ԵՊՀ ԻՄ-ի Հումանիտար գիտությունների ֆակուլտետի «Օտար լեզու և գրականություն» մասնագիտության առաջին կուրսի ուսանող Մհեր Մկրտումյանը մասնակցել է  Հայաստանի Եվրոպական երիտասարդական պառլամենտի և ՀՀ կենտրոնական բանկի հետ համագործակցությամբ՝ «Իմ ֆինանսների ամիսը» նախագծի շրջանակներում կազմակերպված “FIND 2017” (Ֆինանսական նորարարություն ազգային զարգացման համար) համահայկական ուսանողական ֆորումին, որը գլխավորապես կենտրոնացած էր ֆինանսական կրթման վրա։

Ֆորումը համախմբել էր 120 ուսանողների՝ Երևանից և ՀՀ մարզերի բուհերից։ Ուսանողները 5 օրվա ընթացքում (2017 թվականի մայիսի 20-ից 24-ը)  քննարկել են մի շարք ֆինանսական հարցեր, կազմել բանաձևեր և ներկայացրել ֆորումի նախագահությանը։

Ըստ այդմ՝ ԵՊՀ ԻՄ-ի ուսանող Մհեր Մկրտումյանն ընտրվել է լավագույն պատվիրակներից մեկը, և ևս 5 պատվիրակների հետ ներկայացնելու է Հայաստանը սույն թվականի նոյեմբերի 11-ից 19-ը Վրաստանում կայանալիք Եվրոպական երիտասարդական պառլամենտի 86-րդ միջազգային ֆորումում։

2017թ. մայիսի 27-ից հունիսի 3-ը ԵՊՀ Իջևանի մասնաճյուղում կայացան կուրսային աշխատանքների պաշտպանություններ:

Մայիսի 27-ին և 29-ին տեղի ունեցան Կիրառական արվեստի ֆակուլտետի «Կիրառական արվեստ» մասնագիտության 2-րդ  և 3-րդ կուրսերի ուսանողների կուրսային աշխատանքների պաշտպանությունները:

Հունիսի 2-ին կայացավ Բնական գիտությունների ֆակուլտետի «Ինֆորմատիկա և  կիրառական մաթեմատիկա» մասնագիտության 3-րդ կուրսի ուսանողների կուրսային աշխատանքների պաշտպանությունը:

Հունիսի 3-ին տեղի ունեցան Տնտեսագիտության ֆակուլտետի «Տնտեսագիտության տեսություն» մասնագիտության 2-րդ և 3-րդ, «Սերվիս» մասնագիտության 2-րդ և 3-րդ կուրսերի ուսանողների կուրսային աշխատանքների պաշտպանությունները:

Հունիսի 2-3-ին կայացան Հումանիտար գիտությունների ֆակուլտետի կուրսային աշխատանքների պաշտպանությունները:

Հունիսի 2-ին տեղի ունեցան «Պատմություն», «Մանկավարժություն և հոգեբանություն», «Ֆրանսերեն լեզու և գրականություն» մասնագիտությունների 3-րդ կուրսերի ուսանողների կուրսային աշխատանքների պաշտպանությունները:

Հունիսի 3-ին կայացան «Պատմություն», «Հոգեբանություն» 2-րդ, «Անգլերեն լեզու և գրականություն» 3-րդ կուրսերի ուսանողների կուրսային աշխատանքների պաշտպանությունները:

Բոլոր ֆակուլտետներում կուրսային աշխատանքների պաշտպանությունները կազմակերպված էին պատշաճ մակարդակով: Հանձնաժողովների անդամների և մասնագիտությունների կրթական ծրագրերի պատասխանատուների խոսքով՝  աշխատանքները համապատասխանում էին կուրսային աշխատանքներին ներկայացվող ընդհանուր պահանջներին (թեմայի արդիականություն, բովանդակության և թեմայի համապատասխանություն, նպատակի և խնդիրների ներկայացում ու հիմնավորում, «հարցի պատմություն» և այլն), կատարված էին բարեխղճորեն, դրանցում նկատվում էր նաև ղեկավարների նվիրված և հետևողական աշխատանքը:

Պաշտպանությունների ժամանակ աշխատանքների ներկայացման ընդհանուր մակարդակը բարձր էր, ուսանողների մեծամասնությունն ուներ սահուն ու տրամաբանված բանավոր խոսք:

Աշխատանքները ներկայացվում էին շնորհանդեսների ուղեկցությամբ, տեսական մտքերը հաստատվում գործնական համապատասխան հիմնավորումներով, բնագրային մեջբերումներով:

2017թ. մայիսի 31-ին ԵՊՀ ԻՄ-ի ուսանողական խորհուրդն ամփոփեց 2016-17 ուստարում իր կատարած աշխատանքները:

Ներկա էին ՈՒԽ-ի անդամները, հրավիրված էին մասնաճյուղի տնօրեն Ս. Ա. Առաքելյանը, վարչական անձնակազմի, բուհի ուսանողական այլ կառույցների ներկայացուցիչներ:

Ուսանողական խորհրդի նախագահ Իսկուհի Շաղբաթյանը նախ ներկայացրեց 2016-2017 ուստարվա 1-ին կիսամյակում իրենց կողմից կատարված  աշխատանքները, որոնք ներառում էին՝

Միջոցառումներ, ծրագրեր, նախաձեռնություններ.

1. Փոփոխություններ ՈՒԽ-ի կազմում,
2. Գիտելիքի և դպրության օրվան նվիրված միջոցառում,
3. Անկախության տոնին նվիրված միջոցառումներ,
4. «Ուսանողը որպես հասարակության շարժիչ ուժ» թեմայով էսսեների մրցույթ,
5. «Ինչպե՞ս հասնել հաջողության» թեմայով դաս-միջոցառում,
6. Անգլերեն լեզվի ուսուցման խմբակի ստեղծում,
7. Նոր ուսանողների ընդգրկում ՈՒԽ-ում,
8. Սեմինար ՈՒԽ-ին նոր անդամագրված ուսանողների համար,
9. «Miss Foreign Language» լեզվի գեղեցկության մրցույթ-միջոցառում (համագործակցությամբ՝ Օտար լեզուների ամբիոնի),
10. Մասնաճյուղային ինտելեկտուալ խաղ և զեկուցումներ գիտության ոլորտի համաշխարհային մրցանակների մասին (Ֆիլդսյան, Աբելյան, Նոբելյան, Պուլիցերյան),
11. «Բարի գալուստ Իջևան» ֆիլմի դիտում,
12. 2016-17 ուստարվա հեռակա բաժնի ուսուցման դասերի մեկնարկի առթիվ տոնական միջոցառում,
13. Այց ՎՏԲ-Հայաստան Իջևանի մասնաճյուղ,
14. Ուսանողական ֆլեշ-մոբ՝ Ուսանողների միջազգային օրվա առթիվ,
15. «Կանխարգելենք ՁԻԱՀ-ը» թեմայով բաց դաս,
16. «Վախի վերահսկումը հանրային ելույթների ժամանակ» թեմայով քննարկում,
17. «Ճանաչենք հայ թատրոնի մեծերին» խորագրով դաս-միջոցառում,
18. Ազգային պարերի ուսուցման խմբակի ստեղծում,
19. Ամանորյա դիմակահանդես:

Հանդիպումներ.

1. ՈՒԽ-ի հանդիպումները ուսանողության հետ՝ ըստ ֆակուլտետների,
2. Հանդիպում մասնաճյուղի տնօրենի հետ:

Արտաքին կապեր, ձեռքբերումներ.

1. Մասնակցություն Համապետական ուսանողական եռօրյա խորհրդաժողովին,
2. Խնայողությունների խաղ (համագործակցությամբ՝ ՀԵՀ Տավուշի մարզային կենտրոնի),
3. Մեդիագրագիտության վերաբերյալ դասընթաց (համագործակցությամբ՝ Ինֆոտան),
4. ՀՈՒԱԱ-ի «Կրթական ավտոբուս» ծրագրի իրականացում մասնաճյուղում,
5. «Հասարակություն առանց բռնության» ՀԿ-ի կողմից դասընթաց մասնաճյուղում «Գենդերային անհավասարություն» թեմայով,
6. Մասնաճյուղի թվով 4 ուսանողների մասնակցություն «Բազե-2016»-ին, որոնցից 2-ն արժանացել են մրցանակների,
7. Ուսանողների հասարակական ակտիվության սանդղակի մշակում:

Ապա ներկայացվեցին 2016-17 ուստարվա 2-րդ կիսամյակում կատարված հետևյալ աշխատաքները՝

Միջոցառումներ, ծրագրեր, նախաձեռնություններ.

1. ՈՒԽ-ի կազմի վերահաստատում,
2. Փոփոխություն ԵՊՀ ԻՄ-ի գիտական խորհրդում ընդգրկված ուսանող անդամների կազմում,
3. Կրթաթոշակային ծրագրերին մ/ճ-ի ուսանողների հայտագրման կազմակերպում,
4. Բասկետբոլի առաջնություն,
5. «Երիտասարդության հիմնախնդիրները և պետության հզորացման միտումները» խորագրով ուսանողական գիտաժողով (համագործակցությամբ՝ ԵՊՀ ԻՄ ՈՒԳԸ-ի),
6. «Ուսանողական կառույցների դերն ու նշանակությունը» թեմայով քննարկում,
7. «Ինչպե՞ս գրել ռեզյումե և ներկայանալ հարցազրույցի» թեմայով սեմինար,
8. «Գարեգին Նժդեհ» ֆիլմի դիտում,
9. Սուրբ Զատկի տոնին ընդառաջ իրազեկող միջոցառում,
10. Կանանց միջազգային օրվան նվիրված ֆակուլտետային միջոցառում,
11. Իրազեկում ազգաբնակչությանն ընտրության կարգի մասին,
12. «Հայ զինվորի հոգեկերտվածքի ձևավորումը ազգային գաղափարախոսության համատեքստում» թեմայով քննարկում ուսանողների մասնակցությամբ,
13. Ծանոթացում հայ և համաշխարհային հայտնիների նամականուն,
14. Մոմավառություն և ջահերով երթ՝ ի հիշատակ Հայոց ցեղասպանության զոհերի,
15. Անգլերենի և ազգային պարերի ուսուցման խմբակներում նոր ուսանողների ընդգրկում,
16. «Մենք և մեր ազգային պարերը» խորագրով միջոցառում Պարի միջազգային օրվան ընդառաջ,
17. Անանուն հարցում ուսանողությանը ծավալած գործունեության վերաբերյալ,
18. «Կամակոր կնոջ սանձահարումը» ներկայացման դիտում,
19. Անգլերեն լեզվի ուսուցման ուսանողական խմբակի ուսանողներին հավաստագրերի հանձնում,
20. Շուշիի ազատագրման օրվան ընդառաջ իրազեկող դաս և այցելություն հուշարձան:

Հանդիպումներ՝

1. ՈՒԽ-ի հանդիպումները ուսանողության հետ՝ ըստ ֆակուլտետների,
2. Հանդիպում հեռակա բաժնի ուսանողների հետ,
3. Հանդիպում մասնաճյուղի տնօրենի հետ:

Արտաքին կապեր, համագործակցություններ՝

1. «Ժամանակի կառավարում» թեմայով սեմինար Բարձրագույն կրթության կազմակերպման փորձագետների կողմից,
2. ՁԻԱՀ/ՄԻԱՎ-ի վերաբերյալ եռօրյա սեմինար (համագործակցությամբ՝ ՀԵՀ-ի Տավուշի մարզային կենտրոնի),
3. Մարդու իրավունքների և հանրային քննարկումների վերաբերյալ երօրյա դասընթաց (համագործակցությամբ՝ ՄԱԿ-ի ազգային ասոցիացիայի):

Հանդիպման վերջում ելույթ ունեցավ մասնաճյուղի տնօրեն Ս. Ա. Առաքելյանը՝ կատարված աշխատանքների համար իր գոհունակությունն արտահայտելով Ուսանողական խորհրդին՝ ի դեմս Իսկուհի Շաղբաթյանի, լուծումներ առաջարկեց ուսանողների կողմից բարձրացված խնդիրների շուրջ, դրականորեն արձագանքեց նրանց առաջարկների մեծ մասին: Տնօրենը ուսանողությանը դարձյալ կոչ արեց լինել ակտիվ, նախաձեռնող, ուսումնատենչ, նպատակասլաց, ապրել ուսանողական լիարժեք կյանքով:

2017թ. մայիսի 27-ին ԵՊՀ Իջևանի մասնաճյուղում կայացավ  «Ապրիլյան մարտական գործողություններ. զինվորից մինչև հրամանատար» թեմայով բաց դաս, որը վարեց Հայոց պատմության և հասարակագիտության ամբիոնի դասախոս, Ապրիլյան մարտական գործողությունների մասնակից Վլադիմիր Պողոսյանը:

Բաց դասի հիմնական նպատակն էր բացահայտել բանակային միջավայրը և հնարավորությունները, որտեղ յուրաքանչյուրը, ըստ իր ֆիզիկական և մտավոր ունակությունների, կարող է դրսևորվել:

Վ.Պողոսյանը, բաց դասի շրջանակներում ներկայացնելով բանակային առօրյան, մասնավորապես նշեց. «Անկեղծ ասած, մինչ բանակ զորակոչվելը այլ պատկերացում ունեի բանակային կյանքի, զինվորական կարգապահության և այլ հարցերի շուրջ: Այս երկու տարիները փոխեցին ինձ, իմ պատկերացումները, մարդկային կերպը, վերաբերմունքը դիմացինի, կոլեկտիվի նկատմամբ: Իմ հերոսը, միանշանակ, իմ զինակից ընկերն է, ով անկախ պայմաններից, իրավիճակից, հնարավորություններից, կյանքին սպառնացող վտանգի պայմաններում բարեխղճորեն իրականացնում է իր ծառայողական պարտքը»:

Ընդգծվեց, որ երբ 2016 թ. ապրիլի 1-ի լույս 2-ի գիշերը սկսվեցին ապրիլյան մարտական գործողությունները, հայրենիքի մերօրյա պաշտպանները սառնասրտորեն դիմակայեցին մինչև ատամները զինված հակառակորդին: Ժամկետային զինծառայողներն իրենց հմտավարժ սպաների հրամանատարությամբ արիաբար կանգնեցին մինչև վերջ և հանդես բերեցին հերոսության անկրկնելի օրինակներ: Ապրիլյան իրադարձությունները փոխեցին ոչ միայն բանակային առօրյան, այլև հասարակ քաղաքացուն:

Անդրադառնալով ապրիլյան մարտական գործողություններին՝ Վ.Պողոսյանը նշեց. «Կցանկանայի առանձնացնել հրամանատարներիս, իսկապես, Հայոց հաղթական բանակի սյունը հրամանատարն է: Յուրքանաչյուր հրամանատար հսկայական ներդրում ունի իր ենթակաների բոլոր հաջողությունների մեջ: Զորամասը միասնական տուն է, որտեղ յուրաքանչյուրն ունի իրեն վերապահված դերը, իսկ բանակը մեր պետության ամենակայացած համակարգն է:

Ապրիլյան մարտական գործողություններն ամբողջությամբ փոխեցին իմ պատկերացումներն աշխարհի, մարդկանց, պարզապես հասարակ զինվորի մասին: Կարծես ամեն ոք իր տեղում էր` հրամանատար, զինվոր, զինակից ընկեր… Ես հավատում եմ, որ նման զավակներ ունեցող ժողովուրդն անպարտալի է: Մենք արդեն մի բռունցք ենք` Հայաստան-Սփյուռք-Արցախ, և այդ բռունցքը շեշտակի ուժով իջնում է մեր ժողովրդի խաղաղ գոյակցությանը սպառնացող ոսոխի գլխին»:

Վ.Պողոսյանն առանձնացրեց բանակի ոչ միայն մարտական պատրաստականության մակարդակն ու խնդիրները, այլև  անդրադարձավ մշակութաժամանցային հարցերին. «Բանակում մեզ հնարավորություն տրվեց ոչ միայն լավագույնս ուսումնասիրել ռազմական գործը, այլև ցուցաբերել հասարակական ակտիվություն, կազմել թիմ` «Հայ Ասպետ», տպագրել ամսաթերթ: Թերթը այն հոգեմտավոր միջավայրն էր, որ փորձում  էինք ձևավորել և ստացվեց»:

Բաց դասի վերջում Վ.Պողոսյանը ԼՂՀ Պաշտպանության բանակի հրամանատարության կողմից շնորհակալագիր հանձնեց ԵՊՀ ԻՄ-ի տնօրեն Ս.Առաքելյանին` հայրենասեր, բանիմաց զինվորներ կրթելու համար:

2017թ. մայիսի 25-ին Ենոքավանի լեռնային չքնաղ բնության գրկում՝ «Ապագա տուր» հյուրանոցային համալիրում, կայացավ ԵՊՀ ԻՄ-ի կիրառական արվեստի ֆակուլտետի ուսանողների ավարտական աշխատանքների պաշտպանությունը:

«Կիրառական արվեստ» մասնա­գիտության` 2017թ. առկա ուսուցման ամփոփիչ ատեստավորման հանձնաժողովն ուներ հետևյալ կազմը.

1. Ազիզյան Խաչատուր Սուրենի –   նախագահ, ՀՀ նկարիչների միության նախագահի տեղակալ-քարտուղար, պրոֆեսոր, 

2. Հովհաննիսյան Գուրգեն Ժորժիկի –   նախագահի տեղակալ, ԵՊՀ բակալավրատի բաժնի պետ, աշխ. գիտ. թեկնածու, դոցենտ,

3. Առաքելյան Սամվել Արշավիրի –   մասնաճյուղի տնօրեն, պ.գ. թեկնածու, դոցենտ,

4. Մարգարյան Ալեքսան Շամիլի –   Կիրառական արվեստի ֆակուլտետի դեկանի  ԺՊ, ֆ/մ. գիտ. թեկնածու,

5. Ասատրյան Համլետ Միհրդատի –   Գծանկարի, գունանկարի և քանդակի ամբիոնի  վարիչի ԺՊ, ՀՀ նկարիչների միության անդամ,  արվեստագիտության դոցենտ,

6. Հարությունյան Մարտին Վարդանի –   Դեկորատիվ-կիրառական արվեստի և դիզայնի  ամբիոնի վարիչ, ՀՀ դիզայներների միության անդամ, արվեստագիտության թեկնածու,

7. Մխիթարյան Համլետ Խաչատուրի –   Տավուշի մարզի Իջևանի արվեստի դպրոցի տնօրեն,

8. Ղուլիջանյան Կարո Հայկազի –   Տավուշի մարզի Նոյեմբերյանի արվեստի դպրոցի տնօրեն:

Ավարտական աշխատանքների պաշտպանությանը ողջույնի խոսք ասաց ԵՊՀ Իջևանի մասնաճյուղի տնօրեն Ս. Ա. Առաքելյանը՝ մասնավորապես նշելով. «Հանձնաժողովի հարգարժա՛ն նախագահ, հարգելի՛ անդամներ, սիրելի՛ ուսանողներ, ծնողներ և հյուրեր,  այսօր մեզ համար տոնական օր է. իրականացնում ենք Կիրառական արվեստի ֆակուլտետի ուսանողների ավարտական աշխատանքների պաշտպանությունը: Որոշեցինք այս տարի պաշտպանությունն անցկացնել այս չքնաղ, գեղատեսիլ վայրում՝ «Ապագա տուր» հյուրանոցային համալիրում: Կարծում եմ՝ նպատակն արդարացվում է. խնդիրը միայն ավարտական աշխատանքների  պաշտպանությունը չէ, մենք ցանկանում ենք մեր ուսանող-շրջանավարտներին իրենց աշխատանքներն իրացնելու հնարավորություն տալ: Այդ նպատակով նախնական պայմանավորվածություն ենք ձեռք բերել պարոն Չիբուխչյանի հետ, որպեսզի մեզ հնարավորություն տա հանրապետությունում լավագույնը ճանաչված «Ապագա տուր» տուրիստական հանգրվանում Կիրառական արվեստի ֆակուլտետի աշխատանքների տաղավար ունենալ: Շնորհակալություն պարոն Չիբուխչյանին, հանձնաժողովին՝ պարոն Ազիզյանի գլխավորությամբ, ով վերջերս արժանացել է արվեստի վաստակավոր գործչի կոչման, շնորհավորենք նրան այդ առթիվ ու մեզ բոլորիս՝ այսօրվա տոնի կապակցությամբ և ուսանողներին մաղթենք հաջողություն»:  

Այս տարի ևս Կիրառական արվեստի ֆակուլտետի ուսանողների ավարտական աշխատանքներն աչքի էին ընկնում թեմատիկ, ոճական և ժանրային բազմազանությամբ:

Արդյունքները գոհացնող էին. աշխատանքների մեծ մասն արժանացավ հանձնաժողովի նախագահի և անդամների դրվատանքին: Տասնհինգ ուսանողներից ութը ստացավ «գերազանց» գնահատական, յոթը՝ «լավ»:

Ամփոփիչ ատեստավորման հանձնաժողովի կողմից «գերազանց» գնահատվեցին Անի Խաչատրյանի («Ձորափոր», ասեղնակար-կարպետ, ղեկավար՝ Անուշ Չիբուխչյան), Մերի Մալաքյանի («Աշուն», գոբելեն, ղեկավար՝ Դոնարա Չիբուխչյան), Քրիստինե Աղաբեկյանի («Աղջիկ թռչունով», ինտարսիա, մարկետրի, ղեկավար՝ Սամվել Մելքումյան), Հերմինե Մինասյանի («Մկրտություն», վիտրաժ, ղեկավար՝ Սերգեյ Հովհաննիսյան), Արմեն Տրուզյանի («Քուռկիկ Ջալալի», սֆերիզմ, դեկորատիվ նկարչություն, ղեկավար՝ Մհեր Ստեփանյան), Գայանե Հարությունյանի («Հայկական կարպետ», ղեկավար՝ Անուշ Չիբուխյան), Թեհմինե Ղազարյանի («Աղստևի հովտում», գոբելեն, ղեկավար՝ Դոնարա Չիբուխչյան)  և Կարեն Սարգսյանի («Այվազովսկի», դիմաքանդակ, ղեկավար՝ Տիգրան Բագամյան) ավարտական աշխատանքները:

«Լավ» գնահատվեցին Արմինե Նավասարդյանի («Մկրտություն», որմնանկար, ղեկավար՝ Սերգեյ Հովհաննիսյան), Սյուզի Այվազյանի («Աստղազարդ գիշեր», ասեղային գոբելեն, ղեկավար՝ Դոնարա Չիբուխչյան), Հասմիկ Սարհատյանի («Լեռնաշխարհ», որմնանկար, ղեկավար՝ Սամվել Մելքումյան) աշխատանքները: 

Նարեկ Մամիկոնյանի («Մեծ Մհեր», քանդակ, ղեկավար՝ Սերգեյ Հովհաննիսյան), Անահիտ Փաշինյանի («Հավերժություն», ժամացույց, ղեկավար՝ Քրիստինե Մխիթարյան), Մերի Կիրակոսյանի («Երկխոսություն», գեղանկար, ղեկավար՝ Արևիկ Խաչատրյան) և Մերի Գաբրիելյանի («Ապաշխարանք», ասեղային գոբելեն, ղեկավար՝ Ռուզան Պողոսյան) աշխատանքները ևս ստացան «Լավ» գնահատական:

Բոլոր ծնողների անունից գեղեցիկ շնորհակալական խոսքով հանդես եկավ Սյուզի Այվազյանի մայրը՝ Մարո Գալստյանը՝ ընդգծելով պրոֆեսորադասախոսական անձնակազմի ներկայացուցիչների անփոխարինելի դերն ու ներդրումը իրենց զավակների կրթության և դաստիարակության գործում, հղելով նրանց բարեմաղթանքներ:

Ավարտական աշխատանքների պաշտպանությունն անցավ հաճելի մթնոլորտում՝ մասնակիցներին պատճառելով գեղագիտական մեծ հաճույք ու բավականություն:

Պաշտպանության վերջում տնօրենը Կիրառական արվեստի ֆակուլտետի ուսանողների աշխատանքներից մեկը նվիրեց պարոն Ա.Չիբուխչյանին, ով շնորհակալություն հայտնեց նվերի և մասնաճյուղի նախաձեռնության համար՝ համոզմունք արտահայտելով, որ երկկողմ համագործակցությունը հաջողությամբ կպսակվի:

Ֆակուլտետի վարչական ու պրոֆեսորադասախոսական անձնակազմի ներկայացուցիչները բակալավրի որակավորում ստանալու առթիվ շնորհավորեցին իրենց շրջանավարտներին, մաղթեցին նրանց մասնագիտական ու անձնական մեծ ձեռքբերումներ: