2017թ. ապրիլի 24-ին` Հայոց ցեղասպանության  102-րդ տարելիցին, ԵՊՀ Իջևանի մասնաճյուղի վարչական, պրոֆեսորադասախոսական անձնակազմի անդամներ և ուսանողներ՝ տնօրեն Ս. Ա. Առաքելյանի գլխավորությամբ, Իջևանի քաղաքային իշխանությունների ներկայացուցիչներ, տարբեր կազմակերպությունների ղեկավարներ, բազում քաղաքացիներ միահամուռ շարժվեցին դեպի Իջևանում տեղադրված` Հայոց ցեղասպության զոհերի հիշատակին նվիրված հուշահամալիր՝ հարգանքի տուրք մատուցելու անմեղ զոհերի հիշատակին:

Համալսարանակնները ծաղիկներ ու ծաղկեպսակներ դրեցին հուշարձանին, մասնակցեցին հուշահամալիրի մոտ մարզի հոգևոր դասի ներկայացուցիչների կողմից  կատարվող ոգեկոչման արարողությանը:

Այնուհետև այցելեցին Իջևանի պատմաերկրագիտական թանգարան, որտեղ ականատես եղան Հայոց մեծ եղեռնի թեմայով կազմակերպված ցուցադրությանը:

Պայմանականորեն Հայոց ցեղասպանության սկիզբն է համարվում 1915թ. ապրիլի 24-ը. այդ օրը Կոստանդնուպոլսում ձերբակալվեց մտավորականության սերուցքը ՝ 600 հայազգի մտավորականներ, որոնք հետագայում սպանվեցին աքսորի ճանապարհին. Գրիգոր Զոհրապ, Դանիել Վարուժան, Ռուբեն Զարդարյան, Սիամանթո, Ռուբեն Սևակ,  Երվանդ Սըրմաքեշխանլյան, Ատոմ Յարճանյան, Հովհաննես Հարությունյան և ուրիշներ: Սակայն հայ պատմագիության մեջ որպես Հայոց ցեղասպանության տարեթվեր ընդունված է համարել 1892-1923թթ. որպես Թուրքիայի կառավարող շրջանների՝ Համիդյան Թուրքիայի, ապա Երիտթուրքերի կառավարության կողմից կազմակերպված ցեղասպանություն, որի հետևանքով  զանգվածային տեղահանության ենթարկվեց և բնաջնջվեց Արևմտյան Հայաստանի, Կիլիկիայի և Օսմանյան կայսրության նահանգների հայ բնակչությունը։ Ծիծեռնակաբերդի հուշարձանի 12 քարակոթողները` խորհրդանշում են կորցրած 12 գավառները, որոնք այժմ գտնվում են ժամանակակից Թուրքիայի կազմում:

Երիտթուրքական կառավարությունը, ջանալով պահպանել թուլացած Օսմանյան կայսրության մնացորդները, որդեգրեց պանթուրքիզմի քաղաքականությունը, այն է՝ հսկայածավալ Թուրքական կայսրության ստեղծում, որը, տարածվելով մինչև Չինաստան, իր մեջ կներառեր Կովկասի, Միջին Ասիայի բոլոր թուրքալեզու ժողովուրդներին: Ծրագիրը նախատեսում էր բոլոր ազգային փոքրամասնությունների թյուրքացում և երազելի «Մեծ Թուրանի»-ի ստեղծում՝ Բոսֆորից մինչև Ալթայ։ Այս համատեքստում Արևմտյան Հայաստանի բնիկ հայ ժողովուրդը դիտվում էր որպես գլխավոր խոչընդոտ այս ծրագրի իրականացման ճանապարհին, իսկ չկային հայերը՝ չկար նաև Հայկական հարցը։ Երիտթուրքերը որպես հարմար առիթ օգտագործեցին Առաջին համաշխարհային պատերազմի սկիզբը: Ծրագրի հեղինակներն էին Թալեաթը (ներքին գործերի նախարար), էնվերը (ռազմական գործերի նախարար), Ջեմալը (Պաղեստինյան ճակատի հրամանատար), Բեհաեդդին Շաքիր բեյը (երիտթուրքական կենտրոնական կոմիտեի անդամ) և ուրիշներ։

Հայոց ցեղասպանությունը նախատեսված էր իրականացնել երեք փուլով, որի առաջին փուլը ապրիլի 24 էր, իսկ երկրորդ փուլը՝ շուրջ 60.000 հայ տղամարդկանց զորակոչը թուրքական բանակ: Բանակ զորակոչված 15-45 տարեկան բոլոր հայ տղամարդի ավելի ուշ, զինաթափվեցին ու սպանվեցին իրենց թուրք զինակիցների կողմից: Երրորդ փուլով թուրք ջարդարարները սկսեցին կոտորել անպաշտպան մնացած հայ բնակչությանը՝ գերազանցապես կանանց, ծերունիներին և երեխաներին։ Կազմակերպվեց մասսայական բռնագաղթ, աքսոր և ջարդ։ Հայերին կա՛մ ստիպում էին ուրանալ քրիստոնեությունը, կա՛մ սպանում էին, կա՛մ ստիպում բռնել գաղթի ուղին։ Արևմտյան Հայաստանի ողջ մնացած հայերը բռնագաղթեցին Միջագետքի անապատներ, հիմնականում՝ Դեր Զոր, որտեղ և բնաջնջվեցին։

Վիճակագրական տվյալների համաձայն` Հայաստանում կոտորվեց 66 քաղաքների և մոտ 2500 գյուղերի հայ բնակչությունը։ Թալանվեց և քանդվեց 2350 եկեղեցի ու վանք։ Ոչնչացվեց 1500 դպրոց ու վարժարան։ Հայությանը հասցվեց 14,5 միլիարդ ֆրանկի վնաս։ Օսմանյան կառավարության կողմից իրականացված Հայոց ցեղասպանության փաստը հիմնավորվել է, ճանաչվել ու հաստատվել ականատեսների վկայություններով, օրենքներով, բանաձևերով և բազմաթիվ նահանգների ու միջազգային կազմակերպությունների որոշումներով:

Հայոց ցեղասպանությունը միջազգային հանրության կողմից դատապարտվել է տարբեր մակարդակներով. այն ընդունել են այնպիսի կազմակերպություններ, ինչպիսիք են Եվրոպայի Խորհուրդը՝ 1998, 2001թթ., Եվրամիությունը՝ Եվրախորհրդարանի բանաձևերով, Հայոց ցեղասպանությունը դատապարտել են 1987, 1998, 2000, 2001, 2002, և 2005թթ. ՄԱԿ–ի մի քանի հանձնաժողովներ, Եկեղեցիների համաշխարհային միությունը և այլն։ Հայոց ցեղասպանությունը դատապարտող բանաձևեր և որոշումներ ունեն Շվեդիայի խորհրդարանը, ԱՄՆ Ներկայացուցիչների պալատը, Չիլի և Արգենտինայի Սենատները, Լիտվայի Ասամբլեան, ԵՎրապառլամենտը, Վենեսուելայի Ազգային Ասամբլեան, Լեհաստանի և Նիդերլանդների խորհրդարանները, Կանադայի համայնքների, Իտալիայի դեպուտատների պալատը և այլն: Ֆրանսիայում, Ուրուգվայում, Կիպրոսում օրենքների տեսքով, իսկ Շվեյցարիայում՝ նաև այն ժխտելը դատապարտվում է քրեորեն:

Սակայն մինչև այսօր ոճրագործի` Թուրքիայի կողմից պետական մակարդակով անամոթաբար ժխտվում է ցեղասպանություն–ոճիրն այն «տրամաբանությամբ», որ քանի դեռ աշխարհն ամբողջովին չի ճանաչել ու դատապարտել իր գործած ոճիրը, ուրեմն` չկա և ոճիր, ուստի չկա նաև պատիժ:

Այնինչ հայն ապրում է՝ հիշելով իր դարավոր ահռելի ցավը, տագնապն ու սարսափը, հիշում է` պահանջելով Հայոց ցեղասպանության արդարացի ճանաչում ու հատուցում:

2017թ. ապրիլի 23-ին՝ Հայոց ցեղասպանության 102-րդ տարելիցին ընդառաջ, Իջևանում տեղի ունեցավ մոմավառություն և ջահերով երթ՝ Իջևանի քաղաքային շատրվանների հրապարակից դեպի Ցեղասպանության հուշահամալիր:

Երթին ակտիվ մասնակցություն ունեցան ԵՊՀ Իջևանի մասնաճյուղի ուսանողները՝ ՈՒԽ-ի գլխավորությամբ:

Մասնակիցները վառվող ջահերով, մոմերով, դրոշներով ուղևորվեցին Հայոց ցեղասպանության զոհերի հիշատակը հավերժացնող հուշահամալիր՝ հարգանքի տուրք մատուցելու 1915թ.  1.5 միլիոն անմեղ զոհերի հիշատակին:

Երթի ընթացքում մասնակիցները վանկարկում էին ազգային-հայրենասիրական խոսքեր ու արտահայտություններ, պահանջում Հայ դատի արդարացի ճանաչում:

Իրենց հետ հուշահամալիր տարած մոմերը ուսանողները դրեցին կոթողի մոտ, աղոթեցին զոհերի հոգու հանգստության համար, կատարեցին Հայոց մեծ եղեռնի թեմայով բանաստեղծություններ ու երգեր:

Վերջում  երթի մասնակիցները օդապարիկները բաց թողեցին երկինք:

2017թ. ապրիլի 22-ին ԵՊՀ Իջևանի մասնաճյուղում կայացավ վոլեյբոլի մարզային առաջնություն՝ նվիրված Հայոց ցեղասպանության 102-րդ տարելիցին:

Առաջնությունը ընդգրկուն էր իր մասնակիցներով ու երկրպագուների թվով. մասնակցում էին Տավուշի մարզի վեց թիմեր՝ Գանձաքարի, Սարիգյուղի, Այգեհովտի, Ներքին Ծաղկավանի, Պտղավանի և ԵՊՀ Իջևանի մասնաճյուղի թիմերը:

Ներկա էին մարզի ուսումնական հաստատությունների ներկայացուցիչներ, դպրոցների ֆիզկուլտուրայի ուսուցիչներ, մարզիչներ, հյուրեր, ԵՊՀ Իջևանի մասնաճյուղի վարչական և պրոֆեսորադասախոսական անձնակազմի անդամներ, ուսանողներ, աշակերտներ:

Բացման խոսք ասաց ԵՊՀ ԻՄ-ի արտակարգ իրավիճակների, մարմնակրթության և սպորտի ամբիոնի վարիչ Վ.Պողոսյանը՝ ողջունելով բոլոր մասնակիցներին, ներկայացնելով առաջնության անցկացման նպատակը, որն է՝ Հայոց ցեղասպանության անմեղ զոհերի հիշատակին նվիրված սպորտային միջոցառումով մասսայականացնել սպորտը տարածաշրջանում, համախմբել ամբողջ մարզին:

Ապա ողջույնի խոսքով հանդես եկավ ԵՊՀ Իջևանի մասնաճյուղի տնօրեն Ս. Ա. Առաքելյանը՝ մասնավորապես նշելով, որ Հայոց ցեղասպանության զոհերի հիշատակին նվիրված միջոցառումներն ունեն ոչ միայն հիշելու,  այլև պայքարի ու վերածնության, համախմբման խորհուրդ, հաջողություն մաղթեց վոլեյբոլի մարզային առաջնության բոլոր մասնակիցներին, մաղթեց, որ հաղթի ուժեղագույնը:

Խաղերն ընթացան օլիմպիական ձևով. պարտվողը դուրս էր մնում մրցակցությունից:

Եզրափակիչ դուրս եկան Պտղավանի և ԵՊՀ Իջևանի մասնաճյուղի թիմերը:

Համառ պայքարում 2:1 հաշվով հաղթեց ԵՊՀ Իջևանի մասնաճյուղի հավաքական թիմը:

Երկրորդ և երրորդ տեղերը զբաղեցրին Պտղավանի և Գանձաքարի թիմերը:

Հաղթողները պարգրատրվեցին մեդալներով ու պատվոգրերով:

2017թ. ապրիլի 20-ին ԵՊՀ Իջևանի մասնաճյուղում կայացավ Հայոց լեզվի և գրականության ամբիոնի կողմից «Հարազատ  կրթօջա՛խ  իմ՝  ԵՊՀ  ԻՄ», «Բարություն», «Զրույց  զինվորի  հետ» թեմաներով մարտին հայտարարված   էսսեների համահամալսարանական մրցույթի հաղթողների պարգևատրման արարողությունը:

Ներկա էին մասնաճյուղի վարչական և պրոֆեսորադասախոսական անձնակազմի ներկայացուցիչներ, տարբեր մասնագիտությունների ուսանողներ:

Բացման խոսքով հանդես եկավ Հայոց լեզվի և գրականության ամբիոնի դոցենտ, բ.գ.թ., մասնագիտության կրթական ծրագրի պատասխանատու Ա.Սարհատյանը՝ մասնավորապես նշելով. «Համոզված էինք, որ մեր ուսանողներին կներշնչեն այս թեմաները, և կներկայացվեն լավ աշխատանքներ: Չսխալվեցինք: Ահա  մեր սեղանին են դրված աշխատանքներ՝ երեք թեմաներով: Ուրախացնողն այն էր, որ էսսեները  սրտի խոսքեր էին` գրված անկեղծ ու անմիջական  զգացումներով,  ինքնուրույն էին և անգամ հուզական:  Ներկայացվել էին և՛ չափածո, և՛ արձակ շարադրանքներ, որոնք ամբիոնում քննարկելուց հետո ընտրվեցին մրցանակային տեղերի ու խրախուսանքի արժանի լավագույն աշխատանքները»:   

Ելույթ ունեցավ ԵՊՀ ԻՄ-ի տնօրեն, պ.գ.թ., դոցենտ Ս. Ա. Առաքելյանը՝ ողջունելով   Հայոց լեզվի և գրականության ամբիոնի նախաձեռնությունը, մրցույթի բոլոր մասնակիցներին, ընդգծելով նման միջոցառումների կարևորությունը, նրանց ունեցած ուսուցողական ու դաստիարակչական մեծ նշանակությունը, այնուհետև մրցանակային տեղեր գրաված ուսանողներին պարգևատրեց պատվոգրերով ու նվերներով:

Էսսեների համահամալսարանական մրցույթում առաջին մրցանակի էր արժանացել «Անգլերեն լեզու և գրականություն» մասնագիտության առաջին կուրսի ուսանող Մհեր Մկրտումյանի  էսսեն՝ «Նամակ զինվորին» թեմայով:

Երկրորդ մրցանակի էր արժանացել «Պատմություն» մասնագիտության 4-րդ կուրսի ուսանող Հրանտ Ղազումյանի՝ մեր կրթօջախին նվիրված  ջերմ ու սրտաբուխ աշխատանքը:

Երրորդ մրցանակային տեղ էր գրավել «Հայոց լեզու և գրականություն» մասնագիտության 4-րդ կուրսի ուսանողուհի Դիանա Բեգլարյանի էսսեն, որի մեջ սահմանամերձ գոտում կատարված  իրադարձությունների ֆոնի վրա ներկայացվում է թշնամու հրազենից ծանր վիրավոր իր պապիկի հանդեպ համագյուղացիների ցուցաբերած բարեսրտության ու մարդասիրության մասին:

Ներկայացված բոլոր աշխատանքների մեջ կային արձակ և  չափածո  ուշագրավ հատվածներ, ջերմ  ու սիրառատ տողեր` ուղղված հայ զինվորներին, մեր կրթօջախին, որոնցից խրախուսանքի արժանացան  հետևյալ աշխատանքները.

• «Տնտեսագիտության տեսություն» մասնագիտության երրորդ կուրսի ուսանող Ռաֆիկ Մինասյանի «Նամակ զինվորին»  թեմայով էսսեն,
  

• «Անգլերեն լեզու և գրականություն» մասնագիտության առաջին կուրսի ուսանողուհի Իննա Մկրտումյանի «Բարություն» թեմայով աշխատանքը,

  

• «Տնտեսագիտության տեսություն» մասնագիտության առաջին կուրսի ուսանողուհի Սոսե Խաչատրյանի «Նամակ զինվորին» թեմայով էսսեն:

Վերջում ելույթ ունեցավ Հայոց լեզվի և գրականության ամբիոնի վարիչ Վ.Ավագյանը՝ իրենց անկեղծ, անմիջական,  ստեղծագործական մեծ ներշնչանքով գրված աշխատանքների համար շնորհակալություն հայտնելով բոլոր մասնակիցներին, կարևորելով այդպիսի մրցույթների դերը հատկապես ստեղծագործ ուսանողների բացահայտման, նրանց ինքնադրսևորման իմաստով և համոզմունք արտահայտելով, որ ամբիոնի կողմից նման նախաձեռնությունները կլինեն հաճախական:   

2017թ. ապրիլի 20-ին  Ֆինանսական համակարգի հաշտարարի գրասենյակի  կողմից իրականացվող «Սպառողների ֆինանսական կրթության և իրազեկության բարձրացման» ծրագրի շրջանակներում ԵՊՀ ԻՄ-ում կայացավ  սեմինար-քննարկում, որը վարում էին գրասենյակի ներկայացուցիչներ Աշոտ Ղոչիկյանը, Հայկ Հովհաննիսյանը և Էմիլիա Հարությունյանը:

Սեմինար-քննարկմանը մասնակցում էին Շրջանավարտների և կարիերայի կենտրոնի համակարգող Արփինե Եգանյանը, բուհի տարբեր մասնագիտությունների (գլխավորապես «Տնտեսագիտության տեսություն» մասնագիտության) ուսանողներ:

Սեմինարի ընթացքում մանրամասն ներկայացվեցին ՀՀ ֆինանսական համակարգի կառուցվածքը, ֆինանսական համակարգը կարգավորող մի շարք օրենսդրական ակտեր, ոլորտում առկա ֆինանսական պրոդուկտները (պլաստիկ քարտեր, վարկեր, ավանդներ, ապահովագրություն), դրանցից օգտվելու հետ կապված ռիսկերը, քննարկվեցին տարբեր խնդրահարույց իրավիճակներ, որոնց հետ առնչվում են ինչպես մասնագետները, այնպես էլ յուրաքանչյուր անձ:

Ներկայացվեցին նաև Ֆինանսական համակարգի հաշտարարի գրասենյակի գործունեության հիմնական նպատակները և Հաշտարարի արձանագրած արդյունքները, բերվեցին վիճակագրական տվյալներ, որոնք փաստում էին  գրասենյակի գործունեության ընդլայման մասին: Ընդգծվեց, որ մարզերում Հաշտարարին դիմում են ավելի   հազվադեպ, քան Երևանում, ինչը բացատրվեց հաճախորդի՝  սեփական իրավունքների գիտակցման մակարդակի բարձրացմամբ:

Ուսանողները մեծ հետաքրքրությամբ և ակտիվորեն մասնակցեցին սեմինար-քննարկմանը, Ֆինանսական համակարգի հաշտարարի գրասենյակի  ներկայացուցիչներին ուղղեցին իրենց հետաքրքրող հարցերը և ստացան սպառիչ պատասխաններ:

Սեմինարի վերջում մասնակիցներին առաջադրվեցին տարբեր իրավիճակային խնդիրներ, որոնց ակտիվ մասնակցություն ցուցաբերած ուսանողներին տրվեցին խրախուսական նվերներ, իսկ բոլոր ներկաներին՝ գրասենյակի գործունեությանը և ֆինանսական համակարգին  վերաբերող բուկլետներ: