2015թ. դեկտեմբերի 16-ին ԵՊՀ Իջևանի մասնաճյուղի շրջանավարտների և կարիերայի կենտրոնի ու Աշխատանքի և սոցիալական հարցերի նախարարության «Մասնագիտական կողմնորոշման մեթոդական կենտրոն» ՊՈԱԿ-ի համագործակցության շրջանակներում իրականացվեց «Մասնագիտական կողմնորոշման նոր քաղաքականություն» թեմայով սեմինար-քննարկում:

Նախաձեռնության նպատակն էր ուսանողներին մասնագիտական կողմնորոշման և կարիերայի վերաբերյալ գիտելիքների տրամադրումը, սոցիալ-աշխատանքային տարբեր իրավիճակներում գտնվող անձանց մասնագիտության արդյունավետ ընտրության, փոփոխության և կարիերայի շարունակական զարգացման հնարավորությունների քննարկումը` նկատի ունենալով մարդու անձնային հատկանիշները և աշխատաշուկայի պահանջարկի փոփոխվող իրավիճակը:

Սեմինար-քննարկումն անցկացվեց երկու` «Անգլերեն լեզու և գրականություն», «Հոգեբանություն և մանկավարժություն» մասնագիտությունների` շուրջ 40 ուսանողների հետ:

Սեմինարի ընթացքում ուսանողներին ներկայացվեցին մասնագիտական կողմորոշման համակարգի ներդրման քաղաքականությունը, ՀՀ կառավարության` 2012թ. հոկտեմբերի 4-ի որոշմամբ հավանության արժանացած ՀՀ մասնագիտական կողմորոշման համակարգի զարգացման հայեցակարգը, դրանից բխող միջոցառումների ծրագիրը, համակարգի հիմնական նպատակը, այն է` անձի հետաքրքրություններին, կարիքներին և առանձնահատկություններին, ինչպես նաև աշխատաշուկայում որակավորված և մրցունակ կադրերի պահանջարկին առավելապես համապատասխանող մասնագիտական գործունեության ազատ և գիտակից ընտրության հնարավորության ստեղծումը ողջ կյանքի ընթացքում:

Քննարկվեց մասնագիտական կողմնորոշման գործընթացի բովանդակությունը` անձի բացահայտում և զարգացում, աշխատանքի դերերի և աշխատանքային հարաբերությունների մասին գիտակցության բարձրացում, կարիերայի կառավարման հմտությունների զարգացում, ձեռնարկատիրական հմտությունների զարգացում:

Տարբերակվեցին մասնագիտական կողմնորոշման աշխատանքները հանրակրթական դպրոցներում, նախնական արհեստագործական, միջին մասնագիտական և բարձրագույն ուսումնական հաստատություններում:

Հետաքրքիր և ուսանելի սեմինար-քննարկման շնորհիվ ուսանողները նոր գիտելիքներ ստացան աշխատանքի և կարիերայի զարգացման, մասնագիտական առանձնահատկությունների վերաբերյալ:

2015թ. դեկտեմբերի 7-19-ը ԵՊՀ Իջևանի մասնաճյուղում (առկա ուսուցման համակարգում) իրականացվում են 2015-2016 ուստարվա առաջին կիսամյակի II ընթացիկ քննություններն ու ստուգումները:

ԵՊՀ ԻՄ-ի ուսումնամեթոդական վարչության պետ Արկադի Դավթյանի խոսքով` քննաշրջանն անցկացվում է սահմանված կարգով, ըստ 2015-2016 ուստարվա առաջին կիսամյակի եզրափակիչ գնահատմամբ դասընթացների ընթացիկ քննությունների և ստուգումների ժամանակացույցների:

Սահմանված կարգի համաձայն` ընթացիկ քննությունների և ստուգումների հարցաշարերը նախապես տրամադրվում են ուսանողներին, կազմված թեստերը ստորագրվում են ամբիոնի վարիչի և կնքվում ֆակուլտետի դեկանի կողմից, ըստ այդմ էլ անցկացվում են քննությունները:

Յուրաքանչյուր քննությունից կամ ստուգումից հետո դասախոսը ուսանողների հետ իրականացնում է քննարկում:

Քննական գործընթացի թափանցիկությունն ու հրապարակայնությունն ապահովելու նպատակով քննությունների արդյունքները փակցվում են ֆակուլտետների ցուցատախտակներին և տեղադրվում են մասնաճյուղի պաշտոնական կայքէջում:

Քննությունների արդյունքները քննարկվում են ֆակուլտետների խորհուրդների և ամբիոնների նիստերում:

2015թ. դեկտեմբերի 10-ին Տավուշի մարզային գրադարանում Սերո Խանզադյանի ստեղծագործությանը նվիրված բաց դաս անցկացրեց Հայոց լեզվի և գրականության ամբիոնի ասիստենտ, բ.գ.թ. Վահան Աղաբաբյանը:

Ներկա էին գրադարանի աշխատակիցները, ընթերցողներ և ուսանողներ:
Բանախոսը ներկայացրեց, որ օրերս լրացել է մեծանուն գրողի ծննդյան 100-րդ տարեդարձը:

Ընդգծվեց, որ Սերո Խանզադյանն այն գրողներից է, որոնց ստեղծագործական որոնումների առանցքում հայրենիքի քաղաքական ճակատագիրն է, որը ձևավորում է նրա աշխարհընկալման մոտիվները, գեղարվեստական վերարտադրման թեման, կերպն ու ոճը, իրադարձությունների հորձանուտում հայտնված անհատի դրաման:

Գծագրվեցին անվանի գրողի հոգևոր կենսատարածքի ու ժամանակային ընդգրկումների սահմանները` հայոց պատմության հին ու նոր շրջաններ, Մեծ եղեռն, խորհրդային կարգերի հաստատում, կուլակաթափություն, հետպատերազմյան կյանքի ծանր օրեր, «ձնհալի» շրջանի հույսերի, սպասումների, լճացման տարիների հուսախաբությունների ու հոգևոր սնանկացման տարիներ, արցախյան գոյամարտ, 1980-90-ականների սկզբի համազգային ոգևորության ու զարթոնքի երանելի ակնթարթներ:

Դրանց յուրաքանչյուր հանգրվանում հայ մարդն է` հողագործը, այգեպանը, անասնապահը, երկրաբանը, մտավորականը` հասարակական տարբեր խավերի աշխատավոր մարդիկ` իրենց առօրյա հոգսերով ու ցավերով, մտահոգություններով ու սպասումներով, նաև ուրախության ու երջանկության կարճատև պահերով:

Նրանք կուլակաթափության տարիների ու ստալինյան դժնդակ ժամանակների զոհերն են, նրանց զավակները, հաշմված ու խեղված մարմնով ու հոգով մարդիկ, պատերազմից հույսերով ու հավատով վերադարձած զինվորներ, ովքեր բախվում են դաժան իրականության հետ ու տառապում թերարժեքության բարդույթներով:

Բնութագրվեցին Խանզադյանի կերտած կերպարները` զարմանալիորեն կենսասեր ու հայրենի հողին արմատներով կապված մարդիկ, որոնց համար հայրենիքը ոչ թե սոսկ ծննդավայր է, աշխարհագրական տեղանք, այլ կայուն ու անբեկանելի արժեհամակարգ, ինքնաճանաչման ու ինքնահաստատման միջոց:

Ս. Խանզադյանի հերոսները, ինչքան էլ դժվարին լինի իրենց ապրած ժամանակներում մնալ անաղարտ ու մաքուր, պահպանում են մարդկայնության` լեռնաշխարհում արմատավորված չափանիշները:

Նրանք, կսկիծն ու ցավը ներսում խեղդած, երբեք չարությամբ չեն լցվում աշխարհի ու մարդկանց նկատմամբ, կյանքի ամենաողբերգական, ծանր պահերին անգամ չեն հուսալքվում, թևաթափ չեն լինում:

Շեշտվեց, որ Ս.Խանզադյանի ստեղծագործություններից շատերը, կենսագրական լինելով հանդերձ, վերաճում են մի ամբողջ ժամանակաշրջանի գեղարվեստական նկարագրի, մի ամբողջ սերնդի պատմության:

Ս. Խանզադյանը գրականություն է բերում Սյունյաց լեռնաշխարհի գույներն ու երանգները, բայց չի կտրվում մեծ աշխարհի անցուդարձից: Մեծ աշխարհը նրա համար ճանաչելի է դառնում հայրենի բնության, այդ բնության մեջ ապրող հասարակ մարդկանց ու նրանց զգացմունքների, նախնականորեն պարզ կենցաղի, վարք ու բարքի միջոցով:

Ս. Խանզադյանի ստեղծագործություններում միահյուսված են պատմական փաստն ու հորինվածքը, լեգենդն ու իրողությունը, դրանց մեջ ավանդականը հանդես է գալիս ոչ միայն որպես բովանդակության տարր, այլ որպես ներքին ձևի հատկանիշ:

Վերջում ծավալվեց հետաքրքիր քննարկում:

Ներկաները ողջունեցին նման նախաձեռնությունը, ներկայացրին Ս.Խանզադյանի մասին հուշեր, արժևորեցին նրա ստեղծագործությունները: