2018թ. հունվարի  23-ին ԵՊՀ Իջևանի մասնաճյուղում կայացավ Կիրառական արվեստի ֆակուլտետի գիտական խորհրդի ընդլայնված նիստ, որը նախագահում էր ֆակուլտետի դեկանի ԺՊ, ֆիզմաթ. գիտ. թեկնածու, ասիստենտ Ա.Մարգարյանը:

Ֆակուլտետի գիտխորհրդի նիստին մասնակցում էին ԵՊՀ ԻՄ-ի տնօրեն Ս. Ա. Առաքելյանը, խորհրդի անդամները, ֆակուլտետի վարչական և պրոֆեսորադասախոսական անձնակազմի ներկայացուցիչները, հրավիրված էին Ուսումնամեթոդական վարչության պետ Ա.Դավթյանը, մասնաճյուղի գիտական խորհրդի քարտուղար Մ.Աթոյանը, տնօրենի օգնական Ն.Գրիգորյանը, հասարակայնության հետ կապերի և մամուլի պատասխանատու Հ.Վանյանը:

Նիստի ընթացքում քննարկվեցին օրակարգով նախատեսված հետևյալ հարցերը.

1. 2017-18 ուստարվա առաջին կիսամյակի քննաշրջանի արդյունքների ամփոփում (առանց լուծարքի շրջանի):
2. 2017-18 ուստարվա երկրորդ կիսամյակի նախապատրաստական աշխատանքների մասին:     
3. Ընթացիկ հարցեր:

Զեկուցող՝ Ա. Շ. Մարգարյան

Ֆակուլտետի գիտխորհրդի նախագահ, դեկանի ԺՊ Ա.Մարգարյանը, ելնելով ֆակուլտետի և մասնաճյուղի զարգացման՝ 2016-2020 թթ. ռազմավարական  ծրագրի պահանջներից, ներկայացրեց 2017-18 ուստարվա 1-ին կիսամյակում իրականացված աշխատանքների  վերաբերյալ զեկուցում:

Մասնավորապես նշվեց, որ, ընդունված կարգի համաձայն, ուստարվա սկզբին քննարկվում և հաստատվում են յուրաքանչյուր ստորաբաժանման աշխատանքային պլանները և նրանց իրականացման ժամանակացույցները՝ հաշվի առնելով ընթացիկ տարվա առանձնահատկությունները:

2017թ. սեպտեմբերի 1-ից ֆակուլտետում գործող երեք կրթական ծրագրերից «Համակարգչային գրաֆիկա» ծրագրով II-րդ կուրս էին փոխադրվել երեք ուսանող (մյուսները զորակոչվել էին ՀՀ ազգային բանակ): Նրանց հետագա ուսումնառությունը այդ կազմով նպատակահարմար չէր և հակասում էր ԵՊՀ ուսանողական ակադեմիական խմբերի նորմաների պահանջներին, ուստի վերոնշյալ ուսանողները դիմեցին տնօրենությանը՝ հետագա ուսումնառությունը «Դիզայն» կրթական ծրագրով շարունակելու խնդրանքով, ինչը և բավարարվեց:

2017-18 ուստարվա սկզբից ֆակուլտետն ունի 68 ուսանող (46 վճարովի, 22 անվճար):

Ֆակուլտետի գործունեության թափանցիկությունն ապահովելու նպատակով դեկանատի, ամբիոնի և ֆակուլտետի խորհրդի նիստերի կազմակերպման ժամանակացույցները ներկայացվում, նրանց քննարկվող հարցերի մասին նախապես տեղեկացվում են 19 աշխատակիցները (13 դասախոս, 6 ուսումնաօժանդակ)  և  ուսանողները: Կայացված որոշումները, մասնավորապես՝ ստուգարքներից և քննություններից անմիջապես հետո գնահատման ամփոփ տվյալները փակցվում են հայտարարությունների տախտակին և տեղադրվում մասնաճյուղի պաշտոնական կայքէջում:

Ներկայացվեց, որ 1-ին կիսամյակի բոլոր ստուգարքները, ընթացիկ և եզրափակիչ քննությունները անց են կացվել համաձայն նախապես հաստատված ժամանակացույցի, որին, բացի 1 ուսանողից, մասնակցել են ֆակուլտետի բոլոր ուսանողները:

Առաջադիմությունը, ըստ կուրսերի, խիստ տարբեր էր և ուներ հետևյալ պատկերը.

• «Դիզայն» I կուրս – 63.64%,
• «Դիզայն» II կուրս – 92,3%,
• «Դիզայն» III-ին կուրս – 88,9%,
• «Դիզայն» IV կուրս – 90%,
• «Կիրառական արվեստ» III-րդ կուրս – 85,7%,
• «Կիրառական արվեստ» IV-րդ կուրս – 85,7%:

Ֆակուլտետի ընդհանուր առաջադիմությունը կազմում էր 80,88%:

Ա.Մարգարյանը հավելեց, որ այս տարի քննությունների անցկացման մեջ կատարվել են որոշ փոփոխություններ, մասնավորապես՝ գնահատականները նշանակվել են ուսանողների ներկայությամբ, իրենց աշխատանքները ներկայացնելուց անմիջապես հետո՝ մատնանշելով թերություներն ու բացթողումները:

Օրակարգային հարցերի քննարկումից հետո ելույթ ունեցավ մասնաճյուղի տնօրեն Ս. Ա. Առաքելյանը: Նա իր խոսքում ընդգծեց, որ աշխատանքների որակը բարելավելու նպատակով ուսանողներին տրվեն կիրառական բնույթի և ավելի բարդ առաջադրանքներ, մեծացվի արտալսարանային, ինքնուրույն աշխատանքների ծավալը, դասախոսների կողմից հետևողականություն դրսևորվի դրանց իրականացման վերահսկողության և գնահատման հարցերում: Տնօրենը ֆակուլտետի դեկանին հանձնարարեց կազմել առաջարկությունների փաթեթ և ներկայացնել, թե նյութատեխնիկական ինչպիսի միջոցներ են անհրաժեշտ իրենց աշխատանքներն առավել արդյունավետ կազմակերպելու համար:

2018թ. հունվարի 17-ին ՀՀ ՊՆ Իջևանի զինկոմիսարիատում կայացավ Տավուշի մարզից զինծառայության մեկնող նորակոչիկների ճանապարհման հանդիսավոր արարողությունը, որին մասնակցեցին զինկոմիսարիատի, տարածքային կառավարման մարմինների ներկայացուցիչներ, համալսարանականներ՝ ԵՊՀ ԻՄ-ի տնօրեն Ս. Ա. Առաքելյանի գլխավորությամբ, զորակոչիկների ծնողները, հարազատները, քաղաքացիներ:

Զորակոչված 43 զինակոչիկների մեջ կային ԵՊՀ ԻՄ-ի մեկ տասնյակ ուսանողներ:

Հանդիսավոր միջոցառմանը ելույթ ունեցավ ԵՊՀ Իջևանի մասնաճյուղի տնօրեն Սամվել Առաքելյանը, ով բարի երթ ու խաղաղ ծառայություն մաղթեց նորակոչիկներին, շեշտեց ամեն հայ երիտասարդի համար զինվորական ծառայության անհրաժեշտությունը՝ և՛ հայրենիքի հանդեպ սուրբ պարտքը կատարելու, և՛ նրանց մեջ բարոյակամային հատկանիշները զարգացնելու իմաստներով:

Մասնաճյուղի տնօրեն Ս.Առաքելյանը իր խոսքում շնորհակալություն հայտնեց զորակոչիկների ծնողներին՝ հայրենիքի անվեհեր պաշտպաններ ծնելու և դաստիարակելու համար, նրանց մաղթեց տոկունություն ու համբերություն:

Բարեմաղթանքներ ու հայրենասիրական պատգամներ հղելուց հետո տնօրենը նորակոչիկներին  հանձնեց սրբապատկերներ ու նոթատետրեր:

2018թ. հունվարի 15-ին  ԵՊՀ ԻՄ-ի տնօրեն Ս. Ա. Առաքելյանը խորհրդակցություն անցկացրեց մասնաճյուղի մի խումբ վարչական աշխատակիցների հետ:

Խորհրդակցության ընթացքում քննարկվեցին ԵՊՀ ԻՄ-ի՝ 2017-2018 ուստարվա առաջին կիսամյակի քննաշրջանի ընթացքին, երկրորդ կիսամյակի նախապատրաստական աշխատանքներին ու հատկապես Բակալավրի ավարտական աշխատանքի պատրաստման և գնահատման նոր կարգին վերաբերող հարցեր:

Մասնավորապես նշվեց, որ այս տարի արդեն ամփոփիչ ատեստավորումն իրականացվելու է միայն ավարտական աշխատանքների պաշտպանության միջոցով, ամփոփիչ քննություններ չեն լինելու, և անհրաժեշտ է հետևողական լինել, որ ավարտական աշխատանքները լիովին իրականացվեն ըստ նոր կարգի:

Բակալավրի ավարտական աշխատանքի պատրաստման և գնահատման կարգով սահմանված չափանիշների համաձայն՝ ավարտական աշխատանքի գնահատումն, օրինակ, իրականացվում է 20 միավորանոց սանդղակով, «Աշխատանքի արդիականության հիմնավորումը և գրականության վերլուծությունը» չափանիշի համար սահմանված է առավելագույնը 2 միավոր, «Աշխատանքի կատարումը և արդյունքները» չափանիշի համար՝ առավելագույնը 6 միավոր, «Աշխատանքի շարադրումը և ձևավորումը» չափանիշի համար՝ առավելագույնը 4 միավոր, հրապարակային պաշտպանության համար՝ առավելագույնը 8 միավոր:

Տնօրենը ֆակուլտետների դեկաններին հանձնարարեց ավարտական կուրսերի ուսանողների հետ կազմակերպել հանդիպումներ և նրանց հանգմանորեն ներկայացնել նոր կարգը, բակալավրի ավարտական աշխատանքին ներկայացվող պահանջները, օրինակելի կառուցվածքը, ձևավորումը, պաշտպանությունը, աշխատանքի գնահատման չափանիշները, դրանց համապատասխան չափորոշիչներն ու հատկացվող միավորները և այլն:

2018թ. հունվարի 11-ին  ԵՊՀ Իջևանի մասնաճյուղում կայացավ տնօրեն Ս. Ա. Առաքելյանի հանդիպումը բուհի վարչական անձնակազմի ներկայացուցիչների (Ուսումամեթոդական վարչության, Մարդկային ռեսուրսների կառավարման, Մասնագիտական կրթության որակի ապահովման, Հաշվապահության, Գնումների, մատակարարման և պահեստավորման բաժնի աշխատակիցների, գիտքարտուղարի, հասարակայնության հետ կապերի և մամուլի պատասխանատուի) հետ:

Հանդիպման ընթացքում քննարկվեցին բաժինների գործունեությանը, առաջիկա անելիքներին ու ծրագրերին,  աշխատակիցների գործառույթներին,  նրանց աշխատանքի արդյունավետության բարձրացմանը վերաբերող մի շարք հարցեր:

Ուշադրություն դարձվեց պրակտիկաների կազմակերպման և իրականացման խնդրին, որի կապակցությամբ Ուսումնամեթոդական վարչությանը հանձնարարվեց ներկայացնել առաջարկություններ՝ պրակտիկաների հետ կապված աշխատանքների արդյունավետությունը բարձրացնելու համար:

Մարդկային ռեսուրսների կառավարման և վերապատրաստման բաժնի գործառույթների ու խնդիրների հետ կապված՝ ընդգծվեց, որ վերակազմավորված բաժինը պիտի արդյունավետ կերպով զբաղվի ոչ միայն ԵՊՀ ԻՄ-ի աշխատողների աշխատանքի ընդունման և ազատման գործընթացի, նրանց անձնական տվյալների վարման, համապատասխան հրամանների, պայմանագրերի և այլ փաստաթղթերի ձևակերպման, պաշտոնի անձնագրերի, աշխատանքի նկարագրության և աշխատողի պարտականություններն ու իրավասությունը սահմանող իրավական այլ ակտերի նախապատրաստման ու ընդունման աշխատանքներով, այլև կադրային ճիշտ քաղաքականության վարման, մի խոսքով՝ աշխատակազմի հավաքագրման, տեղաբաշխման և գնահատման խնդիրներով:  

Վերհանվեցին նաև մյուս բաժինների գործունեությանը այս կամ այն կերպ խոչընդոտող խնդիրները և  դարձյալ հանձնարարվեց դրանց վերացման ուղղությամբ մշակել և ներկայացնել առաջարկությունների փաթեթ: