն:

11

Տոնական միջոցառումն ուղեկցվում էր ԵՊՀ ԻՄ-ի կիրառական արվեստի ֆակուլտետի շրջանավարտների գունեղ աշխատանքների ցուցահանդեսով  և ԵՊՀ մշակույթի կենտրոնի (տնօրեն՝ Կարինե Դավթյան) կողմից կազմակերպված գեղեցիկ համերգային ծրագրով:

10

Հանդիսավոր արարողությունը բացվեց աղոթքով ու օրհներգով:

Տավուշի թեմի առաջնորդ Տ. Բագրատ եպիսկոպոս Գալստանյանի անունից օրհնության խոսքով ու աղոթքով հանդես եկավ Տեր Սիմեոն քահանա Առաքելյանը՝ շնորհավորելով ԵՊՀ ԻՄ-ի՝ 2018թ. շրջանավարտներին:

12

ՀՀ օրհներգը կատարեց ԵՊՀ մշակույթի կենտրոնի երգչախումբը (գեղ.  ղեկավար՝ ՀՀ արվեստի վաստակավոր գործիչ Կարեն Սարգսյան, խմբավար՝ Ռուբեն Կարասեֆերյան):

14

Նաիրյան վեհ նազանքով, ԵՊՀ մշակույթի կենտրոնի աղջիկների պարային համույթի (գեղ. ղեկավար՝ Անի Հարոյան) կատարմամբ քաղաքային բեմահարթակի վրա ալիքվեց «Հայկական պար»-ը:

17

Շրջանավարտներին շնորհավորեց ու բարեմաղթանքներ հղեց մասնաճյուղի տնօրենի պաշտոնակատար Ա. Վ. Ցուցուլյանը՝ իր շնորհավորական ուղերձում մասնավորապես նշելով.

15

«Սիրելի՛ ուսանողներ, շրջանավարտներ, աշխատակիցներ, ծնողներ, իջևանցիներ, հյուրեր, մեծ է ԵՊՀ Իջևանի մասնաճյուղի ներդրումը տարածաշրջանի գիտական, մշակութային և հասարակական կյանքի կազմակերպման գործում: Զգալի է մասնաճյուղի ներկայությունը մարզում և հանրապետությունում, որովհետև նրա շրջանավարտները ևս ստացել են այն անհրաժեշտ գիտելիքները, ունեն պրակտիկ մասնագիտական որակավորումներին համապատասխան այն որակները, որոնցով պատրաստ են մրցակցելու այսօրվա տնտեսության, կրթության, քաղաքականության և մշակույթի ասպարեզներում:

Շնորհավորում եմ ձեզ, սիրելի՛ շրջանավարտներ, ցանկանում, որ դուք շարունակեք բարձր պահել ԵՊՀ-ի բարձր անունը, որը դուք կրելու եք հետագայում: Մենք ձեզ ընդամենը սովորեցրել ենք սովորել և կցանկանանք, որ դուք ամբողջ կյանքի ընթացքում շարունակեք ինքնազարգանալ և հիշել, որ ձեր հարազատ օջախը ԵՊՀ Իջևանի մասնաճյուղն է, որտեղ ձեզ միշտ ուրախ են դիմավորելու, խորհուրդներ տալու  և, ինչու չէ, նաև խորհուրդներ ու առաջարկություններ ստանալու: Շնորհակալություն»:

«Հայաստան» երգով հանդես եկավ ԵՊՀ ԻՄ-ի հումանիտար գիտությունների ֆակուլտետի 2-րդ կուրսի ուսանողուհի Մերի Պետրոսյանը:

16

Ապա տեղի ունեցավ դիպլոմների հանդիսավոր հանձնումը:

Նախ գերազանց առաջադիմությամբ շրջանավարտներին պարոն Ցուցուլյանը հանձնեց կարմիր դիպլոմները, ապա, ըստ ֆակուլտետների և մասնագիտությունների, դիպլոմները տրվեցին շրջանավարտներին:

20

Շնորհավորական խոսքով հանդես եկավ ԵՊՀ Իջևանի մասնաճյուղի 2018թ. շրջանավարտ, Ուսանողական խորհրդի նախկին նախագահ Իսկուհի Շաղբաթյանը:

Մասնաճյուղի շրջանավարտներին իրենց երաժշտական ու պարային կատարումներով շնորհավորեցին՝

  • ԵՊՀ Մշակույթի կենտրոնի մեներգիչներ Արծրուն Խանգելդյանը, Արևիկ Պռազյանը, Տաթև Թիլիքյանը, Անի Քոչարյանը («Համալսարա՛ն, դու մեր տունն ես»),
  • ԵՊՀ Մշակույթի կենտրոնի մեներգչուհի Մանա Ասիկյանը («Հայաստան»),
  • Իջևանի մշակույթի պալատի սան Ջուլիա Մեյրոյանը («Միշտ ժպտա»),
  • Իջևանի մշակույթի պալատի սան Գոռ Հարությունյանը («Ջամայկա»),
  • ԵՊՀ մշակույթի կենտրոնի երգչախումբը (“Let my people go”),
  • ԵՊՀ Իջևանի մասնաճյուղի հումանիտար գիտությունների ֆակուլտետի 2-րդ կուրսի ուսանողուհի Զինա Ոսկանյանը («Իմ մոլորակ»),
  • Իջևանի արվեստի դպրոցի պարային համույթը (գեղ. ղեկավար՝ Ֆլորա Ասոյան, «Քոչարի»),
  • ԵՊՀ Մշակույթի կենտրոնի մեներգչուհի Անի Քոչարյանը («Արև»),
  • ԵՊՀ Մշակույթի կենտրոնի մեներգիչ Արծրուն Խանգելդյանը («Ով սիրուն սիրուն»),
  • ԵՊՀ մշակույթի կենտրոնի աղջիկների պարային համույթը («Սայաթ-Նովա»),
  • ԵՊՀ մշակույթի կենտրոնի երգչախումբը (մենակատարներ՝ Անուշիկ Մարոզյան և Վահե Մովսեսյան, կոմպոզիտոր՝ Արամ Սաթյան – «Հայրենիք իմ սուրբ»):

21

ԵՊՀ ԻՄ-ի՝ 2018թ. շրջանավարտներին նվիրված համաքաղաքային միջոցառումը բարձր մակարդակով վարեցին ԵՊՀ Մշակույթի կենտրոնի «Համալսարանական» թատրոն-ստուդիայի սաներ, Ժուռնալիստիկայի ֆակուլտետի 3-րդ կուրսի ուսանողուհի Կարինե Սիմոնյանը և Միջազգային հարաբերությունների ֆակուլետի 2-րդ կուրսի ուսանող Գառնիկ Առաքելյանը:

13

Տոնական օրը եզրափակվեց Տավուշի գողտրիկ բնության գրկում՝ Ենոքավանի «Ապագա տուր» հյուրանոցային համալիրի տարածքում կազմակերպված երաժշտական-պարային երեկույթով:

Մեր դասախոսը՝ ուժային եռամարտի աշխարհի 2018թ. առաջնության չեմպիոնը, ջերմ ընդունելության արժանացավ մասնաճյուղում

2018թ. հունիսի 9-ին ԵՊՀ Իջևանի մասնաճյուղում կայացավ միջոցառում, որը նախաձեռնել էր մասնաճյուղի տնօրենությունը:

6

Ներկա էին ԵՊՀ ԻՄ-ի վարչական և պրոֆեսորադասախոսական անձնակազմի ներկայացուցիչներ, ուսանողներ, հյուրեր:

Միջոցառումը կազմակերպվել էր ԵՊՀ ԻՄ-ի արտակարգ իրավիճակների և մարմնակարթության ամբիոնի դասախոս Նվեր Ղարիբյանի հերթական ծանրակշիռ հաղթանակի՝ ուժային եռամարտի (փաուերլիֆտինգի) աշխարհի 2018թ. առաջնության չեմպիոն դառնալու առիթով:

4

2018թ. մայիսի 17-20-ին ուժային եռամարտի ՀՀ հավաքական թիմը հաջող էր հանդես եկել Ուկրաինայի Լուցկ քաղաքում տեղի ունեցած պաուերլիֆտինգի (ուժային եռամարտ) պատանիների, երիտասարդների, մեծահասակների և վետերանների աշխարհի առաջնությունում:

10

 

Պաուերլիֆտինգի ՀՀ հավաքական թիմը մրցավայր էր մեկնել 24 մարզիկներով (գլխավոր մարզիչ Գագիկ Սարոյանի գլխավորությամբ) և նվաճել 13 մեդալ:

3

Մեծահասակների առաջնությունում աշխարհի չեմպիոններ դարձան Վարազդատ Հակոբյանը (67,5 կգ քաշային), Վիլյամ Սարոյանը (75 կգ քաշային), Արամ Խաչատրյանը (90 կգ քաշային), Հրաչ Գուլոյանը (100 կգ քաշային):

110 կգ քաշային կարգում էլ աշխարհի չեմպիոնական տիտղոսը նվաճեց  ԵՊՀ Իջևանի մասնաճյուղի արտակարգ իրավիճակների և մարմնակարթության ամբիոնի դասախոս Նվեր Ղարիբյանը:

1

Գոռ Խաչատրյանը (75 կգ քաշային) դարձավ առաջնության արծաթե, իսկ Արթուր Առաքելյանը (90 կգ քաշային)՝ բրոնզե մեդալակիր: 

Երիտասարդների առաջնությունում աշխարհի չեմպիոնի կոչմանն արժանացան Դավիթ Պետրոսյանը (75 կգ քաշային), Անդրանիկ Մինասյանը (75 կգ քաշային) և Դավիթ Ավետիքյանը (90 կգ քաշային), իսկ Ռոբերտ Օրդինյանը (110 կգ քաշային) արժանացավ արծաթե մեդալի: 

2

Ուժային եռամարտի ՀՀ պատանիների հավաքականի անդամներ Տիգրան Մաթևոսյանը (44 կգ քաշային), Նորիկ Կարապետյանը (60 կգ քաշային), Անդրանիկ Ասատրյանը (82,5 կգ քաշային), Ժասմին Հայրապետյանը (56 կգ քաշային), Դավիթ Պապյանը (44 կգ քաշային) և Էրիկ Խաչատրյանը (60 կգ քաշային) դարձան ոսկե, իսկ Կարեն Առաքելյանը (82,5 կգ քաշային)՝ արծաթե մեդալակիրներ: 

1

Վետերանների մրցապայքարում չեմպիոններ դարձան Արարատ Շահինյանը (82,5 կգ քաշային), Գևորգ Դավթյանը (110 կգ քաշային), Գագիկ Սարոյանը (125 կգ քաշային), Հովհաննես Յազիչյանը (100 կգ քաշային) և Արամ Խաչատրյանը (90 կգ քաշային), ով սահմանեց աշխարհի նոր ռեկորդ, իսկ 82,5 կգ քաշային Արթուր Ավետիսյանը դարձավ առաջնության արծաթե մեդալակիր (տե՛ս http://www.minsportyouth.am/noroutyounner/hay-ouzhayin-eramartikneri-hajogh-mrcelouy.html):

5

Փառավոր հաղթանակի առթիվ մեր դասախոսին՝ աշխարհի գավաթի 2-րդ մրցանակակիր (2016), Եվրոպայի եռակի չեմպիոն (2016, 2017, 2018), աշխարհի չեմպիոն (2018), ՀՀ միջազգային կարգի սպորտի վարպետ Նվեր Ղարիբյանին, շնորհավորանքի, գնահատանքի և երախտիքի խոսքեր ասացին մասնաճյուղի փոխտնօրեն Ա. Վ. Ցուցուլյանը, միջոցառմանը ներկա համալսարանականները:

9

Այնուհետև ԵՊՀ ԻՄ-ի տնօրենության կողմից Ա.Վ.Ցուցուլյանը հուշանվեր և դրամական պարգև հանձնեց Ն.Ղարիբյանին՝ նրան մաղթելով  նոր հաղթանակների բերկրանքը ճաշակելու, չեմպիոնական բարձունքները նվաճելու բազում առիթներ՝ թե՛ որպես մարզիկ, թե՛ որպես մարզիչ (այդ թվում՝ ԵՊՀ ԻՄ-ի սաների մարզիչ):    

7

Ելույթ ունեցավ Ն.Ղարիբյանը, ջերմ ընդունելության, շնորհավորանքների ու գնահատանքի համար շնորհակալություն հայտնեց տնօրենությանը՝ մասնավորապես նշելով. «Այնքա՜ն պատվաբեր է նման ընդունելությունը, նման վերաբերմունքն ու  գնահատականի արժանանալը… Այս ամենն ինձ ավելի է պարտավորեցնում: Մինչև այժմ ես որոշել էի, որ սա մարզական իմ վերջին մրցաշարը կլինի՝ շարունակելով, սակայն, իմ մարզչական գործունեությունը, քանի որ ունեմ լավ սաներ՝ արդեն իսկ Եվրոպայի ու աշխարհի չեմպիոններ և սպորտի վարպետներ, բայց սա ևս մեկ անգամ ինձ պարտավորեցրեց, որ ես շարունակեմ իմ մարզական կարիերան… Դարձյալ շնորհակալ եմ ինձ գնահատելու և այս ջերմ վերաբերմունքին արժանացնելու համար…»:

8