2021թ. դեկտեմբերի 18-ին Ա.Մակարյանի նախագահությամբ ԵՊՀ Իջևանի մասնաճյուղում տեղի ունեցավ տնօրենության նիստ, որին մասնակցում էին տնօրենության անդամները, հրավիրված էր Տեղեկատվական համակարգերի սպասարկման և զարգացման բաժնի վարիչ Տ.Խաչատրյանը:

Առաջին հարցի՝ հեռակա ուսուցման՝ 2021-2022 ուստարվա 1-ին կիսամյակի դասապրոցեսի կազմակերպման և առաջին ընթացիկ քննությունների ու ստուգումների վերաբերյալ զեկուցեց Ուսումնամեթոդական վարչության պետ Ա.Դավթյանը: Նա նշեց, որ հեռակա ուսուցման բակալավրի՝ 2021-2022 ուստարվա առաջին կիսամյակի դասապրոցեսն իրականացվել է ըստ հաստատված ժամանակացույցի՝ ս.թ. նոյեմբերի 2-ից մինչև դեկտեմբերի 11-ը: Դասապրոցեսը հիմնականում իրակականացվել է առկա տարբերակով՝ բացառությամբ մի քանի դասերի: Հեռակա ուսուցման համակարգում նախորդ տարիներին դասերը հիմնականում իրականացվել են 2-րդ հերթափոխով, սակայն այս ուստարում դասապրոցեսն իրականացվել է առկա ուսուցման հետ համատեղ: Մասնաճյուղի լսարանային ֆոնդը բավարարել է այդպես կազմակերպելու համար: Հաշվի առնելով հեռակա ուսուցման ուսանողների բեռնվածությունը աշխատանքային առումով՝ կազմակերպվել են համապատասխան գրություններ՝ իրենց աշխատանքային վայրեր ներկայացնելու համար, որպեսզի աշխատավայրերից ունենան բացակայելու և դասերին ներկայանալու հնարավորություն: Որոշ կուրսերում ուսանողների հաճախումները բավարար չէին, ուստի բաժնի կողմից շուրջ 170 ուսանողի տրվել է նկատողություն, որից 124-ը տնօրենի կողմից ստացել է խիստ նկատողություն:

Երկրորդ հարցի՝ 2021-2022 ուստարվա բակալավրի առկա և մագիստրատուրայի հեռակա համակարգերում 1-ին կիսամյակի քննաշրջանի և 2-րդ ընթացիկ քննությունների նախապատրաստական աշխատանքների մասին զեկուցեցին Ա.Դավթյանը, Ա.Մարգարյանը և ֆակուլտետների դեկանները:

Մասնավորապես նշվեց, որ 2021-2022 ուստարվա առաջին կիսամյակի 1-ին ընթացիկ քննություններն ընթացքի մեջ են: Ըստ գործող ժամանակացույցի՝ դրանք սկսվել են ս.թ դեկտեմբերի 14-ից և կտևեն  մինչև 25-ը: Քննություններն ու ստուգումները իրականացվում են միայն առկա տարբերակով: Քննաշրջանին մասնակցելու թույլտվություն չունեն այն ուսանողները, որոնք 50%-ից պակաս են վճարել ուսման վարձը: Ըստ գործող ժամանակացույցի՝ ձմեռային քննաշրջանը տևելու է ս.թ. դեկտեմբերի 22-ից մինչև 2022թ. հունվարի 29-ը:

Ֆակուլտետների կողմից կազմվել են քննաշրջանի գրաֆիկներն ըստ կուրսերի և օրերի, դրանք ստուգվել են Ուսումնամեթոդական վարչության կողմից, կատարվել են շտկումներ, տեղադրվել են կայքում, իրազեկվել են դասախոսները և ուսանողները: Մասնաճյուղը պատրաստ է 2021-2022 ուստարվա առաջին կիսամյակի քննաշրջանի իրականացմանը:

Հեռակա ուսուցման մագիստրատուրայի քննաշրջանն իրականացվելու է 2021թ. դեկտեմբերի 22-ից  2022թ. հունվարի 25-ը ժամանակահատվածում: Իրականացվել են անհրաժեշտ նախապատրաստական աշխատանքներ՝ քննաշրջանը պատշաճ իրականացնելու համար:

Երրորդ հարցի՝ Տեղեկատվական համակարգերի սպասարկման և զարգացման բաժնի տարեկան գործունեության հաշվետվության և 2022թ. պլանների վերաբերյալ զեկուցեց բաժնի վարիչ Տ.Խաչատրյանը: Նա նշեց, որ հաշվետու՝ 2021թ. սեպտեմբեր-դեկտեմբեր ժամանակահատվածում ՏՀՍԶ բաժինն աշխատել է խնդիրներին արագ արձագանքման ռեժիմով, օժանդակել է ուսումնական գործընթացին, ապահովել համակարգչային տեխնիկայի ծրագրային և տեխնիկական սպասարկումը, իրականացրել բաժնի գործառույթները:

Մասնավորապես՝ փոխարինվել են խափանված համակարգիչներ, տպիչ սարքեր, համակարգչային մկնիկներ, ստեղնաշարեր, ձևափոխիչներ, ցանցային մալուխներ, կոնեկտորներ: Որոշ համակարգիչների ծրագրային ապահովումը փոխարինվել է ավելի բարձրով, որոշ դեպքերում՝ խափանումների պատճառով: Հնարավորինս կատարվել են Microsoft-ի ակտիվացիաները: Հյուրանոցային համալիրում եղել է ինտերնետի խնդիր, սարքը փոխարինվել է:

Համակարգչային սրահների, տեսասարքով լսարանների, աշխատակազմի համակարգիչները և մյուս համակարգչային տեխնիկան հաշվետու ժամանակահատվածում եղել են հսկողության տակ, ծրագրային ու տեխնիկական տեսակետից նորմալ վիճակում, թարմացվել են ծրագրերը: Կիրառական արվեստի ֆակուլտետում հերթական անգամ վերատեղադրվել են մասնագիտական ծրագրերը: Առաջացած խափանումներն ուղղվել են: Ընթացքի մեջ է Ռոբոտրոնիկայի լաբորատորիայի համակարգիչների ծրագրային ապահովման իրականացումը:

Տեղադրվել, վերատեղադրվել, ըստ անհրաժեշտության՝ թարմացվել և հսկվել են ցանցային աշխատող Nod հակավիրուսային, Հաշվապահության, ԱԿԻԱ բաժնի, ուսումնական SuperVisiօn ծրագրերը: SuperVisiօn ծրագրի TrustedIP դաշտը մաքրվել է ավելորդ IP-ներից:

ԵՊՀ-ում գտնվող սերվերի կարգավորումներում փոփոխություններ են արվում, որոնք տեղադրվում են բոլոր համակարգիչների վրա:

Ինտերնետ կապը մշտապես եղել է հսկողության տակ, եղել են կարճատև ընդհատումներ, որոնք հնարավորինս արագ վերականգնվել են: Փաստացի, մենք սպառում ենք ինտերնետի պահանջված ամբողջ ծավալը, օրվա առաջին կեսին արագությունը թուլանում է, անհրաժեշտ է այդ ժամերին գոնե սահմանափակել ինտերնետի ոչ նպատակային սպառումը:

Ուսումնական տարվա սկզբում վերաբաշխվել են եղած Zoom-երը, շտկվել թերությունները, անունները, ստեղծվել են նորերը, պարբերաբար ստուգվել է դրանց աշխատունակությունը: Բաժինը տեխնիկապես օժանդակել է առցանց դասերի, դասընթացների, հանդիպումների կազմակերպմանը:

Իրականացվել է կայքի տեխնիկական սպասարկումը: Խնդիրներ ենք ունենում  մասնաճյուղի կայքի IP-ի արգելափակման հետ կապված, դիմել ենք ԵՊՀ:

Պատրաստ են և ուղարկված դասախոսների ԵՊՀ էլեկտրոնային հասցեները: Առաջին կուրսի ուսանողների ԵՊՀ էլեկտրոնային հասցեները դեռևս պատրաստ չեն:

Տպիչ սարքերի սպասարկման որակը բարձրացել է: Ձեռք են բերվել տպիչների սպառվող նյութեր՝ մասնավորապես համապատասխան տոներներ և արագ մաշվող մասեր: Բաժինների կողմից տպիչ սարքերի փոխարինման որոշ հայտեր են հետ ուղարկվել: Վաղ ձեռքբերված սարքերն աստիճանաբար խափանվում են և փոխարինման կարիք ունեն, ինչն ընթացքի մեջ է: Ընթացքում սարք է հատկացվել: Որոշ դեպքերում խնդիրներին տրվել են իրավիճակային լուծումներ, և աշխատանքը չի տուժել:

Գնումների, մատակարարման և պահեստավորման բաժին են ներկայացվել անհրաժեշտ սարքավորումների ցուցակները՝ տեխնիկական բնութագրերով և հնարավոր  գներով՝ նյութական միջոցների հնարավորության սահմաններում հետևելու գնումների գործընթացին: Որոշ հայտեր մրցույթի արդյունքում մերժվել են՝ մասնավորապես գների արագ աճի հետևանքով:

2022թ. պլանների հետ կապված՝ Տ.Խաչատրյանը նշեց, որ բաժնի կողմից 2022թ.  նախատեսվել է իրականացնել հետևյալ գործընթացները.

• ԵՊՀ ուսուցման կառավարման moodle համակարգին միանալու կազմակերպում,
• կայքի արդիականացում՝ բաժնի մասով,
• տեսավերահսկման ցանցի վերականգնում և ընդլայնում,
• նոր տպիչ տեխնիկայի ձեռքբերում,
• նոր համակարգիչների ձեռքբերում, վերաբաշխում,
• առցանց եղանակով իրակա­նաց­վող դասընթաց­ների կանոնա­կարգում, հնարավորություն տրվելու դեպքում առցանց հանդիպումների կազմակերպմանը օժանդակում,
• ԵՊՀ ԻՄ-ի՝ 2022-2026 թթ. զարգացման ռազմավարական ծրագրով նախատեսված գործողությունների իրականացում:

Տնօրենության կողմից ՏՀՍԶ բաժնին առաջարկվեց տարվա կտրվածքով վերհանել ոչ միայն իրենց բաժնի, այլև ամբողջ մասնաճյուղի տեխնիկական սպասարկմանն ու զարգացմանն առնչվող կարիքները և տվյալ տարեվերջին սահմանված ժամկետներում ներկայացնել պահանջագիր՝ հաջորդ տարվա գնումների պլանում ընդգրկելու նպատակով:

Նիստին ներկայացված զեկուցումներն ընդունվեցին ի գիտություն:

2021թ. նոյեմբերի 24-ին ԵՊՀ Իջևանի մասնաճյուղում կայացավ տնօրենության ընդլայնված նիստ, որը նախագահում էր Ա.Մակարյանը, մասնակցում էին տնօրենության անդամները, հրավիրված էին ԵՊՀ ԻՄ-ում հերթական ատեստավորման ենթակա ուսուցիչների վերապատրաստման ծրագրի համակարգող Ա.Սարգսյանը, Կրթական բարեփոխումների և դասախոսների վերապատրաստման բաժնի վարիչ Ն.Գրիգորյանը:

Տնօրենության նիստում քննարկվեցին օրակարգային երկու և ընթացիկ հինգ հարցեր:

Առաջին հարցի՝ դասալսումների արդյունքների վերաբերյալ ֆակուլտետների դեկանները նշեցին, որ ամբիոնների վարիչների կողմից իրականացվող և դասախոսների փոխադարձ դասալսումներն անցկացվում են ըստ գործող ժամանակացույցների: Կան դասալսումների օրերի որոշ փոփոխություններ՝ կապված նոյեմբերի 2-16-ը ժամանակահատվածում ուսումնական պարապմունքներն առցանց իրականացնելու հետ: Մի քանի ամբիոնների վարիչներ, նպատակահարմար համարելով դասալսումներն իրականացնել տեղում՝ առկա եղանակով, առաջարկել և հետաձգել են տվյալ ժամանակահատվածում նախատեսված որոշ դասալսումների օրեր: Այս հարցի կապակցությամբ ԵՊՀ ԻՄ-ի տնօրենի պաշտոնակատար Անուշավան Մակարյանը դեկաններին հանձնարարեց հետևողական լինել, որ ամբիոնների վարիչների և դասախոսների փոխադարձ դասալսումներն իրականացվեն՝ ըստ հաստատված ժամանակացույցների, լրացվեն դասալսման գրանցամատյանները, դասի գնահատման հարցաթերթիկները և դասալսման արդյունքների վերլուծության ձևաչափերը, կազմակերպվեն քննարկումներ ամբիոնների նիստերի ժամանակ:

Որոշվեց՝ դասալսումների արդյունքների մասին դեկանների զեկուցումներն ընդունել ի գիտություն:

Երկրորդ հարցի՝  ԵՊՀ ԻՄ-ի 2022թ. նախահաշվի մշակման ընթացքի և ուսանողների ուսման վճարների մուծման դինամիկայի մասին զեկուցեց գլխավոր հաշվապահ Մելանյա Մխիթարյանը: Նա մասնավորապես նշեց, որ ԵՊՀ ԻՄ-ի՝ 2022թ. նախահաշվի մշակման աշխատանքներն ընթացքի մեջ են: Հանձնարարվել էր բոլոր բաժիններին ԵՊՀ ԻՄ-ի գնումների, մատակարարման և պահեստավորման բաժին ու հաշվապահություն ներկայացնել, թե տարվա կտրվածքով ինչ է անհրաժեշտ իրենց բաժիններին:

Վճարների մուծման դինամիկայի հետ կապված՝ զեկուցողը ներկայացրեց, որ ս.թ. նոյեմբերի 1-ի դրությամբ բակալավրի վճարովի առկա ուսուցման համակարգի 420 ուսանող պետք է մուծեր 2021-2022 ուստարվա 1-ին կիսամյակի ուսման վճարի 75%-ը (58.5 միլիոն ՀՀ դրամ), սակայն մուծել է դեռևս 44.5 միլիոն (14 միլիոն պակաս) ՀՀ դրամ: Բակալավրի հեռակա ուսուցման համակարգի դրական ստացած 113 ուսանողներից 110-ը մուծել է ուսման վճարը և հրամանագրվել որպես ուսանող: Հեռակա ուսուցման մագիստրատուրայի առաջին կուրսի բոլոր 14 ուսանողներն էլ մուծել են ուսման վճարը և հրամանագրվել: Ընդհանուր առմամբ ԵՊՀ ԻՄ-ի հեռակա ուսուցման համակարգի ուսանողների ուսման վճարների մուծման գործընթացը դանդաղ է: Ունենք նաև առկա ուսուցման համակարգի ուսանողներ, ովքեր դարձյալ չեն մուծել ուսման վճարը:

Որոշվեց՝ ԵՊՀ ԻՄ-ի 2022թ. նախահաշվի մշակման ընթացքի և ուսանողների ուսման վճարների մուծման դինամիկայի մասին Մ.Մխիթարյանի զեկուցումն ընդունել ի գիտություն:

Ընթացիկ առաջին հարցի՝ ԵՊՀ ԻՄ-ի զարգացման՝ 2021-2026 թթ. ռազմավարական ծրագրի մշակման ընթացքի մասին Մարիետա Ճաղարյանը նշեց, որ ԵՊՀ ԻՄ-ի զարգացման՝ 2021-2026 թթ. ռազմավարական ծրագրի մշակման  հանձնաժողովը ս.թ. սեպտեմբեր-նոյեմբեր ամիսներին արդյունավետ աշխատել է փաստաթղթի մշակման վրա: Մշակվող ՌԾ-ում որպես նպատակ ներկայացված են զարգացման 3 ուղղություններ՝ բարձրորակ կրթություն, գիտություն և նորարարություն, հանրային ներգրավում: Հանձնաժողովն աշխատել է 3 խմբերով, պարբերաբար կազմակերպվել են հանդիպում-քննարկումներ, որոնց ընթացքում  վերջնական ձևավորվել են յուրաքանչյուր նպատակի իրականացման համար անհրաժեշտ խնդիրները, այդ խնդիրների իրականացման համար մշակվել են գործողություններ և վերջնարդյունքի գնահատաման ցուցիչներ: Այժմ հիմնականում իրականացվում են խմբագրման և ցուցիչների հստակեցման աշխատանքներ: Առաջիկա շաբաթվա ընթացքում 1-ին և 3-րդ խմբերը կշարունակեն խմբագրման աշխատանքները, որից հետո հանձնաժողովը կաշխատի միասնական կազմով, և ծրագիրը կբերվի վերջնական տեսքի: Ապա մինչև դեկտեմբերի 20-ը հանձնաժողովը կկազմի նաև ԵՊՀ ԻՄ-ի ռազմավարական ծրագրի իրականացման ժամանակացույց-պլանը:

Ընթացիկ երկրորդ հարցի՝ ԵՊՀ ԻՄ-ում հերթական ատեստավորման ենթակա ուսուցիչների վերապատրաստման դասընթացների կազմակերպման ընթացքի և արդյունքների մասին զեկուցեց վերապատրաստման ծրագրի համակարգող Ասյա Սարգսյանը: Նա նշեց, որ 2021թ. ապրիլի 2-ին ՀՀ ԿԳՄՍՆ կողմից հայտարարված մրցույթում ԵՊՀ ԻՄ-ը, ներկայացնելով հայտադիմումի փաթեթ, հաղթել է և հնարավորություն ստացել իրականացնելու Տավուշի մարզի ատեստավորման ենթակա ուսուցիչների վերապատրաստումները բոլոր բաղադրիչներով հայոց լեզու և գրականություն, ռուսերեն, պատմություն, մաթեմատիկա, ֆիզիկա, քիմիա, կենսաբանություն, աշխարհագրություն, տեխնոլոգիա և ՆԶՊ առարկաների համար: Սահմանվել է, որ դասընթացներն իրականացվելու են ՀՀ կառավարության՝ 2012 թվականի դեկտեմբերի 27-ի N1667-Ն որոշման 14-րդ կետի պահանջին համապատասխան՝ մինչև 2021 թվականի նոյեմբերի 30-ը:

Վերապատրաստումն իրականացվել է առկա և առցանց, ինչպես նաև համակցված մեթոդով (2 ձևերի համադրմամբ), 110 ժամ տևողությամբ: Մասնակիցների ընտրությունը կատարվել է կարգին համապատասխան՝ վերջին 5 տարում առնվազն 2 տարվա ընթացքում վերապատրաստումների մասնակցության փորձ՝ ղեկավար կամ մանկավարժական կադրերի պատրաստման կամ վերապատրաստման ոլորտում: Դասընթացներին մասնակցել է 75 ուսուցիչ:

Դասընթացի առցանց իրականացման պայմանների առկայությունը և համապատասխանությունը ծրագրի իրականացման պահանջներին պահպանված էին: Հաղորդակցումը և համագործակցությունը գերազանց էր: Ուսուցիչների մոտիվացիան բավարար էր: Ծրագրված աշխատանքն իրականացվել է բարձր մակարդակով: Լսարանում կարևորվել է ոչ միայն կարգ ու կանոնը, այլև խրախուսվել է դասընթացին վերապատրաստվողների ակտիվ մասնակցությունը, կառուցողականությունը, համագործակցությունը և հանդուրժողականությունը:

Ընթացիկ երրորդ հարցի՝ ԵՊՀ ԻՄ-ի կրթական ծրագրերի ղեկավարների գործունեության կարգի նախագծի վերաբերյալ զեկուցեց Կրթական բարեփոխումների և դասախոսների վերապատրաստման բաժնի վարիչ Նաթելլա Գրիգորյանը: Նիստում առաջարկվեց նախագիծն ուղարկել ոչ միայն տնօրենության անդամներին, այլև համապատասխան ստորաբաժանումներին և կրթական ծրագրերի ղեկավարներին՝ նրանց կողմից դիտարկումներ ու առաջարկություններ ստանալու և լրամշակման ընթացքում դրանք կարգում ընդգրկելու նպատակով:

Ընթացիկ չորրորդ հարցի՝ հեռակա ուսուցման համակարգում մագիստրատուրայի դասապրոցեսի ընթացքի մասին զեկուցեց հեռակա ուսուցման մագիստրատուրայի «Դպրոցական մանկավարժություն և մեթոդիկա»  կրթական ծրագրի համակարգող Ալեքսան Մարգարյանը: Նա նշեց, որ ԵՊՀ ԻՄ-ի հեռակա ուսուցման մագիստրատուրայի՝ 2021-2022 ուստարվա առաջին կիսամյակի ուսումնական պարապմունքները մեկնարկել են ս.թ. նոյեմբերի 15-ից և տևելու են մինչև դեկտեմբերի 4-ը: Դասացուցակները հաստատվել և տեղադրվել են ԵՊՀ ԻՄ-ի պաշտոնական կայքում, այդ մասին իրազեկվել են ուսանողները և դասախոսները: Դասերն իրականացվում են ըստ հաստատված դասացուցակների, առցանց եղանակով՝ Zoom հարթակում: Ըստ ուսումնական պլանի՝ ընթացքի մեջ են մագիստրատուրայի երկրորդ կուրսի ուսանողների ուսումնական պրակտիկան և մագիստրոսական թեզերի աշխատանքները:

Ընթացիկ հինգերորդ՝ մասնաճյուղից ուսանողի հեռացման հարցի վերաբերյալ զեկուցեց Ուսումնամեթոդական վարչության պետ Արկադի Դավթյանը: Նա տնօրենությանն էր ներկայացրել ԵՊՀ ԻՄ-ից ուսանողի հեռացման մասին զեկուցագիր՝ հայտնելով, որ հեռակա ուսուցման «Զբոսաշրջություն» կրթական ծրագրի 5-րդ կուրսի ուսանողուհի Աննա Արտակի Դավթյանը արտերկրում գտնվելու պատճառով չի մասնակցել 2021-2022 ուստարվա 1-ին կիսամյակում (ս.թ. հոկտեմբերի 5-30-ը) կազմակերպված արտադրական պրակտիկային և ենթակա է հեռացման:

Հիմք ընդունելով ՈՒՄՎ պետ Ա.Դավթյանի զեկուցագիրը և ԵՊՀ ԻՄ-ի ուսանողների պրակտիկայի կազմակերպման և անցկացման կարգի 4-րդ դրույթի 20-րդ կետը` հեռակա ուսուցման «Զբոսաշրջություն» կրթական ծրագրի 5-րդ կուրսի ուսանողուհի Աննա Արտակի Դավթյանը հեռացվեց մասնաճյուղից:

 2021թ. հոկտեմբերի 29-ին ԵՊՀ Իջևանի մասնաճյուղում կայացավ տնօրենության ընդլայնված նիստ, որը նախագահում էր Ա.Մակարյանը, մասնակցում էին տնօրենության անդամները, հրավիրված էին վարչական որոշ ստորաբաժանումների ղեկավարներ՝ Ուսումնամեթոդական վարչության ուսումնական գործընթացի կազմակերպման և վերահսկման բաժնի վարիչ Ն.Առուշանյանը, Տեղեկատվական համակարգերի սպասարկման և զարգացման բաժնի վարիչ Տ.Խաչատրյանը:

Տնօրենության նիստում քննարկվեցին օրակարգային հետևյալ հարցերը.

1. ԵՊՀ ռեկտորի պաշտոնակատարի՝ 2021թ. հոկտեմբերի 26-ի  «Ուսումնական գործընթացն առցանց կազմակերպելու մասին» թիվ 199/7 հրամանից բխող գործողությունների ընթացքը (զեկուցողներ՝ Ա.Մակարյան, Ա.Դավթյան, Տ.Խաչատրյան):
2. Հաղորդում ուսանողների կրթական և այլ կարիքների վերհանման, մատուցվող ծառայություններից նրանց բավարարվածության գնահատման մասին (զեկուցող՝ Մ.Ճաղարյան):
3. Ավարտական աշխատանքների կատարման ընթացքի մասին (զեկուցողներ՝ ֆակուլտետների դեկաններ, Ա.Մարգարյան):
4. Ընթացիկ հարցեր.

5.1. ՀՀ առողջապահության նախարարի՝ 2020 թվականի օգոստոսի 4-ի N 17-Ն հրամանի կատարումն ապահովող միջոցառումների կատարման ընթացքի մասին (COVID-19) (զեկուցողներ՝ Ա.Մակարյան, Վ.Եգանյան):

5.2. ԵՊՀ ԻՄ-ի ուսանողների ուսանողական իրավունքները վերականգնելու մասին (զեկուցող՝ Ն.Առուշանյան):

5.3. Մասնաճյուղից ուսանողի հեռացման հարցի քննարկում (զեկուցող՝ Ն.Առուշանյան):

Առաջին հարցի վերաբերյալ զեկուցող Ա.Դավթյանը մասնավորապես նշեց, որ ԵՊՀ ԻՄ-ի հեռակա ուսուցման բակալավրի՝ 2021-2022 ուստարվա առաջին կիսամյակի ուսումնական պարապմունքներն սկսվելու են ս.թ. նոյեմբերի 2-ից, իսկ հեռակա ուսուցման մագիստրատուրայի դասերը՝ նոյեմբերի 15-ից:

Նշվեց, որ դասացուցակները պատրաստ են, դրանք ուղարկվել են   դասախոսների և ուսանողների էլեկտրոնային հասցեներին, տեղադրվել են մասնաճյուղի կայքէջում: Դասերն իրականացվելու են Zoom հարթակում, ուսանողների համար նախատեսված հղումները նույնպես ներկայացված են դասացուցակներում: Կօգտագործվեն արդեն մշակված ուղեցույցները ուսանողների և դասախոսների համար: Այդ մասին հայտարարություն կդրվի ԵՊՀ ԻՄ-ի պաշտոնական կայքում:

Առկա և հեռակա ուսուցման բակալավրի դասերը մինչև նոյեմբերի 15-ն իրականացվելու են առցանց՝ հիմք ընդունելով ԵՊՀ-ի ռեկտորի պաշտոնակատար Հ.Հովհաննիսյանի՝ 26.10.2021թ. թիվ 199/7 և ԵՊՀ ԻՄ-ի տնօրենի պաշտոնակատար Ա.Մակարյանի՝ 27.10.2021թ. «Ուսումնական գործընթացն առցանց կազմակերպելու մասին» №163 §1 հրամանները:

Որոշվեց.

• ԵՊՀ ռեկտորի պաշտոնակատարի՝ 2021թ. հոկտեմբերի 26-ի  «Ուսումնական գործընթացն առցանց կազմակերպելու մասին» թիվ 199/7 հրամանից բխող գործողությունների ընթացքի մասին զեկուցողներ Ա.Մակարյանի, Ա.Դավթյանի և Տ.Խաչատրյանի զեկուցումներն ընդունել ի գիտություն:
• Հեռակա ուսուցման բակալավրի և մագիստրատուրայի՝ 2021-2022 ուսումնական տարվա առաջին կիսամյակի ուսումնական պարապմունքների կազմակերպման ընթացքը համարել բավարար:

Երկրորդ հարցի՝ ուսանողների կրթական և այլ կարիքների վերհանման, մատուցվող ծառայություններից նրանց բավարարվածության գնահատման մասին զեկուցող Մ.Ճաղարյանը նշեց, որ ԵՊՀ ԻՄ-ի մասնագիտական կրթության որակի ապահովման բաժինը տարբեր մեխանիզմներով (հարցումների, հանդիպումների միջոցով)  կատարել է ուսանողների կրթական կարիքների ուսումնասիրություն,  վերհանել է նրանց խնդիրները, հավաքագրել ներքին և արտաքին շահակիցների կատարած առաջարկները, կատարել է հավաքագրած տվյալների վերլուծություն և կազմել է խնդիրների ու առաջարկների ամփոփ փաթեթ: Հավաքագրված տվյալները, դրանց վերլուծությունները և ուսանողների բարձրաձայնած խնդիրներն ու առաջարկները բաժինն իր առաջարկների հետ միասին ուղարկել է բոլոր շահագրգիռ կառույցներին՝ ակնկալելով դրանց քննարկում և բարձրաձայնած խնդիրների վերաբերյալ առաջարկությունների և լուծումների առաջարկ:

Այս հարցի հետ կապված՝ պարոն Մակարյանն առաջարկեց տնօրենության նիստի քննարկմանը ներկայացնելուց առաջ ֆոկուս-խմբերի հետ կազմակերպել հարցումների արդյունքների վերաբերյալ քննարկումներ՝ խնդիրների իրական պատճառները պարզելու նպատակով և տնօրենությանը ներկայացնել խնդիրների լուծման առաջարկներ:

Որոշվեց՝ ուսանողների կրթական և այլ կարիքների վերհանման, մատուցվող ծառայություններից նրանց բավարարվածության գնահատման մասին Մ.Ճաղարյանի զեկուցումն ընդունել ի գիտություն:

Երրորդ հարցի՝ ավարտական աշխատանքների կատարման ընթացքի մասին զեկուցեցին ֆակուլտետների դեկանները, հեռակա ուսուցման մագիստրատուրայի «Դպրոցական մանկավարժություն և մեթոդիկա»  կրթական ծրագրի համակարգող Ա.Մարգարյանը: Նրանք մասնավորապես նշեցին, որ ավարտական աշխատանքների թեմաներն ամբիոններում քննարկվել և հաստատվել են, ըստ գործող կարգի՝ ուսանողները գրել են դիմումներ, և աշխատանքներն ընթացքի մեջ են: Հաշվի են առնվել նաև 2020թ. ամփոփիչ ատեստավորման հանձնաժողովների նախագահների դիտարկումներն ու առաջարկությունները՝ կապված ավարտական աշխատանքների թեմաների հետ: Ա.Մարգարյանը հավելեց, որ մագիստրոսական թեզերի թեմաները հաստատվել են անցած տարի, աշխատանքներն ընթացքի մեջ են:

Որոշվեց՝ ավարտական աշխատանքների կատարման ընթացքի մասին ֆակուլտետների դեկանների և Ա.Մարգարյանի զեկուցումներն ընդունել ի գիտություն:

Ընթացիկ առաջին հարցի՝ ՀՀ առողջապահության նախարարի՝ 2020 թվականի օգոստոսի 4-ի N 17-Ն հրամանի կատարումն ապահովող միջոցառումների կատարման ընթացքի մասին (COVID-19) զեկուցեցին Ա.Մակարյանը և Վ.Եգանյանը: Զեկուցողները մասնավորապես նշեցին, որ ՀՀ առողջապահության նախարարի՝ 2020թ. օգոստոսի 4-ի N17-Ն հրամանով սահմանված սանիտարական և ԵՊՀ ռեկտորի շրջաբերականով նախատեսված նոր կանոնների պահպանման նպատակով ԵՊՀ ԻՄ-ի տնօրենի պաշտոնակատարի կողմից 2021թ. հոկտեմբերի 2-ին տրված հրամանի համաձայն՝ Անձնակազմի կառավարման և իրավական ապահովման բաժնին հանձնարարվել էր սահմանված կարգով հավաքագրել մասնաճյուղի աշխատակիցների պատվաստման (առաջին և երկրորդ դեղաչափը ստանալու), թեստավորման (կորոնավիրուսային հիվանդության (COVID-19) ախտորոշման պոլիմերազային շղթայական ռեակցիայի հետազոտության (ՊՇՌ)), պատվաստման բժշկական հակացուցումների, հղիության վերաբերյալ անհրաժեշտ տվյալները:

Նշվեց, որ սանիտարահամաճարակային անվտանգության կանոններով սահմանված համապատասխան գրանցամատյանները պետք է պարբերաբար լրացվեն, կատարվի շաբաթական վերլուծություն, և ներկայացվի տեղեկատվություն: Նաև անհրաժեշտ է հետևել մասնաճյուղում հակահամաճարակային կանոնների խիստ պահպանմանը: Հաշվի առնելով թեստավորուման առաջին փուլի խնդիրները՝ փոխտնօրեն Մ.Օթարյանին առաջարկվեց բանակցել մեկ այլ բժշկական կազմակերպության հետ՝ հաջորդ թեստավորումն ավելի արդյունավետ կազմակերպելու համար:

Որոշվեց՝ ՀՀ առողջապահության նախարարի՝ 2020 թվականի օգոստոսի 4-ի N 17-Ն հրամանի կատարումն ապահովող միջոցառումների կատարման ընթացքի մասին (COVID-19) Ա.Մակարյանի և Վ.Եգանյանի զեկուցումներն ընդունել ի գիտություն:

Ընթացիկ երկրորդ հարցի մասին զեկուցող Ն.Առուշանյանը նշեց, որ այս պահի դրությամբ հեռակա ուսուցմամբ վերականգնվելու համար դիմել է ԵՊՀ Իջևանի մասնաճյուղի 4 նախկին ուսանող: Ուսումնամեթոդական վարչության կողմից ստուգվել է ուսանողների ներկայացրած փաստաթղթերի համապատասխանությունը «Հայաստանի Հանրապետության բարձրագույն ուսումնական հաստատությունների ուսանողների հեռացման (ազատման) և վերականգնման» կարգին, որի համաձայն՝ նրանց թույլատրվում է վերականգնել իրենց ուսանողական իրավունքները:

Որոշվեց՝ «Հայաստանի Հանրապետության բարձրագույն ուսումնական հաստատությունների ուսանողների հեռացման (ազատման) և վերականգնման» կարգին համապատասխան՝ ԵՊՀ ԻՄ-ի 4 նախկին ուսանողներին թույլատրել վերականգնել իրենց ուսանողական իրավունքները:

Ընթացիկ երրորդ հարցի մասին զեկուցող Ն.Առուշանյանը նշեց, որ 120 ժամ և ավելի անհարգելի բացակայության պատճառով մասնաճյուղից հեռացման է ենթակա առկա ուսուցման համակարգի 1 ուսանող:

Որոշվեց՝ ըստ ԵՊՀ ԻՄ-ի ներքին կարգապահական կանոնների 62.4 կետի (կիսամյակի ընթացքում 120 ժամ և ավելի անհարգելի բացակայության դեպքում)՝ առկա ուսուցման համակարգի տվյալ ուսանողին հեռացնել մասնաճյուղից:

 2021թ. հոկտեմբերի 16-ին ԵՊՀ Իջևանի մասնաճյուղում կայացավ տնօրենության ընդլայնված նիստ, որը նախագահում էր Ա.Մակարյանը, մասնակցում էին տնօրենության անդամները, հրավիրված էին վարչական որոշ ստորաբաժանումների ղեկավարներ՝ Ուսումնամեթոդական վարչության ուսումնական գործընթացի կազմակերպման և վերահսկման բաժնի վարիչ Ն.Առուշանյանը, Մինչհամալսարանական կրթության և պրակտիկաների կազմակերպման բաժնի վարիչ Լ.Բեգինյանը, Կրթական բարեփոխումների և դասախոսների վերապատրաստման բաժնի վարիչ Ն.Գրիգորյանը, Անձնակազմի կառավարման և իրավական ապահովման բաժնի առաջատար մասնագետ Վ.Բախչագյուլյանը (որպես բաժնի վարիչին փոխարինող):

Տնօրենության նիստում քննարկվեցին օրակարգային հետևյալ հարցերը.

1. Հաղորդում ԵՊՀ ԻՄ-ի՝ 2021-2022 ուստարվա 1-ին կիսամյակի առաջին ընթացիկ ստուգումների և քննությունների նախապատրաստական աշխատանքների մասին (զեկուցող՝ Ա.Դավթյան):
2. Հաղորդում մասնաճյուղի՝ 2021-2022 ուստարվա 1-ին կիսամյակի պրակտիկաների կազմակերպման ընթացքի մասին (զեկուցող՝ Լ.Բեգինյան):
3. Ընթացիկ հարցեր.
   • Ուսանողական իրավունքների վերականգնման մասին (զեկուցող՝ Ն.Առուշանյան):
   • 2021-2022 ուստարվա 1-ին կիսամյակի հետազոտական աշխատանքների կազմակերպման ընթացքի մասին (զեկուցող՝ Ն.Գրիգորյան):
   • ՀՀ առողջապահության նախարարի` 2020 թվականի օգոստոսի 4-ի N17-Ն հրամանի կատարումն ապահովող միջոցառումների կատարման ընթացքի մասին (COVID-19) (զեկուցող՝ Վ.Բախչագյուլյան):

Առաջին հարցի վերաբերյալ զեկուցող Ա.Դավթյանը մասնավորապես նշեց, որ 2021-2022 ուստարվա 1-ին կիսամյակի առաջին ընթացիկ ստուգումների և քննությունների նախապատրաստական աշխատանքները կազմակերպվել են ըստ ժամանակացույցի: Քննաշրջանն իրականացվելու է ս.թ. հոկտեմբերի 26-30-ը: Ֆակուլտետների դեկանները Ուսումնամեթոդական վարչություն են ներկայացրել ընթացիկ ստուգումների և քննությունների կազմակերպման ժամանակացույցները, դրանք տեղադրվել են պաշտոնական կայքէջում և դրանց մասին տեղեկացվել է դասախոսներին և ուսանողներին: Ֆակուլտետներին են տրամադրվել նաև քննությունների համար նախատեսված տետրերը։ Ա.Դավթյանը նշեց, որ մասնաճյուղը պատրաստ է քննաշրջանի իրականացմանը:

Որոշվեց՝ ԵՊՀ ԻՄ–ի՝ 2021-2022 ուստարվա 1-ին կիսամյակի առաջին ընթացիկ ստուգումների և քննությունների նախապատրաստական աշխատանքների մասին Ա.Դավթյանի զեկուցումն ընդունել ի գիտություն:

Երկրորդ հարցի՝ 2021-2022 ուստարվա 1-ին կիսամյակի պրակտիկաների կազմակերպման ընթացքի մասին զեկուցող Լ.Բեգինյանը նշեց, որ 2021-2022 ուստարվա աշխատանքային ուսումնական պլանի համաձայն՝ մասնաճյուղի ուսումնական գործընթացն առաջին կիսամյակում ընդգրկում է 16 պրակտիկա` 6 մանկավարժական, 1 գիտամանկավարժական, 5 արտադրական և 4 ուսումնական: Ըստ ժամանակացույցի՝ մինչև այժմ պրակտիկայի մեջ են համարվում 9 կրթական ծրագրերով 12 կուրսի 158 ուսանողներ: Եվս 3 ուսանող ուսումնական պրակտիկա է իրականացնում որպես տարբերություն:

Բակալավրի կրթական ծրագրով մանկավարժական պրակտիկաները այս տարի ևս կազմակերպվել են Իջևանի թիվ 1 և թիվ 5 հիմնական դպրոցներում, որի համար հաստատությունների տնօրենների հետ կնքվել են նոր պայմանագրեր: Ընթացակարգի համաձայն՝ նախապես պատրաստվել են գրություններ, կատարվել խմբերի բաժանումներ և նախապատրաստական այլ աշխատանքներ: Իջևանի թիվ 5 դպրոցում «Տարրական մանկավարժություն և մեթոդիկա», ինչպես նաև մանկավարժի լրացուցիչ որակավորման «Անգլերեն լեզու և գրականություն» և «Ինֆորմատիկա և կիրառական մաթեմատիկա» 4-րդ կուրսի ուսանողները պրակտիկան սկսել են իրականացնել հոկտեմբերի 4-ից: Առաջին իսկ շաբաթում դպրոցում արձանագրվել է «COVID-19»-ով վարակման դեպքեր ուսուցիչների, աշակերտների և պրակտիկանտների շրջանում: Նշված խմբերի ուսանողների համար պրակտիկայի ղեկավարներին հանձնարարվել է առաջիկա շաբաթներում գործընթացն իրականացնել առցանց եղանակով:

Մագիստրոսի կրթական ծրագրով գիտամանկավարժական պրակտիկան կազմակերպվել է մարզի 11 դպրոցներում և Իջևանի տարածաշրջանային պետական քոլեջում: Աշխատանքներն իրականացվում են ըստ ղեկավարների կողմից տրվող հանձնարարությունների: Արտադրական պրակտիկաները կազմակերպվել, և գրություններ են ուղարկվել 27 հաստատություններ: Ուսումնական պրակտիկաները կազմակերպվում են մասնաճյուղում և արտահայտված են դասացուցակներում:

Պրակտիկաներին ուսանողների մասնակցության վերահսկողությունն ապահովելու նպատակով պրակտիկայի ղեկավարներին հանձնարարվել է յուրաքանչյուր շաբաթվա վերջում բաժին ներկայացնել ուսանողների մասնակցության վերաբերյալ տեղեկատվություն: Արդյունքները կամփոփվեն և կքննարկվեն առաջիկա օրերին:

Որոշվեց՝ մասնաճյուղի՝ 2021-2022 ուստարվա 1-ին կիսամյակի պրակտիկաների կազմակերպման ընթացքի վերաբերյալ Լ.Բեգինյանի զեկուցումն ընդունել ի գիտություն:

Ընթացիկ առաջին հարցի՝ ուսանողական իրավունքների վերականգնման մասին զեկուցող Ն.Առուշանյանը նշեց, որ այս պահի դրությամբ 2021-2022 ուստարվա առաջին կիսամյակում հեռակա ուսուցմամբ վերականգնվելու համար դիմել է ԵՊՀ Իջևանի մասնաճյուղի 10 նախկին ուսանող: Ուսումնամեթոդական վարչության կողմից ստուգվել է ուսանողների ներկայացրած փաստաթղթերի համապատասխանությունը «Հայաստանի Հանրապետության բարձրագույն ուսումնական հաստատությունների ուսանողների հեռացման (ազատման) և վերականգնման» կարգին, որի համաձայն՝ նրանց թույլատրվում է վերականգնել իրենց ուսանողական իրավունքները:

Որոշվեց՝ «Հայաստանի Հանրապետության բարձրագույն ուսումնական հաստատությունների ուսանողների հեռացման (ազատման) և վերականգնման» կարգին համապատասխան՝ ԵՊՀ ԻՄ-ի 10 նախկին  ուսանողներին թույլատրել վերականգնել իրենց ուսանողական իրավունքները:

Ընթացիկ երկրորդ հարցի մասին զեկուցող Ն.Գրիգորյանը նշեց, որ 2021-2022 ուստարվա առաջին կիսամյակում հետազոտական բաղադրիչ պարունակող դասընթացների թիվը 27 է:

«ԵՊՀ-ի բակալավրի և մագիստրոսական կրթական ծրագրերի մասնագիտական դասընթացներում հետազոտական աշխատանքների կատարման կարգ»-ի 13-րդ կետին համապատասխան՝ ամբիոններում երրորդ շաբաթվա ընթացքում հաստատվել են հետազոտական աշխատանքների թեմաները, և դրանք ներկայացվել են ուսանողներին:

2021թ. սեպտեմբերի 17-ին ԿԲԴՎ բաժինը 2021-2022 ուսումնական տարվա 1-ին կիսամյակում հետազոտական բաղադրիչ պարունակող դասընթացները վարող դասախոսների հետ կազմակերպել է առցանց հանդիպում-քննարկում, որը վարել է ԵՊՀ ԻՄ-ի տնօրենի պաշտոնակատար  Ա.Մակարյանը: Հանդիպման ընթացքում քննարկվել են հետազոտական թեմաների ընտրության, աշխատանքների պատրաստման, դրանց ներկայացման և գնահատման չափանիշները:

Ն.Գրիգորյանը հավելեց, որ պարբերական կլինեն հետազոտական բաղադրիչ պարունակող դասընթացները վարող դասախոսների հետ քննարկումները՝ նրանց իրականացրած աշխատանքներին, առաջարկներին ու հաջող փորձին ծանոթանալու համար:

Որոշվեց՝ 2021-2022 ուստարվա 1-ին կիսամյակի հետազոտական աշխատանքների կազմակերպման ընթացքի մասին Ն.Գրիգորյանի զեկուցումն ընդունել ի գիտություն:

Ընթացիկ երրորդ հարցի մասին զեկուցող Վ.Բախչագյուլյանը նշեց, որ ԵՊՀ ԻՄ-ում ՀՀ առողջապահության նախարարի՝ 2020թ. օգոստոսի 4-ի N17-Ն հրամանով սահմանված սանիտարական և ԵՊՀ ռեկտորի շրջաբերականով նախատեսված նոր կանոնների պահպանման նպատակով ԵՊՀ ԻՄ-ի տնօրենի պաշտոնակատարի կողմից 2021թ. հոկտեմբերի 2-ին տրվել է կորոնովիրուսային համավարակի կանխարգելմանն ուղղված միջոցառումների մասին հրաման: Վերջինիս համաձայն՝ Անձնակազմի կառավարման և իրավական ապահովման բաժնին հանձնարարվել է սահմանված կարգով հավաքագրել մասնաճյուղի աշխատակիցների պատվաստման (առաջին և երկրորդ դեղաչափը ստանալու), թեստավորման (կորոնավիրուսային հիվանդության (COVID-19) ախտորոշման պոլիմերազային շղթայական ռեակցիայի հետազոտության (ՊՇՌ)), պատվաստման բժշկական հակացուցումների, հղիության վերաբերյալ անհրաժեշտ տվյալները:

Ըստ հավաքագրված տվյալների՝ 2021թ. հոկտեմբերի 15-ի դրությամբ ԵՊՀ ԻՄ-ում ունենք երկրորդ դեղաչափը ստացած և սերտիֆիկատ ներկայացրած 43 աշխատակից, առաջին դեղաչափը ստացած 90 աշխատակից, թեստավորված 70 աշխատակից, 3 հղի և 3 COVID-19-ով վարակված աշխատակից: Տվյալներն ամբողջական չեն, քանի որ մասնաճյուղում ունենք համատեղությամբ աշխատող դասախոսներ, ովքեր դասի են գալիս 2 շաբաթը մեկ պարբերականությամբ, իսկ թեստավորման արդյունքներն էլ մասամբ դեռ հայտնի չեն:

 Որոշվեց՝ ՀՀ առողջապահության նախարարի` 2020 թվականի օգոստոսի 4-ի  N17-Ն հրամանի կատարումն ապահովող միջոցառումների կատարման ընթացքի մասին (COVID-19) Վ.Բախչագյուլյանի զեկուցումն ընդունել ի գիտություն:

 2021թ. սեպտեմբերի 29-ին ԵՊՀ Իջևանի մասնաճյուղում կայացավ տնօրենության ընդլայնված նիստ, որը նախագահում էր Ա.Մակարյանը, մասնակցում էին տնօրենության անդամները, հրավիրված էին վարչական որոշ ստորաբաժանումների ղեկավարներ՝ Ուսումնամեթոդական վարչության ուսումնական գործընթացի պլանավորման և վերահսկման բաժնի վարիչ Ն.Առուշանյանը, Կրթական բարեփոխումների և դասախոսների վերապատրաստման բաժնի վարիչ Ն.Գրիգորյանը, «Տավուշ» հետազոտական կենտրոնի ղեկավար Հ.Մովսեսյանը, Արտաքին կապերի բաժնի վարիչ Ա.Եգանյանը:

Տնօրենության նիստում քննարկվեցին օրակարգով նախատեսված հետևյալ հարցերը.

1. ԵՊՀ ԻՄ-ի՝ 2020-2021 ուստարվա երկրորդ կիսամյակի առկա և հեռակա ուսուցման համակարգերի քննաշրջանի ամփոփում (զեկուցող՝ Ն.Առուշանյան, ֆակուլտետների դեկաններ):
2. Հաղորդում ԵՊՀ ԻՄ-ի ստորաբաժանումների աշխատանքային պլանների կազմման մասին (զեկուցող՝ Մ.Ճաղարյան):
3. ԵՊՀ ԻՄ-ի զարգացման՝ 2021-2026 թթ. ռազմավարական ծրագրի մշակման ընթացքի մասին (զեկուցողներ՝ Ն.Գրիգորյան, Հ.Մովսեսյան, Ա.Եգանյան):

Առաջին հարցի՝ ԵՊՀ ԻՄ-ի՝ 2020-2021 ուստարվա երկրորդ կիսամյակի առկա և հեռակա ուսուցման համակարգերի քննաշրջանի ամփոփման վերաբերյալ զեկուցող Ն.Առուշանյանը մասնավորապես նշեց, որ 2020-2021 ուստարվա II կիսամյակում քննաշրջանին մասնակցել է բակալավրի կրթական ծրագրով առկա ուսուցման 1-3-րդ կուրսերի 398, հեռակա ուսուցման 1-4-րդ կուրսերի 483 ուսանող, մագիստրոսի կրթական ծրագրով (հեռակա ուսուցման) 1-ին կուրսի 24 ուսանող:

Ընդհանուր առմամբ քննաշրջանին մասնակցել է 905 ուսանող (881-ը՝ բակալավրի, 24-ը՝ մագիստրոսի կրթական ծրագրով), որոնցից անվճար ուսուցմամբ՝ 116, վճարովի ուսուցմամբ՝ 789 ուսանող:  

2020-21 ուստարվա II կիսամյակի քննաշրջանի արդյունքներից ելնելով՝ հեռացման են ներկայացվել առկա ուսուցման 5, հեռակա ուսուցման 32 ուսանողներ:

Քննաշրջանից մինչև 12 կրեդիտ ակադեմիական պարտքեր ունեն առկա ուսուցման 5, հեռակա ուսուցման 29 ուսանողներ:

Որոշվեց՝

1. ԵՊՀ ԻՄ–ի՝ 2020-2021 ուստարվա երկրորդ կիսամյակի առկա և հեռակա ուսուցման համակարգերի քննաշրջանի ամփոփման վերաբերյալ Ն.Առուշանյանի զեկուցումն ընդունել ի գիտություն,
2. տնօրենության նիստում ներկայացված ուսանողներին սահմանված կարգով հեռացնել մասնաճյուղից:

Երկրորդ հարցի՝ ԵՊՀ ԻՄ-ի ստորաբաժանումների աշխատանքային պլանների կազմման մասին իր զեկուցման մեջ Մ.Ճաղարյանը մասնավորապես նշեց, որ 2021թ. սեպտեմբերի սկզբին ԵՊՀ ԻՄ-ի ստորաբաժանումներին հանձնարարվել էր կազմել իրենց աշխատանքնային պլանները: Հաշվի առնելով, որ ԵՊՀ ԻՄ-ի՝ 2021-2026 թթ. զարգացման ռազմավարական ծրագրի մշակումը դեռևս ընթացքի մեջ է և չի հաստատվել գիտական խորհրդի կողմից՝ ԵՊՀ ԻՄ-ի տնօրենի պաշտոնակատար Ա. Հ. Մակարյանի առաջարկով ստորաբաժանումներն իրենց՝ 2021թ. սեպտեմբեր-դեկտեմբեր ամիսների աշխատանքային պլանները պետք է կազմեին ըստ ընթացիկ գործառույթների և նախկին ռազմավարական պլանով չիրականացված խնդիրների: Ստորաբաժանումներն (բացառությամբ ՏՀՍԶ բաժնի) արդեն կազմել և ուղարկել են իրենց աշխատանքային պլանները, որոնք շտկումներից հետո ներկայացվել են տնօրենի հաստատմանը: ՏՀՍԶ բաժինն իր աշխատաքային պլանն ավարտուն տեսքի կբերի մինչև ս.թ. հոկտեմբերի 2-ը:

Որոշվեց՝  ԵՊՀ ԻՄ–ի ստորաբաժանումների աշխատանքային պլանների կազմման մասին Մ.Ճաղարյանի զեկուցումն ընդունել ի գիտություն:

Երրորդ հարցի՝ ԵՊՀ ԻՄ-ի զարգացման՝ 2021-2026 թթ. ռազմավարական ծրագրի մշակման ընթացքի մասին զեկուցեցին ՌԾ-ի երեք ոլորտների պատասխանատուներ Ն.Գրիգորյանը, Հ.Մովսեսյանը և Ա.Եգանյանը:

Առաջին ոլորտի կապակցությամբ Ն.Գրիգորյանը նշեց, որ հիմնական աշխատանքներն արդեն իրականացվել են, և վերջնական խմբագրման ենթակա տարբերակն ուղարկվել է տնօրենին:

Երկրորդ և երրորդ ոլորտների պատասխանատուներ Հ.Մովսեսյանը և Ա.Եգանյանը ներկայացրին, որ աշխատանքներն ընթացքի մեջ են, նախատեսում են փոքր խմբերով հանդիպել և սեղմ ժամկետներում ավարտել ծրագրի մշակման աշխատանքները:

Այդ հարցի հետ կապված՝ պարոն Մակարյանը նշեց, որ մշակման աշխատանքներն իրականացնելիս անհրաժեշտ է հետևողական լինել, որ գործողությունների վերջնարդյունքները լիովին բխեն ներկայացված քայլերից, իսկ  կառուցվածքային առումով նպատակահարմար է խնդիրների վերջնարդյունքները ներկայացնել հավակնությունների տեսքով:

Տնօրենի կողմից առաջարկվեց շաբաթական առնվազն 1 անգամ հավաքվել ՌԾ-ի մշակման համար ձևավորված փոքր խմբերով, որպեսզի միչև ս.թ. հոկտեմբերի վերջը հնարավոր լինի ավարտել ռազմավարական ծրագրի մշակման աշխատանքները:

Որոշվեց՝  ԵՊՀ ԻՄ–ի զարգացման՝ 2021-2026 թթ. ռազմավարական ծրագրի մշակման ընթացքի մասին Ն.Գրիգորյանի, Հ.Մովսեսյանի և Ա.Եգանյանի զեկուցումներն ընդունել ի գիտություն: