Երևանի պետական համալսարանի Իջևանի մասնաճյուղ

Վոլեյբոլի մասնաճյուղային առաջնությունում հաղթեց Տնտեսագիտության ֆակուլտետի հավաքականը

2014թ. փետրվարի 24-26-ը ԵՊՀ Իջևանի մասնաճյուղի մարզադահլիճում տեղի ունեցավ վոլեյբոլի` փոխանցիկ գավաթի մասնաճյուղային առաջնություն:

Նպատակը լավագույն մարզիկներով մասնաճյուղի վոլեյբոլի հավաքականը համալրելն էր:

Առաջնություն մասնակցում էր 6 թիմ (Տնտեսագիտության ֆակուլտետի և «Տնտեսագիտության տեսություն» մասնագիտության I կուրսի, Հումանիտար գիտությունների ֆակուլտետի և «Պատմություն» մասնագիտության IV կուրսի, Բնական գիտությունների ֆակուլտետի «Ինֆորմատիկա և կիրառական մաթեմատիկա» մասնագիտության I կուրսի, Կիրառական արվեստի ֆակուլտետի «Կիրառական արվեստ» մասնագիտության I կուրսի հավաքականները):

Եզրափակիչ դուրս եկան «Պատմություն» մասնագիտության IV կուրսի և Տնտեսագիտության ֆակուլտետի հավաքականները:

2:0 հաշվով հաղթեց Տնտեսագիտության ֆակուլտետի հավաքականը:

Հաղթող թիմը պարգևատրվեց փոխանցիկ գավաթով և հուշանվերով:

Եվրամիության կողմից ֆինանսավորվող ծրագրի պիլոտային տարածքը ավարտական աշխատանքի թեմա

Երևանի պետական համալսարանի Իջևանի մասնաճյուղի չորրորդ կուրսի ուսանող Մերի Ամիրզյանի ավարտական աշխատանքի թեման վերաբերում է Եվրամիության կողմից ֆինանսավորվող և WWF-ի կողմից իրականացվող «Հարավային Կովկասի երկրներում անտառների տրանսֆորմացիայի միջոցով անտառային էկոհամակարգերի կայունության բարձրացում կլիմայի փոփոխության նկատմամբ» ծրագրին։ Ծրագրի պիլոտային տարածքներից մեկը՝ «Հայանտառ» ՊՈԱԿ-ի Նոյեմբերյանի անտառտնտեսության Կողբի անտառապետությունում գտնվող «Նոյեմբերյան» տարածքը (մոտ 78 հա) ընտրվել է որպես աշխատանքի թեմա։

Այն որոշվել է 2013թ-ի գարնանը, որից հետո ուսանողը սկսել է աշխատանքները՝ ներառյալ բազմաթիվ այցեր ծրագրի տարածք, հանդիպումներ անտառտնտեսության աշխատակիցների հետ, քննարկումներ և դաշտային դիտարկումներ։ Ավարտական աշխատանքը ղեկավարում է վերոնշյալ ծրագրի համակարգող, ինչպես նաև ԵՊՀ-ի Իջևանի մասնաճյուղի անտառագիտության ամբիոնի վարիչ՝ Արթուր Ալավերդյանը։

Անտառի տրանսֆորմացիայի ծրագրով մարդկային հզորությունների ստեղծման շրջանակներում Մերի Ամիրզյանը մասնակցել է մի շարք միջոցառումների, այդ թվում ԵՊՀ-ի Իջևանի մասնաճյուղի ուսանողներին և դասախոսներին ուղղված իրազեկության բարձրացման և կրթական միջոցառմանը (նոյեմբերի 7, 2013 թ․, Իջևան, Սպիտակ պիլոտային տարածք), համայնքային աշխատանքային հանդիպմանը Կողբ համայնքում (նոյեմբերի 12, 2013 թ․, Կողբ, Տավուծի մարզ) և միջազգային խորհրդատու Դիրք Ֆրանկենհաուզերի կողմից անցկացված կլիմայի փոփոխության և անտառի տրանսֆորմացիայի ուսուցմանը (փետրվարի 18, 2014թ․, Երևան)։

Իրականացվել են նաև համատեղ դաշտային այցեր ծրագրի անձնակազմի հետ ՝ տարբեր առնչվող հարցերի քննարկման և դաշտային գործողությունների արդյունքների դիտարկման նպատակով։ Ուսանողը մշտական կապ է պահպանում ծրագրի հետ՝ ստանալով անհրաժեշտ տեղեկություններ (անտառի տրանսֆորմացիայի պլան, փոփոխություններ, դաշտային գործողություններ և այլն), ինչպես նաև հայտնելով իր աշխատանքի առաջընթացի մասին։

Անտառի տրանսֆորմացիայի ծրագրի անձնակազմը պատրաստվում է մասնակցել ավարտական աշխատանքի ներկայացմանը։

Աղբյուրը` armenia.panda.org

Մասնաճյուղում բացվեց «Տավուշ» ռազմահայրենասիրական ակումբը

2014թ. փետրվարի 24-ին ԵՊՀ Իջևանի մասնաճյուղում բացվեց «Տավուշ» ռազմահայրենասիրական ակումբը, որի նախագահ նշանակվեց Պատմության և քաղաքագիտության ամբիոնի դասախոս, Մասնագիտական կողմնորոշման և պրակտիկայի կազմակերպման բաժնի վարիչ Վահագն Էդիկի Չոբանյանը:

Նպատակը երիտասարդության, ուսանողության շրջանում հայրենասիրական ոգին բարձրացնելը, արցախյան ազատամարտում ընկած հայորդիների հիշատակը վառ պահելն ու ազգային մտածողությամբ երիտասարդներ դաստիարակելն է:

Բացման արարողությանը հրավիրված էին Իջևանում տեղակայված զորամասի հրամանատար, գնդապետ Մ.Մախսուդյանը, Իջևանի զինկոմ, գնդապետ Ա.Հովակիմյանը, Իջևանի զորամասի հրամանատարի տեղակալ, փոխգնդապետ Հ.Սահակյանը:

Ողջույնի խոսքով հանդես եկավ տնօրեն Ս.Առաքելյանը` կարևորելով երիտասարդության շրջանում ռազմահայրենասիրական դաստիարակությունը, որը մեր երկրի անվտանգության, խաղաղության և հզորացման կարևոր երաշխիքն ու գրավականն է:

Ապա ելույթ ունեցան զորամասի հրամանատար, գնդապետ Մ.Մախսուդյանը և Իջևանի զինկոմ, գնդապետ Ա.Հովակիմյանը, փոխգնդապետ Հ.Սահակյանը` շնորհավորելով ակումբի բացման կապակցությամբ և մաղթելով բեղուն գործունեություն:

Ակումբի գործունեությունն ընդգրկելու է մեր ուսանողների կողմից տարբեր տոնական միջոցառումների կազմակերպում, այցեր սահմանային գյուղեր, հանդիպումներ վետերանների, զոհված ազատամարտիկների ընտանիքների հետ, այցելություններ զոհված ազատամարտիկների շիրիմներին և այլն:

Ըստ այդմ` հուշագիր կնքվեց Տավուշի մարզի սահմանային Բերքաբեր գյուղի գյուղապետ Ա.Մադաթյանի հետ:

Այնուհետև մասնակիցները հավաքվեցին Իջևանում գտնվող` զոհված ազատամարտիկների անունը հավերժացնող հուշարձանի մոտ, որտեղ  տեղի ունեցավ երիտասարդ ակումբականների երդման արարողությունը:

Նրանք նախ ծաղիկներ դրեցին ազատամարտիկների անունը հավերժացնող հուշարձանին, ապա երդվեցին սիրել հայրենիքը, հայոց բանակը, ուսման մեջ լինել առաջավոր և ծառայել Հայաստանի Հանրապետությանը:

Համո Սահյանի ծննդյան 100-ամյակին նվիրված գրական-գեղարվեստական միջոցառում

2014թ. փետրվարի 21-ին ԵՊՀ Իջևանի մասնաճյուղում տեղի ունեցավ Համո Սահյանի ծննդյան 100-ամյակին նվիրված գրական-գեղարվեստական միջոցառում: Այն նախաձեռնել և կազմակերպել էր Հայոց լեզվի և գրականության ամբիոնի դոցենտ Աիդա Սարհատյանը:

Միջոցառմանը ներկա էին Հումանիտար գիտությունների ֆակուլտետի դեկան Վ.Ալեքսանյանը, Հայոց լեզվի և գրականության  ամբիոնի դասախոսները, մասնաճյուղի աշխատակիցներ, ուսանողներ:

Ողջույնի խոսքով հանդես եկավ Ա.Սարհատյանը` մասնավորապես նշելով. «Ընթերցողի առաջ սիրո բազմախորհուրդ ապրումների հարուստ մի աշխարհ է բացում մեր ժամանակների լավագույն քնարերգու Համո Սահյանը: Իր բնաշխարհի կանաչ ու կարմիր, սև ու սպիտակ գույները, արթնացող ամպի տագնապն ու հառաչը, անտառի շուրթի շշուկն ու խորհուրդն ունեն նրա սիրո երգերը: …Մերթ պատանեկան սիրո թրթիռներ են դրանք` նման նոր բողբոջած ոստերի, մերթ սիրո հեքիաթի անրջային պատկերներ են` կանաչ գարնան պես ծաղկափթիթ ու խոստումնալից, մերթ արդեն ապրածի մշուշոտ հուշեր` նման կապտավուն, անձրևաբեր ամպերի…»:

Այնուհետև Հումանիտար գիտությունների ֆակուլտետի շնորհալի ուսանողները հանդես եկան ասմունքով, կատարեցին հայ անվանի բանաստեղծ Համո Սահյանի գողտրիկ բանաստեղծությունների հիման վրա գրված երգեր:

Միջոցառման վերջում իրենց հիացմունքն արտահայտեցին ֆակուլտետի դեկան Վ.Ալեքսանյանը, Հայոց լեզվի և գրականության ամբիոնի ասիստենտ, բ.գ.թ. Ա. Հասանյանը` բարձր մակարդակով կազմակերպված միջոցառման համար հատուկ շնորհակալություն հայտնելով Ա.Սարհատյանին:

«Լավագույն մարզային ուսանողական ինքնակառավարման մարմին» անվանակարգում լավագույնը ճանաչվեց ԵՊՀ Իջևանի մասնաճյուղի ՈՒԳԸ-ն

2014թ․ փետրվարի 21-ին Երևանի պետական կամերային թատրոնում տեղի ունեցավ «Հայկյան 2013» մրցանակաբաշխությունը, որին ներկա էին ՀՀ նախագահ Սերժ Սարգսյանը, ՀԵՀ համակարգող Կարեն Ավագյանը, տարբեր միությունների նախագահներ, բուհերի ներկայացուցիչներ, հյուրեր։

Ամենամյա այս մրցանակաբաշխությունը կազմակերպում է Հայաստանի երիտասարդական հիմնադրամը։ Նպատակն է խրախուսել երիտասարդական, ուսանողական կազմակերպություններին՝ երիտասարդության շրջանում իրականացված աշխատանքերի համար։

Մրցանաբաշխությունը անց է կացվում մի շարք անվանակարգերով։ ԵՊՀ Իջևանի մասնաճյուղի ուսանողական գիտական ընկերությունը ևս հայտ էր ներկայացրել։ Հաղթողների անունները պարզ դարձան միայն մրցանակաբաշխության ժամանակ։

Մասնաճյուղի ՈՒԳԸն հաղթող ճանաչվեց «Լավագույն մարզային ուսանողական ինքնակառավարման մարմին» անվանակարգում։ Մրցանակաբաշխությանը ներկա էին մասնաճյուղի  ՈՒԳԸ-ի ներկայիս նախագահ Արա Հովսեփյանը և նախկին նախագահ Սլավիկ Ալավերդյանը։

Մրցանակը ստանալու համար բեմ բարձրացավ Սլավիկ Ալավերդյանը: Նա ողջունեց ՀՀ նախագահին, ներկաներին, շնորհակալություն հայտնեց Տավուշի մարզպետ Արմեն Ղուլարյանին, ԵՊՀ ԻՄ-ի տնօրեն Սամվել Առաքելյանին և բոլոր նրանց, ովքեր աջակցել են կառույցին՝ հաջողության հասնելու համար։

Բացի նախապես որոշված անվանակարգերից` տրվեցին նաև հատուկ մրցանակներ։ ՀՀ նախագահ Սերժ Սարգսյանը հատուկ մրցանակ հանձնեց Կոթի գյուղի դպրոցի «Ֆիզիկա» և «Մաթեմատիկա» առարկաների ուսուցիչ, ԵՊՀ ԻՄ բնական գիտությունների ֆակուլտետի շրջանավարտ Գևորգ Գրիգորյանին՝ սահմանամերձ գյուղում երեխաներին կրթելու հայրենանվեր աշխատանքի համար։


Մրցանկակիրները ստացան խորհրդանշական արձանիկներ և հայկական «ԱրմԹաբ» պլանշետներ։

Աղբյուրը` president.am, heh.am: