2017թ. մարտի 10-ին ԵՊՀ Իջևանի մասնաճյուղում կայացավ կանանց միամսյակին նվիրված միջոցառում (անգլերեն լեզվով), որը կազմակերպվել էր Անգլերեն լեզվի և գրականության ամբիոնի ու նույն մասնագիտության 3-րդ կուրսի ուսանողների կողմից:

Ներկա էին ամբիոնի վարիչ Ք.Հարությունյանը, ամբիոնի դասախոսները և ուսանողներ:

Միջոցառման ընթացքում շնորհանդեսի ուղեկցությամբ ներկայացվեց տոնի նախապատմությունը, թե ինչպես  և երբվանից մարտի 8-ը հռչակվեց որպես Կանանց միջազգային օր: Ընդգծվեց, որ այդ օրվա հետ կապված առաջին պատմական իրադարձությունը 1857թ. մարտի 8-ն էր, երբ Նյու Յորքի տեքստիլ գործարանների կին աշխատողներն իրենց իրավունքների պաշտպանության համար քայլերթով անցան քաղաքի փողոցներով:

Ուսանողները զանազան սլայդների օգնությամբ ներկայացրին տարիների ընթացքում կանանց ձեռք բերած նվաճումները, հումորային տեսահոլովակների միջոցով անդրադարձան կանանց և տղամարդկանց տարբերություններին:

Միջոցառման մի առանձին հատված էլ նվիրված էր մասնաճյուղում օտար լեզուներ դասավանդող գեղեցիկ սեռի ներկայացուցիչներին, որ մեծ ոգևորությամբ ընդունվեց ոչ միայն ուսանողների, այլև դասախոսների կողմից:

2017թ. մարտի 9-ին ԵՊՀ ԻՄ-ում կայացավ վոլեյբոլի մասնաճյուղային (աղջիկների)  առաջնություն՝ նվիրված կանանց տոնին:

Առաջնությանը մասնակցեցին «ՀԼԳ I», «ԱԼԳ II», «ՏՏ I» կուրսերի և Կիրառական արվեստի ֆակուլտետի հավաքական թիմերը:

Հանդիպեցին «ՀԼԳ I» – «ՏՏ I» և «ԱԼԳ II» – Կիրառական արվեստի ֆակուլտետի հավաքական թիմերը:

Եզրափակիչ դուրս եկան «ՏՏ I» և Կիրառական արվեստի ֆակուլտետի հավաքական թիմերը:

Հաղթող ճանաչվեց Կիրառական արվեստի ֆակուլտետի հավաքական թիմը, որը տնօրենության կողմից պարգևատրվեց հուշանվերներով:

Ս.թ. փետրվարի 23-ին մասնաճյուղում անցկացվեց վոլեյբոլի մասնաճյուղային (տղաների) առաջնություն, որին մասնակցեցին Բնական գիտությունների ֆակուլտետի «Քարտեզագրություն և կադաստրային գործ» մասնագիտության 2-րդ կուրսի, «Ինֆորմատիկա և կիրառական մաթեմատիկա» մասնագիտության 1-ին և 2-րդ կուրսերի, Տնտեսագիտության ֆակուլտետի հավաքական թիմերը:

Նախ հանդիպեցին «ԻԿՄ I» և «ՔԿԳ II» կուրսերի թիմերը. 2:0 հաշվով հաղթեց  «ՔԿԳ II» կուրսի թիմը:

Ապա հանդիպեցին «ԻԿՄ II» կուրսի և Տնտեսագիտության ֆակուլտետի թիմերը. 2:0 հաշվով հաղթեց  Տնտեսագիտության ֆակուլտետի թիմը:

Եզրափակիչ հանդիպմանը մասնակցեցին «ՔԿԳ II» կուրսի և Տնտեսագիտության ֆակուլտետի թիմերը:

Հաղթող ճանաչվեց «Քարտեզագրություն և կադաստրային գործ» մասնագիտության 2-րդ կուրսի թիմը, որը տնօրենության կողմից պարգևատրվեց հուշանվերով:

2017թ. մարտի 7-ին ԵՊՀ ԻՄ-ի բնական գիտությունների ֆակուլտետում տեղի ունեցավ կանանց տոնին նվիրված միջոցառում, որը կազմակերպել էին «Ինֆորմատիկա և կիրառական մաթեմատիկա» մասնագիության չորրորդ կուրսի ուսանողուհիները:

Տոնական միջոցառումն ուղեկցվում էր համապատասխան շնորհանդեսով ու գեղեցիկ դասական երաժշտությամբ:

Միջոցառման մասնակիցները նախ ներկայացրին կանանց տոնի նախապատմությունը, թե մարտի 8-ն ինչպես և ում շնորհիվ հռչակվեց Կանանց միջազգային օր:

Ապա նրանք հանդես եկան տոնին առնչվող գեղարվեստական գողտրիկ զրույցներով («Լուսավոր գարնանը լուսավորեք ձեր միտքն ու հոգին», «Մոր հուզիչ նամակը աղջկան»), ասույթներով ու բանաստեղծություններով:

Մասնավորապես ներկայացվեցին ասույթներ` մայրական ամենազոր սիրո մասին, ոգեշունչ բանաստեղծություններ` գլխավորապես կենսախինդ գարնան վերաբերյալ («Գարնանամուտ», «Երբ լուսափթիթ գարունն է գալիս», «Գարունը այնքա՜ն ծաղիկ է վառել», «Ես չեմ կարող չներշնչվել» և այլն):

Ներկաներն իրենց գոհունակությունն արտահայտեցին մասնակիցներին` գարնանային թարմ տրամադրությամբ հագեցած միջոցառման համար:

2017թ. մարտի 7-ին ԵՊՀ ԻՄ-ի բնական գիտությունների ֆակուլտետում տեղի ունեցավ Ուսանողական գիտական ընկերության նախագահի ընտրություն:

Ներկա էին ֆակուլտետի գիտական խորհրդի և ուսանողական գիտական ընկերության անդամները:

Առաջադրվել էր երկու թեկնածու՝ «Քարտեզագրություն և կադաստրային գործ» մասնագիտության երկրորդ կուրսի ուսանողուհի Աղավնի Օրդինյանը և նույն մասնագիտության երրորդ կուրսի ուսանողուհի Նառա Մնացականյանը:

Ընտրությունից առաջ ֆակուլտետի ՈՒԳԸ-ի գործող նախագահ Էրինե Ղարայանը ներկայացրեց ուսանողական գիտական ընկերության կարևորությունը ուսանողների համար, ուսանողական գիտական նախաձեռնություններով (զեկուցումներով, ինտելեկտուալ խաղերով, բանավեճերով) լի  առօրյա մաղթեց ֆակուլտետին:  

Ընտրության արդյունքում ձայների մեծամասնությամբ Բնական գիտությունների ֆակուլտետի ՈՒԳ-ի նախագահ ընտրվեց Աղավնի Օրդինյանը:

Ֆակուլտետի ուսանողական գիտական ընկերության նորընտիր նախագահին շնորհավորեց և ֆակուլտետի դեկան Մ.Զաքարյանը՝ նրան մաղթելով աշխատանքային բուռն գործունեություն ու  նորանոր հաջողություններ:

2017թ. մարտի 6-ին ԵՊՀ Իջևանի մասնաճյուղում տեղի ունեցավ տնօրեն Ս. Ա. Առաքելյանի հանդիպումը Հեռակա ուսուցման բաժնի աշխատակիցների հետ:

Հանդիպման ընթացքում ամփոփվեցին 2016-2017 ուստարվա երկրորդ կիսամյակի դասերի նախապատրաստական աշխատանքները:

Մասնավորապես նշվեց, որ բոլոր մասնագիտությունների գծով կազմվել են դասացուցակներ, որոնցում ամբողջությամբ արտացոլված է ողջ կիսամյակային ծանրաբեռնվածությունը: Հստակեցված է ողջ լսարանային ֆոնդը: Ուսանողների հաճախումների վերաբերյալ կազմվել են համապատասխան ցուցակներ:

Բաժնի համապատասխան աշխատակիցներին հանձնարարվել է, որ հետևողական լինեն ուսանողական զեղչերի դիմումների, ուսանողների շարժի, ավարտական կուրսերում ամփոփիչ ատեստավորման քննությունների հարցաշարերի և ընդհանրապես այս կիսամյակի ուսումնական գործընթացը պատշաճ մակարդակով իրականացնելու վերաբերյալ բոլոր հարցերում:

Տնօրենը մասնավորապես կարևորեց ուսման առաջադիմությանը միտված նպատակային քայլերի հաջորդականությունը: Այս համատեքստում հրահանգվեց ակտիվորեն համագործակցել համապատասխան ամբիոնների և մասնագիտությունների կրթական ծրագրերի պատասխանատուների հետ:   

Ամփոփելով 2016-2017 ուստարվա երկրորդ կիսամյակի դասերի նախապատրաստական աշխատանքները՝ դրանք գնահատվեցին բավարար: