Երևանի պետական համալսարանի Իջևանի մասնաճյուղ

Բնական գիտությունների ֆակուլտետի գիտխորհրդի նիստում

2015թ. փետրվարի 25-ին ԵՊՀ Իջևանի մասնաճյուղում տեղի ունեցավ Բնական գիտությունների ֆակուլտետի գիտխորհրդի նիստ, որը նախագահում էր ֆակուլտետի դեկանի ժ/պ, ֆիզմաթ. գիտ. թեկնածու, դոցենտ Մ.Զաքարյանը:

Ֆակուլտետի գիտխորհրդի նիստին մասնակցում էին գիտխորհրդի անդամները, հրավիրված էին ԵՊՀ ԻՄ-ի տնօրեն Ս.Առաքելյանը, Ուսումնամեթոդական վարչության պետ Ա.Դավթյանը, տնօրենի օգնական Ն.Գրիգորյանը:

Նիստի ընթացքում քննարկվեցին օրակարգով նախատեսված հետևյալ հարցերը.

1. Ֆակուլտետի գիտական խորհրդի կազմի և աշխատանքային պլանի հաստատում
(զեկուցող` Մ.Ա. Զաքարյան)

2. Ֆակուլտետի զարգացման տարեկան ռազմավարական ծրագրի ընդունում
(զեկուցող` Մ.Ա. Զաքարյան)

3. Ֆինանսական միջոցների ներհոսքի (ուսման վճարներ) վիճակի քննարկում
(զեկուցող` Մ.Ա. Զաքարյան)

4. Ընթացիկ հարցեր:

Նիստի ընթացքում Մ.Զաքարյանը նախ ներկայացրեց ֆակուլտետի գիտխորհրդի նոր կազմը.
1. Զաքարյան Մանվել Աշոտի – դեկանի ժ/պ, գիտխորհրդի նախագահ
2. Գասպարյան Հռիփսիմե Սերյոժայի – ֆակուլտետի քարտուղար, քարտուղար
3. Գուլակյան Գեղամ Վոլոդյայի – ֆակուլտետի արհմիության նախագահ, անդամ
4. Ցուցուլյան Արտակ Վոլոդյայի – Ընդհանուր մաթեմատիկայի և բնագիտության ամբիոնի վարիչի ժ/պ, անդամ
5. Քամալյան Ռաֆայել Ռուբենի – Ծրագրավորման և ինֆորմացիոն տեխնոլոգիաների ամբիոնի վարիչի ժ/պ, անդամ
6. Աթոյան Մհեր Սերգեյի – Ընդհանուր մաթեմատիկայի և բնագիտության ամբիոնի դոցենտ, անդամ
7. Ասիլբեկյան Պավել Նորիկի – Տուրիզմի կառավարման և մշակութաբանության ամբիոնի ասիստենտ, անդամ
8. Օթարյան Քնար Վլադիմիրի – Ծրագրավորման և ինֆորմացիոն տեխնոլոգիաների ամբիոնի դասախոս, անդամ
9. Սաֆարյան Անդրեյ Մեսրոպի – ֆակուլտետի ՈՒԽ-ի նախագահ, անդամ
10. Ղևոնդյան Սոնա Գառնիկի – ֆակուլտետի ՈՒԳԸ-ի նախագահ, անդամ
11. Ներսիսյան Վարուժան Նարիմանի – ՀՀ ԿՊԿ Տավուշի մարզային ստորաբաժանման ղեկավար
12. Ղազարյան Հարություն Ավետիքի – Գետահովիտի հիմնական դպրոցի տնօրեն
13. Թիրաբյան Մարսպետ /Մարզպետ/ Պարգևի – Իջևանի թիվ 1 հիմնական դպրոցի ինֆորմատիկայի ուսուցիչ
14. Հովսեփյան Անահիտ Մհերի – ԻԿՄ II կուրսի ուսանողուհի
12. Խաչատրյան Նազելի Մանվելի – ԻԿՄ II կուրսի ուսանողուհի

Այնուհետև զեկուցողը ներկայացրեց ֆակուլտետի գիտխորհրդի աշխատանքային պլանը, որը կազմվել է ֆակուլտետի զարգացման ռազմավարական պլանի դրույթների և ուսումնական գործընթացի ժամանակացույցի հիման վրա:

Որոշվեց 2014-15 ուստարվա II կիսամյակի ֆակուլտետի գիտխորհրդի նոր կազմը և աշխատանքային պլանը ներկայացնել մասնաճյուղի գիտխորհրդի հաստատմանը:

Երկրորդ հարցի կապակցությամբ զեկուցողը ներկայացրեց ֆակուլտետի զարգացման ռազմավարական ծրագիրը, նրա հիմնարար արժեքները, նպատակները, առաքելությունը:

Կարևորվեց ֆակուլտետի ընդունելության պրոֆիլի ընդլայնման խնդիրը` այն համապատասխանեցնելով տարածաշրջանի տնտեսական զարգացման և աշխատաշուկայի պահանջներին:

Որոշվեց հաստատել ֆակուլտետի զարգացման տարեկան ռազմավարական ծրագիրը:

Ֆակուլտետի գիտխորհրդի նախագահը զեկուցեց նաև ֆինանսական ներհոսքի՝ ուսման վճարների մուծումների վիճակի, ներֆակուլտետային ուսումնական գործընթացի մասին:

Նիստի ընթացքում ելույթ ունեցավ մասնաճյուղի տնօրեն Ս.Ա. Առաքելյանը: Նա ներկայացրեց նախկին ՊՈԱԿԻ և Հիմնադրամի միջև եղած տարբերությունները, վերջինիս առավելությունները:

Տնօրենն ընդգծեց Բնական գիտությունների ֆակուլտետի «Ինֆորմատիկա և կիրառական մաթեմատիկա», «Քարտեզագրություն և կադաստրային գործ» մասնագիտությունների կարևորությունը և պահանջարկը ժամանակակից աշխատաշուկայում: Մասնավորապես պահանջարկ կա չափագրման ուղղությամբ, անհրաժեշտ է օգտագործել դասախոսական կազմի և ուսանողների ներուժը` նշված մասնագիտությունները առավել գրավիչ դարձնելու համար:

Այնուհետև ելույթ ունեցավ ՀՀ ԿՊԿ Տավուշի մարզային ստորաբաժանման ղեկավար Վ.Ն. Ներսիսյանը: Նա ներկայացրեց պետական և մասնավոր հատվածների չափագրումներ կատարող մասնագետի պահանջարկի մասին:

Բնական գիտությունների ֆակուլտետի գիտխորհրդի նիստում արտահայտվեց նաև Ընդհանուր մաթեմատիկայի և բնագիտության ամբիոնի վարիչի ժ/պ Ա.Վ. Ցուցուլյանը` նշելով, որ ֆակուլտետի ուսումնական գործընթացը բխում է կրթության որակի պահանջներից:

Մասնաճյուղում տեղի ունեցավ «Ղազախստան-2050» ռազմավարություն. քննարկում Հայաստանում» թեմայով կոնֆերանս

2015թ. փետրվարի 26-ին ԵՊՀ ԻՄ-ի օնլայն լսարանում տեղի ունեցավ «Ղազախստան-2050» ռազմավարություն. քննարկում Հայաստանում» թեմայով կոնֆերանս, որը կազմակերպվել էր «Եվրոպական ինտեգրացիա» հասարակական կազմակերպության և ԵՊՀ Իջևանի մասնաճյուղի կողմից:

Կոնֆերանսին ներկա էին ԵՊՀ Իջևանի մասնաճյուղի վարչական և պրոֆեսորադասախոսական անձնակազմի ներկայացուցիչներ, ուսանողներ:

Բացման խոսքով հանդես եկավ ՀՀ-ում Ղազախստանի Հանրապետության արտակարգ և լիազոր դեսպան Այիմդոս Բոզջիգիտովը:

Կոնֆերանսի աշխատանքային լեզուն ռուսերենն էր:

Զեկուցումներով հանդես եկան Հայաստանում Ղազախստանի Հանրապետության դեսպանատան խորհրդատու Աբու Ջանփոլադ Մոլդաբայուլը, Հանրության հետ կապերի և լրատվության կենտրոնի տարածաշրջանային հետազոտությունների ծառայության ղեկավար Մանվել Գումաշյանը, «Ինտեգրացիա և զարգացում» հետազոտության և վերլուծության հասարակական կազմակերպության նախագահ Արամ Սաֆարյանը, Երևանի պետական համալսարանի դասախոս, արևելագետ Նաիրա Մկրտչյանը:

Ներկայացված զեկուցումների շուրջ տեղի ունեցավ ակտիվ քննարկում:

ՀՀ-ում Ղազախստանի Հանրապետության արտակարգ և լիազոր դեսպան Այիմդոս Բոզջիգիտովն ու զեկուցողները պատասխանեցին ԵՊՀ ԻՄ-ի պրոֆեսորադասախոսական անձնակազմի ներկայացուցիչների և ուսանողների ուղղած հարցերին, մասնաճյուղին նվիրեցին Ղազախստանի մասին գրականություն (գրքեր, բուկլետներ, օրացույցներ):

Կոնֆերանսի օրակարգը տե՛ս այստեղ:

«Սխալ-մեղք-ապաշխարություն» թեմայով բաց դաս

2015թ. փետրվարի 26-ին ԵՊՀ ԻՄ-ի բնական գիտությունների և կիրառական արվեստի ֆակուլտետների գրադարանում «Սխալ-մեղք-ապաշխարություն» թեմայով բաց դաս անցկացրեց Հայոց պատմության և հասարակագիտության ամբիոնի ասիստենտ Հակոբ Ազատի Զորոյանը:

Բաց դասին ներկա էին մասնաճյուղի աշխատակիցներ, առկա և հեռակա ուսուցման համակարգերում սովորող ուսանողներ:  Հ.Զորոյանը, մարդկային արարքները դասակարգելով ըստ նրանց բնույթի (բարի, չար, լավ, վատ, ճիշտ, սխալ և այլն), մասնավորապես նշեց, որ սխալ արարքները չշտկվելու դեպքում հանդես են գալիս որպես մեղքի և մեղսագործության նախադուռ: Քրիստոնեական դավանաբանությունը ենթադրում է, որ սխալի շտկումը, մեղքի բեռի թեթևացումը տեղի է ունենում 7 հիմնարար խորհուրդներից մեկի` Ապաշխարության միջոցով:

Բաց դասի ընթացքում սխեմատիկ եղանակով ներկայացվեց ապաշխարության բանաձևը (ա/արարքի գիտակցում, բ/անկեղծ զղջում, գ/հրապարակավ խոստովանություն, դ/մեղքերի թողություն), ցույց տրվեց այդ խորհրդի էվոլյուցիան (բարեշրջում), օրինակներ բերվեցին Աստվածաշնչից, Գրիգոր Նարեկացու «Մատեան ողբերգութեան» երկից, դասի թեման կապվեց ժամանակակից աշխարհի տնտեսական, քաղաքական և սոցիալական խնդիրների հետ:

Վերջում կրոնագետ Զորոյանը պատասխանեց մասնակիցների ուղղած հարցերին. ծավալվեց հետաքրքիր քննարկում:

Տեղի ունեցավ վոլեյբոլի մասնաճյուղային առաջնություն

2015թ. փետրվարի 24-ին ԵՊՀ ԻՄ-ում տեղի ունեցավ վոլեյբոլի մասնաճյուղային առաջնություն, որը կազմակերպվել էր Արտակարգ իրավիճակների, մարմնակրթության և սպորտի ամբիոնի կողմից:

Առաջնությանը մասնակցում էին տարբեր ֆակուլտետների հավաքական թիմերը:

Խաղերն ընթացան շրջանաձև կարգով:

Եզրափակիչ դուրս եկան Տնտեսագիտության և Հումանիտար գիտությունների ֆակուլտետների հավաքական թիմերը:

Առաջնությունում հաղթեց Տնտեսագիտության ֆակուլտետի թիմը, որը տնօրենության կողմից պարգևատրվեց հուշանվերով:

Փետրվարի 25-ին ԵՊՀ ԻՄ-ի աշխատակիցները մրցեցին մասնաճյուղի վոլեյբոլի հավաքական թիմի հետ:

Հաղթեց մասնաճյուղի վոլեյբոլի հավաքական թիմը:

Շնորհավոր ծնունդդ, Ամենայն հայոց զորավար

Այսօր՝ 2015թ. փետրվարի 25-ին, լրանում է հայ մեծագույն զորահրամանատար, ֆիդայապետ, ազգային հերոս Անդրանիկ Օզանյանի ծննդյան 150-ամյակը։

Անդրանիկ Թորոսի Օզանյանը (Զորավար Անդրանիկ, Անդրանիկ Փաշա) ծնվել է 1865թ. փետրվարի 25-ին Արևմտյան Հայաստանի Շապին Գարահիսար քաղաքում։ Օզանյանի ազգանվան ծագումը գալիս է Շապին Գարահիսարի մոտ գտնվող Օզան գյուղից։ Հայ զորավարը մեկ տարեկան հասակում կորցրել է մորը։ Վերջինիս մահից հետո Անդրանիկին խնամել է ավագ քույրը։

Անդրանիկ Օզանյանը ամուսնացել է 17 տարեկան հասակում, սակայն մեկ տարի անց նրա կինը մահացել է։ Այնուհետև մահանում է նաև Անդրանիկի նորածին որդին։
Աբդուլ Համիդ սուլթանի օրոք, երբ վատթարանում է հայերի դրությունը, Անդրանիկ Օզանյանը վերցնում է զենքը և պայքարում կեղեքիչների դեմ։

1880-ական թվականներին Անդրանիկը հիմնականում բնակվում էր Կոստանդնոպլսում։ 1897թ. վերադառնալով Արևմտյան Հայաստան` Անդրանիկը միանում է Աղբյուր Սերոբի խմբին։ Մինչև 1904թ. հայ զորավարը պայքարում է Աբդուլ Համիդի դեմ։

1905թ. Անդրանիկը ճամփորդության է մեկնում տարբեր երկրներ, որտեղ փորձում է տեղեկացնել արևմտահայության ծանր վիճակի մասին։

1912թ. Անդրանիկ Օզանյանը ձևավորում է վաշտ և առաջին Բալկանյան պատերազմի ժամանակ Բուլղարիայի կազմում մարտնչում է Օսմանյան կայսրության դեմ։ Իր զորաջոկատով Մարիցա գետի ափին ջարդելով թուրքական մեծաքանակ բանակը` նա Բուլղարիայի կառավարության կողմից արժանանում է բարձրագույն պարգևի` «Ոսկե խաչի»:

1914 թվականին` Առաջին աշխարհամարտը սկսվելուն պես, Անդրանիկը վերադառնում է Կովկաս և ձևավորելով առաջին հայկական կամավորական գունդը` ղեկավարում է թուրքական բանակի դեմ մղված կռիվները, որոնց արդյունքում զորավարը պարգևատրվում է Գևորգյան 4-րդ կարգի շքանշանով և բազում այլ մեդալներով:

Առաջին աշխարհամարտի ժամանակ Զորավարը մի շարք նշանակալից հաղթանակներ է տոնում, որոնցից ամենահիշարժանը Դիլմանի ճակատամարտն էր։
1918թ. մայիսին «խենթի պես քաջ» Անդրանիկի դիվիզիան Վորոնցովկա ավանի մոտ կասեցնում է օսմանյան զորքի առաջխաղացումը դեպի Թիֆլիս, ապա մարտերը շարունակվում են Ղարաքիլիսայի ուղղությամբ:

Զորահրամանատարի դերը խիստ նշանակալից էր նաև Զանգեզուրի պաշտպանական մարտերում: Այնուհանդերձ, Անտանտի դաշնակիցների վարած քաղաքականության ու Հայաստանի ղեկավարության որոշ ներկայացուցիչների հետ հակասություններ ունենալով` Անդրանիկը 1922թ. հեռանում է Հայաստանից:

1927թ. օգոստոսի 31-ին մեծագույն հայը իր մահկանացուն կնքում է ԱՄՆ Ֆրեզնո քաղաքում: 1928թ. նրա աճյունը տեղափոխվում է Փարիզ, 2000 թվականին` Հայաստան։ Նրա աճյունն այժմ ամփոփված է Երևանի Եռաբլուր պանթեոնում։
Անդրանիկ Օզանյանը Հայոց պատմության մեծագույն հայերից մեկն է, ողջ հայության սիրելի զորավարը, «ամենահմայիչ, ամենառոմանտիկ, ամենավառ մարտիկներից մեկը, որ երբևէ տեսել է մարդկությունը»:

Իր իսկ խոսքով ասած` նա իր կյանքում երբեք չի ձգտել անձնական երջանկության ու բարօրության, ձգտել և պայքարել է միայն մի բանի` իր հարազատ ժողովրդի ազատության և բարեկեցության համար, չի փնտրել իր վաստակի գնահատականը և ցանկացել է միայն, որ երջանիկ լինի այն ժողովուրդը, որին ինքը ծառայել է ամբողջ կյանքում:

Շնորհավորում ենք ծնունդդ, Ամենայն հայոց զորավար, փառք ու պատիվ մեր մեծերին: