2017թ. հոկտեմբերի 11-ին և 12-ին ԵՊՀ Իջևանի մասնաճյուղի բնական գիտությունների ֆակուլտետում տեղի ունեցավ «ԲԻ, ԲԻ, ՍԻ: ՄԱԹԵՄԱՏԻԿԱՅԻ ՊԱՏՄՈՒԹՅՈՒՆ» չորս մասից բաղկացած փաստագրական ֆիլմի 1-ին և 2-րդ մասերի ցուցադրություն-քննարկումը, որը կազմակերպել էր ֆակուլտետի ուսանողական գիտական ընկերությունը (ՈՒԳԸ):

Ներկա էին ոչ միայն Բնական գիտությունների ֆակուլտետի տարբեր մասնագիտությունների, այլև Տնտեսագիտության ֆակուլտետի ուսանողներ:

Նրանք, ովքեր հնարավորություն չեն ունեցել ներկա գտնվելու ֆիլմի 1-ին և 2-րդ մասերի ցուցադրություններին, ֆիլմը կարող են դիտել այստեղից.

Ֆիլմի 3-րդ և 4-րդ մասերի ցուցադրությունը տեղի կունենա ս.թ. հոկտեմբերի 17-ին` ժամը 14:10-ին, Բնական գիտությունների ֆակուլտետի թիվ 5 լսարանում:

Բոլոր ցանկացողներին սիրով հրավիրում ենք:

2017թ. հոկտեմբերի 12-ին ԵՊՀ Իջևանի մասնաճյուղ այցելեցին ՀՀ-ում Գերմանիայի դեսպանության մշակութային հարցերի կցորդ (պատասխանատու) Աննեմարի Քուլմանը, Գերմանիայի Ակադեմիական փոխանակման ծառայության (DAAD)-ի երևանյան տեղեկատվական կենտրոնի տնօրեն Սիլվիա Շմիդը, կրթաթոշակային ծրագրերի գլխավոր խորհրդատու Մերի Նավասարդյանը, Գյոթե ինստիտուտի հայաստանյան ներկայացուցիչ Դանա Շլուխտմանը: 

Այցելության հիմնական նպատակն էր ԵՊՀ ԻՄ-ի ուսանողներին ներկայացնել Գերմանիայի Ակադեմիական փոխանակման ծառայության (DAAD)-ի կրթական ծրագրերը՝ նախատեսված հայ ուսանողների (բակալավրիատի և մագիստրատուրայի), շրջանավարտների, հետազոտողների ու դասախոսների համար: 

Նախ՝ տեղի ունեցավ մասնաճյուղի տնօրեն Ս. Ա. Առաքելյանի հետ հանդիպում, որին մասնակցեց և Բնական գիտությունների ֆակուլտետի դեկան Մ.Զաքարյանը, ով Հումբոլդ միության անդամ է, արդեն մի քանի տարի ընդգրկված է գերմանական գիտահետազոտական ծրագրերում (2002թ. եղել է DAAD-ի կրթաթոշակառու, 2004-2006 թթ. և 2017թ. (3 ամիս) մասնակցել է Ալեքսանդր ֆոն Հումբոլդ (գերմ.՝ Alexander von Humboldt-Stiftung) հիմնադրամի գիտահետազոտական ծրագրերին: 

Հանդիպման ընթացքում ներկայացվեցին կրթական և գիտամշակութային գործունեություն իրականացնող երկու հաստատությունների (Գյոթե ինստիտուտի և ԵՊՀ Իջևանի մասնաճյուղի) առաքելությունները, հիմնական խնդիրները, գործող ֆակուլտետներն ու մասնագիտությունները:

Քննարկվեցին ուսանողների փոխանակման ծրագրեր իրականացնելու վերաբերյալ մի շարք հարցեր, ուրվագծվեցին երկկողմ համագործակցության եզրերն ու հեռանկարները: Հայ-գերմանական համագործակցությունը սերտացնելու, լեզվամշակութային հաղորդակցությունը խորացնելու նպատակով տնօրենը հյուրերին առաջարկեց ՀՀ-ում Գերմանիայի դեսպանատանը քննարկել մեզ մոտ գերմաներեն լեզվի ուսուցման կենտրոն ստեղծելու մասին հարցը:

Այնուհետև կայացավ ԵՊՀ ԻՄ-ի ուսանողների հետ հանդիպում, որի ընթացքում գերմանական պատվիրակության ներկայացուցիչները շնորհանդեսների ուղեկցությամբ, առանձին զեկուցումներով ներկայացրին Գերմանիայում գործող բակալավրական, մագիստրոսական և ասպիրանտական ուսուցման պայմանները, անվճար ուսուցման հնարավորությունները:

Հյուրերը հանգամանորեն ներկայացրին Գերմանիայի Ակադեմիական փոխանակման ծառայության (DAAD)-ի կրթաթոշակային և դրամաշնորհային ծրագրերը հայերի համար, գործող կայքերի ու էլեկտրոնային գրադարանների հասցեները և այլն:

Ուսանողներին նաև տրվեցին ներկայացված կրթական ծրագրերի վերաբերյալ մանրամասն տեղեկատվություն պարունակող քառալեզու (գերմաներեն, անգլերեն, ռուսերեն, հայերեն) գրքեր, ամսագրեր, բուկլետներ, բրոշյուրներ:

Գերմանական պատվիրակության ներկայացուցիչները ԵՊՀ Իջևանի մասնաճյուղից հեռացան ջերմ տպավորություններով, համագործակցության ծրագրերի և ԵՊՀ ԻՄ-ի ներկայացուցիչների պատասխան այցի ակնկալիքով:

2017թ. հոկտեմբերի 7-ին ԵՊՀ Իջևանի մասնաճյուղում կայացավ Գրադարանավարի օրվան նվիրված միջոցառում, որը կազմակերպվել էր մասնաճյուղի գրադարանի վարիչ Վլադիմիր Պողոսյանի նախաձեռնությամբ և տնօրենության աջակցությամբ:

Միջոցառմանը ներկա էին բուհի տնօրեն Ս. Ա. Առաքելյանը, Հումանիտար գիտությունների ֆակուլտետի դեկան Ա.Ներսիսյանը, Տնտեսագիտության ֆակուլտետի դեկան Ն.Խուդավերդյանը, վարչական անձնակազմի այլ ներկայացուցիչներ, դասախոսներ և ուսանողներ:

Բացման խոսքով հանդես եկավ գրադարանի վարիչ Վ.Պողոսյանը` ներկայացնելով, որ ՀՀ կառավարության որոշմամբ` 2004 թվականից Հայաստանի Հանրապետությունում հոկտեմբերի 7-ը պաշտոնապես նշվում է որպես «Գրադարանավարի օր»: Այդ կապակցությամբ շնորհավորեց բուհի բոլոր գրադարանավարներին, ընդգծեց նրանց դերն ու նշանակությունը սերունդների հոգևոր զարգացման գործում. «Գրադարանները ազգերի, անշուշտ, նաև հայերի հոգևոր կյանքի և մշակույթի զարգացման մեջ կատարել ու այսօր էլ կատարում են անփոխարինելի դեր: Յուրաքանչյուր գրադարան կոչված է իրականացնելու իրեն հատուկ գործառույթները՝ պատմամշակութային, տեղեկատվական, հաղորդակցական, տեխնոլոգիական, մանկավարժական, վիճակագրական, սպասարկման և այլն: Մեր գրադարանի առաջնահերթ խնդիրն է կազմակերպել իր գրականության վերաբերյալ տեղեկատվություն՝ ընթերցողներին լավագույնս սպասարկելու համար: Եվ այս գործում անփոխարինելի է գրադարանավարի դերը, որի հոգածությունը գրքի և ընթերցողի նկատմամբ չափազանց կարևոր է: Շնորհավորում եմ բոլորիս գրադարանավարի օրվա կապակցությամբ` գրադարանի աշխատակազմին մաղթելով  աշխատանքային նվիրում, անհնարինը հնարավոր դարձնելու հաստատուն կամք»:

Տնօրեն Ս.Առաքելյանը, շնորհավորելով գրադարանավարների տոնը, մասնավորապես նշեց. «Խորհրդային ժամանակաշրջանում հասարակության ամենապահանջված, ամենակարևոր անձը գրադարանավարն էր, ով մտավորականի ամենավառ կերպարն էր` իր ապրելակերպով, նախասիրություններով, արժեհամակարգով: Այսօր էլ գրադարանավարի գործառույթը հսկայական է, քանի որ նա պարտավոր է գրքի և ընթերցողի միջև ձևավորել հոգևոր, կայուն կապ, որպեսզի յուրաքանչյուր գրքի հետ ընթերցողին փոխանցվի ավելին իմանալու, գիտության գաղտնիքներին տիրապետելու կամք: Գրադարանը համալսարանական կյանքի, ուսումնագիտական գործընթացի անբաժան մասն է, իսկ գրադարանավարը այդ անխախտ գործընթացն ապահովողը»:

Բարձր գնահատելով մասնաճյուղի երկարամյա անձնվեր գրադարանավարներ Ալվինա Առուստամյանի, Անահիտ Անտոնյանի և Հասմիկ Օհանյանի աշխատանքը` պարոն Առաքելյանը տնօրենության անունից նրանց հանձնեց շնորհակալագրեր և ԵՊՀ-ի լոգոյով գրիչ-հուշանվերներ:

Միջոցառման ընթացքում գրադարանավարներին շնորհավորանքի և երախտիքի խոսքեր ասացին Հումանիտար գիտությունների ֆակուլտետի դեկան Ա.Ներսիսյանը, Հայոց լեզվի և գրականության ամբիոնի դոցենտ Ա.Սահրատյանը և ուսանողներ:

2017թ. հոկտեմբերի 5-ին ԵՊՀ Իջևանի մասնաճյուղում կայացավ նույն թվականի սեպտեմբերից ԵՊՀ ԻՄ-ի գրադարանին կից ստեղծված գրական-գեղարվեստական ակումբի առաջին հանդիպումը, որը վարեց Հայոց լեզվի և գրականության ամբիոնի ասիստենտ, բ.գ.թ. Ա.Հասանյանը:

Ակումբի նպատակն է միավորել ԵՊՀ ԻՄ-ի տարբեր մասնագիտությունների գրասեր ուսանողներին, որոնց համար գիրքը հոգու կանչ  է, ինքնադաստիարակման յուրօրինակ ձև:

Անդրանիկ հանդիպման ընթացքում ներկայացվեցին ակումբականների հետագա անելիքները, կազմվեց աշխատանքային պլան, կայացավ «Գրականությունն իմ կյանքում» թեմայով զրույց-քննարկում:

Դիտարկվեցին «Գրեթերթ»-ի՝ այս ամսվա համարում տեղ գտած մերօրյա ստեղծագործողների գործերը:

Փորձ արվեց բացահայտելու այդ ստեղծագործությունների թեմատիկ-գաղափարական առանձնահատկություններն ու գեղարվեստական արժանիքները:

Ակումբի անդամները նաև ընդհանուր գծերով ծանոթացան իրենց ստեղծագործող ընկերների  գործերին:

Որոշվեց առաջիկա հանդիպման ընթացքում ամբողջացնել այդ գործերը և կազմակերպել դրանց շուրջ վերլուծական քննարկում:

2017թ. հոկտեմբերի 5-ին ԵՊՀ ԻՄ-ի տնտեսագիտության ֆակուլտետում տեղի ունեցավ «Հաջողություն և առաջնորդություն» թեմայով քննարկումը, որը նախաձեռնել էին «Տնտեսագիտության տեսություն» մասնագիտության ուսանողները (Հրանտ Ղարագյոզյան, Սարգիս Խաչատրյան, Դիանա Բաբլումյան, Հասմիկ Քարտաշյան, Արևիկ Այդինյան, Արփինե Վերանյան, Սոնա Հակոբյան):

Քննարկման հատուկ հյուրն էր Հայոց պատմության և հասարակագիտության ամբիոնի ասիստենտ, ք.գ.թ. Հ.Մովսեսյանը, հրավիրված էին մասնաճյուղի վարչական ու պրոֆեսորադասախոսական անձնակազմի անդամներ և ուսանողներ:

Նախ ուսանողները հանդես եկան բացման խոսքով՝ ներկայացնելով քննարկման նպատակն ու շարժառիթը: «Իր շրջապատողներին յուրաքանչյուր մարդու տված ամենամեծ պարգևը հաջողության սեփական օրինակն է», – նշեցին նրանք՝ ակնկալելով պարոն Մովսեսյանից ստանալ իրենց հետաքրքրող հարցերի պատասխանները:

Քննարկման հատուկ հյուրին տրվեցին այսպիսի հարցեր.

• Ունե՞ք հաջողության հասնելու Ձեր սեփական բանաձևը:
• Ի՞նչն է Ձեզ ոգեշնչում կյանքում առաջ շարժվելու և եղել է ինչ-որ մեկը, ով Ձեզ ոգեշնչել է հաջողությունների հասնելու համար:
• Ո՞րն է Ձեր գլխավոր առաքելությունը կյանքում:
• Ինչպե՞ս եք վերաբերվում հասարակական կարծիքին, արդյո՞ք ճիշտ եք համարում հրաժարվել ինչ-որ մտքերից կամ նպատակներից, որոնք չեն ընդունվի հասարակության կողմից:
• Ինչպե՞ս եք ընդունում ձեր հասցեին ուղղված քննադատությունները:
• Սրտի՞ն թե՞ մտքին պետք է հետևել հաջողության ճանապարհին:
• Համաձա՞յն եք արդյոք, որ հաջողակ տղամարդու կողքին միշտ ուժեղ կին է կանգնած:
• Ո՞րն է ձեր երիտասարդության ամենամեծ դասը:
• Ո՞րն է ձեր ամենասիրած ասույթը և կյանքի կարգախոսը:

Առաջադրված հարցերին պարոն Մովսեսյանը տվեց շատ հետաքրքիր և մոտիվացնող պատասխաններ, խոսեց հրեական դաստիարակության առանձնահատկություններից, խորհուրդներ տվեց, թե ինչպես կարելի է ազատվել բացասական մտքերից ու կոմպլեքսներից:

Նա մասնավորապես նշեց, որ մեզնից յուրաքանչյուրին խանգարում է համեստությունն ու անհամբերությունը: Ընդգծվեց, որ համբերատար լինելով միայն կարելի է իրագործել բոլոր նպատակները:

Հ.Մովսեսյանը խորհուրդ տվեց լինել ավելի շատ լսողի դերում, քան խոսողի, բերեց բազմաթիվ օրինակներ հայտնի առաջնորդների կյանքի պատմություններից:

Քննարկումն անցավ ջերմ մթնոլորտում, վերջում պարոն Մովսեսյանն իր գոհունակությունն արտահայտեց և հույս հայտնեց, որ նմանատիպ նախաձեռնությունները կլինեն շարունակական:

Ուսանողները նույնպես շնորհակալություն հայտնեցին իրենց դասախոսին՝ բավականին հետաքրքիր ու բովանդակալից հարցազրույցի համար: