2015թ. նոյեմբերի 3-ին «Սերվիս» մասնագիտության IV կուրսի ուսանողները «Հյուրանոցային և ռեստորանային մարքեթինգ» դասընթացի շրջանակներում այցելեցին Ենոքավան համայնքում գործող հյուրանոցային համալիր: 

Այցի նպատակն էր տեսական գիտելիքները կիրառել գործնականում` կատարել դաշտային հետազոտություն և ստանալ հետևյալ հարցերի պատասխանները.

• ինչպիսի՞ն է հյուրանոցային և ռեստորանային ծառայությունների պահանջարկը,

• ի՞նչ ծառայություններ են մատուցվում. դրանց իրականացման ձևերը,

• ո՞րն է բիզնեսի նպատակային շուկան,

• ի՞նչ գնային քաղաքականություն է կիրառվում,

• ինչպիսի՞ն է մրցակցային դաշտը,

• որքա՞ն է մարքեթինգային բյուջեն,

• ի՞նչ մարքեթինգային ռազմավարությամբ է առաջնորդվում բիզնեսը,

• զարգացման ի՞նչ հեռանկարներ կան:

Ուսանողներին դիմավորեցին համալիրի տնօրենը̀ Տիգրան Չիբուխչյանը, երկու աշխատակիցներ̀ Արամն ու Նարեկը (նա, ի դեպ, ԵՊՀ ԻՄ-ի շրջանավարտ է):

Նրանք նախ ուսանողներին ներկայացրին համալիրի լյուքս, դելյուքս և ստանդարտ տիպի հյուրատները, նրանց հիմնական տարբերությունները, գները և լրացուցիչ ծառայությունները̀ ձիարշավներ, երեկոյան խարույկ, ձկնորսություն, սպորտային խաղեր, այցելություն մարզի տեսարժան վայրեր, ինչպես նաև սեփական արտադրության կաթնամթերք և մսամթերք (էկոսնունդ):

 Յուրաքանչյուր հյուրատան բաց պատշգամբից բացվում էր աշնանային հիասքանչ բնապատկեր:

Պարոն Չիբուխչյանը նշեց, որ համալիրն ընդգրկում է էկո, գյուղական, ռեկրեացիոն և էքստրեմալ տուրիզմի ձևերը, ներկայացրեց նոր` “Zip Line” ծառայությունը, որն առաջինն է ՀՀ-ում:

Նա անակնկալ մատուցեց ուսանողներին` որպես համալսարանից առաջին այցելուների` հնարավորություն տալով նրանց օգտվել ծառայությունից:

Այցելության վերջում համալիրի տնօրենը կատարեց մի քանի գործնական առաջարկ.

• բիզնես համագործակցություն,

• աշխատատեղ (գիդ, մենեջեր, մատուցող, նկարիչ),

• տուրիստական ծառայությունների ոլորտում կարևոր չորս համակարգչային ծրագրերի ուսուցում համալսարանում և ապագա մենեջերների պատրաստում:

Դեպի «Ապագա Տուր» կատարած այցելությունից ուսանողները վերադարձան հաճելի տպավորություններով, հյուրանոցային տնտեսությանը և ընդհանրապես զբոսաշրջությանը վերաբերող օգտակար գիտելիքներով ու գործնական հմտություններով:

2015թ. նոյեմբերի 3-ին ԵՊՀ ԻՄ-ի տնօրեն Սամվել Առաքելյանը հեռակա ուսուցման դասերի մեկնարկի կապակցությամբ հանդիպեց Հեռակա ուսուցման բաժնի ուսանողների հետ:

2015-2016 ուսումնական տարում մասնաճյուղն ընդունեց հեռակա ուսուցմամբ 199 առաջին կուրսեցիների: 

Հանդիպմանը ներկա էին Հեռակա ուսուցման բաժնի աշխատակիցները` Մ.Զուրաբյանի գլխավորությամբ, Անձնակազմի կառավարման բաժնի վարիչ Ա.Հովհաննիսյանը, մասնաճյուղի դասախոսներ, ուսանողներ:

Հանդիպման ընթացքում մասնաճյուղի տնօրեն Ս.Առաքելյանը հեռակա ուսուցման համակարգի ուսանողներին և մասնավորապես առաջին կուրսեցիներին շնորհավորեց նոր ուսումնական տարվա կապակցությամբ, նրանց մաղթեց, որ լինեն ուսումնատենչ, աշխատասեր, նպատակասլաց, դառնան երկրի օրինավոր քաղաքացիներ ու հայրենիքի արժանավոր զավակներ:

Տնօրենն ընդգծեց նաև, որ յուրաքանչյուր բուհի գնահատականը նրա շրջանավարտներն են: Իր 20-ամյա գործունեության ընթացքում ԵՊՀ Իջևանի մասնաճյուղը տվել է շուրջ 4000 շրջանավարտ, որոնց մեծամասնությունը հաջողությամբ աշխատում է հասարակական կյանքի տարբեր ոլորտներում, պետական և հանրային կառույցներում, բանկային համակարգում և այլն:

Շուրջ մեկ տասնյակ շրջանավարտներ պաշտպանել են թեկնածուական ատենախոսություն և աշխատում են մասնաճյուղում:

Նա ուսանողներին ևս մեկ անգամ կոչ արեց ակտիվորեն մասնակցել ուսանողական նախաձեռնություններին, դառնալ համալսարանական միջավայրի լիիրավ ներկայացուցիչներ, հպարտությամբ կրել ԵՊՀ ԻՄ-ի ուսանող լինելու պատիվն ու պատասխանատվությունը:

2015թ. հոկտեմբերի 31-ին ԵՊՀ Իջևանի մասնաճյուղում տեղի ունեցավ գիտական խորհրդի նիստ` մասնաճյուղի տնօրեն, գիտական խորհրդի նախագահ Ս.Առաքելյանի նախագահությամբ:

Գիտխորհրդի նիստում քննարկվեցին ԵՊՀ ԻՄ-ի` 2016-2020թթ. ռազմավարական ծրագրի նախագիծը, Հայոց լեզվի և գրականության ամբիոնի ասիստենտ, բ.գ.թ. Գ.Մկրտչյանին ԵՊՀ գիտխորհրդում դոցենտի գիտական կոչման համար երաշխավորելու հարցը, մասնաճյուղի մեթոդական խորհրդի և գիտական խորհրդին կից որակի կառավարման հանձնաժողովի կազմերում փոփոխություններ կատարելու վերաբերյալ մի շարք հարցեր:

 Ընթացիկ հարցերից հատկանշական են ԵՊՀ ԻՄ-ի կառուցվածքում, մասնաճյուղի ուսանողական նպաստների, պետական և ներբուհական կրթաթոշակների հատկացման կանոնակարգում փոփոխություններ կատարելու, ԵՊՀ ԻՄ-ի գերբի, դրոշի, օրհներգի և ոսկե մեդալի նախագծերն ու էսքիզները նախապատրաստելու մասին հարցերը, որոնց կապակցությամբ որոշվեց ստեղծել համապատասխան հանձնաժողովներ և նրանց աշխատանքներն ամփոփել մասնաճյուղի գիտխորհրդի տարեվերջյան նիստում:

Նիստի ընթացքում հաստատվեցին ԵՊՀ ԻՄ-ի գիտական խորհրդի նոր կանոնակարգը և մասնաճյուղի ֆակուլտետների նոր
կանոնադրությունները:

Ս.թ. հոկտեմբերի 30-31-ը ԵՊՀ Իջևանի մասնաճյուղում կայացավ 2015թ. հեռակա ընդունելության` օտարերկրյա դիմորդների համար նախատեսված մրցույթը, որին մասնակցում էին Վրաստանի Հանրապետության յոթ քաղաքացիներ:

Նրանք մասնաճյուղ էին դիմել` սովորելու «Տնտեսագիտության տեսություն» մասնագիտությամբ:

Հեռակա ընդունելության մրցույթն անցկացվեց «Մաթեմատիկա», «Ռուսաց լեզու» և «Անգլերեն» առարկաներից:

«Մաթեմատիկա» առարկայի քննության հանձնաժողովը գլխավորում էր Բնական գիտությունների ֆակուլտետի դեկան, ֆ.մ.գ.թ., դոցենտ Մ.Զաքարյանը:

«Ռուսաց լեզու» առարկայի քննության հանձնաժողովը գլխավորում էր Օտար լեզուների ամբիոնի ասիստենտ, բ.գ.թ. Ա.Այդինյանը:

«Անգլերեն» առարկայի քննության հանձնաժողովը գլխավորում էր Օտար լեզուների ամբիոնի դոցենտ, բ.գ.թ. Տ.Խառատյանը:

Մրցույթի նվազագույն շեմը հաղթահարեցին բոլոր դիմորդները:

Քննական հանձնաժողովների նախագահները փաստեցին, որ դիմորդների պատրաստվածության մակարդակը բավարար էր, քննությունները կազմակերպված էին սահմանված կարգով:

2015թ. հոկտեմբերի 29-ին տեղի ունեցավ բնական գիտությունների ֆակուլտետի գիտական խորհրդի նիստ, որը վարում էր խորհրդի նախագահ, ֆակուլտետի դեկանի ժ/պ Մ. Ա. Զաքարյանը: 

Նիստին մասնակցում էին խորհրդի անդամները, հրավիրված էր մասնաճյուղի գիտական խորհրդի քարտուղար Մ. Ս. Աթոյանը:

Ֆակուլտետի գիտխորհրդի նիստում քննարկվեցին ֆակուլտետի կանոնադրության հաստատմանը, 2015-16 ուստարվա I կիսամյակի I ընթացիկ քննությունների և ստուգումների արդյունքներին, ֆակուլտետում ինֆորմացիոն տեխնոլոգիաների արդյունավետ օգտագործմանը վերաբերող մի շարք հարցեր:

Նիստի ընթացքում որոշվեց ֆակուլտետի կանոնադրությունը ներկայացնել մասնաճյուղի գիտական խորհրդի հաստատմանը, ամփոփվեցին 2015-16 ուստարվա I կիսամյակի I ընթացիկ քննությունների և ստուգումների արդյունքները, ֆակուլտետում ինֆորմացիոն տեխնոլոգիաների արդյունավետ օգտագործման վիճակը գնահատվեց բավարար: