Երևանի պետական համալսարանի Իջևանի մասնաճյուղ

Կարիերայի խթանման ծրագիր ԵՊՀ Իջեվանի մասնաճյուղում

1. glxavor 2023 թ․ նոյեմբերի 9-ին ԵՊՀ շրջանավարտների և կարիերայի կենտրոնի նախաձեռնությամբ և ԵՊՀ ԻՄ պրակտիկայի կազմակերպման և շահակիցների հետ համագործակցության (ՊԿՇՀ) բաժնի մասնակցությամբ ԵՊՀ ԻՄ-ում իրականացվեց կարիերայի խթանման ծրագիր:

Ծրագրի շրջանակներում մասնաճյուղի ուսանողները ԵՊՀ շրջանավարտների և կարիերայի կենտրոնի փոխտնօրեն Կարինե Նազարյանի, կենտրոնի աշխատակիցների և ԵՊՀ ԻՄ ՊԿՇՀ բաժնի տեսուչ Աննա Սարգսյանի հետ շրջայց կատարեցին Իջևանի գինու և կոնյակի գործարանում, ծանոթացան գործարանի պատմությանը և գործունեությանը, գինու և կոնյակի ամենապահանջված և արվեստի գործ համարվող նմուշներին: Գործարանի աշխատակցուհին համալսարանականներին նաև ներկայացրեց հետագայում գինու թանգարանի և դեգուստացիոն սրահի կառուցման մասին, որը լավ հնարավորություններ կընձեռի մեր ուսանողներին և շրջանավարտներին աշխատանք գտնելու հարցում:

Այնուհետև ուսանողները հանդիպեցին «Դը Գուրուս», «Արմենիա ինշուրանս» և «Միասնական սոցիալական ծառայություն» կազմակերպությունների ներկայացուցիչներ հետ: «Դը Գուրուս» ընկերության HR մենեջեր Անի Խաչատրյանը և մարքեթինգի մենեջեր Արմենուհի Հարությունյանը ուսանողներին ներկայացրին իրենց կողմից իրականացվող անվճար դասընթացների և ընձեռվող հնարավորությունների մասին: «Արմենիա ինշուրանս» ապահովագրական ընկերության տարածաշրջանային վաճառքների համակարգման բաժնի ղեկավար Նարեկ Գուլքանյանը և մասնագետ Վլադիմիր Նանյանը ներկայացրին իրենց ընկերությունում առկա աշխատանքային հնարավորություններն ու պրակտիկաները: Միասնական սոցիալական ծառայության պետի տեղակալ Թամարա Թորոսյանը ներկայացրեց զբաղվածության պետական աջակցության ծառայությունները:

Համագործակցության շրջանակներում մասնաճյուղի հետ պայմանավորվածություն ձեռք բերվեց կազմակերպություններում հետագա թափուր հաստիքների առկայության դեպքում տեղեկացնել մեր ուսանողներին և շրջանավարտներին:

Այնուհետև ԵՊՀ շրջանավարտների և կարիերայի կենտրոնի փոխտնօրեն Կարինե Նազարյանը ուսանողներին ներկայացրեց կենտրոնի գործունեությունը, թե որ կազմակերպությունների հետ է այն համագործակցում: «Ինչպե՞ս գտնել հենց քո երազած աշխատանքը» խորագրով դասընթացի շրջանակներում կենտրոնի մասնագետներ Մարինե Մարգարյանը և  Արուսյակ Սահակյանը  մասնաճյուղի ուսանողներին ներկայացրին գրագետ CV կազմելու, պատշաճ կերպով հարցազրույցի ներկայանալու կանոնները և նրբությունները: ԵՊՀ շրջանավարտների և կարիերայի կենտրոնի մասնագետ Ժաննա Գրիգորյանը ներկայացրեց կենտրոնի կողմից տրամադրվող աշխատանքային և պրակտիկայի հնարավորությունների մասին տեղեկատվություն:

Մասնաճյուղի ուսանողները շատ տպավորված էին ԵՊՀ շրջանավարտների և կարիերայի կենտրոնի աշխատակիցների, տարբեր կազմակերպությունների ներկայացուցիչների հետ հանդիպումներով, Իջևանի գինու և կոնյակի գործարան այցով ու ցանկություն հայտնեցին, որ այդպիսի միջոցառումներ հաճախակի կազմակերպվեն:

https://shorturl.at/bpR45

«Ֆինտեք Էթիկա» երկօրյա հեղինակային դասընթաց ԵՊՀ Իջևանի մասնաճյուղում

1. glxavor

 2023 թ. նոյեմբերի 7-8-ը ԵՊՀ Իջևանի մասնաճյուղում կայացավ «Ֆինտեք Էթիկա» երկօրյա հեղինակային դասընթացի 3-րդ հոսքը, որը նախաձեռնել էր «ԱուրԷքսչենջՔլաբ» («OurExchangeClub») կրիպտոարժույթի փոխանակման միջազգային նորարարական ընկերությունը:

Դասընթացի նպատակն էր հասարակության ֆինանսական գրագիտության մակարդակի բարձրացումը, նորարարական ոլորտում տասնամյա գործունեության ընթացքում կուտակված գործնական գիտելիքների ու ոլորտային փորձառության փոխանցումը:

«Ֆինտեք Էթիկա» դասընթացը վարում էր նորարարական ոլորտի գործարար, «ԱուրԹիմՔլաբ», «ԱուրԷքսչենջՔլաբ», «ՔլաբՕն» ընկերությունների համահիմնադիր, գործադիր տնօրեն, բիզնես խոսնակ Ավետիս Վարոսյանը:

Դասընթացում ներգրավված էին ֆինանսական ոլորտին առնչվող ութ տասնյակ մասնակիցներ, որոնց մեջ գերակշռող էին ԵՊՀ Իջևանի մասնաճյուղի տնտեսագիտության ֆակուլտետի ուսանողները:

Երկօրյա արագացված դասընթացի շրջանակներում ներկայացվեցին և քննարկվեցին հետևյալ թեմաները՝ «Փողի էվոլյուցիա», «Էլեկտրոնային փող», «Բանկային քարտեր», «Բանկոմատներ», «Օնլայն գնումներ (կիրառությունը և անվտանգ օգտագործման կանոնները)», «Բլոկչեյն», «Կրիպտոարժույթ», «Կրիպտոպանակներ», «Կրիպտոընկերություններ»:

Դասընթացը մասնակիցներին օգնեց հաղորդակցվելու ֆինտեք ոլորտի նորարար և հետաքրքիր տեղեկություններին, ավելացնելու գիտելիքները ոլորտի զարգացման միտումների վերաբերյալ և զերծ մնալու մի շարք ռիսկերից, այլ խոսքով՝ ֆինտեք ոլորտում կայացնելու ճիշտ, արագ և անվտանգ որոշումներ:

Վերջում դասընթացի մասնակիցներին տրվեցին հավաստագրեր:

 

Սիրով շնորհավորում ենք…

IMG_9018

ԵՊՀ Իջևանի մասնաճյուղի ղեկավարության, անձնակազմի և ուսանողների անունից սիրով շնորհավորում ենք Մանկավարժության և հոգեբանության ամբիոնի ասիստենտ, բուհի պատասխանատու և բարեխիղճ աշխատակից, սիրված դասախոս Մելանյա Սաշայի Բարսեղյանին  ծննդյան հոբելյանի առթիվ:

Տիկին Բարսեղյանին մաղթում ենք երջանկություն, առողջություն, շարունակական ձեռքբերումներ և հաջողություններ անձնական կյանքում և մասնագիտական ոլորտում, նպատակների իրականացում, ամենայն բարիք…

ԵՊՀ ԻՄ-ում վերապատրաստում անցած ուսուցիչների վկայականների հանձնում

1. գլխավոր

2023թ. նոյեմբերի 1-ին ԵՊՀ Իջևանի մասնաճյուղում կայացավ հերթական ատեստավորում անցած ուսուցիչների վկայականների հանդիսավոր հանձնումը, որին մասնակցում էին ԵՊՀ ԻՄ-ի տնօրենի պաշտոնակատար Անուշավան Մակարյանը, փոխտնօրեն Մհեր Օթարյանը, Կրթական բարեփոխումների և դասախոսների վերապատրաստման բաժնի անդամները, վերապատրաստումն իրականացրած պրոֆեսորադասախոսական կազմի ներկայացուցիչներ, վարչական աշխատակիցներ:

Սեպտեմբերի 5-ից հոկտեմբերի 28-ը ԵՊՀ Իջևանի մասնաճյուղում վերապատրաստվել են Տավուշի և Գեղարքունիքի մարզի 19 դպրոցների շուրջ հինգ տասնյակ հերթական ատեստավորման ենթակա ուսուցիչներ:

Վերապատրաստումն իրականացվել է հետևյալ մոդուլներից` Հանրակրթության բնագավառի օրենսդրություն, Տեղեկատվական հաղորդակցության տեխնոլոգիաներ, Տարիքային հոգեբանություն, Համընդհանուր ներառում, Գնահատում, Դիրքորոշում և արժեք, Առարկայի դասավանդման մեթոդիկա, Հետազոտական աշխատանքներ կատարելու սկզբունքներ:

Հանդիսավոր արարողությունը ողջույնի խոսքով բացեց ԵՊՀ ԻՄ-ի տնօրենի պաշտոնակատար Ա.Մակարյանը: Նա շնորհավորեց վերապատրաստումը հաջողությամբ ավարտած բոլոր ուսուցիչներին՝ համոզմունք հայտնելով, որ ձեռք բերված գիտելիքներն ու հմտությունները կգտնեն նպատակային կիրառություն և արդյունավետ կերպով կներդրվեն մատաղ սերնդի կրթության և դաստիարակության գործում: Պարոն Մակարյանը շնորհակալություն հայտնեց Կրթական բարեփոխումների և դասախոսների վերապատրաստման բաժնին, վերապատրաստում իրականացրած բոլոր դասախոսներին և վերապատրաստված ուսուցիչներին:

Ուսուցիչներին շնորհավորեցին նաև դասընթացավարներ Ասյա Սարգսյանը, Էդվարդ Այվազյանը և Աիդա Մարդանյանը:

Կալավան գյուղի միջնակարգ դպրոցի ուսուցչուհի Զվարթ Քեշիշյանը և Դիլիջանի թիվ 6 հիմնական դպրոցի ուսուցչուհի Լուսյա Գյուլումյանը բոլոր ուսուցիչների անունից շնորհակալություն հայտնեցին ԵՊՀ Իջևանի մասնաճյուղին՝ վերապատրաստումը բարձր մակարդակով կազմակերպելու և իրականացնելու համար:

Տնօրենության նիստ

1. գլխավորԵՊՀ Իջևանի մասնաճյուղում ս.թ. հոկտեմբերի 27-ին տեղի ունեցավ տնօրենության նիստ՝ Ա. Հ. Մակարյանի նախագահությամբ:

Նիստում քննարկվեցին առկա ուսուցման՝ 2023-2024 ուստարվա 1-ին կիսամյակի 1-ին ընթացիկ ստուգումների և քննությունների, հեռակա ուսուցման բակալավրի և մագիստրատուրայի 1-ին կիսամյակի ուսումնական պարապմունքների նախապատրաստական աշխատանքներին, ԵՊՀ ԻՄ աշխատակիցների և ուսանողների՝ 2022-2023 ուստարում հարցումների միջոցով վերհանված խնդիրներին և կարիքներին վերաբերող օրակարգային հարցերը: Բնական գիտությունների ֆակուլտետի՝ 2022-2023 ուստարվա գործունեության վերաբերյալ հաշվետվության ներկայացման հարցը հետաձգվեց՝ պայմանավորված ԵՊՀ գիտական խորհրդի՝ 2023թ. հոկտեմբերի 26-ի նիստում հաշվետվությունների նոր ձևաչափի ներկայացմամբ և մասնաճյուղում դրա ներդրմամբ:

Տնօրենության նիստում քննարկվեցին նաև ուսանողների ուսանողական իրավունքների վերականգնման, Լեռնային Ղարաբաղից բռնի տեղահանված ուսանողներին ԵՊՀ ԻՄ ընդունելու և հետագա ուսումնառությունը շարունակելու վերաբերյալ ընթացիկ հարցերը:

Առաջին հարցի մասին նշվեց, որ առկա ուսուցման՝ 2023-2024 ուստարվա 1-ին կիսամյակի 1-ին ընթացիկ ստուգումների և քննությունների համար իրականացվել են անհրաժեշտ նախապատրաստական աշխատանքներ:

Ժամանակացույցի համաձայն՝ քննաշրջանը մեկնարկել է ս.թ. հոկտեմբերի 27-ին և կտևի մինչև նոյեմբերի 4-ը: Ֆակուլտետների դեկանները ամբիոններում քննարկումներից հետո Ուսումնամեթոդական վարչություն են ներկայացրել ընթացիկ ստուգումների և քննությունների կազմակերպման ժամանակացույցները, դրանք տեղադրվել են պաշտոնական կայքէջում, և դրանց մասին իրազեկվել են դասախոսները և ուսանողները: Ֆակուլտետներին տրամադրվել են քննությունների համար նախատեսված տետրերը, կատարվել են նախապատրաստական այլ աշխատանքներ:

Քննաշրջանն ընթանում է սահմանված կարգով, Ոսումնամեթոդական վարչությունը, դեկանները և գործընթացի բոլոր պատասխանատուները հետևողական են դրա պատշաճ կազմակերպման և իրականացման գործում, առաջին օրվա դրությամբ խնդիրներ և խախտումներ չեն արձանագրվել:

2Հաջորդիվ ներկայացվեց, որ հեռակա ուսուցման բակալավրի և մագիստրատուրայի՝ 2023-2024 ուստարվա 1-ին կիսամյակի ուսումնական պարապմունքները սկսելու համար նույնպես իրականացվել են նախապատրաստական անհրաժեշտ աշխատանքներ: Հեռակա ուսուցման բակալավրի 2-5-րդ կուրսերի ուսումնական պարապմունքները կմեկնարկեն ս.թ. նոյեմբերի 1-ից, մագիստրատուրայինը՝ նոյեմբերի 14-ից: Քանի որ 2023-2024 ուստարվա բակալավրի հեռակա ուսուցման ընդունելության քննությունները դեռևս ընթացքի մեջ են, և առաջին կուրսեր չեն ձևավորվել, ուստի Ուսումնամեթոդական վարչության պետի կողմից առաջարկվեց հեռակա ուսուցման բակալավրի 1-ին կուրսերի դասերը սկսել նոյեմբերի 3-ից: Դասացուցակները բերվում են վերջնական տեսքի և սեղմ ժամկետներում՝ 2 օրվա ընթացքում, կտեղադրվեն մասնաճյուղի պաշտոնական կայքում, դրանց մասին կտեղեկացվեն դասախոսները և ուսանողները:

Մասնաճյուղի աշխատակիցների և ուսանողների՝ 2022-2023 ուստարում վերհանված խնդիրների և կարիքների վերաբերյալ նշվեց, որ Մասնագիտական կրթության որակի ապահովման բաժինը 2022-23 ուստարում տարբեր մեխանիզմներով վերհանել է բուհի աշխատակիցների և ուսանողների մի շարք կարիքներ և խնդիրներ: Դրանք հիմնականում վերաբերում են դասավանդման և ուսումառության գործընթացին, այդ թվում՝ պրակտիկաներին, գնահատման բազմագործոն համակարգին, նյութատեխնիկական և այլ ռեսուրսներին ու միջոցներին:

Մասնագիտական կրթության որակի ապահովման բաժնի կողմից այդ խնդիրները և կարիքները կխմբավորվեն ըստ պատասխանատվության և կուղարկվեն համապատասխան ստորաբաժանումներին, որպեսզի վերջիններս ներկայացնեն վերհանված խնդիրների լուծման վերաբերյալ իրենց ծրագրերը՝ համապատասխան քայլերով, ժամկետներով և ակնկալիքներով:

Առաջին ընթացիկ հարցի մասին նշվեց, որ ԵՊՀ Իջևանի մասնաճյուղի հեռակա ուսուցման համակարգի 2 նախկին ուսանողներ դիմել են իրենց ուսանողական իրավունքները վերականգնելու համար: Ուսումնամեթոդական վարչությունը ստուգել է նրանց ներկայացրած փաստաթղթերի համապատասխանությունը «Հայաստանի Հանրապետության բարձրագույն ուսումնական հաստատությունների ուսանողների հեռացման (ազատման) և վերականգնման» կարգին: Ըստ այդմ՝ նրանց թույլատրվում է վերականգնել իրենց ուսանողական իրավունքները:

Նիստի վերջին հարցի կապակցությամբ ներկայացվեց, որ ս.թ. հոկտեմբերի 27-ի դրությամբ ԵՊՀ ԻՄ ընդունվելու և մասնաճյուղում նույն կամ հարակից մասնագիտություններով հետագա ուսումնառությունը շարունակելու համար դիմել է Լեռնային Ղարաբաղից բռնի տեղահանված 20 ուսանող: Առարկայական տարբերությունների հանձնման I փուլը ս.թ. նոյեմբերի 1-15-ն ընկած ժամանակահատվածում է: ԵՊՀ Իջևանի մասնաճյուղում շարունակվում է Արցախից բռնի տեղահանված ուսանողների ընդունելության գործընթացը: