2018թ. մարտի 22-ին ԵՊՀ Իջևանի մասնաճյուղում կայացավ «Ամենաարդյունավետ մարդկանց 7 սովորույթները» խորագրով մոտիվացիոն բնույթի սեմինարը, որը կազմակերպել էին մասնաճյուղի ուսանողական գիտական ընկերությունը և ուսանողական խորհուրդը:

Ներկա էին բուհի դասախոսներ, աշխատակիցներ, ուսանողներ:

Սեմինարը վարեց ԵՊՀ ԻՄ ՈՒԳԸ համակարգող Սլավիկ Ալավերդյանը, իսկ տուրիզմի կառավարման և մշակութաբանության ամբիոնի ասիստենտ, քաղ. գիտ. թեկնածու Հովսեփ Մովսեսյանը հանդես եկավ պարզաբանումներով և ներկայացրեց օրինակներ:

Սեմինարի ընթացքում ներկայացվեց 1989թ. լույս տեսած Սթիվեն Ռ. Քովիի «Ամենաարդյունավետ մարդկանց 7 սովորույթները» գիրքը, որը հայերեն հրատարակվել է 2018թ. մարտին «Էդիթ Պրինտ» հրատարակչության կողմից:

Գիրքը 1990 թվականից շարունակում է մնալ բեսթսելլեր բիզնես ոլորտում՝ 40 լեզուներով ավելի քան 30 միլիոն վաճառված օրինակով: Գիրքը 2011թ. “Time” ամսագրի կողմից ընդգրկել է «Բիզնեսի կառավարման վրա ամենամեծ ներգործությունն ունեցող 25 գրքեր»-ի ցանկում: 

Ս.Ալավերդյանը նախ ներկայացրեց, որ մարդիկ աշխարհին նայում են՝ ելնելով իրենց հարացույցներից (հուն.՝ պարադիգմա), և հարացույցի փոփոխությունն ունի մեծ ուժ: Այդ նպատակով նա իրականացրեց սոցիալական փորձ. ներկաներին բաժանեց 2 խմբի և ցուցադրեց տարբեր նկարներ: Այնուհետև նրանց ցույց տվեց այլ նկար, որը համադրում էր նախորդ երկու նկարները, և նույն հարցն ուղղեց բոլորին: Ներկաները տվեցին իրար հակասող պատասխաններ՝ ելնելով նրանից, թե որ նկարն էին տեսել մինչ այդ:

Ապա ներկայացվեց գրքում տեղ գտած ամենահուզիչ պատմություններից երկուսը («Մի կիրակի առավոտ Նյու Յորքի մետրոյում», «Երկու գծանավ փոթորկուն ծովում»): Նշվեց, որ ամեն մի քայլ կարևոր է, և ամեն մի քայլի համար ժամանակ է պահանջվում: Ոչ մի քայլ բաց թողնել չի կարելի, և հանրային հաղթանակներին պետք է նախորդեն անձնական հաղթանակները:

Սեմինարավարը սովորույթը սահմանեց որպես գիտելիքի, հմտության և ցանկության տրամախաչում, տվեց 7 սովորույթների դասակարգումը և հիմնական մտքերից մեկը՝ «Արդյունավետությունը հավասարակշռության մեջ է»: Ներկայացվեց «Ոսկե ձվերի և սագի» առակը, ձևակերպվեց «Արտադրություն (Ա) /Արտադրական կարողություն (ԱԿ)» հավասարակշռությունը:

Այնուհետև ներկայացվեցին 7 սովորույթները.

1. Պրոակտիվ եղիր:
2. Մտովի վերջի՛ց սկսիր (սկսիր՝ պատկերացնելով վերջը):
3. Առաջնային հերթին առաջնայի՛նը դասիր:
4. Փոխշահավետ մտածիր (Հաղթանակ-Հաղթանակ կամ Շահ-Շահ սկզբունք):
5. Նախ ձգտիր հասկանալ, ապա նոր միայն հասկացվել:
6. Սիներգիա ստեղծիր:
7. Սրիր սղոցը:

Նշվեց, որ գրքի հրատարակությունից հետո Ս.Քովին տարբերակել և առանձին գրքով հրատարկել է 8-րդ սովորույթը, այն է՝ «Արդյունավետությունից դեպի մեծություն» (սովորույթների մասին առավել մանրամասն տե՛ս հետևյալ հղումով:

Վերջում ելույթ ունեցավ քաղ. գիտ. թեկնածու, ասիստենտ Հ.Մովսեսյանը, շնորհակալություն հայտնեց ուսանողական կառույցներին նմանատիպ սեմինարներ կազմակերպելու և իրեն ներգրավելու համար, նշեց, որ շատ կարևոր է մոտիվացիոն բնույթի գրքեր կարդալը և հատկապես խորհուրդները կիրառելը:

2018թ. մարտի 21-ին Տնտեսագիտության ֆակուլտետում տեղի ունեցավ միջոցառում՝ նվիրված հայ մեծ գործարարներին:

Միջոցառումը կազմակերպել էր Ընդհանուր տնտեսագիտության ամբիոնի դասախոս Ա.Ալեքսանյանը, իսկ ելույթներով հանդես եկան «Տնտեսագիտության տեսություն» մասնագիտության 4-րդ կուրսի ուսանողները:

Նրանք ելույթներ ունեցան հայ գործարարների, այդ թվում՝ Ռուբեն Վարդանյանի, Քըրք Քըրքորյանի, Ռոբերտ Թատեոսիանի, Էդուարդո Էռնեկյանի և այլ մեծ գործարարների մասին:

Ելույթների ավարտից հետո ներկա գտնվող դասախոսներից արտահայտվեցին՝ ողջունելով նախաձեռնությունը:

2018թ. մարտի 21-ին Հումանիտար գիտությունների ֆակուլտետում տեղի ունեցավ Պոեզիայի համաշխարհային օրվան նվիրված գրական-երաժշտական ցերեկույթ, որը նախաձեռնել էր ֆակուլտետի ուսանողական գիտական ընկերությունը:

Ներկա էին Հումանիտար գիտությունների ֆակուլտետի դասախոսներ և ուսանողներ:

Միջոցառման սկզբում ներկայացվեց, որ այդ օրն առաջին անգամ նշվել է 1999 թվականին, երբ ՅՈՒՆԵՍԿՕ-ի 30-րդ վեհաժողովում որոշում ընդունվեց մարտի 21-ը նշել որպես Պոեզիայի միջազգային օր:

Միջոցառման ընթացքում ուսանողներն արտասանեցին հայ և օտարազգի մեծանուն պոետների  բանաստեղծական գոհարներից:

«Հայոց լեզու և գրականություն» մասնագիտության 2-րդ կուրսի ուսանողուհի Արմիդա Բաղիյանը ներկայացրեց հայ և ռուս խոշոր բանաստեղծներ Համո Սահյանի և Ալեքսանդր Պուշկինի ստեղծագործություններից:

Նույն կուրսի ուսանողուհի Աստղիկ Ղազարյանը  ներկայացրեց ճապոնական պոեզիան, մասնավորապես անդրադարձավ հոքուներին և թանկաներին, որոնք հնգատող և եռատող բանաստեղծություններ են:

Լուսինե Հակոբյանն արտասանեց  Իրանի փառքը կազմող 4 բանաստեղծներից մեկի` Օմար Խայամի ստեղծագործություններից:

Ապա ելույթ ունեցան «Տարրական մանկավարժություն և մեթոդիկա» մասնագիտության 2-րդ կուրսի  ուսանողուհիներ Վանուհի Հարությունյանը, Մարինե Մարտիրոսյանը, Արինա Ալավերդյանը, Ասյա Սարիբեկյանը, Աշխեն Վիրաբյանը՝ ներկայացնելով Ավետիք Իսահակյանի, Պարույր Սևակի, Հովհաննես Թումանյանի, Հովհաննես Շիրազի,  Ժակ Պրևերի  բանաստեղծություններից:

Ասյա Սարիբեկյանն արտասանեց հեղինակային բանաստեղծություն, որը կոչվում էր «Լռություն»:

Երաժշտական կատարմամբ հանդես եկան «Հայոց լեզու և գրականություն» մասնագիտության 2-րդ կուրսի ուսանողուհիներ Նինա Հարությունյանը և Լիանա Յարալյանը, «Պատմություն» մասնագիտության 2-րդ կուրսի ուսանողուհի Դիանա Յարալյանը, «Տարրական մանկավարժություն և մեթոդիկա» մասնագիտության 2-րդ կուրսի  ուսանողուհի Մարինե Մարտիրոսյանը:

Վերջում բանաստեղծական գեղեցիկ պատառիկներով պոեզիայի տոնը ծաղկեցրին Հայոց լեզվի և գրականության ամբիոնի դասախոսներ, բ.գ.թ., դոցենտ Աիդա Սարհատյանը և բ.գ.թ., ասիստենտ Ալիսա Հասանյանը:

2018թ. մարտի 20-ին ԵՊՀ ԻՄ-ի նորաստեղծ Երիտասարդ ծրագրավորողների (IT) ակումբում կայացավ «Մեքենայական ուսուցումը» թեմայով սեմինար-քննարկումը, որը վարեց ակումբի գիտական ղեկավար, Բնական գիտությունների ֆակուլտետի ծրագրավորման և ինֆորմացիոն տեխնոլոգիաների ամբիոնի տեխ. գիտ. թեկնածու, դոցենտ Աննա Սմբատի Սիմոնյանը:

Քննարկման սկզբում «Վեբ կայքերի դերը ժամանակակից աշխարհում» թեմայով զեկուցում կարդաց «ԻԿՄ» մասնագիտության 1-ին կուրսի ուսանող Սարմեն Բեջանյանը՝ ներկայացնելով իր ստեղծած վեբ կայքը։

Սեմինար-քննարկման ընթացքում ներկայացվեցին Մեքենայական ուսուցման առանձնահատկությունները:

Կլոր սեղանի շուրջ իրականացվեց խաղային մեթոդով քննարկում՝ «Ի՞նչ է սովորող մեքենա կամ մեքենայով սովորելը» թեմայով:

Ա.Սիմոնյանը ուսանողներին ներկայացրեց «Գուշակիր հաջորդ թիվը» մաթեմատիկական հետևյալ խաղը.

«Գուշակեք հաջորդ թիվը.

1,1,2,3,5,8,13, ?

Եթե օգտագործենք Ֆիբոնաչիի հաջորդականությունը.

X_n+1 = X_n + X_n-1 ; -ը, ապա պատասխանը կլինի 21: Սակայն ինչու՞ ոչ այլ թիվ, օրինակ, ինչու՞  ոչ 2799։ Օրինաչափություն չկա՞։ Այն գուցե՞ 20  է։

1,1,2,3,5,8,13, 20

Եթե օգտագործենք.

առնչությունը, ապա հաջորդ թիվը կստացվի 20»։

Նշվեց, որ այդ հաջորդականությունը 2017թ. հոկտեմբերին Երևանում կայացած «Մեքենայական ուսուցումը՝ գիտական հայտնագործությունների խթան» թեմայով միջազգային աշխատաժողովում Չիկագոյի համալսարանի դոկտոր Մեսրոբ Օհաննեսյանը անվանել է «Կեղծոնաչի»։

Ներկայացված խաղը նպատակ ուներ, որ սուբյեկտը, դիտարկելով անցյալի տվյալները, կարողանա գնահատել ապագա դիտարկումները։

Տրվեց մեքենայական ուսուցման (“Machine learning”) սահմանումը. այն համակարգչային գիտությունների արհեսատական իտելեկտի ենթաբաժին է, որն ուսումնասիրում է ինքնուրույն ուսուցանվող համակարգերի մոդելներն ու դրանց կառուցման և ուսուցման համար նախատեսված ալգորիթմները։ Այն հնարավորություն է տալիս մեքենային փորձնական տվյալների հիման վրա սովորել այն, ինչը բացահայտ ծրագրավորած չէ։ Մեքենայական ուսուցումը նաև սերտ կապված է վիճակագրության և օպտիմիզացիայի հետ։ Այն մաթեմատիկայի և համակարգչային գիտությունների խաչմերուկում գտնվող ուղղություն է, որն ուսումնասիրում է, թե ինչպես կարող են համակարգչային ծրագրերը սովորել կատարել ինչ-որ գործողություններ՝ մեծ թվով օրինակներ նայելով:

Ներկայացվեցին մեքենայական ուսուցման կիրառության ոլորտները.

• Որոնողական համակարգեր (Web search engine)
• Խոսքի ճանաչում (Speech recognition)
• Կենսաինֆորմատիկա (Bioinformatics)
• Ձեռագիր տեքստի ճանաչում (Handwriting recognition)
• Բնական լեզվի մշակում (Natural language processing)
• Համակարգչային տեսլական (Computer vision)
• Կերպարների ճանաչում (Pattern recognition)
• Տեքստի էմոցիաների վերլուծություն (Sentiment analysis):

Նշվեց, որ վերջին տարիներին աշխարհում այդ ուղղությունը զարգանում է մեծ տեմպերով, բոլոր խոշոր համալսարաններն ու տեխնոլոգիական ընկերություններն ունեն այդ թեմայով զբաղվող հետազոտական խմբեր։ Որպես օրինակ նշվեց, որ մեքենայական ուսուցման շնորհիվ “Google DeepMind”-ում մշակված “AlphaGo” ծրագիրը, որը չինական “Go” խաղում կարողանում է հաղթել մարդկանց, “Facebook” սոցիալական ցանցը կույր օգտատերերի համար կարողանում է բառերով նկարագրել լուսանկարները, “Google”-ը բարձրացնում է մեքենայական թարգմանության որակը, “Microsoft”-ը կարողանում է վերծանել ձայնագրություններում հնչող խոսքը և այլն:

Ծավալվեց բուռն քննարկում՝ ակումբի անդամների մասնակցությամբ:

Նշվեց, որ ակումբի հաջորդ քննարկումը նվիրված կլինի վիրտուալ իրականությանը (“Virtual Reality”) և 360 աստիճան տեխնոլոգիային:

Մատնանշելով, որ ակումբը կոչված է բարձրացնելու ուսանողների մասնագիտական հմտությունները, զարգացնելու նրանց  պրակտիկ գիտելիքներն ու կարողությունները՝ Ա.Սիմոնյանը ցանկություն հայտնեց, որ ակումբի քննարկումներին մասնակցեն, զեկուցումներով հանդես գան ոչ միայն ուսանողները, այլև դասախոսները կամ հրավիրյալ բանախոսները։