2023թ. ապրիլի 13-ին ԵՊՀ Իջևանի մասնաճյուղում Ա.Մակարյանի նախագահությամբ կայացավ տնօրենության նիստ՝ օրակարգային ութ հարցերով:

Առաջին հարցի մասին զեկուցեց Վ.Աղաբաբյանը՝ մասնավորապես նշելով, որ ս.թ. ապրիլի 1-ին ԵՊՀ Իջևանի մասնաճյուղն իրականացրել է ԵՊՀ-ի հետ համատեղ անցկացվող 2023թ. դպրոցական օլիմպիադայի 1-ին փուլը: Օլիմպիադան անցկացվել է հետևյալ հանրակրթական առարկաների գծով՝ մաթեմատիկա, ֆիզիկա, քիմիա, կենսաբանություն, աշխարհագրություն, հայոց պատմություն, հայոց լեզու և գրականություն, ռուսաց լեզու, անգլերեն, գերմաներեն, ֆրանսերեն, ինֆորմատիկա և լրացուցիչ կրթական առարկաներից՝ հայոց եկեղեցու պատմություն, տրամաբանություն, սոցիոլոգիա, պետություն և իրավունքի հիմունքներ, էկոլոգիա և կայուն զարգացման հիմունքներ, տնտեսագիտություն: Տավուշի մարզի հանրակրթական ուսումնական հաստատություններից օլիմպիադային 11 առարկայից մասնակցել է 30 դպրոցի 183 աշակերտ (68 աշակերտ՝ հայոց լեզու և գրականություն առարկայից, 30-ը՝ մաթեմատիկա, 23-ը՝ հայոց պատմություն, 21-ը՝ անգլերեն, 15-ը՝ կենսաբանություն, 9-ը՝ ռուսաց լեզու, 7-ը՝ քիմիա, 5-ը՝ ֆիզիկա, 3-ը՝ աշխարհագրություն, 1-ը՝ ֆրանսերեն, 1-ը՝ գերմաներեն):

Ներկայացնելով օլիմպիադայի 1-ին փուլի արդյունքները՝ զեկուցողը նշեց, որ 183 մասնակիցներից առաջին փուլը հաղթահարել է 35 աշակերտ (14 աշակերտ՝ հայոց լեզու և գրականություն առարկայից, 1-ը՝ մաթեմատիկա, 3-ը՝ հայոց պատմություն, 3-ը՝ անգլերեն, 4-ը՝ ռուսաց լեզու, 3-ը՝ քիմիա, 4-ը՝ ֆիզիկա, 3-ը՝ աշխարհագրություն): Բարձր արդյունքներ ցուցաբերած աշակերտների քանակով առանձնանում է Դիլիջանի ավագ դպրոցը (12 աշակետ անցել է 2-րդ փուլ):

Իբրև ամփոփում՝ նշվեց, որ ԵՊՀ-ի հետ համատեղ անցկացվող 2023թ. դպրոցական օլիմպիադայի 1-ին փուլը մասնաճյուղը կազմակերպել է պատշաճ կերպով և բարձր մակարդակով, որի կապակցությամբ բուհի ղեկավարությունը շնորհակալություն ու գոհունակություն հայտնեց օլիմպիադայի բոլոր կազմակերպիչներին ու պատասխանատուներին:

Երկրորդ հարցի՝ դասապրոցեսին ուսանողների մասնակցության վերաբերյալ զեկուցեց ԵՊՀ ԻՄ-ի փոխտնօրեն Մ.Օթարյանը՝ ըստ կուրսերի ներկայացնելով այս պահի դրությամբ 2022-2023 ուստարվա 2-րդ կիսամյակի առկա և հեռակա ուսուցման դասապրոցեսին ուսանողների հաճախելիության պատկերը: Նշվեց, որ թե՛ առկա և թե՛ հեռակա ուսուցման համակարգերում կան ուսանողներ, ովքեր հատել են բացակայությունների թույլատրելի սահմանը և ստացել են նկատողություն իրենց դեկանատի կամ խիստ նկատողություն տնօրենության կողմից:   

2022-2023 ուստարվա 2-րդ կիսամյակի դասապրոցեսին ուսանողների մասնակցության ընդհանուր վիճակը գնահատվեց բավարար:

Ավագ դպրոցներում և քոլեջներում սովորողների համար ամենամյա «Բաց դռների օրեր» և ճանաչո­ղա­կան այցեր  մասնաճյուղ կազմակերպելու, ԵՊՀ ԻՄ-ի հետ պայմանա­գրա­յին հիմունքներով համա­գոր­ծակ­ցող ավագ դպրոցների և քոլեջների  շրջա­նակն  ընդլայնելու, ԵՊՀ-ի և ԵՊՀ ԻՄ-ի դասախոսներին հանրակրթական ուսումնական հա­ս­­­տա­տու­թյուններում առավելագույնս ներգրավելու հարցերի մասին զեկուցեց Լ.Բեգինյանը:

Նա մասնավորապես նշեց, որ «Բաց դռների օրեր» կազմակերպելու վերաբերյալ կատարվել են քննարկումներ Բնական գիտութ­յունների ֆակուլտետում «Ինֆորմատիկա և կիրառական մաթեմատիկա» և Տնտեսագիտության ֆակուլտետ­ում  «Զբոսաշրջություն» կրթական ծրագրի շրջանակներում, ըստ որոնց՝ նախատեսվել է երկրորդ կիսամյակում (մինչև մայիսի 20-ը) ունենալ երկու «Բաց դռների օրեր»:

Ներկայացվեց, որ 2022-2023 ուստարվա ընթացքում ունեցել ենք տարբեր դպրոցների կողմից ճանաչողական այցեր համալսարան:

ԵՊՀ ԻՄ-ի հետ պայ­մա­նա­գրա­յին հիմունքներով համա­գոր­ծակ­ցող ավագ դպրոցների և քոլեջների  շրջա­նակն  ընդլայնելու մասին նշվեց, որ մասնաճյուղը համագործակցության պայմանագրեր ունի Տավուշի մարզում գործող Իջևանի, Դիլիջանի, Բերդի և Նոյեմբերյանի ավագ դպրոցների հետ: Պայմանագրերը կնքված են 25 տարով և գործելու են մինչև 2036 թվականը: Մասնաճյուղի հետ համագործակցող ավագ դպրոցների շրջանակն ընդլայնելու հարցում վերանայվել են վերջին հինգ տարիների դիմորդների տվյալները, որոնց շնորհիվ մասնաճյուղը դիմորդներ է ունեցել Ճամբարակի ավագ դպրոցից և Երևանի տարբեր (N118, N127, N190) ավագ դպրոցներից:

Պետական քոլեջներից մասնաճյուղում համապատասխան մասնագիտությամբ կրթությունը շարունակելու հետ կապված՝ նշվեց, որ անորոշ ժամկետով համագործակցության պայմանագրեր ունենք մարզի չորս՝ Իջևանի, Դիլիջանի, Նոյեմբերյանի և Բերդի պետական քոլեջների հետ: Մասնաճյուղի հետ համագործակցող քոլեջների շրջանակն ընդլայնելու համար վերանայվել է վերջին հինգ տարվա տվյալների համաձայն կրթության շարունակության համար մասնաճյուղ դիմած քոլեջների շրջանավարտների շրջանակը (Դիլիջանի պետական բժշկական քոլեջ, Դիլիջանի արվեստի պետական քոլեջ, Շիրակի Մ․Նալբանդյանի անվան պետական համալսարանի քոլեջ, Արարատի պետական քոլեջ, Հրազդանի պետական քոլեջ, Աբովյանի պետական քոլեջ, Երևանի տարածաշրջանային N1 պետական քոլեջ, Երևանի հենակետային բժշկական քոլեջ):

ԵՊՀ-ի և ԵՊՀ ԻՄ-ի դասախոսներին հանրակրթական ուսումնական հաստատու­թյուններում՝ ակ­նար­կային և բովան­դակային դասախոսությունների,  թեմատիկ քննարկում­ների կազ­մա­կերպ­ման գոր­ծում առավելագույնս ներգրավելու մասին նշվեց, որ բաժնի կողմից դպրոցներ կազմակերպված այցելությունների ժամանակ (46 դպրոցում կատարվել են քննարկումներ) ներկայացվել է, որ մասնաճյուղը պատրաստ է աջակցել դպրոցներին առարկայական թեմաների քննարկումներ կատարելու հարցում: Մասնաճյուղի աջակցությանը դիմել են Իջևանի վարժարանից (նախագծային աշխատանքի շրջանակներում): Այժմ Ուսումնամեթոդական վարչության կողմից ամբիոններին իջեցվել է շրջաբերական՝ մինչև ապրիլի 20-ը ներկայացնելու թեմաներ, որպեսզի գործընթացը դպրոցներում մինչև մայիսի 15-ն իրականացվի:

Տնօրենը նշեց, որ ինչպես այլ, այնպես էլ մասնագիտական կողմնորոշման հետ կապված գործընթացներն արդյունավետ իրականացնելու համար անհրաժեշտ է կատարել հստակ պլանավորում և ըստ ժամանակացույցի՝ հետևողական լինել դրանց իրականացմանը:

Դասախոսների և ուսանողների (կրթական և այլ) կարիքների վերհանման, մատուցվող ծառայություններից նրանց բավարարվածության գնահատման հարցերի վերաբերյալ զեկուցեց Մ.Ճաղարյանը: Նա մասնավորապես նշեց, որ 2021-2022 ուստարում ՄԿՈԱ բաժնի կողմից տարբեր մեխանիզմներով վերհանվել էին դասախոսների և ուսանողների մի շարք խնդիրներ և կարիքներ:

Բաժնում այդ խնդիրները տրոհվել են, խմբավորվել ըստ պատասխանատվության և ընթացիկ ուստարվա սկզբին ուղարկվել են բոլոր ստորաբաժանումներին, որոնց հիման վրա ստորաբաժանումները կազմել են ներառված խնդիրների լուծման իրենց ծրագրերը՝ քայլերով, ակնկալիքներով և ժամկետներով ամրագրված:

Այդ խնդիրների պատճառների հստակեցման, դրանց հնարավոր լուծման համար պատասխանատու ստորաբաժանումները կազմակերպել են հանդիպում-քննարկումներ ուսանողների և դասախոսների հետ:

Զեկուցողն անդրադարձավ վերհանված հիմնական խնդիրներին և դրանց լուծման համար իրականացված գործընթացներին, որոնք վերաբերում էին մասնագիտական գրականության համալրմանը և հետազոտությունների իրականացման համար տվյալների ձեռքբերմանը, հետազոտական աշխատանքների իրականացմանը և գնահատմանը, պրակտիկաների կազմակերպման ձևին, ժամանակահատվածին, տևողությանը և ղեկավարների ընտրությանը, ուսանողների գնահատման բազմագործոն համակարգի արդյունավետության բարձրացմանը, գնահատման օբյեկտիվությանը և թափանցիկության ապահովմանը, ուսանողների և դասախոսների կողմից բարձրաձայնված և լուծումներ ստացած այլ հարցերի:

Օրակարգային վերջին հարցի մասին զեկուցեց Ն.Առուշանյանը՝ ամփոփելով հեռակա ուսուցման բակալավրի և մագիստրատուրայի քննաշրջանը (լուծարքային շրջանը ներառյալ):

Ելնելով 2022-2023 ուստարվա հեռակա ուսուցման առաջին կիսամյակի քննաշրջանի արդյունքներից՝ ԵՊՀ ԻՄ-ի հեռակա ուսուցման համակարգի 15 ուսանող հեռացվեց մասնաճյուղից ակադեմիական անբավարար առաջադիմության պատճառով: 

 ԵՊՀ Իջևանի մասնաճյուղում 2023թ. մարտի 4-ին Ա.Մակարյանի նախագահությամբ տեղի ունեցավ տնօրենության նիստ:

Նիստում քննարկվեցին 2022-2023 ուստարվա հեռակա ուսուցման 1-ին կիսամյակի հետազոտական աշխատանքների արդյունքների վերլուծությանը, բակալավրի ավարտական աշխատանքների կատարման ընթացքին, 2023թ. բակալավրի կրթական ծրագրով ամփոփիչ ատեստավորման հանձնաժողովների նախագահների թեկնածուներին, հեռակա ուսուցման` 2022-2023 ուստարվա մագիստրոսական թեզերի պաշտպանությանը, 2022-23 ուստարվա հեռակա ուսուցման 1-ին կիսամյակի քննաշրջանի (առանց լուծարքային շրջանի) ամփոփմանը և 2-րդ կիսամյակի նախապատրաստական աշխատանքներին վերաբերող օրակարգային հարցերը:

Ընթացիկ հարցերը վերաբերում էին հեռակա ուսուցման ուսանողների իրավունքների վերականգնման ընթացքին, մինչև 12 կրեդիտ կուտակած ակադեմիական պարտքերի վերահանձնման գործընթացի կազմակերպմանը:

Առաջին հարցի մասին նշվեց, որ հեռակա ուսուցման համակարգում 2022-2023 ուստարվա 1-ին կիսամյակում հետազոտական բաղադրիչ պարունակող դասընթացների թիվը 19 է (18-ը՝ եզրափակիչ գնահատումով, իսկ 1-ը՝ առանց եզրափակիչ գնահատման): Առանց եզրափակիչ գնահատման դասընթացների աշխատանքների ընդհանուր թիվը 11 է, եզրափակիչ գնահատումովը՝ 277:

Աշխատանքների ընդհանուր թիվը պետք է 288 լիներ, որից չի ներկայացվել 34 աշխատանք, 0 է գնահատվել` 71 աշխատանք, 1 միավոր՝ 6 աշխատանք, 2 միավոր՝ 52 աշխատանք, 3 միավոր գնահատվել է 41 աշխատանք, 4 միավոր՝ 50 աշխատանք, 5 միավոր՝ 30 աշխատանք, 1-ական ուսանողի աշխատանք՝ 6 և 7, 8 միավոր՝ 2 աշխատանք, 9 և 10 միավորներ չեն եղել:

Բակալավրի ավարտական աշխատանքների կատարման ընթացքի վերաբերյալ զեկուցեցին ֆակուլտետների դեկանները: Ներկայացնելով աշխատանքների կատարման ընթացքը ըստ կուրսերի՝ նրանք նշեցին, որ առկա ուսուցման համակարգում աշխատանքները պատշաճ կերպով իրականացվում են, և ընթացքը կարելի է գնահատել բավարար՝ ի տարբերություն հեռակա ուսուցման համակարգի, որտեղ աշխատանքների իրականացման վիճակը բավարարի հասցնելու համար անհրաժեշտ է լրացուցիչ ջանքեր գործադրել, մասնավորապես՝ ժամկետների վերաբերյալ ևս մեկ անգամ ծանուցել ուսանողներին, որ հանդիպեն ղեկավարների հետ՝ համապատասխան ցուցումների, խորհրդատվության և շտկումների համար:

Հաջորդ հարցի կապակցությամբ քննարկվեցին դեկանների կողմից ըստ մասնագիտությունների ներկայացված 2023թ. բակալավրի կրթական ծրագրով ամփոփիչ ատեստավորման հանձնաժողովների նախագահների թեկնածությունները: Տնօրենը դեկաններին հանձնարարեց առաջադրված թեկնածուների հետ վերջնական պայմանավորվածություն ձեռք բերել, որպեսզի սեղմ ժամկետներում հաստատվեն նրանց թեկնածությունները:

Հեռակա ուսուցման` 2022-2023 ուստարվա մագիստրոսական թեզերի պաշտպանության վերաբերյալ նշվեց, որ ս.թ. փետրվարի 1-ին ԵՊՀ Իջևանի մասնաճյուղում իրականացվել է «Ընդհանուր մանկավարժություն» մասնագիտության «Դպրոցական մանկավարժություն և մեթոդիկա» կրթական ծրագրի ավարտական կուրսի մագիստրոսական թեզերի պաշտպանությունը: Ամփոփիչ ատեստավորման հանձնաժողովը նախագահում էր Հայաստանի ազգային պոլիտեխնիկական համալսարանի Կապանի մասնաճյուղի տնօրեն, մանկավարժական գիտությունների դոկտոր, պրոֆեսոր Լեռնիկ Պետրոսյանը: Պաշտպանությանը մասնակցում էր 13 ուսանող (1 ուսանող նախորդ տարվանից): 7 ուսանող ստացավ «գերազանց», 6-ը՝ «լավ», գերազանցության դիպլոմ կստանա 6 շրջանավարտ:

Ամփոփիչ ատեստավորման հանձնաժողովը գոհունակություն է հայտնել շրջանավարտների պատրաստվածության մակարդակի վերաբերյալ: Աշխատանքների թեմաներն արդիական էին և նվիրված էին մանկավարժության ժամանակակից մեթոդներին վերաբերող խնդիրներին: Դրանց բնորոշ էին հետազոտական և փորձարարական տարրերի առկայությունն ու վերհանված խնդիրների համակողմանի ուսումնասիրությունը, շրջանավարտների կողմից մասնագիտական գրականության հմուտ շրջանառումը:

Հետագա բարելավման ուղղությամբ հանձնաժողովն առաջարկել է թեզերի թեմաները ձևակերպել ոչ ընդհանրական, այլ կոնկրետ և հստակ, ներկայացման ժամանակ համառոտ անդրադառնալ բոլոր բաժինների բովանդակությանը: Նաև առաջարկվել է մագիստրոսական թեզերը ղեկավարող պրոֆեսորադասախոսական աձնակազմի հետ իրականացնել վերապատրաստում:

Տվյալ հարցի մասին նշվեց նաև, որ ԵՊՀ ԻՄ-ի մագիստրատուրայի հեռակա ուսուցման «Ընդհանուր մանկավարժություն» մասնագիտության՝ 2023թ. շրջանավարտների դիպլոմների հանձնման արարողությունը տեղի կունենա ս.թ. մարտի 11-ին:

2022-23 ուստարվա հեռակա ուսուցման 1-ին կիսամյակի քննաշրջանի (առանց լուծարքային շրջանի) ամփոփման և 2-րդ կիսամյակի նախապատրաստական աշխատանքների վերաբերյալ մասնավորապես նշվեց, որ քննաշրջանին մասնակցել է 473 ուսանող: Քննաշրջանի արդյունքների համաձայն՝ դրական գնահատականներ են ստացել 176, առարկայական պարտքեր ունեն 297 ուսանողներ: Ուսանողների առաջադիմությունը կազմում է 37.2%: Քննաշրջանին չի ներկայացել 27 ուսանող:

2022-2023 ուստարվա հեռակա ուսուցման 2-րդ կիսամյակի ուսումնական գործընթացը 2023թ. մարտի 7-ից սկսելու համար իրականացվել են անհրաժեշտ նախապատրաստական աշխատանքներ՝ կապված դասացուցակների, դասամատյանների, ըստ կուրսերի և խմբերի՝ լսարանային ֆոնդի բաշխման և այլնի հետ:

Ընթացիկ հարցերի կապակցությամբ որոշվեց, որ ելնելով քննաշրջանի արդյունքներից՝ 11 ուսանող դասընթաց է կրկնելու, 2 ուսանող հեռացվում է մասնաճյուղից ակադեմիական անբավարար առաջադիմության պատճառով:

Քննարկվեց նաև 8 նախկին ուսանողների ուսանողական իրավունքները ԵՊՀ ԻՄ-ի բակալավրատի հեռակա ուսուցման համակարգում վերականգնելու հարցը:

 ԵՊՀ Իջևանի մասնաճյուղում 2023թ. հունվարի 27-ին Ա.Մակարյանի նախագահությամբ տեղի ունեցավ տնօրենության՝ այս տարվա առաջին նիստը:

Տնօրենության նիստում քննարկվեցին ԵՊՀ ԻՄ-ի՝ 2023-2024 ուստարվա ուսման վճարների չափերին, 2022-2023 ուստարվա առկա ուսուցման 1-ին կիսամյակի հետազոտական աշխատանքների արդյունքների վերլուծությանը, 2022-23 ուստարվա 1-ին կիսամյակում իրականացված պրակտիկաներին և 2-րդ կիսամյակի ընթացքում նախատեսվող պրակտիկաների նախապատրաստական աշխատանքներին, 2022-23 ուստարվա 1-ին կիսամյակի լուծարքային շրջանի կազմակերպմանը, 2022-23 ուստարվա 2-րդ կիսամյակի նախապատրաստական աշխատանքներին վերաբերող հարցեր:

Ամփոփվեց 2022-23 ուստարվա 1-ին կիսամյակի առկա ուսուցման ձմեռային քննաշրջանը (առանց լուծարքային շրջանի), ներկայացվեց Կիրառական արվեստի ֆակուլտետի դեկանի հաշվետվությունը, հեռակա ուսուցման համակարգի 2 ուսանողի մասնաճյուղից հեռացման հարցը:

Առաջին հարցի մասին նշվեց, որ ըստ ԵՊՀ ԻՄ-ի ուսումնամեթոդական վարչության կողմից հանրապետության մյուս բուհերի հետ իրականացված հերթական համեմատական վերլուծության՝ ԵՊՀ ԻՄ-ի ուսման վարձավճարների չափերը շարունակում են մնալ հանրապետությունում ամենացածրերից այն դեպքում, երբ մասնաճյուղի կողմից առաջարկված կրթական ծրագրերը աշխատաշուկայում իրենց մրցունակությամբ և կրթության որակով ամենևին չեն զիջում համանման կրթական ծրագրերին, իսկ իրականացված ծախսերը որոշ մասնագիտություններում գերազանցում են վարձավճարների չափերին: Միևնույն ժամանակ չի կարելի հաշվի չառնել մարզի բնակչության սոցիալական վիճակը: Ելնելով վերոնշյալ հանգամանքներից՝ քննարկումների արդյունքում որոշվեց առաջարկել ԵՊՀ ԻՄ-ի գիտական խորհրդին ոչ մեծ չափով (հիմնականում 20 և 30 հազար ՀՀ դրամի, «Հայոց լեզու և գրականություն» կրթական ծրագրինը՝ 10 հազար ՀՀ դրամի չափով) փոփոխություններ կատարել ԵՊՀ ԻՄ-ի՝ 2023-2024 ուստարվա ուսման վճարների չափերում:

Երկրորդ հարցի կապակցությամբ ներկայացվեցին 2022-2023 ուստարվա առկա ուսուցման 1-ին կիսամյակի հետազոտական աշխատանքների արդյունքները:

Նշվեց, որ 2022-2023 ուստարվա առաջին կիսամյակում հետազոտական բաղադրիչ պարունակող դասընթացների ընդհանուր թիվը 31 է, որից 23-ը՝ ընթացիկ քննություններով, 8-ը՝ ընթացիկ ստուգումով, եզրափակիչ գնահատումով դասընթացներով աշխատանքների թիվը պետք է լիներ 290, իսկ առանց եզրափակիչ գնահատումով դասընթացների դեպքում՝ 108 աշխատանք:

ԵՊՀ-ի բակալավրի և մագիստրոսական կրթական ծրագրերի մասնագիտական դասընթացներում հետազոտական աշխատանքների կատարման կարգի 13-րդ կետի համաձայն՝ ամբիոններում երրորդ շաբաթվա ընթացքում հաստատվել են հետազոտական աշխատանքների թեմաները և ներկայացվել ուսանողներին:

Կրթական բարեփոխումների և դասախոսների վերապատրաստման բաժինը 2022թ. սեպտեմբերից 2023թ.  հունվար ամիսներին կազմակերպել է 2022-2023 ուստարվա 1-ին կիսամյակում հետազոտական բաղադրիչ պարունակող դասընթացները վարող դասախոսների հետ առցանց հանդիպում-քննարկումներ, որոնք վարել է ԵՊՀ ԻՄ-ի տնօրենի պաշտոնակատար  Ա.Մակարյանը: Հանդիպումների ընթացքում քննարկվել են հետազոտական թեմաների ընտրության, աշխատանքների պատրաստման, դրանց ներկայացման և գնահատման չափանիշները:

Տնօրենության անդամները շնորհակալություն հայտնեցին ԿԲԴՎ բաժնին՝ կատարված աշխատանքի համար, տնօրենը հավելեց, որ առավել նպատակահարմար կլինի հետազոտական աշխատանքների արդյունքները հաջորդիվ ներկայացնել ըստ ֆակուլտետների և գնահատականների բաշխման համեմատական վերլուծության ձևով:

Հաջորդ հարցի վերաբերյալ նշվեց, որ 2022-2023 ուստարվա առաջին կիսամյակում, ըստ բակալավրի և մագիստ­րատուրայի աշխատանքային ուսումնական պլանների, նախատեսված է եղել 13 պրակ­տիկա (առկա ուսուցման համակարգում՝ 9-ը, հեռակա ուսուցման համակարգում՝ 4-ը): Պրակտիկաներն իրականացվել են ծրագրերին համապատասխան, գործընթացին մասնակցել է 151 ուսանող, որոնցից 1 ուսանող ընթացքում վերցրել է տարկետում:

Երկրորդ կիսամյակում, ըստ բակալավրի և մագիստ­րատուրայի աշխատանքային ուսումնական պլանների, նախատեսված է 34 պրակ­տիկա (21-ը՝ առկա ուսուցման համակարգում, 13-ը՝ հեռակա ուսուցման համակարգում):

Այժմ կատարվում են առկա ուսուցման պրակտիկաների նախապատրաստական աշխատանքներ: Թեև, ժամանակացույցի համաձայն, ամբիոնների կողմից ծրագրերը Պրակտիկայի կազմակերպման և շահակիցների հետ համագործակցության բաժին պետք է ներկայացվեին 12 օր առաջ, և հիշեցման կարգով բաժնի կողմից այդ ամսին ուղարկվել է շրջաբերական, ամբիոնների կողմից մինչև այժմ ծրագրերը ներկա­յացվել են մասամբ:

Բաժնի կողմից ստուգվել են ներկայացված ծրագրերի ժամաքանակը, ժամանակահատվածի համապատասխանությունը կրթական ծրագրով սահմանված մոդուլի նկարագրիչի հետ, անճշտությունների դեպքում ապահովվել է հետադարձ կապ: Ըստ ներկայացված ծրագրերի՝ մասնագիտական պրակտիկաների մի մասը  նախատեսված է կազմակերպել մասնաճյուղում` Վիքիմեդիայի հետ համագործակցությամբ և մասնաճյուղի տարածքում գործող Գիտական հետազոտությունների զարգացման կենտրոնի (Ijevan CyberHub), «Ամերիկյան գրադարան և դասընթացների կենտրոն»-ի հետ համագործակցությամբ, ինչպես նաև կիրառական արվեստի ֆակուլտետի արվեստանոցներում:

Մասնաճյուղից դուրս ընդգրկված են 20 հաստատություններ: Մանկավարժական պրակտիկաները նախատեսվում է կազմակերպել Իջևանի համար 1, 4 և 5 հիմնական դպրոցներում: Երթուղիներ ունեցող ուսումնական պրակտիկաների ծրագրերը («Զբոսաշրջություն» կրթական ծրագրի) ընդգրկում են 5 մարզ (Տավուշ, Լոռի, Արագածոտն, Վայոց ձոր, Շիրակ) և Երևան:

Պրակտիկայի կազմակերպման և շահակիցների հետ համագործակցության բաժնին հանձնարարվեց մինչև ս.թ. հունվարի 31-ը ավարտին հասցնել բոլոր ծրագրերը, առաջիկայում կազմակերպել պրակտիկաների ղեկավարների հետ հանդիպումներ:

2022-23 ուստարվա 1-ին կիսամյակի լուծարքային շրջանի կազմակերպման կապակցությամբ նշվեց, որ կազմվել են գրաֆիկները և լուծարքային հանձնաժողովների կազմերը, տեղադրվել մասնաճյուղի պաշտոնական կայքէջում, և դրանց մասին իրազեկվել են ուսանողները և հանձնաժողովների անդամները:

2022-23 ուստարվա 2-րդ կիսամյակի նախապատրաստական աշխատանքների վերաբերյալ նշվեց, որ իրականացվել կամ ընթացքի մեջ են նախապատրաստական անհրաժեշտ աշխատանքները՝ կապված երկրորդ կիսամյակի ուսումնական գործընթացի կազմակերպման ժամանակացույցի, դասացուցակների կազմման, ամբիոններում առարկայական ծրագրերի և փաթեթների վերանայման-թարմացման և այլնի հետ: Երկրորդ կիսամյակի առկա ուսուցման դասապրոցեսը նախատեսվում է սկսել ս.թ. փետրվարի 7-ից: 

Դեկաններին հանձնարարվեց մինչև 2023թ. փետրվարի 1-ը ֆակուլտետների դասացուցակները վերջնական տեսքով ներկայացնել հաստատման և ուղարկել մասնաճյուղի պաշտոնական կայքէջում տեղադրման:

2022-23 ուստարվա 1-ին կիսամյակի առկա ուսուցման ձմեռային քննաշրջանը (առանց լուծարքային շրջանի) ամփոփելիս մասնավորապես նշվեց, որ քննաշրջանին մասնակցած ընդհանուր ուսանողների թիվը 629 է (անվճար՝ 165, վճարովի՝ 464): Ուսանողների ընդհանուր առաջադիմությունը  կազմում է 71.4% (անվճար՝ 97.6%, վճարովի՝ 60.8%): Ներկայացվեց նաև քննաշրջանի արդյունքների պատկերը՝ ըստ ֆակուլտետների: Ամենաբարձր առաջադիմությունը գրանցվել է Հումանիտար գիտությունների ֆակուլտետում (80.3%), ամենացածրը՝ Բնական գիտությունների ֆակուլտետում (53.4%): Տնտեսագիտության ֆակուլտետում ուսանողների առաջադիմությունը կազմում է 61.8%, Կիրառական արվեստի ֆակուլտետում՝ 69.6%:

Կիրառական արվեստի ֆակուլտետի դեկանի պաշտոնակատար Վ.Աղաբաբյանը ներկայացրեց ընդունված ձևաչափով ԵՊՀ ԻՄ-ի ռազմավարական ծրագրի կարճաժամկետ (2022թ. ապրիլ-դեկտեմբեր) պլանի կատարողականի վերաբերյալ ֆակուտետի տարեկան հաշվետվությունը:

Մասնավորապես նշվեց, որ ներկայումս ֆակուլտետում կրթություն է իրականացվում միայն առկա՝ «Դիզայն» և «Դեկորատիվ-կիրառական արվեստ» կրթական ծրագրերով: Ֆակուլտետում ուսանում է 69 ուսանող, որոնցից 21-ը՝ անվճար, 48-ը՝ վճարովի ուսուցման համակարգում:

Կիրառական արվեստի ֆակուլտետում դասավանդում են 4 դոցենտ, 6 ասիստենտ և 12 դասախոս: Դասավանդողներից 7-ը Նկարիչների միության անդամ է, իսկ 1-ը՝ Դիզայներների միության:

Հաշվետու ժամանակահատվածում ֆակուլտետը պարբերաբար կազմակերպել է «Բաց դռների օրեր» և ապագա դիմորդների ճանաչողական այցեր՝ ֆակուլտետի կրթական հնարավորությունները ներկայացնելու համար:

Կրթական ծրագրերը ներկայացնելու նպատակով կազմակերպվել են այցեր Տավուշի և Գեղարքունիքի մարզերի ավագ և միջնակարգ դպրոցներ:

«Դիզայն» կրթական ծրագրի վերանայման և «Դեկորատիվ-կիրառական արվեստ» կրթական ծրագրի մոնիթորինգի ընթացքում վերանայվել է շրջանավարտների մասնագիտական կոմպետենցիաների համախումբը: Այժմ մոնիթորինգի է ենթարկվում «Դիզայն» կրթական ծրագիրը:

Ֆակուլտետում ներդրվել են գրագողությամ դեմ պայքարի մեխանիզմներ:

Ավարտական աշխատանք­ների գիտական մակարդակի բարձրացմանը միտված քայլեր են պարբերաբար իրականացվում: Ֆակուլտետը ավարտական աշխատանքների ղեկավարման և գրախոսման գործում մշտապես ներգրավում է արհեստավարժ մասնագետների:

Կիրառական արվեստի ֆակուլտետի դասախոսները պարբերաբար մասնակցում են ԵՊՀ ԻՄ-ում կազմակերպվող վերապատրաստման դասընթացներին:

Ամբիոններում իրականացվել են փոխադարձ դասալսումներ, վարպետաց դասեր՝ ուսումնասիրելու դասախոսական կազմի ուսումնամեթոդական առաջավոր  փորձը, կազմակերպվել են ցուցահանդեսներ:

Կիրառական արվեստի ֆակուլտետի դեկանի հաշվետվությունն ընդունվեց ի գիտություն:

Հեռակա ուսուցման համակարգի 2 ուսանող հեռացվեց մասնաճյուղից՝ առարկայական տարբերությունները չհանձնելու և կիսամյակի ընթացքում 60 և ավելի ժամ անհարգելի բացակայություններ ունենալու, ուսման վարձը չվճարելու պատճառներով: 

 2022թ. դեկտեմբերի 20-ին ԵՊՀ Իջևանի մասնաճյուղում Ա.Մակարյանի նախագահությամբ տեղի ունեցավ տնօրենության տարեվերջյան նիստ, որին մասնակցում էին տնօրենության անդամները, հրավիրված էր Ուսումնամեթոդական վարչության ուսումնական գործընթացի կազմակերպման և վերահսկման բաժնի վարիչ Ն.Առուշանյանը:

Նիստի ընթացքում քննարկվեցին հերթական ատեստավորման ենթակա ուսուցիչների վերապատրաստման դասընթացների կազմակերպմանը և արդյունքներին, 2022-23 ուստարվա առաջին կիսամյակի առկա երկրորդ և հեռակա առաջին ընթացիկ քննությունների և ստուգումների նախապատրաստական աշխատանքներին, 2022-23 ուստարվա առաջին կիսամյակի քննաշրջանի նախապատրաստական աշխատանքներին, ըստ ԵՊՀ ԻՄ-ի 2022-26 թթ. ՌԾ-ի ժամանակացույցի՝ ստորաբաժանումների տարեկան հաշվետվությունների ներկայացման ընթացքին, հեռակա ուսուցման համակարգում 2022-23 ուստարվա առաջին կիսամյակի դասապրոցեսի կազմակերպմանը և անցկացմանը, հեռակա ուսուցման համակարգում կիսամյակի ընթացքում 80 և ավելի ժամ անհարգելի բացակայություններ ունեցող ուսանողներին մասնաճյուղից հեռացմանը վերաբերող հարցեր:

Առաջին հարցի մասին նշվեց, որ ԵՊՀ Իջևանի մասնաճյուղի կողմից 2022թ. սեպտեմբերի 19-ից հոկտեմբերի 28-ը իրականացվել են պարտադիր ատեստավորման ենթակա ուսուցիչների վերապատրաստումներ, որոնցում ընդգրկված են եղել Տավուշի և Գեղարքունիքի մարզերի 10 դպրոցների 18 ուսուցիչներ:

Յուրաքանչյուր խմբի համար դասընթացի տևողությունը եղել է 110 ժամ, և իրականացվել են վերապատրաստումներ հետևյալ բաղադրիչներից՝

• Հանրակրթության բնագավառի օրենսդրություն – 10 ժամ,
• Տեղեկատվական հաղորդակցության տեխնոլոգիաներ – 20 ժամ,
• Տարիքային հոգեբանություն – 10 ժամ,
• Համընդհանուր ներառում – 10 ժամ,
• Գնահատում – 15 ժամ,
• Դիրքորոշում և արժեք – 10 ժամ,
• Առարկայի դասավանդման մեթոդիկա – 30 ժամ,
• Հետազոտական աշխատանքներ կատարելու սկզբունքներ – 5 ժամ:

ԵՊՀ ԻՄ-ում վերապատրաստված ուսուցիչները փաստել են, որ վերապատրաստումներն իրականացվել են առաջատար ու արհեստավարժ մասնագետների կողմից, բարձր մակարդակով և կառուցողական ջերմ մթնոլորտում:

Երկրորդ հարցի վերաբերյալ նշվեց, որ ժամանակացույցի համաձայն՝ 2022-23 ուստարվա առաջին կիսամյակի առկա երկրորդ ընթացիկ քննությունները և ստուգումները նախատեսված է իրականացնել 2022թ. դեկտեմբերի 22-29-ը, իսկ հեռակա առաջին ընթացիկ քննությունները և ստուգումները՝ դեկտեմբերի 13-24-ն  ընկած ժամանակահատվածում: Անհրաժեշտ փոփոխություններով հանդերձ՝ բոլոր ժամանակացույցները հաստատված և տեղադրված են ԵՊՀ ԻՄ-ի պաշտոնական կայքում: Հարցաշարերը, ըստ կարգի, նախապես տրված են ուսանողներին, ընթացիկ քննությունների տետրերը բաշխված են ֆակուլտետներին:

Հեռակա առաջին ընթացիկ քննությունները և ստուգումները, ըստ ժամանակացույցի, որոշ ֆակուլտետներում արդեն ավարտվել են, մյուսներում ընթացքի մեջ են, անցկացվում են պատշաճ կարգով, խախտումներ չեն եղել:

Մյուս հարցի հետ կապված՝ նշվեց, որ համաձայն ժամանակացույցի՝ 2022-23 ուստարվա առաջին կիսամյակի քննաշրջանը կանցկացվի 2023թ. հունվարի 4-24-ն ընկած ժամանակահատվածում: Ըստ կուրսերի և առարկաների՝ ժամանակացույցներն ուղարկվել են ամբիոններ՝ քննարկումների և հնարավոր փոփոխությունների նպատակով: Այնուհետև հաստատվել և տեղադրվել են մասնաճյուղի պաշտոնական կայքէջում, դրանց մասին իրազեկվել են դասախոսները և ուսանողները:

Ըստ ԵՊՀ ԻՄ-ի 2022-26 թթ. ՌԾ-ի ժամանակացույցի՝ ստորաբաժանումների տարեկան հաշվետվությունների ներկայացման ընթացքի մասին նշվեց, որ ԵՊՀ Իջևանի մասնաճյուղի բոլոր ստորաբաժանումները ս.թ. նոյեմբերի 30-ի դրությամբ ներկայացրել են ընդունված ձևաչափով իրենց հաշվետվությունները՝ մասնաճյուղի ռազմավարական ծրագրի կարճաժամկետ (2022թ. ապրիլ – դեկտեմբեր) պլանի կատարողականի վերաբերյալ: Ստորաբաժանումների կողմից ներկայացված հաշվետվությունների հիման վրա կազմվել է ՌԾ-ի կարճաժամկետ պլանի կատարողականի վերաբերյալ մասնաճյուղի հաշվետվությունը, որը տնօրենը ներկայացնելու է ԵՊՀ ԻՄ-ի գիտական խորհրդի հերթական նիստում:

Հաջորդ հարցի կապակցությամբ նշվեց, որ հեռակա ուսուցման համակարգում 2022-23 ուստարվա առաջին կիսամյակի դասապրոցեսը պատշաճ իրականացվել է, սակայն նախապատրաստական աշխատանքների փուլում առաջացել էին որոշ խնդիրներ՝ կապված ըստ կուրսերի և խմբերի լսարանային ֆոնդի ճիշտ և օպտիմալ բաշխվածության, վերջնական դասացուցակների ներկայացման հետ:

2022-2023 ուստարվա երկրորդ կիսամյակի դասապրոցեսի կազմակերպման և անցկացման ժամանակ նշված բարդությունները բացառելու նպատակով Ուսումնամեթոդական վարչության պետի կողմից առաջարկվեց և տնօրենի կողմից դեկաններին հանձնարարվեց մինչև 2023թ. հունվարի 10-ը դասացուցակները կազմել և ներկայացնել Ուսումնամեթոդական վարչություն:

«ԵՊՀ ԻՄ-ի ներքին կարգապահական կանոններ»-ի 62-րդ դրույթի 4-րդ կետի համաձայն՝ հեռակա ուսուցման համակարգում կիսամյակի ընթացքում 80 և ավելի ժամ անհարգելի բացակայություններ ունեցող մի շարք ուսանողներ հեռացվեցին մասնաճյուղից:

 2022թ. հոկտեմբերի 21-ին ԵՊՀ ԻՄ-ում Ա.Մակարյանի նախագահությամբ տեղի ունեցավ տնօրենության նիստ, որին մասնակցում էին տնօրենության անդամները, հրավիրված էր Ուսումնամեթոդական վարչության ուսումնական գործընթացի կազմակերպման և վերահսկման բաժնի վարիչ Ն.Առուշանյանը:

Նիստում քննարկվեցին 2022-2023 ուստարվա 1-ին կիսամյակի հետազոտական աշխատանքների կազմակերպմանը, առաջին ընթացիկ ստուգումների և քննությունների նախապատրաստական աշխատանքներին, հեռակա ուսուցման բակալավրի և մագիստրատուրայի առաջին կիսամյակի ուսումնական պարապմունքների և պրակտիկաների կազմակերպմանը, ավարտական աշխատանքների թեմաների հաստատման ընթացքին, 2021-2022 ուստարում ուսանողների և դասախոսների վերհանված խնդիրների և կարիքների լուծումներին, բակալավրի հեռակա ուսուցման ուսանողների իրավունքների վերականգնմանը վերաբերող հարցեր: Հաստատվեցին որոշ տարակարգերի աշխատողների համար աշխատանքի նկարագրերը:

2022-2023 ուստարվա 1-ին կիսամյակի հետազոտական աշխատանքների կազմակերպման ընթացքի մասին նշվեց, որ առկա ուսուցման համակարգում հետազոտական բաղադրիչ պարունակող դասընթացների ընդհանուր թիվը 31 է, իսկ հեռակա ուսուցման համակարգում՝ 19: Այս կիսամյակի առաջին շաբաթվա ընթացքում Կրթական բարեփոխումների և դասախոսների վերապատրաստման բաժնի կողմից հիշեցման կարգով նամակներ են ուղարկվել ամբիոնների վարիչներին, կրթական ծրագրերի ղեկավարներին, դեկաններին և գործավարներին, որ ԵՊՀ-ի բակալավրի և մագիստրոսական կրթական ծրագրերի մասնագիտական դասընթացներում հետազոտական աշխատանքների կատարման կարգի 13-րդ կետի համաձայն՝ ամբիոններում երրորդ շաբաթվա ընթացքում պետք է հաստատել հետազոտական աշխատանքների թեմաները և ներկայացնել ուսանողներին: Չորրորդ շաբաթվա ընթացքում բոլոր ամբիոնները բաժին են ուղարկել առկա ուսուցման համակարգի հետազոտական աշխատանքների թեմաների և այդ թեմաներն ընտրած ուսանողների ցանկը՝ ամբիոնների համապատասխան նիստի արձանագրության քաղվածքներով:

Բաժնի կողմից հավաքագրվել են նաև հեռակա ուսուցման համակարգի հետազոտական բաղադրիչ պարունակող դասընթացները վարող դասախոսների տվյալները, ինչպես նաև ամբիոններից պահանջվել է, որ ամբիոնների համապատասխան նիստերում քննարկեն հեռակա ուսուցման համակարգի հետազոտական աշխատանքների թեմաները:

ԿԲԴՎ բաժինը կազմակերպել է 2022-2023 ուսումնական տարվա 1-ին կիսամյակում հետազոտական բաղադրիչ պարունակող դասընթացները վարող դասախոսների հետ առցանց հանդիպում-քննարկումներ, որոնք վարել է ԵՊՀ ԻՄ-ի տնօրենի պաշտոնակատար  Ա.Մակարյանը: Հանդիպումների ընթացքում քննարկվել են հետազոտական թեմաների ընտրության, աշխատանքների պատրաստման, դրանց ներկայացման և գնահատման չափանիշները: Սեպտեմբերին բաժնի կողմից կազմակերպվել է նաև ուսանողների հետ հանդիպում, որի ժամանակ նախ քննարկվել են ուսանողների կողմից բարձրաձայնված խնդիրները, ապա ներկայացվել է հետազոտական աշխատանք պատրաստելու կարգը, մեթոդները: Նախատեսվում է նման հանդիպում կազմակերպել նաև նոյեմբերին:

2022-2023 ուստարվա առաջին ընթացիկ ստուգումների և քննությունների նախապատրաստական աշխատանքների վերաբերյալ նշվեց, որ դրանք կազմակերպվել են՝ համաձայն ժամանակացույցի: Քննաշրջանն իրականացվելու է 2022թ. հոկտեմբերի 27-ից մինչև նոյեմբերի 2-ը: Ամբիոններում քննարկումներից հետո ֆակուլտետների դեկանները Ուսումնամեթոդական վարչություն են ներկայացրել ընթացիկ ստուգումների և քննությունների կազմակերպման ժամանակացույցները, դրանք տեղադրվել են պաշտոնական կայքէջում, և դրանց մասին տեղեկացվել է դասախոսներին և ուսանողներին: Ֆակուլտետներին են տրամադրվել քննությունների համար նախատեսված տետրերը: Իրականացվել են նախապատրաստական այլ անհրաժեշտ աշխատանքներ, և ԵՊՀ Իջևանի մասնաճյուղը պատրաստ է քննաշրջանի իրականացմանը:

Ըստ հաստատված ժամանակացույցի՝ 2022-2023 ուստարվա առաջին կիսամյակի հեռակա ուսուցման բակալավրի ուսումնական պարապմունքները կսկսվեն ս.թ. նոյեմբերի 1-ից, մագիստրատուրայի դասերը կմեկնարկեն նոյեմբերի 15-ից:

Մասնաճյուղում 2022-2023 ուստարվա պրակտիկաների կազմակերպման ընթացքի մասին նշվեց, որ առաջին կիսամյակում, ըստ բակալավրի և մագիստրատուրայի աշխատանքային ուսումնական պլանների, նախատեսված է եղել 13 պրակ­տիկա (առկա ուսուցման համակարգում` 4 ման­կավարժական, 1 մասնագիտական, 4 ուսումնական, հեռակա ուսուցման համակարգում` 2 մանկավարժական, 1 մասնագիտական, 1 գիտաման­կա­վարժական): Առկա ուսուցման պրակտիկաներն ընթացքի մեջ են:

«Տարրական մանկավարժություն և մեթոդիկա» և «Ռուսաց լեզու և գրականություն» կրթական ծրագրերի մանկավարժական պրակտիկաներն իրականացվում են Իջևանի թիվ 1 հիմնական դպրոցում: 3-րդ կուրսերի մանկավարժական պրակտիկաները կազմակերպվել են՝ ընդգրկելով կիսամյակի ողջ ընթացքը (շաբաթական մեկ օր), իսկ 4-րդ կուրսերի մանկավարժական պրակտիկաները կազմակերպվել են նախքան հանրակրթական դպրոցներում աշնանային արձակուրդները, 3 շաբաթ տևողությամբ և կիրականացվեն արձակուրդների ավարտից հետո ևս 3 շաբաթ տևողությամբ:

«Հոգեբանություն» կրթական ծրագրի 3-րդ կուրսի մասնագիտական պրակտիկան կազմակերպվել է «Հույսի կամուրջ» հասարակական կազմակերպության Իջևանի մասնաճյուղում` ընդգրկելով կիսամյակի ողջ ընթացքը (շաբաթական մեկ օր):

«Դիզայն» և «Դեկորատիվ-կիրառական արվեստ» կրթական ծրագրերի ուսումնական պրակտիկաները կազմակերպվել են մասնաճյուղում և  դասացուցակում եղել են արտահայտված:

Հեռակա ուսուցմամբ նախատեսված պրակտիկաների կազմակերպման համար կատարվում են նախապատրաստական աշխատանքներ:

Ավարտական աշխատանքների թեմաների հաստատման ընթացքի կապակցությամբ դեկանները նշեցին, որ ամբիոնային նիստերում քննարկվել են դրանք, իրականացվել են անհրաժեշտ շտկումներ և փոփոխություններ, որոշ ֆակուլտետների գիտական խորհուրդների նիստերում արդեն հաստատվել, մյուսներում առաջիկայում կհաստատվեն դրանք: ԵՊՀ ԻՄ-ի տնօրենի պաշտոնակատար Ա.Մակարյանն ընդգծեց, որ գործընթացի պատասխանատուները հետևողական լինեն, որ ավարտական աշխատանքների թեմաները լիովին համապատասխանեն մասնագիտություններին, կրթական ծրագրերի վերջնարդյունքներին, այդ հարցում կարևորեց նախնական անոտացիաների պատրաստման անհրաժեշտությունը:

2021-2022 ուստարում ուսանողների և դասախոսների վերհանված խնդիրների և կարիքների լուծումների վերաբերյալ նշվեց, որ 2021-2022 ուստարում Մասնագիտական կրթության որակի ապահովման բաժինը տարբեր մեխանիզմներով վերհանել է դասախոսների և ուսանողների մի շարք կարիքներ և խնդիրներ: Դրանք բավարարելու և լուծումներ գտնելու նպատակով բաժինն այդ խնդիրները տրոհել և խմբավորվել է ըստ պատասխանատվության և ընթացիկ ուստարվա սկզբին ուղարկել բոլոր ստորաբաժանումներին: Ստորաբաժանումները կազմել են ներառված խնդիրների լուծման իրենց ծրագրերը՝ համապատասխան քայլերով, ակնկալիքներով և ժամկետներով հանդերձ:

Հավաքագրված խնդիրների մեծ մասը վերաբերում է ամբիոններին, որոնց պատճառների հստակեցման, դրանց հնարավոր լուծման համար ամբիոնները նախատեսել են ուսանողների և դասախոսների հետ անցկացնել հանդիպում-քննարկումներ: Ա.Մակարյանը առաջարկեց կազմակերպել հանդիպումներ ամբիոնների վարիչների և կրթական ծրագրերի ղեկավարների հետ՝ խնդիրների լուծման առաջարկվող քայլերը հստակեցնելու և ավելի արդյունավետ դարձնելու համար:

Իրենց գործունեությանն առնչվող խնդիրների լուծման ծրագրեր են ներկայացրել նաև ԵՊՀ ԻՄ-ի գրադարանը, Տնտեսական գործունեության կազմակերպման և սպասարկման բաժինը, Կրթական բարեփոխումների և դասախոսների վերապատրաստման բաժինը, Մասնագիտական կրթության որակի ապահովման բաժինը և Ուսումնամեթոդական վարչությունը:

ՄԿՈԱ բաժինն այդ ծրագրերի իրականացման արդյունքները, համեմատելով նոր հավաքագրված խնդիրների հետ, կամփոփի ընթացիկ ուստարվա վերջում, և ուսանողների ու դասախոսների բավարարվածության դինամիկան թույլ կտա պարզելու, թե որքանով են այդ ծրագրերը եղել արդյունավետ:

ԵՊՀ ԻՄ-ի բակալավրի հեռակա ուսուցման համակարգում ուսանողների իրավունքների վերականգնման ընթացքի մասին նշվեց, որ 15 նախկին ուսանողներ դիմել են ԵՊՀ ԻՄ-ի բակալավրի հեռակա ուսուցման համակարգում իրենց ուսանողական իրավունքները վերականգնելու համար: Ուսումնամեթոդական վարչության կողմից ստուգվել են ուսանողների վերականգնման դեպքում առաջացած առարկայական տարբերություններով պայմանավորված  կրեդիտների քանակները և նրանց ներկայացրած փաստաթղթերի համապատասխանությունը ՀՀ բարձրագույն ուսումնական հաստատությունների ուսանողների հեռացման (ազատման) և վերականգնման կարգին:

ՀՀ բարձրագույն ուսումնական հաստատությունների ուսանողների հեռացման (ազատման) և վերականգնման կարգի III մասի կետերին համապատասխան՝ որոշվեց վերականգնել ԵՊՀ ԻՄ-ի 15 նախկին ուսանողների ուսանողական իրավունքները: