2018թ. մարտի 28-ին ԵՊՀ Իջևանի մասնաճյուղ էին այցելել «Դասավանդի՛ր, Հայաստան» ծրագրի հավաքագրման համակարգող Տաթևիկ Հովհաննիսյանը և հավաքագրման մասնագետ, ԵՊՀ ԻՄ-ի շրջանավարտ Քնարիկ Մանուկյանը:

Հանդիպումը կազմակերպել էին «Դասավանդի՛ր, Հայաստան» կրթական հիմնադրամն ու ԵՊՀ  ԻՄ-ի շրջանավարտների և կարիերայի կենտրոնը:  

Ներկա էին մասնաճյուղի շրջանավարտների և արտաքին շահակիցների հետ տարվող աշխատանքների համակարգող Արփինե Եգանյանը, ՈՒԳԸ համակարգող Սլավիկ Ալավերդյանը, 3-րդ և 4-րդ կուրսերի ուսանողներ:

Քնարիկ Մանուկյանը ներկայացրեց  ծրագրի առաքելությունը, մանրամասները, դիմելու կարգը, այնուհետև ծրագրի ներկայացուցիչները պատասխանեցին մասնակիցներին հետաքրքրող հարցերին։

Հանդիպման սկզբում նշվեց, որ շատ գյուղերում ուսուցիչների պակաս կա, ինչի հետևանքով ոչ մասնագետը դասավանդում է մի քանի առարկա կամ տևական ժամանակ աշակերտները չեն ունենում որևէ առարկայի ուսուցիչ:

«Դասավանդի՛ր, Հայաստան»-ի առաքելությունն է բարելավել Հայաստանի բոլոր երեխաների կրթության որակը՝ ներգրավելով և որպես ուսուցիչներ վերապատրաստելով համալսարանների շրջանավարտների, ապա 2 տարով նրանց գործուղելով Հայաստանի մարզային դպրոցներ, որտեղ կա տվյալ մասնագիտությամբ ուսուցչի կարիք։

Ծրագրի մասնակիցներն անդամակցում են Երկամյա առաջնորդության զարգացման ծրագրին, որի ընթացքում ձեռք են բերում աշակերտների նվաճումներն ու առաջնորդության ջիղը դասարանում բարելավելու գիտելիքներ, հմտություններ և նոր աշխարհայացք` միաժամանակ իրականացնելով համայնքային զարգացման նախաձեռնություններ:

Ծրագրի առանձնահատկությունն այն է, որ դիմելու համար մանկավարժի որակավորում ունենալը պարտադիր չէ, միայն հարկավոր է դասավանդելու և Հայաստանի զարգացմանը նպաստելու ցանկություն, մյուս խնդիրները, ինչպիսիք են՝ վերապատրաստումը, աշխատանքի տեղավորումը մարզային դպրոցներում, վարձատրությունը, կլուծի ծրագիրը։

Ծրագրին կարող է դիմել 2018թ. հուլիսի դրությամբ բակալավրի կրթական աստիճան ունեցող ցանկացած ոք, այդ թվում` հանրակրթական դպրոցներում դասավանդվող առարկաներին մոտ մասնագիտություն ունեցող անձը:

Ծրագրի մասնակիցները ստանում են.

1. Մասնագիտական աճի հնարավորություն (գործընկեր կազմակերպություններում մասնագիտական և մշակութային զարգացման հնարավորություններ, վերապատրաստող մասնագետի շարունակական աջակցություն),
2. Դրամական աջակցություն (աշխատավարձ և կրթաթոշակ),
3. Մանկավարժի որակավորում (դասավանդման վկայականի կամ մանկավարժության մագիստրոսի աստիճանի ձեռքբերման համար ուսումնական վարձի վճարում),
4. Առաջնորդական հմտությունների զարգացման հնարավորություն,
5. Կարիերայի զարգացման հնարավորություն («Դասավանդի՛ր, Հայաստան» և «Կրթություն բոլորի համար» ծրագրերի շրջանավարտի կարգավիճակ),
6. Գաղափարակից մարդկանց հետ կապերի հաստատում,
7. Նորարար մտքերը և նախագծերն իրականացնելու հարթակ,
8. Մարզային համայնքների զարգացմանը նպաստելու հնարավորություն:

Դիմելու վերջնաժամկետը ապրիլի 30-ն է:

Մայիսի ընթացքում տեղի կունենան հանդիպումներ երկրորդ փուլ անցած դիմորդների հետ, որոնցից հետո կընտրվեն ծրագրի մասնակիցները, ովքեր կմասնակցեն ամառային ինստիտուտին և այն հաջողությամբ ավարտելուց հետո 2018թ. սեպտեմբերի   1-ից աշխատանքի կանցնեն դպրոցներում:

Պատասխանելով ուսանողների հարցերին՝ Տաթևիկ Հովհաննիսյանը նշեց, որ մասնակիցները ծրագրի ընթացքում պետք է բնակվեն իրենց դասավանդման համայնքներում, իրականացնեն լրացուցիչ պարապմունքներ աշակերտների հետ և աջակցեն նաև համայնքի զարգացմանը: Ուսանողների այն հարցին, թե  արդյոք մասնակիցները պիտի դասավանդեն ոչ իրենց մարզում, ծրագրի ներկայացուցիչները նշեցին, որ նման պահանջ չկա, համայնքի ընտրությունը կախված է դպրոցում տվյալ մասնագետի պահանջարկից և համաձայնեցվում է մասնակիցների հետ:

Նշվեց, որ այժմ «Դասավանդի՛ր, Հայաստան»-ը ներկայացված է Հայաստանի 6 մարզի 52 գործընկեր դպրոցում: Ծրագիրն ունի մասնակիցների երեք սերունդ, որոնցից առաջինը՝ 14 մասնակիցներ, արդեն ավարտել են երկամյա ծրագիրը և գտել են իրենց մասնագիտական ուղին ՀՀ առաջատար կազմակերպություններում, իսկ երկրորդ և երրորդ սերնդի մասնակիցները 71-ն են, որոնք աշխատում են շուրջ 5000 երեխայի հետ:

«Դասավանդի՛ր, Հայաստան»-ն անկախ ծրագիր է, որը համագործակցում է ՀՀ կառավարության, մարզպետարանների, դպրոցների, համալսարանների, տեղական և արտասահմանյան կազմակերպությունների և անհատների հետ: Մոդելը, որի հիման վրա ստեղծվել է ծրագիրը, 25 տարվա պատմություն ունի։ Այն սոցիալական փոփոխության հասնելու հաջողված ծրագիր է, որը կիրառվել է աշխարհի շուրջ 46 երկրում, որոնք համախմբվել են “Teach For All” միջազգային ցանցի ներքո:

Հանդիպման վերջում ելույթ ունեցավ ՈՒԳԸ համակարգող Սլավիկ Ալավերդյանը, մասնաճյուղի ղեկավարության և ուսանողության անունից շնորհակալություն հայտնեց այցելության համար:

Նա նշեց, որ ինքը 2015թ. եղել է ծրագրի առաջին դիմորդներից, հետևում է ծրագրի մասնակիցների գործունեությանը և համոզվել է նրանց օգտակարության, երեխաներին ոգեշնչելու մեջ: Ս.Ալավերդյանը ևս ուսանողներին կոչ արեց անպայման դիմել ծրագրին, օգտագործել եզակի հնարավորությունը, ինչպես նաև ծրագրի մասին պատմել ընկերներին:

Ծրագրին դիմելու համար անհրաժեշտ է լրացնել առցանց հայտադիմումը՝ անցնելով հետևյալ հղումով՝ https://arm.teachforarmenia.org/2018-form-arm:

   Հայտադիմումների և ընդունելության հետ կապված հարցերի դեպքում կարելի է զանգահարել Հավաքագրման համակարգող Տաթևիկ Հովհաննիսյանին՝ (041)530154 հեռախոսահամարով կամ գրել tatev.hovhannisyan@teachforarmenia.org էլեկտրոնային հասցեին:

Ծրագրի մասին հավելյալ տեղեկություններ ստանալու համար կարելի է այցելել պաշտոնական կայք՝ http://www.teachforarmenia.org/:

Ծրագրի մասնակիցների հաջողությունների մասին կարելի է կարդալ՝ անցնելով հետևյալ հղումով՝ http://www.mediamax.am/am/news/tfa/:

2018թ. մարտի 28-ին ԵՊՀ Իջևանի մասնաճյուղում  կայացավ «Հայերը համաշխարհային կերպարվեստում» խորագրով միջոցառումը (ռուսերեն), որը կազմակերպել էին Կիրառական արվեստի ֆակուլտետի ՈՒԳԸ-ն և ՈՒԽ-ն՝ Ռուսաց լեզվի և գրականության սեկցիայի պատասխանատու բ.գ.,թ., ասիստենտ Անժելա Այդինյանի աջակցությամբ:

Միջոցառմանը ներկա էին Կիրառական արվեստի ֆակուլտետի դեկանը, դասախոսներ, տարբեր ֆակուլտետների ուսանողներ, մասնակցում էին «Դիզայն» մասնագիտության 1-ին և 2-րդ կուրսերի ուսանողները:

Այն յուրատեսակ տուրք էր մեր մշակույթի նվիրյալներին և նպատակ ուներ հայ արվեստը ներկայացնել ոչ միայն հայերենով, այլև ռուսաց լեզվով:

«Հայերը համաշխարհային կերպարվեստում» խորագրով միջոցառումն ուներ հագեցած ծրագիր:

Ողջույնի խոսքով հանդես եկավ Ռուսաց լեզվի և գրականության սեկցիայի պատասխանատու բ.գ.,թ., ասիստենտ Անժելա Այդինյանը՝ մասնավորապես նշելով, որ մշակույթն ու արվեստն են ձևավորում մարդու և սերունդների ինքնագիտակցությունը: Արվեստի զարգացումն ազդում է երիտասարդների կրթության ու գեղագիտական դաստիարակության վրա, խթանում ստեղծագործ ոգին ու պրպտուն միտքը: Արվեստը մարդկային կյանքի մեծագույն արժեքն է, նրա մեջ բյուրեղանում է ամեն ինչ: Արվեստագետների շնորհիվ մարդիկ հնարավորություն են ունենում հաղորդակցվել գեղանկարչությանը, քանդակագործությանը, ճաշակել լավ երաժշտություն, հիանալ դրամատիկական և պարային արվեստով:

Այնուհետև «Դիզայն» մասնագիտության 2-րդ կուրսի ուսանողուհի Կարինե Ալավերդյանն ազդարարեց վիկտորինայի մեկնարկը:

Հաղթող ճանաչվեց Տնտեսագիտության ֆակուլտետի «Սերվիս» մասնագիտության թիմը և պարգևատրվեց հուշանվերով:

Ապա մասնակիցները ներկայացրին հայ մեծանուն նկարիչների կյանքն ու գործունեությունը:

1-ին կուրսի ուսանողուհիներ Նոննա Ալավերդյանը և Իրինա Փիրումյանը  ներկայացրին Գևորգ Բաշինջաղյանին և Մարտիրոս Սարյանին, իսկ 2-րդ կուրսի ուսանողուհի Դոնարա Սարգսյանը՝ Հովհաննես Այվազովսկուն:

Ելույթներն ուղեկցվեցին բուռն քննարկումներով:

Վերջում  ելույթ ունեցավ Կիրառական արվեստի ֆակուլտետի դեկան Ալեքսան Մարգարյանը՝ շնորհակալություն հայտնելով միջոցառման կազմակերպիչներին, ընդգծելով նմանատիպ միջոցառումների կարևորությունը:

«Հայերը համաշխարհային կերպարվեստում» խորագրով միջոցառումը մեծ բավականություն պատճառեց ներկաներին:

2018թ. մարտի 26-27-ին ԵՊՀ ԻՄ-ի անգլերեն լեզվի և գրականության  ամբիոնի դասախոսներ Ք.Հարությունյանը, Ա.Սիմոնյանը, Ն.Գասպարյանը, Զ.Անտոնյանը մասնակցեցին   անգլերեն դասավանդողների համար «Մանմար» հրատարակչատան կողմից կազմակերպված վերապատրաստման դասընթացի:

Վերապատրաստմանը մասնակցում էին Հայաստանի Հանրապետության` անգլերեն լեզվի բազմաթիվ դասախոսներ և ուսուցիչներ:

Երկօրյա դասընթացը վարում էին բրիտանացի մասնագետներ Վոն Ջոնսը և Ֆիլ Ուորվիքը:

Վոն Ջոնսը ավելի քան 30 տարի դասավանդել է Ֆրանսիայում, Ճապոնիայում, Իսպանիայում և վարում է վերապատրաստման դասընթացներ ամբողջ աշխարհում: Այժմ ապրելով Օքսֆորդում` նա դասավանդում է անգլերեն և գրում դասագրքեր: Նրա հեղինակած դասագրքերի թվում է “Focus” դասագրքերի շարքը, որը լայն կիրառություն ունի նաև Հայաստանում: Ջոնսը Սյու Քեյի հետ համահեղինակությամբ է գրել այդ գրքերը, որոնք հրատարակվել են հայտնի “Pearson” հրատարակչության կողմից:

Վերապատրաստման ընթացքում Վոն Ջոնսը ներկայացրեց միջոցներ, որոնք կօգնեն անհրաժեշտ բառապաշարի դասավանդմանը:

Ֆիլ Ուորվիքը ավելի քան 20 տարի անգլերեն է դասավանդել Բրազիլիայում, Չինաստանում, Իտալիայում և Արգենտինայում: Այժմ նա մասնավոր լեզուների դպրոցի տնօրեն է Չեխիայում, Միացյալ Թագավորության դեսպանատան կողմից կազմակերպվող ամառային դպրոցների համակարգող է, ինչպես նաև CELTA դասընթացների դասավանդող և քննող:  

Վերապատրաստման ժամանակ Ֆիլ Ուորվիքը խոսեց այն միջոցների մասին, որոնք կօգնեն սովորեցնել ուսանողներին խոսել և հաղորդակցվել անգլերենով:

Երկօրյա դասընթացն անցավ շատ ակտիվ և անմիջական մթնոլորտում:

2018թ. մարտի 26-ին ԵՊՀ Իջևանի մասնաճյուղում կայացավ ուսանողների հետ տնօրեն Սամվել Առաքելյանի հերթական հանդիպումը, որին ներկա էին ՈՒԳԸ համակարգող Սլավիկ Ալավերդյանը, ուսանողական կառույցների նախագահները և ներկայացուցիչներ, կուրսերի ավագներ:

Հանդիպման ընթացքում քննարկվեցին ուսանողների կարգապահության, 2017-2018 ուստարվա երկրորդ կիսամյակի առաջին ընթացիկ քննաշրջանին նախապատրաստվելու վերաբերյալ մի շարք հարցեր:

Ուսանողները ներկայացրին դասապրոցեսի արդյունավետության բարձրացման ուղղությամբ իրենց առաջարկները, մասնավորապես առանձնացրին էլեկտրոնային դասախոսությունների քանակի մեծացման, լսարանների կահավորվածության և տեխնիկապես հագեցվածության հետ կապված խնդիրները: Տնօրենը նշեց, որ արդեն պլանավորել են ավելացնել պրոյեկտորով լսարանների թիվը:

ՈՒԽ-ի նախագահ Իսկուհի Շաղբաթյանը նշեց, որ աշխատանքներն ընթանում են բնականոն հունով, ուսանողության շրջանում իրականացվում է Ակադեմիական ազնվության վերաբերյալ անանուն հարցում, և առաջիկայում կկազմակերպվի քննարկում:

Ս.Առաքելյանը անդրադարձավ ուսանողների կարգապահության խնդիրներին, նշեց, որ ուսանողները գիտեն և պաշտպանում են իրենց իրավունքները, բայց հաճախ չեն կատարում իրենց պարտականությունները: Նա ներկայացրեց, որ այսուհետ բացակայությունները հարգելի համարելու համար ուսանողները իրավունք կունենան բժշկական տեղեկանք ներկայացնելու և դիմում գրելու, եթե նախապես բացակայության պատճառի մասին տեղեկացնեն ֆակուլտետի դեկանատ և կարգադրեց նշված կարգը ներկայացնել բոլոր ուսանողներին:

Ծավալվեց քննարկում ուսանողի վարքագծի, դրա վրա ազդող գործոնների և մասնաճյուղի անելիքների վերաբերյալ: Դարձյալ ընդգծվեց, որ բուհն իրականացնում է ոչ միայն կրթական, այլև դաստիարակչական գործառույթ, իր ներքին կարգապահական կանոնների պահպանմամբ փորձում է ապահովել պատշաճ կարգապահություն, բարձրացնել ուսանողների պատասխանատվությունը, ինքնագիտակցության մակարդակը, դաստիարակել պետությանը պիտանի և օրինապահ քաղաքացիներ:

Հանդիպման վերջում պարոն Առաքելյանը խորհուրդ տվեց հաճախակի օգտագործել «Շնորհակալություն» և «Ներողություն» բառերը, որոնք բնորոշ են հզոր մարդկանց ու մոգական ուժ ունեն, կոչ արեց լավ նախապատրաստվել քննություններին՝ ցանկալի արդյունքի հասնելու համար:

2018թ. մարտի 24-ին ԵՊՀ Իջևանի մասնաճյուղում կայացավ ՀՀ արտգործնախարարի` ֆրանկոֆոնիայի հարցերով խորհրդական Վահագն Աթաբեկյանի հետ հերթական հանդիպումը:

Ներկա էին Ֆրանսերեն լեզվի և գրականության, Անգլերեն լեզվի և գրականության ամբիոնների դասախոսներ, համապատասխան մասնագիտությունների ուսանողներ:

Հանդիպման նպատակն էր ընդգծել առաջիկայում Երևանում կայանալիք Ֆրանկֆոոնիայի գագաթնաժողովի կարևորությունը Հայաստանի Հանրապետության համար, մասնակիցներին հանգամանորեն ներկայացնել դրա ընթացակարգը:

Նախ պարոն Աթաբեկյանը ջերմորեն շնորհավորեց ԵՊՀ ԻՄ-ի ուսանողներին՝ Ֆրանկոֆոնիայի միջբուհական մրցույթում պատվավոր տեղեր գրավելու համար, ողջունեց այն փաստը, որ ԵՊՀ Իջևանի մասնաճյուղը զիջել է  միայն Բրյուսովի անվան համալսարանին և առաջ է անցել անգամ Ֆրանսիական համալսարանից։ 

Հանդիպման ընթացքում ՀՀ արտգործնախարարի խորհրդականը մանրամասն ներկայացրեց կամավորական սկզբունքով Ֆրանկոֆոնիայի գագաթնաժողովին մասնակցելու պայմաններն ու դրույթները: 

Վերջում ուսանողները պարոն Աթաբեկյանին ուղղեցին Ֆրանկոֆոնիայի գագաթնաժողովի և ֆրանսիական մշակույթի վերաբերյալ մի շարք հարցեր՝ ստանալով սպառիչ պատասխաններ: