2017թ. նոյեմբերի 25-ին ԵՊՀ Իջևանի մասնաճյուղում տեղի ունեցավ “Never Give Up” և “I Got 99 Problems” թեմաներով զրույց-քննարկում (“TED Talks”), որը կազմակերպել էին բ.գ.թ. ասիստենտ Նարինե Գասպարյանը և ասիստենտ Զարուհի Անտոնյանը:

Քննարկման ժամանակ «Անգլերեն լեզու և գրականություն» մասնագիտության III կուրսի ուսանողուհիներ Սյուզաննա Շահնազարյանը և Արևիկ Հարությունյանը ներկայացրին իրենց նպատակներն ու երազանքները:

Սյուզաննա Շահնազարյանը ներկայացրեց երազանքներին հավատալու, դրանք նպատակներ և իրականություն դարձնելու իր բանաձևը, նշեց, որ նպատակներին հասնելու համար  պետք է անհնարինը դարձնել հնարավոր, անկարելին՝ կարելի: Ուսանողներին մոտիվացնելու համար նա ներկայացրեց իր հաջողության պատմությունը, ընդգծեց, որ յուրաքանչյուր մարդ ինքն է ընտրում հաջողության հասնելու իր ճանապարհը: Քննարկումն ավելի հետաքրքրաշարժ դարձնելու համար մեջբերվեցին  նշանավոր գրողների և արվեստագետների թևավոր խոսքերից:

Արևիկ Հարությունյանը երգիծանքով ներկայացրեց այն խնդիրները, որոնք կապված են ուսանող լինելու հետ: Դասերից ուշանալը, երբեմն ծուլանալը ներկայացվեցին բավականին հետաքրքիր և զավեշտալի ձևով: Նա թվարկեց այն դեպքերը, երբ ուսանողը ընկնում է անհարմար իրավիճակների մեջ, օրինակ, երբ մոռացել է տետրը, բայց իսկապես կատարել է տնային առաջադրանքը: Ներկայացվեցին ուսանող լինելու առավելությունները, նշվեց, որ յուրաքանչյուր ուսանող ունի սովորելու իր մեթոդներն ու մոտեցումները:

Այնուհետև ծավալվեց ակտիվ, հետաքրքիր և ուսանելի զրույց-քննարկում, որի ընթացքում բոլոր մասնակիցներն անդրադարձան ուսանողական կյանքին առնչվող  տարաբնույթ հարցերի, ներկայացրին սեփական տեսակետները՝ առաջարկելով որոշ խնդիրների լուծման իրենց տարբերակները: 

2017թ. նոյեմբերի 24-ին մասնաճյուղում կայացավ  գրական-երաժշտական ցերեկույթ՝ ԵՊՀ ԻՄ-ի երկու շնորհալի ուսանողուհիների` հեռակա ուսուցման «Հոգեբանություն» մասնագիտության երրորդ կուրսի ուսանողուհի Լիլիա Մնացականյանի և առկա ուսուցման «Ֆրանսերեն լեզու և գրականություն» մասնագիտության չորրորդ կուրսի ուսանողուհի Մերի Գասպարյանի մասնակցությամբ:

Ցերեկույթին հրավիրված էին մասնաճյուղի վարչական և պրոֆեսորադասախոսական անձնակազմի ներկայացուցիչներ (տնօրեն Ս. Ա. Առաքելյանը, Ուսումնամեթոդական վարչության պետ Ա.Դավթյանը, Մ.Զուրաբյանի գլխավորությամբ՝ հեռակա ուսուցման բաժնի անդամները և ուրիշներ), ուսանողներ (գլխավորապես հեռակա ուսուցման համակարգի) և հյուրեր:

Գրական-երաժշտական միջոցառման ընթացքում հիմնականում ներկայացվեցին քնարական սրտաբուխ երգեր, այդ թվում՝ Լիլիա Մնացականյանի ու Մերի Գասպարյանի հեղինակային չքնաղ ստեղծագործություններից:

Լիլիա Մնացականյանը կատարողական բարձր վարպետությամբ, կիթառի և դաշնամուրի ուղեկցությամբ ներկայացրեց հետևյալ երգերը.

• «Սիրո աղոթք»,
• «Ճերմակ աղավնի»,
• «Էլ չեմ գտնի»,
• «Միայն արի»,
• «Բել»,
• «Դու հեռացար»,
• «Ինչու թողիր դու հեռացար»,
• «Գիտառա (Այ-այ)»,
• «Եթե իմանայիր»,
• «Հայուհի գեղեցիկ»,
• «Չունի աշխարհը քեզ նման»:

Մերի Գասպարյանն արտասանեց իր հեղինակային խորունկ բանաստեղծություններից.

• «Աղոթք»,
• «Հեռանամ»,
• «Անգիրել եմ տողեր ամեն»,
• «Ու թե գիշերը»,
• «Սիրո աղոթք»:

Միջոցառման ընթացքում իր հեղինակային գողտրիկ բանաստեղծություններով («Բարությունը քո», «Աշուն էր», «Տարիները եկել, շեղջվել», «Ու ուր հասանք մենք», «Գեթ մեկ անգամ», «Սիրող մարդը հիասթափվել չգիտի») հանդես եկավ նաև Իջևանի ավագ դպրոցի սան Աստղիկ Շաղբաթյանը:

Բարձր մակարդակով կազմակերպված գրական-երաժշտական ծրագիրն անկեղծորեն հուզեց բոլոր ունկնդիրների սրտերը՝ գեղագիտական մեծ հաճույք պատճառելով թե՛ մասնաճյուղի ղեկավարությանը, և թե՛ առկա ու հեռակա ուսուցման համակարգերի ուսանողներին:

2017թ. նոյեմբերի 24-ին ԵՊՀ Իջևանի մասնաճյուղում կայացավ տնօրեն Ս. Ա. Առաքելյանի հանդիպումը Հումանիտար գիտությունների ֆակուլտետի վարչական և պրոֆեսորադասախոսական անձնակազմի ներկայացուցիչների հետ:

Հանդիպման ընթացքում քննարկվեցին ուսումնական գործընթացի շարունակական բարելավմանը, սեմինար և գործնական պարապմունքների առավել արդյունավետ կազմակերպմանը, ուսանողների ինքնուրույնության ու գործնական հմտությունների զարգացմանը վերաբերող մի շարք հարցեր:

Շեշտվեց, որ ֆակուլտետի վարչական և պրոֆեսորադասախոսական անձնակազմի ներկայացուցիչները հետևողական լինեն 2017-2018 ուստարվա առաջին կիսամյակի քննաշրջանը (մասնավորապես՝ 2-րդ ընթացիկ քննությունները, ստուգումները և ստուգարքները) կազմակերպված և պատշաճ մակարդակով անցկացնելու հարցում:

Դասախոսները տնօրենին ներկայացրին իրենց առաջարկները, նրանից ստացան իրենց հուզող հարցերի պատասխանները:

2017թ. նոյեմբերի 24-ին ԵՊՀ Իջևանի մասնաճյուղում կայացավ Հայաստանի Հանրապետության և Արցախի հերոս, արցախյան պատերազմի մասնակից, հրամանատար Մոնթե Մելքոնյանի ծննդյան 60-ամյա հոբելյանին նվիրված միջոցառում, որը կազմակերպել էր մասնաճյուղի «Տավուշ» ռազմահայրենասիրական ակումբը՝ նրա անդամ, ակումբի Տնտեսագիտության ֆակուլտետի համակարգող Սոսե Խաչատրյանի պատասխանատվությամբ:

Ներկա էին ԵՊՀ ԻՄ-ի տնօրեն Ս. Ա. Առաքելյանը, «Տավուշ» ռազմահայրենասիրական  ակումբի անդամները, ուսանողներ:

ՀՀ և Արցախի հերոս Մոնթե Մելքոնյանի ծննդյան 60-ամյա հոբելյանը համալսարանականների համար բարեպատեհ առիթ էր ևս մեկ անգամ արժևորելու Մոնթեի խոշոր ավանդը Արցախի ազատագրման գործում, հարգանքի ու երախտիքի տուրք մատուցելու Ազգային հերոսի սուրբ հիշատակին, մատաղ սերնդի հիշողության մեջ վառ պահելու նրա անմահ կերպարը:

Հայրենասիրական միջոցառումը սկսվեց մարտիկի աղոթքով:

Այնուհետև տրվեցին Մոնթե Մելքոնյանի վերաբերյալ կենսագրական փաստեր, կրթությունը, մարտական ուղին, սերը, սպանությունը, ճանաչումը:  

Ջերմ ու անմիջական շնչով ներկայացվեց Մոնթեի ու Սեդայի մեծ, ջինջ ու մաքուր սիրո պատմությունը:

Հնչեցվեցին հերոսի թևավոր մտքերն ու արտահայտությունները, իր մասին մեծանուն գործիչների և հայրենանվեր անձանց խոսքերը:

Միջոցառման ընթացքում արտասանվեց «Տավուշ» ռազմահայրենասիրական ակումբի անդամ Սոսե Խաչատրյանի գրած բանաստեղծությունը` նվիրված Մոնթեի հիշատակին.

Արցախ աշխարհում կռիվ է եղել,

Ավեր է եղել, արյուն է թափվել,

Ու կռվի դաշտում ահեղ գոչյունով

Ակա՜ն է պայթել. Մոնթե՜ն է զոհվել:

Ու նրա հոգին, ինչպես վեհ արծիվ,

Ճախրել է ամպեր,  հասել երկնքին,

Երկար տարիներ, ինչպես հրեշտակ,

Պաշտպան է դարձել Հայոց աշխարհին:

Դու մեր սրտում ես, Մոնթե՜ Մելքոնյան,

Կհիշենք մենք քեզ ընդմիշտ, հավիտյան:

Միջոցառման ընթացքում  կատարվեցին ազգային-հայրենասիրական երգեր:

Վերջում ցուցադրվեց Մոնթե Մելքոնյանի մասին փաստավավերագրական ֆիլմ: