2015թ. հոկտեմբերի 20-29-ը Իջևան քաղաքի մարզադահլիճում կայացավ Իջևանի ուսումնական հաստատությունների` ֆուտբոլի առաջնություն, որը կազմակերպվել էր «ՆԻԿԱՐՄ» ակումբի տնօրեն Արմեն Խաչատրյանի կողմից: 

Այն կրում էր «Ազգային ժողովի պատգամավոր Հակոբ Հակոբյանի գավաթ» անունը:

Առաջնությանը մասնակցում էին Իջևանի ուսումնական հաստատությունների տարբեր տարիքային թիմեր:

ԵՊՀ Իջևանի մասնաճյուղի ֆուտբոլի հավաքականը կիսաեզրափակիչում հանդիպեց Իջևանի վարժարանի թիմի հետ և 8:4 հաշվով հաղթեց:

Եզրափակիչում մասնաճյուղի հավաքականը հանդիպեց Տավուշի տարածաշրջանային պետական քոլեջի հետ և հաղթեց 9:3 հաշվով:

Գրավելով առաջին տեղը` ԵՊՀ ԻՄ-ի հավաքականի տղաները` Վահե Վարշամյանը, Էդգար Խոջայանը, Տիգրան Հարությունյանը, Վրեժ Սարհատյանը, Էդմոն Ավետիսյանը և Վարդան Մալխասյանը պարգևատրվեցին գավաթով, պատվոգրով և մեդալներով:

Առաջնության լավագույն ռմբարկու ճանաչվեց մասնաճյուղի ֆուտբոլի հավաքականի անդամ, «Պատմություն» մասնագիտության II կուրսի ուսանող Էդգար Խոջայանը:

Լավագույն պաշտպան ճանաչվեց Հեռակա ուսուցման բաժնի «Պատմություն» մասնագիտության IV կուրսի ուսանող Վրեժ Սարհատյանը:

Հուշանվերների արժանացավ թիմի մարզիչ Վարդիթեր Պողոսյանը:

Թիմի մասնակցությանն աջակցելու համար «ՆԻԿԱՐՄ» ակումբի կողմից շնորհակալագիր տրվեց ԵՊՀ Իջևանի մասնաճյուղի տնօրեն Ս.Առաքելյանին:

2015թ. հոկտեմբերի 12-31-ը մասնաճյուղում (առկա ուսուցման համակարգում) իրականացվում են ԵՊՀ դասավանդման որակի և արդյունավետության վերաբերյալ ուսանողական հարցումներ:

2009 թվականից ի վեր` յուրաքանչյուր կիսամյակ, մասնաճյուղում ԵՊՀ ռեկտորատի կողմից անց է կացվում այս հարցումը, որի միջոցով պարզվում և ուսումնասիրվում է դասախոսների դասավանդման մեթոդների, որակի, մասնագիտական կոմպետեցիաների վերաբերյալ ուսանողների կարծիքը:

Գնահատումը ուսանողներն իրականացնում են 5 միավորից բաղկացած սանդղակով:

Հարցաթերթի «Կարծիքներ և առաջարկներ» բաժնում նրանք ներկայացնում են մասնագիտական առարկաների, գործնական և սեմինար պարապմունքների ժամաքանակների ավելացմանը, գնահատման համակարգերին, մասնագիտական գրականության ավելացմանը, լաբորատորիաների` սարքավորումներով հարստացմանը, պրակտիկայի անցկացման արդյունավետությանը և այլնին վերաբերող առաջարկություններ, վեր են հանում իրենց կրթական կարիքները:

ԵՊՀ ԻՄ-ի ուսումնամեթոդական վարչությունը ուսանողական հարցման արդյունքները համապատասխան ձևաչափով ներկայացնում է ֆակուլտետի դեկանին, իսկ վերջինս էլ երեք օրվա ընթացքում դրանք տրամադրում է համապատասխան ամբիոնների վարիչներին:

Ուսանողական հարցման արդյունքները ստանալուց հետո երկու շաբաթվա ընթացքում համապատասխան ամբիոնի վարիչը հատուկ այդ նպատակով հրավիրված ամբիոնի նիստում կազմակերպում է դրանց քննարկումը:

Հարցման արդյունքները քննարկվում են նաև ֆակուլտետի գիտական խորհրդի նիստում:

Քննարկման արդյունքում մշակվում են համապատասխան առաջարկություններ և երաշխավորություններ` ուղղված դասախոսի դասավանդման որակի բարելավմանը:

2015թ. հոկտեմբերի 21-ին ԵՊՀ Իջևանի մասնաճյուղում տեղի ունեցավ հանդիպում Դիլիջանի միջազգային դպրոցի (Dilijan International School) սաների հետ:

Հանդիպումը կազմակերպվել էր Դիլիջանի միջազգային դպրոցի նախաձեռնությամբ և նպատակ ուներ աշխարհի 12 երկրներից դպրոցում ուսանող աշակերտներին մոտիկից, տեղում ծանոթացնելու երկրի մշակույթին, պատմությանն ու մարդկանց:

Հանդիպման ընթացքում մասնաճյուղի տնօրեն Ս.Առաքելյանը ողջունեց Դիլիջանի միջազգային դպրոցի նման նախաձեռնությունը, աշակերտներին ընդհանուր գծերով ներկայացրեց ՀՀ հյուսիսարևելյան տարածաշրջանում կրթական և գիտամշակութային գործունեություն իրականացնող ԵՊՀ Իջևանի մասնաճյուղի առաքելությունը, հիմնարար արժեքներն ու ռազմավարական նպատակները:

Տնօրենը պատասխանեց աշակերտներին հուզող հարցերին, որոնք հիմնականում վերաբերում էին մասնաճյուղում գործող ֆակուլտետներին ու մասնագիտություններին, ընդունելության կարգին, այլ երկրներից մասնաճյուղում ուսանելու հնարավորությանը:

Մասնակիցների հարցերի ու պատասխանների միջոցով ծավալվեց հետաքրքիր քննարկում:

Դպրոց-համալսարան կապն ու համագործակցությունը սերտացնելու նպատակով Ս.Առաքելյանը առաջարկեց հետագայում անգլերեն լեզվով կազմակերպել կլոր սեղան-քննարկում ԵՊՀ Իջևանի մասնաճյուղի և Դիլիջանի միջազգային դպրոցի սաների մասնակցությամբ, նա պատրաստակամություն հայտնեց հանդես գալու ակնարկային դասախոսություններով:

Հանդիպման վերջում մասնաճյուղի տնօրենը Դիլիջանի միջազգային դպրոցի աշակերտներին մաղթեց, որ Հայաստանում ստացած գիտելիքները նպատակային օգտագործեն իրենց երկրներում:

2015թ. հոկտեմբերի 17-ին ԵՊՀ Իջևանի մասնաճյուղում տեղի ունեցավ Հումանիտար գիտությունների ֆակուլտետի գիտական խորհրդի նիստ, որին մասնակցում էին ֆակուլտետի գիտական խորհրդի անդամները` ֆակուլտետի դեկան, պատմ. գիտ. թեկնածու, դոցենտ Վ.Ալեքսանյանի նախագահությամբ:

Ֆակուլտետի գիտական խորհրդի նիստում քննարկվեցին 2016 թվականին Հումանիտար գիտությունների ֆակուլտետի կառուցվածքում ներդրվող «Սոցիալական աշխատանք» և «Տարրական մանկավարժություն» կրթական ծրագրերի ուսումնական պլաններին, 2015-2016 ուստարվա 1-ին միջանկյալ քննությունների ընթացքին վերաբերող մի շարք հարցեր:

2016-2017 ուստարում Հումանիտար գիտությունների ֆակուլտետի կառուցվածքում ներդրվող «Սոցիալական աշխատանք» և «Տարրական մանկավարժություն» կրթական ծրագրերի վերաբերյալ նշվեց, որ այդ երկու նոր մասնագիտությունները ԵՊՀ ԻՄ-ում ներդնելիս հաշվի են առնվել մասնագետների, արտաքին շահակիցների, մարզի կրթության ոլորտի պատասխանատուների կարծիքները ՀՀ-ի և հատկապես տարածաշրջանի աշխատաշուկայում դրանց ունեցած մեծ պահանջարկի վերաբերյալ:

«Տարրական մանկավարժություն» մասնագիտության հետ կապված` մասնավորապես նշվեց, որ մարզի տարրական դասարաններում առկա է դասավանդողների խիստ պակաս:

«Սոցիալական աշխատանք» մասնագիտության կապակցությամբ ԵՊՀ ԻՄ-ի արտաքին շահակից, «ՍՕՍ» մանկական գյուղ «Իջևան» ծրագրի տնօրեն Սպարտակ Սարգսյանը նշեց, որ այսօր նկատելի է սոցիալական աշխատողի դերի բարձրացում: Իջևանում և հարակից գյուղերում ներկայումս կա 388 երեխա, 151 ընտանիք, որոնց հետ կատարվում է սոցիալական աշխատանք:

Կատարված ուսումնասիրությունները ցույց են տալիս, որ մարզին անհրաժեշտ են բազային կրթություն ունեցող որակյալ կադրեր սոցիալական աշխատանքի ոլորտում:

Նշվեց նաև, որ «Սոցիալական աշխատանք» կրթական ծրագիրը կիրականացվի տեղի և ԵՊՀ-ից հրավիրված մասնագետների ուժերով:

Այսպիսով` նիստի ընթացքում հաստատվեցին 2016թ. Հումանիտար գիտությունների ֆակուլտետի կառուցվածքում ներդրվող «Սոցիալական աշխատանք» և «Տարրական մանկավարժություն» կրթական ծրագրերի ուսումնական պլանները:

2015-2016 ուստարվա 1-ին միջանկյալ քննությունների ընթացքը գնահատվեց բավարար: