2023թ. մայիսի 26-ին ճանաչողական այցով ԵՊՀ Իջևանի մասնաճյուղում հյուրընկալվել էին Տավուշի՝ Պ․Տէվէճեանի անվան տարածաշրջանային քոլեջի այս տարվա շրջանավարտները՝ ԵՊՀ ԻՄ-ի պրակտիկայի կազմակերպման և շահակիցների հետ համագործակցության բաժնի վարիչ Լ.Բեգինյանի, նույն բաժնի տեսուչ Ա.Սարգսյանի և քոլեջի կուրսղեկ Ռ․Զուրաբյանի  ուղեկցությամբ:

Քոլեջի շրջանավարտները նախ շրջայց կատարեցին ԵՊՀ Իջևանի մասնաճյուղում, ծանոթացան համալսարանական առօրյային, ֆակուլտետներին, իրականացվող կրթական ծրագրերին, բուհում կրթությունը շարունակելու հնարավորություններին, տեղեկատվություն ստացան մասնաճյուղի տարածքում գործող ուսումնագիտական կենտրոնների, ուսանողական կառույցների մասին, ապա ունեցան հանդիպում-քննարկումներ:

Ելնելով քոլեջի շրջանավարտների հետաքրքրություններից՝ հանդիպում կազմակերպվեց Տնտեսագիտության ֆակուլտետի դեկանի պաշտոնակատար, ֆ.մ.գ.թ., դոցենտ Ա․Մարգարյանի և դասախոս Ս․Սաֆարյանի հետ: Հանդիպման ընթացքում քննարկվեցին «Զբոսաշրջություն» և «Ֆինանսներ (ըստ ոլորտի)» կրթական ծրագրերի առանձնահատկություները, աշխատաշուկայի հնարավորությունները:

Ապա քոլեջի սաները հանդիպեցին Ուսումնամեթոդական վարչության պետ Ա․Դավթյանի հետ, ով միջին մասնագիտական ուսումնական հաստատությունում ուսումնառության ընթացքում բարձր առաջադիմություն ցուցաբերած (միայն «Լավ» և (կամ) «Գերազանց» գնահատականներ ունեցող) շրջանավարտներին ներկայացրեց հեռակա ուսուցմամբ երկրորդ կուրսում նախընտրած մասնագիտությամբ ուսումը շարունակելու ընթացակարգը:

Հավակնորդ շրջանավարտները պարոն Դավթյանին մեծ հետաքրքրությամբ լսեցին և նրանից ստացան իրենց հետաքրքրող հարցերի պատասխանները, որոնք գլխավորապես վերաբերում էին ընդունելության անհրաժեշտ փաստաթղթերին, դրանց ներկայացման ժամկետներին, մրցույթի կազմակերպմանը, առարկայական տարբերություններին, ժամանակացույցին, վճարաչափերին:

Հանրապետության գլխավոր զբոսաշրջային դեստինացիայի զբոսաշրջային ռեսուրսների և ենթակառուցվածքների ուսումնասիրման ու գնահատման նպատակով ԵՊՀ ԻՄ-ի առկա ուսուցման «Զբոսաշրջություն» կրթական ծրագրի առաջին կուրսի ուսանողները պրակտիկայի ղեկավար Ա.Ուլիխանյանի  գլխավորությամբ այցելեցին Երևան և Զվարթնոցի տաճար:

Պրակտիկան իրականացվեց հետևյալ երթուղով՝ Իջևան–Զվարթնոցի տաճար–«Էրեբունի» պատմահնագիտական արգելոց-թանգարան–Հայաստանի պատմության թանգարան–Երվանդ Քոչարի տուն-թանգարան–Կասկադ համալիրի սրահներ–«Ռամադա» հյուրանոց–Բուսաբանական այգի–Իջևան: Երթուղու ընթացքում ուսանողներին ներկայացվեցին մայրաքաղաքի պատմությունը, գլխավոր փողոցները,  զբոսաշրջային ռեսուրսները և ենթակառուցվածքները:

Այցելվող օբյեկտների վերաբերյալ ուսանողները նյութեր էին նախապատրաստել, իսկ այցելության ընթացքում տվյալ օբյեկտները նրանք մասնագիտորեն ուսումնասիրեցին, ներկայացրին և գնահատեցին զբոսաշրջային փաթեթներում  դրանց ընդգրկվածությունը:

Զվարթնոցի տաճարի  ստեղծման պատմությանը, ճարտարապետական լուծմանն ու գեղարվեստական տարրերին ծանոթանալուց հետո ուսանողներն այցելեցին Երևանի թանգարաններ: Այցելությունը սկսեցին «Էրեբունի» պատմահնագիտական արգելոց-թանգարանից, որտեղ Երևան-Էրեբունու ծննդյան վկայականի սեպագիր արձանագրության  միջոցով ծանոթացան ամրոցի հիմնադրման պատմությանը, ճարտարապետությանը, ռելիեֆներին, որմնանկարների  պահպանված նմուշներին, դեկորատիվ-կիրառական արվեստի  գործերին: Գաֆէսճեան ժամանակակից արվեստի կենտրոնում, որը գտնվում է Կասկադ համալիրում, պրակտիկանտներն ուսումնասիրեցին Ջերարդ Գաֆէսճեանի ժամանակակից արվեստի հավաքածուն, համալիրի սրահների ցուցադրությունները:

Պրակտիկան կազմակերպվել էր «Թանգարանային գիշեր» մշակութային միջոցառման շրջանակներում, որի ընթացքում թանգարաններն ու մշակութային հաստատությունները բաց են մնում մինչև ուշ գիշեր, որը նպաստում է այցելությունների և զբոսաշրջային հոսքերի ավելացմանը: Ըստ այդմ՝ թանգարաններում ուսանողները ոչ միայն ծանոթացան ցուցանմուշներին, այլև դիտարկեցին և գնահատեցին զբոսաշրջիկների հոսքը:

 2023թ. մայիսի 22-ին ԵՊՀ ԻՄ-ի պրակտիկայի կազմակերպման և շահակիցների հետ համագործակցության բաժնի և Ուսանողական գիտական ընկերության նախաձեռնությամբ Իջևանի՝ Գ․Անանյանի անվան ավագ դպրոցում կայացավ «Ամենախելացին» ինտելեկտուալ խաղը, որին մասնակցում էր 11-րդ դասարանի 12 աշակերտ: Խաղը վարեց ՈՒԳԸ նախագահը՝ «Ֆինանսներ» մասնագիտության 2-րդ կուրսի ուսանողուհի Անի Թիրաբյանը:

Ինտելեկտուալ խաղի առաջին փուլում տրվեց ընդհանուր զարգացվածությունը ստուգող 10 հարց: Առավելագույն միավոր հավաքած 6 աշակերտները հնարավորություն ստացան խաղը շարունակելու երկրորդ փուլում:

Մասնակիցները երկրորդ փուլում 12-ից ընտրեցին 2-ական թեմա և փորձեցին պատասխանել իրենց ընտրած թեմայի հարցերին 1 րոպեի ընթացքում: Լարված մրցակցության պայմաններում 2-րդ փուլը հաղթահարեցին Թամարա Առաքելյանը, Սյուզաննա Հովասափյանը և Պարթև Մելիքբեկյանը:

Թեժ պայքար ծավալվեց նաև 3-րդ փուլում, որի ընթացքում ևս մասնակիցները պատասխանեցին իրենց կողմից նախապես ընտրված թեմայի հարցերին:

Առավելագույն միավորներ վաստակելով՝ «Ամենախելացին» խաղի հաղթող ճանաչվեց Թամարա Առաքելյանը, 2-րդ և 3-րդ հորիզոնականները համապատասխանաբար զբաղեցրին Պարթև Մելիքբեկյանը և Սյուզաննա Հովասափյանը:

Հաղթողները ԵՊՀ Իջևանի մասնաճյուղի կողմից պարգևատրվեցին պատվոգրերով և գրքերով:

Աշակերտները շատ տպավորված էին խաղով և ցանկություն հայտնեցին այդպիսի միջոցառումների նորից մասնակցել:

Նմանատիպ միջոցառումները ոչ միայն ամրապնդում են դպրոց-համալսարան կապը, այլև նպաստում են աշակերտների մոտիվացիայի աճին, նոր գիտելիքների ձեռքբերմանը և բազմակողմանի զարգացմանը:

 «Երևանի պետական համալսարան» հիմնադրամի Իջևանի մասնաճյուղը՝ ի դեմս տնօրենի պաշտոնակատար Ա.Մակարյանի, և «Դիլիջանի պետական քոլեջ» պետական ոչ առևտրային կազմակերպությունը՝ ի դեմս տնօրեն Վ.Հովհաննիսյանի, կնքեցին համագործակցության համաձայնագիր՝ բարձրագույն ուսումնական հաստատությունում միջին մասնագիտական ուսումնական հաստատության բարձր առաջադիմություն ցուցաբերած շրջանավարտների ուսուցումը շարունակելու մասին:

Մինչև համաձայնագրի ստորագրումը քոլեջից համալսարան ընդունվելու գործընթացի մանրամասների վերաբերյալ խորհրդատվությամբ հանդես եկան Ուսումնամեթոդական վարչության պետ Ա.Դավթյանը և ՈՒՄՎ ուսումնական գործընթացի կազմակերպման և վերահսկման բաժնի վարիչ Ն.Առուշանյանը՝ անդրադառնալով առարկայական տարբերությունների հաշվարկով մասնագիտությունների ընտրության նպատակահարմարությանը:

Կնքված համաձայնագրով կողմերը ստանձնեցին ԵՊՀ Իջևանի մասնաճյուղում Դիլիջանի պետական քոլեջի շրջանավարտների ուսումը շարունակելու համար անհրաժեշտ մի շարք պարտականություններ:

ԵՊՀ ԻՄ-ը մասնավորապես պարտավորվեց՝

• իրականացնել քոլեջի բարձր առաջադիմություն (միայն «Լավ» և «Գերազանց» գնահատականներ ունեցող) ցուցաբերած շրջանավարտների ուսուցումը բուհի բակալավրիատի հեռակա ուսուցման 2-րդ կուրսից՝ վճարովի համակարգում՝ տվյալ ուսումնական տարվա համար ՀՀ ԿԳՄՍ նախարարության կողմից համապատասխան կրթական ծրագրերի գծով բուհին հատկացված տեղերի սահմաններում,
• համագործակցել քոլեջի հետ ուսումնական պլանների և առարկայական ծրագրերի փոխհամաձայնեցման և վերամշակման աշխատանքներում,
• քոլեջին ցույց տալ համապատասխան մեթոդական և մասնագիտական օգնություն՝ ուսումնական գործընթացն ավելի արդյունավետ կազմակերպելու նպատակով,
• կազմակերպել ուսուցում հեռակա ուսուցման համակարգում հետևյալ կրթական ծրագրերի գծով՝ «Տարրական մանկավարժություն և մեթոդիկա», «Հոգեբանություն», «Ֆինանսներ (ըստ ոլորտի)», «Զբոսաշրջություն», «Պատմություն» և այլն:

Քոլեջը պարտավորվեց՝

• պետական որակավորող հանձնաժողովի կազմում ընդգրկել բուհի և քոլեջի ներկայացուցիչներ՝ հավասար թվով,
• ամփոփիչ ստուգման արդյունքների հիման վրա իրականացնել բուհում ուսումը շարունակող հավակնորդների մրցույթ և արդյունքների մասին արձանագրությունը ներկայացնել բուհ,
• վերանայել և բուհի ուսումնական պլանների հետ համաձայնեցնել քոլեջի ուսումնական պլանները և առարկայական ծրագրերը համապատասխան մասնագիտությունների գծով:

Հանդիպումն ավարտվեց համաձայնագրի դրույթների իրականացման վերաբերյալ կողմերի պատրաստակամության արտահայտմամբ:

 2023թ. մայիսի 16-19-ին ԵՊՀ Իջևանի մասնաճյուղի ուսանողական խորհուրդը նախաձեռնել էր մշակութային և սպորտային բաց առաջնություն, որին մասնակցեցին ուսանողներ, դասախոսներ և հանրակրթական դպրոցների աշակերտներ:

Բաց առաջնության ընթացքում մասնակիցները հանդես եկան 4 ասպարեզներում՝ ասմունք, երգ, շախմատ և սեղանի թենիս:

Մայիսի 16-ին մասնաճյուղի դահլիճում տեղի ունեցավ ասմունքի մրցույթ-փառատոնը, որով պաշտոնապես մեկնարկեց բաց առաջնությունը: Ժյուրիի որոշմամբ ասմունքի փառատոնում 1-ին տեղը գրավեց Գոհար Վիրաբյանը, 2-րդ տեղը՝ Լիդա Ցուցուլյանը և Լիլիթ Կիրակոսյանը, 3-րդ տեղը` Տիգրան Եղիազարյանը:

Մայիսի 17-ին տեղի ունեցավ շախմատի առաջնությունը, որտեղ 1-ին հորիզոնականը զբաղեցրեց Արայիկ Թիրաբյանը, 2-րդ հորիզոնականը՝ Դավիթ Ավետիսյանը, 3-րդը` Էրիկ Չիբուխչյանը: Դիտարժան ու հետաքրքիր խաղի համար մրցավարների որոշմամբ հատուկ մրցանակի արժանացավ Սլավա Կոնջորյանը:

Մայիսի 18-ին կայացավ երգի մրցույթը, որտեղ մասնակիցները ներկայացրին հայկական ժողովրդական, ինչպես նաև արտասահմանյան երգեր: Ժյուրիի անդամների որոշմամբ երաժշտական մրցույթի 1-ին հորիզոնականը զբաղեցրեց Անի Ուլիխանյանը, 2-րդ հորիզոնականը՝ Լիլիթ Թորոսյանը, 3-րդը` Սառա Քամալյանը:

Մայիսի 19-ին տեղի ունեցավ առաջության վերջին մրցույթը: Մասնակիցներն իրենց ուժերը փորձեցին սեղանի թենիսի մարզաձևում, որտեղ 1-ին հորիզոնականը զբաղեցրեց Անդրանիկ Ղալթախչյանը, 2-րդ հորիզոնականը՝ Դավիթ Ալեքսանյանը, 3-րդ հորիզոնականը` Էրիկ Խաչատրյանը:

Ուսանողական խորհուրդը շարունակելու է նախաձեռնել նմանօրինակ մրցույթներ և առաջնություններ` ստեղծելով հարթակ` ինքնադրսևորման և սեփական կարողությունները կատարելագործելու համար:

Բաց առաջնության հաղթողների պարգևատրման արարողությունը կկայանա ս.թ. մայիսի 24-ին` ժամը 12:00-ին, ԵՊՀ Իջևանի մասնաճյուղի գիտական խորհրդի նիստերի սենյակում: