2015թ. դեկտեմբերի 26-ին ԵՊՀ Իջևանի մասնաճյուղում տեղի ունեցավ Գիտական խորհրդի՝ տարեվերջյան ընդլայնված նիստ, որին ներկա էին մասնաճյուղի աշխատակիցները, ուսանողական խորհրդի և ուսանողական գիտական ընկերության անդամները:

Նիստի ընթացքում մասնաճյուղի գիտխորհրդի նախագահ Ս.Առաքելյանը ներկայացրեց օրակարգով նախատեսված հետևյալ հարցերը.

1. ԵՊՀ ԻՄ-ի` 2011-2015թթ. զարգացման ռազմավարական ծրագրի կատաման մասին:
2. Մասնաճյուղի` 2015թ. եկամուտների և ծախսերի նախահաշվի (բյուջե) հունվար-դեկտեմբեր կատարողականի մասին:
3. ԵՊՀ ԻՄ-ի` 2016թ. եկամուտների և ծախսերի նախահաշվի (բյուջե) հաստատում:
4. Մասնաճյուղի` 2014-15թթ. ուսումնական տարվա գործունեության վերաբերյալ տնօրենի հաշվետվությունը:
5. ԵՊՀ ԻՄ-ի` 2016-2020թթ. զարգացման ռազմավարական ծրագրի քննարկում:
6. Ընթացիկ հարցեր.

• ԵՊՀ Իջևանի մասնաճյուղում ուսանողական նպաստների, պետական և ներբուհական կրթաթոշակների հատկացման կանոնակարգում փոփոխություն կատարելու համար ձևավորված հանձնաժողովի կատարած աշխատանքների մասին:
• Մասնաճյուղում կառուցվածքային փոփոխություններ կատարելու
  նպատակով ստեղծված հանձնաժողովի կատարած աշխատանքների մասին:
• ԵՊՀ ԻՄ-ի զինանշանի, դրոշի, օրհներգի և հուշամեդալի
  էսքիզների պատրաստման նպատակով ստեղծված 
  հանձնաժողովի կատարած աշխատանքների մասին:
• Մասնաճյուղի տնօրենության կանոնակարգում փոփոխություններ կատարելու մասին:

Հատկանշական է, որ նիստի ընթացքում 2011-2015թթ. ԵՊՀ ԻՄ-ի զարգացման ռազմավարական ծրագրով նախատեսված գործողությունների կատարման վիճակը  գնահատվեց լավ:

Հավանություն տրվեց ԵՊՀ ԻՄ-ի` 2014-15թթ. ուսումնական տարվա գործունեության, մասնաճյուղի` 2015թ. եկամուտների և ծախսերի նախահաշվի (բյուջե)՝ հունվար-դեկտեմբեր կատարողականի վերաբերյալ տնօրենի հաշվետվություններին:

Մասնաճյուղի վերոնշյալ հանձնաժողովների կատարած աշխատանքները գնահատվեցին բավարար:

Գիտխորհրդի նախագահ, մասնաճյուղի տնօրեն Ս.Առաքելյանն ամփոփեց 2015 թվականին մասնաճյուղի ունեցած ձեռքբերումներն ու բացթողումնեը:

Նա մասնավորապես նշեց, որ 2011թ.-ից մասնաճյուղն անցել է իր գործունեության ռազմավարական պլանավորմանը՝ հիմք ընդունելով ԵՊՀ-ի զարգացման՝ 2011-15թթ. ռազմավարական ծրագիրը: Մշակվել և հաստատվել է մասնաճյուղի զարգացման՝ 2011-15թթ. ռազմավարական ծրագիրը, որով մասնաճյուղը կրթության բոլոր մակարդակներում հավակնում է`

• ուսումնառությունն իրականացնել բարձրորակ կադրերով, որոնք ունակ կլինեն կրթության մշտական բարեփոխման պայմաններում ակտիվ նորարական գործունեության՝ պահպանելով կրթական բարձր չափանիշներ,
• ապահովել ուսանողակենտրոն ուսումնառություն,
• բավարարել արտաքին և ներքին շահակիցների ներկա և հեռանկարային պահանջմունքները,
• արդիականացնել ուսումնառության նյութական ռեսուրսները և այլն:

ԵՊՀ Իջևանի մասնաճյուղի` 2011-2015թթ. զարգացման ռազմավարական ծրագրի ռազմավարական 8 նպատակների իրականացման համար նախատեսված էր լուծել երկու տասնյակ խնդիր` իրենց 114 գործողություններով:

ԵՊՀ ԻՄ-ի ռազմավարական գործունեության հնգամյա ժամանակաշրջանն ամփոփելով՝ նշեց, որ մասնաճյուղն իր առջև դրված խնդիրների 67%-ն ամբողջությամբ իրականացրել է, 13%-ն իրականացրել է մասնակի, և կան խնդիրներ (20%), որոնց իրականացումը հաշվետու ժամանակահատվածում ներքին և արտաքին մի շարք գործոնների պատճառով հնարավոր չի եղել իրականացնել:

Անդրադարձ կատարելով առանձին նպատակների կատարողականին՝ շեշտեց, որ մասնաճյուղը պատվով և արդյունավետ է իրականցրել իր գերակա նպատակներից 1-ինը («Բարձրորակ կրթություն»), լիարժեք իրականացվել է այդ նպատակով պլանավորված գործողությունների 74%-ը: Այդ նպատակի իրականացման ճանապարհին մասնաճյուղի կարևոր ձեռքբերումներն են` աշխատաշուկայի պահանջներին համահունչ մասնագիտություններով ուսումնառության կազմակերպումը, կրթական վերջնարդյունքներով ձևակերպված և ներդրված 15 կրթական ծրագրերը, կայուն ներդրված որակի ներքին ապահովման գործընթացը, որի գործընթացների շրջանակներում 3 անգամ իրականացվել է մասնաճյուղի ինստիտուցիոնալ կարողությունների ինքնագնահատում և պատրաստվել են համապատասխան զեկույցները (2010-11թթ.՝ պիլոտային, 2013թ.՝ փորձնական, 2015թ.՝ հիմնական), կրեդիտային համակարգի և էլեկտրոնային տեղեկատվական «SuperVision» համակարգի լիարժեք կիրառումը, դասավանդման առաջավոր փորձի փոխանցման և երիտասարդ դասախոսների աջակցման կենտրոնի ստեղծումը, ուսումնական ենթակառուցվածքների բարելավումն ու արդիականացումը:

2-րդ գերակա նպատակը մասնաճյուղում գիտական հետազոտությունների և նորարարության ծավալի մեծացումն ու գիտական ներուժի ներդնումն է: Այստեղ մասնաճյուղը` որպես բակալավրիական կրություն իրականացնող հաստատություն, լուրջ խնդիրներ ունի և այդ նպատակի իրականացման գործողությունների միայն 20%-ն է լիարժեք իրականցրել, ընդ որում` դա սահմանափակվել է միայն դասախոսների գիտական գործունեության աջակցման և խրախուսման մեխանիզմներ ներդնելով, գիտական նստաշրջաններ և գիտաժողովներ կազմակերպելով և «Ակունք» գիտական հոդվածների ժողովածուի հրատարակումներով: 2011-15թթ. ժամանակահատվածում մասնաճյուղի դասախոսների գիտական գործունեության մասին են վկայում հրատարակված 3 դասագրքերը, 17 մենագրությունները, 42 ուսումնական և ուսումնամեթոդական ձեռնարկները, 375 հոդվածները և 22 զեկուցումների թեզիսները, օտարերկրյա միջազգային գրախոսվող 8,  ԱՊՀ երկրներում գրախոսվող 14, Հայաստանյան գրախոսվող 27 մասնագիտական ամսագրերում հրատարակված հոդվածները: Մասնաճյուղի դասախոսները մասնակցել են 13 տարածաշրջանային, 30 հանրապետական և 30 միջազգային գիտաժողովների ու գիտական նստաշրջանների: Նշվածների թվում` 1 միջազգային և 5 հանրապետական գիտաժողովներն անց են կացվել մասնաճյուղում: Այս նպատակի իրականացման շրջանակներում առկա են հետևյալ բացթողումները. հիմնական դասախոսական կազմն ընդգրկված չէ հետազոտական նախագծերում, ուսանողների հետ գրեթե չեն իրականացվում պլանավորված գիտահետազոտական աշխատանքներ, չեն գործում տեղական և միջազգային  դրամաշնորհային ծրագրերի մշակմանն ու իրագործմանը մասնաճյուղի մասնագետների մասնակցության աջակցման մեխանիզմներ:

Մասնաճյուղը բավականին ձեռքբերումներ ունի տարածաշրջանի հասարակության մտավոր, կրթական, տնտեսական, գիտական և մշակութային առաջընթացի աջակցման գործում, որը նրա 3-րդ գերակա նպատակն է: Այս նպատակի իրականացման 12 գործողություններից 6-ը լիարժեք իրականացվել են, մասնավորապես` ԵՊՀ ԻՄ-ն իր ամբողջ գործունեության վերաբերյալ տեղեկատվության մատչելիությունն  ապահովում և թափանցիկ կերպով լուսաբանում է 2011թ. հոկտեմբերից գործող մասնաճյուղի պաշտոնական կայքէջով, համագործակցում է տարբեր լրատավական ծառությունների հետ և միայն 2014-15թթ. նրանց միջոցով լուսաբանվել են մասնաճյուղի 7 իրադարձություններ, 2012-2014թթ.  «Երևանի համալսարան»  ամսաթերթում  տպագրվել է մասնաճյուղի ուսանողական առօրյային, Կիրառական արվեստի ֆակուլտետի ուսանողների աշխատանքների ցուցահանդեսներին, մասնաճյուղում կազմակերպված գիտաժողովներին,  արտասահմանյան բուհերի ներկայացուցիչների այցերին վերաբերող 10 հոդված, 2011 թվականից պարբերաբար իրականացվում են այցելություններ մարզի դպրոցներ, 2014թ. հոկտեմբերից Կիրառական արվեստի ֆակուլտետում «Գծանկար», «Գունանկար», «Կոմպոզիցիա» առարկաներից իրականացվում են նախապատրաստական դասընթացներ և այլն: Այստեղ մասնաճյուղի բացթողումները հիմնականում վերաբերում են հարատև ուսումնառության համակարգի ներդրման հետ կապված գործողություններին:

Անբասիր աշխատանքի համար մասնաճյուղի գիտխորհրդի նիստում ԵՊՀ-ի հուշամեդալով պարգևատրվեցին ՄԿՈԱ բաժնի ավագ մասնագետ Մարիետա Ճաղարյանը, Արտակարգ իրավիճակների, մարմնակրթության և սպորտի ամբիոնի վարիչ, փետրագնդակի միջազգային կարգի սպորտի վարպետ, բազմակի չեմպիոն, Համահայկական 5-րդ և 6-րդ խաղերի ոսկե մեդալակիր (2011 և 2015 թթ.) Վարդիթեր Պողոսյանը: 

ԵԿՄ վարչության նախագահ Մանվել Գրիգորյանի կողմից հուշամեդալ տրվեց զոհված ազատամարտիկի այրի, մասնաճյուղի գրադարանի վարիչ Ալվինա Առուստամյանին:

Տարածաշրջանի հասարակության մտավոր, կրթագիտական, մշակութային առաջընթացին աջակցելու, ռազմահայրենասիրական ոգին բարձրացնելու գործում ԵՊՀ Իջևանի մասնաճյուղի հետ սերտ համագործակցելու համար շնորհակալագրերի արժանացան ՀՀ ՊՆ № զորամասի հրամանատարի տեղակալ Հենրիկ Սահակյանը, Հայ Առաքելական եկեղեցու  Տավուշի թեմի փոխառաջնորդ  Հայր  Սամվել  Մխիթարյանը, Իջևանի ավագ դպրոցի տնօրեն Արմեն Խոջոյանը, ՀՀ ԱԱԾ Տավուշի մարզային վարչության պետի տեղակալ Հովսեփ Մովսեսյանը, «Առաջին լրատվական» ծառայության Տավուշի մարզի թղթակից Գայանե Թամամյանը:

Շնորհակալագրեր տրվեցին և Իջևանի ավագ դպրոցի 11-րդ դասարանի աշակերտներ, մասնաճյուղի աշխատակիցների երեխաներ Արման Բայրամյանին և Անի Մարգարյանին՝ «Արմենիա» հեռուստաընկերության «Ամենախելացի» հեռուստախաղում հաղթելու կապակցությամբ:

Վերջում պարոն Առաքելյանը շնորհավորեց բոլորի Նոր տարին և Սուրբ Ծնունդը, մաղթեց, որ 2016 թվականը լինի նորանոր ձեռքբերումների, խաղաղության, հաջողության, բարեկեցության տարի:

Նիստից հետո տեղի ունեցավ հյուրասիրություն:

2015թ. դեկտեմբերի 25-ին ԵՊՀ Իջևանի մասնաճյուղում անգլերեն լեզվով կայացավ «Սուրբ Ծնունդ և Ամանոր (Christmas and New year)» թեմայով գրական-երաժշտական միջոցառում, որը կազմակերպել էին Հումանիտար գիտությունների ֆակուլտետի oտար լեզուների ամբիոնի դասախոսներ Աստղիկ Սիմոնյանը, Շուշանիկ Գրիգորյանը, Իննեսա Քոչարյանը:

Ամանորյա միջոցառմանը մասնակցում էին «Անգլերեն լեզու և գրականություն» մասնագիտության 1-ին և 2-րդ կուրսերի, «Ֆրանսերեն լեզու և գրականություն» մասնագիտության 2-րդ կուրսի ուսանողները, փոքրիկներ, հյուրեր:

Միջոցառման մասնակիցները ներկայացրին Սուրբ Ծննդի և Ամանորի ավանդույթները աշխարհում, հանդես եկան Նոր տարվան և Սուրբ ծննդին նվիրված անհատական և խմբակային երգերով, բանաստեղծություններով, ներկայացրին իրենց դասախոսի հետ համատեղ երգ, սոցիալական գովազդ և այլն:

Ի՜նչ Նոր տարի` առանց Ձմեռ պապի. ամանորյա միջոցառման ընթացքում հանդես եկավ Ձմեռ պապը, փոքրիկներին հանձնեց նվերներ:

Այնուհետև ելույթ ունեցավ ԵՊՀ ԻՄ-ի ուսանողական խորհրդի նախագահ Ռազմիկ Հովսեփյանը` շնորհակալություն հայտնելով տոնական միջոցառման կազմակերպիչներին ու մասնակիցներին, շնորհավորեց բոլորի  գալիք Ամանորը և Սուրբ Ծնունդը` հղելով բարեմաղթանքներ:

Միջոցառման ամբողջական ծրագիրը տե՛ս այստեղ:

2015թ. դեկտեմբերի 9-19-ը ԵՊՀ ԻՄ-ի մինչհամալսարանական կրթության և պրակտիկայի կազմակերպման (ՄԿՊԿ) բաժինը հանդիպումներ է կազմակերպել Տավուշի մարզի` շուրջ երեք տասնյակ միջնակարգ և ավագ դպրոցներում:

Հանդիպումների նպատակն էր աշակերտներին տալ մասնագիտական կողմնորոշում, ԵՊՀ ԻՄ-ում գործող մասնագիտությունների վերաբերյալ տեղեկատվություն, ամրապնդել դպրոց-համալսարան կապը:

Հանդիպումներին, որոնց մասնակցում էին ՄԿՊԿ բաժնի վարիչ Վ.Աղաբաբյանը, դպրոցների տնօրեններ, ուսուցիչներ, Վ.Աղաբաբյանը ներկայացրել է ԵՊՀ Իջևանի մասնաճյուղի ֆակուլտետները, ամբիոնները, մասնագիտությունները, մասնաճյուղում նախատեսվող նոր կրթական ծրագրերը, միասնական քննությունների առանձնահատկությունները:

 Մասնավորապես նշվել է, որ 2016թ. ԵՊՀ Իջևանի մասնաճյուղը, գործող մասնագիտություններից բացի, ընդունելություն է իրականացնելու 2 նոր` «Տարրական մանկավարժություն և մեթոդիկա», «Համակարգչային գրաֆիկա» մասնագիտություններով: Յուրաքանչյուր մասնագիտության համար ներկայացվել են ընդունելության քննությունների ցանկը, անվճար և վճարովի տեղերը, ուսման վարձաչափերը:

Քննարկվել են ընդունելության քննությունների, շտեմարանների, օլիմպիադաների անցկացման և բաց դռների օրերի հետ կապված մի շարք հարցեր:

Հանդիպումների ընթացքում աշակերտներին հետաքրքրել են գլխավորապես կրթական գործընթացին, ուսման վարձաչափերին, հատկապես սահմանամերձ բնակավայրերի ուսանողների համար նախատեսված զեղչերին ու արտոնություններին, ընդունելության քննությունների մեկ և երկու աստղանիշով առարկաների ընտրությանը վերաբերող հարցեր:

Տարածաշրջանի աշխատաշուկայի պահանջներին համապատասխան կրթական ծրագրեր իրականացնելու հետ մեկտեղ ապագա դիմորդներին հատկապես գրավել է ուսման համեմատաբար մատչելի վարձաչափերի առկայությունը մասնաճյուղում:

2015թ. դեկտեմբերի 19-ին տեղի ունեցավ Տնտեսագիտության ֆակուլտետի գիտական խորհրդի նիստ, որը վարում էր խորհրդի նախագահ, ֆակուլտետի դեկան Ն.Խուդավերդյանը:

Նիստին մասնակցում էին խորհրդի անդամները, հրավիրված էր մասնաճյուղի տնօրեն Ս.Առաքելյանը:

Ֆակուլտետի գիտխորհրդի նիստում դեկանը ներկայացրեց հաշվետվություն` ըստ ԵՊՀ ԻՄ-ի` 2011-2015թթ. զարգացման ռազմավարական ծրագրի, և քննարկվեցին մի շարք ընթացիկ հարցեր:

Մասնավորապես նշվեց, որ ֆակուլտետը,  լինելով տարածաշրջանի  միակ  պետական    տնտեսագիտական  հոսքի  մասնագիտական  կրթօջախը, իր  առաքելությունն  է  համարում աշխատաշուկայում  արդի  պահանջներին  համապատասխան  տնտեսագետ մասնագետների  և  հիմնարար  արժեքների  ապահովումը:

Հաշվետու  ժամանակաշրջանում  ֆակուլտետի  ուսումնական  գործընթացի  կազմակերպումն  իրականացվել  է  ԵՊՀ  Իջևանի  մասնաճյուղի զարգացման` 2011-2015թթ. ռազմավարական  ծրագրին  համահունչ,  իսկ  ֆակուլտետի  ամենամյա  աշխատանքները  պլանավորվել  են  ռազմավարական  ծրագրի  անբաժան  մաս  կազմող  ժամանակացույց-պլանին  համապատասխան:

Ֆակուլտետում գործող  մասնագիտական  ամբիոնների (Ընդհանուր  տնտեսագիտության, Տուրիզմի  կառավարման  և  մշակութաբանության) կողմից   իրականացվել  են  կրթական  ծրագրերի  կառուցվածքային  և  բովանդակային  փոփոխություններ`  ժամանակակից  ծրագրային  չափանիշների  պահանջներին  համապատասխան: Բարձրորակ  կրթություն ապահովելու հետ մեկտեղ ամբիոններն իրականացնում  են  պրոֆեսորադասախոսական  անձնակազմի  արդյունավետ  համալրման  և  մասնագիտական  որակի  հետ  կապված  անհրաժեշտ  քաղաքականության  մշակումն  ու  իրագործումը:

Հաշվետու  ժամանակահատվածում  ամբիոնների  կողմից վերանայվել և  արդիականացվել   են առարկայական  ծրագրերը,  դասընթացների  բովանդակությունը,  վերջնարդյունքների  գնահատման  չափանիշները, ըստ այդմ` ստեղծվել  են առարկայական   փաթեթներ,  որոնք  առավել  պլանվորված  և  վերահսկելի    են  դարձրել  ուսումնական  գործընթացը:

Ֆակուլտետում  ձևավորվել  է  առցանց  լսարան  և  ժամանակակից  համակարգչային  տեխնիկայով  հագեցած  լաբորատորիա, մեծացել  է  դասավանդման  ընթացքում  նոր տեղեկատվական  տեխնոլոգիաներ   կիրառող  դասախոսների  տեսակարար  կշիռը: Այս  ամենը  նպաստել  է  ուսումնական  գործընթացի  արդյունավետության  բարձրացմանը,  ինչի  մասին են վկայում ուսանողների  շրջանում անցկացված  դասավանդման  որակի  և  արդյունավետության  վերաբերյալ  ուսանողական  հարցման  դինամիկ  աճող  գնահատակաները:

Հաշվետու  ժամանակաշրջանում ֆակուլտետում  գրանցվել  է  նաև  գիտական  կյանքի  զգալի  աշխուժացում: Երկու  ամբիոնների  դասախոսների  կողմից    վերջին  հինգ    տարվա  ընթացքում  զգալիորեն  ավելացել  է  տպագրված  հոդվածների,  զեկուցման  թեզիսների,  մենագրությունների  և  ձեռնարկների  թիվը,  պաշտպանվել  է  մեկ  դոկտորական  և  մեկ  թեկնածուկան  թեզ: 

Ֆակուլտետում  ներքին  համատեղությամբ աշխատող  որոշ  դասախոսներ  պարբերաբար  մասնագիտական  ստաժավորում  են    անցնում  արտասահմանյան բուհերում    ու  գիտահետազոտական  կազմակերպություններում  և  ձեռք  բերած  փորձը  ներդնում են նաև ֆակուլտետի  երկու  մասնագիտությունների  գծով  իրականացվող  ուսումնական  գործընթացներում:

Տիկին Խուդավերդյանը ֆակուլտետում  գիտական  հետազոտությունների  և  նորարարությունների  ակտիվացման  առումով շեշտեց, որ Ընդհանուր  տնտեսագիտության ամբիոնի  երկու  աշխատակիցներ  մասնակցել  են  «Միգրացիայի  և  մարդկային  կապիտալի  վերարտադրության  փոխառնչությունները  ՀՀ-ում»  միջազգային  դրամաշնորհային  ծրագրին, որի շրջանակներում  նախաավարտական պրակտիկա  է  անցել  ֆակուլտետի վեց  ուսանող  ու  ստացել  համապատասխան  վկայագիր: Կոլեկտիվ  հետազոտության  արդյունքներն  ամփոփվել  են  մենագրության  ձևով: Տվյալ  ամբիոնի  նախաձեռնությամբ  ու  անմիջական  մասնակցությամբ  կազմակերպվել  է  «Բուհերի  կառավարման  համակարգի  բարելավման  ժամանակակից  հիմնախնդիրները»  թեմայով հանրապետական գիտագործնական  կոնֆերանս,  որի  նյութերը  հրատարակվել  են  գիտական  հոդվածների  ժողովածուի  ձևաչափով:

Տուրիզմի  կառավարման  և  մշակութաբանության ամբիոնի երեք  աշխատակիցներ (Ա.Պոտոսյան,  Վ.Գրիգորյան,  Ա.Ուլիխանյան)  գիտական  զեկուցումներով  հանդես  են  եկել  ԵՊՀ-ի  սոցիալ-տնտեսական  աշխարհագրության    ամբիոնի, ՀՀ  տարածքային  կառավարման  և  արտակարգ  իրավիճակների նախարարության  կողմից  կազմակերպված  հանրապետական  գիտաժողովում: Ամբիոնի ասիստենտ Պ.Ասիլբեկյանը  2014թ.  մասնակցել  է  Գերմանիայի  Դաշնությունում կազմակերպված «Հարավային  Կովկասի  երկրների  համագործակցություն» ծրագրին:

Հանրային  ներգրավման  խնդրի առնչությամբ նշվեց, որ ֆակուլտետի  աշխատակիցները  մասնաճյուղի  կայքէջի  միջոցով ակտիվորեն  մասնակցել  են  ֆակուլտետի  գովազդային, լրատվական, ինչպես  նաև  ավագ  դպրոցներում մասնագիտական  կողմնորոշման  և  ֆակուլտետի  մասնագիտությունների  ներկայացման  աշխատանքներին:

Ֆակուլտետը որակյալ  կադրային  ներուժով  ապահովելու ուղղությամբ ևս     կատարվել են զգալի  աշխատանքներ: Դասախոսների  որակավորման  բարձրացման, մասնագիտական  մակարդակի  կատարելագործման  նպատակով  կազմակերպվել  են  դասընթացներ,  որոնք  ուղղված  են եղել արդյունավետ  և  որակյալ  ուսումնական  գործընթացի  կազմակերպմանը:  Ֆակուլտետի  դասախոսական  կազմը  համալրվել  և  համալրվում  է մայր բուհից հրավիրված  բարձրորակ  կադրերով: Բարելավվել է նաև ֆակուլտետի նյութատեխնիկական բազան:

Զեկուցողը, հաշվետվությունն ամփոփելով, նշեց, որ ֆակուլտետում  աշխատանքներն իրականացվել  են  բարձր  պատասխանատվությամբ  օժտված  աշխատակիցների  միջոցով`  սերտորեն  համագործակցելով  մասնաճյուղի  մյուս  բոլոր ստորաբաժանումների  հետ:

Տնտեսագիտության ֆակուլտետի գիտխորհրդի նիստում ելույթ ունեցավ Տուրիզմի կառավարման և մշակութաբանության ամբիոնի վարիչ Գ.Հովհաննիսյանը` կատարված աշխատանքի և տրված գնահատականի համար շնորհակալություն հայտնելով ֆակուլտետիի և մասնաճյուղի անձնակազմին:

 Նիստը եզրափակեց մասնաճյուղի տնօրեն Ս.Առաքելյանը` բարձր գնահատելով ֆակուլտետի ծավալած գործունեությունը, համակողմանի և հանգամանալից հաշվետվության համար շնորհակալություն հայտնելով ֆակուլտետի գիտխորհրդի նախագահին, ֆակուլտետում և ընդհանրապես մասնաճյուղում կադրային ճիշտ քաղաքականության իմաստով շեշտեց ավագ, միջին և կրտսեր սերնդի ներկայացուցիչների ներգրավվածությունը բուհի ուսումնական գործընթացում:  

2015թ. դեկտեմբերի 17-ին կայացավ ԵՊՀ գիտխորհրդի` այս տարվա վերջին նիստը:

Օրակարգային ինը հարցերից վերջինը վերաբերում էր ԵՊՀ Իջևանի մասնաճյուղին:
Տնօրեն Սամվել Առաքելյանը ներկայացրեց մասնաճյուղի տարեկան գործունեության վերաբերյալ հաշվետվություն:

Ս.Առաքելյանը մասնավորապես նշեց, որ հաշվետու տարում վերանայվել է մասնաճյուղի մասնագիտությունների ցանկը՝ դրանք ավելի համապատասխանեցնելով աշխատաշուկայի պահանջներին:

Համագործակցության հուշագիր է ստորագրվել մարզում գործող քոլեջների, ավագ և հիմնական դպրոցների ու վարժարանների հետ:

«Այս տարի վերջապես հասանք այն արդյունքին, որ դասախոսների 50 տոկոսից ավելին ունեն գիտական կոչումներ»,- ընդգծել է պարոն Առաքելյանը` ավելացնելով, որ մասնաճյուղի դասախոսները, սակայն, քիչ են ներգրավված միջազգային ծրագրերում, և առաջիկայում պետք է ուշադրությունը կենտրոնացնել նաև այդ խնդրի վրա:

Վերջին 1 տարվա ընթացքում տպագրվել է ԵՊՀ Իջևանի մասնաճյուղի դասախոսների հեղինակած 8 մենագրություն, 15 մեթոդական ձեռնարկ և 113 հոդված: