Սոցիալական մեդիայի և համացանցի զարգացման այս դարաշրջանում աճել է անգլերենով հաղորդակցվելու անհրաժեշտությունն ու նշանակությունը։ Մյուս կողմից, լեզվական գրագիտության՝ 21-րդ դարում շարունակ աճող աննախադեպ պահանջարկի պայմաններում առավել քան կարևոր է գրագետ և ճիշտ հաղորդակցվելու ունակությունը, հետևաբար՝ անգլերենի քերականության և ոճական հարցերի վերաբերյալ հիմնական գիտելիքների ու հմտությունների տիրապետումը։

Քուինսլենդի համալսարանը (Ավստրալիա), որն անգլերենի ուսուցման լավագույն կենտրոններից մեկն է աշխարհում, edX հարթակում առաջարկում է անգլերենի քերականության և ոճաբանության (English Grammar and Style) զանգվածային բաց առցանց դասընթաց (MOOC)։ Դասընթացավարները՝ Քուինսլենդի համալսարանի դասախոսներ, մասնակիցներին հնարավորություն կտան յուրացնելու անգլերենի քերականության հիմնական սկզբունքների, բառօգտագործման, շարահյուսության, կետադրության և գրավոր ոճերի վերաբերյալ առանցքային գիտելիքներ, ինչպես նաև՝ այդ ամենը ճիշտ կիրառելու, սեփական և այլոց գրավոր խոսքը գնահատելու և շտկելու (խմբագրելու) հմտություններ։ Դասընթացը փոխներգործուն է՝ բաղկացած տեսանյութ-դասախոսություններից, լեզվաբան մասնագետների հետ հարցազրույց-տեսանյութերից և տարբեր գործնական վարժություններից։

Մեկնարկը․  դասընթացն սկսվելու է հուլիսի 25-ին
Տևողությունը․  8 շաբաթ
Մասնակցի ներգրավվածությունը․ շաբաթական 4 ժամ
Արժեքը․ անվճար է 
Հավաստագրի առկայություն․ տրվում է, արժեքը՝ $99 

Ինչպես մասնակցել դասընթացին

Անհրաժեշտ է գրանցվել  հարթակում  (ստեղծել անհատական հաշիվ), ապա մուտք գործել հարթակ և բացել ընտրված դասընթաց(ներ)ը («view course» ընտրանքը հասանելի է միայն դասընթացի մեկնարկից հետո)։ 

Աղբյուրը՝ armscoop.com

2016թ. հունիսի 4-ին ԵՊՀ ԻՄ-ի մի խումբ ուսանողներ, որոնք ՀԵՀ Տավուշի մարզային կենտրոնի կամավորներ են, կազմակերպեցին հանրային ընթերցանություն:

Ուսանողները երիտասարդական կենտրոնից իրենց սիրելի գրքերով շարժվեցին դեպի Իջևանի բուսաբանական այգի:

 Ընթերցանության մասնակիցներից յուրաքանչյուրը ներկայացրեց իր նախասիրած գիրքը, հեղինակին և ստեղծագործությունը, այնուհետև հատվածներ կամ աֆորիզմներ ընթերցեց, և միասին քննարկեցին դրանք:

Երիտասարդները մի քանի ժամ կտրվեցին վիրտուալ կյանքից, իրենց սիրելի ստեղծագործություններով կիսվեցին միմյանց հետ: Սա խթան էր, որ նրանք ավելի ավելի շատ զբաղվեն ընթերցանությամբ և ուրիշներին էլ ներգրավեն դրա մեջ:

Այնուհետև խմբով շրջեցին բուսաբանական այգով, որտեղ կան 650-ից ավելի թփեր և ծառատեսակներ բոլոր մայրցամաքներից, բացառությամբ` Ավստրալիայի, ծանոթացան այնտեղի բուսականությանը, դենդրոպարկի ստեղծման պատմությանը: 

Աղբյուրը՝ http://heh.am

Համաշխարհային կրթական և գիտական դաշտում առկա են հազարավոր միջազգային կրթաթոշակային ծրագրեր, որոնք առաջարկվում են ինչպես կրթական հաստատությունների, մասնավոր կազմակերպությունների և հիմնադրամների, այնպես էլ տարբեր երկրների կառավարությունների կողմից։ ArmScoop-ն առանձնացրել և ըստ երկրների ներկայացնում է օտարերկրյա կառավարությունների կողմից ղեկավարվող կամ ֆինանսավորվող մի շարք կրթաթոշակային ծրագրեր, որոնք բոլորը հասանելի են Հայաստանում բնակվող ուսանողների և գիտնականների համար։

Անհրաժեշտ է նկատի ունենալ, որ 2016-17 ուս․ տարվա համար ծրագրերի մի մասին դիմելու գործընթացն ավարտվել է․ այդ դեպքում նշված են 2017-2018 ուս․ տարվա համար դիմելու գործընթացի ժամկետները։

Ծանոթացեք նաև․ Կրթաթոշակային ծրագրեր հայերի համար | ամբողջական ցանկ

∗∗∗

Ամերիկայի Միացյալ Նահանգներ

Ֆուլբրայթի անվան ծրագիր 

«Ֆուլբրայթ»-ը ԱՄՆ կառավարության կողմից ֆինանսավորվող՝ միջազգային կրթական փոխանակման առաջատար ծրագիր է։ Այն բաղկացած է տարբեր բաղադրիչներից և հիմնականում նախատեսված է ամերիկյան համալսարաններում և այլ ակադեմիական հաստատություններում օտարերկրյա ուսանողների (մագիստրանտներ, դոկտորանտներ (PhD student)), ինչպես նաև երիտասարդ մասնագետների ու գիտաշխատողների ուսումնառության և հետազոտական աշխատանքների համար։ Ֆուլբրայթի ծրագիրը մեկնարկել է 1946 թ. ամերիկյան սենատոր Ջ. Ուիլյամ Ֆուլբրայթի նախաձեռնությամբ և նպատակ ունի մեծացնել փոխըմբռնումը Միացյալ Նահանգների և այլ երկրների ժողովուրդների միջև:

• Ֆուլբրայթի օտարերկրյա ուսանողական ծրագիրը (Fulbright Foreign Student Program in USA) հնարավորություն է տալիս շուրջ 155 երկրների ուսանողների և երիտասարդ հետազոտողների մագիստրոսական (Master’s degree) և (PhD study) ծրագրերով ուսանել Ամերիկայի Միացյալ Նահանգներում։  Կրթաթոշակներ կարող են շնորհվել նաև ակադեմիական աստիճան չհետապնդող ուսումնառության համար։ 
• Ֆուլբրայթի գիտական ծրագրով (Fulbright Scholar Program) դրամաշնորհներ են տրամադրվում գիտաշխատողների ու մասնագետներին` հյուրընկալող հաստատություններում դասախոսելու ու հետազոտական աշխատանքներ իրականացնելու համար:

Դրամաշնորհը․ Ֆուլբրայթի օտարերկրյա ուսանողական ծրագրի դրամաշնորհը սովորաբար ներառում է ուսման վարձավճարը, թռիչքի արժեքը, կեցության թոշակը, բժշկական ապահովագրությունը և ուսումնական գրքերի ծախսը։ Դրամաշնորհը տրվում է ուսումնառության ողջ ընթացքի համար։

Ովքե՞ր կարող են դիմել. Ֆուլբրայթի ծրագրի առանձին բաղադրիչների հասանելիությունը, ինչպես նաև ծրագրին դիմելու չափանիշներն ու պայմանները զգալիորեն տարբերվում են յուրաքանչյուր երկրի դեպքում և յուրաքանչյուր տարի կարող են փոփոխվել։ Հայաստանում հիմնականում հասանելի է Ֆուլբրայթի գիտական ծրագիրը (սկսած 1992 թ.),  որն իրականացվում է ՀՀ-ում ԱՄՆ դեսպանության կողմից: 

Ինչպե՞ս դիմել. ՀՀ-ում ԱՄՆ դեսպանության Հասարակայնության հետ կապերի գրասենյակի կողմից անցկացվող ընդունելության մրցույթին մասնակցելով։ Ֆուլբրայթի գիտական ծրագրին դիմելու համար պետք է լրացնել առցանց դիմումը։ Ֆուլբրայթի օտարերկրյա ուսանողական ծրագրին դիմելու համար պետք է լրացնել հետևյալ առցանց դիմումը։

Ե՞րբ դիմել. Դիմելու ժամկետները տարբեր են՝ յուրաքանչյուր տարի փետրվարից հոկտեմբեր ամիսների միջակայքում։ 

Համֆրիի անվան կրթաթոշակ

Հուբերտ Հ. Համֆրիի անվան կրթաթոշակային ծրագիրը (Hubert H. Humphrey Fellowship Program) նախատեսված է օտարերկրյա գիտաշխատողների համար՝ ԱՄՆ առաջնակարգ բուհերից մեկում (տես ծրագրին մասնակից բուհերի ցանկը) մեկ տարի ժամկետով ինքնուրույն մշակված հետազոտական աշխատանքներ իրականացնելու նպատակով։ Մասնակիցներըմասնագիտական զարգացման տարատեսակ հնարավորություններ ունեն՝ ընտրված համալսարանական դասընթացների, գիտաժողովների մասնակցության, մասնագիտական կապերի հաստատման և գործնական աշխատանքների միջոցով։ Մասնագիտական գործունեության ոլորտները բազմազան են՝ իրավունք, հանրային քաղաքականություն, լրագրություն, ֆինանսներ և բանկային գործ, կրթության կառավարում, հանրային առողջապահություն և այլն (ամբողջական ցանկը)։ Յուրաքանչյուր տարի շնորհվում է մոտ 200 կրթաթոշակ։ Ծրագրի ավարտին մասնակիցներին ԱՄՆ կառավարության կողմից տրվում է վկայական, սակայն գիտական կոչում չի շնորհվում: Համֆրիի ծրագիրը մեկնարկել է ԱՄՆ Կոնգրեսի ֆինանսավորմամբ 1978 թ․ Ֆուլբրայթի փոխանակման ծրագրի շրջանակներում՝ ի նշանավորումն ԱՄՆ 38-րդ փոխնախագահ Հուբերտ Հ․ Համֆրիի (1911-1978) գործունեության։

Դրամաշնորհը ներառում է հյուրընկալող համալսարանում դասավանդման վճարը, կեցության թոշակը, բժշկական ապահովագրությունը, մասնագիտական գործունեության (գիտաժողովներ, հետազոտական այցեր), ուսումնական գրքերի ծախսը, անհրաժեշտության դեպքում նաև՝ անգլերենի կատարելագործման դասընթացների ծախսը․ մանրամասները՝ այստեղ։
Ովքե՞ր կարող են դիմել. կրթաթոշակը շնորհվում է մասնագիտական գործունեության որոշակի փորձ (առնվազն 5 տարի) ունեցող մասնագետներին, որոնք ունեն անգլերենի պահանջվող ունակություններ և նախկինում չեն օգտվել ԱՄՆ-ում նման հնարավորությունից։ Կարևոր նախապայմաններ են նաև առաջնորդական հմտությունների առկայությունը և հանրային ու հասարակական ակտիվությունը։
Ինչպե՞ս դիմել. Հայաստանում Համֆրիի ծրագիրն իրականացվում է ուղղակիորեն ՀՀ-ում ԱՄՆ դեսպանության հասարակայնության հետ կապերի գրասենյակի կողմից: Ծրագրի շրջանակներում ըստ գիտական ոլորտների հասանելիության և համապատասխանության չափանիշների վերաբերյալ մանրամասն կարող եք ծանոթանալ այստեղ։
Ե՞րբ դիմել. Հայաստանում Հեմֆրիի ծրագրի 2017 թ․ մրցույթին մասնակցելուվերջնաժամկետն է 2016 թ․ հունիսի 10-ը։

«Ֆուլբրայթ» և «Համֆրի» ծրագրերի վերաբերյալ մանրամասն տեղեկությունների համար կարող եք դիմել ՀՀ-ում ԱՄՆ դեսպանության Հասարակայնության հետ կապերի գրասենյակ։
Երևան 0082, Ամերիկյան փողոց 1
հեռախոս` (+37410) 46 47 00
ֆաքս`:(+37410) 46 47 35

Կանադա

Կանադայի Վանյեի անվան դոկտորական կրթաթոշակ

Կանադայի Վանյեի անվան դոկտորական կրթաթոշակը (Vanier Canada Graduate Scholarships) նախատեսված է կանադացի և Կանադայում կրթությունը շարունակող օտարերկրյա լավագույն դոկտորական ուսանողների (PhD student • ասպիրանտի համարժեքը) աջակցության համար։Շնորհվում է միայն ծրագրին մասնակից համալսարանների և այլ ակադեմիական հաստատությունների կողմից սեփական թեկնածուների առաջադրման սկզբունքով՝ հաշվի առնելով ընդհանրական երեք չափանիշներ՝ ակադեմիական գերազանցություն, հետազոտական կարողություններ և առաջնորդություն։ Հասանելի է բնական գիտությունների, ճարտարագիտության, բժշկական գիտությունների և սոցիալական ու հումանիտար գիտությունների մասնագետների համար։ Մեկնարկել է 2008 թ․ և կոչվում է ի պատիվ Կանադայի նախկին Գեներալ-նահանգապետ (1959-1967) Ժորժ Վանյեի:

Դրամաշնորհի արժեքը՝ տարեկան 50 հազար դոլար․ տևողությունը՝ 3 տարի։ 
Ովքե՞ր կարող են դիմել. կրթաթոշակի հայցորդները պետք է առաջադրվեն այն հաստատությունների կողմից (տեղերի համապատասխան քանակով), որտեղ ցանկանում են սովորել։ Թեկնածուներն ուղղակիորեն չեն կարող դիմել ծրագրին։ Համապատասխանության չափանիշները՝ այստեղ։
Ինչպե՞ս դիմել. առաջադրումը կարող է կատարվել ինչպես ուսանողի նախաձեռնությամբ, այնպես էլ հաստատության կողմից։ Ընտրությունը կատարվում է ներքին մրցակցային հիմունքներով։
Ե՞րբ դիմել. հայտերի ընդունման գործընթացը բաղկացած է յուրաքանչյուր հաստատության ներքին վերժնաժամկետից և ծրագրի ընդհանուր վերջնաժամկետից՝ յուր․ տարի նախքան նոյեմբեր ամիսը։

Բենթինգի անվան հետդոկտորական կրթաթոշակ

Կանադական Բենթինգի անվան հետդոկտորական կրթաթոշակային ծրագիրը (Banting Postdoctoral Fellowships) նախատեսված է կանադացի և Կանադայում հետդոկտորական հետազոտություն իրականացնող օտարերկրյա առաջատար դիմորդների աջակցության համար և միտված է Կանադայի գիտահետազոտական կարողությունների զարգացման մեջ լավագույն մասնագետների ներգրավմանը։ Հասանելի է բնական գիտությունների, ճարտարագիտության, բժշկական գիտությունների և սոցիալական ու հումանիտար գիտությունների մասնագետների համար։ Ծրագիրը կոչվում է ի պատիվ ինսուլինի հայտնաբերման համար Նոբելյան մրցանակակիր կանադացի Ֆրեդերիկ Բենթինգի։

Դրամաշնորհի արժեքը՝ տարեկան 70 հազար դոլար ․ տևողությունը՝ 2 տարի։ 
Ովքե՞ր կարող են դիմել. կրթաթոշակի հայցորդները պետք է հետդոկտորական հետազոտություն իրականացնեն ծրագրի մասնակից ակադեմիական հաստատություններից որևէ մեկում։ Համապատասխանության չափանիշները՝այստեղ։
Ինչպե՞ս դիմել. ծրագրին դիմելու գործընթացը կատարվում է ընդունող հաստատության միջոցով։
Ե՞րբ դիմել. հայտերի ընդունման գործընթացը տևում է յուր․ տարի ապրիլ-սեպտեմբեր ամիսներին։ 2016 թ․ վերջնաժամկետ՝ սեպտեմբերի 21:

Մեծ Բրիտանիա

Չիվնինգի կրթաթոշակ

Բրիտանական «Չիվնինգ» կրթաթոշակային ծրագիրը (British Chevening Scholarships) հիմնվել է ՄԹ Արտաքին գործերի և Համագործակցության երկրների նախարարության կողմից և նախատեսված է Մեծ Բրիտանիայի բուհերում մագիստրոսական ծրագրով (սովորաբարմեկամյա) կրթություն ստացող օտարերկրացիների համար։ Կրթաթոշակները հատկացվում են մասնագիտությունների լայն ընտրանու համար, որը կարող է տարբեր լինել ծրագրին հասանելիություն ունեցող յուրաքանչյուր երկրի համար։ Հայաստանցի դիմորդների համարնախընտրելի մասնագիտությունների ցանկը՝ այստեղ։ Տարեկան տրամադրվում է շուրջ 1500 կրթաթոշակ։ Պարտադիր պայման է ծրագրով ուսումնառությունից հետո առնվազն 2 տարով մասնակցի վերադարձը հայրենիք (քաղաքացիության երկիր)։

Դրամաշնորհը սովորաբար ներառում է ուսման վարձը, կեցության ամենամսյա ծախսերը, նպաստային փաթեթը, դեպի ՄԹ և հակառակը թռիչքի արժեքը։
Ովքե՞ր կարող են դիմել. կրթաթոշակի հայցորդները պետք է՝ ա) ունենան բակալավրի կրթական աստիճան, բ) ունենան առնվազն 2 տարվա աշխատանքային փորձ, գ) դիմեն ՄԹ բուհերում առաջիկա ուստարվա համար նախատեսված 3 տարբերդասընթացների և մինչև 2016 թ․ հուլիսի 14-ը ընտրված դասընթացներից որևէ մեկի համար ստացած լինեն բուհի վերջնական հրավերը (unconditional offer), դ) մինչև 2016 թ․ հուլիսի 14-ը ներկայացնեն ծրագրով պահանջվող՝ անգլերենի իմացության աստիճանը հավաստող փաստաթղթերը։ Համապատասխանության չափանիշներիմանրամասները՝ այստեղ։
Ինչպե՞ս դիմել. ծրագրին դիմելու գործընթացը կատարվում է առցանց եղանակով։
Ե՞րբ դիմել. կրթաթոշակների (Chevening Scholarships) համար հայտերի ընդունմանգործընթացը, սկսած վերջնաժամկետից հետո դիմորդների պայմանական ընտրությունից, տևում է առնվազն 8 ամիս։ 2016-17 ուս․ տարվա ընդունելության գործընթացն ավարտված է։ 2017-18  ուս․ տարվա ընդունելության գործընթացը կսկսվի 2016 թ․ օգոստոսին, դիմելու վերջնաժամկետը՝ 2016 թ․ նոյեմբեր։

Ֆրանսիա

Էյֆելի անվան «գերազանցության կրթաթոշակ»

Էյֆելի անվան «գերազանցության» կրթաթոշակային ծրագիրը (Bourse d’excellence Eiffel) հիմնադրվել է Ֆրանսիայի Արտաքին գործերի նախարարության կողմից և նախատեսված է ֆրանսիական բուհերում մագիստրոսական (niveau master/Master’s) և դոկտորական (doctorat/ PhD) ծրագրերով սովորող օտարերկրյա լավագույն ուսանողների համար։ Ոչ ֆրանսալեզու ուսանողները կարող են դիմել ծրագրին՝ իրենց ընտրած բուհի (դասընթացի) լեզվի իմացության պահանջներին համապատասխանելու դեպքում։ Առանձին դեպքերում ծրագրի ընդհանուր տևողության շրջանակներում կարող են ներառվել ֆրանսերենի ինտենսիվ դասընթացներ, որոնց արժեքը ծրագրի կողմից չի փոխհատուցվում։ Կրթաթոշակները շնորհվում են 3 բնագավառներում.

• Մագիստրատուրայում՝ ինժեներական գիտությունների, ևդոկտորանտուրայում՝ լայն իմաստով գիտությունների բնագավառում (ինժեներական գիտություններ, ճշգրիտ գիտություններ` մաթեմատիկա, ֆիզիկա, քիմիա և բնագիտություն, նանո- և բիոտեխնոլոգիաներ, տիեզերագիտություն, Երկրի մասին գիտություններ, շրջակա միջավայրի մասին գիտություններ, տեղեկատվության և հաղորդակցության տեխնոլոգիաներ և գիտություններ),
• տնտեսագիտություն և կառավարում,
• իրավագիտություն և միջազգային հարաբերություններ։

Դրամաշնորհները հատկացվում են 12-36 ամիս տևողությամբ մագիստրոսական ծրագրով ուսանողներին և այն դոկտորանտներին, որոնք մասնակցում են 10 ամիս տևողությամբ որևէ ծրագրի՝ համաղեկավարությամբ (joint supervision/cotutelle) կամկրկնակի ուս․ ծրագրով (dual enrolment)։ Մագիստրանտների համար դրամաշնորհը կազմում է ամսական €1,181 (որից €1,031՝ կեցության նպաստ, և €150՝ ամսական կրթաթոշակ), դոկտորանտների համար՝ 1,400 եվրո։
Ովքե՞ր կարող են դիմել. կրթաթոշակի հայցորդները պետք է լինեն մինչև 30 տ․՝ մագիստրատուրայի դեպքում, մինչև 35 տ․՝ դոկտորանտուրայի դեպքում։ Համապատասխանության մնացյալ չափանիշների մանրամասները՝ այստեղ։
Ինչպե՞ս դիմել. դիմորդներն ուղղակիորեն չեն կարող մասնակցել ծրագրին։ Կրթաթոշակի համար դիմումներն առաջադրվում են Ֆրանսիայի այն բուհերի կողմից, որտեղ սովորում են ներգրավված ուսանողները։ Դիմող հաստատությունը կարող է համապատասխան երկրում գործող Ֆրանսիայի դեսպանատան միջոցով խորհրատվություն ստանալ այդ երկրի քաղաքացի դիմորդների վերաբերյալ։
Ե՞րբ դիմել. հայտերի առաջադրման գործընթացը բուհերի կողմից սկսվում է յուր․ տարի հոկտեմբերին, ընդհանուր ծրագրի վերջնաժամկետը հաջորդ տարվահունվարին է։ 

Գերմանիա

DAAD կրթաթոշակային ծրագիր

Գերմանիայի Ակադեմիական փոխանակման ծառայության (DAAD) կրթաթոշակային ծրագիրը նախատեսված է զարգացող երկրների ուսանողներին և հետազոտողներին գերմանական բուհերում ու ակադեմիական հաստատություններում աջակցելու համար։ Կրթաթոշակները տրամադրվում են մրցակցային հիմունքներով՝ հիմնականում լեզվի դասընթացների, մագիստրոսական ծրագրերի, հետազոտական այցելությունների և դոկտորական աշխատանքների համար: 2017-2018 ուս․ տարվա համար նախատեսված դասընթացների վերաբերյալ ամփոփ տեղեկատվությունը (հաստատությունը, տևողությունը, լեզուն, դիմելու վերջնաժամկետը) տես այստեղ, մանրամասն տեղեկատվությունը՝ այստեղ։

Դրամաշնորհները հատկացվում են 12-36 ամիս տևողությամբ (կախված ծրագրի բնությից)։ Դրամաշնորհի չափը. €750՝ մագիստրանտների համար, €1000՝ դոկտորանտների համար։ 
Ովքե՞ր կարող են դիմել. կրթաթոշակի հայցորդները պետք է բավարարեն ակադեմիական առաջադիմության և լեզվական իմացության անհրաժեշտ պայմաններին, ունենան առնվազն բակալավրի աստիճան, ինչպես նաև ունենան առմնազն 2 տարվա մասնագիտական աշխատանքային փորձառություն։ Ընտրության համար կարևոր չափանիշ է Գերմանիայում կրթությունը շարունակելու համար մասնագիտական և անձնական դրդապատճառների համոզիչ շարադրանքը։Համապատասխանության չափանիշների հավելյալ մանրամասները՝ այստեղ։
Ինչպե՞ս դիմել. կրթաթոշակի հավակնորդները պետք է ուղղակիորեն դիմեն համապատասխան դասընթացի համար։ Դիմումների գործընթացի և անհրաժեշտ փաստաթղթերի վերաբերյալ տես այստեղ։
Ե՞րբ դիմել. հայտերի ընդունման վերջնաժամկետը տարբեր է՝ կախված կոնկրետ դասընթացից, հիմնականում՝ օգոստոս-հոկտեմբեր ամիսներին։

Հավելյալ տեղեկությունների համար կարող եք դիմել DAAD երևանյանգրասենյակ (Հասցե՝
Երևան  0019, Սարմենի փողոց 82, hեռ.` (+37410) 58 25 15, էլ. փոստ` info@daad.am):

Նիդերլանդներ

Նիդերլանդների կրթաթոշակային ծրագիր 

Նիդերլանդների կրթաթոշակային ծրագիրը (Netherlands Fellowship Programme) նախատեսված է51 անդամ երկրների քաղաքացիների համար՝ Նիդերլանդների տարբեր կրթական հաստատություններում ուսումնառության համար։ NFP ծրագրով առանձին կրթաթոշակներ են շնորհվում 3 ենթածրագրերի համար՝ կարճատև դասընթացներ (տես այստեղ),մագիստրոսական (Master’s) և դոկտորական (PhD studies) ծրագրեր։ NFP ծրագրի նպատակը անդամ երկրների քաղաքացիների մասնագիտական կարողությունների զարգացումն է և ամբողջովին ֆինանսավորվում է Նիդերլանդների կառավարության (Արտաքին գործերի նախարարության) կողմից։ 

Ծրագրում ներառված է մասնագիտական ոլորտների լայն շրջանակ, առավել մեծ թվով կրթաթոշակներ շնորհվում են հումանիտար և սոցիալական գիտությունների, տնտեսագիտության, գյուղատնտեսական գիտությունների և մասնավոր ձեռնարկատիրության զարգացման բնագավառներում (հետաքրքրող դասընթացը կարող եք գտնել հետևյալ ցանկից)։ Առավելություն է տրվում կին թեկնածուներին։

Դրամաշնորհը․ NFP կրթաթոշակը ներառում է ուսման ընթացքում ծրագրի մասնակցի աշխատավարձի փոխհատուցումը, ուսման վարձավճարը, կեցության ծախսերը, վիզայի վճարը, ճանապարհածախսը, ապահովագրությունը։ Մանրամասները՝ այստեղ։
Ովքե՞ր կարող են դիմել. կրթաթոշակը շնորհվում է այն մասնագետներին, որոնք NFP ծրագրին մասնակից երկրների քաղաքացիներ են և բնակվում ու աշխատում են այդ երկրում։ Հավակնորդները պետք է առաջադրվեն իրենց գործատուների կողմից՝ ծրագրին համապատասխանության համար։
Ինչպե՞ս դիմել. Ծրագրի հավակնորդները համապատասխան դասընթացն ընտրելուց հետո պետք է ուղղակիորեն դիմեն տվյալ դասընթացը կազմակերպող կրթականհաստատությանը՝ ընդունելության գործընթացի մանրամասները ճշտելու համար։ Հայաստանի քաղաքացիները վիզայի վերաբերյալ հարցերի համար կարող են դիմել Հայաստանում Նիդերլանդների Թագավորության դեսպանություն (Թբիլիսի):
Ե՞րբ դիմել. վերջնաժամկետները տարբեր են՝ ըստ ծրագրի և բուհի։

Հոլանդական կրթաթոշակային ծրագիր

Հոլանդական կրթաթոշակային ծրագիրը (Holland Scholarship) նախատեսված է օտարերկրյա ուսանողների համար, որոնք ցանկանում են բակալավրական կամ մագիստրոսականկրթական ծրագրերով ուսանել Նիդերլանդներում։ Ծրագիրը ֆինանսավորվում է Նիդերլանդների Կրթության, մշակույթի և գիտության նախարարության կողմից։ Կրթաթոշակները հասանելի են միայն որոշակի թվով հետազոտական և կիրառական գիտությունների համալսարաններում սովորելու դեպքում։ 

Դրամաշնորհը ամբողջովին չի փոխհատուցում դիմորդների ուսմանվարձավճարները։ Դրամաշնորհի չափը €5000 է, որն ուսանողը կարող է ստանալ ուսման առաջին տարում։
Ովքե՞ր կարող են դիմել. կրթաթոշակի հավակնորդները պետք է համապատասխանեն ընտրած բուհի առանձնահատուկ պահանջներին, որոնց վերաբերյալ տեղեկատվությունը հասանելի է համապատասխան կայքում։
Ինչպե՞ս դիմել. Ծրագրի հավակնորդները համապատասխան դասընթացն ընտրելուց հետո պետք է ուղղակիորեն դիմեն տվյալ դասընթացը կազմակերպող կրթական հաստատությանը՝ ընդունելության գործընթացի մանրամասները ճշտելու համար։
Ե՞րբ դիմել. 2017-2018 ուս․ տարվա ընդունելության գործընթացի պայմանները հասանելի կլինեն 2016 թ․ նոյեմբերին։

Շվեյցարիա

Շվեյցարիայի կառավարության «Գերազանցության կրթաթոշակներ»

Շվեյցարիայի կառավարության «Գերազանցության կրթաթոշակներ» ծրագիրը հնարավորություն է տալիս ավելի քան 180 երկրի քաղաքացիներին սովորել կամ հետազոտություն իրականացնել շվեյցարական լավագույն բուհերում ու գիտական կենտրոններում։ Հայաստանի համար նախատեսված ենթածրագրերը և դրանց ուղեցույցները յուրաքանչյուր տարի հրապարակվում են առանձին էջում։ Հայաստանի քաղաքացիների համար հասանելի են միայն ասպիրանտական (դոկտորական • PhD), դոկտորական(հետդոկտորական • Postdoctoral) և հետազոտական կրթաթոշակներ՝ բոլոր ակադեմիական ոլորտներում։

Դրամաշնորհը․ կրթաթոշակները սովորաբար ներառում են ուսման վարձավճարից ազատումը, ճանապարհածախսի միանվագ գումարը, կեցության ծախսերը, ապահովագրական ծախսերը։ Մանրամասները՝ համապատասխան ուղեցույցում։ 
Ովքե՞ր կարող են դիմել. կրթաթոշակը շնորհվում է յուրաքանչյուր ենթածրագրի առանձին պահանջներին և ընտրության չափանիշներին համապատասխանող՝ Հայաստանում բնակվող քաղաքացիներին։ Դոկտորական (ասպիրանտական) և հետազոտական կրթաթոշակների հավակնորդների տարիքը չպետք է գերազանցի 35-ը։
Ինչպե՞ս դիմել. ծրագիրը  Հայաստանում ղեկավարվում է «Լույս» հիմնադրամի հետ համագործակցությամբ։ Դիմումի փաթեթը ստանալու համար անհրաժեշտ է գրել swiss.scholarship@luys.am հասցեին` կից ներկայացնելով «Լույս»-ի կայքում յուր․ տարի հրապարակվող՝ ընդհանուր տեղեկությունների ձևը (լրացված):
Ե՞րբ դիմել. 2017-2018 ուս․ տարվա համար դիմումների ընդունման գործընթացը կսկսվի2016 թ․ սեպտեմբերի 1-ին։

Շվեդիա

Շվեդական ինստիտուտի կրթաթոշակային ծրագիր

Շվեդական ինստիտուտի կրթաթոշակները (The Swedish Institute Study Scholarships – SISS) տրամադրվում են իրավասու երկրների (ներառյալ՝ Հայաստանի Հանրապետությունը) ուսանողներին Շվեդիայի բուհերում մագիստրոսական ծրագրովուսումնառության համար: Տարեկան տրամադրվում է շուրջ 300 կրթաթոշակ։

Ծրագրի նպատակներից է՝ օգնելու կրթաթոշակ ստացողներին ակտիվ դերակատարում ունենալ իրենց հասարակությունների դրական զարգացման մեջ: Լավագույն թեկնածուները մասնագիտական հրաշալի գիտելիքներով օժտված հավակնոտ երիտասարդներն են, որոնք կդրսևորեն ղեկավարման  փորձ և հստակ պատկերացումներ կունենան, թե ինչպես Շվեդիայում ստացած կրթությունը օգտակար կլինի իրենց երկրին։ Առավելություններ կտրվեն կայուն զարգացման, ժողովրդավարության, գենդերային անհավասարության, մարդու իրավունքների կամ աղքատության կրճատման թեմաներն ուսումնասիրող ծրագրերի հայտերին (առավել մանրամասն՝ տես այստեղ):

Դրամաշնորհը․ կրթաթոշակը ներառում է ուսման վարձի (անմիջապես վճարվում է շվեդական տվյալ համալսարան) և կեցության ծախսերի, ապահովագրության համար անհրաժեշտ գումարը։ Հետևյալ իրավասու երկրների դիմորդ թեկնածուները կստանան ճանապարհածախսի միանվագ գումար՝ 15000 շվեդական կրոնի չափով։
Ովքե՞ր կարող են դիմել. թեկնածուները պետք է ունենան առնվազն երկու տարվա աշխատանքային փորձ։ Դիմորդները պետք է դրսևորեն բացառիկ ակադեմիական գիտելիքներ և առաջնորդական աշխատանքի հմտությունններ, ղեկավարման փորձ։ Բացի այդ ամենից, դիմորդները պետք է առավել ուշադրություն դարձնեն այն հարցերի շուրջ աշխատանքին, որոնք նպաստում են արդար և կայուն զարգացմանը իրենց երկրում։
Ինչպե՞ս դիմել. դիմելու ընթացակարգի, այդ թվում՝ ուղեցույցների, ժամկետների, փաստաթղթերի ձևանմուշների, ընտրության կարգի վերաբերյալ մանրամասներին կարող եք ծանոթանալ այստեղ:
Ե՞րբ դիմել. 2017-2018 ուս․ տարվա համար դիմումների ընդունման գործընթացը կսկսվի2016 թ․ վերջին։

Իտալիա

Իտալիայի կառավարության կրթաթոշակային ծրագիր

Իտալիայի կառավարության կրթաթոշակային ծրագիրը հնարավորություն է տալիս համապատասխան իրավասու երկրների քաղաքացիներին իտալական բուհերում և այլ ակադեմիական հաստատություններում կրթություն ստանալ բակալավրի,մագիստրոսական, դոկտորական ծրագրերով, ինչպես նաև կատարել մասնագիտական հետազոտություններ։ Կրթաթոշակները շնորհվում են միայն Իտալիայի կրթության և հետազոտությունների պետական համակարգի մաս կազմող բուհերում ուսանելու դեպքում։ Ծրագի շրջանակներում հասանելի մասնագիտական ոլորտները տրամադրվում են հյուրընկալող համալսարնների կողմից։ 

Դրամաշնորհները սովորաբար ներառում են ուսման վարձից ազատումը (մասնակցի փոխարեն վճարում է ծրագիրը), սակայն որոշ բուհերի դեպքում դա կարող է չգործել։ Ճանապարհածախսի փոխհատուցում չի տրվում։ 
Ովքե՞ր կարող են դիմել. թեկնածուները պետք է համապատասխանեն ընտրված բուհի կողմից պահանջվող ակադեմիական չափանիշներին, տիրապետեն իտալերենին(բացառությամբ այն դեպքերի, երբ կրթական ծրագիրն ամբողջովին անգլերեն է)։ Դիմորդների տարիքը չպետք է գերազանցի 35-ը։
Ինչպե՞ս դիմել. ծրագրին դիմելուց առաջ թեկնածուները պետք է ուղղակիորեն կապվեն նախընտրած հաստատությունների հետ, այնուհետև պայմանները ճշտելուց հետո լրացնեն համապատասխան առցանց դիմում-հայտը։ Դիմելու ընթացակարգի և ընտրության կարգի վերաբերյալ մանրամասների համար անհրաժեշտ է դիմել Հայաստանում Իտալիայիդեսպանություն։
Ե՞րբ դիմել. 2017-2018 ուս․ տարվա համար դիմումների ընդունման վերջնաժամկետը՝ 2017 թ․ ապրիլ։

Աղբյուրը՝ http://armscoop.com

2015-16 ուստարվա 2-րդ կիսամյակում ԵՊՀ Իջևանի մասնաճյուղում «Էկոլոգիա և բնապահպանության հիմունքներ» դասընթացը «Պատմություն», «Հոգեբանություն» ու «Ինֆորմատիկա և կիրառական մաթեմատիկա» մասնագիտությունների առաջին կուրսերում կազմակերպվել է առցանց:

Դասընթացը վարել է Ընդհանուր մաթեմատիկայի և բնագիտության ամբիոնի ասիստենտ, կ.գ.թ. Սոնա Խաչատրյանը:

Առցանց դասերն իրականացվել են  հաջորդաբար` ըստ դասընթացի ժամանակացույցի:

«Էկոլոգիա և բնապահպանության հիմունքներ» դասընթացը բաղկացած էր առանձին դասերից, որոնք իրենց հերթին կազմված էին համառոտ նկարագրից, ուսուցանող նյութից և վարժություններից:

Ուսուցանվող նյութն ուներ ձայնային աջակցություն, պարունակում էր պատկերներ, անիմացիոն նյութեր, հղումներ էլեկտրոնային ռեսուրսներին:

Դասի նյութն ուսումնասիրելուց հետո ուսանողները պատասխանել են նյութին կից բերված հարցերին՝ հնարավորություն ունենալով նաև տեսնել ճիշտ պատասխանը և դրա բացատրությունը:

Ամսական ոչ պակաս, քան մեկ անգամ դասախոսը կազմակերպել է լսարանային հանդիպումներ ուսանողների հետ, որոնց ընթացքում պատասխանել  ընթացիկ հարցերին, լուծել կազմակերպչական խնդիրներ:

Ուսանողները հնարավորություն են ունեցել նաև դասախոսին դիմելու տեքստային հաղորդակցությունների միջոցով:

Դասընթացն ամփոփվել է առցանց թեստավորման եղանակով կազմակերպված ստուգարքով:

Թեստային հարցերն ընտրվել են մշտապես նորացվող հարցերի բազայից, որում մասնավորապես ընդգրկվել են դասերի ընթացքում իրականացված  վարժությունները:

2016թ. մայիսի 14-29-ը ԵՊՀ Իջևանի մասնաճյուղում տեղի ունեցավ 2015-2016 ուստարվա առկա ուսուցման ամփոփիչ ատեստավորումը` ինը մասնագիտությունների ամփոփիչ ատեստավորման քննություններն ու ավարտական աշխատանքների պաշտպանությունը:

Ամփոփիիչ ատեստավորման քննությունները կայացան սահմանված կարգով, թե՛ ամփոփիչ ատեստավորման հանձնաժողովները և թե՛ ուսանողները քննություններին ու ավարտական աշխատանքների պաշտպանություններին մասնակցեցին ամենայն պատասխանատվությամբ ու լրջությամբ:

2016թ. մայիսի 14-ին տեղի ունեցավ «Պատմություն» մասնագիտության ամփոփիչ քննությունը:

Հանձնաժողովը գլխավորում էր ՀՀ ԳԱԱ պատմության ինստիտուտի ավագ մասնագետ, պատմ. գիտ. դոկտոր, պրոֆեսոր Կլիմենտ Ամասիայի Հարությունյանը:

Մասնակցում էր 23 ուսանող, որոնցից «գերազանց» ստացավ 7-ը, «լավ»` 6-ը, «բավարար»` 10-ը:

Մայիսի 15-ին տեղի ունեցավ «Պատմություն» մասնագիտության ավարտական աշխատանքների պաշտպանությունը:

9 ուսանող ստացավ «գերազանց», 9-ը` «լավ», 5-ը` «բավարար»:

«Պատմություն» մասնագիտության ամփոփիչ ատեստավորման հանձնաժողովը բարձր գնահատեց իրենց մասնագիտության շրջանակներում ինքնուրույն դատողություններ անելու, ազատ հաղորդակցվելու շրջանավարտների կարողությունները, լավ գնահատեց մասնագիտական գիտելիքների իմացության և կիրառման կարողությունների, ինքնակրթության հմտությունների դրսևորման մակարդակը:

Շրջանավարտների ձեռք բերած ուսումնառության ընդհանրական արդյունքների հետագա բարելավման ուղղությամբ առաջարկվեց  ուսումնական ծրագրերը թարմացնել, մեծ ուշադրություն դարձնել ռազմական պատմության հիմնահարցերին, ավարտական աշխատանքների թեմաների ընտրության ուղղությամբ առաջարկվեց դարձյալ մեծ ուշադրություն դարձնել ռազմական պատմության թեմատիկային:

Մայիսի 20-ին տեղի ունեցավ «Մանկավարժություն և հոգեբանություն» մասնագիտության ամփոփիչ քննությունը:

Հանձնաժողովը գլխավորում էր Գյումրիի Մ.Նալբանդյանի անվան պետական մանկավարժական ինստիտուտի պրոռեկտոր, մանկ. գիտ. դոկտոր, պրոֆեսոր Սպարտակ Սերյոժայի Սողոյանը:

Մասնակցում էր 8 ուսանող, որոնցից «գերազանց» ստացավ 1-ը, «լավ»` 5-ը, «բավարար»` 2-ը:

Մայիսի 21-ին կայացավ «Մանկավարժություն և հոգեբանություն» մասնագիտության ավարտական աշխատանքների պաշտպանությունը:

2 ուսանող ստացավ «գերազանց», 6-ը` «լավ»:

«Մանկավարժություն և հոգեբանություն» մասնագիտության ամփոփիչ ատեստավորման հանձնաժողովը լավ գնահատեց մասնագիտական գիտելիքների իմացության, իրենց մասնագիտության շրջանակներում ինքնուրույն դատողություններ անելու, հաղորդակցվելու շրջանավարտների կարողությունները, բավարար գնահատեց ձեռք բերած գիտելիքների և պատկերացումների կիրառման կարողությունների, ինքնակրթության հմտությունների դրսևորման մակարդակը:

Շրջանավարտների ձեռք բերած ուսումնառության ընդհանրական արդյունքների հետագա բարելավման ուղղությամբ առաջարկվեց լուրջ ուշադրություն դարձնել հոգեկանի ֆիզիոլոգիական հիմքերի ուսումնասիրմանը, ավարտական աշխատանքների թեմաների ընտրության ուղղությամբ առաջարկվեց ընտրել գլխավորապես տարածաշրջանային հիմնախնդիրների բացահայտմանը և լուծմանը վերաբերող թեմաներ:

Մայիսի 20-ին տեղի ունեցավ «Կիրառական մաթեմատիկա և ֆիզիկա» մասնագիտության ամփոփիչ քննությունը:

Հանձնաժողովը գլխավորում էր ՀՀ ԿԳՆ Գիտության պետական կոմիտեի աշխատակազմի ղեկավար, ֆիզմաթ. գիտ. դոկտոր, պրոֆեսոր Լևոն Գրիշի Մարդոյանը:

Մասնակցում էր 13 ուսանող, որոնցից «գերազանց» ստացավ 3-ը, «լավ»` 7-ը, «բավարար»` 3-ը:

Մայիսի 21-ին կայացավ  «Կիրառական մաթեմատիկա և ֆիզիկա» մասնագիտության ավարտական աշխատանքների պաշտպանությունը:

6 ուսանող ստացավ «գերազանց», 4-ը` «լավ», 3-ը` «բավարար»:

«Կիրառական մաթեմատիկա և ֆիզիկա» մասնագիտության ամփոփիչ ատեստավորման հանձնաժողովը լավ գնահատեց  մասնագիտական գիտելիքների իմացության և կիրառման կարողությունները, իրենց մասնագիտության շրջանակներում ինքնուրույն դատողություններ անելու, հաղորդակցվելու շրջանավարտների կարողությունների, ինքնակրթության հմտությունների դրսևորման մակարդակը:

Ավարտական աշխատանքների թեմաների վերաբերյալ նշվեց, որ դրանք արդիական էին և կիրառական:

Մայիսի 21-ին տեղի ունեցավ «Հայոց լեզու և գրականություն» մասնագիտության ամփոփիչ քննությունը:

Հանձնաժողովը գլխավորում է ՀՀ պետական կառավարման ակադեմիայի դոցենտ, բան. գիտ. թեկնածու Լավրենտի Աշոտի Միրզոյանը:

Մասնակցում էր 25 ուսանող, որոնցից «գերազանց» ստացավ 7-ը, «լավ»` 16-ը, «բավարար»` 2-ը:

Մայիսի 22-ին կայացավ «Հայոց լեզու և գրականություն» մասնագիտության ավարտական աշխատանքների պաշտպանությունը:

6 ուսանող ստացավ «գերազանց», 18-ը` «լավ», 1-ը` «բավարար»:

«Հայոց լեզու և գրականություն» մասնագիտության ամփոփիչ ատեստավորման հանձնաժողովը լավ գնահատեց  մասնագիտական գիտելիքների իմացության և կիրառման կարողությունները, իրենց մասնագիտության շրջանակներում ինքնուրույն դատողություններ անելու, հաղորդակցվելու շրջանավարտների կարողությունների մակարդակը, բավարար համարեց ինքնակրթության հմտությունների դրսևորման մակարդակը:

Ավարտական աշխատանքների վերաբերյալ հանձնաժողովի կարծիքը բարձր էր հատկապես որակավորմանը թեմայի համապատասխանության ու մասնագիտական գրականությունից օգտվելու և համադրելու կարողությունների տեսանկյուններից: 

Մայիսի 23-ին տեղի ունեցավ «Կիրառական արվեստ» մասնագիտության ամփոփիչ քննությունը:

Հանձնաժողովը գլխավորում է ՀՀ նկարիչների միության նախագահի տեղակալ-քարտուղար, պրոֆեսոր Խաչատուր Սուրենի Ազիզյանը:

Մասնակցում էր 31 ուսանող, որոնցից «գերազանց» ստացավ 10-ը, «լավ»` 9-ը, «բավարար»` 12-ը:

Մայիսի 24-ին կայացավ «Կիրառական արվեստ» մասնագիտության ավարտական աշխատանքների պաշտպանությունը:

17 ուսանող ստացավ «գերազանց», 14-ը` «լավ»:

«Կիրառական արվեստ»  մասնագիտության ամփոփիչ ատեստավորման հանձնաժողովը բավարար համարեց մասնագիտական գիտելիքների իմացության և կիրառման կարողությունները, իրենց մասնագիտության շրջանակներում ինքնուրույն դատողություններ անելու, հաղորդակցվելու շրջանավարտների կարողությունների, ինքնակրթության հմտությունների դրսևորման մակարդակը:

Շրջանավարտների ձեռք բերած ուսումնառության ընդհանրական արդյունքների հետագա բարելավման ուղղությամբ առաջարկվեց առավել մեծ ուշադրություն դարձնել բնօրինակներին, ոչ միայն տեսականորեն իմանալ դրանց անվանումները, այլև մոտիկից տեսնել դրանք: Ավարտական աշխատանքների կապակցությամբ ընդգծվեց, որ նրանցում տրված է արդի ժամանակշրջանին հարիր կոմպոզիցիոն խնդիրների լուծում, առկա է թեմայի ճիշտ ընտրություն և իրականացում,  բարձր գնահատվեցին ավարտական աշխատանքներում յուրօրինակ նորարարական տարրերի օգտագործումը, դրանց ներկայացման մակարդակը և բանավոր խոսքը:

Մայիսի 23-ին տեղի ունեցավ «Ֆրանսերեն լեզու և գրականություն» մասնագիտության ամփոփիչ քննությունը:

Հանձնաժողովը գլխավորում է Երևանի Վ.Բրյուսովի անվան պետական լեզվահասարակագիտական համալսարանի ֆրանսերեն լեզվի ամբիոնի դոցենտ, բ.գ.թ. Մելանյա Սմբատի Ղազարյանը:

Մասնակցում էր 9 ուսանող, որոնցից «գերազանց» ստացավ 4-ը, «լավ»` 5-ը:

Մայիսի 25-ին կայացավ «Ֆրանսերեն լեզու և գրականություն» մասնագիտության ավարտական աշխատանքների պաշտպանությունը:

6 ուսանող ստացավ «գերազանց», 3-ը` «լավ»:

«Ֆրանսերեն լեզու և գրականություն» մասնագիտության ամփոփիչ ատեստավորման հանձնաժողովը բարձր գնահատեց  շրջանավարտների ազատ հաղորդակցվելու, ինքնակրթության հմտությունների դրսևորման մակարդակը, լավ գնահատեց իրենց մասնագիտության շրջանակներում ինքնուրույն դատողություններ անելու, մասնագիտական գիտելիքների իմացության և կիրառման կարողությունների մակարդակը:

Շրջանավարտների ձեռք բերած ուսումնառության ընդհանրական արդյունքների հետագա բարելավման ուղղությամբ առաջարկվեց  հարցաշարերում ընդգրկել ավելի կոնկրետ հարցեր: Ավարտական աշխատանքների իրականացման բարելավման ուղղությամբ առաջարկվեց, որ դրանք գրվեն ֆրանսերեն:

Մայիսի 27-ին տեղի ունեցավ «Անգլերեն լեզու և գրականություն» մասնագիտության ամփոփիչ քննությունը:

Հանձնաժողովը գլխավորում է Երևանի Վ.Բրյուսովի անվան պետական լեզվահասարակագիտական համալսարանի անգլերեն լեզվի բառագիտության և ոճաբանության ամբիոնի ասիստենտ, բ.գ.թ. Լիլիթ Ասատուրի Բադալյանը: 

Մասնակցում էր 24 ուսանող, որոնցից «գերազանց» ստացավ 10-ը, «լավ»` 9-ը, «բավարար»` 5-ը:

Մայիսի 28-ին կայացավ «Անգլերեն լեզու և գրականություն» մասնագիտության ավարտական աշխատանքների պաշտպանությունը:

14 ուսանող ստացավ «գերազանց», 9-ը` «լավ», 1-ը` «բավարար»:

«Անգլերեն լեզու և գրականություն» մասնագիտության ամփոփիչ ատեստավորման հանձնաժողովը բարձր գնահատեց մասնագիտական գիտելիքների իմացության և կիրառման կարողությունները, իրենց մասնագիտության շրջանակներում ինքնուրույն դատողություններ անելու, ազատ հաղորդակցվելու շրջանավարտների կարողությունների, ինքնակրթության հմտությունների դրսևորման մակարդակը:

Ավարտական աշխատանքների իրականացման հետագա բարելավման ուղղությամբ առաջարկվեց ավելի արդիական դարձնել աշխատանքների թեմաները՝ ուշադրություն դարձնելով նաև դրանց տրամաբանական կառուցվածքին և մյուս պահանջներին:

Մայիսի 27-ին տեղի ունեցավ «Սերվիս» մասնագիտության ամփոփիչ քննությունը:

Հանձնաժողովը գլխավորում է ՀՀ էկոնոմիկայի նախարարության զբոսաշրջության վարչության պետ Մեխակ Վեմիրի Ապրեսյանը:

Մասնակցում էր 18 ուսանող, որոնցից «գերազանց» ստացավ 11-ը, «լավ»` 4-ը, «բավարար»` 3-ը:

Մայիսի 28-ին կայացավ «Սերվիս» մասնագիտության ավարտական աշխատանքների պաշտպանությունը:

9 ուսանող ստացավ «գերազանց», 5-ը` «լավ», 4-ը` «բավարար»:

«Սերվիս» մասնագիտության ամփոփիչ ատեստավորման հանձնաժողովը բարձր գնահատեց  մասնագիտական գիտելիքների իմացության և կիրառման կարողությունները, լավ համարեց հաղորդակցման կարողությունների մակարդակը, բավարար՝ իրենց մասնագիտության շրջանականերում դատողություններ անելու կարողությունները:

Շրջանավարտների ձեռք բերած ուսումնառության ընդհանրական արդյունքների հետագա բարելավման ուղղությամբ առաջարկվեց  ոլորտը կարգավորող օրենսդրության համաձայն՝ կատարելագործել հարցաշարերը, բարելավել հարցատոմսերը՝ ապահովելով տարբեր դասընթացներին վերաբերող հարցերի համամասնությունը: Ավարտական աշխատանքների իրականացման բարելավման ուղղությամբ առաջարկվեց մեծ ուշադրություն դարձնել աշխատանքների վերլուծական կողմին, խնդիրներին լուծումներ տալու հմտություններին և պրակտիկ մոտեցումներին:

Հանձնաժողովի նախագահի արտահայտած կարծիքի համաձայն՝ ԵՊՀ Իջևանի մասնաճյուղն ամփոփիչ քննության և ավարտական աշխատանքների ու դրանց պաշտպանության մակարդակով, դասախոսական կազմով, ուսանողների առաջադիմությամբ, իր կազմակերպվածությամբ և բուհին ներկայացվող պահանջներով բավարարում է «Սերվիս բակալավր» պատրաստելու պահանջներին և ոլորտում պահանջարկին համապատասխանող կադրեր պատրաստելու զգալի ներուժ ունի:

Մայիսի 28-ին տեղի ունեցավ «Տնտեսագիտության տեսություն» մասնագիտության ամփոփիչ քննությունը:

Հանձնաժողովը գլխավորում է Խ.Աբովյանի անվան հայկական պետական մանկավարժական համալսարանի տնտեսագիտության և կառավարման ամբիոնի պրոֆեսոր, տնտ. դոկտոր Մաքսիմ Տիգրանի Սարգսյանը:

Մասնակցում էր 35 ուսանող, որոնցից «գերազանց» ստացավ 12-ը, «լավ»` 12-ը, «բավարար»` 11-ը:

Մայիսի 29-ին կայացավ «Տնտեսագիտության տեսություն» մասնագիտության ավարտական աշխատանքների պաշտպանությունը:

14 ուսանող ստացավ «գերազանց», 12-ը` «լավ», 9-ը` «բավարար»:

«Տնտեսագիտության տեսություն» մասնագիտության ամփոփիչ ատեստավորման հանձնաժողովը բարձր գնահատեց շրջանավարտների մասնագիտական գիտելիքների իմացության մակարդակը, բավարար համարեց ինքնուրույն մտածելու և արտահայտվելու կարողությունները:

 Շրջանավարտների ձեռք բերած ուսումնառության ընդհանրական արդյունքների հետագա բարելավման ուղղությամբ առաջարկվեց  քննությունները սկսել ավելի վաղ և ապահովել որոշակի ժամանակահատված ամփոփիչ քննության և ավարտական աշխատանքների պաշտպանության միջև: