Մարտի 15-ին մասնաճյուղի մի խումբ ուսանողներ ՀԵՀ Տավուշի մարզային կենտրոնի կամավորների հետ այցելել են Իջևանի պատմաերկրագիտական թանգարան: 

Թանգարանի աշխատակիցները երիտասարդներին ներկայացրին թանգարանային նմուշները, ինչպես նաև այն բացառիկ նմուշները, որոնք գտնվում են միայն Իջևանի թանգարանում:

Պատմաերկրագիտական թանգարանի տնօրեն Ն. Թանանյանը ներկայացրեց մի քանի հետաքրքիր փաստեր ցուցանմուշներից: Թերևս, դրանցից ամենանշանավորն Իջևանի թիվ 4 դպրոցի տարածքում հայտնաբերված դամբարանից վերցված նմուշներն էին:

Ընդհանրապես թիվ 4 դպրոցի, Իջևանի հիվանդանոցի տարածքը Քրիստոսի ծննդից առաջ առաջին հազարամյակի դամբարանադաշտ է, որն ուսումնասիրվել է 1967թ.: Վերջերս նաև նորահայտ դամբարանում հայտնաբերվել են լավ պահպանված բրոնզե թուր, նետերի օբսիդիան ծայրեր, զրահաշապկի բրոնզե կոճակներ և այլն:

Երիտասարդները ծանոթացան Իջևանի տարածքի պատմությանը, մշակույթին և ձեռք բերեցին նոր գիտելիքներ տարածաշրջանի մշակույթի մասին։ Այցելուները գրառումներ կատարեցին պատմաերկրագիտական թանգարանի հուշամատյանում և մեծ ոգևորությամբ հեռացան այնտեղից:

2015-16 ուստարվա երկրորդ կիսամյակում ԵՊՀ ԻՄ-ի «Տնտեսագիտության Տեսություն»  մասնագիտության 3-րդ կուրսի ուսանողները «Ձեռնարկության էկոնոմիկա» դասընթացի շրջանակներում ճանաչողական այց կատարեցին Իջևանի գինու և կոնյակի գործարան:

Ուսանողներին ուղեկցում էր Ընդհանուր տնտեսագիտության ամբիոնի դասախոս, ուսումնական խորհրդատու Անուշ Սարիբեկյանը:

Բարձր մակարդակով կազմակերպված ճանաչողական այցի ընթացքում ուսանողներին դիմավորեց կազմակերպության տեխնոլոգ, շշալցման պատասխանատու Գոհար Թամամյանը:

Նա ուսանողներին  ներկայացրեց արտադրության կազմակերպման գործընթացը,  արտադրական տեխնոլոգիաները, մթերող սարքավորումները, հոսքագծերը, խմիչքների տեսակները, կազմակերպության  ստեղծման  պատմությունը  և  զարգացման  հեռանկարները: Նա նշեց նաև, որ կատարվում են կառուցողական աշխատանքներ, որոնց արդյունքում ավելի շատ խաղող կմթերվի, և կբարելավվի գինու կայունությունը:

Ուսանողներն այցելեցին գինու և կոնյակի մառաններ, իմացան, թե ինչ տեսակի գինիներ են պահվում կարասներում, ինչքան է դրանց հնությունը, և որ երկրներ են դրանք արտահանվում:

Ճանաչողական էքսկուրսիայի ընթացքում  ուսանողները տեղեկացան ոչ միայն արտադրության պրոցեսին և դրա հետ կապված խնդիրներին, այլև իմացան, որ գործարանն ընդլայնել է տեսականին. գինուց և կոնյակից բացի՝ առաջարկում է շուկային օղի և պահածոներ: Արտահանելու նպատակով նմուշներ են ուղարկվել Չինաստան և Ճապոնիա:

Վերջում մեր ուսանողները հնարավորություն ունեցան ներկա գտնվելու օղու շշալցման գործընթացին:

2016թ. մարտի 14-ին ԵՊՀ Իջևանի մասնաճյուղ այցելեցին  “Technology and Science Dynamics” ընկերության ներկայացուցիչները՝ “Technology and Science Dynamics”, “New Technology Education Fund (NTEF) Armenia” ընկերությունների հիմնադիր տնօրեն Վահան Շաքարյանը, նախագծերի համակարգող Շուշանիկ Վարդանյանը, մենեջեր Արփինե Ամիրյանը:

Այցելության հիմնական նպատակն էր համագործակցել ԵՊՀ Իջևանի մասնաճյուղի հետ՝ ուսանողներին ընդգրկելու մարզում ստեղծվելիք Մերգելյան ակումբի գործունեության մեջ, հետագայում նրանցից լավագույններին ապահովելու աշխատանքով:    

Նախ՝ տեղի ունեցավ մասնաճյուղի տնօրեն Ս.Առաքելյանի հետ հանդիպում, որի ընթացքում “Technology and Science Dynamics” ընկերության հիմնադիր տնօրեն Վահան Շաքարյանը ընդհանուր գծերով ներկայացրեց իրենց կազմակերպության գործունեությունը, նպատակը, խնդիրները: Պարոն Շաքարյանը մասնավորապես նշեց, որ “TSD”-ն գիտահետազոտական ընկերություն է, որն զբաղվում է բարձր տեխնոլոգիաների արտադրությամբ: Գիտահետազոտական ծրագրերի շրջանակներում ընկերությունը ձևավորել է «Երիտասարդ հետազոտողների Մերգելյան ակումբ», պլանավորվել է Տավուշի մարզում ևս ձևավորել համապատասխան ակումբ և նրա դասընթացներում ընդգրկել մարզի հիմնական բարձրագույն ուսումնական հաստատության՝ ԵՊՀ ԻՄ-ի ուսանողներին:

Մասնաճյուղի տնօրենը ներկայացրեց ՀՀ հյուսիսարևելյան տարածաշրջանում կրթական և գիտամշակութային գործունեություն իրականացնող ԵՊՀ Իջևանի մասնաճյուղի առաքելության, գործող ֆակուլտետների ու մասնագիտությունների վերաբերյալ ընդհանուր տեղեկատվություն, ուրվագծվեցին համագործակցության եզրերը:

Որպես համագործակցության առաջին քայլ՝ մասնաճյուղի տարբեր մասնագիտությունների (գլխավորապես բնագիտական ուղղվածության) ուսանողների հետ իրականացվեց սեմինար-քննարկում, որի ընթացքում նախաձեռնության պատասխանատուները ներկայացրին իրենց կազմակերպությունը, նրա գործունեության հիմնական ուղղությունները, թողարկվող արտադրանքները («Արմթաբ», «Արմֆոն» բրենդներ և այլն), ցուցադրեցին դրանց մասին պատմող տեսահոլովակներ:

Ուսանողներն ուղղեցին իրենց հետաքրքող հարցերը, ստացան լիարժեք պատասխաններ:

 “TSD” գիտահետազոտական ընկերության ներկայացուցիչների կողմից առաջարկվեց հետաքրքրված ուսանողներից ձևավորել նախնական խումբ և իրենց արտադրամասերի ու Մերգելյան ակումբի գործունեությանը մոտիկից ծանոթանալու նպատակով կազմակերպել ճանաչողական այց: