2017թ. ապրիլի 6-ին ԵՊՀ ԻՄ-ի ուսանողական խորհրդում կայացավ «Հայ զինվորի հոգեկերտվածքի ձևավորումը ազգային գաղափարախոսության համատեքստում» թեմայով քննարկում: 

Ուսանողներն անդրադարձան ազգային ոգուն, հայ մարդու, հայ զինվորի դաստիարակությանը վերաբերող հարցերի՝ իրենց արտահայտած տեսակետները հիմնավորելով գեղարվեստական բնորոշ մեջբերումներով, բանաստեղծություններով ու երգերով:

Քննարկման ընթացքում ներկայացվեցին նաև մերօրյա հերոսների սխրագործությունները՝ ևս մեկ անգամ հաստատելով  հայրենիքի պաշտպանության գործի առաջնայնությունը:

Ընդգծվեց հասարակական կյանքի տարբեր օղակներում ռազմահայրենասիրական դաստիարակությանը, ազգային արժեքների պահպանմանն ուղղված միջոցառումների կարևորությունը:

Հիմնավորվեց այն գաղափարը, որ պետք է մշտապես զգոն ու շրջահայաց լինել, բարձր պահել ազգային ինքնագիտակցության ոգին, խորապես ճանաչել սեփական ժողովրդի պատմությունը և նրան վերաբերվել որպես անցյալի արձագանքի՝ ապագայի մեջ:

Քննարկման վերջում Ուսխորհրդի անդամներն այցելեցին Ազատամարտիկների հուշարձան, ծաղիկներ դրեցին և աղոթեցին նրանց հոգու հանգստության համար՝ ուխտելով  շարունակել նրանց կիսատ մնացած վեհ երազանքները:

2017թ. ապրիլի 3-ին ԵՊՀ Իջևանի մասնաճյուղում կայացավ «Անգլերենը որպես օտար լեզու դասավանդվող լսարանում Էքստրավերտությունը և ինտրովերտությունը» թեմայով սեմինար-քննարկում, որը վարում էր «Անգլերեն լեզու և գրականություն» մասնագիտության ծրագրի պատասախանատու Աստղիկ Սիմոնյանը:

Քննարկմանը ներկա էին Անգլերեն լեզվի և գրականության ամբիոնի դասախոսներ, մասնակցում էին տվյալ մասնագիտության առաջին և երկրորդ կուրսերի ուսանողներ:

Նախ Ա.Սիմոնյանի կողմից ներկայացվեց քննարկվող թեմայի նպատակը, խնդիրները, ակնկալվող արդյունքները, բացատրվեցին դրան առնչվող տերմինները:

Այնուհետև դասախոսներին ուղղվեցին հարցեր, թե ինչ մեթոդներ կիրառել, ինչպիսի հանձնարարություններ տալ անգլերենը որպես օտար լեզու դասավանդվող լսարանում՝ տարբեր հոգեբանական տիպերի (էքստրավերտ, ինտրովերտ, ամբիվերտ) պատկանող ուսանողների հետ աշխատելիս:

Ապա հարցեր ուղղվեցին ուսանողներին: Այն հարցին, թե արդյոք  դասախոսներին հաջողվում է վերահսկել դասին ինտրովերտ և էքստրավերտ ուսանողների մասնակցության հավասարակշռությունը, ուսանողների մեծ մասը դրական պատասխանեց:

Քննարկման սկզբում գերիշխող էր այն կարծիքը, որ իրենց ակտիվության շնորհիվ էքստրավերտ ուսանողներն ավելի շատ են արտահայտում իրենց ձեռք բերած գիտելիքները, ըստ այդմ` համարվում են ավելի ընդունակ ու բանիմաց: Սակայն “TED talks” հայտնի ալիքի ֆիլմերից մեկը՝ Սյուզն Քեյնի «Ինտրովերտների ուժը» դասախոսությունը (The Power of Introverts հասանելի` https://www.youtube.com/watch?v=c0KYU2j0TM4 կայքում) լսելուց հետո պարզ դարձավ, որ ինտրովերտությունը բացասական գիծ չէ, այլ երբեմն հակառակը`աշխարհին պետք են ինտրովերտներ, երբ հարցը վերաբերում է եզակի գաղափարներ և մտքեր արտահայտելուն: Չպետք է ինտրովերտությունը ընկալել որպես պատնեշ` օտար լեզվի դասավանդման և ուսումնառության հարցում, այլ պետք է հարմարեցնել «Մտածի՛ր, ապա կիսվի՛ր» (“Think-pair-share”) տեխնիկան` առավելագույն արդյունքի հասնելու համար:

Ֆիլմի ավարտից հետո մասնակիցներին տրվեցին անանուն հարցման թերթիկներ, որոնցում նրանք պետք է արտահայտեին վերոնշյալ և այլ հարցերի շուրջ իրենց ունեցած կարծիքները: Վերջում մասնակիցները գրավոր ներկայացրին անգլերեն լեզվի դասավանդման բարելավմանն ուղղված իրենց առաջարկները` աչքի առաջ ունենալով ուսանողների տարբեր հոգեբանական տիպերը:

Սեմինար-քննարկման կառուցվածքի անգլերեն տարբերակին կարող եք ծանոթանալ այստեղ՝ Introextro.pptx:

 2017թ. մարտի 25-ին ԵՊՀ ԻՄ-ի գծանկարի, գունանկարի և քանդակի ամբիոնի ասիստենտ, մանկավարժական գիտությունների թեկնածու Լիլիթ Ֆլջյանի և Խ.Աբովյանի անվան հայկական պետական մանկավարժական համալսարանի կողմից Կիրառական արվեստի ֆակուլտետին նվիրաբերվեց մասնագիտական արժեքավոր գրականություն՝ հայերենով և օտար լեզուներով ութ անուն գիրք:

Ներկա էին ֆակուլտետի վարչական և պրոֆեսորադասախոսական անձնակազմի ներկայացուցիչներ, ուսանողներ, մասնաճյուղի աշխատակիցներ:

Նվիրաբերված գրքերը հիմնականում պատկերագրություններ են, որոնցում ամփոփված են հայ և համաշխարհային կերպարվեստի հայտնի ներկայացուցիչների աշխատանքները.

1. Միրզախանյան Ռ., Իմպրեսիոնիզմ. նկարիչ հայեր, Երևան, 2016, 416 էջ:
2. Չուբարյան Ա., Ղուկաս Չուբարյան, Եր., 2012, 148 էջ:
3. Հակոբյան Ա., Արսեն Շաբանյան, Եր., 2009, 144 էջ:
4. Հակոբյան Ա., Վարդան Մախոխյան, Եր., 2006, 196 էջ:
5. Ֆլջյան Լ. Հ., Նյութերի տեխնոլոգիա, ուսումնամեթոդական ձեռնարկ, Եր., 2017, 50 էջ (4 օրինակ):
6. Leonard de Vinci, Son temps,  Mango document,  64 p.:
7. “Regard d՚ aujourd՚hui”,  Fontaine – Mango,  1995,  64 p.:
8. “Jahresberisht”, KHM,  2001,  158 p.:

 Լ.Ֆլջյանի խոսքով՝ իրենց նախաձեռնության նպատակն է նպաստել մասնաճյուղի ուսանողների մասնագիտական գիտելիքների զարգացմանը,   տրամադրված գրքերը նրանց հնարավորություն կտան մոտիկից տեսնելու և ուսումնասիրելու հայտնի նկարիչների աշխատանքները, դրանց հիման վրա մասնագիտական փորձառություն ձեռք բերելու և ինքնահաստատվելու:

Տիկին Ֆլջյանին մեծ նախաձեռնության համար իրենց խորին շնորհակալությունը հայտնեցին Կիրառական արվեստի ֆակուլտետի դեկան Ա.Մարգարյանը, ֆակուլտետի դասախոսները, մասնավորապես՝ Գ.Հովհաննիսյանը, Ա.Չիբուխչյանը, ուսանողները:

2017թ. մարտի 23-ին ԵՊՀ Իջևանի մասնաճյուղում տեղի ունեցավ Դասավանդման առաջավոր փորձի փոխանցման և երիտասարդ դասախոսների աջակցման կենտրոնի կազմակերպած՝ «Մանկավարժական ժամանակակից տեխնոլոգիաները» թեմայով դաս-քննարկումը, որը վարեց մ.գ.դ., պրո‎‎ֆեսոր Հ. Հ. Պետրոսյանը:

Պրոֆեսորը ներկայացրեց դասի նպատակը և խնդիրները, մանկավարժական արդի տեխնոլոգիաների տեսական հիմունքները, տեխնոլոգիաների դասակարգումը, անդրադարձավ հումանիտար տեխնոլոգիաների առանձնահատկություններին:

Ապա Հ.Պետրոսյանն անդրադարձավ ուսուցման ժամանակակից տեխնոլոգիաների բովանդակության, ընտրության և դրանց կիրառման հարցերին: Նրա խոսքով` ուսուցման տեխնոլոգիան մանկավարժական համակարգի բաղադրիչն է, և նրա կառուցվածքը կարելի է ներկայացնել երկու տարբերակով՝ ըստ այն կազմող տարրերի (մեթոդներ, ձևեր, եղանակներ, միջոցներ, հնարներ և ուսուցման, տեղեկատվության, ղեկավարման ձևեր) և ըստ գործառնությունների (նախագծում, իրականացում, վերլուծություն, արժևորում և գնահատում):

Փորձառու մանկավարժը շեշտեց, որ ուսուցման տեխնոլոգիա ասելով` պետք է հասկանալ կրթական գործընթացի մասնակիցների փոխազդեցության միջոցներն ու եղանակները: Մեթոդները, միջոցները, ձևերը, եղանակները, հնարները ուսուցման տեխնիկայի բաղադրիչներն են, որոնք ընտրվում և օգտագործվում են:

Դաս-քննարկման ընթացքում մանրամասն ներկայացվեցին և ուսուցման մեթոդները, դրանց բովանդակությունը, ընտրությունը և իրականացումը, դրանց տեղն ու դերը ընդհանրապես կրթական տեխնոլոգիայում:

«Ուսուցման մեթոդը, – սահմանեց պարոն Պետրոսյանը, – դասավանդողի և ուսումնառողի կարգավորված փոխկապակցված գործունեության եղանակ է, գործունեության ճանապարհ՝ ուղղված ուսուցման գործընթացում դրված նպատակների իրականացմանը, խնդիրների լուծմանը»:

2017թ. մարտի 23-ին ամփոփվեցին Երևանի պետական համալսարանի կողմից անցկացվող դպրոցականների օլիմպիադայի 2-րդ փուլի արդյունքները, որոնց համաձայն՝ Տավուշի մարզի 15 աշակերտներ հաղթող ճանաչվեցին և կստանան համապատասխանաբար I, II, III կարգի դիպլոմներ ու պատվոգրեր:

Այս տարի Տավուշի մարզից օլիմպիադային մասնակցեց 24 միջնակարգ, 4 ավագ դպրոցների և 2 վարժարանի 300 աշակերտ, որոնցից շուրջ 60 աշակերտ հաղթահարեցին 1-ին փուլի արգելքը և մասնակցեցին 2-րդ փուլին:

«Հայոց լեզու և գրականություն» առարկայից I կարգի դիպլոմի է արժանացել Կողբի թիվ 2 միջնակարգ դպրոցի XII դասարանի աշակերտուհի Մարուսյա Ղարախանյանը:

«Ստեղծագործական աշխատանք»-ից I կարգի դիպլոմի է արժանացել Իջևանի ավագ դպրոցի XII դասարանի աշակերտուհի Անի Մարգարյանը:

Ստեղծագործական աշխատանք»-ից II կարգի դիպլոմի է արժանացել Բերդավանի միջնակարգ դպրոցի X դասարանի աշակերտուհի Վիկտորյա Ղազարյանը:

«Կենսաբանություն» առարկայից II կարգի դիպլոմի է արժանացել Արճիսի միջնակարգ դպրոցի XII դասարանի աշակերտուհի Արփինե Մինասյանը:

«Հայոց լեզու և գրականություն» առարկայից III կարգի դիպլոմի են արժանացել Կողբի թիվ 2 միջնակարգ դպրոցի XII դասարանի աշակերտուհի Լիդա Քոչարյանը և Իջևանի ավագ դպրոցի XII դասարանի աշակերտուհի Գոհար Մխիթարյանը:

«Աշխարհագրություն» առարկայից պատվոգրի է արժանացել Աչաջրի միջնակարգ դպրոցի XII դասարանի աշակերտ Տիգրան Գասպարյանը:

«Կենսաբանություն» առարկայից պատվոգրի են արժանացել Աչաջրի միջնակարգ դպրոցի XII դասարանի աշակերտ Ադամ Փիրումյանը և  Բերդավանի միջնակարգ դպրոցի XII դասարանի աշակերտուհի Աննա Թանդիլյանը:

«Հայ ժողովրդի պատմություն» առարկայից պատվոգրի է արժանացել Կողբի թիվ 2 միջնակարգ դպրոցի XII դասարանի աշակերտուհի Նելլի Մուրադյանը:

«Ֆիզիկա» առարկայից պատվոգրի է արժանացել Բերդավանի միջնակարգ դպրոցի XII դասարանի աշակերտ Սուրեն Մելքոնյանը:

«Հայոց լեզու և գրականություն» առարկայից պատվոգրի են արժանացել Կողբի թիվ 2 միջնակարգ դպրոցի XII դասարանի աշակերտուհի Լիլիթ Մուրադյանը, Իջևանի ավագ դպրոցի XII դասարանի աշակերտուհի Էդիտա Օթարյանը և Վերին Ծաղկավանի XII դասարանի աշակերտուհիներ Մարիա Հովսեփյանն ու Մերի Խալաթյանը:

Հարկ է նշել, որ  ԵՊՀ-ի ամենամյա օլիմպիադայում 1-3-րդ տեղերը զբաղեցրած աշակերտները վճարովի ուսուցման համակարգով ԵՊՀ ընդունվելու դեպքում առաջին կուրսում կստանան ուսման վարձի զեղչ՝ համապատասխանաբար 50, 40 և 30%-ով: