Երևանի պետական համալսարանի Իջևանի մասնաճյուղ

Դպրոցական օլիմպիադայի հաղթողները պարգևատրվեցին

2013թ. ապրիլի 6-ին ԵՊՀ Իջևանի մասնաճյուղում տեղի ունեցավ մարտի 16-ին ԵՊՀ-ի կողմից կազմակերպված դպրոցական օլիմպիադայում հաղթած աշակերտների պարգևատրման արարողությունը:

ԵՊՀ ԻՄ-ի տնօրեն Ս.Առաքելյանը հանդիպեց տարբեր առարկաներից առավել բարձր միավորներ ստացած Տավուշի մարզի դպրոցների 12-րդ դասարանի 16 աշակերտների հետ:

Ներկա էին նաև մասնաճյուղի ուսանողական կառույցների ղեկավարները և Մինչհամալսարանական կրթության և մասնագիտական կողմնորոշման բաժնի վարիչը:

Տնօրենը դպրոցականների հետ խոսեց մասնագիտությունների ընտրության, գիտելիքի կարևորության մասին: Նա շնորհավորեց բոլորին, մաղթեց հաջողություններ և հանձնեց դիպլոմներ ու գովասանագրեր:

Այնուհետև ելույթ ունեցավ մասնաճյուղի ՄԿՄԿ բաժնի վարիչ Վ.Չոբանյանը: Նա ևս շնորհավորեց հաղթողներին, խոսեց ԵՊՀ ԻՄ-ի՝ որպես մարզային բուհի առաքելության և նրա հետ համագործակցության մասին: Վ.Չոբանյանը նշեց, որ առաջիկայում մասնաճյուղում կազմակերպվելու է դպրոցականների ինտելեկտուալ խաղ և կոչ արեց անպայման մասնակցել խաղին:

Ավարտվեց «Բանավիճում ենք հանուն մարդու իրավունքների զարգացման» ծրագիրը

2013թ. ապրիլի 5-ին ՀՀ Մարդու իրավունքների պաշտպանի գրասենյակում կազմակերպված պաշտոնական ընդունելությամբ եզրափակվեց «Բանավիճում ենք հանուն մարդու իրավունքների զարգացման» ծրագիրը:

Ներկա էին Երևանում Բրիտանական դեսպանատան ծրագրերի համակարգող Օլյա Ազատյանը, ՀՀ Մարդու իրավունքների պաշտպանի տեղակալ Գենյա Պետրոսյանը և խորհրդական Տաթևիկ Խաչատրյանը, ՄԱԿ-ի հայկական ասոցացիայի ՀԿ-ի նախագահ Արմինե Պոդոսյանը և գործադիր տնօրեն Արփինե Դանիելյանը:

ՀՀ 5 մարզերում և Երևանում անց էին կացվել 2-ական սեմինարներ, որոնց մասնակցել էին 180 երիտասարդներ: Սեմինարների առավել ակտիվ 30 մասնակիցները մարտի 28-ին մասնակցեցին Երևանում կայացած հեռուստաբանավեճին, որը ցուցադրվեց Երկիր Մեդիա հեռուստաալիքով: Ժյուրին, որի կազմում էին կրթության ոլորտի մասնագետ Անահիտ Բախշյանը, ՀՀ ԱԺ պատգամավոր Էդմոն Մարուքյանը և ՀՀ Մարդու իրավունքների պաշտպանի տեղակալ, խորհրդական Տաթևիկ Խաչատրյանը, ընտրեց 3 լավագույն բանավիճողներին:

ԵՊՀ Իջևանի մասնաճյուղից հեռուստաբանավեճին մասնակցել էին Սլավիկ Ալավերդյանը (ԿՄ/Ֆ 4-րդ), Մելինե Մելիքյանը (ԿՄ/Ֆ 3-րդ) և Արա Հովսեփյանը (ԿՄ/Ֆ 1-ին):

Ընդունելության ժամանակ հեռուստաբանավեճի մասնակիցները ստացան վկայականներ, իսկ հաղթողները՝ խրախուսական մրցանակներ:

Ծրագրին  նպաստելու և աջակցելու համար վկայականներ տրվեցին նաև ՄԻՊ մարզային գրասենյակներին և այն բուհերին, որոնք աջակցել էին ծրագրի իրականացմանը՝ այդ թվում ԵՊՀ Իջևանի մասնաճյուղին:

Ցուցահանդեսի բացումը

2013թ. ապրիլի 4-ին Իջևանի քաղաքային պատկերասրահում տեղի ունեցավ ԵՊՀ ԻՄ-ի կիրառական արվեստի ֆակուլտետի դասախոսների և ուսանողների ստեղծագործությունների ցուցահանդեսի բացումը:

Ներկա էին ԵՊՀ իջևանի մասնաճյուղի վարչական և պրոֆեսորադասախոսական անձնակազմի ներկայացուցիչներ, քաղաքային պատկերասրահի աշխատակիցներ, ուսանողներ, այցելուներ:

Մասնաճյուղի տնօրեն Ս.Առաքելյանը Մայրության և գեղեցկության տոնի կապակցությամբ շնորհավորեց գեղեցիկ սեռի ներկայացուցիչներին, ողջունեց այդ առիթով ցուցահանդեսի կազմակերպումը:

Նա  ցանկություն հայտնեց, որ մայիս ամսին կազմակերպվի Շուշիի ազատագրմանը նվիրված ցուցահանդես, որտեղ դասախոսները և ուսանողները ներկայանան նոր աշխատանքներով (հատկապես բնանկարի ժանրում):

Ելույթ ունեցան նաև քաղաքային պատկերասրահի աշխատակցուհի, մշակութաբան Հ.Էդիլյանը, մասնաճյուղի կիրառական արվեստի ֆակուլտետի դեկան Կ.Այվազյանը:

Կ.Այվազյանն ընդգծեց, որ ցուցահանդեսը բազմաժանր է (գեղանկար, գրաֆիկական աշխատանք, գոբելեն, կոլաժ, բնանկար, նատյուրմորտ): Ներկայացված է 45 աշխատանք:

Ցուցահանդեսը կտևի 1 ամիս:

ԵՊՀ Իջևանի մասնաճյուղում տեղի ունեցավ Կանանց և մայրության միամսյակին նվիրված միջոցառում

2013թ.ապրիլի 4-ին ԵՊՀ Իմ-ի նիստերի դահլիճում տեղի ունեցավ Կանանց և մայրության միամսյակին նվիրված միջոցառում: Այն նախաձեռնել և կազմակերպել էր մասնաճյուղի ուսանողական խորհուրդը՝ նախագահ Վարդան Եգանյանի գլխավորությամբ:

Ներկա էին մասնաճյուղի ֆակուլտետների դեկանները, դասախոսներ, առկա և հեռակա ուսուցման ուսանողներ ու հյուրեր:

Միջոցառման համար ապահովվել էր տոնական մթնոլորտ. դահլիճը զարդարվել էր գեղեցիկ ծաղկեփնջերով ու մոմերով:

Միջոցառումը հագեցած էր գեղարվեստական տարբեր ժանրի կատարումներով: Այն բացվեց ողջույնի գեղեցիկ խոսքով, որից հետո մասնաճյուղի տաղանդավոր ու շնորհալի ուսանողները ներկայացրին ասմունք, երգ, պար:

Տոնական միջոցառումը մեծ բավականություն պարգևեց ներկաներին, նրանց համար վերածվեց իսկական տոնի:

Վերջում խոսքը տրվեց ԵՊՀ Իջևանի մասնաճյուղի տնօրեն Ս.Առաքելյանին:

Մայրության և գեղեցկության տոնի կապակցությամբ նա շնորհավորեց բոլոր մայրերին, կանանց և աղջիկներին, շնորհակալություն հայտնեց մասնաճյուղի ուսանողական խորհրդին՝ հետաքրքիր և բովանդակալից միջոցառման համար:

ԵՊՀ Իջևանի մասնաճյուղում անցկացվեց Ծիծաղի և հումորի միջազգային օրվան նվիրված ակցիա

2013թ. ապրլիի 2-ին ԵՊՀ Իջևանի մասնաճյուղում Կիրառական արվեստի ֆակուլտետի ՈՒԽ-ի գլխավորությամբ անցկացվեց Ծիծաղի և հումորի միջազգային օրվան նվիրված ակցիա, որի ընթացքում ուսանողները շնորհավորեցին մասնաճյուղի մյուս ուսանողնորին և հանձնեցին թռուցիկներ:

Ապրիլի 1-ը ամբողջ աշխարհում տարածված է որպես Ծիծաղի և հումորի օր: Հայաստանում ապրիլի 1-ն ընդունված է համարել «խաբելու օր», սակայն ՀՀ կառավարության` 2006 թվականի փետրվարի 16-ի հատուկ որոշմամբ այն պետականորեն ճանաչվեց որպես Հումորի և երգիծանքի օր:

Այս տոնի արմատները կապված են Նոր տարվա հետ: Եվրոպայում 16-րդ դարի երկրորդ կեսին Ամանորը նշվում էր մարտի վերջերին: Նոր տարվա բուն գալուստը նշանավորվում էր ապրիլի 1-ին: Ավելի ուշ, Ֆրանսիայի թագավորի հրամանով, մարդիկ տարեմուտը սկսել են նշել հունվարի 1-ին: Չնայած այս հանգամանքին՝ որոշ պահպանողական մարդիկ շարունակել են ամանորյա տոները նշել ապրիլի 1-ին, մյուսներն էլ ծիծաղել և ծաղրել են նրանց՝ անվանելով «ապրիլմեկյան հիմարներ»: Զվարճալի խաղարկությունները, միմյանց հոգու հետ խաղալը վերածվեցին բարի ու հաճելի ավանդույթի:

Ծիծաղի և հումորի տոնի ծագման վարկածներից մեկն էլ այն է, որ ապրիլի 1-ը սկզբնապես նշվել է որպես գարնանային գիշերահավասարի օր և Զատիկի շրջան: Այն մշտապես ուղեկցվել է կատակներով, չարաճճիություններով և ուրախությամբ: