2017թ. դեկտեմբերի 15-ին ԵՊՀ Պալեանների անվան դահլիճում տեղի ունեցավ ԵՊՀ ուսանողական գիտական ընկերության՝ 2017-2018 ուստարվա առաջին կիսամյակի ընդլայնված նիստը, որը վարում էր ԵՊՀ ՈՒԳԸ նախագահ Մհեր Հակոբյանը:

Ներկա էին ԵՊՀ-ի բոլոր ֆակուլտետների, կենտրոնների, ինստիտուտների և Իջևանի մասնաճյուղի ՈՒԳԸ-ների ներկայացուցիչներ:

Մ.Հակոբյանը, ողջունելով բոլոր մասնակիցներին, նշեց, որ այս ուստարվա ընդլայնված նիստը տարբերվում է մյուս նիստերից, քանի որ ամփոփվում է նաև հոբելյանական տարին: Նա փաստեց, որ 4-րդ միջազգային գիտաժողովին ներկայացվել է 400 հայտ՝ 25 երկրների 57 բուհերից, զեկուցումներով հանդես են եկել 14 երկրների 350 մասնակիցներ, և այն այս տարվա ամենակարևոր միջոցառումներից էր:

Նա ներկայացրեց նաև այս կիսամյակի նոր ծրագիրը՝ «Հետադարձ հայացք»-ը, որի շրջանակներում անցկացվում են հարցազրույցներ ՈՒԳԸ նախկին նախագահների հետ՝ ներկայացնելով նրանց փորձը, հմտություններն ու հիշողությունները:

Ընդլայնված նիստում ներկայացվեցին նաև ՈՒԳԸ համալրումները և ձեռքբերումները, ֆակուլտետային ՈՒԳԸ և հանձնաժողովների ցուցանիշները:

Ակտիվ գործունեություն ծավալած ստորաբաժանումները և ՈՒԳԸ ակտիվ անդամները պարգևատրվեցին հավաստագրերով և գրքերով։

ԵՊՀ 5 ֆակուլտետների և Իջևանի մասնաճյուղի ուսանողական գիտական ընկերությունների գործունեությունը գնահատվել էր «գերազանց»:

Պարգևը ստացավ ԵՊՀ ԻՄ-ի ՈՒԳԸ նախագահ Հրանտ Ղարագյոզյանը:

Պարգևատրվեց նաև մասնաճյուղի ՈՒԳԸ ակտիվ անդամ, Բնական գիտությունների ֆակուլտետի «Քարտեզագրություն և կադաստրային գործ» մասնագիտության 4-րդ կուրսի ուսանողուհի Նառա Մնացականյանը:

Եզրափակելով իր խոսքը՝ Մհեր Հակոբյանը ներկայացրեց նաև հաջորդ տարվա գլխավոր միջոցառումը՝ 5-րդ միջազգային գիտաժողովը, որը տեղի կունենա ապրիլի 16-20-ը և նվիրված կլինի Հայաստանի առաջին հանրապետության հիմնադրման 100-ամյակին:

Նիստը եզրափակվեց պարգևատրման հատուկ արարողությամբ: Քանի որ նիստը վերջինն էր ՈՒԳԸ փոխնախագահ Մարիամ Մարտիրոսյանի համար, ՈՒԳԸ նախագահ Մհեր Հակոբյանը շնորհակալություն հայտնեց 6 տարիների ընթացքում ՈՒԳԸ գործունեության մեջ նրա մեծ ներդրման համար և նրան պարգևատրեց պատվոգրով:

2017թ. դեկտեմբերի 14-ին ԵՊՀ Իջևանի մասնաճյուղում կայացավ թիմային ինտելեկտուալ խաղի մասնաճյուղային առաջնության եզրափակիչ փուլը, որը կազմակերպել էին Ուսանողական գիտական ընկերությունը և Ուսանողական խորհուրդը:

Եզրափակիչ փուլին մասնակցում էին ֆակուլտետների ուժեղագույն թիմերը` Հումանիտար գիտությունների ֆակուլտետի «Պատմություն» 2-րդ, Տնտեսագիտության ֆակուլտետի «Տնտեսագիտության տեսություն» 2-րդ, Բնական գիտությունների ֆակուլտետի «Ինֆորմատիկա և կիրառական մաթեմատիկա» 3-րդ, Կիրառական արվեստի ֆակուլտետի «Դիզայն» 1-ին կուրսերի թիմերը։ 

Ներկա էին Կիրառական արվեստի ֆակուլտետի դեկան Ա.Մարգարյանը, Հումանիտար գիտությունների ֆակուլտետի դեկանի տեղակալ Վ.Աղաբաբյանը, Տնտեսագիտության ֆակուլտետի դեկանի օգնական Ա.Ազատյանը, Տուրիզմի կառավարման և մշակութաբանության ամբիոնի ասիստենտ Պ.Ասիլբեկյանը, Ընդհանուր տնտեսագիտության ամբիոնի դասախոս Ա.Եգանյանը, Ընդհանուր մաթեմատիկայի և բնագիտության ամբիոնի դասախոս Ս.Ալավերդյանը, ուսանողական կառույցների նախագահները և ուսանողներ:

Թիմային ինտելեկտուալ խաղի մասնաճյուղային առաջնության եզրափակիչն անցկացվեց 3 փուլով։

3-րդ փուլում ցուցադրվեցին «Հայֆիլմ» կինոստուդիայի արտադրության ֆիլմերից փոքրիկ հատվածներ, և թիմերը պետք է կռահեին, թե որ ֆիլմից է տվյալ հատվածը։

Խաղն ընթացավ թեժ մրցակցության պայմաններում, և համառ պայքարից հետո 1 միավորի առավելությամբ արդեն 2-րդ տարին անընդմեջ հաղթող ճանաչվեց «Պատմություն» մասնագիտության 2-րդ կուրսի թիմը։

2-րդ, 3-րդ և 4-րդ տեղերը զբաղեցրին համապատասխանաբար «Տնտեսագիտության տեսություն» 2-րդ, «Ինֆորմատիկա և կիրառական մաթեմատիկա» 3-րդ և «Դիզայն» 1-ին կուրսերի թիմերը։

3-րդ և 4-րդ տեղերը զբաղեցրած թիմերը արժանացան շնորհակալագրերի, 2-րդ տեղը զբաղեցրած թիմը` պատվոգրի։

Մասնաճյուղային ինտելեկտուալ խաղում կրկնակի հաղթանակ տարած  «Պատմություն» 2-րդ կուրսի թիմին տրվեց փոխանցիկ գավաթը, պատվոգիր և հուշանվեր։

2017թ. դեկտեմբերի 13-ին՝ 5-րդ մոտոհրաձգային կամավորական բրիգադի կազմավորման 25-րդ տարեդարձի առթիվ, ԵՊՀ Իջևանի մասնաճյուղում կայացավ միջոցառում, որին մասնակցում էին բուհի վարչական և պրոֆեսորադասախոսական անձնակազմի ներկայացուցիչներ՝ տնօրեն Ս. Ա. Առաքելյանի գլխավորությամբ,  ԵԿՄ անդամներ, բարձրաստիճան ռազմական պաշտոնյաներ, ՀՀ ՊՆ Իջևանի զորամասի հրամանատար, գնդապետ Վ.Հովսեփյանը, Իջևանի Սբ. Ներսես Շնորհալի եկեղեցու հոգևոր հովիվ Տեր Սիմեոն քահանա Առաքելյանը, ուսանողներ, հյուրեր:

5-րդ կամավորական բրիգադի կազմավորման 25-րդ տարեդարձի առթիվ շնորհավորական խոսքով հանդես եկավ ԵՊՀ Իջևանի մասնաճյուղի տնօրեն, ԵԿՄ Տավուշի մարզային կազմակերպության փոխնախագահ Ս. Ա. Առաքելյանը և ընթերցեց այդ կապակցությամբ ԵԿՄ վարչության նախագահ, Արցախի հերոս, զորավար Մանվել Գրիգորյանի հղած ուղերձը, որտեղ մասնավորապես նշված էր. 

«Եռասերունդ Երկրապահ կամավորականների միության, Հանրապետության բոլոր երկրապահների, 5-րդ բրիգադի մարտիկների, պատանի, երիտասարդ երկրապահների և անձամբ իմ անունից շնորհավորում եմ բոլորիս՝ 5-րդ կամավորական բրիգադի կազմավորման 25-րդ տարեդարձի առթիվ: Մաղթում եմ բոլորիս քաջառողջություն և հաջողություններ ընդհանուր գործունեության մեջ: Շնորհավորում եմ հայ ժողովրդին և հայոց բանակին, քանի որ բրիգադը բոլոր մարտական առաջադրանքները փայլուն կատարել է:

5-րդ բրիգադը կազմավորվեց 1992 թվականի նոյեմբերի 28-ին՝ դառնալով կամավորականների և զինծառայողների գործակցությամբ ստեղծված առաջին խոշոր միավորումը: Բրիգադի կազմում ընդգրկվեցին ՀՀ գրեթե բոլոր շրջանների կամավորականները, կամավորական ջոկատներն ու գումարտակները: 5-րդ բրիգադը կատարեց իր առջև դրված խնդիրները, անցավ փառապանծ մարտական ուղի և ռազմադաշտից վերադարձավ հաղթանակով: Արցախյան պատերազմի դաժան տարիներին բրիգադը ամենամեծ բանակային կազմավորումն էր՝ Արցախի պաշտպանության բանակից հետո: Հայ ժողովրդին պարտադրված պատերազմում ձեռք բերած հաղթանակի մեջ անգնահատելի է 5-րդ բրիգադի դերը, և իր մարտիկների կյանքի ու առողջության գնով վաստակած հաղթանակաբեր գործունեության համար բրիգադն անվանվեց Լեգենդար և Հաղթական:

Հայոց զինուժի հաղթանակի պատմության մեջ ոսկե տառերով է գրված 5-րդ բրիգադը և նրա յուրաքանչյուր մարտիկի հերոսական մարտական ուղին: Այդ  մարտական ուղին անցնում է Արցախյան ազատամարտի հյուսիսային ու հարավային ռազմաճակատներով և հասնում է Արցախի ու ՀՀ պետական սահմանների ամրապնդմանն ու հայոց բանակի հզորացմանը:

Ես հպարտ եմ, ինձ համար պատիվ է, որ եղել եմ 5-րդ բրիգադի հրամանատարը, հպարտ եմ, որ մարտնչել եմ 5-րդի խիզախ հերոսների հետ, որ նահատակվեցին հանուն հայրենիքի ազատագրման ու հանուն խաղաղության: Ես հպարտ եմ, որ ծառայել եմ ձեզ հետ, սիրելի՛ 5-րդցիներ: Հպարտ եմ, որ այսօր բոլորս միասին 5-րդ բրիգադի փառքն ու հմտությունը փոխանցում ենք նոր սերնդին՝ երիտասարդ ու պատանի երկրապահներին: Ձեզանից շատերն աշխատում են դպրոցներում պատանի երկրապահների հետ և իրենց փորձը փոխանցելով նոր սերնդին՝ կազմակերպում են Պատանի երկրապահ ակումբի ռազմահայրենասիրական դաստիարակության գործընթացը, շարունակում են բրիգադի առաքելությունը: Ես հավատում եմ, որ նոր սերունդը տեր կկանգնի 5-րդի ձեռքբերումներին:

Լեգենդար բրիգադի փառապանծ մարտիկների համար իսկական փորձություն էր 2016-ի ապրիլյան պատերազմը: Դարձյալ, առանց վարանելու, 5-րդցիները կանգնեցին առաջնագծում, դիրքապահ հայ զինվորի կողքին: 5-րդ բրիգադի հետ ճանապարհ անցած հայորդին ցմահ էլ հայրենիքի զինվորն է և նույնիսկ մահից հետո էլ երկնքից է հսկում հայ ազգի անդորրը:

Եվս մեկ անգամ շնորհավորում եմ բոլորիս՝ բրիգադի կազմավորման 25-րդ տարեդարձի առթիվ: Շնորհավորում եմ բոլորին՝ և՛ զոհվածներին, և՛ ողջերին՝ անուն առ անուն:

Փա՛ռք 5-րդ բրիգադի նահատակ հերոսներին: Փա՛ռք հերոսներ ծնող հերոս հայ մայրերին: Փա՛ռք հայ ժողովրդին պարտադրված վերջին պատերազմի բոլոր նահատակներին՝ Սպարապետ Վազգեն Սարգսյանի գլխավորությամբ:

Փա՛ռք նաև բոլոր նրանց, ովքեր հիշում ու մեծարում են նահատակ ընկերներին, շարունակում են նրանց գործը և փառավորում ապրողներին»:

Ներկաները մեկ րոպե լռությամբ հարգեցին մեր անմահացած հերոսների սուրբ հիշատակը:

Տեր Սիմեոն քահանան հնչեցրեց Տերունական աղոթքը, օրհնեց բոլոր ներկաներին, հայ ընտանիքները, որոնց համար երկրապահ զինվոր ունենալը միշտ էլ առանձնահատուկ հպարտությամբ, սիրով ու նվիրումով է լցրել նրանց հոգիները, օրհնեց դահլիճում ներկա մեր եռասերունդ (ավագ, երիտասարդ և պատանի) երկրապահներին, ովքեր պատվով ու պատասխանատվությամբ են իրականացնում հայրենիքը պաշտպանելու, նրա սահմանները անսասան պահելու, մատաղ սերնդի հոգևոր ու ռազմահայրենասիրական դաստիարակության գործը:

Ցուցադրվեց բրիգադի հերոսական գործունեության վերաբերյալ կարճ ֆիլմ:

Ապա 5-րդ բրիգադի կազմավորման 25-րդ տարեդարձին ՀՀ երկրապահ կամավորականների միության հուշամեդալներով ու պատվոգրերով պարգևատրվեցին մի շարք պաշտոնյաներ, երկրապահներ, ԵՊՀ Իջևանի մասնաճյուղի՝ քառօրյա պատերազմին մասնակցած երկու տասնյակ ուսանողներ:

ԵԿՄ հուշամեդալներով պարգևատրվեցին ԵՊՀ ԻՄ-ի առկա ուսուցման համակարգի 2, հեռակա ուսուցման համակարգի 16 ուսանողներ.

Առկա ուսուցման համակարգ.

1. Միրզոյան Բորիս Գարիկի (ՏՏ III),
2. Խաչատրյան Տիգրան Հենրիկի (ԿԱ III):

Հեռակա ուսուցման համակարգ.

1. Աբովյան Արտուշ Արմենի (ՏՏ  II),
2. Մելիքսեթյան Ժորա   Վանիկի   (ՏՏ  II),
3. Պետրոսյան Արշալույս   Աշոտի (ՏՏ  II),
4. Արամյան Հրաչ   Ալբերտի (Ֆինանս. I),
5. Պետրոսյան Արթուր   Աշոտի      (Ֆինանս. I),
6. Եգանյան Վահագն   Գարիկի      (Պ I),
7. Օթարյան Աշոտ   Հովիկի (Պ II),
8. Սիրադեղյան Մանվել   Մուշեղի (Պ II),
9. Աղինյան Հրանտ   Անդրանիկի (Հ I),
10. Մանուչարյան Արամ   Արթուրի (Հ II),
11. Երիցյան Արամ   Սուրենի (ԻԿՄ II),
12. Աղասարյան Կարեն   Յուրայի    (ԲԲ I),
13. Հախվերդյան Գարիկ   Արտիկի (ԲԲ I),
14. Իսախանյան Աշոտ   Հարությունի (ԲԲ I),
15. Մելքոնյան Վարշամ   Սերգոյի (ԲԲ II),
16. Եսայան Վահե   Էդվինի   (ՔԿԳ II):

2017թ. դեկտեմբերի 7-ին  Հումանիտար գիտությունների ֆակուլտետում կայացավ «Երկրաշարժ» գեղարվեստական ֆիլմի ցուցադրություն-քննարկումը, որը կազմակերպվել էր մասնաճյուղի ՈՒԳԸ-ի և ՈՒԽ-ի համատեղ ջանքերով։

Ֆիլմի ցուցադրությունից առաջ զեկուցումով հանդես եկավ Հումանիտար գիտությունների ֆակուլտետի ՈՒԳԸ նախագահի տեղակալ Շիրակ Գասպարյանը:

Նա ներկայացրեց աղետալի երկրաշարժի մասին տեղեկություններ (երկրաշարժի տևողությունը, ուժգնությունը, մարդկային ու նյութական կորուստները և այլն)։

Ներկաները մեծ հուզմունքով դիտեցին ֆիլմը` վերապրելով Սպիտակի երկրաշարժի ողբերգական և ծանր օրերը:

«Երկրաշարժ» գեղարվեստական ֆիլմի ցուցադրությանը հաջորդեց քննարկում, թե ինչպես ճիշտ պաշտպանվել երկրաշարժից, ինչ անել երկրաշարժի ժամանակ և դրանից հետո՝ մարդկանց նյութական, մարդկային և բարոյահոգեբանական կորուստները նվազագույնի հասցնելու համար: